Ушбу Қонуннинг мақсади экологик аудит соҳасидаги муносабатларни тартибга солишдан иборат.

Экологик аудит тўғрисидаги қонунчилик ушбу Қонун ва бошқа қонунчилик ҳужжатларидан иборатдир.

Агар Ўзбекистон Республикасининг халқаро шартномасида Ўзбекистон Республикасининг экологик аудит тўғрисидаги қонунчилигида назарда тутилганидан бошқача қоидалар белгиланган бўлса, халқаро шартнома қоидалари қўлланилади.

Ушбу Қонунда қуйидаги асосий тушунчалар қўлланилади:

экологик аудит — экологик аудит субъекти амалга оширадиган хўжалик ва бошқа фаолиятни техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларига риоя этиш юзасидан экологик аудиторлик ташкилоти томонидан ўтказиладиган тизимли, ҳужжатлаштирилган, мустақил баҳолаш;

экологик аудитор — экологик аудиторнинг малака сертификатига эга бўлган жисмоний шахс;

экологик аудитнинг буюртмачиси — экологик аудит ўтказиш ташаббуси билан чиқувчи хўжалик юритувчи субъект, унинг мулкдори иштирокчилари ва (ёки) акциядорлари;

экологик аудиторнинг малака сертификати — экологик аудиторнинг малакасини тасдиқловчи ва экологик аудиторлик фаолиятини амалга ошириш ҳуқуқини берувчи ҳужжат;

экологик аудит объекти — экологик аудит субъектининг атроф-муҳитга таъсир кўрсатадиган хўжалик ва бошқа фаолияти, шунингдек унинг атроф-муҳитни бошқариш тизими;

экологик аудит субъекти — маҳсулот ишлаб чиқаришни амалга оширувчи, ишларни бажарувчи ва хизматлар кўрсатувчи, ўзида экологик аудит ўтказиладиган хўжалик юритувчи субъект ва бошқа ташкилотлар;

экологик аудиторлик ташкилоти — экологик аудиторлик фаолиятини амалга оширувчи юридик шахс;

экологик аудиторлик фаолияти — экологик аудиторлик ташкилотининг экологик аудит ўтказишни ва турдош хизматлар кўрсатишни ўз ичига олган тадбиркорлик фаолияти;

экологик аудит хулосаси — экологик аудит буюртмачисига йўлланган, ўтказилган экологик аудит жараёни, техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларининг аниқланган бузилишлари, ўтказилган лаборатория синовларининг натижалари тўғрисидаги батафсил маълумотларни ҳамда экологик аудит ўтказиш натижасида олинган бошқа ахборотни ўз ичига олган ҳужжат.

Экологик аудитнинг асосий принциплари мустақиллик, холислик, махфийлик ва ишончлиликдан иборатдир.

Экологик аудит стандартлари экологик аудитни ўтказиш, турдош хизматлар кўрсатиш ва экологик аудиторлар ишининг сифатини назорат қилиш тизимини ташкил этиш тартибини белгилайди.

Миллий экологик аудит стандартлари экологик аудиторлик фаолиятини амалга оширишга доир ягона талабларни белгилайди.

Экологик аудиторлик ташкилотлари экологик аудитни ўтказиш чоғида шартномага мувофиқ халқаро экологик аудит стандартларини қўллаши мумкин.

Экологик аудитнинг асосий вазифалари қуйидагилардан иборат:

экологик аудит субъекти хўжалик ва бошқа фаолиятининг экологик жиҳатлари тўғрисидаги ишончли ахборотни тўплаш;

экологик аудит субъектининг хўжалик ва бошқа фаолияти техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларига мувофиқлигини аниқлаш;

экологик аудит субъекти фаолиятининг атроф-муҳит ҳолатига таъсирини баҳолаш;

экологик аудит субъекти томонидан амалга ошириладиган табиатни муҳофаза қилишга оид тадбирларнинг самарадорлигини баҳолаш;

атроф-муҳитнинг ифлосланиши билан боғлиқ фавқулодда вазиятларнинг юзага келиши хавфини камайтириш;

атроф-муҳитни бошқариш тизимининг самарадорлигини баҳолаш;

экологик аудит хулосасини тузиш, экологик аудит субъекти томонидан амалга ошириладиган табиатни муҳофаза қилишга оид тадбирлар самарадорлигини оширишга, шунингдек атроф-муҳитни бошқариш тизимини такомиллаштиришга қаратилган тавсиялар ишлаб чиқиш.

Экологик аудит қонунчиликка мувофиқ амалга ошириладиган экологик назоратнинг ўрнини босмайди.

Экологик аудит экологик аудиторлик ташкилоти ва экологик аудит буюртмачиси ўртасида тузиладиган, экологик аудит ўтказиш муддатлари ва бошқа шартлари белгиланадиган шартнома асосида ўтказилади.

Экологик аудит экологик аудит субъектининг атроф-муҳитни муҳофаза қилиш ва табиий ресурслардан оқилона фойдаланиш соҳасидаги бутун фаолиятига ёки унинг алоҳида қисмига нисбатан ўтказилиши мумкин.

Экологик аудит субъектининг фаолияти техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларига мувофиқ бўлган тақдирда Ўзбекистон Республикаси Экология ва атроф-муҳитни муҳофаза қилиш давлат қўмитаси (бундан буён матнда Давлат экология қўмитаси деб юритилади) томонидан бир йил давомида текширилмайди, бундан ушбу модданинг олтинчи қисмида назарда тутилган ҳоллар мустасно.

Экологик аудит субъектининг фаолияти техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларига мувофиқ бўлмаган тақдирда экологик аудит субъекти аниқланган қоидабузарликларни бир ойлик муддатда бартараф этиши шарт.

Авариялар ва фавқулодда вазиятлар юзага келганда, шунингдек жиноят ишларини тергов қилиш ёхуд Ўзбекистон Республикаси Президентининг ёки Ўзбекистон Республикаси Вазирлар Маҳкамасининг топшириғи муносабати билан Давлат экология қўмитаси томонидан ўтказилган экологик аудитнинг факти ва натижаларидан қатъи назар текширув ўтказилиши мумкин.

Экологик аудит ихтиёрий ёки мажбурий шаклда ўтказилиши мумкин.

Атроф-муҳитга таъсир кўрсатиш хавфи кам бўлган ёки унчалик кўп бўлмаган (локал таъсирга эга) экологик аудит субъектларининг фаолиятига нисбатан экологик аудит ихтиёрий тартибда ўтказилади.

Атроф-муҳитга юқори ва ўртача таъсир кўрсатиш хавфига эга бўлган экологик аудит субъектлари ҳар йилги мажбурий экологик аудитдан ўтказилиши лозим.

Атроф-муҳитга таъсир кўрсатиш хавфи даражаси бўйича фаолият турларининг рўйхати Ўзбекистон Республикаси Вазирлар Маҳкамаси томонидан белгиланади.

Ихтиёрий экологик аудит экологик аудит буюртмачисининг ташаббусига кўра ўтказилади.

Мажбурий йиллик экологик аудит экологик аудит субъектининг атроф-муҳитни муҳофаза қилиш ва табиий ресурслардан оқилона фойдаланиш соҳасидаги бутун фаолиятига нисбатан ўтказилади.

Экологик аудит ўтказиш якунлари бўйича экологик аудит хулосаси тузилади.

Экологик аудит хулосаси аниқланган камчиликларни бартараф этишга доир тавсияларни, шунингдек экологик аудит субъекти томонидан амалга оширилаётган табиатни муҳофаза қилишга оид тадбирлар самарадорлигини ошириш бўйича тавсиялар ва таклифларни ўз ичига олиши керак.

Экологик аудит хулосаси махфий ҳужжатдир ва у экологик аудит буюртмачисининг розилигисиз ошкор қилинишига йўл қўйилмайди.

Экологик аудит хулосасининг ҳар бир саҳифаси экологик аудитни амалга оширган экологик аудитор (экологик аудиторлар) ва экологик аудиторлик ташкилотининг раҳбари томонидан имзоланган бўлиши керак.

Экологик аудит хулосасининг шакли ва мазмуни экологик аудит стандартларида белгиланади.

Экологик аудиторлик ташкилотлари ўз фаолиятини амалга ошириш чоғида мустақилдир.

Экологик аудиторлик хизматлари кўрсатиш тўғрисидаги шартнома фақат экологик аудиторлик ташкилотининг фуқаролик жавобгарлиги суғурта полиси мавжуд бўлган тақдирда тузилади.

Экологик аудиторлик ташкилотларининг, шунингдек улар ходимларининг фаолиятига мустақил экологик аудитни амалга оширишга монелик қилиш мақсадида аралашишга ҳамда қандай шаклда бўлмасин таъсир ўтказишга йўл қўйилмайди.

Давлат ҳокимияти ва бошқаруви органларининг мансабдор шахслари, шунингдек қонунчиликка мувофиқ тадбиркорлик фаолияти билан шуғулланиши тақиқланган бошқа шахслар экологик аудиторлик ташкилотларининг муассислари бўлиши мумкин эмас.

Экологик аудиторлик ташкилотлари ҳар қандай ташкилий-ҳуқуқий шаклда тузилиши ва ўз фаолиятини амалга ошириши мумкин, бундан акциядорлик жамияти мустасно.

Экологик аудиторлик ташкилотига ушбу экологик аудиторлик ташкилоти ўзи учун асосий иш жойи бўлган экологик аудитор раҳбар бўлиши мумкин.

Экологик аудиторлик ташкилотлари давлат хизматлари марказларида давлат рўйхатидан ўтказилиши лозим.

Экологик аудиторлик ташкилотлари давлат ва хўжалик бошқаруви органлари, шунингдек маҳаллий давлат ҳокимияти органлари томонидан ташкил этилиши мумкин эмас.

Экологик аудиторлик ташкилоти бошқа экологик аудиторлик ташкилотининг муассиси (иштирокчиси) бўлиши мумкин эмас ҳамда атроф-муҳитга таъсир кўрсатиш ва табиий ресурслардан фойдаланиш билан боғлиқ бирор-бир тадбиркорлик фаолияти билан шуғулланишга ҳақли эмас.

Экологик аудиторлик ташкилоти қуйидаги ҳуқуқларга эга:

экологик аудит субъектига нисбатан экологик аудит ўтказиш тўғрисида қарор қабул қилиш учун унинг таъсис ҳужжатлари ва бошқа ҳужжатлари билан олдиндан танишиш;

экологик аудит субъектининг асбоб-ускуналари ва бошқа мол-мулкини инвентаризациядан ўтказиш, шунингдек уларнинг ҳақиқий ҳолати ва иш самарадорлигини ўрганиш;

зарур ўлчовлар ўтказиш, намуналар олиш ва ўзининг аккредитациядан ўтган лабораториясида ёки бошқа аккредитациядан ўтган лабораторияда лаборатория синовларини ўтказиш;

экологик аудит ўтказиш давомида юзага келган масалалар бўйича табиатни муҳофаза қилишга оид тадбирларни ўтказиш учун масъул бўлган шахслардан тушунтиришлар ва экологик аудит ўтказиш учун зарур бўлган қўшимча маълумотлар олиш;

экологик аудит ўтказишда иштирок этишга бошқа мутахассисларни эксперт сифатида жалб қилиш;

экологик аудит билан боғлиқ ҳуқуқий масалалар юзасидан маслаҳатлар бериш.

Экологик аудиторлик ташкилоти қуйидаги турдош хизматларни ҳам кўрсатиши мумкин:

а) атроф-муҳитга салбий таъсир кўрсатганлик учун тўлов ҳисоб-китобининг тўғрилигини текшириш;

б) қуйидаги масалалар юзасидан таҳлил қилиш ва маслаҳат бериш:

табиий ресурслардан фойдаланиш ва (ёки) атроф-муҳитга таъсир кўрсатиш билан боғлиқ фаолиятни амалга ошириш;

атроф-муҳитга таъсир кўрсатиш тўғрисида ҳисоботлар тузиш;

табиатни муҳофаза қилишга оид фаолиятни ва тадбирларни режалаштириш, амалга ошириш ҳамда натижаларини баҳолаш;

ишлаб чиқаришга доир экологик назоратни ташкил этиш ва ўтказиш, унинг натижалари тўғрисида ҳисоботлар тузиш;

атроф-муҳитга салбий таъсирни камайтириш бўйича илғор технологиялар ва усулларни жорий этиш;

в) атроф-муҳитга етказилган зарарнинг миқдорини аниқлаш.

Экологик аудиторлик ташкилоти:

экологик аудиторлик фаолиятини амалга ошириш чоғида экологик аудит тўғрисидаги қонунчилик талабларига риоя этиши;

штатида асосий иш жойи экологик аудиторлик ташкилоти бўлган камида тўрт нафар экологик аудитор мавжуд бўлишини таъминлаши;

экологик аудиторлик ташкилотининг фуқаролик жавобгарлиги суғурта полисига эга бўлиши;

экологик аудит хулосасида техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларининг бузилиши ҳолатини бартараф этиш бўйича тавсияларни акс эттириши;

экологик аудиторлик фаолиятини амалга оширишга доир тегишли ҳужжатларни экологик аудит буюртмачисининг талабига кўра тақдим этиши;

экологик аудиторлик хизматларини кўрсатиш чоғида олинган ахборотнинг махфийлигини таъминлаши;

экологик аудит натижаларини экологик аудит стандартларига биноан расмийлаштириши ва экологик аудит хулосаларининг нусхаларини экологик аудиторлик ташкилотида камида беш йил сақлаши;

экологик аудиторлар иши сифатининг назоратини таъминлаши шарт.

Экологик аудиторлик ташкилоти била туриб сохта тузилган экологик аудит хулосасини тузиши оқибатида етказилган зарар учун экологик аудит буюртмачиси олдида жавобгар бўлади.

Экологик аудитнинг экологик аудит ўтказмасдан тузилган ёки экологик аудит натижалари бўйича тузилган, аммо экологик аудитор (экологик аудиторлар) томонидан олинган ва ўрганилган ҳужжатлар мазмунига мувофиқ бўлмаган хулосаси била туриб сохта тузилган ҳисобланади.

Сифатсиз ўтказилган ёки лозим даражада ўтказилмаган экологик аудит натижасида экологик аудит буюртмачисига етказилган зарарларнинг, шу жумладан бой берилган фойданинг ўрни қонунчиликда белгиланган тартибда қопланиши лозим.

Қуйидагиларга экологик аудит ўтказиш тақиқланади:

экологик аудит субъектининг мансабдор шахслари билан яқин қариндошлик муносабатларида бўлган шахсга;

экологик аудит субъектига нисбатан мулкий ёки шахсий номулкий манфаатлари бор шахсга;

Давлат экология қўмитасининг мансабдор шахсларига;

экологик аудит субъектининг ходимига.

Экологик аудит экологик аудиторлик ташкилотлари ва экологик аудиторлар томонидан қуйидагиларга нисбатан ҳам ўтказилмайди:

ушбу экологик аудиторлик ташкилотининг мулкдорлари, иштирокчилари, кредиторлари, суғуртачилари бўлган хўжалик юритувчи субъектларга, шунингдек ушбу экологик аудиторлик ташкилотлари ва экологик аудиторлар ўзига нисбатан мулкдор, иштирокчи, акциядор бўлган хўжалик юритувчи субъектларга нисбатан;

ўз мулкдори, иштирокчиси, акциядори, шунингдек табиатни муҳофаза қилишга оид фаолиятни ташкил этиш ва юритиш учун жавобгар бўлган шахси бир вақтнинг ўзида мазкур экологик аудиторлик ташкилотининг мулкдори, иштирокчиси бўлган хўжалик юритувчи субъектга нисбатан;

ўз ходими бир вақтнинг ўзида мазкур экологик аудиторлик ташкилотининг ходими бўлган экологик аудит субъектига нисбатан.

Экологик аудиторлик ташкилоти айни бир экологик аудит субъектида кетма-кет уч мартадан ортиқ экологик аудит ўтказишга ҳақли эмас.

Экологик аудиторга қуйидаги талаблар қўйилади:

Ўзбекистон Республикаси фуқаролигининг мавжудлиги;

тегишли соҳага оид олий маълумотнинг мавжудлиги;

атроф-муҳитни муҳофаза қилиш соҳасида ёки турдош соҳаларда кетма-кет камида уч йиллик иш тажрибасига эга бўлиш;

экологик аудитор малака сертификатининг мавжудлиги.

Экологик аудитор аризасида кўрсатилган фаолиятни фақат битта экологик аудиторлик ташкилотида амалга оширишга ҳақли.

Экологик аудиторларни тайёрлаш, шунингдек экологик аудиторнинг малака сертификатини бериш тартиби Ўзбекистон Республикаси Вазирлар Маҳкамаси томонидан белгиланади.

Экологик аудитор қуйидаги ҳуқуқларга эга:

экологик аудит ўтказиш учун зарур бўлган маълумотлар ва материалларни олиш;

экологик аудитга тақдим қилинган, экологик аудит тўғрисидаги қонунчилик талабларига жавоб бермайдиган материалларни рад этиш.

Экологик аудитор:

экологик аудиторлик фаолиятини амалга ошириш чоғида экологик аудит тўғрисидаги қонунчилик талабларига риоя этиши;

экологик аудит натижаларини экологик аудит стандартларига биноан расмийлаштириши;

экологик аудит ўз вақтида, комплекс тарзда, холисона, сифатли ўтказилишини, шунингдек экологик аудит хулосаси расмийлаштирилиши ва берилишини таъминлаши;

экологик аудитнинг муайян объектига нисбатан шахсий манфаатдорлиги мавжуд бўлган тақдирда ўзини ўзи рад этиш ҳақида арз қилиши;

экологик аудиторлик хизматларини кўрсатиш чоғида олинган ахборотнинг махфийлигини таъминлаши шарт.

Экологик аудитор ёрдамчиси экологик аудиторнинг малака сертификатига эга бўлмаган, экологик аудиторлик ташкилотида ишлайдиган ҳамда экологик аудит хулосасига имзо қўйиш ҳуқуқисиз, экологик аудиторлик ташкилотининг топшириғига кўра экологик аудитда иштирок этадиган жисмоний шахсдир.

Экологик аудитор ёрдамчисига нисбатан экологик аудит ўтказиш чоғида олинган маълумотларни ошкор қилмаслик мажбурияти татбиқ этилади.

Экологик аудитор ёрдамчиси сифатида ишлаш вақти экологик аудиторнинг малака сертификатини олиш учун зарур бўлган иш стажига киритилади.

Экологик аудит буюртмачиси қуйидаги ҳуқуқларга эга:

экологик аудит ўтказиш учун экологик аудиторлик ташкилотини мустақил равишда танлаш;

ихтиёрий экологик аудит чоғида экологик аудитнинг йўналиши ва иш ҳажмини белгилаш;

экологик аудиторлик ташкилотидан экологик аудит хулосаси қайси қонунчилик ҳужжатлари нормаларига асосланганлиги тўғрисидаги зарур ахборотни олиш;

экологик аудит хулосасини олиш.

Экологик аудит буюртмачиси:

экологик аудиторларга экологик аудитни ўтказиш учун тегишли шарт-шароитлар яратиши;

экологик аудитни ўтказиш учун зарур бўлган маълумотлар ва материалларни тақдим этиши;

экологик аудит режасини тасдиқлаши;

экологик аудиторлик хизматлари кўрсатиш тўғрисидаги шартномага мувофиқ экологик аудит ўтказиш хизматлари учун ҳақ тўлаши шарт.

Экологик аудит субъекти қуйидаги ҳуқуқларга эга:

экологик аудитнинг йўналиши, иш ҳажмлари ва режаси билан танишиш;

экологик аудиторлардан табиатни муҳофаза қилишга оид тадбирларни ишлаб чиқиш ва ўтказиш, экологик аудит ўтказиш чоғида аниқланган камчиликлар ҳамда қоидабузарликларни бартараф этиш бўйича маслаҳатлар ва тавсиялар олиш.

Экологик аудит субъекти:

экологик аудиторларни экологик аудитни экологик аудиторлик хизматлари кўрсатиш тўғрисидаги шартномада белгиланган муддатларда ўтказиши учун тегишли шарт-шароитлар билан таъминлаши;

экологик аудиторларга технологик асбоб-ускуналарнинг ишга яроқлилиги ва самарадорлигини аниқлаш нуқтаи назаридан кўздан кечириши, чиқиндилар тўпланадиган ва сақланадиган жойларни, атмосфера ҳавосини, сув ва ер ресурсларини ифлослантирувчи манбаларни текшириш, биологик ресурсларни сақлаш мақсадида ҳудудни ўрганиши, шунингдек лаборатория синовларини ўтказиш учун зарур бўлган намуна ва нусхалар олиши учун имконият бериши;

экологик аудит жараёнида аниқланган техник жиҳатдан тартибга солиш соҳасидаги норматив ҳужжатлар, атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларининг бузилишларини бартараф этиши шарт.

Экологик аудиторлик ташкилотларининг реестри экологик аудиторлик ташкилотларининг рўйхатини ўз ичига олади ва Давлат экология қўмитасининг расмий веб-сайтига жойлаштирилади.

Экологик аудиторларнинг реестри экологик аудиторнинг малака сертификатига эга бўлган экологик аудиторларнинг рўйхатини ўз ичига олади ва Давлат экология қўмитасининг расмий веб-сайтига жойлаштирилади.

Экологик аудиторлик ташкилотларининг реестри ва Экологик аудиторларнинг реестрини юритиш тартиби, унинг шакли ҳамда унга доир талаблар Ўзбекистон Республикаси Вазирлар Маҳкамаси томонидан белгиланади.

Экологик аудиторларнинг жамоат бирлашмалари экологик аудиторларни ихтиёрий асосда бирлаштирадиган нодавлат нотижорат ташкилотларидан иборатдир.

Экологик аудиторлар жамоат бирлашмаларининг фаолияти экологик аудиторларнинг касбий даражасини ривожлантиришга ва қўллаб-қувватлашга, уларнинг касбий манфаатларини ҳимоя қилишга қаратилган.

Экологик аудиторларнинг жамоат бирлашмалари:

экологик аудиторларнинг жамоат бирлашмалари аъзоларининг ҳисобини юритади ва улар ҳақидаги маълумотларни ўзининг веб-сайтларига жойлаштиради;

экологик аудиторларни ўқитиш дастурларини ишлаб чиқишда иштирок этади;

экологик аудиторнинг малака сертификатини олиш учун малака имтиҳонларини ташкил этиш ва ўтказишда иштирок этади;

экологик аудит тўғрисидаги қонунчиликни такомиллаштириш бўйича таклифлар тайёрлайди.

Экологик аудиторлик фаолиятини амалга ошириш чоғида юзага келадиган низолар қонунчиликда белгиланган тартибда ҳал этилади.

Экологик аудит тўғрисидаги қонунчиликни бузганликда айбдор шахслар белгиланган тартибда жавобгар бўлади.

Давлат экология қўмитаси ва манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

Ўзбекистон Республикаси Вазирлар Маҳкамаси:

ҳукумат қарорларини ушбу Қонунга мувофиқлаштирсин;

давлат бошқаруви органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

Ушбу Қонун расмий эълон қилинган кундан эътиборан ўн икки ой ўтгач кучга киради.