Jismoniy shaxslar tomonidan Oʻzbekiston Respublikasining bojxona chegarasi orqali naqd xorijiy valyutani olib kirish va olib chiqib ketish tartibini soddalashtirish maqsadida:

1. 2018-yilning 1-yanvaridan boshlab:

jismoniy shaxslar tomonidan ekvivalenti 2 000 (ikki ming) AKSh dollariga teng yoki undan oshmaydigan miqdordagi naqd xorijiy valyutani Oʻzbekiston Respublikasiga olib kirish yoki Oʻzbekiston Respublikasidan olib chiqib ketishda yozma ravishda majburiy deklaratsiya taqdim etish tartibi;

tijorat banklari tomonidan jismoniy shaxslarning naqd xorijiy valyutani Oʻzbekiston Respublikasidan tashqariga olib chiqib ketishlariga ruxsatnoma berishi bekor qilinsin.

2. Belgilansinki, jismoniy shaxslar tomonidan naqd xorijiy valyutani Oʻzbekiston Respublikasidan tashqariga olib chiqib ketishi ekvivalentda 5 000 (besh ming) AQSh dollariga teng yoki undan oshmaydigan summa doirasida hech qanday ruxsatnomalarsiz amalga oshiriladi.

Belgilangan summadan ortiqcha mablagʻni olib chiqib ketish:

rezidentlar tomonidan — Oʻzbekiston Respublikasi Markaziy bankining ruxsatnomasi asosida;

norezidentlar tomonidan — Oʻzbekiston Respublikasiga kirish chogʻida toʻldirilgan yoʻlovchi bojxona deklaratsiyasi asosida amalga oshiriladi, deklaratsiyada naqd xorijiy valyuta summasi olib chiqib ketiladigan naqd xorijiy valyuta summasidan kam boʻlmagan miqdorda koʻrsatiladi.

Norezidentlar — respublikada belgilangan tartibda tashkil qilingan musobaqalar, tanlov va olimpiadalarning sovrindorlari yoki qatnashchilari tomonidan belgilangan summadan ortiqcha naqd xorijiy valyuta olib chiqib ketilayotganda naqd xorijiy valyuta olinganligining qonuniyligini tasdiqlovchi hujjat ular tomonidan ushbu naqd xorijiy valyutani olib chiqib ketish uchun asos boʻladi.

3. Jismoniy shaxslar tomonidan Oʻzbekiston Respublikasiga naqd xorijiy valyutani olib kirishlari cheklovlarsiz amalga oshiriladi.

4. Jismoniy shaxslar tomonidan ekvivalenti 2 000 (ikki ming) AKSh dollaridan oshadigan summadagi naqd xorijiy valyutani Oʻzbekiston Respublikasiga olib kirish va olib chiqib ketish chogʻida olib kirilayotgan yoki olib chiqib ketilayotgan naqd xorijiy valyutaning jami summasi yozma ravishda deklaratsiya qilinadi.

5. Oʻzbekiston Respublikasi Davlat bojxona qoʻmitasi, Markaziy banki, Tashqi ishlar vazirligi va Turizmni rivojlantirish davlat qoʻmitasi ushbu Farmon qoidalari respublika aholisiga va xorijiy davlatlarning fuqarolariga oʻz vaqtida yetkazilishi yuzasidan kompleks chora-tadbirlar amalga oshirilishini taʼminlasin.

6. Oʻzbekiston Milliy teleradiokompaniyasi ommaviy axborot vositalarida mazkur Farmon qoidalari keng yoritilishini taʼminlasin.

7. Oʻzbekiston Respublikasi Prezidentining ayrim hujjatlari ilovaga muvofiq oʻz kuchini yoʻqotgan deb hisoblansin.

8. Oʻzbekiston Respublikasidan Davlat bojxona qoʻmitasi Oʻzbekiston Respublikasi Markaziy banki va Adliya vazirligi bilan birgalikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

9. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov, Oʻzbekiston Respublikasi Markaziy banki raisi M.B. Nurmurotov va Oʻzbekiston Respublikasi Davlat bojxona qoʻmitasi raisi M.V. Tohiriy zimmasiga yuklansin.

1. Oʻzbekiston Respublikasi Prezidentining “Jismoniy shaxslarning naqd xorijiy valyutani olib kelishi va olib chiqib ketishini tartibga solish chora-tadbirlari toʻgʻrisida” 1998-yil 20-martdagi PF-1979-sonli Farmoni.

2. Oʻzbekiston Respublikasi Prezidentining “Jismoniy shaxslarning naqd xorijiy valyutani olib kelishi va olib chiqib ketishini tartibga solish chora-tadbirlari toʻgʻrisida” 1997-yil 20-martdagi PF-1979-sonli Farmoniga oʻzgartirishlar kiritish toʻgʻrisida” 2001-yil 19-iyundagi PF-2887-sonli Farmoni.

3. Oʻzbekiston Respublikasi Prezidentining “Oʻzbekiston Respublikasida naqd xorijiy valyuta muomalasini tartibga solish borasidagi qoʻshimcha chora-tadbirlar toʻgʻrisida” 2002-yil 27-iyundagi PF-3099-sonli Farmoni 4-bandining ikkinchi xatboshi.

4. Oʻzbekiston Respublikasi Prezidentining “Jismoniy shaxslarning naqd xorijiy valyutani olib kelishi va olib chiqib ketishini tartibga solish chora-tadbirlari toʻgʻrisida” 1998-yil 20-martdagi PF-1979-sonli Farmoniga oʻzgartirishlar kiritish toʻgʻrisida” 2003-yil 28-iyuldagi PF-3284-sonli Farmoni.