Республика аҳолиси манфаатлари ҳимоя қилинишини таъминлаш, алкоголли ва тамаки маҳсулотлари мамлакат ҳудудига келтирилиши, ишлаб чиқарилиши ва сотилиши устидан давлат назоратини янада кучайтириш мақсадида Вазирлар Маҳкамаси қарор қилади:

1. Белгилаб қўйилсинки, 1998 йил 5 августдан бошлаб алкоголли ва тамаки маҳсулотлари транспортнинг барча турлари билан, Ўзбекистон Республикасининг божхона ҳудуди орқали транзит олиб ўтилишига фақат Вазирлар Маҳкамасининг рухсатномаси билан ижозат берилади.

Ўзбекистон Республикаси Давлат божхона қўмитаси, Давлат солиқ қўмитаси Молия вазирлиги ва Ташқи иқтисодий алоқалар вазирлиги билан биргаликда беш кун муддатда Алкоголли ва тамаки маҳсулотлари Ўзбекистон Республикасининг божхона ҳудуди орқали транзит олиб ўтилиши тартиби тўғрисидаги низомни ишлаб чиқсинлар ва Вазирлар Маҳкамаси билан келишган ҳолда тасдиқласинлар, бунда юкнинг республика божхона органлари ходимлари томонидан кузатиб борилишини назарда тутсинлар.

2. Белгилансинки, алкоголли ва тамаки маҳсулотларини эркин муомала (импорт)га чиқариш тартибида божхонада расмийлаштириш:

товар келиб чиққан ва жўнатилган мамлакатда товар жўнатишдан олдин мажбурий инспекция қилинган, агар контрактнинг умумий қиймати 10,0 минг АҚШ долларидан ортиқ бўлса;

товарга Ўзбекистон Республикаси санитария-эпидемиология станциялари лабораторияларининг санитария-гигиена хулосаси мавжуд бўлган тақдирда амалга оширилади.

3. 1998 йил 1 августдан бошлаб Ўзбекистон Республикаси ҳудудида:

олиб чиқиб кетиладиган хом ашёдан алкоголли маҳсулот ишлаб чиқариш;

спирт ва алкоголли маҳсулотларни ишлаб чиқариш ва улар айланиши чоғида бартер операцияларини амалга ошириш таъминлансин.

4. Акциз маркалари тизимини жорий этиш бўйича идоралараро комиссия акциз маркаларини ҳимоя қилишнинг янги, шу жумладан голографик йўллар қўлланиладиган усулларини жорий этган ҳолда акциз маркаларини мунтазам равишда янгилаб туришни амалга жорий этсин.

5. Ўзбекистон Республикаси Давлат солиқ қўмитаси ва Молия вазирлигига алкоголли ва тамаки маҳсулотлари ишлаб чиқарган корхоналар томонидан акциз солиғи ва бошқа солиқлар қонун ҳужжатлари билан белгиланган муддатидан 3 ой муддатда тўланмаган тақдирда алкоголли ва тамаки маҳсулотларни ишлаб чиқаришга берилган лицензияларнинг амал қилишини тўхтатиш ёки уларни бекор қилиш тўғрисида Ўзбекистон Республикаси Вазирлар Маҳкамасига таклифлар киритиш ҳуқуқи берилсин.

6. Ўзбекистон Республикаси Молия вазирлиги, Давлат солиқ қўмитаси, Давлат божхона қўмитаси Адлия вазирлиги билан биргаликда Ўзбекистон Республикасининг Маъмурий жавобгарлик тўғрисидаги кодексига ва Жиноят кодексига этил спирти, алкоголли ва тамаки маҳсулотлари ғайриқонуний келтирилганлиги, ишлаб чиқарилганлиги ва айланишда бўлганлиги учун фуқаролар ва мансабдор шахсларнинг маъмурий ва жиноий жавобгарлигини кучайтиришни назарда тутувчи ўзгартириш ва қўшимчалар киритиш тўғрисидаги таклифларни икки ҳафта муддатда киритсинлар.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Б.С. Ҳамидов зиммасига юклансин.