|
Hujjat kuchini yo‘qotgan " " 08.05.2025
|
Oʻzbekiston Respublikasi Vazirlar Mahkamasining
qarori
Yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimini joriy etish chora-tadbirlari toʻgʻrisida
LexUZ sharhiMazkur qaror Oʻzbekistan Respublikasi Vazirlar Mahkamasining 2025-yil 5-maydagi 294-sonli “Yetim va ota-ona qaramogʻidan mahrum boʻlgan bolalarni har tomonlama qoʻllab-quvvatlash hamda ularga ijtimoiy yordam koʻrsatish bilan bogʻliq xarajatlarni moliyalashtirishga doir qoʻshimcha chora-tadbirlar toʻgʻrisida”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “Yetim bolalar va ota-ona qaramogʻidan mahrum boʻlgan bolalarni tarbiyalashning tubdan yangilangan tizimini joriy etish chora-tadbirlari toʻgʻrisida” 2021-yil 9-avgustdagi PQ-5215-son qaroriga muvofiq yetim bolalar va ota-ona qaramogʻidan mahrum boʻlgan bolalarning muammolarini oʻrganish hamda hal etish, ularning orzu-istaklarini roʻyobga chiqarishga koʻmaklashish maqsadida Vazirlar Mahkamasi qaror qiladi:
1. Quyidagilarni nazarda tutuvchi “Mehr daftari” tizimi joriy etilsin:
a) Oʻzbekiston Respublikasi Xalq taʼlimi vazirligi tizimidagi Mehribonlik uylari, Bolalar shaharchalari, Respublika bolalar oʻquv-tarbiya muassasalari, Oilaviy bolalar uylari, Oʻzbekiston Respublikasi Sogʻliqni saqlash vazirligi tizimidagi Bolalar uylari va “SOS — Oʻzbekiston bolalar mahallalari” uyushmasi boʻlinmalaridagi (keyingi oʻrinlarda — oʻquv-tarbiya muassasalari) tarbiyalanuvchilarning muammolarini oʻrganish hamda hal etish, ularning orzu-istaklarini amalga oshirishga koʻmaklashish, shu jumladan:
bolalarning ota-onasi yoki boshqa qonuniy vakillarining qaramogʻidan mahrum boʻlish sabablarini har tomonlama oʻrganish hamda aniqlangan muammolarni bartaraf etish va ularning oldini olish;
yetim bolalar va ota-ona qaramogʻidan mahrum boʻlgan bolalarni farzandlikka, vasiylikka (homiylikka, patronatga) olgan oilalarni ragʻbatlantirish;
b) ushbu bandning “a” kichik bandida nazarda tutilgan chora-tadbirlarni oʻz vaqtida va samarali amalga oshirish uchun yetim bolalar va ota-ona qaramogʻidan mahrum boʻlgan bolalarning “Mehr daftari”ni shakllantirish va yuritish.
2. Quyidagilarni nazarda tutuvchi Yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimini joriy etish tartibi toʻgʻrisidagi nizom 1-ilovaga muvofiq tasdiqlansin:
“Mehr daftari”ga kiritiladigan yetim bolalar va ota-ona qaramogʻidan mahrum boʻlgan bolalar toifasi;
“Mehr daftari”ni shakllantirish va amalga oshirish;
yetim bolalar va ota-ona qaramogʻidan mahrum boʻlgan bolalarni tuman (shahar) hokimi qarori asosida “Mehr daftari”dan chiqarish va unga oʻzgartirish kiritish tartibi;
“Mehr daftari” tizimida amalga oshirilgan ishlar yuzasidan hisobot yuritish tartibi.
3. Oʻzbekiston Respublikasi Prezidentining “Yetim bolalar va ota-ona qaramogʻidan mahrum boʻlgan bolalarni tarbiyalashning tubdan yangilangan tizimini joriy etish chora-tadbirlari toʻgʻrisida” 2021-yil 9-avgustdagi PQ-5215-son qarorining 10-bandiga muvofiq:
“Mehr daftari” tizimi doirasida amalga oshiriladigan chora-tadbirlarni moliyalashtirish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmalarini tashkil etish belgilanganligi;
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasining mablagʻlarini homiylik mablagʻlari, 2022-yil 1-yanvardan boshlab alkogol mahsulotlarining (pivo va tabiiy vino bundan mustasno) ulgurji savdosi bilan shugʻullanuvchi korxonalar sof tushumining uch foizi miqdoridagi ajratmalar, shuningdek, qonunchilikda taqiqlanmagan boshqa manbalar hisobidan shakllantirish belgilanganligi maʼlumot uchun qabul qilinsin.
4. Quyidagilarni nazarda tutuvchi “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasi toʻgʻrisidagi nizom 2-ilovaga muvofiq tasdiqlansin:
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasi (keyingi oʻrinlarda — “Mehr daftari” jamgʻarmasi) mablagʻlarini shakllantirish va ularni undirish tartibi;
“Mehr daftari” jamgʻarmasi mablagʻlaridan foydalanishning asosiy yoʻnalishlari;
“Mehr daftari” jamgʻarmasi mablagʻlarini sarflash va boshqarish;
“Mehr daftari” jamgʻarmasi vasiylik kengashining namunaviy tarkibi va ushbu kengashning ish yuritish tartibini belgilash;
“Mehr daftari” jamgʻarmasi hisobotini yuritish.
5. Milliy gvardiya Xalq taʼlimi vazirligi hamda Axborot texnologiyalari va kommunikatsiyalarini rivojlantirish vazirligi bilan birgalikda:
2022-yil 1-fevralga qadar yetim bolalar va ota-ona qaramogʻidan mahrum boʻlgan bolalarni “Mehr daftari”ga kiritishning axborot tizimini amaliyotga joriy etsin;
2022-yil 1-fevraldan boshlab “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarga oid maʼlumotlarni “Elektron hukumat” tizimi idoralararo integratsiyalashuv platformasi orqali aniqlashni yoʻlga qoʻysin.
6. Xalq taʼlimi vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
7. Mazkur qarorning bajarilishini nazorat qilish xalq taʼlimi vaziri B.O. Saidov va Milliy gvardiya qoʻmondoni R.M. Djurayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 17-yanvar,
26-son
Vazirlar Mahkamasining 2022-yil 17-yanvardagi 26-son qaroriga
1-ILOVA
1-ILOVA
Yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimini joriy etish tartibi toʻgʻrisida
NIZOM
1-bob. Umumiy qoidalar
1. Mazkur Nizom yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimini joriy etish tartibini belgilaydi.
2. Ushbu Nizomda quyidagi asosiy tushunchalar qoʻllaniladi:
“Mehr daftari” tizimi — yetim bolalar va ota-ona qaramogʻidan mahrum boʻlgan bolalarning muammolarini oʻrganish hamda hal etish, ularning orzu-istaklarini roʻyobga chiqarishga hamda jamiyatga ijtimoiylashuviga koʻmaklashish, ularni vasiylikka (homiylikka, patronatga) olgan oilalarni ragʻbatlantirish, shuningdek bolalarning ota-onasi yoki boshqa qonuniy vakillarining qaramogʻidan mahrum boʻlish sabablarini har tomonlama oʻrganish hamda aniqlangan muammolarni bartaraf etish va ularning oldini olish boʻyicha kompleks chora-tadbirlarni oʻz ichiga olgan tizim;
“Mehr daftari” — yetim bolalar va ota-ona qaramogʻidan mahrum boʻlgan bolalarning muammolarini oʻrganish hamda hal etish, ularning orzu-istaklarini roʻyobga chiqarishga koʻmaklashish maqsadida ular haqidagi maʼlumotlarni kiritish, idoralararo maʼlumotlar almashishni tashkil etish hamda “Mehr daftari” tizimi boʻyicha amalga oshiriladigan chora-tadbirlarning samaradorligini monitoring qilish imkonini beruvchi elektron platforma;
“Mehr daftari” jamgʻarmasi — Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida tashkil etiladigan “Mehr daftari” tizimiga kiritilgan shaxslarni qoʻllab-quvvatlash jamgʻarmasi;
oʻquv-tarbiya muassasalari — Oʻzbekiston Respublikasi Xalq taʼlimi vazirligi tizimidagi Mehribonlik uylari, Bolalar shaharchalari, Respublika bolalar oʻquv-tarbiya muassasalari, Oilaviy bolalar uylari, Oʻzbekiston Respublikasi Sogʻliqni saqlash vazirligi tizimidagi Bolalar uylari, “SOS — Oʻzbekiston bolalar mahallalari” uyushmasi boʻlinmalari (bolalarni muqobil parvarish qilish xizmatlari, yoshlarga hamrohlik qilish xizmatlari va ijtimoiy yetimlikning oldini olish xizmatlari).
3. “Mehr daftari” tizimiga kiritilgan yetim bolalar va ota-ona qaramogʻidan mahrum boʻlgan bolalarni ijtimoiy qoʻllab-quvvatlash boʻyicha chora-tadbirlar mazkur Nizom va boshqa qonunchilik hujjatlarida belgilangan tartibda amalga oshiriladi.
LexUZ sharhiQarang: Vazirlar Mahkamasining 2021-yil 25-oktabrdagi 656-son qarori bilan tasdiqlangan Yetim bolalar va ota-ona qaramogʻidan mahrum boʻlgan bolalarni uy-joy bilan taʼminlash tartibi toʻgʻrisidagi nizom.
4. Yetim bolalar va ota-ona qaramogʻidan mahrum boʻlgan bolalar tuman (shahar) hokimi qarori asosida “Mehr daftari”ga kiritiladi va undan chiqariladi.
Yetim bolalar va ota-ona qaramogʻidan mahrum boʻlgan bolalarni “Mehr daftari”ga kiritishning axborot tizimidan (keyingi oʻrinlarda — “Mehr daftari” axborot tizimi) foydalanish va maʼlumotlarni kiritish tartibi Milliy gvardiya tomonidan belgilanadi.
2-bob. “Mehr daftari”ni shakllantirish va amalga oshirish
5. Oʻquv-tarbiya muassasalari hamda tuman (shahar) hokimliklarining Bolalarni himoya qilish shuʼbalari “Mehr daftari”ni shakllantirishga masʼul hisoblanadi.
6. Tuman (shahar) hokimi qarori va ilovadagi sxemaga muvofiq quyidagilar “Mehr daftari”ga maʼlumotlarning bevosita kiritilishini taʼminlaydi:
a) Xalq taʼlimi vazirligi tomonidan uning tizimidagi Mehribonlik uylari, Bolalar shaharchalari, Respublika bolalar oʻquv-tarbiya muassasalari va Oilaviy bolalar uylari;
Sogʻliqni saqlash vazirligi tomonidan uning tizimidagi Bolalar uylari;
“SOS — Oʻzbekiston bolalar mahallalari” uyushmasi tomonidan uning tizimidagi bolalarni muqobil parvarish qilish xizmatlari, yoshlarga hamrohlik qilish xizmatlari va ijtimoiy yetimlikning oldini olish xizmatlari tarbiyalanuvchilari va bitiruvchilari toʻgʻrisidagi;
b) tuman (shahar) hokimliklarining Bolalarni himoya qilish shuʼbalari tomonidan vasiylikka (homiylikka, patronatga) olingan yetim bolalar va ota-ona qaramogʻidan mahrum boʻlgan bolalar toʻgʻrisidagi.
7. “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarning muammo (ehtiyoj, qiziqish)lari quyidagi tartibda oʻrganiladi:
oʻquv-tarbiya muassasalarida:
tarbiyalanuvchilarning bevosita murojaatlari va ular orasida oʻtkaziladigan soʻrovnomalar orqali;
oʻquv-tarbiya muassasalari bitiruvchilarining yoki ularning manfaatlarini himoya qiluvchi shaxs (tashkilot)lar murojaatlari orqali;
tuman (shahar) hokimliklarining bolalarni himoya qilish shuʼbalarida:
vasiylikka (homiylikka, patronatga) olingan yetim bolalar va ota-ona qaramogʻidan mahrum boʻlgan bolalarning murojaatlari orqali;
vasiylikka (homiylikka, patronatga) olingan yetim bolalar va ota-ona qaramogʻidan mahrum boʻlgan bolalarning ota-onalari, qonuniy vakillari yoki ularning manfaatlarini himoya qiluvchi shaxs (tashkilot)lar murojaatlari orqali.
8. Murojaatlar va soʻrovnomalar natijasi yuzasidan oʻquv-tarbiya muassasalari hamda tuman (shahar) hokimliklarining Bolalarni himoya qilish shuʼbalari 15 ish kuni muddatda “Yoʻl xaritasi” loyihasini tayyorlaydi.
9. “Yoʻl xaritasi” loyihasida yetim bolalar va ota-ona qaramogʻidan mahrum boʻlgan bolalarning muammo (ehtiyoj, qiziqish)larini hal etishga qaratilgan aniq chora-tadbirlar, ijro etish muddati hamda ularni bajaruvchi masʼul tashkilotlar va sarflanadigan xarajatlarning miqdori koʻrsatib oʻtiladi.
10. Hududiy oʻquv-tarbiya muassasalari tomonidan taqdim etilgan “Yoʻl xaritalari” loyihalari tegishli tuman (shahar) hokimliklarining Bolalarni himoya qilish shuʼbalari tomonidan umumlashtiriladi.
11. “Yoʻl xaritasi” loyihasi 3 ish kunida tuman (shahar) hokimliklari tomonidan tasdiqlanadi va Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklaridagi “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmalari vasiylik kengashlariga (keyingi oʻrinlarda — Vasiylik kengashi) taqdim etiladi.
12. Vasiylik kengashi tomonidan 3 ish kunida yetim bolalar va ota-ona qaramogʻidan mahrum boʻlgan bolalarning muammo (ehtiyoj, qiziqish)larini hal etishga qaratilgan chora-tadbirlarni amalga oshirish uchun “Mehr daftari” jamgʻarmasi mablagʻlari hisobidan yordam koʻrsatilishi toʻgʻrisida qaror qabul qilinadi.
13. Vasiylik kengashi qarorining nusxasi shu kunning oʻzida tegishli tuman (shahar) hokimliklariga ijro uchun yuboriladi.
“Mehr daftari” jamgʻarmasida yetarlicha mablagʻ mavjud boʻlmagan taqdirida, “Yoʻl xaritalari” kelib tushgan sanasiga asosan mablagʻ yigʻilgunga qadar “Mehr daftar” platformasida “onlayn-navbat”ga qoʻyiladi. Bunda Vasiylik kengashi mablagʻ yetishmasligi haqida tuman (shahar) hokimliklarining Bolalarni himoya qilish shuʼbalariga xabar beradi va “Yoʻl xaritalari”ning navbat raqamlari roʻyxatini taqdim etadi. Bolalarni himoya qilish shuʼbalari murojaat qilgan shaxslarni yozma ravishda mablagʻ yetishmasligi hamda ularga tegishli “Yoʻl xaritasi”ning navbat raqami haqida xabardor qiladi.
14. “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash ishlari quyidagilar tomonidan muvofiqlashtiriladi:
tuman (shahar) hokimligining Bolalarni himoya qilish shuʼbasi tomonidan manfaatdor davlat organlari va tashkilotlar bilan birgalikda;
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Bolalarni himoya qilish masalalari kotibiyatlari tomonidan manfaatdor davlat organlari va tashkilotlari bilan birgalikda;
Vazirlar Mahkamasining Bolalarni himoya qilish masalalari shuʼbasi va Milliy gvardiya tomonidan manfaatdor vazirlik va idoralar bilan birgalikda.
15. Xalq taʼlimi vazirligi, Sogʻliqni saqlash vazirligi, Milliy gvardiya, Yoshlar ishlari agentligi, Bandlik va mehnat munosabatlari vazirligi hamda Mahalla va nuroniylarni qoʻllab-quvvatlash vazirligining hududiy boʻlinmalari — “Mehr daftari” tizimi doirasidagi chora-tadbirlarni amalga oshiruvchi manfaatdor davlat organlari hisoblanadi.
(15-bandning birinchi xatboshisi Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)
“Mehr daftari” axborot tizimiga maʼlumotlarning oʻz vaqtida kiritilishi va haqqoniyligi Milliy gvardiyaning hududiy boʻlinmalari tomonidan nazorat qilinadi.
3-bob. “Mehr daftari”dan chiqarish va unga oʻzgartirish kiritish
16. Yetim bolalar va ota-ona qaramogʻidan mahrum boʻlgan bolalar 25 yoshga toʻlganda tegishli tuman (shahar) hokimligining Bolalarni himoya qilish shuʼbasi tomonidan tuman (shahar) hokimining qarori va ilovadagi sxemaga muvofiq “Mehr daftari”dan chiqariladi.
Bunda:
“Mehr daftari”dan chiqarilayotgan shaxslarning bandligi taʼminlangan va uy-joyi mavjud boʻlishi shart. “Mehr daftari”dan chiqarilayotgan shaxslarning bandligi taʼminlanmagan holatlarda, ularning bandligini taʼminlash uchun “Yoʻl xaritasi” tuziladi hamda “Mehr daftari” hisobida turish muddati bandligi taʼminlangunga qadar, biroq 5 yildan ortiq boʻlmagan muddatga uzaytiriladi;
“Mehr daftari”dan chiqarilayotgan shaxslarning oʻzlariga biriktirilgan turar joyga ega boʻlmaganligi va turar joyga muhtojligi aniqlangan holatlarda, belgilangan tartibga asosan ularni uy-joy bilan taʼminlash choralari koʻriladi va “Mehr daftari” hisobida turish muddati uy-joy bilan taʼminlangunga qadar, biroq 5 yildan ortiq boʻlmagan muddatga uzaytiriladi;
LexUZ sharhiQarang: Vazirlar Mahkamasining 2021-yil 25-oktabrdagi 656-son qarori bilan tasdiqlangan Yetim bolalar va ota-ona qaramogʻidan mahrum boʻlgan bolalarni uy-joy bilan taʼminlash tartibi toʻgʻrisidagi nizomning 4-bobi.
“Mehr daftari” axborot tizimiga kiritiladigan tegishli oʻzgartirishlar tuman (shahar) hokimligining Bolalarni himoya qilish shuʼbasi tomonidan bevosita amalga oshiriladi.
17. Tuman (shahar) hokimligining Bolalarni himoya qilish shuʼbasining hududdagi oʻquv-tarbiya muassasalari, manfaatdor davlat organlari hamda tashkilotlar bilan hamkorlikdagi xulosasiga muvofiq yetim bolalar va ota-ona qaramogʻidan mahrum boʻlgan bolalarning “Mehr daftari”da boʻlish muddati 5 yilgacha uzaytirilishi mumkin.
18. Yetim bolalar va ota-ona qaramogʻidan mahrum boʻlgan bolalar boshqa oʻquv-tarbiya muassasasiga yoki doimiy (vaqtincha) yashash uchun respublikaning boshqa hududiga koʻchib oʻtganda, tegishli oʻquv-tarbiya muassasalari va tuman (shahar) hokimligining Bolalarni himoya qilish shuʼbasi tomonidan ular doimiy va vaqtincha yashash joyi boʻyicha roʻyxatga olingan kunidan boshlab, oʻn besh kun muddatda “Mehr daftari”ga tegishli oʻzgartirishlar kiritiladi.
19. Yetim bolalar va ota-ona qaramogʻidan mahrum boʻlgan bolalarga nisbatan sudning ozodlikdan mahrum etishni nazarda tutuvchi hukmi chiqarilganda, ularni “Mehr daftari” tizimi boʻyicha qoʻllab-quvvatlash masalasi toʻxtatib turiladi.
Bunda sud hukmi qonuniy kuchga kirgandan soʻng tegishli tuman (shahar) hokimligining Bolalarni himoya qilish shuʼbasi tomonidan “Mehr daftari”ga oʻzgartirish kiritiladi.
20. “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalar ularga ish beruvchilar tomonidan jismoniy shaxslardan olinadigan daromad soligʻi yoki ijtimoiy soliq toʻlovi ketma-ket 12 oy davomida hisoblanganda hamda ushbu maʼlumotlar Oʻzbekiston Respublikasi Davlat soliq qoʻmitasining markazlashtirilgan axborot bazasida aks ettirilgan taqdirda, ish bilan bandligi taʼminlangan deb hisoblanadi.
4-bob. “Mehr daftari” tizimida hisobot
21. Oʻquv-tarbiya muassasalari hamda tuman (shahar) hokimligining Bolalarni himoya qilish shuʼbasi “Mehr daftari”dagi yetim bolalar va ota-ona qaramogʻidan mahrum boʻlgan bolalar toʻgʻrisidagi maʼlumotlarning toʻliq aks ettirib borilishini taʼminlaydi hamda ularning haqqoniyligi uchun shaxsan javobgar hisoblanadi.
Barcha maʼlumot va hisobotlar “Mehr daftari” axborot tizimida shakllantiriladi.
22. “Mehr daftari” tizimida amalga oshirilgan ishlar yuzasidan quyidagi tartibda hisobot beriladi:
har chorak yakuniga koʻra, “Mehr daftari” tizimi boʻyicha tuman (shahar) hokimligining Bolalarni himoya qilish shuʼbasi oʻquv-tarbiya muassasalari hamda hududiy davlat organlari va tashkilotlar rahbarlari bilan birgalikda amalga oshirilayotgan ishlar toʻgʻrisidagi hisobotlari xalq deputatlari tuman (shahar) Kengashlarida eshitib boriladi;
har yarim yil yakuniga koʻra, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzurida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Bolalarni himoya qilish masalalari kotibiyati, hududdagi tuman (shahar) hokimliklarining Bolalarni himoya qilish shuʼbalari hamda manfaatdor davlat organlari va tashkilotlar bilan birgalikda “Mehr daftari” tizimi boʻyicha amalga oshirilayotgan ishlar muhokama qilinadi hamda respublika darajasida hal etilishi lozim boʻlgan masalalar hududlar kesimida Vazirlar Mahkamasining Bolalarni himoya qilish masalalari shuʼbasiga kiritib boriladi;
yil yakuniga koʻra, Vazirlar Mahkamasining Bolalarni himoya qilish masalalari shuʼbasi huzurida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Bolalarni himoya qilish masalalari kotibiyati, manfaatdor vazirlik va idoralar bilan birgalikda “Mehr daftari” tizimining faoliyati muhokama qilinadi.
5-bob. Yakunlovchi qoidalar
23. Ushbu Nizomni qoʻllash jarayonida yuzaga keladigan nizolar qonunchilik hujjatlarida belgilangan tartibda hal etiladi.
24. Mazkur Nizom talablari buzilishida aybdor boʻlgan shaxslar qonunchilikka muvofiq javob beradilar.
Yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimini joriy etish tartibi toʻgʻrisidagi nizomga
ILOVA
ILOVA
Yetim bolalar va ota-ona qaramogʻidan mahrum boʻlgan bolalarni har tomonlama qoʻllab-quvvatlashga qaratilgan “Mehr daftari” tizimiga kiritish va chiqarish
SXEMASI
|
|
Ijrochilar |
|
Tadbirlar |
|
Muddatlar | |
|
|
||||||
|
1-bosqich |
Oʻquv-tarbiya muassasalari |
“Mehr daftari” tizimiga kiritish uchun xalq taʼlimi tizimidagi Mehribonlik uylari, Bolalar shaharchalari, Respublika bolalar oʻquv-tarbiya muassasalari, shuningdek, oilaviy bolalar uylari tarbiyalanuvchilarining roʻyxatini; “Mehr daftari” tizimiga kiritish uchun Sogʻliqni saqlash vazirligi tizimidagi Bolalar uylari tarbiyalanuvchilarining roʻyxatini; “Mehr daftari” tizimiga kiritish uchun “SOS — Oʻzbekiston bolalar mahallalari” uyushmasi tizimidagi bolalarni muqobil parvarish qilish xizmatlari, yoshlarga hamrohlik qilish xizmatlari va ijtimoiy yetimlikning oldini olish xizmatlari tarbiyalanuvchilari va bitiruvchilari roʻyxatini tuman (shahar) hokimligining Bolalarni himoya qilish shuʼbasiga taqdim etish. |
2 ish kuni | |||
|
|
||||||
|
2-bosqich |
Bolalarni himoya qilish shuʼbasi |
“Mehr daftari” tizimiga kiritiladigan oʻquv-tarbiya muassasalari tarbiyalanuvchilari, shuningdek, vasiylik, homiylikka (patronatga) olingan yetim bolalar va ota-ona qaramogʻidan mahrum boʻlgan bolalar roʻyxatini shakllantirish; |
3 ish kuni | |||
|
Tuman (shahar) hokimi |
Mazkur roʻyxatdagi bolalarni “Mehr daftari” tizimiga kiritish yuzasidan tuman (shahar) hokimining qarorini chiqarish. | |||||
|
|
||||||
|
3-bosqich |
Oʻquv-tarbiya muassasalari |
Tuman (shahar) hokimi qarori asosida yetim bolalar va ota-ona qaramogʻidan mahrum boʻlgan bolalar toʻgʻrisidagi maʼlumotlarni “Mehr daftari” tizimiga kiritish. |
3 ish kuni | |||
|
Bolalarni himoya qilish shuʼbasi |
Tuman (shahar) hokimi qarori asosida vasiylik, homiylikka (patronatga) olingan yetim bolalar va ota-ona qaramogʻidan mahrum boʻlgan bolalar toʻgʻrisidagi maʼlumotlarni “Mehr daftari” tizimiga kiritish. | |||||
|
|
||||||
|
4-bosqich |
Oʻquv-tarbiya muassasalari |
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarning muammo (ehtiyoj, qiziqish)larini oʻrganish. |
5 ish kuni | |||
|
Bolalarni himoya qilish shuʼbasi |
“Mehr daftari”ga kiritilgan vasiylikka (homiylikka, patronatga) olingan yetim bolalar va ota-ona qaramogʻidan mahrum boʻlgan bolalarning muammo (ehtiyoj, qiziqish)larini oʻrganish. | |||||
|
|
||||||
|
5-bosqich |
Bolalarni himoya qilish shuʼbasi |
Oʻrganish natijasini umumlashtirgan holda yetim bolalar va ota-ona qaramogʻidan mahrum boʻlgan bolalar, shu jumladan, vasiylik, homiylikka (patronatga) olingan bolalarning muammo (ehtiyoj, qiziqish)larini hal etishga qaratilgan yoʻl xaritasini ishlab chiqish. |
15 ish kuni | |||
|
|
||||||
|
6-bosqich |
Tuman (shahar) hokimi |
Yetim bolalar va ota-ona qaramogʻidan mahrum boʻlgan bolalar, shu jumladan, vasiylikka (homiylikka, patronatga) olingan bolalarning muammo (ehtiyoj, qiziqish)larini hal etishga qaratilgan yoʻl xaritasini tasdiqlash va uni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklaridagi “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmalari Vasiylik kengashiga taqdim etish. |
3 ish kuni | |||
|
|
||||||
|
7-bosqich |
Vasiylik kengashi |
Yetim bolalar va ota-ona qaramogʻidan mahrum boʻlgan bolalar, shu jumladan, vasiylik, homiylikka (patronatga) olingan bolalarning muammo (ehtiyoj, qiziqish)larini hal etishga qaratilgan chora-tadbirlarni amalga oshirish uchun “Mehr daftari” jamgʻarmasi mablagʻlari hisobidan yordam koʻrsatilishi toʻgʻrisida qaror qabul qilish, ushbu qarorni tuman (shahar) hokimliklariga ijro uchun yuborish. |
3 ish kuni | |||
|
|
||||||
|
8-bosqich |
Tuman (shahar) hokimligi |
Tasdiqlangan yoʻl xaritasini XTV, SSV, Bandlik va mehnat munosabatlari, Mahalla va nuroniylarni qoʻllab-quvvatlash vazirliklari, Milliy gvardiya, Yoshlar ishlari agentligining hududiy boʻlinmalariga amalga oshirish uchun yuborish hamda zarur mablagʻlarni tegishli tashkilotlarga oʻtkazish. |
3 ish kuni | |||
|
|
||||||
|
9-bosqich |
XTV, SSV, Bandlik va mehnat munosabatlari, Mahalla va nuroniylarni qoʻllab-quvvatlash vazirliklari, Milliy gvardiya, Yoshlar ishlari agentligining hududiy boʻlinmalari |
Tasdiqlangan yoʻl xaritasiga muvofiq yetim bolalar va ota-ona qaramogʻidan mahrum boʻlgan bolalar, shu jumladan, vasiylik, homiylikka (patronatga) olingan bolalarning muammo (ehtiyoj, qiziqish)larini hal etishga qaratilgan chora-tadbirlarni amalga oshirish. |
Yoʻl xaritasida belgilangan muddatlarda | |||
|
|
||||||
|
10-bosqich |
Bolalarni himoya qilish shuʼbasi |
Yetim bolalar va ota-ona qaramogʻidan mahrum boʻlgan bolalar, shu jumladan, vasiylik, homiylikka (patronatga) olingan bolalarni “Mehr daftari”dan chiqarish yoki muddatni uzaytirish toʻgʻrisida tuman (shahar) hokimiga taklif kiritish. |
bola 25 yoshga toʻlganda | |||
|
|
||||||
|
11-bosqich |
Tuman (shahar) hokimligi |
Yetim bolalar va ota-ona qaramogʻidan mahrum boʻlgan bolalar, shu jumladan, vasiylik, homiylikka (patronatga) olingan bolalarni “Mehr daftari”dan chiqarish yoki muddatni uzaytirish toʻgʻrisida tuman (shahar) hokimi qarorini chiqarish. |
Taklif kiritilgandan soʻng 1 ish kunida |
(ilova Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)
Vazirlar Mahkamasining 2022-yil 17-yanvardagi 26-son qaroriga
2-ILOVA
2-ILOVA
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasi toʻgʻrisida
NIZOM
1-bob. Umumiy qoidalar
1. Mazkur Nizom “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasi (keyingi oʻrinlarda — “Mehr daftari” jamgʻarmasi) mablagʻlarini shakllantirish, ulardan foydalanish va nazorat qilish tartibini belgilaydi.
2. “Mehr daftari” tizimi doirasida amalga oshiriladigan chora-tadbirlarni moliyalashtirish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan “Mehr daftari” jamgʻarmasi tashkil etiladi.
3. “Mehr daftari” jamgʻarmasi yuridik shaxs hisoblanmaydi va uning mablagʻlari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida budjet tashkilotlarining budjetdan tashqari jamgʻarmalari shaklidagi ochilgan gʻazna hisobvaraqlarida jamlanadi.
4. Ushbu Nizomda quyidagi tushunchalardan foydalaniladi:
“Mehr daftari” tizimi — yetim bolalar va ota-ona qaramogʻidan mahrum boʻlgan bolalarning muammolarini oʻrganish hamda hal etish, ularning orzu-istaklarini roʻyobga chiqarishga hamda jamiyatga ijtimoiylashuviga koʻmaklashish, ularni vasiylikka (homiylikka, patronatga) olgan oilalarni ragʻbatlantirish, shuningdek, bolalarning ota-onasi yoki boshqa qonuniy vakillarining qaramogʻidan mahrum boʻlish sabablarini har tomonlama oʻrganish hamda aniqlangan muammolarni bartaraf etish boʻyicha kompleks chora-tadbirlarni oʻz ichiga olgan tizim;
oʻquv-tarbiya muassasalari — Oʻzbekiston Respublikasi Xalq taʼlimi vazirligi tizimidagi Mehribonlik uylari, Bolalar shaharchalari, Respublika bolalar oʻquv-tarbiya muassasalari, Oilaviy bolalar uylari, Oʻzbekiston Respublikasi Sogʻliqni saqlash vazirligi tizimidagi Bolalar uylari, “SOS — Oʻzbekiston bolalar mahallalari” uyushmasi boʻlinmalari (bolalarni muqobil parvarish qilish xizmatlari, yoshlarga hamrohlik qilish xizmatlari va ijtimoiy yetimlikning oldini olish xizmatlari);
yetim bolalar va ota-ona qaramogʻidan mahrum boʻlgan bolalar — oʻquv-tarbiya muassasalari tarbiyalanuvchilari va bitiruvchilari hamda vasiylikka (homiylikka, patronatga) olingan bolalar.
2-bob. “Mehr daftari” jamgʻarmasi mablagʻlarini shakllantirish manbalari va ularni undirish tartibi
5. Quyidagilar “Mehr daftari” jamgʻarmasi mablagʻlarini shakllantirish manbalari hisoblanadi:
2022-yil 1-yanvardan boshlab alkogol mahsulotlarining (pivo, tabiiy vino hamda import qilinadigan alkogol mahsulotlari bundan mustasno) ulgurji savdosi bilan shugʻullanuvchi korxonalar sof tushumining uch foizi miqdoridagi ajratmalar (keyingi oʻrinlarda — Maxsus ajratma);
homiylik mablagʻlari;
qonunchilikda taqiqlanmagan boshqa manbalar.
6. Maxsus ajratmaning hisobotini taqdim etish va uning toʻlov muddati kechiktirilgan har bir kun uchun Soliq kodeksiga muvofiq javobgarlik choralari qoʻllaniladi.
Alkogol mahsulotlarining ulgurji savdosi bilan shugʻullanuvchi korxonalar tomonidan Maxsus ajratma oʻzlari roʻyxatdan oʻtgan hududda tashkil etilgan “Mehr daftari” jamgʻarmasiga toʻlanadi.
7. Maxsus ajratmaning toʻgʻri hisoblab chiqarilishi va “Mehr daftari” jamgʻarmasiga belgilangan muddatlarda toʻlanishi boʻyicha nazorat davlat soliq xizmati organlari tomonidan amalga oshiriladi.
8. Moliya vazirligi va Davlat soliq qoʻmitasi tomonidan Maxsus ajratma boʻyicha hisobot shakli tasdiqlanadi hamda belgilangan tartibda Maxsus ajratma toʻlovchilariga yetkaziladi.
9. Maxsus ajratma boʻyicha hisobotni taqdim etish tartibi Oʻzbekiston Respublikasi Soliq kodeksining 292-moddasiga muvofiq amalga oshiriladi.
3-bob. “Mehr daftari” jamgʻarmasi mablagʻlaridan foydalanishning asosiy yoʻnalishlari
10. Quyidagilar “Mehr daftari” jamgʻarmasi mablagʻlaridan foydalanishning asosiy yoʻnalishlari hisoblanadi:
yetim bolalar va ota-ona qaramogʻidan mahrum boʻlgan bolalarning muammolarini hal etish, isteʼdodli bolalarni qoʻllab-quvvatlashga koʻmaklashish;
yetim bolalar va ota-ona qaramogʻidan mahrum boʻlgan bolalarni hayotga tayyorlash, ularning taʼlim-tarbiyasini tashkil etish, kasbga yoʻnaltirish va bandligini taʼminlash;
yetim bolalar va ota-ona qaramogʻidan mahrum boʻlgan, ayniqsa nogiron va surunkali kasalliklari boʻlgan bolalarning sogʻligini tiklash va saqlash;
yetim bolalar va ota-ona qaramogʻidan mahrum boʻlgan bolalarning kommunal toʻlovlar boʻyicha qarzdorliklarini qoplash;
bolalarning ota-onasi yoki boshqa qonuniy vakillarining qaramogʻidan mahrum boʻlish sabablarini oʻrganish natijasiga koʻra aniqlangan muammolarini bartaraf etish va ularning oldini olish;
yetim bolalar va ota-ona qaramogʻidan mahrum boʻlgan bolalarni vasiylikka (homiylikka, patronatga) olgan oilalarni ragʻbatlantirish;
qonunchilik hujjatlari bilan belgilangan yetim bolalar va ota-ona qaramogʻidan mahrum boʻlgan bolalarni qoʻllab-quvvatlashga qaratilgan boshqa xarajatlarni qoplash.
“Mehr daftari” jamgʻarmasi mablagʻlarining ushbu bandda nazarda tutilmagan boshqa maqsadlarga yoʻnaltirilishiga yoʻl qoʻyilmaydi.
4-bob. “Mehr daftari” jamgʻarmasi mablagʻlarini sarflash va boshqarish
11. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarida mazkur Nizomning ilovasiga muvofiq namunaviy tarkibda “Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasining vasiylik kengashi (keyingi oʻrinlarda — Vasiylik kengashi) tashkil etiladi.
Vasiylik kengashi oʻz faoliyatini jamoatchilik asosida amalga oshiradi.
12. “Mehr daftari” jamgʻarmasi mablagʻlarini shakllantirish va sarflash Vasiylik kengashi qaroriga koʻra amalga oshiriladi.
Vasiylik kengashi qarori Vasiylik kengashi yigʻilishining bayoni bilan rasmiylashtiriladi.
13. “Mehr daftari” jamgʻarmasi mablagʻlari hisobidan koʻrsatiladigan moddiy yordamlar tuman (shahar) hokimliklari tomonidan tasdiqlangan “Yoʻl xaritasi”ga muvofiq Vasiylik kengashi qaroriga asosan amalga oshiriladi.
Bunda:
Vasiylik kengashi tomonidan yetim bolalar va ota-ona qaramogʻidan mahrum boʻlgan bolalarga mazkur Nizomning 10-bandida nazarda tutilgan moddiy yordam ularning muammolari va orzu-istaklaridan kelib chiqib, bazaviy hisoblash miqdorining oʻttiz besh baravarigacha boʻlgan miqdorda beriladi;
moddiy yordam yetim bolalar va ota-ona qaramogʻidan mahrum boʻlgan bolalar muammolarining hajmi va hayotiy muhimligidan kelib chiqib, Vasiylik kengashi qaroriga asosan bazaviy hisoblash miqdorining oʻttiz besh baravaridan koʻp boʻlgan miqdorda, ammo bazaviy hisoblash miqdorining ellik baravaridan koʻp boʻlmagan miqdorda berilishi mumkin;
moddiy yordam “Yoʻl xaritasida” nazarda tutilgan maqsadlar uchun masʼul ijrochilar bilan kelishilgan holda, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan belgilangan tartibda moliyalashtiriladi va toʻgʻri-toʻgʻridan yetim bolalar va ota-ona qaramogʻidan mahrum boʻlgan bolalarga naqd pul yoki naqd pulsiz shaklda (bank plastik kartochkalari orqali va pul oʻtkazish yoʻli bilan) toʻlanishiga yoʻl qoʻyilmaydi.
14. Vasiylik kengashining yigʻilishlari har oyda kamida bir marta oʻtkaziladi. Vasiylik kengashi raisining tashabbusi bilan yoki zaruratga koʻra navbatdan tashqari yigʻilishlar ham tashkil etilishi mumkin.
15. Vasiylik kengashi raisi kengash yigʻilishlariga raislik qiladi.
16. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Bolalarni himoya qilish masalalari kotibiyati “Mehr daftari” jamgʻarmasining ishchi organi (keyingi oʻrinlarda — ishchi organ) hisoblanadi.
17. “Mehr daftari” jamgʻarmasi mablagʻlari boʻyicha daromadlar va xarajatlar smetasi Vasiylik Kengashi va ishchi organ takliflari asosida ishlab chiqiladi hamda tasdiqlangan xarajatlar smetasi tegishli hududiy moliya bosh boshqarmalarida roʻyxatdan oʻtkaziladi.
Xarajatlar smetasini shakllantirishda ushbu Nizomning 10-bandida nazarda tutilgan yoʻnalishdagi ishlarning manzilli roʻyxati ishchi organ tomonidan shakllantiriladi.
18. “Mehr daftari” jamgʻarmasining joriy yilda foydalanilmay qolgan mablagʻlari Oʻzbekiston Respublikasi Davlat budjetiga olib qoʻyilmaydi va ulardan keyingi yilda foydalaniladi.
19. Vasiylik kengashi:
“Mehr daftari” jamgʻarmasiga umumiy rahbarlik qiladi va uning faoliyatini nazorat qiladi;
har yili 25-dekabrgacha “Mehr daftari” jamgʻarmasining kelgusi yil uchun daromadlar va xarajatlarning yillik parametrlari hamda yillik ish rejasini tasdiqlaydi;
“Mehr daftari” jamgʻarmasi mablagʻlarini ushbu Nizomning 10-bandida nazarda tutilgan maqsadlarga yoʻnaltiradi;
“Mehr daftari” jamgʻarmasi mablagʻlarini taqsimlaydi, zarur hollarda tasdiqlangan xarajatlar rejalariga tegishli oʻzgartirishlar kiritadi;
“Mehr daftari” jamgʻarmasi mablagʻlaridan maqsadli va samarali foydalanilishini nazorat qiladi va ular boʻyicha tegishli qarorlar qabul qiladi;
“Mehr daftari” jamgʻarmasi faoliyatini yanada rivojlantirish uchun jismoniy va yuridik shaxslarning homiylik xayriyalarini va texnik koʻmak mablagʻlarini (grantlarni) jalb etish choralarini koʻradi;
“Mehr daftari” jamgʻarmasi mablagʻlarini shakllantirish, ulardan maqsadli va samarali foydalanish bilan bogʻliq boshqa vazifalarni amalga oshiradi.
20. Ishchi organ:
“Mehr daftari” jamgʻarmasining yillik ish rejasini ishlab chiqadi va tasdiqlash uchun Vasiylik kengashiga kiritadi;
Vasiylik kengashi aʼzolariga kengash yigʻilishi vaqti va oʻtkaziladigan joyi toʻgʻrisida xabar beradi;
Vasiylik kengashi yigʻilishining kun tartibiga kiritiladigan masalalarni tayyorlaydi, yigʻilish bayonnomasini rasmiylashtiradi;
davlat tomonidan berilgan ijtimoiy koʻmak va moddiy yordam toʻgʻrisidagi maʼlumotlarni “Mehr daftari”da qayd etib boradi;
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarning murojaatlari bilan ishlaydi.
Vasiylik kengashi qarori bilan ishchi organga qoʻshimcha vazifalar ham yuklanishi mumkin.
21. “Mehr daftari” jamgʻarmasining boʻsh mablagʻlarini tijorat banklarning depozitlarida joylashtirish taqiqlanadi.
5-bob. “Mehr daftari” jamgʻarmasi hisobotini yuritish
22. “Mehr daftari” jamgʻarmasi mablagʻlaridan foydalanish boʻyicha hisob va hisobot Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan yuritiladi.
23. “Mehr daftari” jamgʻarmasi daromadlari va xarajatlari toʻgʻrisidagi hisobotlarni taqdim etish tartibi Oʻzbekiston Respublikasi Budjet kodeksining 163-moddasiga muvofiq amalga oshiriladi.
24. Vasiylik kengashi raisi har chorakda “Mehr daftari” jamgʻarmasi daromadlari va xarajatlari ijrosi toʻgʻrisida tegishli xalq deputatlari tuman (shahar) Kengashiga hisobot berib boradi.
6-bob. Yakunlovchi qoidalar
25. “Mehr daftari” jamgʻarmasi mablagʻlaridan maqsadli va samarali foydalanish uchun masʼuliyat Vasiylik kengashiga yuklanadi.
26. Davlat moliyaviy nazorati inspeksiyasi hududiy boshqarmalari mazkur Nizom doirasida amalga oshiriladigan ishlar uchun ajratiladigan mablagʻlarning samarali va maqsadli ishlatilishini nazorat qiladi.
(26-band Oʻzbekiston Respublikasi Vazirlar Mahkamasining 2025-yil 1-martdagi 135-sonli qarori tahririda — Qonunchilik maʼlumotlari milliy bazasi, 03.03.2025-y., 09/25/135/0208-son)
27. Ushbu Nizom talablari buzilishida aybdor boʻlgan shaxslar qonunchilikka muvofiq javobgar boʻladilar.
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasi toʻgʻrisidagi nizomga
ILOVA
ILOVA
“Mehr daftari”ga kiritilgan yetim bolalar va ota-ona qaramogʻidan mahrum boʻlgan bolalarni qoʻllab-quvvatlash jamgʻarmasi vasiylik kengashining
TARKIBI
|
1. |
Lavozimiga koʻra |
— |
Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimi, Vasiylik kengashi raisi |
|
2. |
Lavozimiga koʻra |
— |
Milliy gvardiyaning Qoraqalpogʻiston Respublikasi, viloyatlar va Toshkent shahar boʻyicha boshqarmasi boshligʻi, Vasiylik kengashi raisining oʻrinbosari |
|
3. |
Lavozimiga koʻra |
— |
Qoraqalpogʻiston Respublikasi Xalq taʼlimi vaziri, viloyatlar va Toshkent shahar Xalq taʼlimi boshqarmalari boshliqlari |
|
4. |
Lavozimiga koʻra |
— |
Qoraqalpogʻiston Respublikasi sogʻliqni saqlash vaziri, viloyatlar va Toshkent shahar Sogʻliqni saqlash boshqarmalari boshliqlari |
|
5. |
Lavozimiga koʻra |
— |
Qoraqalpogʻiston Respublikasi mahalla va nuroniylarni qoʻllab-quvvatlash vaziri, viloyatlar va Toshkent shahar mahalla va nuroniylarni qoʻllab-quvvatlash boshqarmasi boshligʻi |
|
6. |
Kelishuvga koʻra |
— |
Qoraqalpogʻiston Respublikasi prokurori, viloyatlar va Toshkent shahar prokurori |
|
7. |
Lavozimiga koʻra |
— |
Qoraqalpogʻiston Respublikasi moliya vaziri, viloyatlar va Toshkent shahar Moliya bosh boshqarmasi boshligʻi |
|
8. |
Lavozimiga koʻra |
— |
Qoraqalpogʻiston Respublikasi bandlik va mehnat munosabatlari vaziri, viloyatlar va Toshkent shahar Bandlik va mehnat munosabatlari boshqarmasi boshligʻi |
|
9. |
Kelishuvga koʻra |
— |
“Mikrokreditbank” ATB hududiy filiali rahbari |
|
10. |
Kelishuvga koʻra |
— |
Qoraqalpogʻiston Respublikasi Joʻqorgʻi Kengesi, xalq deputatlari viloyatlar va Toshkent shahar Kengashi deputati |
|
11. |
Kelishuvga koʻra |
— |
ommaviy axborot vositalari vakili |
|
12. |
Lavozimiga koʻra |
— |
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining Bolalarni himoya qilish masalalari kotibiyati mudiri, Vasiylik kengashi kotibi |
Izoh. Vasiylik kengashi aʼzolari boshqa ishga oʻtgan taqdirda, Vasiylik kengashi tarkibiga ushbu lavozimlarga yangidan tayinlangan shaxslar yoki tegishli funksiyalarni bajarish zimmasiga yuklangan shaxslar kiritiladi.
Vasiylik kengashi tomonidan kengash tarkibiga davlat ulushiga ega boshqa tijorat banklari ham kiritilishi mumkin.
(ilova Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)
(Qonunchilik maʼlumotlari milliy bazasi, 18.01.2022-y., 09/22/26/0035-son; 06.08.2022-y., 09/22/431/0716-son; 10.08.2022-y., 09/22/438/0726-son; 03.03.2025-y., 09/25/135/0208-son)
