|
Ҳужжат кучини йўқотган 08.05.2025
|
Ўзбекистон Республикаси Вазирлар Маҳкамасининг
қарори
Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш чора-тадбирлари тўғрисида
LexUZ шарҳиМазкур қарор Ўзбекистан Республикаси Вазирлар Маҳкамасининг 2025 йил 5 майдаги 294-сонли «Етим ва ота-она қарамоғидан маҳрум бўлган болаларни ҳар томонлама қўллаб-қувватлаш ҳамда уларга ижтимоий ёрдам кўрсатиш билан боғлиқ харажатларни молиялаштиришга доир қўшимча чора-тадбирлар тўғрисида»ги қарорига асосан ўз кучини йўқотган.
Ўзбекистон Республикаси Президентининг «Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш чора-тадбирлари тўғрисида» 2021 йил 9 августдаги ПҚ-5215-сон қарорига мувофиқ етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга кўмаклашиш мақсадида Вазирлар Маҳкамаси қарор қилади:
1. Қуйидагиларни назарда тутувчи «Меҳр дафтари» тизими жорий этилсин:
а) Ўзбекистон Республикаси Халқ таълими вазирлиги тизимидаги Меҳрибонлик уйлари, Болалар шаҳарчалари, Республика болалар ўқув-тарбия муассасалари, Оилавий болалар уйлари, Ўзбекистон Республикаси Соғлиқни сақлаш вазирлиги тизимидаги Болалар уйлари ва «SOS — Ўзбекистон болалар маҳаллалари» уюшмаси бўлинмаларидаги (кейинги ўринларда — ўқув-тарбия муассасалари) тарбияланувчиларнинг муаммоларини ўрганиш ҳамда ҳал этиш, уларнинг орзу-истакларини амалга оширишга кўмаклашиш, шу жумладан:
болаларнинг ота-онаси ёки бошқа қонуний вакилларининг қарамоғидан маҳрум бўлиш сабабларини ҳар томонлама ўрганиш ҳамда аниқланган муаммоларни бартараф этиш ва уларнинг олдини олиш;
етим болалар ва ота-она қарамоғидан маҳрум бўлган болаларни фарзандликка, васийликка (ҳомийликка, патронатга) олган оилаларни рағбатлантириш;
б) ушбу банднинг «а» кичик бандида назарда тутилган чора-тадбирларни ўз вақтида ва самарали амалга ошириш учун етим болалар ва ота-она қарамоғидан маҳрум бўлган болаларнинг «Меҳр дафтари»ни шакллантириш ва юритиш.
2. Қуйидагиларни назарда тутувчи Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш тартиби тўғрисидаги низом 1-иловага мувофиқ тасдиқлансин:
«Меҳр дафтари»га киритиладиган етим болалар ва ота-она қарамоғидан маҳрум бўлган болалар тоифаси;
«Меҳр дафтари»ни шакллантириш ва амалга ошириш;
етим болалар ва ота-она қарамоғидан маҳрум бўлган болаларни туман (шаҳар) ҳокими қарори асосида «Меҳр дафтари»дан чиқариш ва унга ўзгартириш киритиш тартиби;
«Меҳр дафтари» тизимида амалга оширилган ишлар юзасидан ҳисобот юритиш тартиби.
3. Ўзбекистон Республикаси Президентининг «Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш чора-тадбирлари тўғрисида» 2021 йил 9 августдаги ПҚ-5215-сон қарорининг 10-бандига мувофиқ:
«Меҳр дафтари» тизими доирасида амалга ошириладиган чора-тадбирларни молиялаштириш учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаларини ташкил этиш белгиланганлиги;
«Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармасининг маблағларини ҳомийлик маблағлари, 2022 йил 1 январдан бошлаб алкоголь маҳсулотларининг (пиво ва табиий вино бундан мустасно) улгуржи савдоси билан шуғулланувчи корхоналар соф тушумининг уч фоизи миқдоридаги ажратмалар, шунингдек, қонунчиликда тақиқланмаган бошқа манбалар ҳисобидан шакллантириш белгиланганлиги маълумот учун қабул қилинсин.
4. Қуйидагиларни назарда тутувчи «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаси тўғрисидаги низом 2-иловага мувофиқ тасдиқлансин:
«Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаси (кейинги ўринларда — «Меҳр дафтари» жамғармаси) маблағларини шакллантириш ва уларни ундириш тартиби;
«Меҳр дафтари» жамғармаси маблағларидан фойдаланишнинг асосий йўналишлари;
«Меҳр дафтари» жамғармаси маблағларини сарфлаш ва бошқариш;
«Меҳр дафтари» жамғармаси васийлик кенгашининг намунавий таркиби ва ушбу кенгашнинг иш юритиш тартибини белгилаш;
«Меҳр дафтари» жамғармаси ҳисоботини юритиш.
5. Миллий гвардия Халқ таълими вазирлиги ҳамда Ахборот технологиялари ва коммуникацияларини ривожлантириш вазирлиги билан биргаликда:
2022 йил 1 февралга қадар етим болалар ва ота-она қарамоғидан маҳрум бўлган болаларни «Меҳр дафтари»га киритишнинг ахборот тизимини амалиётга жорий этсин;
2022 йил 1 февралдан бошлаб «Меҳр дафтари»га киритилган етим болалар ва ота-она қарамоғидан маҳрум бўлган болаларга оид маълумотларни «Электрон ҳукумат» тизими идоралараро интеграциялашув платформаси орқали аниқлашни йўлга қўйсин.
6. Халқ таълими вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
7. Мазкур қарорнинг бажарилишини назорат қилиш халқ таълими вазири Б.О. Саидов ва Миллий гвардия қўмондони Р.М. Джураев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 17 январь,
26-сон
Вазирлар Маҳкамасининг 2022 йил 17 январдаги 26-сон қарорига
1-ИЛОВА
1-ИЛОВА
Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш тартиби тўғрисида
НИЗОМ
1-боб. Умумий қоидалар
1. Мазкур Низом етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш тартибини белгилайди.
2. Ушбу Низомда қуйидаги асосий тушунчалар қўлланилади:
«Меҳр дафтари» тизими — етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга ҳамда жамиятга ижтимоийлашувига кўмаклашиш, уларни васийликка (ҳомийликка, патронатга) олган оилаларни рағбатлантириш, шунингдек болаларнинг ота-онаси ёки бошқа қонуний вакилларининг қарамоғидан маҳрум бўлиш сабабларини ҳар томонлама ўрганиш ҳамда аниқланган муаммоларни бартараф этиш ва уларнинг олдини олиш бўйича комплекс чора-тадбирларни ўз ичига олган тизим;
«Меҳр дафтари» — етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга кўмаклашиш мақсадида улар ҳақидаги маълумотларни киритиш, идоралараро маълумотлар алмашишни ташкил этиш ҳамда «Меҳр дафтари» тизими бўйича амалга ошириладиган чора-тадбирларнинг самарадорлигини мониторинг қилиш имконини берувчи электрон платформа;
«Меҳр дафтари» жамғармаси — Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида ташкил этиладиган «Меҳр дафтари» тизимига киритилган шахсларни қўллаб-қувватлаш жамғармаси;
ўқув-тарбия муассасалари — Ўзбекистон Республикаси Халқ таълими вазирлиги тизимидаги Меҳрибонлик уйлари, Болалар шаҳарчалари, Республика болалар ўқув-тарбия муассасалари, Оилавий болалар уйлари, Ўзбекистон Республикаси Соғлиқни сақлаш вазирлиги тизимидаги Болалар уйлари, «SOS — Ўзбекистон болалар маҳаллалари» уюшмаси бўлинмалари (болаларни муқобил парвариш қилиш хизматлари, ёшларга ҳамроҳлик қилиш хизматлари ва ижтимоий етимликнинг олдини олиш хизматлари).
3. «Меҳр дафтари» тизимига киритилган етим болалар ва ота-она қарамоғидан маҳрум бўлган болаларни ижтимоий қўллаб-қувватлаш бўйича чора-тадбирлар мазкур Низом ва бошқа қонунчилик ҳужжатларида белгиланган тартибда амалга оширилади.
LexUZ шарҳиҚаранг: Вазирлар Маҳкамасининг 2021 йил 25 октябрдаги 656-сон қарори билан тасдиқланган Етим болалар ва ота-она қарамоғидан маҳрум бўлган болаларни уй-жой билан таъминлаш тартиби тўғрисидаги низом.
4. Етим болалар ва ота-она қарамоғидан маҳрум бўлган болалар туман (шаҳар) ҳокими қарори асосида «Меҳр дафтари»га киритилади ва ундан чиқарилади.
Етим болалар ва ота-она қарамоғидан маҳрум бўлган болаларни «Меҳр дафтари»га киритишнинг ахборот тизимидан (кейинги ўринларда — «Меҳр дафтари» ахборот тизими) фойдаланиш ва маълумотларни киритиш тартиби Миллий гвардия томонидан белгиланади.
2-боб. «Меҳр дафтари»ни шакллантириш ва амалга ошириш
5. Ўқув-тарбия муассасалари ҳамда туман (шаҳар) ҳокимликларининг Болаларни ҳимоя қилиш шуъбалари «Меҳр дафтари»ни шакллантиришга масъул ҳисобланади.
6. Туман (шаҳар) ҳокими қарори ва иловадаги схемага мувофиқ қуйидагилар «Меҳр дафтари»га маълумотларнинг бевосита киритилишини таъминлайди:
а) Халқ таълими вазирлиги томонидан унинг тизимидаги Меҳрибонлик уйлари, Болалар шаҳарчалари, Республика болалар ўқув-тарбия муассасалари ва Оилавий болалар уйлари;
Соғлиқни сақлаш вазирлиги томонидан унинг тизимидаги Болалар уйлари;
«SOS — Ўзбекистон болалар маҳаллалари» уюшмаси томонидан унинг тизимидаги болаларни муқобил парвариш қилиш хизматлари, ёшларга ҳамроҳлик қилиш хизматлари ва ижтимоий етимликнинг олдини олиш хизматлари тарбияланувчилари ва битирувчилари тўғрисидаги;
б) туман (шаҳар) ҳокимликларининг Болаларни ҳимоя қилиш шуъбалари томонидан васийликка (ҳомийликка, патронатга) олинган етим болалар ва ота-она қарамоғидан маҳрум бўлган болалар тўғрисидаги.
7. «Меҳр дафтари»га киритилган етим болалар ва ота-она қарамоғидан маҳрум бўлган болаларнинг муаммо (эҳтиёж, қизиқиш)лари қуйидаги тартибда ўрганилади:
ўқув-тарбия муассасаларида:
тарбияланувчиларнинг бевосита мурожаатлари ва улар орасида ўтказиладиган сўровномалар орқали;
ўқув-тарбия муассасалари битирувчиларининг ёки уларнинг манфаатларини ҳимоя қилувчи шахс (ташкилот)лар мурожаатлари орқали;
туман (шаҳар) ҳокимликларининг болаларни ҳимоя қилиш шуъбаларида:
васийликка (ҳомийликка, патронатга) олинган етим болалар ва ота-она қарамоғидан маҳрум бўлган болаларнинг мурожаатлари орқали;
васийликка (ҳомийликка, патронатга) олинган етим болалар ва ота-она қарамоғидан маҳрум бўлган болаларнинг ота-оналари, қонуний вакиллари ёки уларнинг манфаатларини ҳимоя қилувчи шахс (ташкилот)лар мурожаатлари орқали.
8. Мурожаатлар ва сўровномалар натижаси юзасидан ўқув-тарбия муассасалари ҳамда туман (шаҳар) ҳокимликларининг Болаларни ҳимоя қилиш шуъбалари 15 иш куни муддатда «Йўл харитаси» лойиҳасини тайёрлайди.
9. «Йўл харитаси» лойиҳасида етим болалар ва ота-она қарамоғидан маҳрум бўлган болаларнинг муаммо (эҳтиёж, қизиқиш)ларини ҳал этишга қаратилган аниқ чора-тадбирлар, ижро этиш муддати ҳамда уларни бажарувчи масъул ташкилотлар ва сарфланадиган харажатларнинг миқдори кўрсатиб ўтилади.
10. Ҳудудий ўқув-тарбия муассасалари томонидан тақдим этилган «Йўл хариталари» лойиҳалари тегишли туман (шаҳар) ҳокимликларининг Болаларни ҳимоя қилиш шуъбалари томонидан умумлаштирилади.
11. «Йўл харитаси» лойиҳаси 3 иш кунида туман (шаҳар) ҳокимликлари томонидан тасдиқланади ва Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларидаги «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармалари васийлик кенгашларига (кейинги ўринларда — Васийлик кенгаши) тақдим этилади.
12. Васийлик кенгаши томонидан 3 иш кунида етим болалар ва ота-она қарамоғидан маҳрум бўлган болаларнинг муаммо (эҳтиёж, қизиқиш)ларини ҳал этишга қаратилган чора-тадбирларни амалга ошириш учун «Меҳр дафтари» жамғармаси маблағлари ҳисобидан ёрдам кўрсатилиши тўғрисида қарор қабул қилинади.
13. Васийлик кенгаши қарорининг нусхаси шу куннинг ўзида тегишли туман (шаҳар) ҳокимликларига ижро учун юборилади.
«Меҳр дафтари» жамғармасида етарлича маблағ мавжуд бўлмаган тақдирида, «Йўл хариталари» келиб тушган санасига асосан маблағ йиғилгунга қадар «Меҳр дафтар» платформасида «онлайн-навбат»га қўйилади. Бунда Васийлик кенгаши маблағ етишмаслиги ҳақида туман (шаҳар) ҳокимликларининг Болаларни ҳимоя қилиш шуъбаларига хабар беради ва «Йўл хариталари»нинг навбат рақамлари рўйхатини тақдим этади. Болаларни ҳимоя қилиш шуъбалари мурожаат қилган шахсларни ёзма равишда маблағ етишмаслиги ҳамда уларга тегишли «Йўл харитаси»нинг навбат рақами ҳақида хабардор қилади.
14. «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш ишлари қуйидагилар томонидан мувофиқлаштирилади:
туман (шаҳар) ҳокимлигининг Болаларни ҳимоя қилиш шуъбаси томонидан манфаатдор давлат органлари ва ташкилотлар билан биргаликда;
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Болаларни ҳимоя қилиш масалалари котибиятлари томонидан манфаатдор давлат органлари ва ташкилотлари билан биргаликда;
Вазирлар Маҳкамасининг Болаларни ҳимоя қилиш масалалари шуъбаси ва Миллий гвардия томонидан манфаатдор вазирлик ва идоралар билан биргаликда.
15. Халқ таълими вазирлиги, Соғлиқни сақлаш вазирлиги, Миллий гвардия, Ёшлар ишлари агентлиги, Бандлик ва меҳнат муносабатлари вазирлиги ҳамда Маҳалла ва нуронийларни қўллаб-қувватлаш вазирлигининг ҳудудий бўлинмалари — «Меҳр дафтари» тизими доирасидаги чора-тадбирларни амалга оширувчи манфаатдор давлат органлари ҳисобланади.
(15-банднинг биринчи хатбошиси Ўзбекистон Республикаси Вазирлар Маҳкамасининг 2022 йил 9 августдаги 438-сонли қарори таҳририда — Қонунчилик маълумотлари миллий базаси, 10.08.2022 й., 09/22/438/0726-сон)
«Меҳр дафтари» ахборот тизимига маълумотларнинг ўз вақтида киритилиши ва ҳаққонийлиги Миллий гвардиянинг ҳудудий бўлинмалари томонидан назорат қилинади.
3-боб. «Меҳр дафтари»дан чиқариш ва унга ўзгартириш киритиш
16. Етим болалар ва ота-она қарамоғидан маҳрум бўлган болалар 25 ёшга тўлганда тегишли туман (шаҳар) ҳокимлигининг Болаларни ҳимоя қилиш шуъбаси томонидан туман (шаҳар) ҳокимининг қарори ва иловадаги схемага мувофиқ «Меҳр дафтари»дан чиқарилади.
Бунда:
«Меҳр дафтари»дан чиқарилаётган шахсларнинг бандлиги таъминланган ва уй-жойи мавжуд бўлиши шарт. «Меҳр дафтари»дан чиқарилаётган шахсларнинг бандлиги таъминланмаган ҳолатларда, уларнинг бандлигини таъминлаш учун «Йўл харитаси» тузилади ҳамда «Меҳр дафтари» ҳисобида туриш муддати бандлиги таъминлангунга қадар, бироқ 5 йилдан ортиқ бўлмаган муддатга узайтирилади;
«Меҳр дафтари»дан чиқарилаётган шахсларнинг ўзларига бириктирилган турар жойга эга бўлмаганлиги ва турар жойга муҳтожлиги аниқланган ҳолатларда, белгиланган тартибга асосан уларни уй-жой билан таъминлаш чоралари кўрилади ва «Меҳр дафтари» ҳисобида туриш муддати уй-жой билан таъминлангунга қадар, бироқ 5 йилдан ортиқ бўлмаган муддатга узайтирилади;
LexUZ шарҳиҚаранг: Вазирлар Маҳкамасининг 2021 йил 25 октябрдаги 656-сон қарори билан тасдиқланган Етим болалар ва ота-она қарамоғидан маҳрум бўлган болаларни уй-жой билан таъминлаш тартиби тўғрисидаги низомнинг 4-боби.
«Меҳр дафтари» ахборот тизимига киритиладиган тегишли ўзгартиришлар туман (шаҳар) ҳокимлигининг Болаларни ҳимоя қилиш шуъбаси томонидан бевосита амалга оширилади.
17. Туман (шаҳар) ҳокимлигининг Болаларни ҳимоя қилиш шуъбасининг ҳудуддаги ўқув-тарбия муассасалари, манфаатдор давлат органлари ҳамда ташкилотлар билан ҳамкорликдаги хулосасига мувофиқ етим болалар ва ота-она қарамоғидан маҳрум бўлган болаларнинг «Меҳр дафтари»да бўлиш муддати 5 йилгача узайтирилиши мумкин.
18. Етим болалар ва ота-она қарамоғидан маҳрум бўлган болалар бошқа ўқув-тарбия муассасасига ёки доимий (вақтинча) яшаш учун республиканинг бошқа ҳудудига кўчиб ўтганда, тегишли ўқув-тарбия муассасалари ва туман (шаҳар) ҳокимлигининг Болаларни ҳимоя қилиш шуъбаси томонидан улар доимий ва вақтинча яшаш жойи бўйича рўйхатга олинган кунидан бошлаб, ўн беш кун муддатда «Меҳр дафтари»га тегишли ўзгартиришлар киритилади.
19. Етим болалар ва ота-она қарамоғидан маҳрум бўлган болаларга нисбатан суднинг озодликдан маҳрум этишни назарда тутувчи ҳукми чиқарилганда, уларни «Меҳр дафтари» тизими бўйича қўллаб-қувватлаш масаласи тўхтатиб турилади.
Бунда суд ҳукми қонуний кучга киргандан сўнг тегишли туман (шаҳар) ҳокимлигининг Болаларни ҳимоя қилиш шуъбаси томонидан «Меҳр дафтари»га ўзгартириш киритилади.
20. «Меҳр дафтари»га киритилган етим болалар ва ота-она қарамоғидан маҳрум бўлган болалар уларга иш берувчилар томонидан жисмоний шахслардан олинадиган даромад солиғи ёки ижтимоий солиқ тўлови кетма-кет 12 ой давомида ҳисобланганда ҳамда ушбу маълумотлар Ўзбекистон Республикаси Давлат солиқ қўмитасининг марказлаштирилган ахборот базасида акс эттирилган тақдирда, иш билан бандлиги таъминланган деб ҳисобланади.
4-боб. «Меҳр дафтари» тизимида ҳисобот
21. Ўқув-тарбия муассасалари ҳамда туман (шаҳар) ҳокимлигининг Болаларни ҳимоя қилиш шуъбаси «Меҳр дафтари»даги етим болалар ва ота-она қарамоғидан маҳрум бўлган болалар тўғрисидаги маълумотларнинг тўлиқ акс эттириб борилишини таъминлайди ҳамда уларнинг ҳаққонийлиги учун шахсан жавобгар ҳисобланади.
Барча маълумот ва ҳисоботлар «Меҳр дафтари» ахборот тизимида шакллантирилади.
22. «Меҳр дафтари» тизимида амалга оширилган ишлар юзасидан қуйидаги тартибда ҳисобот берилади:
ҳар чорак якунига кўра, «Меҳр дафтари» тизими бўйича туман (шаҳар) ҳокимлигининг Болаларни ҳимоя қилиш шуъбаси ўқув-тарбия муассасалари ҳамда ҳудудий давлат органлари ва ташкилотлар раҳбарлари билан биргаликда амалга оширилаётган ишлар тўғрисидаги ҳисоботлари халқ депутатлари туман (шаҳар) Кенгашларида эшитиб борилади;
ҳар ярим йил якунига кўра, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳузурида Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Болаларни ҳимоя қилиш масалалари котибияти, ҳудуддаги туман (шаҳар) ҳокимликларининг Болаларни ҳимоя қилиш шуъбалари ҳамда манфаатдор давлат органлари ва ташкилотлар билан биргаликда «Меҳр дафтари» тизими бўйича амалга оширилаётган ишлар муҳокама қилинади ҳамда республика даражасида ҳал этилиши лозим бўлган масалалар ҳудудлар кесимида Вазирлар Маҳкамасининг Болаларни ҳимоя қилиш масалалари шуъбасига киритиб борилади;
йил якунига кўра, Вазирлар Маҳкамасининг Болаларни ҳимоя қилиш масалалари шуъбаси ҳузурида Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Болаларни ҳимоя қилиш масалалари котибияти, манфаатдор вазирлик ва идоралар билан биргаликда «Меҳр дафтари» тизимининг фаолияти муҳокама қилинади.
5-боб. Якунловчи қоидалар
23. Ушбу Низомни қўллаш жараёнида юзага келадиган низолар қонунчилик ҳужжатларида белгиланган тартибда ҳал этилади.
24. Мазкур Низом талаблари бузилишида айбдор бўлган шахслар қонунчиликка мувофиқ жавоб берадилар.
Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимини жорий этиш тартиби тўғрисидаги низомга
ИЛОВА
ИЛОВА
Етим болалар ва ота-она қарамоғидан маҳрум бўлган болаларни ҳар томонлама қўллаб-қувватлашга қаратилган «Меҳр дафтари» тизимига киритиш ва чиқариш
СХЕМАСИ
|
|
Ижрочилар |
|
Тадбирлар |
|
Муддатлар | |
|
|
||||||
|
1-босқич |
Ўқув-тарбия муассасалари |
«Меҳр дафтари» тизимига киритиш учун халқ таълими тизимидаги Меҳрибонлик уйлари, Болалар шаҳарчалари, Республика болалар ўқув-тарбия муассасалари, шунингдек, оилавий болалар уйлари тарбияланувчиларининг рўйхатини; «Меҳр дафтари» тизимига киритиш учун Соғлиқни сақлаш вазирлиги тизимидаги Болалар уйлари тарбияланувчиларининг рўйхатини; «Меҳр дафтари» тизимига киритиш учун «SOS — Ўзбекистон болалар маҳаллалари» уюшмаси тизимидаги болаларни муқобил парвариш қилиш хизматлари, ёшларга ҳамроҳлик қилиш хизматлари ва ижтимоий етимликнинг олдини олиш хизматлари тарбияланувчилари ва битирувчилари рўйхатини туман (шаҳар) ҳокимлигининг Болаларни ҳимоя қилиш шуъбасига тақдим этиш. |
2 иш куни | |||
|
|
||||||
|
2-босқич |
Болаларни ҳимоя қилиш шуъбаси |
«Меҳр дафтари» тизимига киритиладиган ўқув-тарбия муассасалари тарбияланувчилари, шунингдек, васийлик, ҳомийликка (патронатга) олинган етим болалар ва ота-она қарамоғидан маҳрум бўлган болалар рўйхатини шакллантириш; |
3 иш куни | |||
|
Туман (шаҳар) ҳокими |
Мазкур рўйхатдаги болаларни «Меҳр дафтари» тизимига киритиш юзасидан туман (шаҳар) ҳокимининг қарорини чиқариш. | |||||
|
|
||||||
|
3-босқич |
Ўқув-тарбия муассасалари |
Туман (шаҳар) ҳокими қарори асосида етим болалар ва ота-она қарамоғидан маҳрум бўлган болалар тўғрисидаги маълумотларни «Меҳр дафтари» тизимига киритиш. |
3 иш куни | |||
|
Болаларни ҳимоя қилиш шуъбаси |
Туман (шаҳар) ҳокими қарори асосида васийлик, ҳомийликка (патронатга) олинган етим болалар ва ота-она қарамоғидан маҳрум бўлган болалар тўғрисидаги маълумотларни «Меҳр дафтари» тизимига киритиш. | |||||
|
|
||||||
|
4-босқич |
Ўқув-тарбия муассасалари |
«Меҳр дафтари»га киритилган етим болалар ва ота-она қарамоғидан маҳрум бўлган болаларнинг муаммо (эҳтиёж, қизиқиш)ларини ўрганиш. |
5 иш куни | |||
|
Болаларни ҳимоя қилиш шуъбаси |
«Меҳр дафтари»га киритилган васийликка (ҳомийликка, патронатга) олинган етим болалар ва ота-она қарамоғидан маҳрум бўлган болаларнинг муаммо (эҳтиёж, қизиқиш)ларини ўрганиш. | |||||
|
|
||||||
|
5-босқич |
Болаларни ҳимоя қилиш шуъбаси |
Ўрганиш натижасини умумлаштирган ҳолда етим болалар ва ота-она қарамоғидан маҳрум бўлган болалар, шу жумладан, васийлик, ҳомийликка (патронатга) олинган болаларнинг муаммо (эҳтиёж, қизиқиш)ларини ҳал этишга қаратилган йўл харитасини ишлаб чиқиш. |
15 иш куни | |||
|
|
||||||
|
6-босқич |
Туман (шаҳар) ҳокими |
Етим болалар ва ота-она қарамоғидан маҳрум бўлган болалар, шу жумладан, васийликка (ҳомийликка, патронатга) олинган болаларнинг муаммо (эҳтиёж, қизиқиш)ларини ҳал этишга қаратилган йўл харитасини тасдиқлаш ва уни Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларидаги «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармалари Васийлик кенгашига тақдим этиш. |
3 иш куни | |||
|
|
||||||
|
7-босқич |
Васийлик кенгаши |
Етим болалар ва ота-она қарамоғидан маҳрум бўлган болалар, шу жумладан, васийлик, ҳомийликка (патронатга) олинган болаларнинг муаммо (эҳтиёж, қизиқиш)ларини ҳал этишга қаратилган чора-тадбирларни амалга ошириш учун «Меҳр дафтари» жамғармаси маблағлари ҳисобидан ёрдам кўрсатилиши тўғрисида қарор қабул қилиш, ушбу қарорни туман (шаҳар) ҳокимликларига ижро учун юбориш. |
3 иш куни | |||
|
|
||||||
|
8-босқич |
Туман (шаҳар) ҳокимлиги |
Тасдиқланган йўл харитасини ХТВ, ССВ, Бандлик ва меҳнат муносабатлари, Маҳалла ва нуронийларни қўллаб-қувватлаш вазирликлари, Миллий гвардия, Ёшлар ишлари агентлигининг ҳудудий бўлинмаларига амалга ошириш учун юбориш ҳамда зарур маблағларни тегишли ташкилотларга ўтказиш. |
3 иш куни | |||
|
|
||||||
|
9-босқич |
ХТВ, ССВ, Бандлик ва меҳнат муносабатлари, Маҳалла ва нуронийларни қўллаб-қувватлаш вазирликлари, Миллий гвардия, Ёшлар ишлари агентлигининг ҳудудий бўлинмалари |
Тасдиқланган йўл харитасига мувофиқ етим болалар ва ота-она қарамоғидан маҳрум бўлган болалар, шу жумладан, васийлик, ҳомийликка (патронатга) олинган болаларнинг муаммо (эҳтиёж, қизиқиш)ларини ҳал этишга қаратилган чора-тадбирларни амалга ошириш. |
Йўл харитасида белгиланган муддатларда | |||
|
|
||||||
|
10-босқич |
Болаларни ҳимоя қилиш шуъбаси |
Етим болалар ва ота-она қарамоғидан маҳрум бўлган болалар, шу жумладан, васийлик, ҳомийликка (патронатга) олинган болаларни «Меҳр дафтари»дан чиқариш ёки муддатни узайтириш тўғрисида туман (шаҳар) ҳокимига таклиф киритиш. |
бола 25 ёшга тўлганда | |||
|
|
||||||
|
11-босқич |
Туман (шаҳар) ҳокимлиги |
Етим болалар ва ота-она қарамоғидан маҳрум бўлган болалар, шу жумладан, васийлик, ҳомийликка (патронатга) олинган болаларни «Меҳр дафтари»дан чиқариш ёки муддатни узайтириш тўғрисида туман (шаҳар) ҳокими қарорини чиқариш. |
Таклиф киритилгандан сўнг 1 иш кунида |
(илова Ўзбекистон Республикаси Вазирлар Маҳкамасининг 2022 йил 9 августдаги 438-сонли қарори таҳририда — Қонунчилик маълумотлари миллий базаси, 10.08.2022 й., 09/22/438/0726-сон)
Вазирлар Маҳкамасининг 2022 йил 17 январдаги 26-сон қарорига
2-ИЛОВА
2-ИЛОВА
«Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаси тўғрисида
НИЗОМ
1-боб. Умумий қоидалар
1. Мазкур Низом «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаси (кейинги ўринларда — «Меҳр дафтари» жамғармаси) маблағларини шакллантириш, улардан фойдаланиш ва назорат қилиш тартибини белгилайди.
2. «Меҳр дафтари» тизими доирасида амалга ошириладиган чора-тадбирларни молиялаштириш учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан «Меҳр дафтари» жамғармаси ташкил этилади.
3. «Меҳр дафтари» жамғармаси юридик шахс ҳисобланмайди ва унинг маблағлари Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида бюджет ташкилотларининг бюджетдан ташқари жамғармалари шаклидаги очилган ғазна ҳисобварақларида жамланади.
4. Ушбу Низомда қуйидаги тушунчалардан фойдаланилади:
«Меҳр дафтари» тизими — етим болалар ва ота-она қарамоғидан маҳрум бўлган болаларнинг муаммоларини ўрганиш ҳамда ҳал этиш, уларнинг орзу-истакларини рўёбга чиқаришга ҳамда жамиятга ижтимоийлашувига кўмаклашиш, уларни васийликка (ҳомийликка, патронатга) олган оилаларни рағбатлантириш, шунингдек, болаларнинг ота-онаси ёки бошқа қонуний вакилларининг қарамоғидан маҳрум бўлиш сабабларини ҳар томонлама ўрганиш ҳамда аниқланган муаммоларни бартараф этиш бўйича комплекс чора-тадбирларни ўз ичига олган тизим;
ўқув-тарбия муассасалари — Ўзбекистон Республикаси Халқ таълими вазирлиги тизимидаги Меҳрибонлик уйлари, Болалар шаҳарчалари, Республика болалар ўқув-тарбия муассасалари, Оилавий болалар уйлари, Ўзбекистон Республикаси Соғлиқни сақлаш вазирлиги тизимидаги Болалар уйлари, «SOS — Ўзбекистон болалар маҳаллалари» уюшмаси бўлинмалари (болаларни муқобил парвариш қилиш хизматлари, ёшларга ҳамроҳлик қилиш хизматлари ва ижтимоий етимликнинг олдини олиш хизматлари);
етим болалар ва ота-она қарамоғидан маҳрум бўлган болалар — ўқув-тарбия муассасалари тарбияланувчилари ва битирувчилари ҳамда васийликка (ҳомийликка, патронатга) олинган болалар.
2-боб. «Меҳр дафтари» жамғармаси маблағларини шакллантириш манбалари ва уларни ундириш тартиби
5. Қуйидагилар «Меҳр дафтари» жамғармаси маблағларини шакллантириш манбалари ҳисобланади:
2022 йил 1 январдан бошлаб алкоголь маҳсулотларининг (пиво, табиий вино ҳамда импорт қилинадиган алкоголь маҳсулотлари бундан мустасно) улгуржи савдоси билан шуғулланувчи корхоналар соф тушумининг уч фоизи миқдоридаги ажратмалар (кейинги ўринларда — Махсус ажратма);
ҳомийлик маблағлари;
қонунчиликда тақиқланмаган бошқа манбалар.
6. Махсус ажратманинг ҳисоботини тақдим этиш ва унинг тўлов муддати кечиктирилган ҳар бир кун учун Солиқ кодексига мувофиқ жавобгарлик чоралари қўлланилади.
Алкоголь маҳсулотларининг улгуржи савдоси билан шуғулланувчи корхоналар томонидан Махсус ажратма ўзлари рўйхатдан ўтган ҳудудда ташкил этилган «Меҳр дафтари» жамғармасига тўланади.
7. Махсус ажратманинг тўғри ҳисоблаб чиқарилиши ва «Меҳр дафтари» жамғармасига белгиланган муддатларда тўланиши бўйича назорат давлат солиқ хизмати органлари томонидан амалга оширилади.
8. Молия вазирлиги ва Давлат солиқ қўмитаси томонидан Махсус ажратма бўйича ҳисобот шакли тасдиқланади ҳамда белгиланган тартибда Махсус ажратма тўловчиларига етказилади.
9. Махсус ажратма бўйича ҳисоботни тақдим этиш тартиби Ўзбекистон Республикаси Солиқ кодексининг 292-моддасига мувофиқ амалга оширилади.
3-боб. «Меҳр дафтари» жамғармаси маблағларидан фойдаланишнинг асосий йўналишлари
10. Қуйидагилар «Меҳр дафтари» жамғармаси маблағларидан фойдаланишнинг асосий йўналишлари ҳисобланади:
етим болалар ва ота-она қарамоғидан маҳрум бўлган болаларнинг муаммоларини ҳал этиш, истеъдодли болаларни қўллаб-қувватлашга кўмаклашиш;
етим болалар ва ота-она қарамоғидан маҳрум бўлган болаларни ҳаётга тайёрлаш, уларнинг таълим-тарбиясини ташкил этиш, касбга йўналтириш ва бандлигини таъминлаш;
етим болалар ва ота-она қарамоғидан маҳрум бўлган, айниқса ногирон ва сурункали касалликлари бўлган болаларнинг соғлигини тиклаш ва сақлаш;
етим болалар ва ота-она қарамоғидан маҳрум бўлган болаларнинг коммунал тўловлар бўйича қарздорликларини қоплаш;
болаларнинг ота-онаси ёки бошқа қонуний вакилларининг қарамоғидан маҳрум бўлиш сабабларини ўрганиш натижасига кўра аниқланган муаммоларини бартараф этиш ва уларнинг олдини олиш;
етим болалар ва ота-она қарамоғидан маҳрум бўлган болаларни васийликка (ҳомийликка, патронатга) олган оилаларни рағбатлантириш;
қонунчилик ҳужжатлари билан белгиланган етим болалар ва ота-она қарамоғидан маҳрум бўлган болаларни қўллаб-қувватлашга қаратилган бошқа харажатларни қоплаш.
«Меҳр дафтари» жамғармаси маблағларининг ушбу бандда назарда тутилмаган бошқа мақсадларга йўналтирилишига йўл қўйилмайди.
4-боб. «Меҳр дафтари» жамғармаси маблағларини сарфлаш ва бошқариш
11. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида мазкур Низомнинг иловасига мувофиқ намунавий таркибда «Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармасининг васийлик кенгаши (кейинги ўринларда — Васийлик кенгаши) ташкил этилади.
Васийлик кенгаши ўз фаолиятини жамоатчилик асосида амалга оширади.
12. «Меҳр дафтари» жамғармаси маблағларини шакллантириш ва сарфлаш Васийлик кенгаши қарорига кўра амалга оширилади.
Васийлик кенгаши қарори Васийлик кенгаши йиғилишининг баёни билан расмийлаштирилади.
13. «Меҳр дафтари» жамғармаси маблағлари ҳисобидан кўрсатиладиган моддий ёрдамлар туман (шаҳар) ҳокимликлари томонидан тасдиқланган «Йўл харитаси»га мувофиқ Васийлик кенгаши қарорига асосан амалга оширилади.
Бунда:
Васийлик кенгаши томонидан етим болалар ва ота-она қарамоғидан маҳрум бўлган болаларга мазкур Низомнинг 10-бандида назарда тутилган моддий ёрдам уларнинг муаммолари ва орзу-истакларидан келиб чиқиб, базавий ҳисоблаш миқдорининг ўттиз беш бараваригача бўлган миқдорда берилади;
моддий ёрдам етим болалар ва ота-она қарамоғидан маҳрум бўлган болалар муаммоларининг ҳажми ва ҳаётий муҳимлигидан келиб чиқиб, Васийлик кенгаши қарорига асосан базавий ҳисоблаш миқдорининг ўттиз беш бараваридан кўп бўлган миқдорда, аммо базавий ҳисоблаш миқдорининг эллик бараваридан кўп бўлмаган миқдорда берилиши мумкин;
моддий ёрдам «Йўл харитасида» назарда тутилган мақсадлар учун масъул ижрочилар билан келишилган ҳолда, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан белгиланган тартибда молиялаштирилади ва тўғри-тўғридан етим болалар ва ота-она қарамоғидан маҳрум бўлган болаларга нақд пул ёки нақд пулсиз шаклда (банк пластик карточкалари орқали ва пул ўтказиш йўли билан) тўланишига йўл қўйилмайди.
14. Васийлик кенгашининг йиғилишлари ҳар ойда камида бир марта ўтказилади. Васийлик кенгаши раисининг ташаббуси билан ёки заруратга кўра навбатдан ташқари йиғилишлар ҳам ташкил этилиши мумкин.
15. Васийлик кенгаши раиси кенгаш йиғилишларига раислик қилади.
16. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Болаларни ҳимоя қилиш масалалари котибияти «Меҳр дафтари» жамғармасининг ишчи органи (кейинги ўринларда — ишчи орган) ҳисобланади.
17. «Меҳр дафтари» жамғармаси маблағлари бўйича даромадлар ва харажатлар сметаси Васийлик Кенгаши ва ишчи орган таклифлари асосида ишлаб чиқилади ҳамда тасдиқланган харажатлар сметаси тегишли ҳудудий молия бош бошқармаларида рўйхатдан ўтказилади.
Харажатлар сметасини шакллантиришда ушбу Низомнинг 10-бандида назарда тутилган йўналишдаги ишларнинг манзилли рўйхати ишчи орган томонидан шакллантирилади.
18. «Меҳр дафтари» жамғармасининг жорий йилда фойдаланилмай қолган маблағлари Ўзбекистон Республикаси Давлат бюджетига олиб қўйилмайди ва улардан кейинги йилда фойдаланилади.
19. Васийлик кенгаши:
«Меҳр дафтари» жамғармасига умумий раҳбарлик қилади ва унинг фаолиятини назорат қилади;
ҳар йили 25 декабргача «Меҳр дафтари» жамғармасининг келгуси йил учун даромадлар ва харажатларнинг йиллик параметрлари ҳамда йиллик иш режасини тасдиқлайди;
«Меҳр дафтари» жамғармаси маблағларини ушбу Низомнинг 10-бандида назарда тутилган мақсадларга йўналтиради;
«Меҳр дафтари» жамғармаси маблағларини тақсимлайди, зарур ҳолларда тасдиқланган харажатлар режаларига тегишли ўзгартиришлар киритади;
«Меҳр дафтари» жамғармаси маблағларидан мақсадли ва самарали фойдаланилишини назорат қилади ва улар бўйича тегишли қарорлар қабул қилади;
«Меҳр дафтари» жамғармаси фаолиятини янада ривожлантириш учун жисмоний ва юридик шахсларнинг ҳомийлик хайрияларини ва техник кўмак маблағларини (грантларни) жалб этиш чораларини кўради;
«Меҳр дафтари» жамғармаси маблағларини шакллантириш, улардан мақсадли ва самарали фойдаланиш билан боғлиқ бошқа вазифаларни амалга оширади.
20. Ишчи орган:
«Меҳр дафтари» жамғармасининг йиллик иш режасини ишлаб чиқади ва тасдиқлаш учун Васийлик кенгашига киритади;
Васийлик кенгаши аъзоларига кенгаш йиғилиши вақти ва ўтказиладиган жойи тўғрисида хабар беради;
Васийлик кенгаши йиғилишининг кун тартибига киритиладиган масалаларни тайёрлайди, йиғилиш баённомасини расмийлаштиради;
давлат томонидан берилган ижтимоий кўмак ва моддий ёрдам тўғрисидаги маълумотларни «Меҳр дафтари»да қайд этиб боради;
«Меҳр дафтари»га киритилган етим болалар ва ота-она қарамоғидан маҳрум бўлган болаларнинг мурожаатлари билан ишлайди.
Васийлик кенгаши қарори билан ишчи органга қўшимча вазифалар ҳам юкланиши мумкин.
21. «Меҳр дафтари» жамғармасининг бўш маблағларини тижорат банкларнинг депозитларида жойлаштириш тақиқланади.
5-боб. «Меҳр дафтари» жамғармаси ҳисоботини юритиш
22. «Меҳр дафтари» жамғармаси маблағларидан фойдаланиш бўйича ҳисоб ва ҳисобот Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан юритилади.
23. «Меҳр дафтари» жамғармаси даромадлари ва харажатлари тўғрисидаги ҳисоботларни тақдим этиш тартиби Ўзбекистон Республикаси Бюджет кодексининг 163-моддасига мувофиқ амалга оширилади.
24. Васийлик кенгаши раиси ҳар чоракда «Меҳр дафтари» жамғармаси даромадлари ва харажатлари ижроси тўғрисида тегишли халқ депутатлари туман (шаҳар) Кенгашига ҳисобот бериб боради.
6-боб. Якунловчи қоидалар
25. «Меҳр дафтари» жамғармаси маблағларидан мақсадли ва самарали фойдаланиш учун масъулият Васийлик кенгашига юкланади.
26. Давлат молиявий назорати инспекцияси ҳудудий бошқармалари мазкур Низом доирасида амалга ошириладиган ишлар учун ажратиладиган маблағларнинг самарали ва мақсадли ишлатилишини назорат қилади.
(26-банд Ўзбекистон Республикаси Вазирлар Маҳкамасининг 2025 йил 1 мартдаги 135-сонли қарори таҳририда — Қонунчилик маълумотлари миллий базаси, 03.03.2025 й., 09/25/135/0208-сон)
27. Ушбу Низом талаблари бузилишида айбдор бўлган шахслар қонунчиликка мувофиқ жавобгар бўладилар.
«Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаси тўғрисидаги низомга
ИЛОВА
ИЛОВА
«Меҳр дафтари»га киритилган етим болалар ва ота-она қарамоғидан маҳрум бўлган болаларни қўллаб-қувватлаш жамғармаси васийлик кенгашининг
ТАРКИБИ
|
1. |
Лавозимига кўра |
— |
Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокими, Васийлик кенгаши раиси |
|
2. |
Лавозимига кўра |
— |
Миллий гвардиянинг Қорақалпоғистон Республикаси, вилоятлар ва Тошкент шаҳар бўйича бошқармаси бошлиғи, Васийлик кенгаши раисининг ўринбосари |
|
3. |
Лавозимига кўра |
— |
Қорақалпоғистон Республикаси Халқ таълими вазири, вилоятлар ва Тошкент шаҳар Халқ таълими бошқармалари бошлиқлари |
|
4. |
Лавозимига кўра |
— |
Қорақалпоғистон Республикаси соғлиқни сақлаш вазири, вилоятлар ва Тошкент шаҳар Соғлиқни сақлаш бошқармалари бошлиқлари |
|
5. |
Лавозимига кўра |
— |
Қорақалпоғистон Республикаси маҳалла ва нуронийларни қўллаб-қувватлаш вазири, вилоятлар ва Тошкент шаҳар маҳалла ва нуронийларни қўллаб-қувватлаш бошқармаси бошлиғи |
|
6. |
Келишувга кўра |
— |
Қорақалпоғистон Республикаси прокурори, вилоятлар ва Тошкент шаҳар прокурори |
|
7. |
Лавозимига кўра |
— |
Қорақалпоғистон Республикаси молия вазири, вилоятлар ва Тошкент шаҳар Молия бош бошқармаси бошлиғи |
|
8. |
Лавозимига кўра |
— |
Қорақалпоғистон Республикаси бандлик ва меҳнат муносабатлари вазири, вилоятлар ва Тошкент шаҳар Бандлик ва меҳнат муносабатлари бошқармаси бошлиғи |
|
9. |
Келишувга кўра |
— |
«Микрокредитбанк» АТБ ҳудудий филиали раҳбари |
|
10. |
Келишувга кўра |
— |
Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгаши депутати |
|
11. |
Келишувга кўра |
— |
оммавий ахборот воситалари вакили |
|
12. |
Лавозимига кўра |
— |
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг Болаларни ҳимоя қилиш масалалари котибияти мудири, Васийлик кенгаши котиби |
Изоҳ. Васийлик кенгаши аъзолари бошқа ишга ўтган тақдирда, Васийлик кенгаши таркибига ушбу лавозимларга янгидан тайинланган шахслар ёки тегишли функцияларни бажариш зиммасига юкланган шахслар киритилади.
Васийлик кенгаши томонидан кенгаш таркибига давлат улушига эга бошқа тижорат банклари ҳам киритилиши мумкин.
(илова Ўзбекистон Республикаси Вазирлар Маҳкамасининг 2022 йил 9 августдаги 438-сонли қарори таҳририда — Қонунчилик маълумотлари миллий базаси, 10.08.2022 й., 09/22/438/0726-сон)
(Қонунчилик маълумотлари миллий базаси, 18.01.2022 й., 09/22/26/0035-сон; 06.08.2022 й., 09/22/431/0716-сон; 10.08.2022 й., 09/22/438/0726-сон; 03.03.2025 й., 09/25/135/0208-сон)
