Oʻzbekiston Respublikasi Prezidentining
Qarori
Kioto protokolining musaffo rivojlanish mexanizmi doirasida investitsiya loyihalarini amalga oshirish chora-tadbirlari toʻgʻrisida
Kioto Protokolining Musaffo rivojlanish mexanizmi doirasida parnik gazlarini atmosferaga chiqarishni qisqartirish boʻyicha chora-tadbirlar kompleksini amalga oshirish, mamlakat iqtisodiyoti tarmoqlarida ekologik hamda energiyani tejaydigan loyihalarni amalga oshirish uchun xorijiy investitsiyalar va ilgʻor texnologiyalarni jalb qilishni faollashtirish maqsadida:
1. Oʻzbekiston Respublikasi Birlashgan Millatlar Tashkilotining iqlim oʻzgarishi toʻgʻrisidagi Hadli Konvensiyasining Kioto Protokolini ratifikatsiya qilgani, unga muvofiq Musaffo rivojlanish mexanizmi doirasida respublika zararli chiqindilar chiqarishni cheklash va qisqartirish boʻyicha investitsiya loyihalarini amalga oshirish uchun xalqaro moliya tashkilotlari, chet mamlakatlar va kompaniyalarning investitsiyalarini, shuningdek zamonaviy texnologiyalarni jalb eta olishi maʼlumot uchun qabul qilinsin.
2. Vazirlar Mahkamasi huzurida Kioto Protokolining Musaffo rivojlanish mexanizmi boʻyicha Idoralararo kengash 1-ilovaga muvofiq tarkibda tuzilsin.
Idoralararo kengashning jamoatchilik asosida faoliyat yuritadigan Kotibiyati 2-ilovaga muvofiq tarkibda tashkil etilsin.
Idoralararo kengash zimmasiga quyidagi asosiy funksiyalar yuklatilsin:
Kioto Protokolining Musaffo rivojlanish mexanizmidan foydalanishning ustuvor yoʻnalishlarini aniqlash;
milliy darajada Musaffo rivojlanish mexanizmi boʻyicha loyihalarni tanlash va maʼqullash qoidalari hamda tartiblarini tasdiqlash;
vakolatli organlar tomonidan oʻtkazilgan ekspertizalar natijalariga koʻra milliy darajada Musaffo rivojlanish mexanizmi boʻyicha loyihalarni maʼqullash;
Musaffo rivojlanish mexanizmi boʻyicha loyihalar qatnashchilari oʻrtasida chiqindilar chiqarish qisqartirilishini sotib olish toʻgʻrisidagi Bitimlar loyihalarini maʼqullash.
3. Oʻzbekiston Respublikasi Iqtisodiyot vazirligi Kioto Protokolining Musaffo rivojlanish mexanizmi boʻyicha Oʻzbekiston Respublikasining Milliy organi etib belgilansin va uning zimmasiga quyidagi asosiy vazifalarni hal etish yuklatilsin:
Oʻzbekiston Respublikasining iqtisodiy, ekologik, ijtimoiy va texnologik manfaatlarini hisobga olgan holda Musaffo rivojlanish mexanizmi doirasidagi loyihalarni amalga oshirish uchun tayyorlash va tanlab olish, ular boʻyicha tegishli maʼlumotlar bazasini shakllantirish;
Musaffo rivojlanish mexanizmi doirasida amalga oshirish uchun taqdim etiladigan loyihalarning Kioto Protokolining 12-moddasida belgilangan shartlar va tartib-qoidalarga, xalqaro shartnomalar va Oʻzbekiston Respublikasining qonun hujjatlariga, shuningdek barqaror rivojlanishning xalqaro va milliy mezonlariga muvofiqligini ekspertizadan oʻtkazish boʻyicha vakolatli vazirliklar va idoralarning faoliyatini muvofiqlashtirish;
Musaffo rivojlanish mexanizmi boʻyicha amalga oshirish uchun taqdim etiladigan investitsiya loyihalarini maʼqullash uchun Idoralararo kengashga kiritish;
Musaffo rivojlanish mexanizmi boʻyicha investitsiya loyihalarini Idoralararo kengash maʼqullaganidan soʻng BMTning iqlim oʻzgarishi toʻgʻrisidagi Hadli Konvensiyasi Kotibiyati huzuridagi Musaffo rivojlanish mexanizmining Ijro etuvchi Kengashiga taqdim etish;
Musaffo rivojlanish mexanizmi doirasidagi investitsiya loyihalarining amalga oshirilishi ustidan monitoring olib borish.
Oldingi tahrirga qarang.
4. Belgilansinki, Musaffo rivojlanish mexanizmi doirasidagi loyihalarga toʻgʻridan-toʻgʻri investitsiyalarni amalga oshiruvchi xorijiy sheriklarning foydasi Oʻzbekiston Respublikasi hududida foyda soligʻi toʻlashdan ozod etiladi.
(4-band Oʻzbekiston Respublikasi Prezidentining 2009-yil 27-fevraldagi PQ-1062-sonli qarori tahririda — OʻR QHT, 2009-y., 10-11-son, 107-modda)
5. Belgilab qoʻyilsinki, Musaffo rivojlanish mexanizmi doirasidagi investitsiya loyihalarining loyiha-texnik hujjatlari Kioto Protokoli talablariga muvofiq:
shunday loyihalar uchun Musaffo rivojlanish mexanizmi Ijro etuvchi Kengashi tomonidan joriy etilgan yagona formatga qatʼiy muvofiq ishlab chiqiladi;
Musaffo rivojlanish mexanizmi Vakolatli tezkor organi tomonidan validatsiya (loyihani tasdiqlash toʻgʻrisidagi qaror) qilinishi va Ijro etuvchi kengashi tomonidan roʻyxatga olinishi shart.
Oʻzbekiston Respublikasi Vazirlar Mahkamasi bir oy muddatda Kioto Protokolining Musaffo rivojlanish mexanizmi doirasidagi investitsiya loyihalarini tayyorlash va amalga oshirish tartibini tasdiqlasin.
Oldingi tahrirga qarang.
6. Oʻzbekiston Respublikasi Iqtisodiyot vazirligi Favqulodda vaziyatlar vazirligi huzuridagi Gidrometeorologiya xizmati markazi bilan birgalikda ikki hafta muddatda Musaffo rivojlanish mexanizmi boʻyicha Oʻzbekiston Respublikasining Milliy organini BMTning iqlim oʻzgarishi toʻgʻrisidagi Hadli Konvensiyasi Kotibiyatida belgilangan tartibda roʻyxatga olish uchun zarur hujjatlarni tayyorlasin.
(6-band Oʻzbekiston Respublikasi Prezidentining 2017-yil 26-avgustdagi PF-5168-sonli Farmoni tahririda — OʻR QHT, 2017-y., 35-son, 917-modda)
7. Oʻzbekiston Respublikasi Adliya vazirligi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Davlat tabiatni muhofaza qilish qoʻmitasi, “Davarxitektqurilish” qoʻmitasi bilan birgalikda bir oy muddatda Musaffo rivojlanish mexanizmi doirasida amalga oshiriladigan investitsiya loyihalari hujjatlarini ishlab chiqish, ekspertizadan oʻtkazish va tasdiqlash borasida Oʻzbekiston Respublikasining normativ-huquqiy hujjatlariga oʻzgartish va qoʻshimchalar boʻyicha Vazirlar Mahkamasiga takliflar kiritsin.
8. Mazkur Qarorning ijrosini nazorat qilish Oʻzbekiston Respublikasi Bosh vazirining oʻrinbosari R. S. Azimov zimmasiga yuklansin.
Oʻzbekiston Respublikasining Prezidenti I. KARIMOV
Toshkent sh.,
2006-yil 6-dekabr,
PQ-525-son
Oldingi tahrirga qarang.
Oʻzbekiston Respublikasi Prezidentining 2006-yil 6-dekabrdagi PQ-525-son qaroriga
1-ILOVA
Kioto Protokolining Musaffo rivojlanish mexanizmi boʻyicha Idoralararo kengash
TARKIBI

1.

J.A. Qoʻchqorov

—

Bosh vazir oʻrinbosari, Oʻzbekiston Respublikasi iqtisodiy taraqqiyot va kambagʻallikni qisqartirish vaziri, Idoralararo kengash rahbari

2.

T.A. Ishmetov

—

moliya vaziri, Idoralararo kengash rahbari oʻrinbosari

3.

I.I. Norqulov

—

iqtisodiy taraqqiyot va kambagʻallikni qisqartirish vazirining birinchi oʻrinbosari, Idoralararo kengash rahbari oʻrinbosari

4.

Sh.X. Xodjayev

—

energetika vaziri oʻrinbosari

5.

I.Y. Abduraxmonov

—

innovatsion rivojlanish vaziri

6.

Sh.S. Xidoyatov

—

uy-joy kommunal xizmat koʻrsatish vaziri

7.

L.Sh. Kudratov

—

investitsiyalar va tashqi savdo vazirining birinchi oʻrinbosari

8.

A.B. Voitov

—

qishloq xoʻjaligi vaziri

9.

N.N. Oblomurodov

—

Ekologiya va atrof muhitni muhofaza qilish davlat qoʻmitasi raisi

10.

Sh.X. Xabibullayev

—

Gidrometeorologiya xizmati markazi bosh direktori

11.

B.S. Yuldashev

—

Fanlar akademiyasi prezidenti

12.

F.M. Abduraxmanov

—

“Issiqlik elektr stansiyalari” AJ boshqaruvi raisi

13.

M.R. Abdullayev

—

“Oʻzbekneftgaz” AJ boshqaruvi raisi

14.

N.T. Agzamov

—

Neft mahsulotlari va gazdan foydalanishni nazorat qilish inspeksiyasi boshligʻi

15.

Lavozimi boʻyicha

—

“Oʻzkimyosanoat” AJ boshqaruvi raisi

16.

A.X. Xursanov

—

“Olmaliq KMK” AJ boshqaruvi raisi

17.

D.E. Mannonov

—

“Fargʻonaazot” AJ boshqaruvi raisi

18.

Lavozimi boʻyicha

—

Iqtisodiy taraqqiyot va kambagʻallikni qisqartirish vazirligining Departamenti direktori, Idoralararo kengash kotibiyati rahbari

Izoh: Idoralararo kengash aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan shaxslar kiritiladi.
(1-ilova matni Oʻzbekiston Respublikasi Prezidentining 2022-yil 2-dekabrdagi PQ-436-son qarori tahririda — Qonunchilik maʼlumotlari milliy bazasi, 03.12.2022-y., 07/22/436/1061-son)
Oldingi tahrirga qarang.
Oʻzbekiston Respublikasi Prezidentining 2006-yil 6-dekabrdagi PQ-525-son qaroriga
2-ILOVA
Idoralararo kengashning jamoatchilik asosida faoliyat yuritadigan kotibiyati
TARKIBI

1.

Lavozimi boʻyicha

—

Iqtisodiy taraqqiyot va kambagʻallikni qisqartirish vazirligining Departamenti direktori, Kotibiyat rahbari

2.

Lavozimi boʻyicha

—

Vazirlar Mahkamasining Makroiqtisodiy tahlil, tarkibiy oʻzgartirishlar, moliya-bank tizimi, davlat aktivlarini boshqarish, raqobatni rivojlantirish, tadbirkorlikni qoʻllab-quvvatlash va kambagʻallikni qisqartirish masalalari kotibiyati bosh mutaxassisi

3.

Lavozimi boʻyicha

—

Iqtisodiy taraqqiyot va kambagʻallikni qisqartirish vazirligi boshqarma boshligʻi

4.

Lavozimi boʻyicha

—

Iqtisodiy taraqqiyot va kambagʻallikni qisqartirish vazirligi boshqarma boshligʻi

5.

Lavozimi boʻyicha

—

Moliya vazirligi boshqarma boshligʻi

6.

Lavozimi boʻyicha

—

Investitsiyalar va tashqi savdo vazirligi boshqarma boshligʻi

7.

Lavozimi boʻyicha

—

Ekologiya va atrof muhitni muhofaza qilish davlat qoʻmitasi boshqarma boshligʻi

8.

Lavozimi boʻyicha

—

Gidrometeorologiya xizmati markazi boshqarma boshligʻi

Izoh: Kotibiyat aʼzolari boshqa ishga oʻtgan taqdirda uning tarkibiga ushbu lavozimlarga yangidan tayinlangan shaxslar kiritiladi.
(2-ilova matni Oʻzbekiston Respublikasi Prezidentining 2022-yil 2-dekabrdagi PQ-436-son qarori tahririda — Qonunchilik maʼlumotlari milliy bazasi, 03.12.2022-y., 07/22/436/1061-son)
(Oʻzbekiston Respublikasi Oliy Majlisi palatalarining Axborotnomasi, 2006-y., 12-son, 711-modda; 2009-y., 10-11-son, 107-modda; Oʻzbekiston Respublikasi qonun hujjatlari toʻplami, 2017-y., 35-son, 917-modda; Qonunchilik maʼlumotlari milliy bazasi, 03.12.2022-y., 07/22/436/1061-son)