OʻZBEKISTON AVTOMOBIL VA DARYO TRANSPORTI AGENTLIGI BOSHLIGʻINING

buyrugʻi

Avtomobilda tashuvchining yoʻl harakati xavfsizligi xizmati toʻgʻrisidagi nizomni tasdiqlash haqida

[Oʻzbekiston Respublikasi Adliya vazirligi tomonidan 2013-yil 26-dekabrda roʻyxatdan oʻtkazildi, roʻyxat raqami 2545]

Oldingi tahrirga qarang.

Oʻzbekiston Respublikasining “Yoʻl harakati toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2013-y., 15-son, 197-modda) hamda Vazirlar Mahkamasining 2004-yil 10-martdagi 118-sonli qarori (Oʻzbekiston Respublikasi qonun hujjatlari toʻplami, 2004-y., 10-son, 120-modda) bilan tasdiqlangan Oʻzbekiston avtomobil va daryo transporti agentligi toʻgʻrisidagi nizomga muvofiq buyuraman:

(muqaddima Oʻzbekiston Respublikasi transport vazirining 2025-yil 25-fevraldagi 3-sonli buyrugʻi (roʻyxat raqami 3612, 14.03.2025-y.) tahririda — Qonunchilik maʼlumotlari milliy bazasi, 17.03.2025-y., 10/25/3612/0248-son)

1. Avtomobilda tashuvchining yoʻl harakati xavfsizligi xizmati toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Boshliq V. ISMAILOV

Toshkent sh.,

2013-yil 23-dekabr,

20-son

Oʻzbekiston avtomobil va daryo transporti agentligi boshligʻining 2013-yil 23-dekabrdagi 20-sonli buyrugʻiga
ILOVA

Avtomobilda tashuvchining yoʻl harakati xavfsizligi xizmati toʻgʻrisidagi

NIZOM

Oldingi tahrirga qarang.

Mazkur Nizom avtomobilda tashuvchining yoʻl harakati xavfsizligi xizmatini tashkil etish tartibini, shuningdek uning vazifalari, funksiyalari va Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati organlari (bundan buyon matnda DYHXX organlari deb yuritiladi) bilan oʻzaro munosabatlarini belgilaydi.

I bob. Umumiy qoidalar

1. Mazkur Nizomda quyidagi asosiy tushunchalardan foydalaniladi:

avtomobilda tashuvchi — mulk huquqi yoki boshqa ashyoviy huquqlar asosida avtotransport vositasiga ega boʻlgan, tijorat asosida yoʻlovchi, bagaj va yuk tashish xizmatini koʻrsatadigan hamda bunga maxsus ruxsatnomasi (litsenziyasi) boʻlgan yuridik shaxs;

avtotransport vositalari — avtomobilda tashuvchiga tegishli boʻlgan, yoʻlovchi, bagaj va yuk tashishga hamda maxsus ishlarni bajarishga moʻljallangan avtomobillar, shatakchi avtomobillar, tirkama va yarim tirkamalar;

yoʻl harakati xavfsizligi xizmati — avtomobilda tashuvchining avtotransport vositalari orqali tashishlarni amalga oshirishda yoʻl harakati xavfsizligini taʼminlash vazifasi yuklatilgan tarkibiy boʻlinmasi (bundan buyon matnda YHX xizmati deb yuritiladi);

Oldingi tahrirga qarang.

yoʻl-transport hodisasi — transport vositasining yoʻlda harakatlanish jarayonida va uning ishtirokida sodir boʻlgan, fuqarolar vafot etgan yoki ularning sogʻligʻiga zarar yetkazilgan, transport vositalari, inshootlar, yuklar shikastlangan yoxud boshqa moddiy zarar yetkazilgan hodisa;

(1-bandning beshinchi xatboshisi Oʻzbekiston Respublikasi transport vazirining 2025-yil 25-fevraldagi 3-sonli buyrugʻi (roʻyxat raqami 3612, 14.03.2025-y.) tahririda — Qonunchilik maʼlumotlari milliy bazasi, 17.03.2025-y., 10/25/3612/0248-son)

Oldingi tahrirga qarang.

yoʻl harakati qoidalarining buzilishi — avtotransport vositalari haydovchilari tomonidan Oʻzbekiston Respublikasi Vazirlar Mahkamasining 2022-yil 12-apreldagi 172-son qarori bilan tasdiqlangan Yoʻl harakati qoidalarida belgilangan talablarning buzilishi.

(1-bandning oltinchi xatboshisi Oʻzbekiston Respublikasi transport vazirining 2023-yil 26-iyundagi 18-sonli buyrugʻi (roʻyxat raqami 2545-1, 19.07.2023-y.) tahririda — Qonunchilik maʼlumotlari milliy bazasi, 19.07.2023-y., 10/23/2545-1/0494-son)

Oldingi tahrirga qarang.

2. Oʻzbekiston Respublikasi “Mehnatni muhofaza qilish toʻgʻrisida”gi Qonunining 12-moddasiga muvofiq, ellikta va undan ortiq avtotransport vositalari mavjud boʻlgan avtomobilda tashuvchilarda YHX tashkil etiladi yoki yoʻl harakati xavfsizligi boʻyicha mutaxassis lavozimi joriy etiladi.

(2-band Oʻzbekiston Respublikasi transport vazirining 2023-yil 26-iyundagi 18-sonli buyrugʻi (roʻyxat raqami 2545-1, 19.07.2023-y.) tahririda — Qonunchilik maʼlumotlari milliy bazasi, 19.07.2023-y., 10/23/2545-1/0494-son)

3. YHX xizmatlari kasaba uyushmasi qoʻmitasi bilan kelishilgan normativ hujjatlar asosida faoliyat yuritadi va oʻz maqomiga koʻra avtomobilda tashuvchining asosiy xizmatlariga tenglashtiriladi hamda uning rahbariga boʻysunadi.

4. YHX xizmatlarining mutaxassislari ularning xizmat vazifalariga taalluqli boʻlmagan ishlarni bajarishga jalb etilishi mumkin emas.

5. YHX xizmati avtomobilda tashuvchining faoliyati tugatilgan taqdirdagina tugatiladi.

II bob. YHX xizmatining tuzilishi

6. Avtotransport vositalarining soni 50 tadan kam boʻlgan avtomobilda tashuvchilarda YHX xizmatining vazifalari avtomobilda tashuvchining rahbarlaridan biriga yuklatiladi.

7. Avtotransport vositalarining soni 50 tadan 150 tagacha boʻlgan avtomobilda tashuvchilarda YHX xizmatining vazifalarini bajaruvchi mutaxassis lavozimi joriy etiladi.

8. Avtotransport vositalarining soni 151 tadan ortiq boʻlgan avtomobilda tashuvchilarda quyidagicha shtat birliklaridan iborat boʻlgan YHX xizmati tashkil etiladi:

avtotransport vositalarining soni 151 tadan 300 tagacha boʻlgan avtomobilda tashuvchilarda — 2 ta xodim;

avtotransport vositalarining soni 301 tadan 500 tagacha boʻlgan avtomobilda tashuvchilarda — 3 ta xodim;

avtotransport vositalarining soni 501 tadan 750 tagacha boʻlgan avtomobilda tashuvchilarda — 4 ta xodim.

9. Avtotransport vositalarining soni 750 tadan ortiq boʻlgan avtomobilda tashuvchilarning YHX xizmatida har 250 ta avtotransport vositalari uchun qoʻshimcha ravishda yana 1 ta xodim lavozimi joriy etiladi.

10. Avtotransport vositalarining soni 500 tadan ortiq boʻlgan avtomobilda tashuvchilarda yoʻl harakati xavfsizligi boʻyicha rahbar oʻrinbosari lavozimi joriy etiladi.

11. YHX xizmatida mazkur Nizomga asosan belgilangan xodimlar soni doirasida xizmat (boʻlim) boshligʻi, katta muhandis, muhandis lavozimlari joriy etiladi. YHX xizmati xodimlarining vazifalari mazkur Nizom, xodimlarning lavozim yoʻriqnomalari va avtomobilda tashuvchining boshqa lokal normativ hujjatlari bilan belgilanadi.

Oldingi tahrirga qarang.

12. Oʻzbekiston Respublikasi “Yoʻl harakati toʻgʻrisida”gi Qonunining 41-moddasiga asosan, YHX xizmatlari xodimlari Oʻzbekiston Respublikasi Transport vazirligi tomonidan tasdiqlangan maxsus dasturlar boʻyicha vaqti-vaqti bilan, uch yilda kamida bir marta oʻz malakasini oshirib, malaka imtihoni topshirishi kerak.

(12-band Oʻzbekiston Respublikasi transport vazirining 2026-yil 23-apreldagi 2-sonli buyrugʻi (roʻyxat raqami 2545-2, 02.05.2026-y.) tahririda — Qonunchilik maʼlumotlari milliy bazasi, 04.05.2026-y., 10/26/2545-2/0446-son)

III bob. YHX xizmatining asosiy vazifalari va funksiyalari

13. YHX xizmati quyidagi asosiy vazifalarni bajaradi:

avtotransport vositalari haydovchilarining ishini yoʻl harakati xavfsizligini taʼminlovchi talablarga muvofiq tashkil etadi;

Oldingi tahrirga qarang.

avtotransport vositalari haydovchilarining qonunchilik hujjatlarida belgilangan mehnat qilish va dam olish tartibiga rioya etilishini taʼminlaydi;

(13-bandning uchinchi xatboshisi Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

avtotransport vositalari haydovchilarining malakasini oshirish uchun zarur sharoitlar yaratadi;

yoʻl harakati xavfsizligiga tahdid soluvchi texnik nosozliklar mavjud boʻlganda, transport vositalaridan foydalanishga yoʻl qoʻymaydi;

avtoransport vositalari ishtirokida sodir boʻlgan yoʻl-transport hodisalarining va yoʻl harakati qoidalari buzilishlarining sabablarini tahlil qiladi hamda ularni bartaraf etish boʻyicha chora-tadbirlarni koʻradi;

avtoransport vositalari haydovchilarining tibbiy koʻriklarini, ularning yoʻl-transport hodisalarida jabrlanganlarga birlamchi shoshilinch tibbiy yordam koʻrsatish boʻyicha koʻnikmalarini takomillashtirishga doir tadbirlarni tashkil etadi va oʻtkazadi;

Oldingi tahrirga qarang.

avtomobilda tashuvchining fuqarolik javobgarligini sugʻurta qilish boʻyicha qonunchilik hujjatlarida belgilangan majburiyatlarning bajarilishini taʼminlaydi;

(13-bandning sakkizinchi xatboshisi Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

avtotransport vositalarining but saqlanishini taʼminlaydi.

14. YHX xizmati oʻziga yuklatilgan vazifalarni bajarish uchun quyidagi funksiyalarni amalga oshiradi:

avtotransport vositalari haydovchilariga haydovchilik guvohnomasiga muvofiq boshqarish huquqi berilgan avtotransport vositalarini boshqarish uchun ruxsat berilishini nazorat qiladi;

Oldingi tahrirga qarang.

avtomobilda tashuvchining barcha xodimlari tomonidan yoʻl harakati xavfsizligi toʻgʻrisidagi qonunchilik hujjatlari talablariga rioya qilinishini nazorat qiladi, aniqlangan kamchiliklarni bartaraf etish yuzasidan zarur chora-tadbirlarni amalga oshiradi, xizmat tekshiruvlarini oʻtkazishda ishtirok etadi;

katta hajmli va ogʻir vaznli yuklarni ixtisoslashtirilgan avtotransport vositalarida tashishning qonunchilik hujjatlarida belgilangan tartibiga rioya qilinishini nazorat qiladi;

tashishlarni amalga oshirishda avtotransport vositalari haydovchilarining qonunchilik hujjatlarida belgilangan mehnat qilish va dam olish tartibiga rioya qilinishini nazorat qiladi;

(14-bandning uchinchi — beshinchi xatboshilari Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

avtotransport vositalari haydovchilariga yoʻl harakati xavfsizligi boʻyicha: ishga qabul qilishda (dastlabki), reys oldidan (reys oldi), maxsus, mavsumiy va qoʻshimcha (navbatdan tashqari) yoʻl-yoʻriqlar koʻrsatilishini taʼminlaydi;

avtotransport vositalari haydovchilarining malakasini oshirish maqsadida yoʻl harakati xavfsizligi xonasini tashkil qiladi va uning faoliyatiga uslubiy rahbarlik qiladi;

avtotransport vositalarining yoʻnalishga chiqish oldidan texnik jihatdan sozligi va koʻrinishi talab darajasida boʻlishini nazorat qiladi;

yoʻl harakati xavfsizligiga tahdid soluvchi sharoitlar aniqlanganda avtotransport vositalarining harakatlanishini taqiqlaydi;

yoʻl-transport hodisalari va yoʻl harakati qoidalari buzilishlarini bartaraf etish boʻyicha choraklik dasturlarni ishlab chiqadi va tasdiqlash uchun avtomobilda tashuvchining rahbariga taqdim etadi;

DYHXX organlaridan olingan maʼlumotlar asosida avtomobilda tashuvchining xodimlariga yuz bergan yoʻl-transport hodisalari va ularning oqibatlari haqida muntazam ravishda maʼlumot berib boradi va ularning yuzaga kelish sabablari haqida tushuntirishlar beradi;

mazkur Nizomning 1-ilovasiga muvofiq shakldagi Avtomobilda tashuvchi tomonidan yoʻl harakati xavfsizligi boʻyicha tadbirlarni hisobga olish kitobini, 2-ilovasiga muvofiq shakldagi Yoʻl-transport hodisalarini va ular haqidagi maʼlumotlarni qayd etish kitobini, 3-ilovasiga muvofiq shakldagi Avtotransport vositalari haydovchilari tomonidan yoʻl harakati qoidalari buzilishini hisobga olish kitobini hamda 4-ilovasiga muvofiq shakldagi Yoʻl harakati xavfsizligi xizmatining koʻrsatmalarini qayd qilish kitobini yuritadi;

avtotransport vositalari haydovchilarining majburiy ravishda dastlabki va davriy tibbiy koʻrikdan, shu jumladan reys oldidan tibbiy koʻrikdan oʻtishlarini taʼminlaydi;

avtotransport vositalari ishtirokidagi sugʻurta hodisalarini tekshirishda ishtirok etadi;

ish vaqti tugagandan soʻng avtotransport vositalarining saqlash joyiga oʻz vaqtida qaytishi va qabul qilib olinishini nazorat qiladi.

IV bob. YHX xizmatining huquqlari va majburiyatlari

15. YHX xizmati oʻz zimmasiga yuklangan vazifalar va funksiyalarni bajarish uchun quyidagi huquqlarga ega:

yoʻl harakati xavfsizligi masalalari boʻyicha boshqa tashkilotlar bilan munosabatlarda avtomobilda tashuvchining vakili boʻlish;

avtomobilda tashuvchining boshqa tarkibiy boʻlinmalaridan oʻz vakolatiga doir maʼlumotlarni talab qilib olish;

yoʻl harakati xavfsizligini taʼminlash boʻyicha avtomobilda tashuvchining barcha tarkibiy boʻlinmalari uchun majburiy boʻlgan va faqat avtomobilda tashuvchining birinchi rahbari tomonidan bekor qilinishi mumkin boʻlgan koʻrsatmalar berish;

tashishlarni amalga oshirish bilan bogʻliq hujjatlarning toʻgʻri rasmiylashtirilganligini nazorat qilish, aniqlangan kamchiliklarning oʻz vaqtida bartaraf etilishi uchun zarur choralarni koʻrish;

yoʻl harakati xavfsizligiga xavf tugʻdiruvchi jiddiy kamchiliklar aniqlanganda avtotransport vositalari harakatlanishini taqiqlash;

Oldingi tahrirga qarang.

ahvoli yoki harakatlari yoʻl harakati xavfsizligiga tahdid soladigan avtotransport vositalari haydovchilarini mehnat toʻgʻrisidagi qonunchilik hujjatlariga muvofiq ishdan chetlatish, ularga nisbatan tegishli choralarni qoʻllash yuzasidan avtomobilda tashuvchining rahbariyatiga taklif kiritish;

(15-bandning yettinchi xatboshisi Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

namunali avtotransport vositalari haydovchilarini mehnat uchun ragʻbatlantirish yuzasidan avtomobilda tashuvchining rahbariyatiga taklif kiritish.

16. Avtotransport vositalarining soni 50 tadan ortiq boʻlgan avtomobilda tashuvchilarda yoʻl-transport hodisasi sodir boʻlgan joyga yetib borish, yoʻnalishdagi avtotransport vositalari ishini monitoring qilish, avtomobil yoʻllari ahvolini tekshirish, avtokolonnalarni kuzatib borish uchun YHX xizmati maxsus yengil avtomobil bilan taʼminlanadi. Ushbu avtomobil ishtirokida amalga oshirilgan tadbirlar mazkur Nizomning 5-ilovasiga muvofiq shaklda Yoʻl harakati xavfsizligi xizmatiga biriktirilgan avtomobil ishtirokida amalga oshirilgan tadbirlarni qayd etish kitobiga kiritib borilishi zarur.

17. YHX xizmati:

Oldingi tahrirga qarang.

oʻz harakatlari bilan yoʻl harakati xavfsizligi toʻgʻrisidagi qonunchilik hujjatlari talablarini buzmasligi;

(17-bandning ikkinchi xatboshisi Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

Oldingi tahrirga qarang.

avtomobilda tashuvchining boshqa xizmatchilari va avtotransport vositalari haydovchilari tomonidan yoʻl harakati xavfsizligi toʻgʻrisidagi qonunchilik hujjatlari talablarining buzilishi holatlariga befarq boʻlmasligi;

(17-bandning uchinchi xatboshisi Oʻzbekiston Respublikasi adliya vazirining 2021-yil 28-iyuldagi 16-mh-sonli buyrugʻi (roʻyxat raqami 3313, 28.07.2021-y.) tahririda — Qonunchilik maʼlumotlari milliy bazasi, 28.07.2021-y., 10/21/3313/0724-son)

avtomobilda tashuvchining rahbari hamda vakolatli davlat organlarining qonuniy koʻrsatmalari va talablarini bajarishi shart.

V bob. YHX xizmatining DYHXX organlari bilan oʻzaro hamkorligi

18. YHX xizmati DYHXX organlarining soʻroviga muvofiq avtotransport vositalari va avtotransport vositalari haydovchilari toʻgʻrisidagi hamda avtotransport vositalari ishtirokida yuz bergan yoʻl-transport hodisalari natijasida yetkazilgan zararni aniqlash uchun zarur boʻlgan maʼlumotlarni taqdim etadi.

19. DYHXX organlari YHX xizmatining soʻroviga muvofiq avtotransport vositalari ishtirokida sodir boʻlgan yoʻl-transport hodisalari va yoʻl harakati qoidalarining buzilish holatlari haqidagi maʼlumotlarni taqdim etadi.

Zarur hollarda, YHX xizmati va DYHXX organlari avtotransport vositalari kolonnalarini kuzatib borish ishlarini hamkorlikda amalga oshiradi.

VI bob. Yakuniy qoidalar

20. Avtomobilda tashuvchilarning rahbarlari mazkur Nizomga muvofiq YHX xizmatining tashkil etilishi uchun javobgardir.

21. YHX xizmati xodimlari mazkur Nizomga muvofiq YHX xizmatining zimmasiga yuklatilgan vazifa va funksiyalarning oʻz vaqtida hamda toʻliq amalga oshirilishi uchun javobgardir.

22. Mazkur Nizom Oʻzbekiston Respublikasi Ichki ishlar vazirligi, Mehnat va aholini ijtimoiy muhofaza qilish vazirligi va Oʻzbekiston Kasaba uyushmalari Federatsiyasi Kengashi bilan kelishilgan.

Ichki ishlar vaziri A. AXMEDBAYEV

2013-yil 23-dekabr

Mehnat va aholini ijtimoiy muhofaza qilish vaziri A. XAITOV

2013-yil 23-dekabr

Oʻzbekiston Kasaba uyushmalari Federatsiyasi Kengashi raisi T. NARBAYEVA

2013-yil 23-dekabr

Avtomobilda tashuvchining yoʻl harakati xavfsizligi xizmati toʻgʻrisidagi nizomga
1-ILOVA

‎‎Avtomobilda tashuvchi tomonidan yoʻl harakati xavfsizligi ‎boʻyicha tadbirlarni hisobga olish ‎kitobi
‎	‎	‎	‎	‎	‎
t/r‎	Tadbirning nomi‎	Tadbirni ‎oʻtkazish ‎sanasi‎	Ishtirokchilar‎	Tadbirni oʻtkazgan ‎shaxs‎	Tadbirni ‎oʻtkazgan ‎shaxsning ‎imzosi‎
1‎	2‎	3‎	4‎	5‎	6‎
‎	‎	‎	‎	‎	‎

Avtomobilda tashuvchining yoʻl harakati xavfsizligi xizmati toʻgʻrisidagi nizomga
2-ILOVA

‎‎Yoʻl-transport hodisalarini va ular haqidagi maʼlumotlarni qayd etish ‎kitobi
‎	‎	‎	‎	‎	‎	‎	‎	‎
T/r‎	YTH haqida tushgan xabar (yil, oy, kun, soat) ‎	YTH haqida xabar bergan shaxslar haqidagi toʻliq maʼlumotlar‎	YTH sodir boʻlgan shahar, tuman va avtomobil yoʻli va koʻchaning nomi va km‎	YTHning qisqacha bayoni (vaqti), dastlabki sababi va turi‎	YTH oqibatida tan jarohati olgan va vafot etgan shaxslar toʻgʻrisidagi toʻliq maʼlumotlar (F.I.O., yoshi, jinsi va hokazolar)‎	YTHda ishtirok etgan transport vositalari toʻgʻrisidagi toʻliq maʼlumotlar (rusumi, davlat raqami belgisi, tegishliligi va hokazolar)‎	YTH toʻgʻrisida berilgan xabarni qabul qilib olgan ichki ishlar organi nomi, navbatchisi (F.I.O., lavozimi, unvoni) toʻgʻrisida maʼlumot‎	Shikastlangan holda qaytgan transport vositalari haqida hududiy ichki ishlar organiga xabar berilgan vaqt va xabarni ichki ishlar organida qabul qilib olgan navbatchi (F.I.O., lavozimi, unvoni)‎
‎	1	2‎	3‎	4‎	5‎	6‎	7‎	8‎
‎	‎	‎	‎	‎	‎	‎	‎	‎

Izoh: Kitob raqamlangan, ip oʻtkazib tikilgan, muhrlangan boʻlishi, oxirgi yozuv yozilgan vaqtdan boshlab uch yil mobaynida saqlanishi shart

Avtomobilda tashuvchining yoʻl harakati xavfsizligi xizmati toʻgʻrisidagi nizomga
3-ILOVA

‎‎Avtotransport vositalari haydovchilari tomonidan yoʻl harakati qoidalari buzilishini hisobga olish ‎ kitobi
‎	‎	‎	‎	‎	‎	‎	‎	‎	‎	‎	‎
t/r‎	Haydovchi toʻgʻrisida maʼlumotlar: F.I.O., yoshi, ish staji, haydovchilik toifasi ‎	Avtotransport vositasining modeli va davlat raqami ‎	Yoʻl harakati qoidalari buzilgan sana va vaqt‎	Yoʻl harakati qoidalari buzishining xususiyati‎	Yoʻl harakati qoidalari buzilgan holat‎	Yoʻl harakati qoidalari buzilganligini aniqlagan shaxs‎	Haydovchiga nisbatan qoʻllanilgan huquqiy taʼsir chorasi‎	Huquqiy taʼsir chorasi tayinlangan vaqt va tayinlagan mansabdor shaxs‎	Haydovchi bilan olib borilgan tushuntirish ishlari‎	Tegishli yozuv kiritgan mansabdor shaxsning imzosi‎	Izoh‎
‎	1‎	2‎	3‎	4‎	5‎	6‎	7‎	8‎	9‎	10‎	11‎
‎	‎	‎	‎	‎	‎	‎	‎	‎	‎	‎	‎

Avtomobilda tashuvchining yoʻl harakati xavfsizligi xizmati toʻgʻrisidagi nizomga
4-ILOVA

‎‎Yoʻl harakati xavfsizligi xizmatining koʻrsatmalarini qayd qilish ‎ kitobi
‎	‎	‎	‎	‎	‎	‎
t/r‎	Tekshiruv oʻtkazilgan ‎sana‎	Aniqlangan kamchilik va qoida buzishlar‎	Bartaraf etish muddati‎	Tavsiya va takliflar‎	Tekshirilayotgan va ‎tekshirayotgan shaxslarning imzosi‎	Bajarilganligi ‎toʻgʻrisidagi belgi, sana, imzo‎
‎	1‎	2‎	3‎	4‎	5‎	6‎
‎	‎	‎	‎	‎	‎	‎

Avtomobilda tashuvchining yoʻl harakati xavfsizligi xizmati toʻgʻrisidagi nizomga
5-ILOVA

‎‎Yoʻl harakati xavfsizligi xizmatiga biriktirilgan avtomobil ishtirokida ‎amalga oshirilgan tadbirlarni qayd etish ‎KITOBI
‎___________________________________________________________________
‎‎(avtomobilda tashuvchining nomi)
‎	‎	‎	‎	‎	‎‎‎‎Avtomobil markasi ________________
‎	‎	‎	‎	‎	‎‎Davlat raqami _____________________
‎	‎	‎	‎	‎	‎	‎	‎	‎
t/r‎	Yoʻl varaqasi raqami‎	Yoʻnalishga ‎chiqish va ‎qaytish sanasi, vaqti‎	Haydovchining F.I.O.‎	Tadbir oʻtkazishga chiqayotgan shaxsning familiyasi, ismi, otasining ismi va lavozimi‎	Tadbir nomi‎	Oʻtkazilgan tadbirning natijasi‎	Tadbirni ‎oʻtkazgan shaxsning imzosi‎	Izoh‎
‎	1‎	2‎	3‎	4‎	5‎	6‎	7‎	8‎
‎	‎	‎	‎	‎	‎	‎	‎	‎

(Oʻzbekiston Respublikasi qonun hujjatlari toʻplami, 2013-y., 52-son, 710-modda; Qonunchilik maʼlumotlari milliy bazasi, 28.07.2021-y., 10/21/3313/0724-son; 19.07.2023-y., 10/23/2545-1/0494-son; 17.03.2025-y., 10/25/3612/0248-son; 04.05.2026-y., 10/26/2545-2/0446-son)