Ўзбекистон Республикаси Президентининг «Ўзбекистон миллий телерадиокомпанияси фаолиятини ташкил этиш бўйича тадбирлар ҳақида» 2005 йил 27 декабрдаги ПҚ–245-сон қарорини бажариш юзасидан ва Ўзбекистон миллий телерадиокомпаниясининг (кейинги ўринларда матнда Ўзбекистон МТРК деб юритилади) ҳудудий бўлинмалари ходимлари сонини мақбуллаштириш, бюджетдан ажратиладиган маблағлардан самарали ва оқилона фойдаланиш мақсадида Вазирлар Маҳкамаси қарор қилади:

1. Қуйидагилар:

Ўзбекистон МТРК Қорақалпоғистон Республикаси телерадиокомпаниясининг ташкилий тузилмаси ва ходимлари сони 1-иловага мувофиқ;

Ўзбекистон МТРК вилоятлар телерадиокомпанияларининг намунавий ташкилий тузилмаси ва ходимлари сони 2-иловага мувофиқ тасдиқлансин.

2. Белгилаб қўйилсинки:

Ўзбекистон МТРКнинг ҳудудий бўлинмалари фаолиятини молиялаштириш телерадио кўрсатувлар ва эшиттиришларнинг тасдиқланган ўртача суткалик ҳажмига мувофиқ Ўзбекистон миллий телерадиокомпанияси орқали амалга оширилади;

Ўзбекистон МТРКнинг ҳудудий бўлинмалари меҳнатга ҳақ тўлаш фонди аниқ телерадио маҳсулотлар тайёрлаш учун ижодий ходимларни муддатли шартномалар бўйича жалб этишга йўналтириладиган харажатларни ҳисобга олган ҳолда белгиланади.

3. Ўзбекистон МТРК ва Ўзбекистон Республикаси Молия вазирлигининг ҳудудий бўлинмалар ҳузурида Ўзбекистон МТРКнинг давлат унитар корхоналари ҳузурида ташкил этиладиган жамғармалар сингари ижодий жамоани, студиялар ва алоҳида ходимларни рағбатлантириш ва тақдирлаш жамғармалари ташкил этиш тўғрисидаги таклифларига розилик берилсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Н. Арипов зиммасига юклансин.