toggle_night_mode
Ўзбекистон Республикаси Вазирлар Маҳкамасининг
қарори
«Фавқулодда вазиятлар волонтёри» жамоатчилик гуруҳларини ижтимоий қўллаб-қувватлаш чора-тадбирлари тўғрисида
Ўзбекистон Республикаси Президентининг «Фавқулодда вазиятлар органлари фаолиятини янада такомиллаштиришга доир ташкилий чора-тадбирлар тўғрисида» 2025 йил 20 октябрдаги ПҚ-310-сон қарори ижросини таъминлаш, аҳолини ва ҳудудларни фавқулодда вазиятлардан муҳофаза қилишда «Фавқулодда вазиятлар волонтёри» жамоатчилик гуруҳларининг фаолиятини ривожлантириш ҳамда уларни ижтимоий қўллаб-қувватлаш мақсадида Вазирлар Маҳкамаси қарор қилади:
1. Қуйидагиларни назарда тутувчи Волонтёрлар ва кўнгилли қутқарувчиларни «Фавқулодда вазиятлар волонтёри» жамоатчилик гуруҳларига жалб этиш ва ижтимоий қўллаб-қувватлаш тартиби тўғрисидаги низом иловага мувофиқ тасдиқлансин:
волонтёрларга Ўзбекистон Республикаси Фавқулодда вазиятлар вазирлиги академияси бакалавриат таълим йўналишига ўқишга киришда тўплаган балларининг 5 фоизи миқдорида қўшимча балл бериш учун тавсиянома (кейинги ўринларда — тавсиянома) бериш тартиби;
кўнгилли қутқарувчиларга «маҳалла еттилиги» тавсияномасига асосан ҳудудий қутқарув тузилмаларида қутқарувчи лавозимига ишга қабул қилиш бўйича танловда устуворлик бериш тартиби.
2. Белгилансинки, волонтёрларга бериладиган тавсиянома бланкалари Фавқулодда вазиятлар вазирлиги учун Ўзбекистон Республикаси Давлат бюджети параметрларида ҳар йили назарда тутиладиган маблағлар доирасида «Давлат белгиси» МЧЖ томонидан тайёрланади.
3. Ўзбекистон Республикаси Фавқулодда вазиятлар вазирлиги икки ой муддатда белгиланган тартибда:
волонтёрларга тавсиянома бериш учун танловни ташкил этиш ва ўтказиш бўйича комиссия регламентини;
тавсиянома бериш учун танловда волонтёрлар фаолиятини баҳолаш тартибини тасдиқласин.
4. Вазирлар Маҳкамасининг 2021 йил 27 декабрдаги 775-сон қарори билан тасдиқланган Ўзбекистон Республикаси олий ҳарбий таълим муассасаларида ўқишга номзодларни саралаб олиш ва қабул қилиш, курсантларни ўқишдан четлаштириш ва қайта тиклаш тартиби тўғрисидаги низом қуйидаги мазмундаги 533-банд билан тўлдирилсин:
«533. Ўзбекистон Республикаси Президентининг «Фавқулодда вазиятлар органлари фаолиятини янада такомиллаштиришга доир ташкилий чора-тадбирлар тўғрисида» 2025 йил 20 октябрдаги ПҚ-310-сон қарорига мувофиқ фавқулодда вазиятларнинг олдини олиш ва уларни бартараф этишда фаоллик кўрсатган, натижалари билан бошқаларга ўрнак бўлган волонтёрларга Ўзбекистон Республикаси фавқулодда вазиятлар вазири тавсияномасига асосан Фавқулодда вазиятлар вазирлиги академиясининг бакалавриат таълим йўналишига ўқишга киришда ўзлари тўплаган балларнинг 5 фоизи миқдорида қўшимча балл кўринишида имтиёз берилади».
5. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ва Ўзбекистон Республикаси фавқулодда вазиятлар вазири А.И. Икрамов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 17 апрель,
181-сон
Вазирлар Маҳкамасининг 2026 йил 17 апрелдаги 181-сон қарорига
ИЛОВА
Волонтёрлар ва кўнгилли қутқарувчиларни «Фавқулодда вазиятлар волонтёри» жамоатчилик гуруҳларига жалб этиш ва ижтимоий қўллаб-қувватлаш тартиби тўғрисида
НИЗОМ
1-боб. Умумий қоидалар
1. Ушбу Низом волонтёрлар ва кўнгилли қутқарувчиларни «Фавқулодда вазиятлар волонтёри» жамоатчилик гуруҳларига (кейинги ўринларда — жамоатчилик гуруҳлари) жалб этиш ва уларни ижтимоий қўллаб-қувватлаш тартибини белгилайди.
2. Жамоатчилик гуруҳлари ҳар бир маҳаллада ёшлар орасида волонтёрлардан ва аҳоли ўртасида кўнгилли қутқарувчилардан иборат таркибда тегишли ҳудудда фавқулодда вазиятларнинг олдини олиш ҳамда оқибатларини бартараф этиш орқали ушбу маҳаллани фавқулодда вазиятлардан холи ҳудудга айлантириш мақсадида ташкил этилади.
3. Жамоатчилик гуруҳларининг аъзоларига қуйидаги имтиёзлар тақдим этилади:
фавқулодда вазиятларнинг олдини олиш ва уларни бартараф этишда фаоллик кўрсатган, натижалари билан бошқаларга ўрнак бўлган волонтёрларга Ўзбекистон Республикаси фавқулодда вазиятлар вазири тавсияномасига асосан Ўзбекистон Республикаси Фавқулодда вазиятлар вазирлиги академиясининг (кейинги ўринларда — Академия) бакалавриат таълим йўналишига ўқишга киришда ўзлари тўплаган балларнинг 5 фоизи миқдорида қўшимча балл бериш;
кўнгилли қутқарувчиларга «маҳалла еттилиги» тавсияномасига асосан ҳудудий қутқарув тузилмаларида қутқарувчи лавозимига ишга қабул қилиш бўйича танловда белгиланган тартибда устуворлик бериш.
2-боб. Волонтёрлар ва кўнгилли қутқарувчиларни жамоатчилик гуруҳларига жалб этиш
4. Жамоатчилик гуруҳларига фақат ўн саккиз ёшдан катта бўлган Ўзбекистон Республикаси фуқаролари жалб этилади.
5. Қуйидаги фуқароларнинг жамоатчилик гуруҳларига жалб этилишига йўл қўйилмайди:
ўн саккиз ёшга тўлмаган;
муомалага лаёқати белгиланган тартибда чекланган ёки муомалага лаёқатсиз деб топилган;
ўзига нисбатан жиноят иши қўзғатилган, шунингдек, қасддан жиноят содир этганлик учун судланганлик ҳолати тугалланмаган ёки судлангани олиб ташланмаган;
жиноий жазони ўтаётган;
белгиланган вазифаларни амалга оширишга монелик қиладиган касаллиги ёки жисмоний нуқсони мавжуд бўлган;
ҳақиқий ҳарбий хизматдаги шахслар.
6. Жамоатчилик гуруҳларига аъзо бўлиш истагидаги шахслар Волонтёрлар электрон платформаси (volontyor.uz) орқали белгиланган тартибда ҳисобга қўйилгандан сўнг ҳудудий фавқулодда вазиятлар бошқармаларига (бош бошқармаларига) ариза билан мурожаат қилади.
7. Ҳудудий фавқулодда вазиятлар бошқармалари (бош бошқармалари):
ариза берувчиларнинг ушбу Низомнинг 5-банди талабларига мувофиқлигини тегишли давлат органлари ва ташкилотлардан, шу жумладан, ахборот тизимлари орқали белгиланган тартибда олинган маълумотлар асосида аниқлайди;
тегишли талабларга жавоб берувчи фуқароларни 24 соатлик ўқув дастури асосида Ўзбекистон Республикаси Фавқулодда вазиятлар вазирлиги томонидан белгиланган тартибда тайёргарликдан ва аттестациядан ўтказади;
аттестациядан ўтган фуқароларга «волонтёр қутқарувчи» мақомини ва «қутқарувчи дафтарчаси»ни беради ҳамда уларнинг ҳисобини юритади.
8. Келгусида Академияга ўқишга кириш истагида бўлган фуқаролар жамоатчилик гуруҳи волонтёри сифатида, фавқулодда вазиятлар органларига қутқарувчи лавозимига ишга кирмоқчи бўлган фуқаролар жамоатчилик гуруҳи кўнгилли қутқарувчиси сифатида рўйхатга олинади.
9. Волонтёрлар ва кўнгилли қутқарувчилар фавқулодда вазиятларнинг олдини олиш ҳамда оқибатларини бартараф этиш ишларига ихтиёрийлик тамойили асосида жалб этилади.
10. Волонтёрлар ва кўнгилли қутқарувчилар томонидан амалга оширилган ишлар тўғрисидаги маълумотлар уларнинг «қутқарувчи дафтарчаси»га туман (шаҳар) фавқулодда вазиятлар бўлими (бошқармаси) бошлиғи томонидан қайд этиб борилади.
3-боб. Волонтёрлар ва кўнгилли қутқарувчиларни ижтимоий қўллаб-қувватлаш
1-§. Волонтёрларга тавсиянома бериш
11. Академияга ўқишга киришда қўшимча балл бериш учун тавсиянома Ўзбекистон Республикаси Фавқулодда вазиятлар вазирлиги томонидан ташкил этиладиган танловда ғолиб бўлган волонтёрларга берилади.
Танлов 18 ёшдан 25 ёшгача бўлган волонтёрлар иштирокида ушбу Низомга 1-иловадаги схемага мувофиқ ўтказилади.
12. Танловни ташкил этиш ва ўтказиш учун Ўзбекистон Республикаси фавқулодда вазиятлар вазирининг маънавий-маърифий ишлар ва кадрлар билан таъминлаш бўйича ўринбосари раислигида комиссия тузилади.
Камида беш нафар раҳбар-ходимлар ва мутахассислардан иборат бўлган комиссия таркиби, шунингдек, комиссия регламенти ҳар йили 10 мартга қадар Ўзбекистон Республикаси фавқулодда вазиятлар вазирининг буйруғи билан тасдиқланади.
Комиссия таркибига Ўзбекистон Республикаси Ёшлар ишлари агентлиги вакили ҳам киради, шунингдек, унга бошқа вазирлик ва идораларнинг соҳа мутахассислари ҳам жалб этилиши мумкин.
13. Волонтёрларнинг фаолияти туман (шаҳар), вилоят ва республика даражасида қуйидаги мезонлар асосида тўпланган баллар орқали баҳоланади:
«маҳаллабай» тамойили асосида фавқулодда вазиятларнинг олдини олиш бўйича амалга оширган ишлари;
фавқулодда вазиятларда қидирув-қутқарув ишларидаги иштироки;
фавқулодда вазиятлар зонасида аҳолига биринчи тиббий ёрдам кўрсатиш ва эвакуация тадбирларидаги иштироки;
фавқулодда вазиятлар оқибатларини бартараф этиш бўйича амалга оширган ишлари;
қўмондонлик ҳамда махсус-тактик машқлардаги иштироки.
Волонтёрларни ушбу мезонлар асосида саралаш ва баҳолаш тартиби Ўзбекистон Республикаси фавқулодда вазиятлар вазири томонидан тасдиқланади.
14. Туман (шаҳар) фавқулодда вазиятлар бўлимлари (бошқармалари) туман (шаҳар) ёшлар ишлари бўлимлари билан биргаликда ҳар йили 1 мартга қадар волонтёрларни саралайди ҳамда фаолияти энг юқори баҳоланган 3 нафар волонтёр номзодига тегишли қуйидаги ҳужжатларни ҳудудий фавқулодда вазиятлар бошқармаларига (бош бошқармаларига) электрон шаклда тақдим этади:
волонтёрлар рўйхати;
волонтёрларнинг идентификацияловчи ID-карталари (биометрик паспорти) нусхалари («Электрон ҳукумат» тизимининг идоралараро интеграциялашув платформаси орқали реал вақт режимида олинади);
волонтёрларнинг фаолияти бўйича туман (шаҳар) фавқулодда вазиятлар бўлими (бошқармаси) бошлиғининг ҳисоботлари;
волонтёрларнинг «қутқарувчи дафтарчаси» нусхалари;
туман (шаҳар) ёшлар ишлари бўлими бошлиғининг фикрномалари;
волонтёрларнинг тегишли мезонлар бўйича бажарган ишларини тасдиқловчи фото ва видеоматериаллар.
Бунда волонтёрларни саралашда уларнинг фаолияти бўйича ҳисоботлар, «қутқарувчи дафтарчаси» ҳамда фото ва видеоматериаллардаги маълумотларнинг ўзаро мутаносиблиги ўрганилиши шарт.
15. Ҳудудий фавқулодда вазиятлар бошқармалари (бош бошқармалари) туман (шаҳар) фавқулодда вазиятлар бўлимлари (бошқармалари) томонидан тақдим этилган волонтёрларни белгиланган тартибда саралайди ҳамда фаолияти энг юқори баҳоланган 3 нафар волонтёр номзодини тегишли ҳужжатлар билан биргаликда ҳар йили 15 мартга қадар комиссияга тақдим этади.
16. Комиссия ҳудудий фавқулодда вазиятлар бошқармалари (бош бошқармалари) томонидан тақдим этилган номзодларни ҳар йили 1 апрелга қадар белгиланган тартибда саралайди ва уларнинг фаолиятини баҳолайди.
17. Баҳолаш натижаларига кўра ҳар бир ҳудуддан бир нафардан жами 14 нафар волонтёрга ушбу Низомга 2-иловага мувофиқ шаклда тавсиянома берилади.
18. Тавсиянома берилган волонтёрларнинг рўйхати Ўзбекистон Республикаси фавқулодда вазиятлар вазирининг буйруғи билан ҳар йили 10 апрелга қадар тасдиқланади.
19. Тавсияномалар волонтёрларга ҳудудий фавқулодда вазиятлар бошқармалари (бош бошқармалари) томонидан ҳар йили 1 майга қадар тақдим этилади.
20. Тавсиянома бир ўқув йили учун амал қилади.
2-§. Кўнгилли қутқарувчиларга ишга қабул қилишда устуворлик бериш
21. Ҳудудий қутқарув тузилмаларида қутқарувчи лавозимига ишга кириш истагини билдирган 30 ёшдан ошмаган кўнгилли қутқарувчилар маҳалла фуқаролар йиғини раисига тавсиянома олиш учун ариза билан мурожаат қилади. Аризага фуқаронинг «қутқарувчи дафтарчаси» нусхаси илова қилинади.
22. «Маҳалла еттилиги» аъзолари аризани бир ҳафта муддатда туман (шаҳар) фавқулодда вазиятлар бўлимлари (бошқармалари) бошлиқлари билан биргаликда кўриб чиқади.
23. Аризани кўриб чиқишда «қутқарувчи дафтарчаси»да қуйидаги маълумотлар қайд этилганига эътибор қаратилади:
фавқулодда вазиятларда қидирув-қутқарув ишларидаги иштироки;
фавқулодда вазиятлар зонасида аҳолига биринчи тиббий ёрдам кўрсатиш ва эвакуация тадбирларидаги иштироки;
фавқулодда вазиятларнинг олдини олиш ва оқибатларини бартараф этиш бўйича амалга оширган ишлари;
қўмондонлик ҳамда махсус-тактик машқлардаги иштироки.
Бунда ушбу бандда назарда тутилган маълумотлардан камида иккитаси «қутқарувчи дафтарчаси»да қайд этилган тақдирда, кўнгилли қутқарувчига тавсиянома берилади.
24. Туман (шаҳар) фавқулодда вазиятлар бўлимлари (бошқармалари) томонидан тавсияномаларнинг ҳисоби юритилади.
25. Тавсиянома бир йил давомида амал қилади.
26. Тегишли қутқарув тузилмасида қутқарувчи лавозимига танлов эълон қилинганда, тавсиянома кўнгилли қутқарувчи томонидан бошқа ҳужжатлар билан биргаликда тақдим этилади.
27. Тавсиянома эгалари қутқарувчи лавозимига ишга киришда танловда антропометрик параметри (бўйи) бўйича устуворликка эга бўлади ҳамда тест синовларидан озод этилади.
4-боб. Якунловчи қоидалар
28. Волонтёрлар ва кўнгилли қутқарувчилар мансабдор шахсларнинг хатти-ҳаракатлари устидан қонунчилик ҳужжатларида белгиланган тартибда шикоят қилиш ҳуқуқига эга.
29. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.
30. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавоб беради.
Волонтёрлар ва кўнгилли қутқарувчиларни «Фавқулодда вазиятлар волонтёри» жамоатчилик гуруҳларига жалб этиш ва ижтимоий қўллаб-қувватлаш тартиби тўғрисидаги низомга
1-ИЛОВА
Волонтёрларга Ўзбекистон Республикаси Фавқулодда вазиятлар вазирлиги академияси бакалавриат таълим йўналишига ўқишга киришда тўплаган балларининг 5 фоизи миқдорида қўшимча балл бериш учун тавсиянома бериш
СХЕМАСИ

Босқичлар

Масъуллар

Ўтказиладиган тадбирлар

Бажариш муддатлари

1-босқич

Туман (шаҳар) фавқулодда вазиятлар бўлимлари (бошқармалари) туман (шаҳар), ёшлар ишлари бўлимлари

Волонтёрларни саралайди ҳамда фаолияти энг юқори баҳоланган 3 нафар волонтёр номзодига тегишли ҳужжатларни ҳудудий фавқулодда вазиятлар бошқармаларига (бош бошқармаларига) тақдим этади.

Ҳар йили 1 мартга қадар

2-босқич

Фавқулодда вазиятлар вазирлиги

Танловни ташкил этиш ва ўтказиш учун комиссия таркибини тасдиқлайди.

Ҳар йили 10 мартга қадар

3-босқич

Ҳудудий фавқулодда вазиятлар бошқармалари (бош бошқармалари)

1. Туман (шаҳар) фавқулодда вазиятлар бўлимлари (бошқармалари) томонидан тақдим этилган волонтёрларни саралайди.

2. Фаолияти энг юқори баҳоланган 3 нафар волонтёр номзодига тегишли ҳужжатларни комиссияга тақдим этади.

Ҳар йили 15 мартга қадар

4-босқич

Комиссия

Ҳудудий фавқулодда вазиятлар бошқармалари (бош бошқармалари) томонидан тақдим этилган номзодларни саралайди ва уларнинг фаолиятини баҳолайди.

Ҳар йили 1 апрелга қадар

5-босқич

Фавқулодда вазиятлар вазири

Тавсиянома берилган волонтёрларнинг рўйхатини тасдиқлайди.

Ҳар йили 10 апрелга қадар

6-босқич

Ҳудудий фавқулодда вазиятлар бошқармалари (бош бошқармалари)

Тавсияномаларни волонтёрларга тақдим этади.

Ҳар йили 1 майга қадар

Волонтёрлар ва кўнгилли қутқарувчиларни «Фавқулодда вазиятлар волонтёри» жамоатчилик гуруҳларига жалб этиш ва ижтимоий қўллаб-қувватлаш тартиби тўғрисидаги низомга
2-ИЛОВА
ЎЗБЕКИСТОН РЕСПУБЛИКАСИ ФАВҚУЛОДДА ВАЗИЯТЛАР ВАЗИРЛИГИ АКАДЕМИЯСИГА ЎҚИШГА КИРИШ УЧУН БЕРИЛАДИГАН ТАВСИЯНОМА БЛАНКАСИНИНГ
ШАКЛИ

TAVSIYANOMA

FVV 000000

_______-yilda tugʻilgan, Oʻzbekiston Respublikasi fuqarosi _______________________________________________________________________________________

_____________________________________________________________________________________________________________________________________ga

(familiyasi, ismi, otasining ismi)

favqulodda vaziyatlarning oldini olish va ularni bartaraf etishda faol ishtirok etib, boshqalarga oʻrnak boʻlgani uchun berildi.

Oʻzbekiston Respublikasi Prezidentining 2025-yil 20-oktabrdagi PQ-310-son qaroriga muvofiq Oʻzbekiston Respublikasi Favqulodda vaziyatlar vazirligi akademiyasining bakalavriat taʼlim yoʻnalishiga oʻqishga kirishda oʻzi toʻplagan ballning besh foizi miqdorida qoʻshimcha ball beriladi.

Tavsiyanoma Oʻzbekiston Respublikasi favqulodda vaziyatlar vazirining 20___-yil «___» _________-dagi ____-son buyrugʻiga asosan berildi.

Tavsiyanoma rasmiylashtirilib berilgan sanadan eʼtiboran bir yil muddat davomida kuchga ega boʻladi.

M.Oʻ.___________________________________________________________________________________

Oʻzbekiston Respublikasi favqulodda vaziyatlar vaziri

(imzosi, familiyasi, ismi, otasining ismi)

(Қонунчилик маълумотлари миллий базаси, 18.04.2026 й., 09/26/181/0382-сон)