Oʻzbekiston Respublikasi Prezidentining “Oʻzbekiston Respublikasida atom energetikasini rivojlantirish chora-tadbirlari toʻgʻrisida” 2018-yil 19-iyuldagi PF-5484-son Farmonini va Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzuridagi Atom energetikasini rivojlantirish agentligi faoliyatini tashkil etish toʻgʻrisida” 2018-yil 19-iyuldagi PQ-3870-son qarorini bajarish yuzasidan Vazirlar Mahkamasi qaror qiladi:

1. Oʻzbekiston Respublikasi Energetika vazirligi huzuridagi Atom energetikasini rivojlantirish agentligi toʻgʻrisidagi nizom 1-ilovaga muvofiq tasdiqlansin.

2. Belgilansinki:

Oʻzbekiston Respublikasi Energetika vazirligi huzuridagi Atom energetikasini rivojlantirish agentligi (keyingi oʻrinlarda “Oʻzatom” agentligi deb ataladi) oʻz faoliyatini boshqa davlat va xoʻjalik boshqaruvi organlaridan, mahalliy davlat hokimiyati organlaridan mustaqil ravishda amalga oshiradi hamda Oʻzbekiston Respublikasi Energetika vazirligi tarkibiga kiradi;

“Oʻzatom” agentligining rahbarlik lavozimlariga va konsultantlar sifatida jalb etiladigan yuqori malakali xorijiy mutaxassislarning ish haqi, unga yuklangan vazifalarni bajarish doirasida Oʻzbekiston Respublikasi Vazirlar Mahkamasi bilan kelishgan holda belgilanadi va “Oʻzatom” agentligining Atom energetikasini rivojlantirish jamgʻarmasi mablagʻlari hisobidan toʻlanadi;

“Oʻzatom” agentligining xodimlari mehnatga haq toʻlash sharoitlari boʻyicha Vazirlar Mahkamasining “Davlat hokimiyati va boshqaruvi organlari, sud organlari va notarial idoralar xodimlari mehnatiga haq toʻlashning tarif setkasini joriy etish toʻgʻrisida” 1996-yil 12-apreldagi 147-son qaroriga 3-ilovada koʻrsatilgan vazirliklar va idoralarning markaziy apparatlari xodimlariga, ijtimoiy-maishiy va tibbiy xizmat koʻrsatish sharoitlari boʻyicha Oʻzbekiston Respublikasi Vazirlar Mahkamasi apparati xodimlariga tenglashtiriladi.

3. Oʻzbekiston Respublikasi Tashqi ishlar vazirligi “Oʻzatom” agentligi buyurtmanomalariga binoan, unga yuklangan vazifalarni amalga oshirish doirasida jalb etiladigan xorijiy mutaxassislarga kirish vizalari rasmiylashtirilishini konsullik yigʻimlari va boshqa yigʻimlar undirilmasdan taʼminlasin.

4. Oʻzbekiston Respublikasi Ichki ishlar vazirligi “Oʻzatom” agentligining buyurtmanomalariga binoan, unga yuklangan vazifalarni amalga oshirish doirasida jalb etiladigan xorijiy mutaxassislarga koʻp martalik vizalarning berilishi va muddati uzaytirilishini, shuningdek, vaqtincha turgan joyi boʻyicha roʻyxatga olinishi va uning uzaytirilishini davlat boji undirilmasdan taʼminlasin.

5. Oʻzbekiston Respublikasi Bandlik va mehnat munosabatlari vazirligi “Oʻzatom” agentligining buyurtmanomalariga binoan, unga yuklangan vazifalarni bajarish uchun respublikaga jalb etiladigan xorijiy mutaxassislarga ruxsatnomalar berilishini (muddati uzaytirilishini), shuningdek, jalb etiladigan xorijiy mutaxassislarga Oʻzbekiston Respublikasi hududida mehnat faoliyatini amalga oshirish huquqiga tasdiqnomalarning berilishini (muddati uzaytirilishini) taʼminlasin.

6. Oʻzbekiston Respublikasi Hukumatining 2-ilovaga muvofiq ayrim qarorlariga qoʻshimchalar kiritilsin.

7. Vazirliklar va idoralar oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — “Oʻzbekneftgaz” AJ boshqaruvi raisi A.S.Sultanov va Oʻzbekiston Respublikasi Vazirlar Mahkamasi huzuridagi Atom energetikasini rivojlantirish agentligi bosh direktori J.T.Mirzamahmudov zimmasiga yuklansin.

1. Ushbu Nizom Oʻzbekiston Respublikasi Energetika vazirligi huzuridagi Atom energetikasini rivojlantirish agentligining (keyingi oʻrinlarda “Oʻzatom” agentligi deb ataladi) maqomi, funksiyalari, vazifalari, huquqlari, tashkiliy asoslari va majburiyatlarini belgilaydi.

2. “Oʻzatom” agentligi atom energetikasini rivojlantirish va undan foydalanish sohasida yagona davlat siyosati va strategik yoʻnalishlari amalga oshirilishi uchun masʼul davlat boshqaruvi organi hisoblanadi.

3. “Oʻzatom” agentligi oʻz faoliyatida Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga hamda boshqa qonun hujjatlariga amal qiladi.

4. “Oʻzatom” agentligining oʻz vakolatlari doirasida qabul qilingan qarorlari davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va mansabdor shaxslar, shuningdek, fuqarolar tomonidan bajarilishi majburiy hisoblanadi.

5. “Oʻzatom” agentligi davlat muassasasi shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga va Oʻzbekiston Respublikasi Moliya vazirligining Gʻaznachiligida gʻazna hisob raqamlariga, bank hisob raqamlariga, shu jumladan, xorijiy valyutadagi hisob raqamlariga ega boʻladi.

6. “Oʻzatom” agentligining rasmiy nomi:

a) davlat tilida:

toʻliq — Oʻzbekiston Respublikasi Energetika vazirligi huzuridagi Atom energetikasini rivojlantirish agentligi;

qisqartirilgani — “Oʻzatom” agentligi;

b) ingliz tilida:

toʻliq — Agency for the Development of Nuclear Energy under the Ministry of energy of the Republic of Uzbekistan;

qisqartirilgani — Agency “Uzatom”;

v) rus tilida:

toʻliq — Agentstvo po razvitiyu atomnoy energetiki pri Ministerstve energetiki Respubliki Uzbekistan;

qisqartirilgani — Agentstvo “Uzatom”.

7. “Oʻzatom” agentligining joylashgan joyi (pochta manzili):

Toshkent shahri, Oybek koʻchasi, 26/1.

8. Quyidagilar “Oʻzatom” agentligining atom energiyasidan tinchlik maqsadida foydalanish sohasidagi asosiy vazifalari va faoliyat yoʻnalishlari hisoblanadi:

atom energiyasidan tinchlik maqsadida foydalanish sohasida davlat siyosatining ustuvor yoʻnalishlari boʻyicha takliflarni, shu jumladan, normativ-huquqiy hujjatlar ishlanmalarini tayyorlash;

Oʻzbekiston Respublikasida atom energetikasini rivojlantirish davlat dasturlarini ishlab chiqish va amalga oshirish, investitsiyalarni, shu jumladan, xorijiy investitsiyalarni atom energetikasi sohasida loyihalarni amalga oshirish uchun jalb etish;

sanoat va ekologik xavfsizlikning xalqaro talablariga muvofiq boʻlgan zamonaviy texnologiyalar va asbob-uskunalarni joriy etgan holda atom energetikasi obyektlarini loyihalash, qurish va ulardan foydalanish boʻyicha bitimlar va shartnomalar tuzish;

atom ilm-fani va yadro texnologiyalarini rivojlantirish boʻyicha kompleks chora-tadbirlarni, fundamental tadqiqotlar, ilmiy izlanishlar, tajriba-konstruktorlik va innovatsion ishlar loyihalarini tayyorlash va amalga oshirish, ilgʻor texnologiyalarni joriy etish;

tadqiqiy va energetik atom reaktorlarini, yadro-fizika qurilmalarini, yadro materiallari va radiatsiya manbalarini saqlash, radioaktiv chiqindilarni koʻmish punktlari rivojlantirilishini va xavfsiz faoliyat koʻrsatishini taʼminlash;

boshqa vazirliklar va idoralar bilan birgalikda yadro avariyalarining va radiatsion avariya vaziyatlarining oldini olish boʻyicha tadbirlar rejasini ishlab chiqqan holda respublikaning radiatsiya va yadro xavfsizligi obyektlari tizimini takomillashtirish;

yadro materiallari va texnologiyalarining, radioaktiv materiallarning tarqatilmasligini, jismoniy himoya hamda yadro va radiatsiya xavfsizligini taʼminlash boʻyicha tadbirlarning amalga oshirilishini taʼminlash;

kadrlarni, shu jumladan, yetakchi xorijiy institutlarda tayyorlash, qayta tayyorlash va kadrlar malakasini oshirish tizimini tashkil etish;

Xalqaro atom energetikasi agentligi, Atom energetikasi boʻyicha Yevropa hamjamiyati va boshqa xalqaro tashkilotlar bilan xalqaro hamkorlikni va oʻzaro hamkorlikni amalga oshirish;

manfaatdor vazirliklar va idoralar bilan birgalikda atom energetikasi sohasidagi xalqaro moliya institutlari, donor mamlakatlar, kompaniyalar va banklar bilan atom energetikasi sohasiga xorijiy investitsiyalarni va ilgʻor texnologiyalarni jalb etish maqsadida hamkorlikni rivojlantirish.

9. “Oʻzatom” agentligi atom energiyasidan tinchlik maqsadida foydalanish sohasida qoʻyilgan vazifalarni bajarish doirasida quyidagi funksiyalarni amalga oshiradi:

atom energetikasidan foydalanish, shu jumladan, ilmiy-texnika va investitsiya siyosati sohasida davlat siyosatini shakllantirish, atom energetikasi, yadro ilm-fani va texnologiyalari obyektlarini rivojlantirish va xavfsiz faoliyat koʻrsatishini taʼminlash boʻyicha takliflar ishlab chiqadi;

atom energetikasidan va yadro texnologiyalaridan tinchlik maqsadlarida foydalanish boʻyicha normativ-huquqiy hujjatlar loyihalarini tayyorlaydi va belgilangan tartibda kiritadi;

radiatsiya, yadro, sanoat va ekologik xavfsizlikning xalqaro talablariga muvofiq boʻlgan zamonaviy texnologiyalar va asbob-uskunalarni joriy etgan holda atom energetikasi obyektlarini qurish va ulardan foydalanish boʻyicha qisqa muddatli va uzoq muddatli dasturlarni ishlab chiqadi;

ushbu sohadagi oʻrta muddatli va uzoq muddatli dasturlar doirasida tinchlik maqsadlarida atom energetikasi obyektlarini qurish boʻyicha har yillik ishlar rejalarini ishlab chiqadi;

Oʻzbekiston Respublikasi Fanlar akademiyasi va boshqa idoralar bilan birgalikda atom energetikasi sohasida ilgʻor texnologiyalarni joriy etish boʻyicha fundamental tadqiqotlar, ilmiy-qidiruv, tajriba-konstruktorlik va innovatsion ishlar loyihalarini ishlab chiqadi va amalga oshiradi;

Oʻzbekiston Respublikasi Fanlar akademiyasi bilan birgalikda tarmoqni rivojlantirishning har yilgi, oʻrta muddatli va uzoq muddatli dasturlari doirasida atom energetikasidan tinchlik maqsadlarida foydalanish sohasida mavzuli ilmiy-tadqiqot va tajriba-konstruktorlik ishlarining ustuvor yoʻnalishlarini belgilaydi;

atom energiyasidan tinchlik maqsadida foydalanish, yadro va radiatsiya xavfsizligi, yadro materiallari va radioaktiv moddalar bilan ish olib borish sohasida oʻz vakolatlari doirasida norma va qoidalarni ishlab chiqadi;

atom energiyasidan tinchlik maqsadida foydalanish sohasida kadrlar tayyorlashni, yetakchi xorijiy taʼlim va ilmiy-tadqiqot muassasalarida ularning malakasini oshirishni tashkil etadi;

yagona kadrlar siyosati amalga oshirilishini ishlab chiqadi va taʼminlaydi hamda “Oʻzatom” agentligi, idoraviy mansub muassasalari xodimlari mehnatiga ish haqi toʻlash va ularni ijtimoiy muhofaza qilish tizimini shakllantiradi;

alohida zararli (radioaktiv va boshqa) sharoitlarda ishlarni olib borganlik uchun qoʻshimcha haq miqdorlarini belgilash boʻyicha takliflarni asoslaydi va ishlab chiqadi, tarmoqda mehnatni muhofaza qilish ishlarini muvofiqlashtiradi.

10. “Oʻzatom” agentligi oʻziga yuklangan vazifalar va funksiyalarni bajarish uchun quyidagi huquqlarga ega:

oʻz vakolatlari doirasida, shu jumladan, boshqa davlat organlari bilan birgalikda, davlat organlari va tashkilotlari, jismoniy va yuridik shaxslar tomonidan bajarilishi majburiy boʻlgan normativ-huquqiy hujjatlarni qabul qilish;

atom energiyasidan tinchlik maqsadlarida foydalanish sohasidagi davlat siyosatini amalga oshirish masalalarida davlat, xoʻjalik boshqaruvi organlari va mahalliy ijro etuvchi hokimiyat organlari faoliyatini belgilangan tartibda muvofiqlashtirish;

“Oʻzatom” agentligi vakolatiga kiradigan masalalarni hal etish uchun zarur boʻlgan materiallar va maʼlumotlarni davlat va xoʻjalik organlaridan, korxonalar va tashkilotlardan belgilangan tartibda soʻrash va olish;

“Oʻzatom” agentligi vakolatiga kiradigan masalalar boʻyicha zarur statistik axborotlarni davlat statistika organlaridan tekin olish;

atom energiyasidan tinchlik maqsadlarida foydalanish sohasida bajariladigan davlat va tijorat loyihalari hamda dasturlarida ishtirok etish;

“Oʻzatom” agentligi vakolatiga kiradigan masalalar boʻyicha kengashlarni davlat va xoʻjalik boshqaruvi organlari, mahalliy davlat hokimiyati organlari, shuningdek, xoʻjalik yurituvchi subyektlar rahbarlari va mutaxassislarini jalb etgan holda belgilangan tartibda tashkil etish;

atom energiyasidan tinchlik maqsadlarida foydalanish sohasida kadrlar tayyorlash va xodimlar malakasini oshirish uchun idoraviy ilmiy va oʻquv markazlarini, xoʻjalik hisobidagi konsultatsiya va axborot markazlarini belgilangan tartibda tashkil etish;

atom energiyasidan tinchlik maqsadlarida foydalanish sohasidagi joriy va strategik vazifalarni yoritish uchun noshirlik faoliyatini belgilangan tartibda amalga oshirish va matbuot organlarini taʼsis etish;

“Oʻzatom” agentligi mol-mulkini oʻz tashkiliy tuzilmasi diorasida bepul foydalanish huquqi bilan bir boʻlinmadan boshqasiga belgilangan tartibda berish;

binolarga xizmat koʻrsatish ishlarini bajarish, inventarlardan va xoʻjalik buyumlaridan, avtotransport, aloqa vositalari, hisoblash, kompyuter va tashkiliy texnikani saqlash va ulardan foydalanish, dasturiy taʼminot vositalarini xarid qilish boʻyicha ishlarni bajarish yuzasidan belgilangan tartibda shartnomalar tuzish;

amaldagi qonun hujjatlariga muvofiq “Oʻzatom” agentligining ijtimoiy infratuzilmasini tashkil etish va takomillashtirish, “Oʻzatom” agentligi xodimlari mehnatini ragʻbatlantirishning yagona tizimini shakllantirish;

“Oʻzatom” agentligi xodimlarini, ular tomonidan tegishli sohadagi ular faoliyatining asosiy koʻrsatkichlari boʻyicha parametrlarining bajarilishini hisobga olgan holda moddiy ragʻbatlantirish tartibi, miqdori va shartlarini belgilash;

“Oʻzatom” agentligi vakolatiga kiradigan masalalar boʻyicha takliflarni koʻrib chiqish uchun Vazirlar Mahkamasiga, davlat va xoʻjalik boshqaruvi organlariga, mahalliy davlat hokimiyati organlariga kiritish;

“Oʻzatom” agentligi vakolatiga taalluqli boʻlgan masalalar boʻyicha xorijiy mamlakatlarda, xalqaro va xorijiy tashkilotlarda, forumlar va maydonchalarda Oʻzbekiston Respublikasi manfaatlarini belgilangan tartibda ifodalash;

“Oʻzatom” agentligi faoliyati sohasiga kiritilgan masalalarni ishlab chiqish uchun ilmiy va boshqa tashkilotlarni, olimlar va mutaxassislarni belgilangan tartibda jalb etish;

atom energetikasidan tinchlik maqsadlarida foydalanish va atom energetikasini rivojlantirish masalalari boʻyicha Oʻzbekiston Respublikasining xorijiy mamlakatlar va xalqaro tashkilotlar bilan xalqaro shartnomalari loyihalarini kelishish uchun Oʻzbekiston Respublikasi Vazirlar Mahkamasiga kiritish;

“Oʻzatom” agentligi va uning idoraviy mansub tashkilotlari va mutaxassislarini stajirovkalardan oʻtish, malaka oshirish, xalqaro konferensiyalarda, biznes-forumlarda va boshqa tadbirlarda qatnashish uchun xorijiy mamlakatlarga belgilangan tartibda yuborish;

atom energetikasi sohasidagi yetakchi xorijiy mutaxassislarni “Oʻzatom” agentligida va uning idoraviy mansub tashkilotlarida ishlash uchun shartnoma asosida, belgilangan tartibda jalb etish;

“Oʻzatom” agentligi vakolatiga kiradigan masalalar boʻyicha xorijiy davlatlar, xalqaro va xorijiy tashkilotlar, ilmiy-tadqiqot institutlari vakillari bilan belgilangan tartibda muzokaralar oʻtkazish;

zaruriyat boʻlganda, normativ-huquqiy hujjatlarni ishlab chiqish uchun tegishli tarmoqlarda olimlar va mutaxassislardan vaqtinchalik ishchi guruhlar tuzish, ushbu ishlarga boshqa vazirliklar, idoralar va tashkilotlardan mutaxassislar va ekspertlarni shartnoma asosida jalb etish;

idoraviy mansub tashkilotlarda mehnatni muhofaza qilish va texnika xavfsizligi boʻyicha ishlarni muvofiqlashtirish;

ushbu Nizomda belgilangan maqsadlarga erishishga yoʻnaltirilgan, qonun hujjatlarida taqiqlanmagan boshqa faoliyat turlarini amalga oshirish.

11. “Oʻzatom” agentligi quyidagilar uchun javob beradi:

“Oʻzatom” agentligiga yuklangan vazifalar va funksiyalarning samarali bajarilishi;

respublikada atom energetikasini rivojlantirish boʻyicha oldindan chora-tadbirlar koʻrilishi;

atom energetikasi boʻyicha texnikaviy tartibga solish sohasidagi normativ hujjatlar talablariga rioya etilishi yuzasidan tizimli nazoratning yuritilishi;

Oʻzbekiston Respublikasi Prezidenti va Hukumati topshiriqlarining oʻz vaqtida va sifatli bajarilishi va kelgusida tizimli monitoring olib borilishini taʼminlagan holda uzoq muddatli, oʻrta muddatli va har yilgi rivojlanish dasturlari ishlab chiqilishi;

atom energetikasi uchun yuqori malakali, oliy va oʻrta maʼlumotli, professional bilimga ega boʻlgan mutaxassislarni tayyorlash, qayta tayyorlash va ushbu tarmoq xodimlari malakasini oshirish, shuningdek, ular mehnatini ragʻbatlantirish mexanizmlarini takomillashtirish boʻyicha tizimli chora-tadbirlarning amalga oshirilishi;

“Oʻzatom” agentligining faoliyati bilan bogʻliq boʻlgan prognoz koʻrsatkichlariga erishish sohasidagi ishlarning samarali tashkil etilishi;

Vazirlar Mahkamasiga va Oʻzbekiston Respublikasi Prezidenti apparatiga kiritiladigan normativ-huquqiy hujjatlar va boshqa hujjatlar, shuningdek, “Oʻzatom” agentligi tomonidan qabul qilinadigan qarorlar loyihalarining sifati va yakuniy natijalari;

tarmoqni rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning oʻz vaqtida va samarali amalga oshirilishi.

12. Quyidagilar “Oʻzatom” agentligi bosh direktorining asosiy funksional majburiyatlari hisoblanadi:

Oʻzbekiston Respublikasining Konstitutsiyasi va qonunlari, shuningdek, boshqa normativ-huquqiy hujjatlari talablariga rioya etish;

“Oʻzatom” agentligi faoliyatiga umumiy rahbarlik qilish, Oʻzbekiston Respublikasi Prezidentining hujjatlari, Vazirlar Mahkamasining qarorlari va boshqa qonun hujjatlarida “Oʻzatom” agentligiga yuklangan vazifa va funksiyalarning bajarilishini tashkil etish;

“Oʻzatom” agentligi faoliyatini yanada takomillashtirish boʻyicha Oʻzbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan konsepsiyalar, kompleks dasturlar va tadbirlarning bajarilishi yuzasidan chuqur va tanqidiy tahlilni amalga oshirish;

Oʻzbekiston Respublikasi Prezidenti apparatining xizmatlari va Vazirlar Mahkamasining komplekslari, shuningdek, tegishli vazirliklar va idoralar bilan “Oʻzatom” agentligi faoliyati sohasiga kiradigan masalalar boʻyicha oʻzaro hamkorlik qilish, Vazirlar Mahkamasi va uning Rayosati majlislarida masalalarni koʻrib chiqishda qatnashish;

Oʻzbekiston Respublikasi Prezidentining, Oʻzbekiston Respublikasi Bosh vazirining va uning oʻrinbosarlarining shu jumladan Oʻzbekiston Respublikasi energetika vazirining topshiriqlarini ijro etish;

“Oʻzatom” agentligi faoliyati ayrim uchastkalariga rahbarlik qilish yuzasidan “Oʻzatom” agentligi mansabdor shaxslarining vakolatlarini aniqlash va ularning shaxsiy javobgarligi darajasini belgilash;

“Oʻzatom” agentligi faoliyati rejalashtirilishini tashkil etish, “Oʻzatom” agentligi va mansabdor shaxslarining har choraklik ish rejalarini tasdiqlash, ularning bajarilishi yuzasidan nazoratni taʼminlash;

Oʻzbekiston Respublikasi Prezidenti va Vazirlar Mahkamasining hujjatlari va topshiriqlarini bajarishni tashkil etish taʼsirchan tizimini yaratish va monitoringini yuritish, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga hamda Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq “Oʻzatom” agentligi faoliyatida ijro intizomini mustahkamlash boʻyicha kompleks amaliy chora-tadbirlarni bajarish;

Oʻzbekiston Respublikasining “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi qonunlariga muvofiq “Oʻzatom” agentligining qonun loyihalari boʻyicha faoliyatini tashkil etish;

Oʻzbekiston Respublikasining “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi qonunlari, Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamenti (keyingi oʻrinlarda Vazirlar Mahkamasining Reglamenti deb ataladi) hamda Oʻzbekiston Respublikasi Prezidentining 2017-yil 28-iyuldagi PQ-3161-son qarori bilan tasdiqlangan Oʻzbekiston Respublikasi Prezidenti apparatining Reglamenti (keyingi oʻrinlarda Oʻzbekiston Respublikasi Prezidenti Apparati Reglamenti deb ataladi) talablariga qatʼiy muvofiq ravishda faoliyat koʻrsatish masalalari boʻyicha normativ-huquqiy hujjatlar loyihalarining sifatli ishlab chiqilishini tashkil etish va ularning Vazirlar Mahkamasiga oʻz vaqtida kiritilishini taʼminlash;

“Oʻzatom” agentligiga taqdim etilgan takliflarning va normativ-huquqiy hujjatlar loyihalarining toʻliq va har tomonlama koʻrib chiqilishini taʼminlash, ularni moliyaviy, iqtisodiy, huquqiy va boshqa xil ekspertizadan puxta oʻtkazilishini, shuningdek, ularning Vazirlar Mahkamasi Reglamentida va Oʻzbekiston Respublikasi Prezidenti apparatining Reglamentida belgilangan muddatlarda kelishilishini (vizalanishini) taʼminlash;

“Oʻzatom” agentligi xodimlarini lavozimga tayinlash va lavozimdan ozod etish;

“Oʻzatom” agentligiga kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, “Oʻzatom” agentligi kadrlar zaxirasini shakllantirish;

“Oʻzatom” agentligi xodimlarini tayyorlash, qayta tayyorlash va ularning malakasini oshirish tizimini tashkil etish;

“Oʻzatom” agentligi faoliyatiga ishlarni tashkil etishning zamonaviy shakllari joriy etilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish;

Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy masʼuliyatlarini yanada oshirish va xorijiy delegatsiyalarning Oʻzbekiston Respublikasiga tashriflarini tashkil etish choralari toʻgʻrisida” 2017-yil 3-avgustdagi PQ-3170-son qarorlariga toʻliq muvofiq holda “Oʻzatom” agentligi rahbarlari va xodimlarining xizmat safarlarini tashkil etish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablagʻlardan maqsadli va oqilona foydalanilishini taʼminlash;

“Oʻzatom” agentligi xodimlari tomonidan “Oʻzatom” agentligi xodimlarining odob-axloq qoidalari talablariga rioya etilishini taʼminlash;

huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq “Oʻzatom” agentligi tizimida korrupsiya va boshqa qoida buzilishlarining oldini olish chora-tadbirlarini koʻrish;

“Oʻzatom” agentligi xodimlari bajarishi majburiy boʻlgan buyruqlar qabul qilish va koʻrsatmalar berish;

zarurat boʻlgan taqdirda “Oʻzatom” agentligining tashkiliy tuzilmasiga boshqaruv xodimlarining belgilangan cheklangan umumiy soni va mehnatga haq toʻlash fondi doirasida oʻzgartirishlar kiritish;

“Oʻzatom” agentligining shtatlar roʻyxatini belgilangan tartibda tasdiqlash;

“Oʻzatom” agentligi xodimlarini koʻkrak nishonlari va faxriy yorliqlar bilan belgilangan tartibda mukofotlash toʻgʻrisidagi masalalarni hal etish, “Oʻzatom” agentligining alohida namuna koʻrsatgan xodimlarini Oʻzbekiston Respublikasi faxriy unvonlari va davlat mukofotlari bilan taqdirlashga tavsiya etish;

“Oʻzatom” agentligi xodimlarini ragʻbatlantirish va intizomiy javobgarlikka tortish masalalarini hal etish, shu jumladan, ularning bundan buyon egallab turgan lavozimida qolishining maqsadga muvofiqligi, ularning shaxsiy javobgarligini oshirish boʻyicha tizimli masalalarni koʻrib chiqish;

Oʻzbekiston Respublikasining “Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi qonunlariga muvofiq “Oʻzatom” agentligining qonun loyihalari boʻyicha faoliyatini tashkil etish;

“Oʻzatom” agentligi mol-mulkini qonun hujjatlarida belgilangan tartibda tasarruf etish.

13. Quyidagilar “Oʻzatom” agentligi bosh direktori oʻrinbosarlarining va tarkibiy boʻlinmalari rahbarlarining asosiy funksional majburiyatlari hisoblanadi:

Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga “Oʻzatom” agentligi tarkibiy boʻlinmalari xodimlari tomonidan rioya etilishini taʼminlash;

tarkibiy boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalarning bajarilishini tashkil etish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlarining ijrosini taʼminlash, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga hamda Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq ijro intizomini mustahkamlash boʻyicha kompleks amaliy chora-tadbirlarni bajarish, tarkibiy boʻlinmalar xodimlarining topshiriqlarni oʻz vaqtida va sifatli bajarish yuzasidan shaxsiy javobgarligini oshirish choralarini koʻrish;

“Oʻzatom” agentligi qarorlarining, bosh direktor buyruqlari va topshiriqlarining oʻz vaqtida va sifatli bajarilishini taʼminlash;

tarkibiy boʻlinmalarning har choraklik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifa va tadbirlarning oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalarning bajarilishini nazorat qilish va muvofiqlashtirish;

tarkibiy boʻlinmalar faoliyati masalalari boʻyicha qonunchilikni takomillashtirish yuzasidan takliflar ishlab chiqish va ularni koʻrib chiqish uchun “Oʻzatom” agentligi rahbariyatiga kiritish;

“Oʻzatom” agentligi tarkibiy boʻlinmalariga kadrlarni tanlash va tayinlashda bosh direktorga takliflar taqdim etish, tarkibiy boʻlinmalarga ishga qabul qilinayotgan kadrlarning professionalligi, oʻz ishini bilishi, amaliy ish tajribasi, yuqori ishchanlik darajasi va maʼnaviy-axloqiy sifatlari kafolatlanganligini taʼminlash, ularning kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

tarkibiy boʻlinmalarda normativ-huquqiy hujjatlar loyihalarining sifatli ishlab chiqilishini tashkil etish, keyinchalik ularni koʻrib chiqish uchun “Oʻzatom” agentligi tarkibiy boʻlinmalarida tayyorlangan hujjatlar loyihalarini koʻrib chiqish va ularga viza qoʻyishni tashkil etish, ularni “Oʻzatom” agentligi rahbariyati tomonidan imzolash (viza qoʻyish), ularning Vazirlar Mahkamasi Reglamenti va Oʻzbekiston Respublikasi Prezidenti apparati Reglamenti talablariga qatʼiy ravishda oʻz vaqtida Vazirlar Mahkamasiga kiritilishini taʼminlash;

“Oʻzatom” agentligiga taqdim etilgan takliflarni va normativ-huquqiy hujjatlar loyihalarini oʻz vakolati doirasida toʻliq va har tomonlama koʻrib chiqish, ularni moliyaviy, iqtisodiy, huquqiy va boshqa ekspertizalardan puxta oʻtkazish;

Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy masʼuliyatlarini yanada oshirish va xorijiy delegatsiyalarning Oʻzbekiston Respublikasiga tashriflarini tashkil etish choralari toʻgʻrisida” 2017-yil 3-avgustdagi PQ-3170-son qarorlariga toʻliq muvofiq holda xizmat safarlarini tashkil etish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablagʻlardan maqsadli va oqilona foydalanilishini taʼminlash;

“Oʻzatom” agentligi tarkibiy boʻlinmalari xodimlarining faoliyati samaradorligi va natijadorligini tizimli ravishda tanqidiy tahlil qilish, ularning shaxsiy hisobotlarini yigʻilishlarda eshitish, yakunlari boʻyicha zarur choralar koʻrish;

“Oʻzatom” agentligi xodimlari tomonidan xodimlarning axloq-odob qoidalari talablariga rioya etish;

huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq “Oʻzatom” agentligi tarkibiy boʻlinmalarida korrupsiya va boshqa qoida buzilishlarining oldini olish chora-tadbirlarini koʻrish;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

14. “Oʻzatom” agentligining bosh direktori:

“Oʻzatom” agentligiga yuklangan vazifa va funksiyalarning bajarilishi uchun;

“Oʻzatom” agentligining ushbu Nizomning 11-bandida nazarda tutilgan javobgarlik sohalari boʻyicha;

ushbu Nizomning 12-bandida koʻrsatilgan oʻz funksional majburiyatlarining sifatli bajarilishi uchun shaxsan javob beradi.

15. “Oʻzatom” agentligi bosh direktorining oʻrinbosarlari va tarkibiy boʻlinmalari rahbarlari:

tegishli tarkibiy boʻlinmalarga yuklangan vazifalar va funksiyalarning amalga oshirilishi uchun;

ushbu Nizomning 13-bandida koʻrsatilgan oʻz funksional majburiyatlarining sifatli bajarilishi uchun shaxsan javob beradilar.

16. “Oʻzatom” agentligini Oʻzbekiston Respublikasi Bosh vazirining taqdimiga binoan Oʻzbekiston Respublikasi Prezidenti tomonidan lavozimga tayinlanadigan va lavozimdan ozod etiladigan bosh direktor boshqaradi.

Bosh direktorning Oʻzbekiston Respublikasi Prezidenti bilan kelishilgan holda Oʻzbekiston Respublikasi Vazirlar Mahkamasi qarori bilan lavozimga tayinlanadigan va lavozimdan ozod etiladigan birinchi oʻrinbosari va oʻrinbosari boʻladi.

“Oʻzatom” agentligi bosh direktori oʻz maqomiga koʻra vazirga, bosh direktorning birinchi oʻrinbosari — vazirning birinchi oʻrinbosariga, bosh direktorning oʻrinbosari esa — vazir oʻrinbosariga tenglashtiriladi.

“Oʻzatom” agentligining bosh direktori va xodimlari mehnatiga haq toʻlash sharoitlari qonun hujjatlarida belgilangan tartibda aniqlanadi.

17. “Oʻzatom” agentligi bosh direktori:

“Oʻzatom” agentligi yakka tartibdagi ijro organi hisoblanadi va uning joriy faoliyatiga rahbarlik qiladi;

“Oʻzatom” agentligi faoliyatiga umumiy rahbarlikni amalga oshiradi va “Oʻzatom” agentligiga yuklangan vazifalar va funksiyalarning bajarilishi uchun shaxsan javob beradi;

“Oʻzatom” agentligi xodimlarining lavozim majburiyatlarini belgilangan tartibda tasdiqlaydi;

“Oʻzatom” agentligi xodimlarini belgilangan tartibda lavozimga tayinlaydi va lavozimdan ozod qiladi;

oʻz vakolati doirasida “Oʻzatom” agentligi xodimlarining bajarishi majburiy boʻlgan buyruqlar va farmoyishlar chiqaradi, koʻrsatmalar beradi.

Bosh direktor qonun hujjatlariga muvofiq boshqa vakolatlarni ham amalga oshirishi mumkin.

Bosh direktor boʻlmagan davrda uning vakolatlarini vazifalar taqismotiga muvofiq direktor oʻrinbosarlari bajarishadi.

18. “Oʻzatom” agentligi oʻz vazifalari va funksiyalarini amalga oshirishda davlat va xoʻjalik boshqaruvi organlari, mahalliy davlat hokimiyati organlari hamda boshqa tashkilotlar bilan hamkorlik qiladi.

20. “Oʻzatom” agentligi faoliyatining samaradorligi muntazam ravishda baholanadi.

21. “Oʻzatom” agentligi faoliyatining samaradorligi va natijadorligini baholash Oʻzbekiston Respublikasi energetika vaziri tasdiqlaydigan “Oʻzatom” agentligi faoliyatining samaradorligi va natijadorligini baholash mezonlari va ishchi indikatorlari asosida amalga oshiriladi.

22. “Oʻzatom” agentligi faoliyati samaradorligi va natijadorligini baholash yakunlariga koʻra quyidagilar boʻyicha choralar koʻriladi:

“Oʻzatom” agentligi rahbarlari va xodimlariga nisbatan ragʻbatlantirish (mukofotlash) yoki intizomiy javobgarlikning tegishli choralarini koʻrish;

aniqlangan kamchiliklarni bartaraf etish va “Oʻzatom” agentligi faoliyatini yanada takomillashtirish.

23. “Oʻzatom” agentligi faoliyati samaradorligi va natijadorligini baholash tartibi va metodikasi qonun hujjatlari bilan belgilanadi.

24. “Oʻzatom” agentligi faoliyati Oʻzbekiston Respublikasi Davlat budjetidan va qonun hujjatlariga muvofiq jalb etilgan budjetdan tashqari mablagʻlardan, shuningdek, Atom energetikasini rivojlantirish jamgʻarmasidan (keyingi oʻrinlarda Jamgʻarma deb ataladi) moliyalashtiriladi.

25. Jamgʻarma mablagʻlaridan foydalanish Moliya vazirligi bilan kelishiladigan xarajatlar smetasi asosida amalga oshiriladi.

26. “Oʻzatom” agentligi xodimlarini moddiy ragʻbatlantirish amaldagi qonun hujjatlariga muvofiq amalga oshiriladi.

27. “Oʻzatom” agentligi xodimlarining ish haqi lavozim maoshi, mukofotlar, qoʻshimcha toʻlovlar, ustamalar va qonun hujjatlarida nazarda tutilgan ragʻbatlantirish toʻlovlaridan iborat boʻladi.

28. “Oʻzatom” agentligi xodimlariga quyidagilar uchun lavozim maoshiga koeffitsiyentlarda har oylik ustamalar toʻlanadi:

mehnatning alohida sharoitlari uchun — 1,7 miqdorida, u qonun hujjatlarida belgilangan ragʻbatlantiruvchi qoʻshimcha haq va ustamalarni hisoblashda lavozim maoshi tarkibiga kiritiladi;

uzoq muddat davomidagi uzluksiz ish staji uchun quyidagi miqdorlarda, ragʻbatlantirish koeffitsiyentini hisobga olgan holda: 3 yildan 5 yilgacha — 0,05; 5 yildan 10 yilgacha — 0,1; 10 yildan 15 yilgacha — 0,15; 15 yildan 20 yilgacha — 0,2; 20 yildan ortiq — 0,25 miqdorida.

Ushbu bandda nazarda tutilgan tadbirlarni amalga oshirish bilan bogʻliq xarajatlar Oʻzbekiston Respublikasi Davlat budjeti hisobidan va “Oʻzatom” agentligining Atom energetikasini rivojlantirish jamgʻarmasidan teng ulushlarda amalga oshiriladi.

29. “Oʻzatom” agentligi bosh direktori “Oʻzatom” agentligi faoliyatining natijalari toʻgʻrisida Oʻzbekiston Respublikasi Prezidenti, Vazirlar Mahkamasi va Energetika vazirligi oldida muntazam ravishda hisobot beradi.

30. Oʻzbekiston Respublikasi energetika vaziri “Oʻzatom” agentligiga yuklangan vazifalarning samarali bajarilishi boʻyicha doimiy faoliyat monitoringini amalga oshiradi, “Oʻzatom” agentligi faoliyati samaradorligiga obyektiv baho beradi.

31. Faoliyat monitoringi va bahosi yakunlariga koʻra “Oʻzatom” agentligi mansabdor shaxslari va xodimlariga nisbatan yuklangan vazifalarni vijdonan va oʻz vaqtida bajarganlik uchun ragʻbatlantirish yoxud yoʻl qoʻyilgan jiddiy kamchiliklar uchun egallab turgan lavozimidan boʻshatishgacha boʻlgan javobgarlik choralari koʻriladi.

32. “Oʻzatom” agentligini qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining 2016-yil 7-oktabrdagi 336-son qarori (Oʻzbekiston Respublikasi QT, 2016-y., 10-son, 89-modda) bilan tasdiqlangan Rahbarlari xodimlarni Toshkent shahri va Toshkent viloyatida doimiy propiska qilish toʻgʻrisida iltimosnoma kiritishi mumkin boʻlgan davlat hokimiyati organlari, davlat va xoʻjalik boshqaruvi organlari, respublika ahamiyatiga molik boshqa davlat tashkilotlari roʻyxatiga quyidagi mazmundagi 64-band qoʻshilsin:

“64. Oʻzbekiston Respublikasi Vazirlar Mahkamasi huzuridagi Atom energetikasini rivojlantirish agentligi”.

2. Vazirlar Mahkamasining 2018-yil 26-apreldagi 180-f-son farmoyishi bilan tasdiqlangan Oʻzbekiston Respublikasi aeroportlarida rasmiy delegatsiyalarga xizmat koʻrsatish zali toʻgʻrisidagi nizomda:

a) “Toshkent” aeroportining VIP zalida bepul xizmat koʻrsatish huquqiga ega boʻlgan diplomatik missiyalarning mansabdor shaxslari va xodimlari toifalari roʻyxatiga (1-roʻyxat) quyidagi mazmundagi 6.4-kichik band qoʻshilsin:

“6.4. Oʻzbekiston Respublikasi Vazirlar Mahkamasi huzuridagi Atom energetikasini rivojlantirish agentligi bosh direktori va uning oʻrinbosarlari”;

b) Oʻzbekiston Respublikasi aeroportlarining rasmiy delegatsiyalariga xizmat koʻrsatish zalida bepul xizmat koʻrsatish huquqiga ega boʻlgan diplomatik missiyalarning mansabdor shaxslari va xodimlari toifalari roʻyxatiga (1-roʻyxat) quyidagi mazmundagi 6.6-kichik band qoʻshilsin:

“6.6. Oʻzbekiston Respublikasi Vazirlar Mahkamasi huzuridagi Atom energetikasini rivojlantirish agentligi bosh direktori va uning oʻrinbosarlari”.