Oʻzbekiston Respublikasi Vazirlar Mahkamasining
qarori
Tuman fermer, dehqon xoʻjaliklari va tomorqa yer egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Fermer xoʻjaliklarida hisob tizimini tubdan yaxshilash va ularga bank xizmatlari koʻrsatishni takomillashtirishning qoʻshimcha chora-tadbirlari toʻgʻrisida” 2018-yil 2-iyuldagi PQ-3824-son qaroriga muvofiq Vazirlar Mahkamasi qaror qiladi:
1. Tuman fermer, dehqon xoʻjaliklari va tomorqa egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari (keyingi oʻrinlarda markazlar deb ataladi) tomonidan bepul konsalting xizmatlari koʻrsatish tartibi toʻgʻrisidagi nizom ilovaga muvofiq tasdiqlansin.
2. Belgilab qoʻyilsinki, markazlar:
tuman fermer, dehqon xoʻjaliklari va tomorqa yer egalari kengashlari aʼzosi hisoblanadigan, davlat xaridlari uchun paxta xomashyosi va boshoqli don yetishtiruvchi fermer xoʻjaliklariga bepul konsalting xizmatlari koʻrsatadi;
tuman fermer, dehqon xoʻjaliklari va tomorqa yer egalari kengashlarining taklifiga koʻra moliyaviy resurslari cheklangan va buxgalteriya hisobiga ega boʻlmagan, aʼzolik badallarini oʻz vaqtida toʻlaydigan, yer va suv resurslaridan samarali foydalanuvchi, qishloq xoʻjaligi mahsulotlarining boshqa turlarini yetishtiruvchi fermer xoʻjaliklariga shartnomaga muvofiq bepul konsalting xizmatlari koʻrsatishlari mumkin;
Oldingi tahrirga qarang.
ushbu bandning ikkinchi va uchinchi xatboshilarida nazarda tutilmagan fermer xoʻjaliklariga, shuningdek, qishloq xoʻjalik mahsulotlari yetishtiruvchi boshqa xoʻjalik yurituvchi subyektlarga qonunchilik hujjatlarida belgilangan tartibda pullik konsalting xizmatlari koʻrsatadi.
(2-bandning toʻrtinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
 LexUZ sharhi
Qarang: “Soliq maslahatiga oid faoliyat toʻgʻrisida”gi Qonuni.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov hamda Oʻzbekiston fermer, dehqon xoʻjaliklari va tomorqa egalari kengashi raisi vazifasini bajaruvchi A.A. Xaitov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2019-yil 15-fevral,
131-son
Vazirlar Mahkamasining 2019-yil fevraldagi 131-son qaroriga
ILOVA
Tuman fermer, dehqon xoʻjaliklari va tomorqa yer egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish tartibi toʻgʻrisida
NIZOM
1-bob. Umumiy qoidalar
1. Ushbu Nizom tuman fermer, dehqon xoʻjaliklari va tomorqa yer egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
buxgalteriya hisobi va hisobotini yuritish markazlari — (keyingi oʻrinlarda markazlar deb ataladi) tuman fermer, dehqon xoʻjaliklari va tomorqa yer egalari kengashlari huzurida tashkil etilgan fermer xoʻjaliklarida bepul konsalting xizmatlari koʻrsatuvchi muassasa;
bepul konsalting xizmatlari — toʻlov undirilmagan holda ushbu Nizomga muvofiq fermer xoʻjaliklariga markazlar tomonidan koʻrsatiladigan xizmatlar;
buxgalter — oliy iqtisodiy maʼlumotga yoki buxgalteriya hisobi yoʻnalishi boʻyicha oʻrta maxsus maʼlumotga ega boʻlgan hamda markazlarning shtat jadvalida turadigan jismoniy shaxs;
soliq va statistika hisobotlari boʻyicha maslahatchi — oliy iqtisodiy maʼlumotga yoki auditorlik faoliyati yoʻnalishi boʻyicha oʻrta maxsus maʼlumotga ega boʻlgan hamda markazlarning shtat jadvalida turadigan jismoniy shaxs.
Oldingi tahrirga qarang.
aholi xonadonlarida tomorqadan samarali foydalanish boʻyicha agronom — oliy maʼlumotli agronom yoki agronom mutaxassisligi boʻyicha oʻrta-maxsus maʼlumotga ega boʻlgan yoki maxsus oʻquv kurslarini tamomlagan hamda markazlarning shtat jadvalida turadigan jismoniy shaxs.
(2-band Oʻzbekiston Respublikasi Prezidentining 2021-yil 16-dekabrdagi PQ-54-son qaroriga asosan xatboshi bilan toʻldirilgan — Qonunchilik maʼlumotlari milliy bazasi, 17.12.2021-y., 07/21/54/1169-son)
3. Bepul konsalting xizmatlari tuman fermer, dehqon xoʻjaliklari va tomorqa yer egalari kengashlari aʼzosi hisoblanadigan, davlat xaridlari uchun paxta xomashyosi va gʻalla yetishtiruvchi fermer xoʻjaliklariga markazlar tomonidan koʻrsatiladi.
Markazlar tuman fermer, dehqon xoʻjaliklari va tomorqa yer egalari kengashlarining taklifiga koʻra moliyaviy resurslari cheklangan va buxgalteriya hisobiga ega boʻlmagan, aʼzolik badallarini oʻz vaqtida toʻlaydigan, yer va suv resurslaridan samarali foydalanuvchi, qishloq xoʻjaligi mahsulotlarining boshqa turlarini yetishtiruvchi fermer xoʻjaliklariga shartnomaga muvofiq bepul konsalting xizmatlari koʻrsatishlari mumkin.
Oldingi tahrirga qarang.
4. Markazlar ushbu Nizomning 3-bandida nazarda tutilmagan fermer xoʻjaliklariga, shuningdek, qishloq xoʻjalik mahsulotlari yetishtiruvchi boshqa xoʻjalik yurituvchi subyektlarga qonunchilik hujjatlarida belgilangan tartibda pullik konsalting xizmatlari koʻrsatadi.
(4-band Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
5. Konsalting xizmatlari koʻrsatish quyidagi tamoyillarga asoslanadi:
qonun ustuvorligi;
fermer xoʻjaliklarining huquqlari, erkinliklari va qonuniy manfaatlari ustuvorligi;
faoliyatning mustaqilligi va maxfiyligi hamda shartnomaviy majburiyatlarga rioya qilish.
2-bob. Markazlar faoliyatini tashkil etish va ular tomonidan koʻrsatiladigan konsalting xizmatlari
Oldingi tahrirga qarang.
6. Markazlar tuman fermer, dehqon xoʻjaliklari va tomorqa yer egalari kengashlari tomonidan muassasa shaklida tashkil etiladi. Markaz direktori egallab turgan lavozimiga koʻra tuman kengashi raisi oʻrinbosari hisoblanadi, lavozimiga hududiy fermer, dehqon xoʻjaliklari va tomorqa yer egalari kengashi raisining buyrugʻi bilan tayinlanadi.
(6-band Oʻzbekiston Respublikasi Prezidentining 2021-yil 16-dekabrdagi PQ-54-son qarori tahririda — Qonunchilik maʼlumotlari milliy bazasi, 17.12.2021-y., 07/21/54/1169-son)
7. Markazlar quyidagi konsalting xizmatlarini koʻrsatadi:
buxgalteriya hisobi va hisoboti yuritilishini taʼminlash;
xodimlarning ish haqi va majburiy ajratmalarni hisoblash;
asosiy mablagʻlarni, tovar-moddiy boyliklarni, shuningdek, qishloq xoʻjaligi mavsumi yakunlari boʻyicha debitorlik va kreditorlik qarzlarni xatlovdan oʻtkazish;
soliqlar va boshqa majburiy toʻlovlar boʻyicha soliq organlari bilan birga taqqoslashlarni amalga oshirish va ularning oʻz vaqtida toʻlanishini tashkil etish;
soliq va moliyaviy hamda statistika hisobotlarini tuzish va ularni tegishli organlarga taqdim qilish;
Oldingi tahrirga qarang.
daromadlar va xarajatlarni tahlil qilish, tijorat banklaridan kredit olish uchun zarur hujjatlarni tayyorlash va kelgusi yil uchun biznes reja tuzish, moliyaviy hisobotlarni xalqaro standartlarga muvofiqlashtirish;
Oʻzbekiston fermer, dehqon xoʻjaliklari va tomorqa yer egalari kengashiga aʼzolik badallari hisoblanishi va toʻlanishini tashkillashtirish;
agronom tomonidan aholiga oʻz xonadonlaridagi tomorqadan samarali foydalanish boʻyicha, shuningdek fermer, dehqon xoʻjaliklari va tomorqa yer egalariga yer uchastkalaridan samarali foydalanish boʻyicha maslahatlar berish, sifatli urugʻ va koʻchatlar bilan taʼminlash, agrotexnik tadbirlarning oʻz vaqtida oʻtkazilishida amaliy yordam berish.
(7-bandning yettinchi xatboshisi Oʻzbekiston Respublikasi Prezidentining 2021-yil 16-dekabrdagi PQ-54-sonli qaroriga asosan yettinchi — toʻqqizinchi xatboshilar bilan almashtirilgan — Qonunchilik maʼlumotlari milliy bazasi, 17.12.2021-y., 07/21/54/1169-son)
3-bob. Markazlarning huquqlari va majburiyatlari
8. Markazlar konsalting xizmatlarini koʻrsatishda quyidagi huquqlarga ega:
konsalting xizmatlari koʻrsatish bilan bogʻliq boʻlgan hujjatlar va boshqa maʼlumotlar olish;
Oldingi tahrirga qarang.
konsalting xizmatlari koʻrsatilayotgan fermer xoʻjaligi rahbari va boshqa xodimlarini chaqirishga, ulardan qonunchilik hujjatlari, ustav faoliyati, taʼsis hujjatlarining buzilishi holati yuzasidan ogʻzaki va yozma tushuntirishlar talab qilish;
(8-bandning uchinchi xatboshisi Oʻzbekiston Respublikasi Vazirlar Mahkamasining 2022-yil 4-apreldagi 153-sonli qarori tahririda — Qonunchilik maʼlumotlari milliy bazasi, 05.04.2022-y., 09/22/153/0266-son)
zarur hujjat va boshqa maʼlumotlarni davlat organlaridan olish;
shartnoma shartlari fermer xoʻjaligi tomonidan buzilgan taqdirda konsalting xizmatlari koʻrsatishni bekor qilish;
markazlar konsalting xizmatlarini koʻrsatish toʻgʻrisidagi shartnomaga muvofiq boshqa huquqlarga ham ega boʻlishi mumkin.
4-bob. Konsalting xizmatlari koʻrsatish boʻyicha shartnoma tuzish va uni bekor qilish tartibi
9. Markazlar tomonidan bepul konsalting xizmatlarini koʻrsatish ushbu Nizomga 1-ilovaga muvofiq sxema boʻyicha amalga oshiriladi.
10. Konsalting xizmatlari koʻrsatish boʻyicha shartnoma tuzish uchun fermer xoʻjaliklari oʻz xohishiga koʻra markazlarga ushbu Nizomga 2-ilovaga muvofiq shakldagi konsalting xizmatlaridan foydalanish ehtiyoji toʻgʻrisida buyurtma (keyingi oʻrinlarda fermer xoʻjaligining buyurtmasi deb ataladi) taqdim qiladi.
11. Fermer xoʻjaligining buyurtmasi markazlar tomonidan uch kun mobaynida koʻrib chiqiladi. Buyurtmani koʻrib chiqish yakunlari boʻyicha markazlar fermer xoʻjaliklariga bepul yoki pullik konsalting xizmatlari koʻrsatish boʻyicha shartnoma tuzishni taklif qiladi.
12. Ushbu Nizomning 3-bandi birinchi va ikkinchi xatboshilarida koʻrsatilgan fermer xoʻjaliklari bilan ikki kun mobaynida bepul konsalting xizmatlarini koʻrsatish shartnomasi bir yildan ortiq boʻlmagan muddatga tuziladi.
13. Markazlar fermer xoʻjaliklariga koʻrsatiladigan bepul konsalting xizmatlari hisobini yuritadi. Har oyda markaz va fermer xoʻjaligi oʻrtasida ushbu Nizomga 3-ilovaga muvofiq shaklda koʻrsatilgan bepul konsalting xizmatlari toʻgʻrisida dalolatnoma tuziladi.
14. Koʻrsatilgan bepul konsalting xizmatlari toʻgʻrisidagi dalolatnoma Markazlar tomonidan hisobot oyidan keyingi oyning 10-kunidan kechikmay tegishli tuman fermer, dehqon xoʻjaliklari va tomorqa yer egalari kengashlariga taqdim qilinadi.
15. Fermer xoʻjaliklari tomonidan tuman fermer, dehqon xoʻjaliklari va tomorqa yer egalari kengashlariga aʼzolik badallari oʻz muddatida toʻlanmagan taqdirda mazkur shartnoma bekor qilinishi mumkin.
Markaz tomonidan bepul konsalting xizmatlari toʻliq koʻrsatilmagan yoki tegishlicha boʻlmagan sifatdagi xizmatlar koʻrsatilganda yoxud xizmat koʻrsatishning muddatlari buzilgan hollarda Markaz xodimlariga nisbatan intizomiy choralar koʻriladi.
5-bob. Yakunlovchi qoidalar
16. Oʻzbekiston Respublikasi Moliya vazirligi Oʻzbekiston fermer, dehqon xoʻjaliklari va tomorqa yer egalari kengashi bilan birgalikda Markazlar tomonidan ushbu Nizomga rioya qilinishi ustidan nazoratni oʻz vakolatlari doirasida amalga oshiradilar.
17. Ushbu Nizom talablarining buzilishida aybdor boʻlgan shaxslar belgilangan tartibda javob beradilar.
Tuman fermer, dehqon xoʻjaliklari va tomorqa yer egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish tartibi toʻgʻrisidagi nizomga
1-ILOVA
Buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish
SXEMASI
Tuman fermer, dehqon xoʻjaliklari va tomorqa yer egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish tartibi toʻgʻrisidagi nizomga
2-ILOVA
‎ ‎ ‎ ‎ ‎ ‎ ‎ Buxgalteriya hisobi va hisobotini yuritish markazining nomi
‎ ‎ ‎ ‎ ‎ ‎


‎‎‎BUYURTMA

 ‎ ‎ ‎ ‎ ‎ ‎

‎‎(Bepul konsalting xizmatlari koʻrsatishga shartnoma tuzish yuzasidan)

(Fermer xoʻjaligi nomi) fermer xoʻjaligi quyidagi bepul konsalting xizmatlari koʻrsatishga shartnoma tuzishni soʻraydi:
‎‎buxgalteriya hisobi va hisoboti yuritilishini taʼminlash;
‎xodimlarning ish haqi va majburiy ajratmalarni hisoblash;
‎asosiy mablagʻlarni, tovar-moddiy boyliklarni, shuningdek, qishloq xoʻjaligi mavsumi yakunlari boʻyicha debitorlik va kreditorlik qarzlarni xatlovdan oʻtkazish;
‎soliqlar va boshqa majburiy toʻlovlar boʻyicha soliq organlari bilan birga taqqoslashlarni amalga oshirish va ularning oʻz vaqtida toʻlanishini tashkil etish;
‎soliq va moliyaviy hamda statistika hisobotlarini tuzish va ularni tegishli organlarga taqdim qilish;
‎daromadlar va xarajatlarni tahlil qilish va navbatdagi yil uchun biznes-reja tuzishda amaliy yordam koʻrsatish.
‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎

‎‎‎‎(Fermer xoʻjaligi nomi) ‎‎
‎fermer xoʻjaligi boshligʻi

 ‎ ‎ ‎

‎‎(imzo)

 ‎ ‎ ‎

(F.I.Sh.)

 ‎
Tuman fermer, dehqon xoʻjaliklari va tomorqa yer egalari kengashlari huzuridagi Fermer xoʻjaliklarida buxgalteriya hisobi va hisobotini yuritish markazlari tomonidan bepul konsalting xizmatlari koʻrsatish tartibi toʻgʻrisidagi nizomga
3-ILOVA
‎ ‎

‎‎Bepul koʻrsatilgan konsalting xizmatlari toʻgʻrisida dalolatnoma

 ‎ ‎
‎

‎‎(bepul konsalting xizmatlari koʻrsatishga “___”________ yildagi __ son shartnoma boʻyicha)

 ‎

‎‎Ustav asosida ish yurituvchi (buxgalteriya hisobi va hisoboti yuritish markazining nomi) nomidan direktor (familiyasi, ismi, otasining ismi), bundan buyon Markaz deb yuritiladi, bir tomondan, hamda Ustav asosida ish yurituvchi (fermer xoʻjaligi nomi) boshligʻi (familiyasi, ismi, otasining ismi), bundan buyon Fermer xoʻjaligi deb yuritiladi, ikkinchi tomondan, ushbu dalolatnomani quyidagilar haqida tuzdilar:

‎‎1. Markaz tomonidan fermer xoʻjaligining (kun, oy, yil) dan (kun, oy, yil) gacha davrdagi faoliyati boʻyicha quyidagi konsalting xizmatlari koʻrsatildi:

buxgalteriya hisoboti tuzildi;
‎ishchi xodimlarning ish haqi va undan budjetga majburiy ajratmalar hisoblab chiqildi va toʻlandi;
‎xoʻjalikning asosiy mablagʻlari, tovar-moddiy boyliklari, shuningdek, qishloq xoʻjaligi mavsumi yakunlari boʻyicha debitorlik va kreditorlik qarzlari xatlovdan oʻtkazildi;
‎soliq va moliyaviy hamda statistika hisobotlari tuzildi va ular tegishli organlarga taqdim qilindi;
‎soliqlar va boshqa majburiy toʻlovlar boʻyicha taqqoslashlar amalga oshirildi va toʻlanishi oʻz vaqtida taʼminlandi;
‎daromadlar va xarajatlar tahlil qilindi va kelgusi yil uchun biznes-reja tuzishda amaliy yordam koʻrsatildi.

‎‎2. Koʻrsatilgan konsalting xizmatlari yil “____” ____________dagi ____-son Bepul konsalting xizmatlari koʻrsatish shartnomasi bilan belgilangan shartlarga muvofiq keladi, oʻz muddatida bajarildi, lozim darajada rasmiylashtirildi va Fermer xoʻjaligi tomonidan toʻliq qabul qilindi. Koʻrsatilgan konsalting xizmatlari sifati va hajmi yuzasidan fermer xoʻjaligining hamda tegishli organlarning Markazga eʼtirozlari mavjud emas.

‎‎3. Ushbu dalolatnoma yil “____”___________dagi ____-son Bepul konsalting xizmatlari koʻrsatish shartnomasi shartlariga muvofiq ikki nusxada tuzildi.

Taraflarning imzolari, manzillari va rekvizitlari

‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎ ‎
‎

‎‎Buxgalteriya hisobi va hisoboti yuritish markazi
‎‎__________________________
‎__________________________
‎Direktorning F.I.Sh. (imzo)

 ‎ ‎ ‎ ‎ ‎

‎‎(Fermer xoʻjaligi nomi) fermerxoʻjaligi
‎__________________________
‎__________________________
‎Boshliqning F.I.Sh. (imzo)

 ‎

(Qonun hujjatlari maʼlumotlari milliy bazasi, 15.02.2019-y., 09/19/131/2618-son, Qonunchilik maʼlumotlari milliy bazasi, 17.12.2021-y., 07/21/54/1169-son; 05.04.2022-y., 09/22/153/0266-son)