Oʻzbekiston Respublikasi Vazirlar Mahkamasining
qarori
YONILGʻI-MOYLASH MATERIALLARI SOTISHNI TARTIBGA SOLISH TOʻGʻRISIDA
Yonilgʻi-moylash materiallari berishni tartibga solish, yongʻinga qarshi qoidalar buzilishining, shuningdek, aholi hayoti va salomatligi uchun xavf tugʻdiradigan xatti-harakatlarning oldini olish maqsadida Vazirlar Mahkamasi qaror qiladi:
1. Yonilgʻi-moylash materiallarini faqat belgilangan tartibda maxsus jihozlangan statsionar, koʻchma, konteynerli avtoyonilgʻi quyish shoxobchalarida sotishga ruxsat etilsin.
2. Oʻzbekiston Respublikasi Ichki ishlar vazirligi yonilgʻi-moylash materiallarini belgilanmagan joylarda va yongʻinga qarshi qoidalarni buzgan holda sotish hollarini qatʼiy bartaraf etsin. Ushbu qoidalarga rioya qilmagan shaxslarga nisbatan materiallarni oʻz vaqtida rasmiylashtirsin va ularni javobgarlikka tortish uchun tegishli organlarga topshirsin.
3. Oʻzbekiston Respublikasi Davlat soliq qoʻmitasi oʻziga berilgan huquqlardan keng foydalangan holda, foyda (daromadlar)ni yashirib qolish hollarini aniqlasin, buxgalteriya hisobotlarini belgilangan tartibga xilof ravishda kechiktirib topshirishda va maʼlumotlarni buzib koʻrsatishda aybdor boʻlgan shaxslarga nisbatan qonunchilikka muvofiq oʻz vaqtida taʼsir oʻtkazish choralarini koʻrsin.
4. Avtoyonilgʻi quyish shoxobchalarining ishlash Qoidalari tasdiqlansin (ilova qilinmoqda).
5. “Oʻzdavneftmahsulot” davlat-aksionerlik birlashmasi, respublika vazirliklari, idoralari, korporatsiyalari, uyushmalari, tashkilotlari neft mahsulotlarini qabul qilish, saqlash, hisobga olish, tashish, berish va ulardan foydalanish boʻyicha amaldagi qoidalar, normativlar hamda standartlarga rioya etilishi ustidan qatʼiy nazoratni taʼminlasinlar.
6. “Oʻzbekneftgaz” milliy korporatsiyasi neft mahsulotlarini saqlash va ulardan foydalanish qoidalarini buzganlik uchun iqtisodiy jazolarning samarali qoʻllanishini belgilangan tartibda taʼminlasin.
7. Mazkur qarorning bajarilishini nazorat qilish Bosh vazirning oʻrinbosari Q.J. Haqqulov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1994-yil 6-may,
240-son
Vazirlar Mahkamasining
1994-yil 6-maydagi 240-son qaroriga
ILOVA
Avtoyonilgʻi quyish shoxobchalarining ishlash
QOIDALARI
1. Avtoyonilgʻi quyish shoxobchalari (AYQSH) transport vositalariga neft mahsulotlari qoʻyishga moʻljallangan. Baʼzi AYQSHlarda avtomobillar uchun moy, surkaladigan konsistent moddalar, avtomobillar va boshqa transport vositalari uchun ehtiyot qismlar va jihozlar sotish, shaxsiy transport egalaridan ishlatilgan moylarni va neft mahsulotlaridan boʻshagan kichik idishlarni qabul qilib olish, texnika xizmati koʻrsatish, avtomobillarni yuvish va aholiga boshqa xil xizmatlar koʻrsatish tashkil etiladi.
2. AYQSHlar statsionar, koʻchma (KAYOQSH), konteynerli (KAYOQSH va blok-punkt)larga boʻlinadi. Statsionar AYQSHlar shaharlarda va aholi yashaydigan joylarda, shuningdek, avtomobil yoʻllarida joylashadi. Koʻchma AYQSH (KAYOQSH) avtotransport, qishloq xoʻjaligi texnikasi, motorli qayiqlar va katerlar toʻplanadigan joylarda, dala sharoitlarida, turistik avtoyoʻnalishlarda, rezervuarlarni tozalash va tuzatish davrida statsionar AYQSHlar hududlarida joylashtiriladi. Ular avtomobil va tirkama texnika shassilariga oʻrnatiladi.
Konteynerli AYQSH katta avtoyoʻllarda, turistik avtoyoʻnalishlarda, avtomobil xoʻjaliklarida, sanoat va qishloq xoʻjaligi korxonalarida, pulli avtomobil toʻxtash joylarida, garaj kooperativlarida, shuningdek, avtomobil transporti koʻplab toʻplanadigan joylarda joylashtiriladi.
Oldingi tahrirga qarang.
Barcha AYQSHlar nazorat-kassa apparatlari bilan taʼminlangan boʻlishi kerak.
(2-band Oʻzbekiston Respublikasi Vazirlar Mahkamasining 1999-yil 8-fevraldagi 59-sonli qaroriga muvofiq uchinchi xatboshi bilan toʻldirilgan)
3. Shaxsiy transportga xizmat koʻrsatish uchun alohida AYQSH belgilanadi.
4. Neft mahsulotlari AYQSHlarga avtomobil va temir yoʻl transportida yetkazib beriladi.
5. Umumiy foydalanishdan AYQSH “Oʻzdavneftmahsulot” birlashmasining hududiy organlariga, tashkilotlarga qarashli AYQSHlar esa tegishli vazirliklar va idoralarga boʻysunadi.
6. Statsionar va konteynerli AYQSHga boshliq, master yoki AYQSH operatorlaridan biri, koʻchma AYQSHga esa haydovchi-yonilgʻi quyuvchi rahbarlik qiladi.
7. Operatorlar va haydovchi-yonilgʻi quyuvchilar moddiy javobgar shaxslar hisoblanadilar, ular bilan jamoa (brigada) javobgarligi yoki shaxsan moddiy javobgarlik toʻgʻrisida shartnomalar tuziladi.
Oldingi tahrirga qarang.
(8-band Oʻzbekiston Respublikasi Vazirlar Mahkamasining 1998-yil 18-sentabrdagi 397-sonli qarori bilan oʻz kuchini yoʻqotdi)
9. Har bir AYQSHda neft mahsulotlarini hisobga olish massa va hajm birliklarida yuritiladi. Neft mahsulotlari massasini oʻlchashning ishonchliligini va bir xilligini, shuningdek, ularning sifati nazorat qilinishini taʼminlash uchun AYQSH “Oʻzdavstandart” markazi tomonidan qoʻllashga ruxsat berilgan hamda Davlat metrologiya xizmatining tamgʻasiga yoki pasportda tegishli belgiga ega boʻlgan zarur asbob-uskunalar va oʻlchov vositalariga ega boʻlishi kerak.
10. Har bir AYQSHda quyidagi hujjatlar boʻlishi kerak:
texnologik va elektr sxemalari mavjud boʻlgan AYQSH pasporti;
formulyarlar va yonilgʻi hamda moy quyish kolonkalarining texnik bayoni;
rezervuarlarning pasportlari;
rezervuarlarning graduslarga boʻlingan jadvallari;
AYQSHdan texnik foydalanish qoidalari;
Oldingi tahrirga qarang.
tarqatish vedomostlari va limit daftarchalari boʻyicha avtotransport vositalariga yonilgʻi qoʻyish uchun neft mahsulotlari, suyultirilgan va tabiiy gazni berish tartibi (“Oʻzneftmahsulot” aksiyadorlik kompaniyasi AYQSHlar uchun;
(10-bandning yettinchi xatboshisi Oʻzbekiston Respublikasi Vazirlar Mahkamasining 1999-yil 8-fevraldagi 59-sonli qarori tahririda)
xavfsizlik texnikasi va yongʻin xavfsizligi boʻyicha yoʻriqnoma;
tozalash inshootlaridan foydalanish boʻyicha yoʻriqnoma (tozalash inshootlari boʻlgan AYQSHlar uchun);
ishlatilgan neft mahsulotlarini toʻplash boʻyicha yoʻriqnoma (ishlatilgan neft mahsulotlarini toʻplashni amalga oshiruvchi AYQSHlar uchun);
Oldingi tahrirga qarang.
(10-bandning oʻn birinchi xatboshi Oʻzbekiston Respublikasi Vazirlar Mahkamasining 1999-yil 8-fevraldagi 59-sonli qarori bilan oʻz kuchini yoʻqotgan.)
servis daftarchalari kvitansiyalari namunalari (xorijlik transport vositalarining egalariga xizmat koʻrsatuvchi AYQSHlar uchun);
neft mahsulotlarining chakana narxlari preyskurantlari (neft mahsulotlarini naqd pulga beruvchi AYQSHlar uchun);
smena hisoboti;
idishlarga quyilgan neft mahsulotlari, avtomobillar uchun ehtiyot qismlar harakatini hisobga olish daftari;
Oldingi tahrirga qarang.
(10-bandning oʻn oltinchi xatboshi Oʻzbekiston Respublikasi Vazirlar Mahkamasining 1999-yil 8-fevraldagi 59-sonli qarori bilan oʻz kuchini yoʻqotgan.)
neft mahsulotlarini kredit kartalari boʻyicha berish va ularga haq toʻlash tartibi toʻgʻrisida yoʻriqnoma (neft mahsulotlarini kredit kartalari boʻyicha beruvchi AYQSHlar uchun);
keltirilgan neft mahsulotlarini hisobga olish jurnali;
oʻlchov vositalarini tekshirish jadvali;
asbob-uskunalar, jihozlar va mol-mulkni hisobga olish jurnali;
AYQSH xodimlarining lavozim yoʻriqnomasi;
AYQSHning oʻlchov vositalari bilan jihozlanganlik roʻyxati;
shikoyatlar va takliflar daftari.
11. AYQSHning oʻlchov, texnik xizmat koʻrsatish vositalari bilan jihozlanganligi, ularni ishlatish, saqlash va asrash tartibi AYQSHning oʻlchov vositalari bilan jihozlanganlik roʻyxatiga muvofiq amalga oshirilishi kerak.
12. AYQSHda navbatchi operatorning familiyasi, AYQSHning neft mahsulotlarini berish tartibi albatta koʻrsatilgan ish vaqti, yaqin orada joylashgan AYQSHlar sxemalari koʻrsatilgan taxtachalar osib qoʻyilgan boʻlishi kerak.
13. AYQSH badiiy jihatdan bezatilgan peshlavhalar, reklamalar, koʻrgazmali tashviqot vositalari bilan jihozlangan boʻlishi kerak. AYQSHning tevarak-atrofi va katta avtoyoʻllardan kirish qismining beton hamda asfalt qoplamalarida nuqsonlar boʻlmasligi kerak, AYQSH egallab turgan maydonchalar tekis boʻlishi hamda avtomashinalarning kolonkalar va quyish qurilmalariga erkin kelishini taʼminlashi lozim. AYQSH binolari, inshootlari, maydonchalari, shuningdek, uning tevarak-atrofidagi joylar sanitariya-maishiy va yongʻinga qarshi normalarga javob berishi kerak.
Koʻrsatilgan talablarni taʼminlamagani uchun AYQSH rahbariga hayfsan eʼlon qilinadi yoki unga jarima solinadi. Mazkur intizom chorasi takror qoʻllangandan soʻng aybdor ishdan boʻshatiladi.
14. Sutkaning qorongʻi vaqtlarida AYQSHning tevarak-atrofi amaldagi normalarga muvofiq yoritilishi kerak. Neft mahsulotlarini quyish va qabul qilish joylarining yoritilishiga alohida eʼtibor berilishi kerak.
15. AYQSHlar telefon va radiokarnay aloqasi bilan jihozlangan boʻlishi kerak.
Oldingi tahrirga qarang.
16. AYQSH tomonidan davlat yuk avtomobillariga, avtobuslarga, muayyan yoʻnalishdagi avtomobillarga, taksi va boshqa transport vositalariga yonilgʻi tijorat banklarining soʻmlardagi elektron kartochkalari boʻyicha yoki belgilangan tartibda tarqatish vedomostlari boʻyicha va naqd pulga sotiladi.
(16-band Oʻzbekiston Respublikasi Vazirlar Mahkamasining 1999-yil 8-fevraldagi 59-sonli qarori tahririda)
17. Neft mahsulotlarini naqd pulga beruvchi AYQSHlarda pul mablagʻlari oʻgʻirlanishini va AYQSH binosiga ruxsat berilmagan hamda chet kishilarning kirishini istisno qiluvchi chora-tadbirlar koʻrilishi kerak.
18. Yonilgʻi-moy va aralashmalar quyish kolonkalarini tuzatish va sozlash zarur boʻlgan hollarda davlat ishonchnomasi tamgʻasini buzishga tegishli vazirlik yoki idora, “Oʻzdavneftmahsulot” birlashmasining hududiy organi tomonidan buyruq bilan tayinlangan shaxslarga, tamgʻalarni buzish paytida jamlovchi schyotchikning koʻrsatkichlari asbob-uskunalarni tuzatishni hisobga olish jurnalida albatta qayd qilingan holda, ruxsat beriladi. Kolonkalar tuzatilgandan va sozlangandan keyin belgilangan talablarga muvofiq tekshirilishi hamda tekshirish natijalari ijobiy boʻlgan taqdirda ushbu kolonkalarning texnik bayonida koʻrsatilgan sxema boʻyicha tamgʻalanishi kerak.
19. AYQSH rahbarining aybi bilan AYQSHda yonilgʻi-moylash materiallari boʻlmagan taqdirda nazorat qiluvchi organ tegishli organlar oldiga uni ishdan boʻshatish masalasini qoʻyishga haqlidir.
Oldingi tahrirga qarang.
(20-band Oʻzbekiston Respublikasi Vazirlar Mahkamasining 1998-yil 18-sentabrdagi 397-sonli qarori bilan oʻz kuchini yoʻqotgan)
21. AYQSHda har bir oyning 1-kunida rezervuarlarda va boshqa saqlash joylaridagi barcha neft mahsulotlari qayta roʻyxatdan oʻtkazilishi kerak. Zaruriyat boʻlganda neft mahsulotlarini qayta roʻyxatdan oʻtkazish istalgan boshqa muddatda amalga oshirilishi mumkin (moddiy javobgar shaxs almashganda, taftish munosabati bilan va boshqa hollarda).
Oldingi tahrirga qarang.
22. Qayd etib oʻtilgan Qoidalarni hamda AYQSHda neft mahsulotlarini qabul qilib olish, saqlash, hisobga olish va berishning belgilangan tartibini buzishda aybdor boʻlgan shaxslar amaldagi qonunchilikka muvofiq maʼmuriy yoki jinoiy javobgarlikka tortiladilar.
(22-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
 LexUZ sharhi
Qarang: Oʻzbekiston Respublikasi Maʼmuriy javobgarlik toʻgʻrisidagi kodeksining 164, 166, 168-moddalari.