Ўзбекистон Республикаси Президентининг «Ўзбекнефтгаз» нефть ва газ саноати миллий корпорациясини «Ўзбекнефтгаз» миллий холдинг компаниясига айлантириш тўғрисида» 1998 йил 11 декабрдаги ПФ-2154-сон Фармонини бажариш юзасидан Вазирлар Маҳкамаси қарор қилади:

1. Белгилаб қўйилсинки:

«Ўзгеонефтгазқазибчиқариш», «Ўзнефтгазқурилиш», «Ўзнефтмаҳсулот», «Ўзнефтниқайтаишлаш», «Ўзнефтгазишчитаъминот», «Ўзбурғунефтгаз», «Ўзтрансгаз», «Ўзнефтгазмаш» акциядорлик компаниялари юридик шахс ҳуқуқларига эга бўлган очиқ турдаги акциядорлик жамияти шаклида ташкил этилади;

таъсис этилаётган акциядорлик компаниялари негизида акциядорлик компаниялари ташкил қилинаётган тегишли хўжалик бирлашмалари томонидан тузилган шартномалар ва мажбуриятлар бўйича ҳуқуқий ворислар ҳисобланадилар.

2. Белгилансинки, холдинг акциядорлик компанияларининг бошланғич устав сармояси уларга:

акциядорлик компаниялари таркибига кирувчи давлат корхоналари мол-мулкини;

компания шуъба акциядорлик жамиятлари акцияларининг давлатга тегишли назорат пакетларини, шунингдек эркин сотишга, шу жумладан хорижий инвесторларга сотиш учун мўлжалланган пакетларни;

компанияларнинг уюшган қатнашчилари бўлган 1 — 8-иловаларга* мувофиқ акциядорлик жамиятларидаги давлатга тегишли акциялар пакетларини бериш ҳисобига шакллантирилади.

3. Ўзбекистон Республикаси Давлат мулки қўмитаси, Қишлоқ ва сув хўжалиги вазирлиги, «Ўзбекнефтгаз» миллий холдинг компаниясининг 9 ва 10-иловаларга* мувофиқ корхона ва ташкилотларни тугатиш ҳамда Қишлоқ ва сув хўжалиги тизимига ўтказиш тўғрисидаги таклифларига розилик берилсин.

4. Белгилаб қўйилсинки, «Ўзбекнефтгаз» миллий холдинг компаниясининг бошланғич устав сармояси унга:

холдинг акциядорлик компаниялари акциялар пакетининг 51 фоизини;

холдинг компаниясига бевосита ҳисобот берувчи давлат корхоналари мол-мулкини, холдинг компаниясининг уюшган қатнашчилари бўлган 11-иловага* мувофиқ акциядорлик жамиятларидаги давлатга тегишли акциялар пакетларини бериш ҳисобига шакллантирилади.

5. Белгилансинки:

«Ўзбекнефтгаз» холдинг компанияси ҳамда акциядорлик компаниялари таркибига кирувчи давлат корхоналари ва ташкилотлари, шунингдек шуъба акциядорлик жамиятлари юридик шахслар ҳисобланадилар;

холдинг компанияси ва акциядорлик компаниялари таркибига кирувчи корхоналарнинг давлат мулки уларга хўжалик юритиш ҳуқуқлари билан бириктириб қўйилади.

6. Холдинг акциядорлик компаниялари акциялари пакетларини тақсимлашнинг қуйидаги тартиби белгилансин:

компаниялар акцияларининг 51 фоизи давлат мулкига бириктирилади ва холдинг компаниянинг устав жамғармасига қўшилади;

компаниялар акцияларининг кўпи билан 10 фоизи компаниялар меҳнат жамоалари аъзолари ўртасида жойлаштирилади;

қолган қисми фонд бозорида, шу жумладан хорижий инвесторларга эркин сотилади.

7. Ўзбекистон Республикаси Давлат мулки қўмитаси:

давлатга тегишли акциялар улуши 25 фоиздан ошадиган акциядорлик компаниялари ва акциядорлик жамиятларининг Кузатувчи кенгашларига давлат вакили номзодлари бўйича таклифларни икки ҳафта муддатда Вазирлар Маҳкамасига киритсин;

«Ўзбекнефтгаз» холдинг компанияси ва унинг акциядорлик компаниялари таркибига кирувчи акциядорлик жамиятлари акцияларининг давлат пакетларини ишончли бошқарувга бериш тўғрисида бир ой муддатда шартномалар тузсин.

11. Ўзбекистон Республикаси Давлат мулки қўмитаси «Ўзбекнефтгаз» миллий холдинг компанияси билан биргаликда:

1999 йил 1 февралгача «Ўзбекнефтгаз» миллий холдинг компанияси ва унинг акциядорлик компаниялари таъсис йиғилишлари белгиланган тартибда ўтказилишини, раҳбар органлари шакллантирилишини ва уларнинг уставлари тасдиқланишини таъминласин;

«Ўзбекнефтгаз» миллий холдинг компанияси устави лойиҳасини келишиш учун уч ҳафта муддатда Вазирлар Маҳкамасига киритсин;

1999 йилнинг I чорагида, холис баҳолаш компанияларини жалб этган ҳолда, акциядорлик компаниялари устав жамғармасига бериладиган корхоналар давлат мулкини ҳамда акциялар пакетлари қийматини баҳоласин.

12. 1999/2000-ўқув йили бошлангунгача Бухоро нефть ва газ саноати техникуми ҳамда Фарғона нефть техникуми касб-ҳунар коллежларига айлантирилсин.

13. Ўзбекистон Республикаси Вазирлар Маҳкамасининг 13-иловага* мувофиқ қарорлари ўз кучини йўқотган деб ҳисоблансин.

14. Мазкур қарорнинг бажарилишини назорат қилиш Ўзбекистон Республикасининг Бош вазири Ў. Т. Султонов зиммасига юклансин.