Ўзбекистон Республикаси Вазирлар Маҳкамасининг

қарори

«Маҳалла еттилиги» тавсияси асосида камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга ипотека кредитини ажратиш тартиби тўғрисидаги низомни тасдиқлаш ҳақида

Ўзбекистон Республикаси Президентининг «2024 йилда ипотека кредитларини ажратиш механизмларини такомиллаштириш ва аҳолининг уй-жой шароитларини яхшилашга оид қўшимча чора-тадбирлар тўғрисида» 2024 йил 30 апрелдаги ПФ-70-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «2024 йилда ипотека кредитларини ажратиш механизмларини такомиллаштириш ва аҳолининг уй-жой шароитларини яхшилашга оид қўшимча чора-тадбирлар тўғрисида» 2024 йил 30 апрелдаги ПФ-70-сон Фармонида «маҳалла еттилиги» тавсияси асосида камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга ипотека кредитларини ажратиш амалиётини жорий этиш белгиланганлиги маълумот учун қабул қилинсин.

2. Қуйидагиларни назарда тутувчи «Маҳалла еттилиги» тавсияси асосида камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга ипотека кредитини ажратиш тартиби тўғрисидаги низом иловага мувофиқ тасдиқлансин:

якка тартибдаги уй-жойни қуриш, реконструкция қилиш ва таъмирлаш мақсадлари учун Ўзбекистон Республикаси Марказий банкининг асосий ставкасидан тўрт фоиз бандга юқори ставкада 120 миллион сўмгача миқдорда, 20 йилгача муддатга ипотека кредитларини ажратиш;

ипотека кредити бўйича дастлабки бадалнинг бир қисмини қоплаш учун ажратиладиган кредитнинг 15 фоизи миқдорида ҳамда фоиз тўловларининг бир қисмини қоплаш учун кредит муддатининг биринчи беш йили давомида 12 фоиздан ошган қисмига субсидия тўлаб бериш;

ипотека кредитлари ва улар бўйича субсидияларни расмийлаштириш ҳамда ажратиш тартиби.

3. Белгилансинки:

камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга ипотека кредитлари Ўзбекистон Республикаси Иқтисодиёт ва молия вазирлигининг маблағлари ҳисобидан, қоида тариқасида, «Агробанк» АТБ, АТ «Халқ банки», «Микрокредитбанк» АТБ ва «Бизнесни ривожлантириш банки» АТБ томонидан ажратилади;

камбағалликдан чиқариш дастурига киритилган ва уй-жой шароитини яхшилашга муҳтож бўлган шахсларга якка тартибдаги уй-жойни қуриш, реконструкция қилиш ва таъмирлашда кадастр паспортини расмийлаштириш ва кўчмас мулкка бўлган ҳуқуқларни давлат рўйхатидан ўтказиш билан боғлиқ тўловлар қиймати 50 фоизга камайтирилади;

якка тартибдаги уй-жойни қуриш, реконструкция қилиш ва таъмирлаш учун ажратилган ипотека кредитлари бўйича дастлабки бадал ва фоиз харажатларининг бир қисмини қоплаш учун субсидиялар «subsidyplatform.mf.uz» тўлов платформаси орқали ажратилади.

4. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари «маҳалла еттилиги» билан биргаликда камбағалликдан чиқариш дастурига киритилган ва якка тартибдаги уй-жойни қуриш, реконструкция қилиш ҳамда таъмирлашга эҳтиёжи бўлган фуқароларга ипотека кредитларини ажратиш ва уларнинг мақсадли ўзлаштирилиши жараёнини самарали ташкил этиш, кредит олган фуқароларнинг даромадли доимий меҳнат фаолияти билан банд бўлишларини таъминлаш чораларини кўриб борсин.

5. Ўзбекистон Республикаси Камбағалликни қисқартириш ва бандлик вазирлиги уч ой муддатда:

Иқтисодиёт ва молия вазирлиги, Ўзбекистон маҳаллалари уюшмаси, «Агробанк» АТБ, АТ «Халқ банки», «Микрокредитбанк» АТБ ва «Бизнесни ривожлантириш банки» АТБ, Рақамли технологиялар вазирлиги билан биргаликда «Онлайн маҳалла» ва «Рақамли маҳалла» платформалари, «subsidyplatform.mf.uz» тўлов платформаси ҳамда тегишли тижорат банкларининг ахборот тизимлари ўзаро интеграция қилинишини таъминласин;

манфаатдор вазирликлар ва идоралар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда ушбу қарорнинг моҳияти ва аҳамияти аҳоли ўртасида кенг тушунтирилишини ташкил этсин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2024 йил 21 октябрь,

691-сон

Вазирлар Маҳкамасининг 2024 йил 21 октябрдаги 691-сон қарорига
ИЛОВА

НИЗОМ

1-боб. Умумий қоидалар

1. Мазкур Низом «маҳалла еттилиги» тавсияси асосида «Онлайн маҳалла» платформасида камбағалликдан чиқариш индивидуал дастурига (кейинги ўринларда — Дастур) киритилган ва уй-жой шароитини яхшилашга муҳтож бўлган шахсларга якка тартибдаги уй-жойни қуриш, реконструкция қилиш ва таъмирлаш мақсадлари учун ипотека кредитларини ажратиш тартибини белгилайди.

2. Ушбу Низомда қуйидаги асосий тушунчалар қўлланилади:

ариза берувчи — Дастурга киритилган, уй-жой шароитини яхшилашга муҳтож бўлган ҳамда якка тартибдаги уй-жойни қуриш, реконструкция қилиш ва таъмирлаш мақсадлари учун ипотека кредитларини ажратиш бўйича ариза билан мурожаат қилган шахс;

камбағалликдан чиқариш дастури — «маҳалла еттилиги» томонидан камбағал оила даромадини ошириш ва муаммоларини ҳал этиш учун «Онлайн маҳалла» платформасида тузилган индивидуал дастур;

«маҳалла еттилиги» — маҳалла фуқаролари йигини раиси, ҳоким ёрдамчиси, ёшлар етакчиси, хотин-қизлар фаоли, профилактика инспектори, ижтимоий ходим, солиқ инспекторидан иборат жамоа;

«маҳалла еттилиги» тавсияси — Дастурга киритилган ва уй-жой шароитини яхшилашга муҳтож бўлган шахснинг ижтимоий шарт-шароитини ўрганишдан сўнг унга якка тартибдаги уй-жойни қуриш, реконструкция қилиш, таъмирлаш учун ипотека кредитини ажратиш мақсадга мувофиқлигини ифодаловчи «маҳалла еттилиги» томонидан имзоланадиган ҳужжат;

ипотека кредити — Дастурга киритилган ва уй-жой шароитини яхшилашга муҳтож бўлган шахсларга якка тартибдаги уй-жойни қуриш, реконструкция қилиш ва таъмирлаш учун дастлабки бадални инобатга олган ҳолда 120 миллион сўмгача ажратиладиган ипотека кредити;

тижорат банки — Дастурга киритилган ва уй-жой шароитини яхшилашга муҳтож бўлган шахсларга Ўзбекистон Республикаси Иқтисодиёт ва молия вазирлигининг маблағлари ҳисобидан ипотека кредитларини ажратадиган тижорат банклари;

пудрат ташкилоти — якка тартибдаги уй-жойларни қуриш, реконструкция қилиш ва таъмирлаш ишларини бажарадиган тадбиркорлик субъекти;

қарз олувчи — Дастурга киритилган, уй-жой шароитини яхшилашга муҳтож бўлган, мазкур Низомда белгиланган мезонларга мувофиқ бўлган ҳамда якка тартибдаги уй-жойни қуриш, реконструкция қилиш ва таъмирлаш учун ипотека кредитини олган шахс;

Олдинги таҳрирга қаранг.

уй-жой шароитини яхшилашга муҳтож бўлган шахс — Ижтимоий реестрга киритилган оиланинг уй-жой шароитини яхшилашга муҳтож аъзоси;

(2-банднинг ўнинчи хатбошиси Ўзбекистон Республикаси Вазирлар Маҳкамасининг 2026 йил 29 январдаги 35-сонли қарори таҳририда — Қонунчилик маълумотлари миллий базаси, 02.02.2026 й., 09/26/35/0101-сон)

якка тартибдаги уй-жойни қуриш — қарз олувчининг ўзига ёки у билан биргаликда яшаётган яқин қариндошига тегишли ер участкасида мавжуд якка тартибдаги уй-жойга туташиб кетувчи ва (ёки) алоҳида қўшимча якка тартибдаги уй-жойни қуриш, шунингдек, мавжуд уй-жойни бузиб қайта қуриш;

якка тартибдаги уй-жойни реконструкция қилиш — якка тартибдаги уй-жойнинг асосий техник-иқтисодий кўрсаткичларини (юкламаси, хоналарнинг режалаштирилиши, уй-жойнинг қурилиш ҳажми ва умумий майдони, муҳандислик жиҳатдан жиҳозланиши) ўзгартириш билан боғлиқ қурилиш ишлари ва ташкилий-техник тадбирлар мажмуи;

якка тартибдаги уй-жойни таъмирлаш — якка тартибдаги уй-жойнинг асосий техник-иқтисодий кўрсаткичларини сақлаб қолган ҳолда унинг фойдаланиш кўрсаткичларини яхшилаш ёки қайта тиклаш билан боғлиқ қурилиш ишлари ва ташкилий-техник тадбирлар мажмуи.

2-боб. Қарз олувчиларга нисбатан белгиланган мувофиқлик мезонлари

3. Қарз олувчилар қуйидаги мувофиқлик мезонларига мос бўлиши лозим:

18 ёшга тўлган ва 60 ёшдан ошмаган Ўзбекистон Республикаси фуқароси бўлиши;

кредит бўйича ҳисобланган фоизларни ва асосий қарзни тўлов жадвалига мувофиқ ҳар ойда тўлаш учун етарли ҳамда қонунчилик ҳужжатларида тақиқланмаган даромад манбаига, шу жумладан, шахсий ёрдамчи ёки деҳқон хўжалигидан ёхуд якка тартибдаги тадбиркорлик фаолиятидан даромадга эга бўлиши;

қарз юки кўрсаткичи қарз олувчининг барча кредитлари ва микроқарзлари бўйича ўртача ойлик тўловларининг ушбу қарз олувчининг тасдиқланган ўртача ойлик даромадларининг 60 фоизидан юқори бўлмаслиги;

кредит ажратишни кўриб чиқиш вақтида қарз олувчининг кредит ташкилотларидан аввал олинган кредитлар бўйича муддати ўтган қарздорлиги мавжуд бўлмаслиги;

илгари бозор тамойилларига асосланган ипотека кредитлари орқали аҳолини уй-жой билан таъминлаш дастури доирасида ипотека кредитларидан ва ипотека кредитлари бўйича субсидиялардан фойдаланмаган бўлиши;

реконструкция қилинадиган ва таъмирланадиган якка тартибдаги уй-жой ёки якка тартибдаги уй-жой қуриладиган ер участкаси қарз олувчининг ўзига ёки у билан биргаликда яшовчи яқин қариндошларидан бирига тегишли эканлиги ва қарз олувчи мазкур манзилда камида 6 ой давомида доимий рўйхатда турган бўлиши.

4. Қарз юки кўрсаткичини ҳисоб-китоб қилишда қарз олувчининг ўртача ойлик даромадлари миқдори унинг охирги 12 ой мобайнида (12 ойдан кам ишланган тақдирда ишланган давр учун, бироқ 6 ойдан кам бўлмаган муддат давомида) олган даромадлари миқдорининг ўртача арифметик қийматидан келиб чиқиб аниқланади.

5. Тижорат банки қарз олувчининг ўртача ойлик даромадини аниқлашда унинг розилигига кўра қуйидаги тасдиқловчи ҳужжатлардан фойдаланиш ҳуқуқига эга:

иш ҳақи тўғрисидаги маълумот;

пенсия тўловлари миқдори тўғрисидаги маълумот;

жамғариб бориладиган пенсия бадаллари тўғрисидаги маълумот;

фоизлар, дивидендлар, мол-мулкни ижарага беришдан олинган доимий тарздаги даромадларини тасдиқловчи маълумотлар;

ўзини ўзи банд қилиш натижасида олинган даромадлар;

мавжуд шароитдан келиб чиқиб, анкета сўровномаси асосида аниқлаштирилган даромадлар;

қонунчилик ҳужжатларида тақиқланмаган бошқа даромадларни тасдиқловчи маълумотлар.

6. Тижорат банки қарз олувчининг тўлов қобилиятини аниқлашда муқобил усуллардан, шу жумладан, қарз олувчининг банк картаси айланмаси, унинг коммунал харажатлари ҳамда белгиланган талаблардан юқори миқдордаги ихтиёрий тарзда тўланган дастлабки бадал маблағлари тўғрисидаги маълумотлардан фойдаланиши мумкин.

3-боб. Ипотека кредитини расмийлаштириш ва ажратиш тартиби

7. Ипотека кредити ушбу Низомга иловада келтирилган схемага мувофиқ ажратилади.

8. Ипотека кредитининг таъминоти сифатида қарз олувчи ёки у билан биргаликда яшовчи яқин қариндошларининг мулкий эгалигида бўлган:

реконструкция қилинадиган ёки таъмирланадиган якка тартибдаги уй-жойнинг ўзи;

янги қуриладиган якка тартибдаги уй-жойларда қурилиш битгунга қадар учинчи шахс кафиллиги ва (ёки) бошқа таъминот тақдим этилади.

Бунда ушбу таъминотни нотариал расмийлаштириш учун давлат божи ундирилмайди.

9. Якка тартибдаги уй-жойни қуриш, реконструкция қилиш ва таъмирлаш ишлари қарз олувчининг ўз кучи билан ёхуд ёлланма ишчилар ёки пудрат ташкилотларини жалб қилиш орқали амалга оширилади.

10. Ипотека кредити тижорат банклари томонидан 20 йилгача муддатга Ўзбекистон Республикаси Марказий банкининг асосий ставкасидан 4 фоиз бандга юқори ставкада дастлабки бадални инобатга олган ҳолда 120 миллион сўмдан ошмаган миқдорда Иқтисодиёт ва молия вазирлигининг маблағлари ҳисобидан ажратилади.

11. Ипотека кредити бўйича дастлабки бадални қоплаш учун ажратиладиган кредитнинг 15 фоизи миқдорида ҳамда фоиз тўловларининг бир қисмини қоплаш учун кредит муддатининг биринчи беш йили давомида 12 фоиздан ошган қисмига субсидия тўланади.

12. «Маҳалла еттилиги» доимий равишда ўтказиладиган хатлов ва ўрганишлар натижаларига кўра уй-жой шароитини яхшилашга муҳтож бўлган шахсларни аниқлаб боради, уларни Дастурга киритиш ва ипотека кредитини олиш бўйича тавсия бериш чораларини кўради.

13. Уй-жой шароитини яхшилашга муҳтож бўлган шахслар уларни Дастурга киритиш ҳамда якка тартибдаги уй-жойни қуриш, реконструкция қилиш ва таъмирлаш мақсадлари учун ипотека кредитини ажратиш бўйича тавсия олиш учун бевосита «маҳалла еттилиги»га мурожаат қилишга ҳақли.

Бунда ушбу шахсларнинг мурожаати «маҳалла еттилиги» томонидан икки иш куни ичида кўриб чиқилиши ва ўрганиш натижаларига кўра, улар Дастурга киритилиши ва тавсия берилиши ёки уларга Дастурга киритиш ва тавсия беришни рад этиш сабаби кўрсатилган ёзма хулоса тақдим этилиши лозим.

14. Қуйидагилар «маҳалла еттилиги» томонидан тавсия беришни рад қилишга асос бўлади:

ариза берувчининг оиласи Дастурга киритилмаган бўлса;

ариза берувчи уй-жой шароитини яхшилашга муҳтож ҳисобланмаса;

ариза берувчи шахс ёки унинг турмуш ўртоғи мазкур имтиёздан аввал фойдаланган бўлса;

ариза берувчи шахс давлат томонидан аввал берилган ижтимоий ёрдам ва кўмаклардан мақсадсиз фойдаланганлиги тўғрисида тегишли ташкилотларнинг маълумотлари мавжуд бўлса;

қурилиши, реконструкция қилиниши ва таъмирланиши назарда тутилаётган уй-жой ёки у жойлашган ер участкасига нисбатан ашёвий ҳуқуқ низоли бўлса.

15. Дастурга киритилган ва уй-жой шароитини яхшилашга муҳтож бўлган шахслар ипотека кредити олиш учун тегишли ҳужжатларни (қурилиш материаллари ва қурилиш-монтаж ишлари ҳисоб-китоби) илова қилган ҳолда, ариза билан тижорат банкига мурожаат қилади.

16. Тижорат банкининг масъул ходими ариза берувчига ипотека кредитининг асосий йўналишлари бўйича изоҳ беради, талаб этиладиган барча ҳужжатлар рўйхати ва тахминий харажатлар турлари билан таништиради.

17. Тижорат банки бир иш кунида онлайн скорингни амалга ошириш мақсадида ариза берувчига тегишли қуйидаги маълумотларни «Рақамли ҳукумат» тизимининг рақамли маълумотлар платформаси ва/ёки бошқа расмий манбалар орқали текширади:

ариза берувчи Дастурга киритилганлигини;

ариза берувчи даромад манбаига эга эканлигини;

ариза берувчининг кредит тарихини;

реконструкция қилинадиган ва таъмирланадиган якка тартибдаги уй-жой ёки якка тартибдаги уй-жой қуриладиган ер участкаси ариза берувчининг ўзига ёки у билан биргаликда яшовчи яқин қариндошларидан бирига тегишли эканлигини ва ариза берувчи мазкур манзил бўйича камида 6 ой давомида доимий рўйхатда турган бўлишини.

18. Тегишли ҳужжатлар тўлиқ тақдим қилинганидан сўнг тижорат банки уч иш куни ичида ариза берувчига кредит бериш масаласини кўриб чиқади ҳамда аризани қаноатлантириш ёки рад этиш тўғрисида қарор қабул қилади.

19. Ипотека кредити беришни рад этиш тўғрисида қарор қабул қилинган тақдирда, бир иш куни ичида қарз олувчига ипотека кредити беришни рад этишнинг сабаблари аниқ ва тушунарли кўрсатилган ҳолда ёзма хулоса юборилади.

Бунда қуйидагилар ипотека кредитини беришни рад қилишга асос бўлади:

қарз олувчи ва биргаликда қарз олувчиларнинг умумий даромади ипотека кредити бўйича бир ойлик тўловларни амалга ошириш учун етарли бўлмаганда;

ариза берувчининг бошқа кредитлари бўйича тўлов муддати кечиккан қарздорликлари мавжуд бўлганда;

ариза берувчи томонидан нотўғри маълумотлар тақдим этилганда.

20. «Маҳалла еттилиги» ариза берувчига тижорат банкининг ипотека кредити беришни рад этиш хулосасидаги камчиликларни бартараф этишга кўмаклашади.

Ариза берувчи тижорат банки хулосасида кўрсатилган камчиликлар бартараф этилгандан сўнг кредит бериш тўғрисидаги ариза билан тижорат банкига қайта мурожаат қилишга ҳақли.

21. Кредит бериш тўғрисида ижобий қарор қабул қилинган тақдирда, тижорат банки бир иш кунида бу ҳақида ариза берувчини ёзма равишда ёки телефон рақамига SMS хабар юбориш орқали хабардор қилади.

Бунда тижорат банки томонидан ариза берувчига танишиб чиқиш ва ўзи билан олиб кетиши мумкин бўлган кредит шартномаси ва кредитни қайтариш жадвали лойиҳаси тақдим этилади ҳамда тижорат банки ва ариза берувчи ўртасида икки иш кунида кредит шартномаси имзоланади.

22. Тижорат банки кредит шартномаси имзоланганидан сўнг икки иш кунида Ўзбекистон Республикаси Иқтисодиёт ва молия вазирлигининг «subsidyplatform.mf.uz» платформаси орқали якка тартибда қуриладиган, реконструкция қилинадиган ва таъмирланадиган уй-жойнинг кадастр ҳужжатларини илова қилган ҳолда, ипотека кредитининг дастлабки бадалини ҳамда фоиз тўловларининг бир қисмини қоплаш учун субсидия маблағларини тўлашга буюртманома юборади.

Ўзбекистон Республикаси Иқтисодиёт ва молия вазирлиги буюртманома асосида ипотека кредитининг дастлабки бадали учун субсидияни беш иш кунида тижорат банкига ўтказиб беради.

Ипотека кредитлари бўйича фоиз харажатларининг бир қисмини қоплаш учун субсидия буюртманома тақдим этилган ойдан бошлаб Ўзбекистон Республикаси Иқтисодиёт ва молия вазирлиги томонидан ҳар ойнинг 25-санасига қадар тижорат банкининг Бош офисига фуқаролар кесимида ўтказиб берилади.

23. Кредит суммаси Якка тартибдаги уй-жойни қуриш, реконструкция қилиш ва таъмирлаш ишлари қарз олувчининг ўз кучи билан ёки ёлланма ишчилар жалб этилган ҳолда бажарилганда кредит суммаси бажарилган ишлар ҳажмига мутаносиб равишда босқичма-босқич қарз олувчининг банк пластик картасига, пудрат ташкилоти жалб этилган ҳолларда эса, пудрат ташкилотининг ҳисобварағига ўтказиб берилади.

Бунда якка тартибдаги уй-жойни қуриш, реконструкция қилиш ва таъмирлаш ишларини бошлаш учун тижорат банки томонидан умумий қарз суммасининг 30 фоиздан ортиқ бўлмаган қисми дастлабки тўлов сифатида ўтказилади.

Кейинги босқич тўловлари тижорат банки ходими ва ҳоким ёрдамчиси томонидан бажарилган ишларни жойига чиққан ҳолда ўрганиш натижаси бўйича тузилган хулосасига асосан ажратилади.

24. Қарз олувчи ажратилган ипотека кредитини ва унга ҳисобланган фоиз тўловларини ипотека кредитини қайтариш жадвалига асосан тўлаб боради.

25. Тижорат банклари ажратилган кредитларнинг мақсадли ишлатилиши мониторинг қилишда улардан бошқа мақсадда фойдаланилган ҳолатларни аниқлаган тақдирда, кредитнинг қолган қисмини тўлашни тўхтатиш ҳамда белгиланган тартибда субсидия ва кредитларни муддатидан олдин ундириш чораларини кўради.

Бунда қарз олувчига дастлабки бадал ва фоиз учун ажратилган субсидия белгиланган тартибда Ўзбекистон Республикаси республика бюджетига ушбу тижорат банклари томондан тўлиқ миқдорда қайтарилади.

4-боб. Қарз олувчиларнинг ҳуқуқлари ва қонуний манфаатларини таъминлаш

26. Ариза берувчи кредит олиш учун тижорат банкига мурожаат қилганда, банк кредитнинг асосий шартлари тўғрисидаги ахборот варақасини бепул тақдим этади.

27. Тижорат банки ариза берувчига кредит бўйича тўланиши лозим бўлган ойлик тўловлар миқдори ҳамда ариза берувчининг даромадларини таҳлил қилган ҳолда ушбу тўловларни тўлаш учун унинг имконияти етиши (ёки етмаслиги) ҳақида тушунтириш беради.

28. Тижорат банки ипотека кредити шартномасини имзолашдан олдин ариза берувчига ушбу шартнома ҳамда ипотека кредитини қайтариш жадвали лойиҳаларини танишиб чиқиш учун ўзи билан олиб кетиш ҳуқуқига эга эканлиги тўғрисида хабардор қилиши лозим.

29. Банк қарз олувчига кредит шартномаси имзоланган кунда шартноманинг битта асл нусхасини кредитни қайтариш жадвалини илова қилган ҳолда тақдим этиши керак.

30. Банк кредит ажратишда банк хизматлари истеъмолчилари билан ўзаро муносабатларни амалга оширишда банклар фаолиятига қўйиладиган минимал талаблар тўғрисидаги қонунчилик ҳужжатлари талабларига мувофиқ қарз олувчиларнинг ҳуқуқлари ва қонуний манфаатларини таъминлаши шарт.

31. Мазкур Низом асосида якка тартибдаги уй-жойни қуриш, реконструкция қилиш ва таъмирлаш учун ипотека кредитларини ажратишда қарз олувчига ипотека предметини суғурта хавфларидан ва кредитнинг қайтмаслик хатаридан суғурта қилиш талаби қўлланилмайди.

5-боб. Якунловчи қоидалар

32. Ариза берувчи (қарз олувчи) давлат органлари ва ташкилотлари, тижорат банклари хатти-ҳаракатлари юзасидан қонунчилик ҳужжатларида белгиланган тартибда юқори турувчи ташкилотга ёки судга шикоят қилиши мумкин.

LexUZ шарҳи

Қаранг: Ўзбекистон Республикасининг «Жисмоний ва юридик шахсларнинг мурожаатлари тўғрисида»ги ва «Судлар тўғрисида»ги қонунлари.

33. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

LexUZ шарҳи

Қаранг: Ўзбекистон Республикаси Маъмурий жавобгарлик тўғрисидаги кодексининг XIII боби.

Камбағалликни қисқартириш дастурига киритилган ва уй жой шароитини яхшилашга муҳтож бўлган шахсларга ипотека кредитини ажратиш

СХЕМАСИ

Босқичлар	Субъектлар	Чора-тадбирлар	Муддатлар
Босқичлар	Субъектлар	Чора-тадбирлар	Муддатлар

1-босқич	«Маҳалла еттилиги»	1. Фуқаро Дастурга кириш учун тавсия сўраб мурожаат қилганда ўрганиш ўтказади. 2. Ўрганиш натижаларига кўра фуқарони Дастурга киритади ёки рад этиш сабабини кўрсатган ҳолда ёзма хулоса беради.	Доимий
1-босқич	«Маҳалла еттилиги»	3. Ўрганиш натижаларига кўра, уй-жой шароитини яхшилашга муҳтож камбағал оилаларни «Онлайн маҳалла» платформасининг Камбағалликни қисқартириш дастурига киритиб боради.	Икки иш кунида

2-босқич	Ариза берувчи	Ипотека кредитини олиш учун ариза ва тегишли ҳужжатларни банкка тақдим этади.	Ўз ихтиёрига кўра белгиланган муддатларда

3-босқич	Тижорат банки	1. Ариза билан тақдим этилган ҳужжатларни тегишли «Рақамли ҳукумат» тизимининг рақамли маълумотлар платформаси ва/ёки бошқа расмий манбалар орқали текширади: 2. Кредит олиш бўйича тақдим этилган ариза ва унга илова қилинган ҳужжатларни кўриб чиқиб, аризани қаноатлантириш ёки рад этиш тўғрисида қарор қабул қилади. 3. Ариза берувчига рад этиш ёки кредит ажратиш тўғрисида хабарни юборади.	Уч иш кунида

4-босқич	Тижорат банки	1. Ариза берувчи билан ипотека кредити ажратиш тўғрисида шартнома имзолайди, кредит таъминоти ҳужжатларини расмийлаштиради.	Ариза берувчининг ўз ихтиёрига кўра
4-босқич	Тижорат банки	2. Ўзбекистон Республикаси Иқтисодиёт ва молия вазирлигига субсидия олиш бўйича буюртманома юборади.	Икки иш кунида

5-босқич	Иқтисодиёт ва молия вазирлиги	1. Буюртманома асосида ипотека кредитининг бошланғич бадали учун субсидияни тижорат банкига ўтказиб беради.	Беш иш кунида
5-босқич	Иқтисодиёт ва молия вазирлиги	2. Ипотека кредитлари бўйича фоиз харажатларининг бир қисмини қоплаш учун субсидияни буюртманомалар асосида тижорат банкига фуқаролар кесимида ўтказиб беради.	Ҳар ойнинг 25-санасига қадар

6-босқич	Тижорат банки	Шартномага асосан ажратилган кредит суммаси ҳамда субсидияни қарз олувчининг банк пластик картасига, пудрат ташкилоти жалб этилган ҳолларда пудрат ташкилотининг ҳисобварағига ўтказиб беради.	Бажарилган ишлар ҳажмига мутаносиб равишда босқичма-босқич

7-босқич	Пудрат ташкилоти ёки ёлланма ишчи ёхуд қарз олувчи фуқаро	Якка тартибдаги уй-жойни қуриш, реконструкция қилиш ва таъмирлаш ишларини амалга оширади.	Шартномада белгиланган муддатларда

8-босқич	Тижорат банки ва хоким ёрдамчиси	Ажратилган маблағларнинг мақсадли ишлатилишини назоратга олади ва қурилиш, реконструкция қилиш ва таъмирлаш ишларни мониторинг қилиб боради.	Қуриш, реконструкция қилиш ва таъмирлаш ишлари якунига қадар

9-босқич	Қарз олувчи	Кредит шартномасини қайтариш жадвалига асосан кредит ва унга ҳисобланган фоиз тўловларини тўлаб боради.	Шартномада белгиланган муддатларда

(Қонунчилик маълумотлари миллий базаси, 24.10.2024 й., 09/24/691/0848-сон; 02.02.2026 й., 09/26/35/0101-сон)