Oʻzbekiston Respublikasi Prezidenti huzuridagi Iqtisodiy islohot, tadbirkorlik va xorijiy investitsiyalar boʻyicha idoralararo Kengash qarorini va Vazirlar Mahkamasining eksport imkoniyatlarini rivojlantirish davlat dasturini ishlab chiqish toʻgʻrisida 1997-yil 28-fevraldagi 116-son qarorini bajarish yuzasidan Vazirlar Mahkamasi qaror qiladi:

1. Eksport imkoniyatlarini rivojlantirishni ragʻbatlantirish respublika kengashi 1-ilovaga* muvofiq tuzilsin.

Eksport imkoniyatlarini rivojlantirishni ragʻbatlantirish respublika kengashiga:

xalq xoʻjaligi ayrim tarmoqlarini rivojlantirish va ularning tuzilmasini oʻzgartirishning kompleks dasturlari asosida Eksport imkoniyatlarini rivojlantirish davlat dasturini tayyorlash va amalga oshirish;

respublika mintaqalarida eksport imkoniyatlarini koʻpaytirish va importning oʻrnini bosuvchi ishlab chiqarishlarni rivojlantirish boʻyicha aniq maqsadga qaratilgan vazifalarni ishlab chiqish;

yuqori samarali, tez qoplanadigan innovatsiya loyihalari boʻyicha takliflar tayyorlash va ularni amalga oshirish yuzasidan aniq chora-tadbirlar koʻrish;

mahsulot eksport qiluvchilarni davlat tomonidan qoʻllab-quvvatlash yuzasidan takliflar kiritish uchun javobgarlik yuklansin.

2. Eksport imkoniyatlarini rivojlantirishni ragʻbatlantirish respublika kengashi toʻgʻrisidagi nizom 2-ilovaga muvofiq tasdiqlansin.

Respublika kengashi bir hafta muddatda 1997-yilgi ish rejasini ishlab chiqsin va tasdiqlasin.

3. Eksport imkoniyatlarini rivojlantirish davlat dasturi boʻlimlarini ishlab chiqish boʻyicha ishchi guruhlar tarkibi 3-ilovaga* muvofiq tasdiqlansin.

4. “Oʻzistiqbolstat” davlat qoʻmitasi ishchi guruhlar rahbarlari bilan birgalikda vazirliklar, idoralar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining takliflarini puxta ishlab chiqsin hamda 1997-yil 1-maygacha Vazirlar Mahkamasiga Oʻzbekistonning Eksport imkoniyatlarini rivojlantirish davlat dasturi loyihasini taqdim etsin.

5. Belgilab qoʻyilsinki, Respublika kengashining qarorlari barcha vazirliklar, idoralar, korporatsiyalar, konsernlar, uyushmalar, mulkchilik shakllaridan qatʼi nazar, korxonalar va tashkilotlar tomonidan bajarilishi majburiy hisoblanadi.

6. Vazirlar Mahkamasining boj poshlinalari stavkalarini koʻrib chiqish boʻyicha idoralararo komissiya tarkibini tasdiqlash toʻgʻrisida 1995-yil 25-iyuldagi 287-son qarori 5-bandining 13-xat boshi va ushbu qarorga 14-ilova oʻz kuchini yoʻqotgan deb hisoblansin, bu komissiyaning funksiyalari Eksport imkoniyatlarini rivojlantirishni ragʻbatlantirish respublika kengashiga berilsin.

7. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.

1.1. Eksport imkoniyatlarini rivojlantirishni ragʻbatlantirish respublika kengashi (keyingi oʻrinlarda Kengash deb ataladi) Vazirlar Mahkamasining 1997-yil 28-fevraldagi 116-son qaroriga muvofiq tashkil etilgan.

1.2. Kengashning faoliyati eksport imkoniyatlarini rivojlantirish, ishlab chiqarilayotgan mahsulotlarning raqobatbardoshliligini oshirish yoki ishlab chiqarishlarni xalqaro standartlarga mos yuqori sifatli mahsulotlar ishlab chiqarishga qayta ixtisoslashtirish, eksport hajmlarini kengaytirishdan mulkchilikning barcha shakllaridagi korxonalarning iqtisodiy manfaatdorligini oshirish boʻyicha respublikada olib borilayotgan ishlarning samaradorligini oshirishga qaratilgan.

1.3. Kengash oʻz faoliyatida Oʻzbekicton Respublikasining qonunlariga, Oʻzbekiston Respublikasi Prezidentining farmonlariga, Oʻzbekiston Respublikasi Oliy Majlisining qarorlariga, Vazirlar Mahkamasining qarorlari va farmoyishlariga, Oʻzbekiston Respublikasining boshqa davlatlar va xalqaro tashkilotlar bilan tuzgan bitimlariga amal qiladi.

1.4. Kengash oʻz faoliyatini Kengash raisi tomonidan tasdiqlanadigan ish dasturiga muvofiq muntazam oʻtkaziladigan majlislar va maslahat uchrashuvlari shaklida amalga oshiradi.

Quyidagilar Kengashning asosiy vazifalari hisoblanadi:

2.1. Uzoq muddatli tashqi iqtisodiy strategiyani - respublikaning Eksport imkoniyatlarini rivojlantirish davlat dasturini ishlab chiqish.

2.2. Respublika mintaqalarida eksport imkoniyatlarini koʻpaytirish va importning oʻrnini bosuvchi ishlab chiqarishlarni rivojlantirish boʻyicha aniq maqsadga qaratilgan vazifalarni ishlab chiqish.

2.3. Amalga oshirilayotgan iqtisodiy islohotlarning qisqa muddatli va uzoq muddatli maqsadlari, shuningdek Oʻzbekiston Respublikasining Jahon savdo tashkilotiga kirishi munosabati bilan uning xalqaro majburiyatlari asosida eksport siyosatini ishlab chiqish.

2.4. Eksportni rivojlantirish maqsadli jamgʻarmasini tashkil etish yoʻli bilan moliyaviy qoʻllab-quvvatlashning davlat tizimini tashkil etish boʻyicha takliflar kiritish.

2.5. Eksport imkoniyatlarini va importning oʻrnini bosuvchi ishlab chiqarishlarni rivojlantivishning ustuvor yoʻnalishlarini belgilash boʻyicha takliflar kiritish.

2.6. Eksportga mahsulotlar (ishlar, xizmatlar) ishlab chiqarish va sotish bilan bogʻliq masalalar kompleksini operativ hal etish (xomashyo va yarim tayyor mahsulotlar narxlarini, transport va boj tariflarini boshqarish va boshqalar).

2.7. Moliya va moddiy-texnika resurslarini, shu jumladan, investitsiyalarni yuqori samarali, tez qoplanadigan investitsiya loyihalarini amalga oshirishga, shuningdek xomashyo va yarim tayyor mahsulotlarni yuqori darajada ishlash va dastlabki ishlash yoʻli bilan mahsulotlar ishlab chiqarish bilan bogʻliq tarmoqlarga jalb etishga oid takliflar kiritish.

2.8. Turizm, aloqa, transportda tashish, qurilish-pudrat ishlari, fan, taʼlim va informatika sohasida tovarlar, ishlar va xizmatlar eksportini rivojlantirishni iqtisodiy ragʻbatlantirish siyosatini ishlab chiqish.

2.9. Davlat boshqaruvi organlari faoliyatini muvofiqlashtirish, Hukumatning eksportni kengaytirish va importning oʻrnini bosish loyihalarni, shu jumladan, xorijiy sarmoyani jalb qilgan holda, amalga oshirish boʻyicha qarorlari vazirliklar, idoralar tomonidan bajarilishini nazorat qilish.

2.10. Eksport, mahsulot eksport qiluvchilarni zarur huquqiy va yoʻriqnoma hujjatlar bilan taʼminlashning yagona axborot tizimini, eksportga mahsulotlar ishlab chiqaruvchi korxonalarga amaliy yordam koʻrsatish uchun konsalting, injiniring, huquqiy va boshqa xizmatlarni tashkil etish masalalarini tartibga soluvchi qonunlar va normativ-huquqiy hujjatlarni takomillashtirishga doir ishlarni tashkil etish.

Kengash oʻziga yuklangan vazifalarga muvofiq:

3.1. Ishlab chiqilgan prinsiplar va iqtisodiyotni isloh qilish ustuvorliklari asosida eksport imkoniyatlarini va importning oʻrnini bosuvchi ishlab chiqarishlarni rivojlantirishning asosiy yoʻnalishlarini koʻrib chiqish uchun Oʻzbekiston Respublikasi Vazirlar Mahkamasiga kiritadi hamda ularni amalga oshirishning eng samarali yoʻllarini taklif etadi.

3.2. Respublikaning eksport dasturini, iqtisodiyot ustuvor tarmoqlarining eksportni kengaytirish va importning oʻrnini bosish maqsadli dasturlarini amalga oshirishning samarali mexanizmlarini ishlab chiqadi.

3.3. Mahsulot ishlab chiqaruvchilarning turli guruhlarining, eng avvalo kooperatsiya aloqalarini rivojlantirishni talab etuvchi texnik jihatdan murakkab mahsulotlar ishlab chiqaruvchi guruhlarning iqtisodiy manfaatlari kelishilishini taʼminlaydi.

3.4. Eksport siyosati tarkibiy, tarmoq va mintaqaviy siyosat, innovatsiya faoliyati bilan bogʻlanishini taʼminlaydi.

3.5. Kichik biznesning eksport faolligini ragʻbatlantirish masalalarini koʻrib chiqadi.

3.6. Boj poshlinalari stavkalarini koʻrib chiqishga doir takliflar tayyorlaydi.

3.7. Eksport imkoniyatlarini rivojlantirishni taʼminlovchi innovatsiya hamkorligi sohasida xalqaro moliyaviy va iqtisodiy tashkilotlar bilan hamkorlikning ustuvor yoʻnalishlarini tanlashga doir takliflar tayyorlaydi hamda erishilgan yechimlarni amalga oshirishni nazorat qiladi.

3.8. Vazirliklar, idoralar, korporatsiyalar, uyushmalar, korxonalar va tashkilotlarning, joylardagi davlat hokimiyati organlarining ularning eksport imkoniyatlarini rivojlantirish konsepsiyalari va dasturlarini ishlab chiqish, eksportni kengaytirish va importning oʻrnini bosish boʻyicha investitsiya takliflari va loyihalarini koʻrib chiqish va amalga oshirish masalalaridagi faoliyatini muvofiqlashtiradi.

3.9. Xoʻjalik yurituvchi subyektlarning eksport faoliyati davlat monitoringi tizimi doirasida ularning va davlat boshqaruvi tegishli organlarining:

respublikaning mineral-xomashyo imkoniyatlari mavjudligiga asoslangan anʼanaviy eksport hajmini koʻpaytirish imkoniyatlaridan foydalanish;

strategik muhim materiallar va xomashyo bazasida qayta ishlovchi va qazib oluvchi tarmoqlarni rivojlantirish tadbirlarini amalga oshirish;

qoʻshilgan qiymat darajasi yuqori boʻlgan eksportga yoʻnaltirilgan ilm-fanni koʻplab talab qiladigan va mashina-texnika mahsulotlarni yigʻma ishlab chiqarishni tashkil etishga doir ishlab chiqilgan takliflarni bajarish;

eksportga yoʻnaltirilgan investitsiya loyihalarining oʻz vaqtida koʻrib chiqilishi va ekspertizadan oʻtkazilishi;

eksportga yoʻnaltirilgan va importning oʻrnini bosuvchi investitsiya loyihalari roʻyxatini tuzish va uni ehtimol tutilgan investorlar orasida tarqatish;

amaldagi qonun hujjatlariga muvofiq mahsulot eksport qiluvchi korxonalarga berilgan soliq va boj ustunliklari va boshqa imtiyozlarni roʻyobga chiqarish;

Kengash vakolatiga kiruvchi boshqa masalalar boʻyicha hisobotlarni eshitadi.

3.10. Mahsulot eksport qiluvchilarni zarur qonun hujjatlari va normativ hujjatlar, yoʻriqnomalar va axborot-maʼlumotnoma materiallari (jahon bozori konyunkturasi, ehtimol tutilgan hamkorlar toʻgʻrisidagi va boshqalar) bilan taʼminlash maqsadida ularni axborot bilan taʼminlashning yagona tizimini ishlab chiqish va joriy etishga koʻmaklashadi.

3.11. Eksport faoliyatini ragʻbatlantirishning xalqaro amaliyoti tajribasini oʻrganish va respublikaning amaldagi qonun hujjatlarini tahlil qilish asosida Vazirlar Mahkamasiga eksport imkoniyatlarini rivojlantirish sohasida qonun hujjatlari va normativ-huquqiy hujjatlarni yanada takomillashtirish toʻgʻrisida takliflar kiritadi.

3.12. Xoʻjalik yurituvchi subyektlarning eksport faoliyati natijalari asosida har yili yilning eng yaxshi eksport qiluvchilarini aniqlaydi va “Eksportni rivojlantirishda eng salmoqli natijalarga erishganlik uchun har yillik milliy mukofotlarni berish tartibi”ga muvofiq ularni mukofotlaydi.

4.1. Kengash tarkibiga: Kengash raisi, Kengash aʼzolari, ishchi guruhlar rahbarlari kiradi.

4.2. Kengash tarkibiga kengashning raisi, u boʻlmagan vaqtda uning oʻrinbosari boshchilik qiladi. Kengash raisi umumiy rahbarlikni amalga oshiradi, uning faoliyatining bosh yoʻnalishini belgilaydi.

Rais oʻrinbosarlari Respublika Kengashi ish rejasi va uning qarorlari bajarilishini nazorat qiladilar.

4.3. Kengashga lavozimiga koʻra Oʻzbekiston Respublikasi Bosh vaziri boshchilik qiladi.

4.4. Kengash tarkibi Vazirlar Mahkamasining qarori bilan tasdiqlanadi. Kengash tarkibidagi kadrlashni almashtirib turish Kengash raisi tomonidan amalga oshiriladi.

4.5. Ishchi guruhlar Kengashning kotibiyatlari hisoblanadi, ular uning majlislarini tayyorlaydi, uning qarorlarini barcha manfaatdor vazirliklar va idoralar, korxonalar va tashkilotlarga yetkazadi, qabul qilingan qarorlarning amalga oshirilishini nazorat qiladi.

4.6. Ishchi guruhlar rahbarlari va aʼzolariga ish rejasiga muvofiq belgilangan aniq ish biriktirib qoʻyiladi.

4.7. Kengashning ishi uning kalendar yilga tuzilgan rejasiga muvofiq tashkil etiladi. Kengash majlislari har chorakda oʻtkaziladi. Majlis kun tartibi majlis boshlanishidan 15 kun oldin belgilanadi va uning aʼzolariga yuboriladi.

4.8. Kengash qarorlari, uning vakolatlari doirasida, barcha vazirliklar, idoralar, korporatsiyalar, konsernlar, uyushmalar, korxonalar, tashkilotlar, joylardagi davlat hokimiyati mahalliy organlari tomonidan bajarilishi majburiy hisoblanadi. Kengash qarorlari bayonnomalar shaklida qabul qilinadi.