Oʻzbekiston Respublikasi Hukumati bilan Tojikiston Respublikasi Hukumati oʻrtasida

Fuqarolarning oʻzaro kelib-ketishlari toʻgʻrisida

LexUZ sharhi

Mazkur Bitim Oʻzbekiston Respublikasi Prezidentining 2018-yil 14-martdagi PQ-3604-sonli “Xalqaro shartnomani tasdiqlash toʻgʻrisida”gi qarori bilan tasdiqlangan.

(Oʻzbekiston Respublikasi uchun 2018-yil 19-martdan kuchga kirgan)

Oʻzbekiston Respublikasi Hukumati va Tojikiston Respublikasi Hukumati, keyingi oʻrinlarda “Tomonlar” deb ataluvchilar,

ikki qardosh davlat oʻrtasidagi munosabatlarni yanada chuqurlashtirish va oʻz davlatlari fuqarolari oʻrtasidagi aloqalarni rivojlantirishga intilgan holda,

ikkala davlat fuqarolarining oʻzaro kelib-ketish qoidalari va shartlarini tartibga solish maqsadida,

quyidagilar toʻgʻrisida kelishib oldilar:

1-modda

1. 1- va 2-ilovalarda sanab oʻtilgan amaldagi harakatlanish hujjatlari egalari boʻlgan Tomonlar davlatlarining fuqarolari vizasiz 30 sutkagacha Tomonlar davlatlari hududiga kirishlari, chiqishlari, undan tranzit oʻtishlari va unda vaqtincha boʻlishlari mumkin.

2. 30 sutkadan ortiq muddatga Tomonlar davlatlari hududlariga kirish va u erda boʻlishni koʻzlagan Tomonlar davlatlarining fuqarolari Tomonlar davlatlari qonunchiligi bilan oʻrnatilgan tartibga muvofiq viza rasmiylashtiradilar.

Oldingi tahrirga qarang.

3. Bir Tomon davlatining boshqa Tomon davlati hududida boʻlib turgan fuqarolari, qabul qiluvchi Tomon davlatining davlat chegarasini kesib oʻtgan paytdan boshlab 10 (oʻn) kun davomida oʻzlari boʻlib turgan Tomon davlatining vakolatli organlarida roʻyxatdan oʻtish hamda vaqtincha roʻyxatga qoʻyish majburiyatlaridan ozod etiladilar.

4. Basharti Tomonlardan biri davlatining qonunchiligi shaxslarning kirishi, boʻlib turishi, roʻyxatdan oʻtishi va vaqtinchalik roʻyxatda turishi yoki chiqib ketishiga nisbatan yanada qulayroq sharoitlarni oʻrnatadigan boʻlsa, mazkur Tomon davlati hududida oʻz davlatining milliy qonunchiligi qoʻllaniladi.

(1-modda Oʻzbekiston Respublikasi Hukumati bilan Tojikiston Respublikasi Hukumati oʻrtasidagi 2021-yil 10-iyundagi bayonnomaga asosan 3 va 4-bandlar bilan toʻldirilgan)

2-modda

1. Bir Tomon davlatining amaldagi diplomatik, xizmat va milliy pasportlariga ega boʻlgan fuqarolari boshqa Tomon davlati hududida joylashgan diplomatik vakolatxonalar va konsullik muassasalari, shuningdek, xalqaro tashkilotlar vaklatxonalarining xodimlari boʻlsalar, kirib kelgandan soʻng Tomonlar qonunchiligida oʻrnatilgan tartibga muvofiq akkreditatsiyani rasmiylashtiradilar va butun akkreditatsiya muddati davomida vizasiz boʻladilar.

2. Ushbu moddaning 1-bandidagi qoidalar mazkur fuqarolarning rasmiy ish faoliyati davrida ular bilan birga boshqa Tomon davlati hududida yashaydigan oila aʼzolari (turmush oʻrtogʻi va voyaga yetmagan farzandlari)ga ham tatbiq etiladi.

3-modda

Amaldagi diplomatik pasportlari egalari boʻlgan, Tomonlar davlatlariga xizmat safarini amalga oshiradigan va boshqa Tomon davlati hududida oʻttiz sutkadan ortiq boʻlishni koʻzlagan Tomonlar davlatlarining fuqarolariga vizalar ular fuqarosi boʻlgan Tomon davlatining diplomatik vakolatxonasi yoki konsullik muassasasining yozma murojaatiga asosan konsullik yigʻimlari undirilmasdan beriladi.

4-modda

1. Bir Tomon davlatining boshqa Tomon davlati hududida joylashgan obyektlariga xizmat koʻrsatuvchi Tomonlar davlatlarining fuqarolari xizmat vazifalarini bajarishi uchun shu boshqa Tomon davlati hududiga vizasiz kiradilar, chiqadilar va unda boʻladilar.

2. Mazkur xizmatchilarni chegaradan oʻtkazish milliy pasport va xizmat guvohnomasi asosida amalga oshiriladi.

3. Mazkur fuqarolarni boshqa Tomon davlati hududida vaqtincha roʻyxatga olish va qayd qilish Tomonlar davlatlarining vakolatli organlari tarafidan obyektlarga xizmat koʻrsatadigan tashkilotlarning taqdimnomasi asosida boj va yigʻimlar undirilmagan holda amalga oshiriladi.

4. Mazkur obyektlarga xizmat koʻrsatishda foydalaniladigan avtotransport vositalari, maxsus texnika hamda moddiy-texnikaviy resurslar barcha turdagi soliqlar, yigʻimlar, bojlar va boshqa xil toʻlovlardan ozod qilinadi.

5. Ushbu moddaning 1-bandida koʻrsatilgan obyektlarning roʻyxati mazkur Bitim imzolangan sanadan soʻng 30 kun ichida diplomatik kanallar orqali notalar almashish orqali aniqlanadi.

5-modda

Tomonlar xalqaro avtomobil tashishlarini amalga oshiradigan transport korxonalarining diplomatik vakolatxonalar va konsullik muassasalariga murojaati asosida transport vositalarining haydovchilariga belgilangan tartibda 12 oyga qadar muddatga koʻp martalik viza beradilar.

6-modda

1. Tomonlar bir-birlarini mazkur Bitimni qoʻllash sohasiga taalluqli boʻlgan masalalar, shu jumladan, shaxsni va egalarining fuqaroligini tasdiqlovchi amaldagi hujjatlar, ularni berish va ulardan foydalanish tartibiga kiritilgan oʻzgarishlar, Tomonlar davlatlari hududida xorijiy fuqarolarning boʻlishlari qoidalari hamda tegishli qonunchilik hujjatlari yuzasidan xabardor qiladilar.

2. Tomonlar oʻzaro yozma rozilik asosida mazkur Bitimning 1- va 2-ilovalarida koʻrsatilgan hujjatlar roʻyxatlariga oʻzgartirish kiritish boʻyicha qaror qabul qilishlari mumkin.

Bunday holatda, amaldagi hujjatlarga oʻzgartirish kiritilgan yoki yangi hujjatlar amalga kiritilgan taqdirda, Tomonlar diplomatik kanallar orqali ularning kiritilishidan kamida 30 kun ilgari ularning namunalari bilan almashadilar.

7-modda

Tomonlar mazkur Bitim imzolanganidan soʻng mazkur Bitimning 1- va 2-ilovalarida koʻrsatilgan hujjatlarning namunalarini diplomatik kanallar orqali almashadilar.

8-modda

Viza berish uchun konsullik yigʻimlarining tariflari Tomonlar tarafidan oʻzarolik shartlari asosida mazkur Bitimning 3-ilovasiga muvofiq belgilanadi.

9-modda

Tomonlar oʻzarolik asosida quyidagi shaxslarni viza uchun konsullik yigʻimi toʻlashdan ozod etadilar:

Tomonlar oʻrtasidagi shartnomalarga muvofiq fan, texnika, taʼlim, madaniyat, sanʼat va sport sohasida almashuv tarzida borayotganlar;

Ulugʻ Vatan urushi veteranlari va ularga tenglashtirilgan shaxslar, 1- va 2-guruh nogironlari — tegishli hujjat taqdim etilgan holda;

16 yoshgacha boʻlgan va 60 yoshdan oshgan fuqarolar;

oʻquv yurtlarida, Tomonlar davlatlari hududlarida tashkil etiladigan kurslarda taʼlim olayotganlar taklif etuvchi oʻquv yurti murojaatiga asosan.

10-modda

1. Ikkala Tomon davlatining ushbu Bitim qoidalari qoʻllaniladigan fuqarolari davlat chegaralaridan oʻtish uchun belgilangan oʻtkazish punktlari orqali Tomonlarning milliy qonunchiligiga muvofiq davlat chegaralaridan oʻtish tartiblariga amal qilgan holda Tomonlar davlati hududiga kirishlari, chiqishlari va undan tranzit oʻtishlari mumkin.

2. Davlat chegaralaridan oʻtkazish punktlarining roʻyxati alohida bitim bilan aniqlanadi.

11-modda

1. Tomonlar davlatlarining fuqarolari boshqa Tomon davlati hududida boʻlgan chogʻlarida bu Tomon davlatining qonun va qoidalariga rioya qilishlari lozim.

2. Bir Tomon davlatining boshqa Tomon davlati hududida xizmat ishlari bilan boʻlgan fuqarolarini vaqtincha propiskaga qoʻyish va roʻyxatga olish mazkur Bitimning 1- va 2-ilovalarida keltirilgan hujjatlar hamda xizmat va safar guvohnomasi asosida Tomonlar davlatlarining vakolatli organlari tarafidan yigʻim va toʻlovlar undirilmasdan amalga oshiriladi.

3. Mazkur Bitim Tomonlarning boshqa Tomon davlatining kelishi nomaqbul deb hisoblangan fuqarosi kelishini rad etish yoki ularning davlatlari hududida boʻlish muddatini cheklash huquqiga daxl qilmaydi.

12-modda

1. Alohida hollarda (milliy xavfsizlikka, jamoat tartibi yoki fuqarolar sogʻligʻiga tahdid, shu jumladan, favqulodda vaziyatlar va boshqalar) Tomonlar ushbu Bitim amal qilishini toʻla yoki qisman toʻxtatib turish huquqini saqlab qoladilar.

2. Bunday holatda manfaatdor Tomon boshqa Tomonni diplomatik kanallar orqali cheklovlar kuchga kirishidan 72 soat avval xabardor qilgan holda boshqa Tomon davlati fuqarolarining vizasiz kirishi, chiqishi, uning hududida boʻlishi va tranzit oʻtishiga tegishli cheklovlar kiritishi mumkin.

3. Mazkur moddaning 1-bandida nazarda tutilgan holatlar bartaraf etilganidan soʻng, Tomonlar ushbu holatlar bartaraf etilgani toʻgʻrisida bir-birlarini xabardor qilishlari va mazkur Bitimning amal qilishini qayta tiklashlari lozim.

13-modda

Mazkur Bitim qoidalarini qoʻllashda yuzaga keladigan masalalarni Tomonlar muzokara va maslahatlashuvlar yoʻli bilan hal etadilar.

14-modda

Mazkur Bitimga Tomonlarning oʻzaro kelishuviga asosan uning ajralmas qismi hisoblanadigan alohida bayonnomalar bilan rasmiylashtiriladigan va mazkur Bitimning 17-moddasida nazarda tutilgan tartibda kuchga kiradigan oʻzgartirish va qoʻshimchalar kiritilishi mumkin.

15-modda

Mazkur Bitim Oʻzbekiston Respublikasi va Tojikiston Respublikasi ishtirokchilar hisoblanadigan boshqa xalqaro shartnomalardan kelib chiqadigan Tomonlarning huquq va majburiyatlariga daxl qilmaydi.

16-modda

Mazkur Bitim kuchga kirgan sanadan boshlab 2000-yil 16-mayda imzolangan Oʻzbekiston Respublikasi Hukumati bilan Tojikiston Respublikasi Hukumati oʻrtasida fuqarolarning oʻzaro kelib-ketishlari toʻgʻrisida Bitim oʻz kuchini yoʻqotadi.

17-modda

Mazkur Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida oxirgi yozma xabarnoma olingan kundan boshlab kuchga kiradi va Tomonlardan biri uning amal qilishini tugatish niyati toʻgʻrisida boshqa Tomonning rasmiy xabarnomasini olgan sanadan 90 kun oʻtguniga qadar amalda boʻladi.

Dushanbe shahrida 2018-yil 9-martda ikki asl nusxada, har biri oʻzbek, tojik va rus tillarida tuzildi, bunda barcha matnlar bir xil kuchga ega.

Mazkur Bitim qoidalarini talqin qilish maqsadida rus tilidagi matndan foydalaniladi.