Hujjat kuchini yo‘qotgan " " 29.04.2026
Oʻzbekiston Respublikasi Vazirlar Mahkamasining
qarori
Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash tartibi toʻgʻrisidagi nizomni tasdiqlash haqida
 LexUZ sharhi
Mazkur qaror Oʻzbekistan Respublikasi Vazirlar Mahkamasining 2026-yil 28-apreldagi 206-sonli “Agrar va oziq-ovqat sohalarini davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “2023-yilda qayta tiklanuvchi energiya manbalarini va energiya tejovchi texnologiyalarni joriy etishni jadallashtirish chora-tadbirlari toʻgʻrisida” 2023-yil 16-fevraldagi PQ-57-son qarori hamda Vazirlar Mahkamasining “Issiqxona xoʻjaliklari va meva-sabzavotlarni eksport qiluvchi korxonalarning faoliyatini qoʻllab-quvvatlashga doir qoʻshimcha chora-tadbirlar toʻgʻrisida” 2023-yil 27-oktabrdagi 567-son qarori ijrosini taʼminlash, shuningdek, issiqxona xoʻjaliklari faoliyatini qoʻllab-quvvatlash va mahsulot yetishtirish hajmlarini oshirish maqsadida Vazirlar Mahkamasi qaror qiladi:
1. Quyidagilarni nazarda tutuvchi Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash tartibi toʻgʻrisidagi nizom ilovaga muvofiq tasdiqlansin:
issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash uchun subsidiya ajratish boʻyicha talab etiladigan hujjatlar, ularni koʻrib chiqish hamda subsidiya ajratish toʻgʻrisidagi qarorni qabul qilish tartibi;
issiqxonalarni koʻmir yoqilgʻisida isitish uchun koʻmir qozonidan foydalanish yuzasidan monitoring yuritish tartibi.
2. Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasi (J. Xodjayev) (keyingi oʻrinlarda — Hukumat komissiyasi) bir oy muddatda 2024-yilda koʻmir yoqilgʻisida isitish uchun koʻmir qozonini xarid qilish xarajatlarining bir qismi qoplab beriladigan issiqxonalarning manzilli roʻyxatini tasdiqlasin.
3. Oʻzbekiston Respublikasi Qishloq xoʻjaligi vazirligi Hukumat komissiyasi tomonidan tasdiqlangan roʻyxatga muvofiq “Agrosubsidiya” axborot tizimiga kiritilgan issiqxona xoʻjaliklariga oʻz vaqtida subsidiya ajratilishini nazorat qilib borsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 9-iyul,
400-son
Vazirlar Mahkamasining 2024-yil 9 iyuldagi 400-son qaroriga
ILOVA
Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash tartibi toʻgʻrisida
NIZOM
1-bob. Umumiy qoidalar
1. Mazkur Nizom issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini Oʻzbekiston Respublikasi Qishloq xoʻjaligi vazirligi huzuridagi Agrosanoatni rivojlantirish agentligining (keyingi oʻrinlarda — Agentlik) Agrosanoatni rivojlantirish va qoʻllab-quvvatlash davlat maqsadli jamgʻarmasi (keyingi oʻrinlarda — Jamgʻarma) mablagʻlari hisobidan qoplash tartibini belgilaydi.
(1-band Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)
2. Ushbu Nizomda quyidagi asosiy tushunchalardan foydalaniladi:
issiqxona xoʻjaliklari — sanoat usulida issiqxonada qishloq xoʻjaligi mahsulotlarini yetishtiruvchi fermer xoʻjaliklari, dehqon xoʻjaliklari, agroklasterlar va boshqa yuridik shaxs maqomiga ega boʻlgan qishloq xoʻjaligi subyektlari;
koʻmir qozon — issiqxonalarni koʻmir yoqilgʻisida isitish uchun Oʻzbekiston Respublikasida yoki xorijiy davlatlarda ishlab chiqarilgan va muvofiqlik sertifikatiga ega boʻlgan qozon;
talabgor — koʻmir qozonini xarid qilgan va xarajatlarining bir qismini qoplab berish uchun murojaat qilgan qishloq xoʻjaligi subyekti;
subsidiya — issiqxonalarni koʻmir yoqilgʻisida isitish uchun mahalliy va xorijiy ishlab chiqaruvchilardan xarid qilingan koʻmir qozoni xarajatlarining Jamgʻarma mablagʻlari hisobidan qoplab beriladigan qismi;
“Agrosubsidiya” AT — Oʻzbekiston Respublikasi Qishloq xoʻjaligi vazirligining “Raqamli qishloq xoʻjaligi” yagona integratsiya platformasi tarkibiga kiruvchi hamda qishloq xoʻjaligi ekinlarini yetishtirish uchun imtiyozli kreditlar va subsidiyalarni ajratish, mahsulot yetishtiruvchilarga shaffoflik tamoyili asosida xizmatlar koʻrsatish imkoniyatlarini taʼminlab beradigan axborot tizimi.
3. Issiqxona xoʻjaliklariga issiqxonalarni koʻmir yoqilgʻisida isitish uchun xarid qilingan koʻmir qozoni xarajatlarining 20 foizgacha qismini qoplash maqsadida, biroq 80 mln soʻmdan ortiq boʻlmagan miqdorda Jamgʻarma mablagʻlari hisobidan bir martalik subsidiya beriladi.
Issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismi ushbu Nizomga 1-ilovaga muvofiq sxema boʻyicha qoplanadi.
4. Subsidiya “V” va undan yuqori tadbirkorlik subyektlarining barqarorlik reyting darajasiga ega issiqxona xoʻjaliklariga beriladi.
Bunda tadbirkorlik subyektlarining barqarorlik reyting darajasidan kelib chiqib, subsidiyaning amaldagisiga nisbatan quyidagi miqdorlarda taqdim etiladi:
“AAA” toifa — amaldagi miqdorning 100 foizi;
“AA” toifa — amaldagi miqdorning 90 foizi;
“A” toifa — amaldagi miqdorning 80 foizi;
“VVV” toifa — amaldagi miqdorning 70 foizi;
“VV” toifa — amaldagi miqdorning 60 foizi;
“V” toifa — amaldagi miqdorning 50 foizi.
2-bob. Subsidiya ajratish boʻyicha ariza bilan murojaat qilish
5. Har bir tuman (Quvasoy shahar)da issiqxona xoʻjaliklariga issiqxonalarni koʻmir yoqilgʻisida isitish maqsadida koʻmir qozonini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhi (keyingi oʻrinlarda — tuman (Quvasoy shahar) ishchi guruhi) mazkur Nizomga 2-ilovaga muvofiq namunaviy tarkibda tashkil etiladi.
6. Talabgor issiqxonani koʻmir yoqilgʻisida isitish maqsadida koʻmir qozonini xarid qilish xarajatlarining bir qismini qoplash uchun subsidiya ajratish boʻyicha tuman (Quvasoy shahar) ishchi guruhiga “Agrosubsidiya” AT orqali ariza bilan murojaat qiladi hamda quyidagilarni ilova qiladi:
atmosfera havosini ifloslantiruvchi statsionar manbalarda samaradorligi 99,5 foizdan past boʻlmagan chang va gazlarni tutib qoluvchi qurilmalarning mavjudligini tasdiqlovchi hujjatlar;
issiqxona xoʻjaligining kadastr maʼlumotlari;
koʻmir qozonining muvofiqlik sertifikati;
faoliyati boʻyicha davlat ekologik ekspertizasining ijobiy xulosasi;
koʻmir qozonining oldi-sotdi va/yoki pudrat shartnomasi, oʻrnatish ishlari sifatli bajarilganligi toʻgʻrisidagi dalolatnoma hamda hisob-faktura hujjatlari nusxasi;
koʻmir qozonining issiqxonani isitish uchun talab etiladigan isitish quvvatiga egaligi va issiqxona maydonining isitish qozoniga muvofiqligini tasdiqlovchi hujjatlar.
Talabgor arizadagi maʼlumotlar va ilova qilingan hujjatlarning toʻgʻriligi uchun javobgar hisoblanadi.
Talabgordan ushbu bandda nazarda tutilmagan boshqa hujjatlarni talab qilishga yoʻl qoʻyilmaydi.
Talabgor koʻmir qozonini xarid qilish boʻyicha shartnoma imzolangan kundan boshlab bir yil mobaynida subsidiya ajratish yuzasidan tuman (Quvasoy shahar) ishchi guruhiga ariza bilan murojaat qilishi mumkin.
7. Ushbu Nizomning 6-bandida nazarda tutilgan hujjatlar toʻliq boʻlmaganda yoki belgilangan tartibda rasmiylashtirilmagan holda taqdim etilganda tuman (Quvasoy shahar) ishchi guruhi tomonidan arizani qabul qilish rad etiladi.
3-bob. Talabgorning murojaatini koʻrib chiqish va subsidiya ajratish
8. Tuman (Quvasoy shahar) ishchi guruhi har yili 1-martga qadar:
talabgor tomonidan oʻrnatilgan koʻmir qozonining energiya jihatdan samaradorlik darajasini hamda belgilangan tartibda oʻrnatilganligini, issiqxonani isitish uchun talab etiladigan quvvatga egaligi va issiqxona maydonining qurilma quvvatiga muvofiqligini, shuningdek, issiqxona loyihasining parametrlariga koʻra joylashtirilganligini joyiga chiqqan holda oʻrganadi;
oʻrganish natijalariga koʻra ushbu Nizomga 3-ilovaga muvofiq xulosani rasmiylashtirgan holda talabgorlarning manzilli roʻyxatini shakllantiradi;
talabgorlarning manzilli roʻyxatidan kelib chiqib, talabgorlarga subsidiya ajratish toʻgʻrisidagi xulosani rasmiylashtirgandan soʻng talabgorlarning manzilli roʻyxatini va xulosalarni koʻrib chiqish uchun “Agrosubsidiya” AT orqali Agentlikka yuboradi.
Talabgorlarning manzilli roʻyxatini shakllantirishda quyidagi mezonlar inobatga olinadi:
issiqxona obyektlari soz holatda boʻlganligi;
issiqxona xoʻjaliklari amalda faoliyatini samarali yoʻlga qoʻyib, yil davomida kamida bitta mahsulot turini yetishtirayotganligi;
“V” va undan yuqori Tadbirkorlik subyektlarining barqarorlik reyting darajasiga ega issiqxona xoʻjaliklari ekanligi.
9. Tuman (Quvasoy shahar) ishchi guruhi talabgorlarning manzilli roʻyxatini shakllantirishda quyidagilarga shaxsan masʼul hisoblanadi:
tuman (Quvasoy shahar) hokimi — ishchi guruh faoliyatini tashkil qilishga va ishchi guruh tomonidan talabgorning subsidiya ajratish toʻgʻrisidagi arizasini joyiga chiqqan holda muddatida va toʻliq oʻrganishga hamda rasmiylashtirilgan hujjatlarning toʻgʻriligiga;
tuman (Quvasoy shahar) hokimining qishloq va suv xoʻjaligi masalalari boʻyicha oʻrinbosari — subsidiya ajratish toʻgʻrisidagi hujjatlar oʻz vaqtida rasmiylashtirilishi va muvofiqlashtirilishiga;
tuman (Quvasoy shahar) qishloq xoʻjaligi boʻlimi boshligʻi — issiqxona xoʻjaligining kadastr maʼlumotlari toʻgʻriligiga;
tuman (Quvasoy shahar) iqtisodiyot va moliya boʻlimi boshligʻi — talabgorga xizmat koʻrsatuvchi tijorat banki va hisobvaraqlar toʻgʻrisidagi maʼlumotlar toʻgʻriligiga;
tuman (Quvasoy shahar) soliq inspeksiyasi rahbari — talabgorning soliq hisobotlarini topshirib borishi toʻgʻrisidagi maʼlumotlar toʻgʻriligiga;
xizmat koʻrsatuvchi tijorat banki rahbari — talabgorning bank hisobvaragʻidan pul aylanmasi toʻgʻrisidagi maʼlumotlar toʻgʻriligiga;
tuman (Quvasoy shahar) statistika boʻlimi boshligʻi — talabgorning statistika hisobotlarini topshirib borishi toʻgʻrisidagi maʼlumotlar toʻgʻriligiga;
tuman (Quvasoy shahar) fermer, dehqon xoʻjaliklari va tomorqa yer egalari kengashi raisi — quruvchi-pudrat tashkilotlari bilan tuziladigan shartnomada talabgorning huquqi himoya qilinishiga;
tuman (Quvasoy shahar) ekologiya va atrof-muhitni muhofaza qilish boʻlimi boshligʻi — qishloq xoʻjaligi subyektining faoliyati boʻyicha davlat ekologik ekspertizasining ijobiy xulosasi mavjudligi hamda koʻmir qozoni chang-gaz tozalash uskunasi bilan jihozlanganligiga;
Agentlikning tuman (Quvasoy shahar) loyiha ofisi rahbari — koʻmir qozonining muvofiqlik sertifikati mavjudligi, issiqxonani isitish uchun talab etiladigan isitish quvvatiga egaligi va issiqxona maydoniga muvofiqligiga.
10. Agentlik har yili 20-martga qadar:
talabgorga subsidiya ajratish toʻgʻrisidagi xulosani va unga ilova qilingan hujjatlarni koʻrib chiqadi;
talabgorning manzilli roʻyxatga kiritilganligini tekshiradi;
hujjatlarni koʻrib chiqish natijalariga koʻra talabgorga subsidiya ajratish yoki subsidiya ajratishni rad etish haqida qaror qabul qiladi;
talabgorlarning manzilli roʻyxatini Oʻzbekiston Respublikasi Qishloq xoʻjaligi vazirligiga taqdim etadi.
11. Talabgorga xarid qilingan koʻmir qozoni xarajatlarining bir qismini qoplashni rad etish uchun quyidagilar asos boʻladi:
talabgorning oʻz arizasiga asosan;
ushbu Nizomning 6-bandida nazarda tutilgan hujjatlar toʻliq taqdim etilmaganda;
ushbu Nizomning 8-bandida nazarda tutilgan mezonlarga muvofiq kelmaganda;
talabgor tomonidan soxta hujjatlar, notoʻgʻri yoki yolgʻon maʼlumotlar taqdim etilganda;
koʻmir qozoni sifatsiz oʻrnatilganda va issiqxona loyihasining parametrlariga koʻra joylashtirilmaganda;
qishloq xoʻjaligi subyekti tugatilganda.
Ushbu bandda koʻrsatilmagan boshqa asoslar bilan talabgorga subsidiya ajratishni rad etishga yoʻl qoʻyilmaydi.
Agentlik subsidiya ajratishni rad etgan taqdirda, talabgorni bir kun muddatda “Agrosubsidiya” AT orqali rad etishning aniq sabablarini koʻrsatgan holda xabardor qiladi.
Subsidiya ajratish rad etilgan talabgor Agentlikning qarorida koʻrsatilgan rad etish sabablarini birinchi marta murojaat qilgan kundan boshlab bir yil davomida bartaraf etgan holda qayta murojaat qilishi mumkin.
Talabgor tuman (Quvasoy shahar) ishchi guruhining subsidiya ajratishni rad etish toʻgʻrisidagi qaroridan norozi boʻlgan taqdirda, belgilangan tartibda yuqori turuvchi tashkilotga yoki sudga shikoyat qilish huquqiga ega.
 LexUZ sharhi
Qarang: Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi va “Sudlar toʻgʻrisida”gi qonunlari.
12. Oʻzbekiston Respublikasi Qishloq xoʻjaligi vazirligi har yili 1-aprelga qadar Agentlik tomonidan taqdim etilgan talabgorlarning manzilli roʻyxatini oʻrganib chiqib, Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasiga (keyingi oʻrinlarda — Hukumat komissiyasi) tasdiqlash uchun kiritadi.
13. Hukumat komissiyasi har yili 15-aprelga qadar talabgorlarning manzilli roʻyxatini tasdiqlaydi.
14. Agentlik Hukumat komissiyasi tomonidan tasdiqlangan talabgorlarning manzilli roʻyxatiga muvofiq oʻn ish kuni ichida talabgorning tijorat bankidagi hisobvaragʻiga subsidiyani oʻtkazib beradi.
4-bob. Koʻmir qozonidan foydalanish yuzasidan monitoring yuritish
15. Talabgor issiqxonani isitish uchun oʻrnatilgan koʻmir qozonidan besh yil mobaynida foydalanishi va qishloq xoʻjaligi mahsulotlarini yetishtirishi shart.
16. Agentlik Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan holda va talabgor ishtirokida bir yilda bir marta (hisobot yilining oktabr oyidan keyingi yilning aprel oyiga qadar) koʻmir qozonidan foydalanish yuzasidan monitoring oʻtkazadi.
Monitoring natijalari asosida Agentlik tomonidan ikki nusxada dalolatnoma tuziladi hamda dalolatnomaning bir nusxasi Agentlikda va ikkinchi nusxasi talabgorda saqlanadi.
17. Agentlik va talabgor oʻrtasida tuzilgan shartnomada nazarda tutilgan talablarning buzilish holatlari aniqlanganda, Agentlik uch ish kuni ichida talabgorga ajratilgan subsidiyani qaytarish haqidagi ogohlantirish xatini yuboradi.
18. Talabgor ogohlantirish xatini olgan kundan eʼtiboran bir oy ichida ajratilgan subsidiyani Agentlikning shartnomada koʻrsatilgan maxsus shaxsiy gʻazna hisobvaragʻiga qaytaradi.
Shartnomada nazarda tutilgan talablarning buzilish holatlari aniqlangan yilga qarab, subsidiya quyidagi tartibda qaytariladi:
1 yilda — 100 foiz;
2 yilda — 80 foiz;
3 yilda — 60 foiz;
4 yilda — 40 foiz;
5 yilda — 20 foiz.
19. Talabgor subsidiyani belgilangan muddat va miqdorda qaytarmaganda, Agentlik subsidiyani sud tartibida undirish choralarini koʻradi.
5-bob. Yakunlovchi qoidalar
20. Subsidiya berishda yuzaga keladigan kelishmovchiliklar tomonlar oʻrtasida muzokaralar oʻtkazish orqali hal etiladi.
Bunda taraflar oʻrtasida kelishmovchiliklar muzokaralar oʻtkazish orqali hal etilmagan taqdirda, nizolar sud tartibida hal qilinadi.
21. Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash maqsadida ajratilgan mablagʻlardan maqsadli foydalanish Davlat moliyaviy nazorati inspeksiyasi tomonidan nazorat qilinadi.
22. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash tartibi toʻgʻrisidagi nizomga
1-ILOVA
Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash
SXEMASI

Bosqichlar

Subyektlar

Tadbirlar

Muddatlar

1-bosqich

Qishloq xoʻjaligi subyekti

(keyingi oʻrinlarda — talabgor)

Koʻmir qozonini xarid qilish xarajatlarining bir qismini qoplash uchun issiqxona xoʻjaliklariga issiqxonalarni koʻmir yoqilgʻisida isitish maqsadida koʻmir qozonini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhiga (keyingi oʻrinlarda — tuman (Quvasoy shahar) ishchi guruhi) “Agrosubsidiya” AT orqali ariza bilan murojaat qiladi.

Koʻmir qozon ishga tushirilgandan soʻng ixtiyoriy ravishda

2-bosqich

Tuman (Quvasoy shahar) ishchi guruhi

Talabgor tomonidan kiritilgan arizani mazkur Nizomning 6 — 8-bandlariga mosligini koʻrib chiqib, manzilli roʻyxatga kiritadi va talabgorga subsidiya ajratish boʻyicha xulosasini Agrosanoatni rivojlantirish agentligiga (keyingi oʻrinlarda — Agentlik) taqdim etadi.

Har yili 1-martga qadar

3-bosqich

Agentlik

Talabgorga subsidiya ajratish toʻgʻrisidagi xulosani va unga ilova qilingan hujjatlarni koʻrib chiqadi hamda talabgorning manzilli roʻyxatga mosligini tekshiradi.

Hujjatlarni koʻrib chiqish natijalariga koʻra talabgorga subsidiya ajratish yoki subsidiya ajratishni rad etish haqida qaror qabul qiladi.

Manzilli roʻyxatni Qishloq xoʻjaligi vazirligiga taqdim etadi.

Har yili 20-martga qadar

4-bosqich

Qishloq xoʻjaligi vazirligi

Agentlik tomonidan kiritilgan manzilli roʻyxatni umumlashtirib Investitsiyalarni jalb qilish, sanoatni rivojlantirish va savdoni tartibga solish masalalari boʻyicha Hukumat komissiyasiga (keyingi oʻrinlarda — Hukumat komissiyasi) tasdiqlash uchun kiritadi.

Har yili 1-aprelga qadar

5-bosqich

Hukumat komissiyasi

Qishloq xoʻjaligi vazirligi tomonidan kiritilgan manzilli roʻyxatni koʻrib chiqib tasdiqlaydi.

Har yili 15-aprelga qadar

6-bosqich

Agentlik

Hukumat komissiyasi tomonidan tasdiqlangan roʻyxatga muvofiq talabgorning tijorat bankidagi hisobvaragʻiga subsidiya mablagʻlarini oʻtkazib beradi.

10 ish kuni ichida

(1-ilova Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)
Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash tartibi toʻgʻrisidagi nizomga
2-ILOVA
Issiqxona xoʻjaliklariga issiqxonalarni koʻmir yoqilgʻisida isitish maqsadida koʻmir qozonini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhining
NAMUNAVIY TARKIBI
1. Tuman (Quvasoy shahar) hokimi, ishchi guruh rahbari
2. Tuman (Quvasoy shahar) hokimining qishloq va suv xoʻjaligi masalalari boʻyicha oʻrinbosari, ishchi guruh rahbarining oʻrinbosari
3. Tuman (Quvasoy shahar) qishloq xoʻjaligi boʻlimi boshligʻi
4. Tuman (Quvasoy shahar) iqtisodiyot va moliya boʻlimi boshligʻi
5. Tuman (Quvasoy shahar) soliq inspeksiyasi rahbari
6. Xizmat koʻrsatuvchi tijorat banklari rahbarlari
7. Tuman (Quvasoy shahar) statistika boʻlimi rahbari
8. Tuman (Quvasoy shahar) fermer, dehqon xoʻjaliklari va tomorqa yer egalari kengashi raisi
9. Tuman (Quvasoy shahar) ekologiya, atrof-muhitni muhofaza qilish va iqlim oʻzgarishi boʻlimi boshligʻi
10. Agrosanoatni rivojlantirish agentligining tuman (Quvasoy shahar) loyiha ofisi rahbari
(10-band Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)
Issiqxona xoʻjaliklariga issiqxonalarni koʻmir yoqilgʻisida isitish uchun koʻmir qozonini xarid qilish xarajatlarining bir qismini qoplash tartibi toʻgʻrisidagi nizomga
3-ILOVA

“TASDIQLAYMAN”

__________________________ tumani hokimi,

tuman (Quvasoy shahar) ishchi guruhi rahbari

___________ ______________________________________

___(imzo)________________________(F.I.O.)___________

20____ yil “_____” ___________________

Issiqxona xoʻjaliklariga issiqxonalarni koʻmir yoqilgʻisida isitish maqsadida koʻmir qozonini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhining

XULOSASI

_________________ tumanida Issiqxona xoʻjaliklariga issiqxonalarni koʻmir yoqilgʻisida isitish maqsadida koʻmir qozonini xarid qilish xarajatlarining bir qismini qoplash uchun subsidiya ajratishga koʻmaklashuvchi tuman (Quvasoy shahar) ishchi guruhi “___________________________” MCHJ/fermer xoʻjaligi/dehqon xoʻjaligining 20__ yil “___”___________dagi ____-son murojaati oʻrganib chiqildi va quyidagilar aniqlandi:

1. Qishloq xoʻjaligi subyektining nomi: __________________________________________________.

2. Issiqxona va muqobil energiya qurilmasi toʻgʻrisida maʼlumotlar:

a) issiqxona turi: ________, oʻlchami: ____ga, shundan ekin maydoni: ____ga, kontur raqami: ____;

b) muqobil energiya turi: _________________, isitish quvvati (hajmi):______________.

2. Muqobil energiya qurilmasi xarid qilingan tashkilot nomi: _______________, u bilan tuzilgan shartnoma raqami va sanasi: ______-son shartnoma, 202___ yil “_____” _________.

3. Muqobil energiya qurilmasini qurilish-pudratchi nomi: _______________, u bilan tuzilgan shartnoma raqami va sanasi: _______-son shartnoma, 202___ yil “_____” __________.

4. Xizmat koʻrsatuvchi tijorat banki nomi: “_____________” ATB __________ filiali.

XULOSA:

“_________________” MCHJ/fermer xoʻjaligi/dehqon xoʻjaligi tomonidan issiqxona oʻlchami _____ga, shundan ekin maydoni ___ga boʻlgan qishloq xoʻjaligi mahsulotlarini yetishtirish uchun barpo qilingan issiqxonada “__________” yoqilgʻisida ishlovchi muqobil energiya qurilmasi oʻrnatilgan va mazkur qurilma _____ga oʻlchamdagi issiqxonani isitish uchun ______ quvvatga ega, ushbu qurilmadan kamida besh yil mobaynida foydalanish sharti bilan ___________ mln soʻm subsidiya ajratish maqsadga muvofiq deb topildi.

Tuman (Quvasoy shahar) ishchi guruhi aʼzolari:

T/r

F.I.O.

Imzo

Lavozimi

1.

Tuman (Quvasoy shahar) hokimining qishloq va suv xoʻjaligi masalalari boʻyicha oʻrinbosari

2.

Tuman (Quvasoy shahar) qishloq xoʻjaligi boʻlimi boshligʻi

3.

Tuman (Quvasoy shahar) iqtisodiyot va moliya boʻlimi boshligʻi

4.

Fermer, dehqon xoʻjaliklari va tomorqa yer egalari tuman (Quvasoy shahar) kengashi raisi

5.

Agrosanoatni rivojlantirish agentligining tuman (Quvasoy shahar) loyiha ofisi rahbari

6.

Tuman (Quvasoy shahar) ekologiya, atrof-muhitni muhofaza qilish va iqlim oʻzgarishi boʻlimi boshligʻi

(3-ilova Oʻzbekiston Respublikasi Vazirlar Mahkamasining 2025-yil 23-apreldagi 255-sonli qarori tahririda — Qonunchilik maʼlumotlari milliy bazasi, 23.04.2025-y., 09/25/255/0376-son)
(Qonunchilik maʼlumotlari milliy bazasi, 10.07.2024-y., 09/24/400/0490-son; 23.04.2025-y., 09/25/255/0376-son)