Ushbu Qonunning maqsadi xususiy bandlik agentliklarining faoliyati bilan bogʻliq munosabatlarni tartibga solishdan iborat.

Xususiy bandlik agentliklari toʻgʻrisidagi qonunchilik ushbu Qonun va boshqa qonunchilik hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining xususiy bandlik agentliklari toʻgʻrisidagi qonunchiligida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Xususiy bandlik agentligi ish qidirayotgan shaxslarga ish tanlash va ishga joylashish boʻyicha, ish beruvchilar uchun kadrlar tanlash boʻyicha xizmatlar koʻrsatuvchi, shuningdek ishga joylashtirish sohasida axborot va maslahat xizmatlari koʻrsatuvchi tijorat tashkilotidir.

Xususiy bandlik agentligi oliy maʼlumotli rahbarni qoʻshib hisoblaganda kamida ikki nafar xodimga ega boʻlishi kerak.

Xususiy bandlik agentliklari faoliyatining asosiy prinsiplari qonuniylik, ochiqlik va shaffoflik, kamsitishga yoʻl qoʻymaslikdan iboratdir.

Xususiy bandlik agentliklari yuridik va (yoki) jismoniy shaxslar tomonidan har qanday tashkiliy-huquqiy shaklda tuzilishi mumkin.

Xususiy bandlik agentligi davlat organlari, siyosiy partiyalar, kasaba uyushmalari va diniy tashkilotlar tomonidan tuzilishi mumkin emas.

Xususiy bandlik agentligi firma nomiga ega boʻlishi va bu nomda “Xususiy bandlik agentligi” degan soʻzlar boʻlishi kerak.

“Xususiy bandlik agentligi” degan firma nomidan faqat ushbu Qonun qoidalariga muvofiq foydalanilishi mumkin. Ushbu Qonun 3-moddasining talablariga javob bermaydigan yuridik shaxslar oʻz nomida “Xususiy bandlik agentligi” degan soʻz birikmasidan va uning asosida hosil qilingan soʻz birikmasidan foydalanishga haqli emas.

Xususiy bandlik agentligi oʻzining davlat tilidagi toʻliq firma nomi va oʻz joylashgan yeri koʻrsatilgan muhrga ega boʻlishi kerak. Muhrda firma nomi bir vaqtning oʻzida boshqa tilda ham koʻrsatilishi mumkin.

Xususiy bandlik agentligi oʻz nomi boʻlgan shtamplar, blankalarga va oʻzining emblemasiga ega boʻlishga haqli.

Xususiy bandlik agentligi taʼsis hujjatlari asosida faoliyat koʻrsatadi.

Xususiy bandlik agentligining taʼsis hujjatlarida yuridik shaxslarning muayyan tashkiliy-huquqiy shakllari uchun qonunchilikda belgilangan maʼlumotlarga qoʻshimcha ravishda quyidagi maʼlumotlar koʻrsatilishi kerak:

faqat ushbu Qonunning 10-moddasida nazarda tutilgan xizmatlarni koʻrsatish boʻyicha faoliyat toʻgʻrisidagi;

taʼsischilarning, boshqaruv organlarining tuzilmasi va vakolatlari haqidagi;

koʻrsatilayotgan xizmatlar sifatining ichki nazoratiga nisbatan qoʻyiladigan talablar toʻgʻrisidagi.

Xususiy bandlik agentligining faoliyati oʻzining xususiy mol-mulki va (yoki) jalb etilgan mol-mulk asosida amalga oshirilishi mumkin.

Xususiy bandlik agentligi oʻz faoliyatini qaysi mol-mulk asosida va mulkiy huquqlar vositasida amalga oshirsa, oʻsha mol-mulk, shu jumladan mulkiy huquqlar oldi-sotdi, garov, ijara hamda huquqlar va majburiyatlarni belgilash, oʻzgartirish va (yoki) tugatish bilan bogʻliq boshqa bitimlar obyekti boʻlishi mumkin.

Xususiy bandlik agentliklarini davlat roʻyxatidan oʻtkazish Davlat xizmatlari markazlari orqali amalga oshiriladi.

Davlat xizmatlari markazlari arizachiga uni xususiy bandlik agentligi sifatida davlat roʻyxatidan oʻtkazishni ushbu agentlikni tuzish maqsadga muvofiq emas degan vajlar bilan rad etishga yoki qonunda nazarda tutilmagan qoʻshimcha talablar belgilashga haqli emas.

Arizachini xususiy bandlik agentligi sifatida davlat roʻyxatidan oʻtkazishni rad etish, shuningdek davlat roʻyxatidan oʻtkazish muddatlarining buzilishi ustidan sudga shikoyat qilinishi mumkin.

Roʻyxatdan oʻtkazuvchi organning qarori, shuningdek uning mansabdor shaxslarining harakatlari (harakatsizligi) sud tomonidan gʻayriqonuniy deb topilgan taqdirda, ular roʻyxatdan oʻtkazishni rad etish yoki roʻyxatdan oʻtkazish muddatini buzish tufayli arizachiga yetkazilgan zararning oʻrnini qoplaydi hamda maʼnaviy ziyonni kompensatsiya qiladi.

Xususiy bandlik agentliklari quyidagi xizmat turlarini koʻrsatishi mumkin:

Oʻzbekiston Respublikasi hududida ish qidirayotgan shaxslarga ish tanlash;

ish beruvchilar uchun kadrlar tanlash;

Oʻzbekiston Respublikasidan tashqaridagi ishni qidirayotgan shaxslarni ishga joylashtirish;

ishga joylashtirish sohasida axborot va maslahat xizmatlari.

Oʻzbekiston Respublikasi hududida ish qidirayotgan shaxslarga ish tanlash boʻyicha xizmatlar xususiy bandlik agentligi va ish qidirayotgan shaxs oʻrtasida tuzilgan xizmatlar koʻrsatish toʻgʻrisidagi shartnoma asosida koʻrsatiladi.

Oʻzbekiston Respublikasi hududida ish qidirayotgan shaxslarga ish tanlash boʻyicha xizmatlar quyidagilarni oʻz ichiga oladi:

ish qidirayotgan shaxslar toʻgʻrisidagi axborotni ish beruvchilar oʻrtasida tarqatish, shu jumladan axborot-kommunikatsiya texnologiyalaridan foydalangan holda tarqatish;

boʻsh ish oʻrinlariga ega boʻlgan ish beruvchilarni izlashni amalga oshirish;

ish qidirayotgan shaxslarni ishga joylashtirish uchun ish beruvchilar bilan muzokaralar oʻtkazish;

ish beruvchilar va ish qidirayotgan shaxslar oʻrtasidagi suhbatga tayyorgarlik koʻrish hamda muzokaralarda (suhbatlarda) ishtirok etish;

ish beruvchilar va ish qidirayotgan shaxslar oʻrtasidagi mehnat shartnomalari loyihalarini tayyorlashda ishtirok etish.

Ish beruvchilar uchun kadrlar tanlash boʻyicha xizmatlar xususiy bandlik agentligi va ish beruvchi oʻrtasida tuzilgan xizmatlar koʻrsatish toʻgʻrisidagi shartnoma asosida koʻrsatiladi.

Ish beruvchilar uchun kadrlar tanlash boʻyicha xizmatlar quyidagilarni oʻz ichiga oladi:

ish beruvchilarda mavjud boʻlgan boʻsh ish oʻrinlari toʻgʻrisidagi axborotni tarqatish, shu jumladan axborot-kommunikatsiya texnologiyalaridan foydalangan holda tarqatish;

ishga joylashtirish uchun maqbul nomzodlarni izlashni amalga oshirish;

ishga joylashtirish uchun nomzodlar bilan muzokaralar oʻtkazish;

ish beruvchilar va boʻsh ish oʻrinlarini egallashga nomzodlar oʻrtasidagi muzokaralarda (suhbatlarda) ishtirok etish;

ish beruvchilar va ish qidirayotgan shaxslar oʻrtasidagi mehnat shartnomalari loyihalarini tayyorlashda ishtirok etish.

Xususiy bandlik agentliklarining Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlari ularda Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha faoliyatni amalga oshirish uchun litsenziya (bundan buyon matnda litsenziya deb yuritiladi) mavjud boʻlgan taqdirda taqdim etiladi.

Oʻzbekiston Respublikasidan tashqaridagi ishni qidirayotgan shaxslarga yozma shaklda bildirish berilib, unda xususiy bandlik agentligi tomonidan shartnoma majburiyatlari bajarilmagan yoki lozim darajada bajarilmagan taqdirda, murojaat qilish uchun xususiy bandlik agentligining hamda Oʻzbekiston Respublikasi Vazirlar Mahkamasi huzuridagi Migratsiya agentligining pochta manzillari va aloqa bogʻlash uchun telefon raqamlari koʻrsatiladi.

Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlar xususiy bandlik agentligi va ish qidirayotgan shaxs oʻrtasida tuzilgan xizmatlar koʻrsatish toʻgʻrisidagi shartnoma asosida koʻrsatiladi hamda quyidagilarni oʻz ichiga oladi:

Oʻzbekiston Respublikasidan tashqaridagi ishni qidirayotgan shaxslarni ishga joylashtirish masalasi boʻyicha chet ellik sheriklar bilan oʻz vakolatlari doirasida muzokaralar (suhbatlar) oʻtkazish, shartnomalar, bitimlar va bayonnomalarning loyihalarini tayyorlash;

ehtimol tutilgan ish beruvchilarni qidirish, xorijiy mamlakatlarning mehnat bozorini oʻrganish asosida boʻsh ish oʻrinlari mavjudligi toʻgʻrisida Oʻzbekiston Respublikasidan tashqaridagi ishni qidirayotgan shaxslarga axborot taqdim etish;

Oʻzbekiston Respublikasidan tashqarida mehnat faoliyatini amalga oshirishni xohlayotgan shaxslar haqidagi axborotni faqat ularning roziligi bilan chet ellik ish beruvchilar oʻrtasida tarqatish;

ish qidirayotgan shaxslarga Oʻzbekiston Respublikasidan tashqarida mehnat faoliyatini amalga oshirish uchun dastlabki tayyorgarlik tadbirlarini oʻtkazish yoʻli bilan koʻmaklashish;

Oʻzbekiston Respublikasidan tashqaridagi ishni qidirayotgan shaxslarni ishga joylashiladigan mamlakatda boʻlish qoidalari, mehnat sharoitlari, ijtimoiy va uy-joy-maishiy taʼminoti, chet ellik ish beruvchilar bilan mehnat shartnomalarini tuzishning huquqiy jihatlari haqida xabardor qilish;

Oʻzbekiston Respublikasidan tashqaridagi ishni qidirayotgan shaxslar bilan ish beruvchilar oʻrtasida mehnat shartnomalarini tuzishga koʻmaklashish.

Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlar koʻrsatish uchun xususiy bandlik agentliklari tomonidan bazaviy hisoblash miqdorining toʻrt ming baravari miqdoridagi mablagʻlar ularni litsenziyaning amal qilish davriga Oʻzbekiston Respublikasi Vazirlar Mahkamasi huzuridagi Migratsiya agentligining roziligisiz sarflamaslik va mablagʻlar sarflangan taqdirda, belgilangan muddatlarda ularning oʻrnini toʻldirish sharti bilan tijorat banklaridagi depozitlarga zaxiraga joylashtiriladi.

Tijorat banklaridagi depozitlarga zaxiraga joylashtirilgan mablagʻlar xususiy bandlik agentliklari qonun talablari asosida faoliyat koʻrsatishining kafolati boʻlib xizmat qiladi hamda xususiy bandlik agentliklarining faoliyati natijasida boshqa shaxslarga yetkazilgan zararning oʻrnini qoplash taʼminoti sifatida tijorat banklari, Oʻzbekiston Respublikasi Vazirlar Mahkamasi huzuridagi Migratsiya agentligi va xususiy bandlik agentliklari oʻrtasida tuzilgan shartnoma asosida saqlanadi.

Xususiy bandlik agentliklari Oʻzbekiston Respublikasi Vazirlar Mahkamasi huzuridagi Migratsiya agentligining asoslangan talabnomasi boʻyicha tijorat banklaridagi depozitlarga zaxiraga joylashtirilgan mablagʻlarni Migratsiya jamgʻarmasiga oʻtkazib beradi.

Xususiy bandlik agentliklari tomonidan Oʻzbekiston Respublikasi Vazirlar Mahkamasi huzuridagi Migratsiya agentligining asoslangan talabnomasi belgilangan muddatda ixtiyoriy ravishda bajarilmagan taqdirda, tijorat banklari asoslangan talabnomada qayd etilgan summani depozitlarga zaxiraga joylashtirilgan mablagʻlardan Migratsiya jamgʻarmasi hisobvaragʻiga keyingi ish kunidan kechiktirmay oʻtkazib beradi.

Ishga joylashtirish sohasidagi axborot va maslahat xizmatlarini xususiy bandlik agentliklari ishga joylashtirish sohasida axborot va maslahat xizmatlari koʻrsatish toʻgʻrisidagi shartnoma asosida koʻrsatadi. Ishga joylashtirish sohasida xizmatlar koʻrsatish toʻgʻrisidagi shartnomalar asosida xususiy bandlik agentliklari ishga joylashtirish sohasida taqdim etadigan axborot va maslahat xizmatlarining umumiy qiymati tijorat banklaridagi depozitlarga zaxiraga joylashtirilgan mablagʻlar miqdoridan oshmasligi kerak. Xususiy bandlik agentliklari tomonidan ishga joylashtirish sohasida axborot va maslahat xizmatlari koʻrsatish toʻgʻrisidagi yangi shartnomalarni tuzishga faqat ular ilgari tuzilgan shartnomalarni tijorat banklaridagi depozitlarga zaxiraga joylashtirilgan mablagʻlar doirasida bajarganidan keyin yoʻl qoʻyiladi.

Ishga joylashtirish sohasida axborot va maslahat xizmatlari buyurtmachini mehnat bozori holatining tahlili va prognozi hamda uning ishtirokchilari, mazkur bozorning konyunkturasi, mehnat toʻgʻrisidagi qonunchilik haqidagi axborot bilan taʼminlashni, shuningdek ishga joylashtirish sohasidagi boshqa axborotni taqdim etishni oʻz ichiga oladi.

Xizmatlar koʻrsatish toʻgʻrisidagi shartnoma xususiy bandlik agentligi tomonidan ish qidirayotgan shaxs va (yoki) ish beruvchi bilan yozma shaklda tuziladi.

Xususiy bandlik agentliklari tomonidan xizmatlar koʻrsatish toʻgʻrisidagi shartnoma quyidagilarni oʻz ichiga olishi kerak:

xizmatlarning mazmuni;

xizmatlar koʻrsatish muddatlari;

haq toʻlash miqdori va shartlari. Bunda ish qidirayotgan shaxs tomonidan xususiy bandlik agentligiga toʻlanadigan mablagʻlarning bankdagi maxsus depozitga qoʻyilishi toʻgʻrisidagi qoida xususiy bandlik agentligi va ish qidirayotgan shaxs oʻrtasida tuziladigan xizmatlar koʻrsatish toʻgʻrisidagi shartnomaning majburiy sharti hisoblanadi. Xususiy bandlik agentligi shartnoma shartlarini bajarganidan keyin maxsus depozitdagi mablagʻlar xususiy bandlik agentligining bankdagi hisobvaragʻiga oʻtkaziladi;

shartnoma taraflarining huquq va majburiyatlari;

shartnoma majburiyatlarini bajarmaganlik yoki lozim darajada bajarmaganlik uchun taraflarning javobgarligi;

shartnomani bekor qilish tartibi va shartlari;

shartnoma majburiyatlari bajarilmaganda yoki lozim darajada bajarilmaganda pul mablagʻlarini qaytarish tartibi;

Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlar koʻrsatilgan taqdirda, xususiy bandlik agentligida litsenziya mavjudligi toʻgʻrisidagi maʼlumotlar, litsenziyaning tartib (roʻyxatdan oʻtkazish) raqami va berilgan sanasi koʻrsatilgan holda.

Xususiy bandlik agentligi tomonidan xizmatlar koʻrsatish toʻgʻrisidagi shartnoma Oʻzbekiston Respublikasi Vazirlar Mahkamasi huzuridagi Migratsiya agentligining “Xorijda ish” mehnat migratsiyasi elektron dasturiy majmuasida real vaqt rejimida roʻyxatdan oʻtkaziladi.

Xususiy bandlik agentligi Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlar koʻrsatish uchun chet ellik ish beruvchi va (yoki) chet ellik sherik bilan hamkorlik toʻgʻrisida shartnoma tuzadi.

Xususiy bandlik agentligining Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha chet ellik ish beruvchi va (yoki) chet ellik sherik bilan hamkorligi toʻgʻrisidagi shartnoma yozma shaklda tuziladi hamda quyidagilarni oʻz ichiga olishi kerak:

Oʻzbekiston Respublikasidan tashqaridagi ishni qidirayotgan shaxslarni ishga joylashtirish shartlarini (kasb yoki mutaxassislik turi, mehnatga haq toʻlash miqdori, ajratilgan kvotalar soni, ish vaqtining davomiyligi, ish joyigacha va ish joyidan transportda tashish, ishidan mahrum boʻlgan taqdirda ijtimoiy himoya qilish, sanitariya-gigiyena tadbirlarini hamda tibbiyotga oid boshqa tadbirlarni tashkil etish, mehnat va dam olishni muhofaza qilish, ishlab chiqarishda baxtsiz hodisa yoki kasb kasalligi yuzaga kelgan taqdirda kompensatsiya olish tartibi va boshqa shartlar);

taraflarning huquqlari, majburiyatlari va javobgarligini, shu jumladan xususiy bandlik agentligining hamda chet ellik ish beruvchilarning shartnoma majburiyatlarini bajarmaganlik yoki lozim darajada bajarmaganlik uchun ish qidirayotgan shaxs oldida solidar javobgar ekanligini;

shartnomaning muddatlarini, uni oʻzgartirish va bekor qilish tartibini, shuningdek uning boshqa shartlarini.

Xususiy bandlik agentligining Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha chet ellik ish beruvchi va (yoki) chet ellik sherik bilan hamkorligi toʻgʻrisidagi shartnomaning matni xususiy bandlik agentligining rasmiy veb-saytida joylashtiriladi.

Xususiy bandlik agentligining Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha chet ellik ish beruvchi va (yoki) chet ellik sherik bilan hamkorligi toʻgʻrisidagi shartnomani tuzmasdan, xususiy bandlik agentligi tomonidan Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlar koʻrsatish taqiqlanadi.

Xususiy bandlik agentligi quyidagi huquqlarga ega:

xizmatlar koʻrsatish toʻgʻrisidagi shartnomaga muvofiq pullik xizmatlar koʻrsatish;

ishga joylashtirish sohasidagi faoliyatni amalga oshirish uchun davlat hokimiyati va boshqaruvi organlaridan axborot olish;

ish qidirayotgan shaxslardan, shuningdek ish beruvchilardan ishga joylashtirish uchun zarur boʻladigan hujjatlar va axborot olish;

ish qidirayotgan shaxslar va ish beruvchilar ishga joylashtirish masalalariga doir hujjatlarni hamda axborotni taqdim etmagan taqdirda xizmatlar koʻrsatishni rad etish.

ish qidirayotgan shaxslarni kasb-hunarga va chet tillarga oʻqitish boʻyicha oʻquv kurslarini belgilangan tartibda tashkil qilish, shuningdek ushbu jarayonga chet ellik ish beruvchilarni jalb etish;

zaxira qilinadigan mablagʻlarni tijorat banklaridagi depozitlarga joylashtirish hisobidan olinadigan foiz daromadlarini mustaqil ravishda tasarruf etish;

Xususiy bandlik agentligi:

ish qidirayotgan shaxslarga yoki ish beruvchilarga faqat xizmatlar koʻrsatish toʻgʻrisidagi shartnoma asosida xizmatlar koʻrsatishi;

xizmatlar koʻrsatish chogʻida buyurtmachining manfaatlarini ifodalashi;

xizmatlar koʻrsatish chogʻida olingan axborotning maxfiyligiga rioya etishi;

xizmatlar koʻrsatish jarayonida buyurtmachidan olingan hujjatlarning but saqlanishini taʼminlashi;

ish beruvchining yoki Oʻzbekiston Respublikasidan tashqaridagi ishni qidirayotgan shaxsning talabiga koʻra litsenziyasini koʻrsatishi;

ish beruvchilarning va ish qidirayotgan shaxslarning murojaatlarini koʻrib chiqishi hamda ularga javob qaytarishi;

Oʻzbekiston Respublikasi Vazirlar Mahkamasi huzuridagi Migratsiya agentligining soʻroviga koʻra oʻz faoliyati haqidagi maʼlumotlarni taqdim etishi;

xizmatlar koʻrsatish toʻgʻrisidagi shartnomalarni Oʻzbekiston Respublikasi Vazirlar Mahkamasi huzuridagi Migratsiya agentligining “Xorijda ish” mehnat migratsiyasi elektron dasturiy majmuasida real vaqt rejimida roʻyxatdan oʻtkazishi;

xizmatlar koʻrsatish toʻgʻrisidagi bajarilgan shartnomalarga oid arxiv materiallarini shakllantirishi va saqlashi;

xususiy bandlik agentligi, shuningdek uning filiallari va (yoki) vakolatxonalari haqidagi maʼlumotlar oʻzgarganligi toʻgʻrisida Oʻzbekiston Respublikasi Vazirlar Mahkamasi huzuridagi Migratsiya agentligini yetti ish kuni ichida xabardor qilishi;

xizmat koʻrsatish shartnomalari boʻyicha oʻz majburiyatlarini bajarmaganligi yoki lozim darajada bajarmaganligi bilan bogʻliq tavakkalchiliklarni sugʻurtalashi shart. Bunda sugʻurta summasi miqdori xizmatlar koʻrsatish toʻgʻrisidagi shartnoma summasiga hamda Oʻzbekiston Respublikasidan tashqaridagi ishni qidirayotgan shaxsning Oʻzbekiston Respublikasiga qaytish xarajatlariga mutanosib miqdorda belgilanadi;

Xususiy bandlik agentligi oʻzi tomonidan Oʻzbekiston Respublikasidan tashqarida ishga joylashtirilgan shaxslarning mehnat faoliyatini monitoring qilib boradi.

Agar chet ellik ish beruvchi talab qilingan ijtimoiy va maishiy shart-sharoitlarni, mehnatga haq toʻlash shartlarini taʼminlamasa yoki fuqaroning Oʻzbekiston Respublikasidan tashqarida ishga joylashishiga toʻsqinlik qiladigan boshqa muammolar yuzaga kelsa, xususiy bandlik agentligi ushbu fuqaroni boshqa chet ellik ish beruvchida ishga joylashtirish boʻyicha shoshilinch choralar koʻrishi yoki uning Oʻzbekiston Respublikasiga qaytarilishini taʼminlashi shart.

Ushbu moddaning uchinchi qismida nazarda tutilgan majburiyatlar xususiy bandlik agentligi tomonidan bajarilmagan taqdirda, Oʻzbekiston Respublikasi Vazirlar Mahkamasi huzuridagi Migratsiya agentligi fuqaroni Migratsiya jamgʻarmasi mablagʻlari hisobidan Oʻzbekiston Respublikasiga qaytarish choralarini koʻradi va keyinchalik ushbu xarajatlarning oʻrni xususiy bandlik agentligining tijorat banklari depozitlarida zaxiraga joylashtirilgan mablagʻlari hisobidan qoplanadi.

Ish beruvchilar va ish qidirayotgan shaxslar quyidagi huquqlarga ega:

ish qidirayotgan shaxslarni ishga joylashtirishga, ish beruvchilar uchun kadrlar tanlashga koʻmaklashish boʻyicha xizmatlar koʻrsatish, shuningdek ishga joylashtirish sohasida axborot va maslahat xizmatlari koʻrsatish toʻgʻrisidagi shartnoma bajarilishining borishi haqida xususiy bandlik agentligidan axborot olish;

xususiy bandlik agentligi tomonidan shartnoma shartlari bajarilmagan taqdirda va qonunchilikda nazarda tutilgan boshqa hollarda, xizmatlar koʻrsatish toʻgʻrisidagi shartnomaning bekor qilinishini talab qilish;

xizmatlar koʻrsatish toʻgʻrisidagi shartnoma xususiy bandlik agentligining aybi bilan bekor qilinganligi tufayli yetkazilgan zararning oʻrni qoplanishini va maʼnaviy ziyon kompensatsiya qilinishini talab qilish;

oʻz huquqlari va qonuniy manfaatlari buzilgan taqdirda tegishli davlat organlariga, isteʼmolchilarning huquqlarini himoya qiluvchi tashkilotlarga, xususiy bandlik agentliklarining birlashmalariga yoki sudga murojaat qilish.

Ish beruvchilar va ish qidirayotgan shaxslar:

xususiy bandlik agentliklari bilan tuzilgan xizmatlar koʻrsatish toʻgʻrisidagi shartnomalar shartlariga rioya etishi;

xususiy bandlik agentliklari bilan tuzilgan xizmatlar koʻrsatish toʻgʻrisidagi shartnomalar shartlariga muvofiq xizmatlar haqini oʻz vaqtida toʻlashi;

xususiy bandlik agentligiga oʻz faoliyatini amalga oshirishi uchun zarur boʻlgan ishonchli va toʻliq maʼlumotlar hamda hujjatlarni taqdim etishi shart.

Oʻzbekiston Respublikasi Vazirlar Mahkamasi huzuridagi Migratsiya agentligi:

Xususiy bandlik agentliklarining reyestrini yuritadi;

litsenziyani beradi, qayta rasmiylashtiradi, litsenziyaning amal qilishini toʻxtatib turadi, qayta tiklaydi, litsenziyani bekor qiladi yoki qonunchilikda nazarda tutilgan hollarda va tartibda uni bekor qilish toʻgʻrisidagi ariza bilan sudga murojaat qiladi;

xususiy bandlik agentliklari faoliyatini ochiq, shaffof va tizimli baholash mezonlarini belgilaydi hamda ularning reytingini tuzadi;

xususiy bandlik agentliklari tomonidan qonunchilik talablariga, shu jumladan litsenziya talablari va shartlariga rioya etilishi ustidan nazoratni amalga oshiradi;

Xususiy bandlik agentliklarining reyestrida mavjud boʻlgan maʼlumotlarni hamda litsenziyani berish, qayta rasmiylashtirish, litsenziyaning amal qilishini toʻxtatib turish, qayta tiklash va tugatish, litsenziyani bekor qilish toʻgʻrisidagi axborotni ommaviy axborot vositalarida hamda Oʻzbekiston Respublikasi Vazirlar Mahkamasi huzuridagi Migratsiya agentligining rasmiy veb-saytida eʼlon qiladi.

Xususiy bandlik agentliklari tomonidan qonun hujjatlari talablariga rioya etilishi ustidan nazoratni amalga oshirish maqsadida Oʻzbekiston Respublikasi Vazirlar Mahkamasi huzuridagi Migratsiya agentligi xususiy bandlik agentliklari faoliyatining tekshiruvlarini (moliya-xoʻjalik faoliyatiga aralashmasdan) oʻtkazish huquqiga ega. Bunda tekshiruvlar Tekshiruvlarni elektron roʻyxatga olish yagona tizimida tadbirkorlik subyektlarini roʻyxatdan oʻtkazish orqali Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakilni xabardor qilish tartibida oʻtkaziladi. Xususiy bandlik agentliklari faoliyatini tekshirish chogʻida Oʻzbekiston Respublikasi Vazirlar Mahkamasi huzuridagi Migratsiya agentligining mansabdor shaxslari oʻz vakolatlari doirasida;

xususiy bandlik agentliklarining hududlari va binolariga moneliksiz kirish;

tekshiruvga taalluqli barcha zarur hujjatlar bilan tanishib chiqish;

xususiy bandlik agentliklarining mansabdor shaxslaridan tekshiruv oʻtkazish chogʻida aniqlangan qoidabuzarliklar faktlari yuzasidan yozma tushuntirishlar, shuningdek hujjatlarning zarur boʻlgan, tegishli ravishda tasdiqlangan koʻchirma nusxalarini olish huquqiga ega.

Xususiy bandlik agentliklarining reyestri xususiy bandlik agentliklari toʻgʻrisidagi yangilanib turadigan yozuvlarni oʻz ichiga olgan maʼlumotlarning yagona axborot bazasidir.

Xususiy bandlik agentliklarining reyestrida xususiy bandlik agentliklari toʻgʻrisidagi quyidagi asosiy maʼlumotlar koʻrsatilishi kerak:

yuridik shaxsning nomi, tashkiliy-huquqiy shakli, pochta manzili, telefon raqami;

xususiy bandlik agentligi rahbarining familiyasi, ismi, otasining ismi;

litsenziya berilgan (qayta rasmiylashtirilgan, litsenziyaning amal qilishi toʻxtatib turilgan, qayta tiklangan, tugatilgan, u bekor qilingan, dublikatlari berilgan) sana va uning raqami (mavjud boʻlgan taqdirda).

Xususiy bandlik agentliklarining reyestridagi axborot Oʻzbekiston Respublikasi Vazirlar Mahkamasi huzuridagi Migratsiya agentligining rasmiy veb-saytiga joylashtiriladi.

Yuridik shaxs Xususiy bandlik agentliklarining reyestriga kirish uchun Oʻzbekiston Respublikasi Vazirlar Mahkamasi huzuridagi Migratsiya agentligiga Xususiy bandlik agentliklarining reyestriga kiritish toʻgʻrisidagi arizani taqdim etadi.

Xususiy bandlik agentliklarining reyestriga kiritish toʻgʻrisidagi arizada quyidagilar koʻrsatilishi kerak:

yuridik shaxsning nomi, joylashgan yeri (pochta manzili) va tashkiliy-huquqiy shakli;

xizmat koʻrsatayotgan bankning nomi, bankda talab qilib olinadigan depozit hisobvaragʻining raqami;

arizachi rahbarining familiyasi, ismi, otasining ismi, pasportiga yoki identifikatsiyalovchi ID-kartasiga oid maʼlumotlar;

arizachi koʻrsatmoqchi boʻlgan xizmat turlari;

xodimlarni asosiy ish joyi boʻyicha ishga qabul qilish toʻgʻrisidagi maʼlumotlar;

shtatda oliy maʼlumotli rahbarni qoʻshgan holda kamida ikki nafar xodim mavjudligi haqidagi maʼlumotlar.

Yuridik shaxsdan ushbu moddada nazarda tutilmagan hujjatlarni talab qilishga yoʻl qoʻyilmaydi.

Xususiy bandlik agentliklarining reyestriga kiritish uchun zarur boʻlgan hujjatlar yuridik shaxs tomonidan Oʻzbekiston Respublikasi Vazirlar Mahkamasi huzuridagi Migratsiya agentligiga bevosita, pochta aloqasi vositalari orqali yoki elektron shaklda, ular qabul qilib olinganligi toʻgʻrisida maʼlum qilgan holda taqdim etiladi. Elektron shaklda taqdim etilgan hujjatlar yuridik shaxsning elektron raqamli imzosi bilan tasdiqlanadi.

Taqdim etilgan hujjatlar roʻyxat boʻyicha qabul qilinadi, roʻyxat hujjatlar qabul qilingan sana toʻgʻrisida belgi qoʻyilgan holda darhol arizachiga beriladi (yuboriladi).

Oʻzbekiston Respublikasi Vazirlar Mahkamasi huzuridagi Migratsiya agentligi uch kunlik muddatda arizachini Xususiy bandlik agentliklarining reyestriga kiritish toʻgʻrisidagi masalani koʻrib chiqadi va bu haqda unga xabar qiladi yoki asoslantirilgan rad javobini yuboradi.

Xususiy bandlik agentliklarining reyestriga kiritishni rad etish toʻgʻrisida qaror qabul qilingan taqdirda, rad etish haqidagi bildirishnoma rad etishning aniq sabablarini koʻrsatgan holda yozma shaklda arizachiga beriladi (yuboriladi).

Arizachi bildirishnomada koʻrsatilgan sabablarni bartaraf etib, hujjatlarni takroran koʻrib chiqish uchun oʻttiz kalendar kuni ichida taqdim etishi mumkin.

Takroran murojaat qilinganda Xususiy bandlik agentliklarining reyestriga kiritishni rad etish uchun asos boʻlib xizmat qilgan sabablar arizachi tomonidan bartaraf etilmaganligi fakti aniqlangan taqdirda, hujjatlarni takroran koʻrib chiqish amalga oshirilmaydi, berilgan hujjatlar esa arizachiga qaytarilishi lozim.

Bildirishnomada koʻrsatilgan, rad etish uchun asos boʻlib xizmat qilgan sabablar bartaraf etilganidan keyin Xususiy bandlik agentliklarining reyestriga kiritishni rad etishga yoʻl qoʻyilmaydi.

Ushbu Qonunda nazarda tutilgan xizmatlarning Xususiy bandlik agentliklarining reyestriga kiritilmagan yuridik shaxslar tomonidan koʻrsatilishiga yoʻl qoʻyilmaydi.

Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha faoliyat litsenziya asosida amalga oshiriladi.

Litsenziya Oʻzbekiston Respublikasi Vazirlar Mahkamasi huzuridagi Migratsiya agentligi tomonidan cheklanmagan muddatga beriladi.

Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha faoliyatni amalga oshirishning litsenziyaga oid talablari va shartlari quyidagilardan iborat:

mehnat va migratsiya toʻgʻrisidagi qonunchilikka majburiy ravishda rioya etish;

faqat ushbu Qonunda nazarda tutilgan faoliyatni amalga oshirish;

shtatda oliy maʼlumotli rahbarni qoʻshib hisoblaganda kamida ikki nafar xodimning mavjudligi;

xususiy bandlik agentligining taʼsischilari va (yoki) rahbarlari tarkibida firibgarlik, odam savdosi, terrorizm, ekstremizm bilan bogʻliq jinoyatlarni sodir etganlik uchun sudlanganligi tugallanmagan yoki olib tashlanmagan shaxslar mavjud emasligi, shuningdek ushbu jinoyatlarni sodir etganlik uchun sudlanganligi tugallanmagan yoki olib tashlanmagan shaxslar bilan xususiy bandlik agentliklari tomonidan mehnat shartnomalari va fuqarolik-huquqiy shartnomalar tuzilmasligi;

litsenziyalovchi organ belgilagan tartibda uch yilda kamida bir marta yuridik shaxs xodimlari tomonidan malaka sertifikatini olish;

ushbu faoliyatni amalga oshirish uchun zarur shart-sharoitlar yaratish, shu jumladan xususiy yoki ijaraga olingan binoga ega boʻlish, tegishli moddiy-texnika bazasidan va boshqa vositalardan foydalanish, shuningdek binoning yongʻin xavfsizligi talablariga, sanitariya qoidalari, normalari va gigiyena normativlariga muvofiqligini taʼminlash;

litsenziya daʼvogari tomonidan bazaviy hisoblash miqdorining toʻrt ming baravari miqdoridagi mablagʻlarni litsenziyaning amal qilish davriga Oʻzbekiston Respublikasi Vazirlar Mahkamasi huzuridagi Migratsiya agentligining roziligisiz sarflamaslik va mablagʻlar sarflangan taqdirda, belgilangan muddatlarda ularning oʻrnini toʻldirish sharti bilan tijorat banklaridagi depozitlarga zaxiraga joylashtirish;

xizmat koʻrsatish shartnomalari boʻyicha xususiy bandlik agentliklarining oʻz majburiyatlarini bajarmaganlik yoki lozim darajada bajarmaganlik bilan bogʻliq tavakkalchiliklarni sugʻurtalash boʻyicha amaldagi sugʻurta shartnomalari va sugʻurta polislariga ega boʻlish;

xususiy bandlik agentliklarining xizmatlar koʻrsatish toʻgʻrisidagi shartnomalarida belgilangan majburiyatlarini bajarish bilan bogʻliq xarajatlar oʻrnini tijorat banklari depozitlarida zaxiraga joylashtirilgan mablagʻlar hisobidan Oʻzbekiston Respublikasi Vazirlar Mahkamasi huzuridagi Migratsiya agentligining asoslangan talabnomasiga asosan qoplash.

Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha faoliyatni litsenziyalash tartibi Oʻzbekiston Respublikasi Vazirlar Mahkamasi tomonidan belgilanadi.

Xususiy bandlik agentliklari hisob va hisobotlarni yuritadi. Hisobotlar xususiy bandlik agentligining tanloviga koʻra qogʻozda va (yoki) elektron shaklda tuzilishi mumkin. Xususiy bandlik agentligining elektron shaklda taqdim etilgan hisobotlari xususiy bandlik agentligi rahbarining elektron raqamli imzosi bilan tasdiqlanadi. Davlat xususiy bandlik agentliklari tomonidan hisobga olishning elektron tarzda yuritilishini dasturiy taʼminotni imtiyozli shartlarda yoki bepul tarqatish orqali ragʻbatlantiradi.

Xususiy bandlik agentligi hisobotlarni faqat davlat statistika organlariga va davlat soliq xizmati organlariga, shuningdek oʻz faoliyati toʻgʻrisidagi maʼlumotlarni Oʻzbekiston Respublikasi Vazirlar Mahkamasi huzuridagi Migratsiya agentligiga taqdim etadi.

Davlat organlariga xususiy bandlik agentliklari uchun hisobotlarning qonunda nazarda tutilmagan qoʻshimcha turlarini belgilash taqiqlanadi.

Xususiy bandlik agentliklari aholini ishga joylashtirish sohasida xizmatlar koʻrsatish maqsadida davlat organlari va boshqa tashkilotlar bilan hamkorlikni amalga oshiradi.

Davlat organlari va boshqa tashkilotlar quyidagi yoʻnalishlar boʻyicha xususiy bandlik agentliklari bilan hamkorlik qiladi hamda ularga koʻmaklashadi:

iqtisodiyot tarmoqlarida talab qilingan kasblar va malakalarga ega boʻlgan kadrlar tayyorlash boʻyicha davlat buyurtmasini olish uchun tanlovlarda ishtirok etishga jalb etish, shuningdek aholini ishga joylashtirish sohasida boshqa xizmatlar koʻrsatish;

xususiy bandlik agentliklarining soʻrovlari boʻyicha boʻsh va tashkil etilayotgan ish oʻrinlari, shuningdek ish qidirayotgan shaxslar toʻgʻrisidagi maʼlumotlarni taqdim etish;

aholi bandligini taʼminlashga qaratilgan dasturlar va loyihalarni amalga oshirishga, shu jumladan xorijda amalga oshirishga jalb etish;

aholini ishga joylashtirish sohasida davlat-xususiy sheriklikni rivojlantirish;

aholini ishga joylashtirish sohasida axborot kampaniyalari, konferensiyalar, simpoziumlar, seminarlarni birgalikda tayyorlash va oʻtkazish.

Xususiy bandlik agentliklari umumiy manfaatlarni ifodalash va himoya qilish maqsadida xususiy bandlik agentliklarining birlashmalarini tuzish huquqiga ega.

Xususiy bandlik agentliklarini davlat tomonidan ragʻbatlantirish quyidagilar orqali amalga oshiriladi:

ular uchun qulay shart-sharoitlar yaratish, ularning moddiy-texnika bazasini mustahkamlash boʻyicha kompleks chora-tadbirlarni ishlab chiqish va amalga oshirish;

aholini ishga joylashtirish va uning bandligi sohasidagi dasturlar hamda loyihalarni amalga oshirishda ularning ishtirokini kengaytirish boʻyicha choralar koʻrish;

ularning samarali faoliyati uchun zarur boʻlgan huquqiy, iqtisodiy, statistik, ishlab chiqarish-texnologik, ilmiy-texnikaviy va boshqa axborot bilan taʼminlash;

ishga joylashtirish sohasida soliqlar, boshqa majburiy toʻlovlar va tariflar boʻyicha imtiyozlar hamda preferensiyalar belgilash;

xususiy bandlik agentliklari xodimlarini tayyorlash, qayta tayyorlash va ularning malakasini oshirishda koʻmaklashish.

Xususiy bandlik agentliklarini davlat tomonidan ragʻbatlantirish qonunchilikka muvofiq boshqa usullarda ham amalga oshirilishi mumkin.

Xususiy bandlik agentligini tugatish uning taʼsischilari yoki taʼsis hujjatlari bilan bunga vakolatli boʻlgan uning organining qaroriga koʻra yoxud sudning qarori boʻyicha amalga oshiriladi.

Xususiy bandlik agentligi tugatilganda boʻshatilayotgan xodimlarga ularning huquqlari va qonuniy manfaatlariga rioya etilishi kafolatlanadi.

Xususiy bandlik agentligi roʻyxatdan oʻtkazuvchi organning tegishli davlat reyestriga tugatish toʻgʻrisidagi yozuv kiritilganidan soʻng, Oʻzbekiston Respublikasi Vazirlar Mahkamasi huzuridagi Migratsiya agentligi xabardor qilingan holda tugatilgan deb hisoblanadi.

Oʻzbekiston Respublikasi Vazirlar Mahkamasi huzuridagi Migratsiya agentligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

Xususiy bandlik agentliklarining faoliyati bilan bogʻliq nizolar qonunchilikda belgilangan tartibda hal etiladi.

Xususiy bandlik agentliklari toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

Oʻzbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

Ushbu Qonun rasmiy eʼlon qilingan kundan eʼtiboran kuchga kiradi.