“Terrorizmga qarshi kurash toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Terrorchilik harakati oqibatida zarar koʻrgan shaxslarni ijtimoiy reabilitatsiya qilish tartibi toʻgʻrisidagi Nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov va Oʻzbekiston Respublikasi Bosh vazirining oʻrinbosari J.A.Qoʻchqorov zimmasiga yuklansin.

1. Ushbu Nizom “Terrorizmga qarshi kurash toʻgʻrisida”gi Oʻzbekiston Respublikasi Qonuniga muvofiq terrorchilik harakati oqibatida zarar koʻrgan Oʻzbekiston Respublikasi fuqarolarini, xorijiy fuqarolarni va fuqaroligi boʻlmagan shaxslarni (keyingi oʻrinlarda terrorchilik harakati oqibatida zarar koʻrgan shaxslar deb ataladi) ijtimoiy reabilitatsiya qilish tartibini belgilaydi.

2. Ushbu Nizomning amal qilishi terrorchilikka qarshi operatsiyalar oʻtkazilgan zonada zarar koʻrgan shaxslarga tez tibbiy yoki boshqa shoshilinch yordam koʻrsatishga tatbiq etilmaydi.

3. Terrorchilik harakati oqibatida zarar koʻrgan shaxslarni ijtimoiy reabilitatsiya qilish ularni normal hayot faoliyatiga qaytarish maqsadida oʻtkaziladi va huquqiy yordam berishni, ularning ruhiy, tibbiy, kasbiy reabilitatsiyasini, ularni ishga joylashtirishni, zarur hollarda ularga obod turar joy va qonunchilikda nazarda tutilgan boshqa yordam berishni oʻz ichiga oladi.

Terrorchilik harakati oqibatida zarar koʻrgan shaxslarga bir vaqtning oʻzida ijtimoiy reabilitatsiya qilish boʻyicha yordamning ushbu bandning birinchi xatboshida koʻrsatilgan bir nechta turi (keyingi oʻrinlarda ijtimoiy reabilitatsiya boʻyicha yordam berish deb ataladi) koʻrsatilishi mumkin.

4. Xorijiy davlatlarda sodir etilgan terrorchilik harakatlari oqibatida zarar koʻrgan Oʻzbekiston Respublikasi fuqarolarini ijtimoiy reabilitatsiya qilish, agar Oʻzbekiston Respublikasining xalqaro shartnomalarida oʻzgacha hol nazarda tutilmagan boʻlsa, ushbu Nizomga muvofiq amalga oshiriladi.

5. Terrorchilik harakati oqibatida zarar koʻrgan shaxsni jabrlangan deb eʼtirof etish toʻgʻrisida surishtiruvchi, tergovchi, prokurorning qarori yoki sudning ajrimi ijtimoiy reabilitatsiyani amalga oshirish uchun asos hisoblanadi.

6. Terrorchilik harakati oqibatida zarar koʻrgan shaxslarni ijtimoiy reabilitatsiya qilish ushbu Nizomga ilovaga muvofiq sxema boʻyicha amalga oshiriladi.

7. Terrorchilik harakati oqibatida zarar koʻrgan shaxslarni ijtimoiy reabilitatsiya qilish boʻyicha yordamning tegishli turi koʻrsatilishini taʼminlash uchun terrorchilikka qarshi kurashuvchi davlat organlari — Oʻzbekiston Respublikasi Davlat xavfsizlik xizmati, Milliy gvardiyasi, Ichki ishlar vazirligi, Davlat bojxona qoʻmitasi, Mudofaa vazirligi, Favqulodda vaziyatlar vazirligi, Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti vakillaridan iborat tarkibda Ijtimoiy reabilitatsiya qilish masalalarini koʻrib chiqish boʻyicha idoralararo komissiya (keyingi oʻrinlarda Idoralararo komissiya deb ataladi) tashkil etiladi.

Idoralararo komissiya tarkibiga koʻrib chiqilayotgan masalaning oʻziga xosligidan (huquqiy yordam, ruhiy, tibbiy, kasbiy reabilitatsiya, ishga joylashtirish, obod uy-joy berish va shu kabilar) kelib chiqib tegishli davlat boshqaruvi organlari, mahalliy ijro etuvchi hokimiyat organlari va fuqarolarning oʻzini oʻzi boshqarish organlari vakillari kiritilishi mumkin.

8. Terrorizmga qarshi kurashishda ishtirok etuvchi davlat organlari faoliyatini muvofiqlashtirish, shuningdek Idoralararo komissiya faoliyatini tashkil etish Oʻzbekiston Respublikasi Davlat xavfsizlik xizmati tomonidan amalga oshiriladi.

Oʻzbekiston Respublikasi Davlat xavfsizlik xizmati raisining oʻrinbosari Idoralararo komissiyaning raisi hisoblanadi.

9. Idoralararo komissiyaning shaxsiy tarkibi va ish reglamenti uning raisi tomonidan tasdiqlanadi.

10. Ijtimoiy reabilitatsiya boʻyicha yordam olish uchun terrorchilik harakati oqibatida zarar koʻrgan shaxslar yoki ularning vakillari Idoralararo komissiyaga yozma tarzda murojaat qiladilar va quyidagi hujjatlarni taqdim etadilar:

terrorchilik harakati oqibatida zarar koʻrgan shaxsning familiyasi, ismi va otasining ismi, yashash manzili va talab etiladigan yordam turi koʻrsatilgan holda ijtimoiy reabilitatsiya qilish boʻyicha yordamning tegishli turi koʻrsatilishini taʼminlash uchun ijtimoiy reabilitatsiya qilish boʻyicha yordam berish toʻgʻrisidagi ariza;

terrorchilik harakati oqibatida zarar koʻrgan shaxsning pasporti yoki uning shaxsini tasdiqlaydigan boshqa hujjatning nusxasi;

terrorchilik harakati oqibatida zarar koʻrgan shaxsning vakili murojaat qilgan taqdirda vakilning vakolatlarini tasdiqlaydigan hujjatning asl nusxasi va uning shaxsini tasdiqlaydigan hujjatning nusxasi;

shaxsni terrorchilik oqibatida zarar koʻrgan deb eʼtirof etish toʻgʻrisida surishtiruvchi, tergovchi, prokurorning qarori yoki sud ajrimining nusxasi.

11. Terrorchilik harakati oqibatida zarar koʻrgan shaxslarni ijtimoiy reabilitatsiya qilish zarar koʻrgan shaxslar yoki ular vakillarining yozma murojaatisiz davlat organlari yoki boshqa tashkilotlarning tashabbusi bilan amalga oshirilishi mumkin.

Bunda tegishli davlat organlari yoki boshqa tashkilotlar Idoralararo komissiyaga quyidagi hujjatlarni taqdim etadilar:

terrorchilik harakati oqibatida zarar koʻrgan shaxslarning familiyasi, ismi va otasining ismi, yashash manzili va talab etiladigan yordam turi koʻrsatilgan holda ijtimoiy reabilitatsiya boʻyicha yordam berish toʻgʻrisidagi xat;

terrorchilik harakati oqibatida zarar koʻrgan shaxsning pasporti yoki shaxsini tasdiqlaydigan boshqa hujjatning nusxasi;

shaxsni terrorchilik harakati oqibatida zarar koʻrgan jabrlanuvchi deb eʼtirof etish toʻgʻrisida surishtiruvchi, tergovchi, prokurorning qarori yoki sud ajrimining nusxasi.

12. Terrorchilik harakati oqibatida zarar koʻrgan shaxsning yoki uning vakilining, shuningdek ushbu Nizomning 11-bandida koʻrsatilgan davlat organlari yoki boshqa tashkilotlarning murojaati Idoralararo komissiya tomonidan besh ish kuni mobaynida koʻrib chiqilishi kerak.

13. Ushbu Nizomning 10 va 11-bandlarida koʻrsatilgan hujjatlar toʻliq boʻlmagan hajmda taqdim etilgan, shuningdek hujjatlarni rasmiylashtirishda noaniqliklar aniqlangan taqdirda Idoralararo komissiya ikki kun mobaynida murojaat qilgan shaxslardan yoki davlat organlari va boshqa tashkilotlardan yetishmayotgan hujjatlarni yoki aniqlangan noaniqliklarni bartaraf etish uchun qoʻshimcha maʼlumotlarni soʻrab oladi.

14. Taqdim etilgan hujjatlarda yolgʻon maʼlumot koʻrsatilishi holati aniqlanganda Idoralararo komissiya ijtimoiy reabilitatsiya boʻyicha yordam koʻrsatishni rad etish toʻgʻrisida qaror qabul qiladi.

Idoralararo komissiya terrorchilik harakati oqibatida zarar koʻrgan shaxsni yoki uning vakilini yoxud tegishli davlat organi va boshqa tashkilotni ijtimoiy reabilitatsiya boʻyicha yordam berish rad etilganligi toʻgʻrisida qaror qabul qilinganligi haqida bunday qaror qabul qilingan kundan boshlab ikki ish kuni mobaynida rad etish sabablarini koʻrsatib yozma shaklda xabardor qiladi.

15. Idoralararo komissiya terrorchilik harakati oqibatida zarar koʻrgan shaxsning yoki uning vakilining yoxud davlat organi yoki boshqa tashkilotning murojaatini koʻrib chiqish yakunlari boʻyicha ijtimoiy reabilitatsiya boʻyicha talab etiladigan yordam turidan kelib chiqib ijtimoiy reabilitatsiya boʻyicha yordam beradigan masʼul davlat organi yoki muassasani (keyingi oʻrinlarda ijtimoiy reabilitatsiya boʻyicha masʼul organ deb ataladi) belgilaydi va shaxsni unga ijtimoiy reabilitatsiya boʻyicha yordam berish uchun yoʻllash toʻgʻrisida qaror qabul qiladi.

16. Idoralararo komissiya tomonidan qabul qilingan qaror bunday qaror qabul qilingan kundan boshlab bir ish kunidan kechikmay ijtimoiy reabilitatsiya boʻyicha masʼul organga yuboriladi.

Bunda Idoralararo komissiya terrorchilik harakati oqibatida zarar koʻrgan shaxsni yoki uning vakilini, shuningdek ushbu Nizomning 11-bandida nazarda tutilgan holatda tegishli davlat organi va boshqa tashkilotni ham qabul qilingan qaror toʻgʻrisida u qabul qilingan kundan boshlab ikki ish kuni mobaynida yozma shaklda xabardor qilishi kerak.

Xatda ijtimoiy reabilitatsiya boʻyicha masʼul organning nomi, u joylashgan joy, ijtimoiy reabilitatsiya boʻyicha masʼul organ rahbarining (masʼul xodimning) familiyasi, ismi, otasining ismi va uning xizmat telefoni raqami koʻrsatiladi.

17. Ijtimoiy reabilitatsiya boʻyicha masʼul organ Idoralararo komissiyaning qarori olingandan keyin bir ish kuni mobaynida uning ijro etilishini tashkil etadi.

Terrorchilik harakati oqibatida zarar koʻrgan shaxslarga ijtimoiy reabilitatsiya boʻyicha yordam belgilangan tartibda koʻrsatiladi. Bunda ijtimoiy reabilitatsiya boʻyicha masʼul organlar tomonidan byurokratizm va sansalorlik qilinishiga yoʻl qoʻyilmaydi.

18. Ijtimoiy reabilitatsiya boʻyicha masʼul organ bir ish kuni mobaynida Idoralararo komissiyaga ijtimoiy reabilitatsiya boʻyicha yordam berilganligi toʻgʻrisidagi maʼlumotni yozma shaklda yuboradi.

19. Terrorchilik harakati oqibatida zarar koʻrgan shaxs yoki uning vakili ijtimoiy reabilitatsiya boʻyicha berilgan yordamdan qoniqmagan taqdirda Idoralararo komissiyaga ijtimoiy reabilitatsiya boʻyicha tegishli yordam bergan ijtimoiy reabilitatsiya boʻyicha masʼul organ ustidan shikoyat bilan murojaat qilish huquqiga ega.

Ushbu bandning birinchi xatboshida nazarda tutilgan holatda Idoralararo komissiya tomonidan terrorchilik harakati oqibatida zarar koʻrgan shaxsning yoki uning vakilining asoslangan va qonuniy talablarini qondirish yuzasidan qoʻshimcha choralar koʻriladi.

20. Ijtimoiy reabilitatsiya boʻyicha masʼul organning rahbari ijtimoiy reabilitatsiya boʻyicha beriladigan yordamning oʻz vaqtidaligi va sifati uchun shaxsan javob beradi.

21. Terrorchilik harakati oqibatida zarar koʻrgan shaxslarni ijtimoiy reabilitatsiya qilish Oʻzbekiston Respublikasining respublika budjeti, Qoraqalpogʻiston Respublikasi budjeti, viloyatlar va Toshkent shahrining mahalliy budjetlari mablagʻlari hisobiga amalga oshiriladi.

22. Ushbu Nizom talablari buzilishida aybdor boʻlgan shaxslar qonunchilikda belgilangan tartibda javob beradi.