Мазкур Низом Ўзбекистон Республикасининг «Бухгалтерия ҳисоби тўғрисида»ги Қонуни ва бухгалтерия ҳисобининг 1-сонли «Ҳисоб сиёсати ва молиявий ҳисобот» миллий стандартига мувофиқ ишлаб чиқилган.

Низомда бухгалтерия ҳисоби субъектлари томонидан молиявий ҳисоботларни тақдим қилиш муддатлари белгиланган.

Ўзбекистон Республикасининг «Бухгалтерия ҳисоби тўғрисида»ги Қонунига мувофиқ молиявий ҳисобот қуйидагиларга тақдим этилади:

мулкдорларга (давлат мулкини бошқаришга ваколатли бўлган органларига; таъсис ҳужжатларига мувофиқ муассисларга (иштирокчиларга));

солиқ органларига;

давлат статистика органларига;

қонунчилик ҳужжатларига мувофиқ бошқа органларга.

Кичик ва ўрта корхоналар, микрофирмалар ҳисоботни фақат жойлардаги давлат статистика органлари ва солиқ органларига тақдим этадилар.

1. Вазирликлар, идоралар, уюшмалар, корпорациялар, концернлар ва давлат мулкини бошқарувчи бошқа органлар учун умумлаштирилган чораклик ва йиллик ҳисоботларни тақдим этишнинг қуйидаги муддатлари белгиланади:

чораклик ҳисоботлар учун ҳисобот чораги тугагандан сўнг 40 (қирқ) кун мобайнида;

йиллик ҳисоботлар учун ҳисобот йилидан кейинги йилнинг 15 мартидан кечиктирмай.

2. Хорижий сармоялар иштирокидаги корхоналар ва чет эл фирмаларининг ваколатхоналари учун йиллик молиявий ҳисоботларни тақдим этиш муддати ҳисобот йилидан кейинги йилнинг 25 мартидан кечиктирмай белгиланади.

3. Юридик шахс мақомига эга бўлган бюджет ташкилотлари молиявий натижалар тўғрисидаги ҳисоботни молия органларига йилда бир марта ҳисобот йилидан кейинги йилнинг 15 мартидан кечиктирмай тақдим этадилар.

4. Хўжалик юритувчи субъектлар (мазкур Низомнинг 1 — 3 бандларида кўрсатилган субъектлардан ташқари) чораклик ва йиллик молиявий ҳисоботларни қуйидаги муддатларда тақдим этадилар:

чораклик молиявий ҳисоботлар учун ҳисобот даври тугагандан кейинги ойнинг 25-кунига қадар;

йиллик молиявий ҳисоботлар учун ҳисобот йилидан кейинги йилнинг 15 февралидан кечиктирмай.

Кичик корхоналар ва микрофирмалар фақат йиллик молиявий ҳисоботни ҳисобот йилидан кейинги йилнинг 15 февралидан кечиктирмай тақдим этадилар.

5. Вазирликлар, идоралар, уюшмалар, концернлар, жамоатлар ва давлат мулкини бошқарувчи бошқа органлар, шунингдек хўжалик юритувчи субъектлар, шу жумладан хорижий сармоялар иштирокидаги субъектлар мазкур Низомни бузганликлари учун Ўзбекистон Республикаси қонунчилик ҳужжатларига мувофиқ жавобгар бўладилар.

6. Мазкур Низом кучга кирган пайтдан бошлаб қуйидаги меъёрий ҳужжатлар ўз кучини йўқотади:

Ўзбекистон Республикаси Молия вазирлигининг 1993 йил 22 мартдаги 21-сонли «Корхоналар ва ташкилотлар чораклик бухгалтерия ҳисоботининг ҳажми ва шакллари тўғрисида»ги хати;

Ўзбекистон Республикаси Молия вазирлигининг 1993 йил 27 октябрдаги 76-сонли «Корхоналар ва ташкилотлар йиллик бухгалтерия ҳисоботининг ҳажми ва шакллари тўғрисида»ги хати;

Ўзбекистон Республикаси Молия вазирлигининг 1994 йил 17 январдаги 8-сонли Ўзбекистон Республикаси Молия вазирлигининг 1993 йил 27 октябрдаги 76-сонли хатини тўлдириш масаласи бўйича хати;

Ўзбекистон Республикаси Молия вазирлигининг 1993 йил 16 ноябрдаги 81-сонли ва Ўзбекистон Республикаси Вазирлар Маҳкамаси ҳузуридаги Давлат солиқ бошқармасининг 66-сонли «Чораклик ва йиллик бухгалтерия ҳисоботларини тақдим этиш муддатлари тўғрисида»ги хати;

Ўзбекистон Республикаси Молия вазирлигининг 1994 йил 30 июндаги 17-02/35-сонли «Ярим йиллик бухгалтерия ҳисоботини тақдим этиш муддатлари тўғрисида»ги хати;

Ўзбекистон Республикаси Молия вазирлигининг 1995 йил 19 апрелдаги 44-сонли ва Ўзбекистон Республикаси Давлат солиқ қўмитасининг 34-сонли «Молиявий натижалар тўғрисидаги бухгалтерия ҳисоботини тақдим этиш тўғрисида»ги хати;

Ўзбекистон Республикаси Молия вазирлигининг 1996 йил 31 октябрдаги 165-сонли «1996 йилдан бошлаб умумлаштирилган чораклик ва йиллик бухгалтерия ҳисоботлари ва балансларни тақдим этиш муддатлари тўғрисида»ги буйруғи;

Ўзбекистон Республикаси Молия вазирлигининг 1996 йил 6 февралдаги 17-7/20-сонли «1996 йил учун чораклик бухгалтерия ҳисоботларининг ҳажми тўғрисида»ги хати (ўзбек тилида);

Ўзбекистон Республикаси Молия вазирлигининг 1996 йил 6 февралдаги 11-сонли ва Ўзбекистон Республикаси Давлат солиқ қўмитасининг 96-13-сонли хати.