Hujjat kuchini yo‘qotgan " " 15.01.2022
Oʻzbekiston Respublikasi Vazirlar Mahkamasining
qarori
“Sogʻlom turmush tarzi” platformasi faoliyatini tashkil etish chora-tadbirlari toʻgʻrisida
 LexUZ sharhi
Mazkur qaror Oʻzbekistan Respublikasi Vazirlar Mahkamasining 2022-yil 15-yanvardagi 23-sonli “Aholining jismoniy tayyorgarlik darajasini baholash boʻyicha sport sinovlarini tashkil etish va oʻtkazish chora-tadbirlari toʻgʻrisida”gi qaroriga asosan oʻz kuchini yoʻqotgan.
Oʻzbekiston Respublikasi Prezidentining “Sogʻlom turmush tarzini keng tatbiq etish va ommaviy sportni yanada rivojlantirish chora-tadbirlari toʻgʻrisida” 2020-yil 30-oktabrdagi PF-6099-son Farmoni ijrosi yuzasidan Vazirlar Mahkamasi qaror qiladi:
1. Oʻzbekiston Respublikasi Turizm va sport vazirligi, Axborot texnologiyalari va kommunikatsiyalarini rivojlantirish vazirligi, Sogʻliqni saqlash vazirligi hamda Moliya vazirligi tomonidan aholini kunlik yurish va yugurishga targʻib qilish maqsadida “Sogʻlom turmush tarzi” platformasi (keyingi oʻrinlarda — platforma) yaratilganligi maʼlumot uchun qabul qilinsin.
2. Quyidagilarni nazarda tutuvchi “Sogʻlom turmush tarzi” platformasi faoliyatini tashkil etish tartibi toʻgʻrisidagi nizom ilovaga muvofiq tasdiqlansin:
platformaning mobil ilovasi va veb-portalidan foydalanish tartibi;
mobil ilova orqali fuqarolarning erishgan natijalariga koʻra ragʻbatlantirish;
mobil ilova orqali idoralararo baholash reytingini aniqlash hamda uning gʻoliblarini ragʻbatlantirish;
platformada toʻlovlarni amalga oshirish tartibi.
3. Belgilab qoʻyilsinki:
Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi tomonidan platforma toʻliq ishga tushirilganidan soʻng doimiy texnik jihatdan qoʻllab-quvvatlash sharti bilan Turizm va sport vazirligiga oʻtkazib beriladi;
“Aloqabank” aksiyadorlik-tijorat banki platforma faoliyatida texnik imkoniyatlarini inobatga olgan holda xizmat koʻrsatuvchi bank hisoblanadi;
platforma faoliyati tegishliligiga koʻra Turizm va sport vazirligi, Moliya vazirligi, Axborot texnologiyalari va kommunikatsiyalarini rivojlantirish vazirligi hamda Sogʻliqni saqlash vazirligi tomonidan nazorat qilib boriladi. Bunda:
Axborot texnologiyalari va kommunikatsiyalarini rivojlantirish vazirligi — platforma doimiy ravishda haqqoniy va faol ishlab turishi, shuningdek uning doimiy texnik qoʻllab-quvvatlanishi;
Moliya vazirligi — fuqarolarning platformadagi elektron hamyoniga oʻtkazilishi bilan bogʻliq toʻlovlarning moliyalashtirilishi;
Turizm va sport vazirligi — platformadan foydalanish shartlarini buzgan fuqarolarning ishtirokiga cheklovlar oʻrnatish, shuningdek ular toʻgʻrisidagi maʼlumotlarni tahlil qilish, tuzilgan reytinglar shaffofligi va oshkoraligi taʼminlanishi;
Sogʻliqni saqlash vazirligi — platformada foydalanuvchilar uchun taqdim etilayotgan taomlar kilokalloriyasi toʻgʻrisidagi maʼlumotlarning ishonchliligi uchun javobgar hisoblanadi.
4. Oʻzbekiston Respublikasi Turizm va sport vazirligi:
manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin;
Axborot texnologiyalari va kommunikatsiyalarini rivojlantirish vazirligi bilan birgalikda 2022-yil 1-yanvarga qadar platforma faoliyatini tashkil etish natijalari puxta tahlil qilingan holda, mazkur tizimni yanada takomillashtirish yuzasidan asoslantirilgan takliflarni Vazirlar Mahkamasiga kiritsin.
5. Belgilansinki, platforma 2021-yil 10-maydan test rejimda ishlaydi hamda 2021-yil 1-iyundan boshlab platforma toʻliq ishga tushiriladi va toʻlovlar belgilangan tartibda amalga oshiriladi.
6. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari — turizm va sport vaziri A.A. Abduxakimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 28-aprel,
253-son
Vazirlar Mahkamasining 2021-yil 28-apreldagi 253-son qaroriga
ILOVA
“Sogʻlom turmush tarzi” platformasi faoliyatini tashkil etish tartibi toʻgʻrisida
NIZOM
1-bob. Umumiy qoidalar
1. Ushbu Nizom “Sogʻlom turmush tarzi” platformasi (keyingi oʻrinlarda — platforma) faoliyatini tashkil etish tartibini belgilaydi.
2. Platforma aholini kunlik yurish va yugurishga targʻib qilish maqsadida tashkil etilgan boʻlib, u orqali:
Oʻzbekiston hududida bir sutka davomida oʻn ming va undan ortiq qadam yurgan 18 va undan yuqori yoshdagi Oʻzbekiston Respublikasi fuqarosining platformadagi elektron hamyoniga 3 ming soʻmdan;
har oyda har bir tuman (shahar) boʻyicha eng koʻp yurgan shaxsga 300 ming soʻmdan, har bir hudud boʻyicha eng koʻp yurgan shaxsga 500 ming soʻm, respublika boʻyicha eng koʻp yurgan shaxsga 1 mln soʻm qoʻshimcha ravishda platformadagi elektron hamyoniga oʻtkaziladi.
3. Ushbu Nizomda quyidagi asosiy tushunchalar qoʻllaniladi:
akkaunt — platforma foydalanuvchisining roʻyxatdan oʻtgan qisqacha nomi;
autentifikatsiya — foydalanuvchi identifikatorini tekshirish uchun foydalanuvchi nomi va paroli kabi maʼlumotlarini tekshirish bilan bogʻliq jarayon;
veb-portal — aholiga sogʻlom turmush tarzini tatbiq etish, targʻibot va tashviqot ishlarini tashkillashtirishda xizmat koʻrsatuvchi hamda vazirlik va idoralar, mahalliy davlat hokimiyati organlari va boshqa tashkilotlarda platformada roʻyxatdan oʻtgan xodimlarning yurish natijalariga koʻra, reytingini tuzuvchi dasturiy mahsulot;
mobil ilova — platformada roʻyxatdan oʻtgan fuqarolarga sogʻlom turmush tarzini tatbiq etuvchi, yurish natijasini koʻrsatib boruvchi hamda fuqarolarga elektron hamyoniga kelib tushgan mablagʻlarni koʻrib borish va toʻlov tizimlari orqali sarf qilishda foydalanadigan dasturiy mahsulot;
roʻyxatdan oʻtish — platforma foydalanuvchisini identifikatsiyalash va u toʻgʻrisidagi shaxsiy maʼlumotlarini qayta ishlash uchun moʻljallangan Yagona identifikatsiya tizimidan roʻyxatdan oʻtish;
fuqaro — mobil ilovadan hamda veb-portaldan foydalanuvchi, 18 va undan yuqori yoshdagi Oʻzbekiston Respublikasining fuqarosi;
elektron hamyon — foydalanuvchilarning shaxsiy kabinetida elektron pul mablagʻlari saqlanadigan va ulardan foydalanish imkonini beradigan dasturiy taʼminot.
4. Platforma mobil ilova va veb-portal dasturiy mahsulotlaridan iborat boʻladi. Bunda, mobil ilova orqali platformada roʻyxatdan oʻtgan fuqarolarning qadamlari toʻgʻrisidagi maʼlumot veb-portalga integratsiya qilingan holda, Turizm va sport vazirligi tomonidan koʻrib boriladi. Veb-portal orqali vazirlik va idoralar, mahalliy davlat hokimiyati organlari va boshqa tashkilotlarning platformada roʻyxatdan oʻtgan xodimlarini yurish natijalari reytingi tuziladi hamda mazkur veb-portalda yoritib boriladi.
5. Toʻlovlarni toʻlab berish hamda reyting baholash oshkoralik, xolislik, adolatlilik, tenglik va shaffoflik prinsiplari asosida amalga oshiriladi.
6. “Sogʻlom turmush tarzi” platformasidan foydalanish hamda pul oʻtkazmalarini fuqarolarning elektron hamyoniga qadar kelib tushishi ushbu Nizomga 1-ilovada keltirilgan sxemaga muvofiq amalga oshiriladi.
2-bob. Mobil ilova va veb-portaldan foydalanish tartibi
7. Mobil ilovadan foydalanish uchun fuqarolar Google Play Market yoki AppStore internet doʻkonlaridan mobil ilovani yuklab olishi hamda Android operatsion tizimida Google Fit, iOS operatsion tizimida NealthKit ilovalarini mobil qurilmasiga oʻrnatishi lozim.
8. Mobil ilovadan foydalanish uchun foydalanuvchining telefon qurilmasi Android yoki iOS operatsion tizimlaridan birida ishlashi va akselerometr qurilmasiga ega boʻlishi kerak.
9. Fuqaro mobil ilovadan foydalanishi uchun “Elektron hukumat” tizimi foydalanuvchilarini identifikatsiyalashning yagona axborot tizimi (id.egov.uz) orqali roʻyxatdan oʻtgan boʻlishi hamda autentifikatsiya va identifikatsiyasini amalga oshirishi zarur.
10. Mobil ilovadan foydalanishi uchun fuqarolar faqat bitta qurilmadan roʻyxatdan oʻtishi lozim va uning qadamlari faqat shu qurilma maʼlumotlari asosida hisobga olinadi.
11. Fuqaro mobil ilovadan roʻyxatdan oʻtgandan keyin unga elektron hamyon ochiladi va tegishli toʻlovlar mazkur hamyon orqali amalga oshiriladi.
12. Fuqaroning har kunlik yurgan qadamlari hisobi mobil qurilmadagi qadamlarni hisoblash moduli orqali yuritiladi.
13. Fuqaroning Oʻzbekiston Respublikasi hududidagi bir sutka davomida oʻn ming va undan ortiq qadam yurganligi, har oyda har bir tuman (shahar), har bir hudud, respublika boʻyicha eng koʻp yurganligi platforma orqali avtomatik tarzda aniqlanadi hamda Turizm va sport vazirligining “Aloqabank” aksiyadorlik-tijorat bankida (keyingi oʻrinlarda — “Aloqabank” ATB) ochilgan tranzit hisobvaragʻi orqali toʻlovlar amalga oshiriladi.
14. Turizm va sport vazirligi tomonidan buyurtma platforma maʼlumotlari asosida avtomatik tarzda shakllantiriladi va Moliya vazirligining Gʻaznachiligiga moliyalashtirish uchun yuboriladi. Buyurtmaga muvofiq Turizm va sport vazirligining Moliya vazirligi Gʻaznachiligida ochilgan shaxsiy gʻazna hisobvaragʻidan vazirlikning “Aloqabank” ATBda ochilgan tranzit hisobvaragʻi orqali fuqaroning elektron hamyoniga oʻtkazib beriladi.
15. Fuqaroga mobil ilovadan foydalangan holda uning elektron hamyoniga kelib tushgan toʻlovlar boʻyicha maʼlumotlarni koʻrib borish, shuningdek elektron hamyonidagi mablagʻlarni bank kartalariga oʻtkazish yoki toʻlovlarni amalga oshirish imkoniyati taqdim etiladi.
16. Fuqaro tomonidan uning elektron hamyonidan bank kartasiga mablagʻlar oʻtkazilganda yoki toʻlov amalga oshirilganda toʻlov summasi elektron hamyon tizimi orqali ushbu hamyonga biriktirilgan Yagona virtual karta hisobvaragʻidan amalga oshiriladi.
17. Yagona virtual karta hisobvaragʻidan amalga oshirilgan tranzaksiyalar “Aloqabank” ATB tomonidan mustaqil ravishda Turizm va sport vazirligining ushbu bankdagi depozit hisobvaragʻi mablagʻlari hisobidan qoplanadi.
18. Veb-portal orqali aholiga sogʻlom turmush tarzini tatbiq etuvchi hamda vazirlik va idoralar, mahalliy davlat hokimiyati organlari va boshqa tashkilotlarda platformada roʻyxatdan oʻtgan xodimlarning yurish natijalariga koʻra, reytingi toʻgʻrisidagi maʼlumotlar taqdim etiladi.
19. Veb-portaldagi vazirlik va idoralar, mahalliy davlat hokimiyati organlari va boshqa tashkilotlarning platformada roʻyxatdan oʻtgan xodimlari va ularning yurish natijalari toʻgʻrisidagi maʼlumotlar mobil ilovadagi maʼlumotlardan avtomatik tarzda olinadi.
3-bob. Mobil ilova orqali fuqarolarning erishgan natijalariga koʻra ragʻbatlantirish
20. Bir sutka davomida oʻn ming va undan ortiq qadam yurgan fuqarolar hamda bir oy davomida har bir tuman (shahar), hudud hamda respublika boʻyicha eng koʻp yurgan shaxslar mobil ilova orqali avtomatlashgan tarzda Turizm va sport vazirligi tomonidan tahlil qilinadi.
Tahlil natijalariga koʻra, mobil ilova orqali roʻyxatdan oʻtgan fuqaro bir sutka davomida oʻn ming va undan ortiq qadam yurgan taqdirda, uning elektron hamyoniga uch ming soʻm oʻtkazib beriladi.
Har oyda uzluksiz ravishda har bir tuman (shahar) boʻyicha eng koʻp yurgan shaxsga 300 ming soʻmdan, har bir hudud boʻyicha eng koʻp yurgan fuqaroga 500 ming soʻm, respublika boʻyicha eng koʻp yurgan fuqaroga 1 mln soʻm qoʻshimcha ravishda elektron hamyoniga oʻtkazib beriladi.
Har oyda uzluksiz ravishda har bir tuman (shahar) boʻyicha, har bir hudud boʻyicha, respublika boʻyicha eng koʻp yurgan fuqarolar koʻrsatkichlari teng boʻlib qolgan hollarda, yuqorida belgilangan miqdordagi mablagʻlar ularning har biriga toʻlab beriladi.
Platformada fuqaroning yurgan qadamlari hisobi soat 00-00 dan 23-59 gacha yuritiladi.
Mobil ilova ish faoliyati davomida texnik nosozliklar kelib chiqadigan taqdirda, tegishli pul mablagʻlari 24 soat davomida oʻtkazib beriladi.
Oldingi tahrirga qarang.
(20-bandning yettinchi xatboshisi Oʻzbekiston Respublikasi Prezidentining 2021-yil 30-dekabrdagi PQ-73-sonli qaroriga asosan chiqarilgan — Qonunchilik maʼlumotlari milliy bazasi, 30.12.2021-y., 07/21/73/1227-son)
21. Turizm va sport vazirligining Moliya vazirligining Gʻaznachiligida ochilgan shaxsiy gʻazna hisobvaragʻiga tushadigan tegishli daromadlar manbalarining bir meʼyorda doimiy tushish imkoniyati cheklanganligini inobatga olib, mazkur shaxsiy gʻazna hisobvaragʻida 500,0 mln soʻmdan kam mablagʻ qolsa, mobil ilova boʻyicha foydalanuvchilarga toʻlovlar, ushbu shaxsiy gʻazna hisobvaragʻida 5,0 mlrd soʻmgacha mablagʻlar boʻlgunga qadar, avtomatik tarzda toʻxtatiladi.
Agar shaxsiy gʻazna hisobvaragʻida mablagʻlar 5,0 mlrd soʻmdan oshsa, shu kundan boshlab mobil ilovada oʻn ming va undan ortiq qadam yurgan fuqarolarga toʻlovlar avtomatik tarzda amalga oshirilishi boshlanadi.
Bunda, shaxsiy gʻazna hisobvaragʻidagi mablagʻlar 500,0 mln soʻmdan 5,0 mlrd soʻmgacha boʻlgungacha davrda mobil ilovada oʻn ming va undan ortiq qadam yurgan fuqarolarga toʻlanadigan toʻlovlar toʻlanmaydi.
Shu bilan birga, ushbu bandda nazarda tutilgan shartlar har oyda uzluksiz ravishda har bir tuman (shahar) boʻyicha eng koʻp yurgan fuqaroga 300 ming soʻmdan, har bir hudud boʻyicha eng koʻp yurgan fuqaroga 500 ming soʻm, respublika boʻyicha eng koʻp yurgan fuqaroga 1 mln soʻmdan toʻlanadigan toʻlovlarga nisbatan tatbiq etilmaydi.
22. Turizm va sport vazirligi tomonidan amalga oshirilgan toʻlovlar boʻyicha hisobotlar, reyting natijalari toʻgʻrisidagi maʼlumotlar, shuningdek Moliya vazirligining Gʻaznachiligida ochilgan Turizm va sport vazirligining shaxsiy gʻazna hisobvaragʻidagi mablagʻlar 500,0 mln soʻmdan 5,0 mlrd soʻmgacha boʻlgan davri haqidagi maʼlumotlar platforma veb-portalida eʼlon qilinib boriladi.
23. Toʻlovlarning haqqoniyligini nazorat qilish Moliya vazirligining Davlat moliyaviy nazorati bosh boshqarmasi tomonidan amalga oshiriladi.
4-bob. Mobil ilova orqali idoralararo baholash reytingini aniqlash hamda uning gʻoliblarini ragʻbatlantirish
24. Idoralararo baholash reytingi quyidagi mezonlar boʻyicha 100 ballik tizimda amalga oshiriladi:
“Sogʻlom turmush tarzi” mobil ilovasidan roʻyxatdan oʻtgan tashkilot xodimlari soni (jami xodimlar soniga nisbatan foizda) — 30 ballgacha;
bir sutka davomida oʻn ming va undan ortiq qadam yurgan eng koʻp tashkilot xodimlari soni (jami xodimlar soniga nisbatan foizda) — 50 ballgacha;
bir sutka davomida oʻn ming va undan ortiq qadam yurgan tashkilotning 50 yoshdan oshgan eng koʻp xodimlari uchun qoʻshimcha ravishda — 20 ballgacha baholanadi.
25. Vazirlik va idoralar, mahalliy davlat hokimiyati organlari va boshqa tashkilotlarda platformada roʻyxatdan oʻtgan xodimlari hamda ularning yurish va natijalari 100 ballik reyting tizimi asosida quyidagicha baholanadi:
85,0 — 100 ball toʻplanganda — “namunali”;
71,0 — 84,9 ball toʻplaganda — “yaxshi”;
50,0 — 70,9 ball toʻplaganda — “qoniqarli”;
49,9 ball va undan kam ball toʻplaganda — “qoniqarsiz”.
5-bob. Gʻoliblarni ragʻbatlantirish tartibi
26. Vazirlik va idoralar, mahalliy davlat hokimiyati organlari va boshqa tashkilotlarning platformada roʻyxatdan oʻtgan xodimlari hamda ularning yurish natijalari va yakuniy reyting baholari Turizm va sport vazirligi tomonidan tasdiqlanadi.
27. Yarim yillik yakunida reyting ballari natijalari boʻyicha “namunali” deb topilgan davlat organlari (tashkilotlar) rahbarlarini ragʻbatlantirish (esdalik sovgʻalari, diplom va boshqalar) Turizm va sport vazirligining hamda hududiy tashkilotlar rahbarlarini ragʻbatlantirish (esdalik sovgʻalari, diplom va boshqalar) hududiy ommaviy sport tadbirlarini oʻtkazish uchun rejalashtirilgan mablagʻlar hisobidan qoplanadi.
6-bob. Yakunlovchi qoidalar
28. Mobil ilova orqali fuqarolarning elektron hamyoniga oʻtkazmalar ularning geolokatsiyalari yordamida fuqarolar tomonidan haqiqatdan tegishli masofani bosib oʻtganligi tasdiqlangandan keyin oʻtkaziladi.
29. Axborot texnologiyalari va kommunikatsiyalarini rivojlantirish vazirligi Turizm va sport vazirligi bilan birgalikda doimiy ravishda platformada belgilangan tartibni buzgan holda qadamlarni bajarish va elektron hamyoniga pul tushirayotgan shaxslarni aniqlashga qaratilgan monitoring tadbirlarini olib boradi.
30. Belgilangan tartibni buzgan (buzishda gumon qilingan) fuqarolarning akkauntiga cheklovlar (vaqtincha cheklovlar) oʻrnatiladi.
31. Ushbu Nizomning talablariga rioya etilishini nazorat qilish qonunchilik hujjatlariga muvofiq amalga oshiriladi.
32. Ushbu Nizom talablarini buzgan shaxslar qonunchilik hujjatlariga muvofiq javobgarlikka tortiladi.
“Sogʻlom turmush tarzi” platformasining faoliyatini tashkil etish tartibi toʻgʻrisidagi nizomga
1-ILOVA
“Sogʻlom turmush tarzi” platformasidan foydalanish hamda pul oʻtkazmalarini fuqarolarning elektron hamyoniga qadar kelib tushish
SXEMASI

Bosqichlar

Subyektlar

Tadbirlar

Bajarish muddati

1-bosqich

Bank, Platforma

1. Elektron hamyon kartalari uchun yagona virtual kartani tizimga biriktirish

2. Elektron hamyon kartalari uchun yagona virtual karta hamda tranzit hisobvaragʻini ochish

Zaruratga qarab

2-bosqich

Foydalanuvchi

id.egov.uz orqali avtorizatsiyadan oʻtish

1 soat davomida

3-bosqich

Platforma

1. Elektron hamyon mavjudligini tekshirish (Elektron hamyon mavjud boʻlsa)

2. Foydalanuvchiga Elektron hamyon kartasini yaratish, Elektron hamyon kartasini bankdagi yagona virtual kartaga biriktirish (Elektron hamyon mavjud boʻlmasa)

Avtomatlashgan tarzda

4-bosqich

Foydalanuvchi

Elektron hamyon karta raqamini kiritish

Avtomatlashgan tarzda

 

5-bosqich

Platforma

1. Foydalanuvchi Elektron hamyon kartasini roʻyxatdan oʻtkazish.

Avtomatlashgan tarzda

2. Har kungi bosib oʻtilgan qadamlar sonini hisoblash.

24 soat davomida

3. Bir kun oldingi yakunlangan kun boʻyicha foydalanuvchilar uchun Ragʻbatlantirish reyestrini shakllantirish.

Avtomatlashgan tarzda

6-bosqich

Turizm va sport vazirligi

1. Toʻlovlar reyestrini tasdiqlash.

2. Mablagʻ ajratish boʻyicha gʻaznachilikka soʻrovnoma yuborish.

Soʻrovnoma kelib tushgandan keyin bir ish kuni davomida

7-bosqich

Moliya gʻaznachiligi

 

Gʻaznachilik hisobvaragʻidan vazirlikning “Aloqabank” ATdagi hisobvaragʻiga toʻlovlarni amalga oshirish.

Soʻrovnoma kelib tushgandan keyin bir ish kuni davomida

8-bosqich

Bank

1. Turizm va sport vazirligi hisobvaragʻiga mablagʻlarni kirim qilish.

Avtomatlashgan tarzda

2. Yagona virtual karta hisobini toʻldirish.

mablagʻ kirim qilingan vaqtdan boshlab uch soat davomida

9-bosqich

Platforma

1. Turizm va sport vazirligi hisobvaragʻiga mablagʻlarni kirim qilish.

Avtomatlashgan tarzda

2. Yagona virtual karta hisobini toʻldirish.

Oldingi tahrirga qarang.
(2-ilova Oʻzbekiston Respublikasi Prezidentining 2021-yil 30-dekabrdagi PQ-73-sonli qaroriga asosan oʻz kuchini yoʻqotgan — Qonunchilik maʼlumotlari milliy bazasi, 30.12.2021-y., 07/21/73/1227-son)
(Qonun hujjatlari maʼlumotlari milliy bazasi, 29.04.2021-y., 09/21/253/0390-son; Qonunchilik maʼlumotlari milliy bazasi, 30.12.2021-y., 07/21/73/1227-son)