Gaz taʼminoti tizimini samarali boshqarishni shakllantirish va bozor mexanizmlarini keng joriy etish, uni modernizatsiya qilish, texnik va texnologik qayta jihozlash uchun investitsiyalarni har taraflama jalb etish, koʻrsatilayotgan xizmatlar sifatini oshirish hamda yetkazib berilgan tabiiy gaz uchun hisob-kitoblarni oʻz vaqtida amalga oshirishni taʼminlash maqsadida:

1. “Oʻzbekneftgaz” MXK, “Oʻztransgaz” AK va Oʻzbekiston Respublikasi Moliya vazirligining gaz taqsimlash tarmoqlaridan foydalanish va tabiiy gaz sotish funksiyalarini amalga oshirish uchun, gaz taʼminotining tuman (shahar) filiallariga yoki ularning uchastkalariga biriktirilgan gaz taʼminoti obyektlarini tanlovlar oʻtkazish natijalariga koʻra, 2017-yilning 1-iyunidan boshlab xususiy operatorlarga ishonchli boshqaruvga topshirish boʻyicha tajriba loyihalarini amalga oshirish toʻgʻrisidagi taklifi qabul qilinsin.

2. Quyidagilar:

gaz taqsimlash tarmoqlaridan foydalanish va tabiiy gaz sotish funksiyalarini amalga oshirish uchun xususiy operatorlar ishonchli boshqaruviga topshiriladigan gaz taʼminoti tuman (shahar) filiallariga yoki ularning uchastkalariga biriktirilgan gaz taʼminoti obyektlarining roʻyxati 1-ilovaga* muvofiq;

gaz taqsimlash tarmoqlaridan foydalanish va tabiiy gaz sotish funksiyalarini amalga oshirish uchun ishonchli boshqaruvga topshiriladigan xususiy operatorlarni tanlab olish boʻyicha tanlov komissiyasining tarkibi 2-ilovaga* muvofiq tasdiqlansin.

3. Xususiy operatorlarni tanlab olish boʻyicha tanlov komissiyasiga quyidagi huquqlar berilsin:

gaz taqsimlash tarmoqlaridan foydalanish va tabiiy gaz sotish funksiyalarini amalga oshirish uchun xususiy operatorlarga ishonchli boshqaruvga topshiriladigan gaz taʼminoti tuman (shahar) filiallariga yoki ularning uchastkalariga biriktirilgan gaz taʼminoti obyektlarini tasdiqlangan roʻyxatga muvofiq belgilash;

xususiy operatorlarga sotilgan tabiiy gaz qiymatining 21 foizidan ortiq boʻlmagan miqdorda vositachilik mukofotini belgilash.

4. Belgilansinki:

xususiy operatorlar xodimlar sonidan qatʼi nazar, yagona soliq toʻlovchilari hisoblanadi;

tabiiy va suyultirilgan gazni sotishdan tushadigan mablagʻlar bevosita “Oʻztransgaz” AKning hisobvaraqlariga tushiriladi;

xususiy operatorlar tabiiy gaz sotish ishonchli boshqaruv shartnomalari asosida tabiiy gaz sotish boʻyicha faoliyatni amalga oshirish huquqini beradigan litsenziya olmasdan, litsenziya talablari va shartlariga soʻzsiz rioya qilgan holda amalga oshiradilar.

5. Belgilab qoʻyilsinki:

2017-yilning 1-iyunidan boshlab, yetkazib berilgan tabiiy gaz uchun qarzi boʻlib, tarmoqdan uzib qoʻyilgan isteʼmolchilar gaz taʼminoti tarmoqlariga qayta ulanishi uchun Oʻzbekiston Respublikasida belgilangan eng kam oylik ish haqining ikki barobari miqdorda toʻlov undiriladi;

maishiy isteʼmolchilarga tabiiy gazni hisoblash zamonaviy elektron uskunalarini xarid qilish, oʻrnatish va keyinchalik xizmat koʻrsatish “Oʻztransgaz” AKning shaxsiy mablagʻlari hisobidan amalga oshiriladi.

6. Oʻzbekiston Respublikasi Vazirlar Mahkamasi ikki hafta muddatda gaz taʼminoti obyektlarini topshirish jarayonlarini, gaz taqsimlash tarmoqlaridan foydalanish va tabiiy gaz sotish funksiyalarini amalga oshirish uchun ishonchli boshqaruvga topshirish va xususiy operatorlarni tanlab olish boʻyicha tanlovlarni oʻtkazish tartibini nazarda tutgan holda, Gaz taqsimlash tarmoqlaridan foydalanish va tabiiy gaz sotish funksiyalarini amalga oshirish uchun gaz taʼminoti obyektlarini xususiy operatorlarga ishonchli boshqaruvga topshirish tartibi toʻgʻrisidagi nizomni tasdiqlasin.

7. Oʻzbekiston Respublikasi Moliya vazirligi Davlat soliq qoʻmitasi, Markaziy bank, “Oʻzbekneftgaz” MXK, “Oʻzbekenergo” AJ va “Oʻzkimyosanoat” AJ bilan birgalikda, yetkazib beriladigan tabiiy gaz uchun iqtisodiyot tarmoqlarining energetika, neft-gaz, kimyo va qishloq xoʻjaligi tashkilotlarining bank hisobvaraqlaridagi pul mablagʻlarini taqsimlash tartibi va mexanizmini nazarda tutadigan takliflarni bir oy muddatda Vazirlar Mahkamasiga kiritsin.

8. Oʻzbekiston Milliy axborot agentligi, Oʻzbekiston Milliy teleradiokompaniyasi, Oʻzbekiston matbuot va axborot agentligi respublika gaz taʼminoti tizimiga xususiy operatorlarni jalb etish boʻyicha koʻrilayotgan choralar toʻgʻrisida tadbirkorlik subyektlari keng xabardor qilinishini taʼminlasin.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.