3. Жамғарма ўз фаолиятида Ўзбекистон Республикаси Конституцияси, қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармон, қарор ва фармойишлари, Ўзбекистон Республикаси Вазирлар Маҳкамасининг қарор ва фармойишлари, Ўзбекистон Республикаси Президенти ҳузуридаги Давлат хизматини ривожлантириш агентлигининг қарорлари ва бошқа норматив-ҳуқуқий ҳужжатларга, шунингдек, ушбу Низомга амал қилади.

4. Жамғарма давлат муассасаси шаклидаги юридик шахс ҳисобланиб, ўз мустақил баланси, Ўзбекистон Республикаси Молия вазирлиги Ғазначилигидаги шахсий ҳисобварақлари, Ўзбекистон Республикаси Давлат герби тасвири ва давлат тилидаги ўз номи туширилган муҳр, штамп ва бошқа белгиларига эга.

Жамғарманинг жойлашган ўрни (почта манзили): Тошкент шаҳар, Миробод тумани, Амир Темур шоҳ кўчаси, 13-уй.

5. Жамғарманинг расмий номи:

а) давлат тилида:

тўлиқ номи — Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси;

қисқартирилган номи — «Эл-юрт умиди» жамғармаси;

б) рус тилида:

тўлиқ номи — Фонд «Эл-юрт умиди» по подготовке специалистов за рубежом и диалогу с соотечественниками;

қисқартирилган номи — Фонд «Эл-юрт умиди»;

в) инглиз тилида:

тўлиқ номи — «El-yurt umidi» Foundation for training specialists abroad and the dialogue with compatriots;

қисқартирилган номи — «El-yurt umidi» Foundation.

2-боб. Жамғарманинг асосий вазифалари ва фаолият йўналишлари

6. Қуйидагилар Жамғарманинг асосий вазифалари ва фаолият йўналишлари ҳисобланади:

иқтидорли ва истиқболли, айниқса давлат хизматчиларини республика ҳудудларидан тизимли равишда излаб топиш, танлаш ва рағбатлантириш, уларнинг хориждаги нуфузли таълим, илмий ва бошқа муассасаларда таълим олишини ташкил этиш;

устувор ва талаб юқори бўлган мутахассисликларни аниқлаш, шу асосда Жамғарма стипендиатларининг етакчи хорижий таълим ва илмий муассасаларда, шунингдек, танланган фаолият соҳаси бўйича илғор тажрибага эга бўлган ишлаб чиқариш, инновацион ва бошқа компания ва ташкилотларда таълим олишини ташкил этиш;

вазирликлар, идоралар ва ташкилотларнинг тўғридан-тўғри буюртмалари асосида истиқболли ва талаб юқори бўлган мутахассисликлар бўйича стажировкадан ўтиш дастурларини ташкил этиш;

хориждаги нуфузли илмий-тадқиқот, таълим ва тиббиёт муассасаларида, иқтисодиётнинг истиқболли тармоқларида, айниқса, энг янги инновацион технологияларни ишлаб чиқариш ва қўллаш соҳаларида ишлаётган, қимматли илмий ва амалий тажрибага эга ватандошларимиз билан алоқалар ўрнатиш;

давлат органларининг кадрлар бўйича хизматлари томонидан фойдаланилиши ва онлайн тарзда излаш мумкин бўлган, жаҳон мамлакатлари ҳамда мутахассисликлар бўйича каталоглаштирилган қимматли илмий ва амалий тажрибага эга ватандошларнинг электрон реестри (маълумотлар базаси)ни яратиш ва юритиш;

хорижий олимлар, ўқитувчилар, муҳандислар ва бошқа мутахассисларни, шу жумладан ватандошларни таълим, соғлиқни сақлаш, иқтисодиёт ва давлат бошқаруви соҳаларига, айниқса, янги, истиқболли тармоқларга жалб этиш, улар учун қулай шароитлар яратиш, долзарб муаммоларини ҳал этиш, уларнинг салоҳиятидан самарали фойдаланишни таъминлаш бўйича таклифлар ишлаб чиқиш ва тадбирларни амалга ошириш;

таълим, соғлиқни сақлаш ва иқтисодиёт соҳаларида меҳнат қилаётган ватандошлар орасида Ўзбекистоннинг ижобий қиёфасини шакллантириш, Ўзбекистон Республикасида иқтисодиёт тармоқлари ва ижтимоий соҳани ривожлантириш масалалари бўйича уларнинг ғоя ва фикрларини тўплаш, умумлаштириш ва тегишли ташкилотларга етказиш, шунингдек, тўпланган материалларни тайёрлаш ва тарқатишнинг самарали тизимини яратиш;

хорижда Ўзбекистоннинг ижобий имижини шакллантириш ва қўллаб-қувватлашда, шунингдек, жаҳоннинг ривожланган мамлакатларидаги нуфузли таълим ва илмий марказлари, халқаро ташкилотлар билан алоқаларни йўлга қўйиш ҳамда ҳамкорликни ривожлантиришда ватандошлар салоҳиятидан фаол фойдаланиш;

жаҳоннинг ривожланган мамлакатларидаги етакчи таълим ва илмий муассасаларида бакалавриат, магистратура ва докторантура дастурлари бўйича таълим, соғлиқни сақлаш, иқтисодиёт ва давлат бошқаруви соҳаларидаги истиқболли мутахассисларни, шу жумладан педагоглар ва илмий кадрларни танлаб олиш ҳамда тайёрлашни ташкил этиш;

нуфузли хорижий таълим, илмий ва бошқа муассасаларда истиқболли мутахассисларнинг ўқишини мониторинг қилиш, уларнинг Ўзбекистонда муносиб ишга жойлашишига кўмаклашиш, ушбу мутахассисларнинг меҳнат фаолиятини мониторинг қилиш, уларнинг касбий жиҳатдан ўсишига ва мансаб поғоналарида кўтарилишида кўмаклашиш;

маҳаллий ҳамда хорижий экспертларнинг, шу жумладан ватандошларимизнинг Ўзбекистондаги ижтимоий-сиёсий ва социал-иқтисодий ислоҳотларнинг боришига оид таҳлилий материаллари чоп этиладиган журналлар, илмий тўпламларни тайёрлаш ва кенг тарқатиш;

давлат органлари ва бошқа ташкилотларда кадрларни хорижда ўқитиш борасидаги ишлар ҳолатини мониторинг қилиш ҳамда хорижда кадрларни тайёрлаш ва хорижий мутахассисларни жалб этиш тизимини такомиллаштириш бўйича таклифлар ишлаб чиқиш;

таълим, соғлиқни сақлаш, иқтисодиёт ва давлат бошқаруви соҳаларида халқаро ташкилотлар, хорижий мамлакатларнинг давлат тузилмалари ва нодавлат ташкилотлари билан алоқаларни йўлга қўйиш ҳамда уларни ҳамкорликни ривожлантириш бўйича лойиҳаларни амалга оширишга жалб этиш.

3-боб. Жамғарманинг ҳуқуқлари

7. Жамғарма асосий вазифалари ва фаолиятининг йўналишларига мувофиқ қуйидаги ҳуқуқларга эга:

давлат органлари ва бошқа ташкилотлардан кадрларнинг хорижда таълим олиши бўйича ишлар ҳолати, хорижий мутахассисларга бўлган эҳтиёж ва уларни, хусусан ватандошлар орасидан жалб этиш, шунингдек, айниқса давлат хизматига жалб этилган мутахассислар фаолияти самарадорлигига доир тегишли ахборотни сўраб олиш;

стипендиатларнинг нуфузли хорижий таълим, илмий ва бошқа муассасаларда бакалавриат, магистратура ва докторантурада таълим олиш дастурлари (кейинги ўринларда — таълим дастурлари)да таълим олиши мониторингини юритиш масалаларида тегишли хорижий ва маҳаллий ташкилотлар, Ўзбекистон Республикасининг хорижий ваколатхоналари билан ҳамкорлик қилиш;

стипендиатлар хорижда ўқишни тугатганидан сўнг уларнинг республикадаги профессионал фаолияти мониторингини ўтказиш, уларни Ўзбекистонда муносиб ишга жойлаштиришга, касбий ва мансаб поғоналарида кўтарилишига кўмаклашиш масалалари бўйича вазирликлар, идоралар ва бошқа ташкилотлар билан ўзаро ҳамкорлик қилиш;

олий таълим муассасаларининг таълим жараёнлари, илмий ташкилотларда тадқиқотчилик фаолияти, шунингдек, вазирликлар, идоралар ва бошқа ташкилотларда амалий фаолиятда иштирок этиши учун хорижлик етакчи ўқитувчилар, олимлар, муҳандис-техник кадрлар ҳамда мутахассисларни республикага белгиланган тартибда таклиф этиш;

Ўзбекистон Республикаси ва хорижий мамлакатлар ҳудудида ўз номидан ва ўз ваколатлари доирасида жисмоний ва юридик шахслар билан шартномалар ҳамда бошқа ҳужжатларни ишлаб чиқиш ва имзолаш;

Жамғарма таълим дастурларини ташкил этиш, шу жумладан республикага хорижий олимлар ва мутахассисларни, хусусан ватандошларни жалб қилиш учун хорижий ҳамкорлар билан биржа танловлари ва ваколатли органларда контрактлар (шартномалар) экспертизасини ўтказмаган ҳолда тўғридан-тўғри шартномалар тузиш;

Ўзбекистон Республикаси ва хорижий мамлакатлар ҳудудида турли кўргазмалар, танловлар, конференциялар ва бошқа илмий ҳамда таълим тадбирларини ташкил этиш;

давлат хизматчилари ва бошқа тоифа ходимлари салоҳиятини оширишга кўмаклашиш, иқтидорли ва истиқболли ёшларни рағбатлантириш мақсадида етакчи хорижий ҳамда маҳаллий олимлар ва экспертларни, жумладан ватандошларни жалб этган ҳолда ўқув курслари, илмий-маърифий ва бошқа тадбирларни ташкил этиш;

Жамғарма фаолиятига вазирликлар, идоралар, таълим, илмий ва бошқа муассасалар, шу жумладан хорижий мамлакатларнинг илмий-педагогик кадрлари ҳамда мутахассисларини шартнома асосида жалб этиш;

белгиланган тартибда республика ҳудудида ва унинг ташқарисида ташкил этиладиган халқаро таълим ҳамда илмий ташкилотлар, турли нодавлат нотижорат ташкилотлари, тадбиркорлик субъектларининг муассиси ва ҳаммуассиси бўлиш;

шартнома асосида турли таълим, илмий, маслаҳат ва бошқа хизматлар кўрсатиш.

Жамғарма қонун ҳужжатларига зид бўлмаган бошқа фаолият билан ҳам шуғулланиш ҳуқуқига эга.

Жамғарма бир йилда камида икки марта нашр этиладиган «UzBridge» электрон илмий, ижтимоий-иқтисодий, маданий-маърифий журналини чоп этади.

4-боб. Жамғарма фаолиятини ташкил этиш

8. Жамғарманинг олий бошқарув органи Васийлик кенгаши ҳисобланади.

Жамғарма Васийлик кенгаши таркиби Ўзбекистон Республикаси Президенти томонидан тасдиқланади.

Жамғарма Васийлик кенгашининг мажлислари раис ёки унинг топшириғига кўра раис ўринбосари раҳбарлигида ўтказилади.

Жамғарма Васийлик кенгашининг мажлислари зарурат бўйича, аммо бир йилда камида бир марта ўтказилади. Жамғарма Васийлик кенгашининг қарорлари баённома билан расмийлаштирилади.

Васийлик кенгашининг ўз ваколатлари доирасида қабул қилган қарорлари барча манфаатдор вазирликлар, идоралар ва бошқа ташкилотлар, шунингдек, Жамғарманинг таълим дастурларида иштирок этаётган жисмоний шахслар учун мажбурий ҳисобланади.

9. Жамғарманинг Васийлик кенгаши:

Жамғарма фаолиятини ташкил этиш ва уни ривожлантириш, Жамғарманинг таълим ва бошқа дастурлари бўйича маблағларини тақсимлаш ва фойдаланишга оид энг муҳим масалалар бўйича қарорлар қабул қилади;

номзодларни танлов асосида саралаб олиш йўналишлари ва Жамғарма таълим дастурлари бўйича таълим соҳалари кесимида квоталар ажратиш учун истиқболли ҳамда талаб юқори бўлган мутахассисликлар рўйхатини белгилайди;

Олдинги таҳрирга қаранг.

таълим дастурлари ва номзодларни саралаш танловини ўтказиш йўналишлари бўйича истиқболли ва талаб юқори бўлган мутахассисликларни ҳисобга олган ҳолда таълим соҳалари кесимида стипендиялар квоталарини ажратади, шунингдек, танловда рақобат даражасини эътиборга олган ҳолда, квоталарга ўзгартиришлар киритади;

(9-банд Ўзбекистон Республикаси Президентининг 2021 йил 9 ноябрдаги ПФ-3-сонли Фармонига асосан тўртинчи хатбоши билан тўлдирилган — Қонунчилик маълумотлари миллий базаси, 09.11.2021 й., 06/21/3/1037-сон)

Жамғарма стипендияларини олиш учун тегишли йўналишлар бўйича календарь йил давомида даврий равишда, ажратилган молиявий ресурслар доирасида очиқ саралаш танловларини эълон қилади;

Жамғарма таълим дастурлари бўйича тавсия этилган мамлакатлар, таълим, илмий ва бошқа муассасаларни тавсия этган ҳолда очиқ саралаш танловлари ғолибларини тасдиқлайди;

Жамғарма стипендияларини молиялаштиришнинг бир стипендиатга мўлжалланган чекланган миқдорини тасдиқлайди;

етакчи хорижий таълим, илмий ва бошқа муассасалар бакалавриати, магистратураси ёки докторантурасига мустақил ўқишга кирган ҳамда таълим олаётган Ўзбекистон Республикаси фуқароларига Жамғарма стипендияларини ажратиш тўғрисида қарорлар қабул қилади;

саралаш танловининг барча йўналишларида Жамғарма таълим дастурлари бўйича таълим олиш учун тавсия этиладиган хорижий таълим, илмий ва бошқа муассасалар, вазирликлар, агентликлар, ишлаб чиқариш, инновацион компаниялар ва бошқа ташкилотлар рўйхатини тасдиқлайди;

Жамғарманинг йиллик даромад ва харажатлари, Жамғарма томонидан хорижий ва маҳаллий таълим, илмий ва бошқа муассасалар билан биргаликда ташкил этиладиган таълим, тадқиқот ва бошқа лойиҳаларни молиялаштириш учун Жамғарма сарф-харажатларини тасдиқлайди;

мамлакатда амалга оширилаётган кенг кўламли ижтимоий-иқтисодий ислоҳотларнинг тобора ортиб бораётган талабларини ҳисобга олган ҳолда хорижий олимлар, тадқиқотчилар, муҳандис-техник кадрлар ва бошқа мутахассисларни, шу жумладан ватандошларни доимий ва вақтинчалик асосда ишга жалб этиш билан боғлиқ харажатларнинг чекланган миқдорини тасдиқлайди;

ватандошлар иштирокида хорижда Ўзбекистон ҳақида ижобий ахборот муҳитини шакллантиришга, нуфузли таълим, илмий ва бошқа муассасалар билан алоқалар ўрнатиш ва ҳамкорликни ривожлантиришга қаратилган чора-тадбирларни амалга ошириш билан боғлиқ харажатларнинг чекланган миқдорларини тасдиқлайди;

давлат хизматчилари ва бошқа тоифа ходимлари салоҳиятини оширишда кўмаклашиш, иқтидорли ва истиқболли ёшларни рағбатлантириш мақсадида илғор хорижий ҳамда маҳаллий олимлар ва экспертларни, жумладан ватандошларни жалб этган ҳолда ўқув курслари, илмий-маърифий ва бошқа тадбирларни ташкил этишни молиялаштириш бўйича қарорлар қабул қилади;

Жамғарма фаолиятига алоқадор бошқа масалаларни кўриб чиқади ва улар бўйича қарорлар қабул қилади.

Жамғарма Васийлик кенгаши аъзолари Жамғармани бошқариш бўйича мажбуриятларини жамоатчилик асосида бажарадилар.

5-боб. Жамғарма фаолиятини бошқариш

10. Жамғармага Ўзбекистон Республикаси Президенти томонидан лавозимга тайинланадиган ва лавозимидан озод қилинадиган ижрочи директор раҳбарлик қилади.

Олдинги таҳрирга қаранг.

Жамғарманинг ижрочи директори Ўзбекистон Республикаси Президенти ёрдамчиси томонидан лавозимга тайинланадиган ва лавозимидан озод этиладиган икки нафар ўринбосарга, шу жумладан бир нафар биринчи ўринбосарга эга.

(10-банднинг иккинчи хатбошиси Ўзбекистон Республикаси Президентининг 2024 йил 25 октябрдаги ПФ-168-сонли Фармони таҳририда)

Жамғарманинг ижрочи директори мақоми, тиббий ва транспорт хизматлари кўрсатиш шароитларига кўра Ўзбекистон Республикаси Президенти маслаҳатчисининг ўринбосарига, унинг ўринбосарлари эса — Ўзбекистон Республикаси Президенти Администрацияси шуъба мудирига тенглаштирилади.

Ижрочи директор бўлмаган даврда унинг ваколатлари мажбуриятлар тақсимотига мувофиқ унинг ўринбосарларидан бири томонидан амалга оширилади.

11. Жамғарманинг ижрочи директори:

Жамғарма олдига қўйилган мақсад ва вазифаларга эришишни таъминлашга, Жамғарма маблағларини мақсадли ва самарали сарфлашга шахсан жавобгар ҳисобланади;

Жамғарманинг жорий фаолиятини ташкил этади ва унинг зиммасига юклатилган вазифаларни бажариш чораларини кўради;

Жамғарма Васийлик кенгаши томонидан белгилаб берилган йўналишларга мувофиқ Жамғарма фаолиятига умумий раҳбарликни амалга оширади;

Жамғарма Васийлик кенгаши қарорлари бажарилишини таъминлайди;

Жамғарма ходимларини лавозимга тайинлайди ва лавозимидан озод этади;

давлат ва хўжалик бошқаруви органларида, бошқа ташкилотларда, шу жумладан хорижий мамлакатларда, шунингдек, халқаро ташкилотларда Жамғарма вакили ҳисобланади;

Жамғарма штатлар жадвалини ва харажатлар сметасини тасдиқлайди;

бўш турган молиявий ресурсларнинг амалдаги қонун ҳужжатларига мувофиқ самарали бошқарилишини таъминлайди;

Жамғарманинг лавозим йўриқномалари ва бошқа ички ҳужжатларини тасдиқлайди;

Жамғарма ходимларини моддий рағбатлантириш бўйича белгиланган тартибда чоралар кўради;

қонун ҳужжатларида белгиланган тартибда ишончномалар беради;

Жамғарма номидан шартномалар тузади ва Жамғарма ходимлари томонидан бажарилиши мажбурий бўлган буйруқлар чиқаради.

Ижрочи директор амалдаги қонун ҳужжатларига мувофиқ бошқа ҳуқуқ ва мажбуриятларга ҳам эга бўлиши мумкин.

6-боб. Жамғарманинг мулки, молиявий маблағлари, ҳисоби ва ҳисоботи

12. Жамғарманинг мулки асосий воситалар, бинолар, иншоотлар, ускуналар, айланма маблағлар ва маблағларни шакллантиришнинг барча манбалари ҳисобидан харид қилинган бошқа моддий қимматликлар, шунингдек, Жамғарманинг молиявий ресурсларидан иборат.

13. Жамғарма тўртта, шу жумладан учта бириктирилган ва битта навбатчи енгил автотранспорт воситаларини сақлаш лимитига эга.

14. Жамғарма мулкининг қиймати унинг мустақил балансида акс эттирилади.

15. Қуйидагилар Жамғарма харажатларини молиялаштириш манбалари ҳисобланади:

Ўзбекистон Республикаси Давлат бюджети маблағлари;

Ўзбекистон Республикаси Тикланиш ва тараққиёт жамғармаси маблағлари;

хўжалик фаолияти ва шартнома асосида хизматлар кўрсатишдан тушумлар;

жисмоний ва юридик шахсларнинг ҳомийлик хайриялари;

халқаро молиявий институтлар ва хорижий ташкилотларнинг грантлари;

Ўзбекистон Республикаси Президенти ҳузуридаги Давлат хизматини ривожлантириш агентлигининг Давлат хизматини ривожлантиришни қўллаб-қувватлаш жамғармаси маблағлари;

қонун ҳужжатлари билан тақиқланмаган бошқа манбалар.

16. Ўзбекистон Республикаси Давлат бюджети ҳисобидан Жамғармага ажратилган молиявий маблағлар қуйидаги харажатларни қоплашга йўналтирилади:

а) таълим дастурлари, хорижий олимлар ва экспертларни, шу жумладан ватандошларни таклиф қилишни, шунингдек, давлат хизматчилари салоҳиятини оширишга кўмаклашиш бўйича тадбирларни молиялаштириш учун ажратилган маблағлар қисмида:

саралаш танлови йўналишлари бўйича стипендиялар квоталари ва бир стипендиатга маблағлар сарфининг чекланган меъёрларига мувофиқ равишда Жамғарманинг таълим дастурларини амалга ошириш;

хорижий олимлар ва экспертларни жалб қилиш, чет элда истиқомат қилувчи қимматли касбий тажрибага эга ватандошлар билан алоқалар ўрнатиш ва доимий мулоқот олиб бориш;

хорижда Ўзбекистоннинг ижобий имижини шакллантириш ва фаол илгари суриш, нуфузли таълим, илмий ва бошқа муассасалар билан ҳамкорликни ривожлантиришга қаратилган халқаро форумлар, конференциялар ва бошқа тадбирларни ўтказиш;

давлат хизматчилари ва бошқа тоифа ходимлари салоҳиятини оширишга кўмаклашиш, иқтидорли ва истиқболли ёшларни рағбатлантириш мақсадида хорижий ҳамда маҳаллий олимлар ва экспертларни жалб этган ҳолда ўқув курслари, илмий-маърифий ва бошқа тадбирлар ташкил этишни молиялаштириш;

б) жорий таъминот, шу жумладан ишчи ходимлар меҳнатига ҳақ тўлаш, Жамғармага юклатилган бевосита вазифаларни бажариш учун ажратилган маблағлар қисмида:

жорий таъминот, шу жумладан ходимлар меҳнатига ҳақ тўлаш ва уларни моддий рағбатлантириш, Жамғарма кадрларининг салоҳиятини ошириш, унинг ахборот ва моддий-техника базасини ривожлантириш;

Жамғарма таълим дастурлари бўйича очиқ саралаш танловини ўтказиш, хорижий олимлар ва экспертларни, шу жумладан ватандошларни таклиф қилиш бўйича фаолиятни таъминлаш;

Жамғарма зиммасига юклатилган бошқа вазифаларни бажариш.

17. Жамғарма ходимларига Олий ва ўрта махсус таълим вазирлигидаги тегишли лавозимлар учун белгиланган меҳнатга ҳақ тўлаш ва моддий рағбатлантириш миқдорлари ва шароитлари татбиқ этилади.

Жамғарма ходимларининг лавозим маошига улар иш ҳажми ва самарадорлигидан келиб чиқиб (меҳнатни рағбатлантириш коэффициенти ҳисобга олинган ҳолда), лавозим маошининг 100 фоизигача миқдорда ҳар ойлик устамалар белгиланади.

18. Жамғарма ўз мажбуриятлари бўйича қонун ҳужжатларига мувофиқ унга тегишли бўлган барча мол-мулк билан жавобгар бўлади.

19. Жамғарма белгиланган тартибда бухгалтерия ҳисобини олиб боради, молиявий ва статистика ҳисоботини юритади.

7-боб. Якунловчи қоида

20. Жамғармани қайта ташкил этиш ва уни тугатиш қонун ҳужжатларида белгиланган тартибда амалга оширилади.

Ўзбекистон Республикаси Президентининг 2021 йил 11 февралдаги ПФ-6168-сон Фармонига
3-ИЛОВА

Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси Васийлик кенгаши

ТАРКИБИ

Олдинги таҳрирга қаранг.

лавозимига кўра	—	Ўзбекистон Республикаси Президентининг кадрлар сиёсати масалалари бўйича маслаҳатчиси — Ўзбекистон Республикаси Президенти ҳузуридаги Давлат хизматини ривожлантириш агентлиги директори, Васийлик кенгаши раиси
лавозимига кўра	—	Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси ижрочи директори, Васийлик кенгаши раисининг ўринбосари
А.Ш. Бекмуродов	—	Ўзбекистон Республикаси Президенти ҳузуридаги Давлат бошқаруви академияси ректори, Васийлик кенгаши раисининг ўринбосари
А.Х. Тошкулов	—	Ўзбекистон Республикаси олий ва ўрта махсус таълим вазири, Васийлик кенгаши раисининг ўринбосари
А.Х. Камилов	—	Ўзбекистон Республикаси ташқи ишлар вазири
Р.К. Давлетов	—	Ўзбекистон Республикаси адлия вазири
Ш.Х. Шерматов	—	Ўзбекистон Республикаси халқ таълими вазири
Б.С. Юлдашев	—	Ўзбекистон Республикаси Фанлар академияси президенти
Н.Б. Хусанов	—	Ўзбекистон Республикаси бандлик ва меҳнат муносабатлари вазири
А.М. Хаджибаев	—	Ўзбекистон Республикаси соғлиқни сақлаш вазири
Ж.А. Ходжаев	—	Ўзбекистон Республикаси қишлоқ хўжалиги вазири
И.Ю. Абдурахмонов	—	Ўзбекистон Республикаси инновацион ривожланиш вазири
У.Н. Ташкенбаев	—	Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси бошлиғи
М.М. Ходжиматов	—	Республика Маънавият ва маърифат маркази раҳбари
С.С. Саидов	—	Ўзбекистон Ёзувчилар уюшмаси раиси
А.З. Саъдуллаев	—	Ўзбекистон Республикаси ёшлар сиёсати ва спорт вазирининг биринчи ўринбосари — Ёшлар ишлари агентлиги директори
И.И. Норқулов	—	Ўзбекистон Республикаси иқтисодий тараққиёт ва камбағалликни қисқартириш вазирининг биринчи ўринбосари
А.Б. Воитов	—	Ўзбекистон Республикаси инвестициялар ва ташқи савдо вазирининг биринчи ўринбосари
Ж.И. Абруев	—	Ўзбекистон Республикаси молия вазирининг ўринбосари
лавозимига кўра	—	Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси ижрочи директорининг ўринбосари, Васийлик кенгаши котиби

Изоҳ. Васийлик кенгаши аъзолари бошқа ишга ўтган тақдирда унинг таркибига ушбу лавозимларга янги тайинланган ёки зиммасига тегишли функцияларни бажариш юкланган шахслар киритилади.

(3-илова Ўзбекистон Республикаси Президентининг 2024 йил 25 октябрдаги ПФ-168-сонли Фармони таҳририда)

Ўзбекистон Республикаси Президентининг 2021 йил 11 февралдаги ПФ-6168-сон Фармонига
4-ИЛОВА

НИЗОМ

1-боб. Умумий қоидалар

1. Ушбу Низом Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси (кейинги ўринларда — Жамғарма) томонидан хорижда бакалавриат, магистратура ва докторантурада таълим олиш дастурлари (кейинги ўринларда — таълим дастурлари) бўйича номзодларни очиқ саралаш танловини ташкил этиш тартиби ва механизмларини белгилайди.

2. Жамғарма таълим дастурлари бўйича таълим олишга юбориш очиқ саралаш танлови асосида амалга оширилади.

Очиқ саралаш танлови аризалар келиб тушиши ва тўпланишига қараб, календарь йил давомида даврий равишда, аммо бир йилда камида икки маротаба ўтказилади.

3. Номзодларни очиқ саралаш танловини ташкил этиш ва ўтказиш Танлов комиссияси томонидан амалга оширилади, унинг шахсий таркиби ҳамда ишлаш тартиби Жамғарманинг Васийлик кенгаши томонидан тасдиқланади.

4. Таълим дастурлари бўйича таълим олишга қабул фақат Ўзбекистон Республикаси фуқаролари учун ҳамда қабул ва танлаб олишнинг ягона қоидалари асосида амалга оширилади.

Олдинги таҳрирга қаранг.

Шу билан бирга, қоидага кўра, ўз назарий билим ва/ёки амалий тажрибалари натижасида хорижда таълим олиш учун хорижий таълим, илмий ёки бошқа муассаса томонидан номзодга таклиф этилган грант (стипендия ёки бошқа молиявий имтиёз)лар миқдори ёхуд таълим муддатининг қисқалиги танлов жараёнида устунлик берувчи ҳолат сифатида эътиборга олинади.

(4-банд Ўзбекистон Республикаси Президентининг 2021 йил 9 ноябрдаги ПФ-3-сонли Фармонига асосан иккинчи хатбоши билан тўлдирилган — Қонунчилик маълумотлари миллий базаси, 09.11.2021 й., 06/21/3/1037-сон)

5. Саралаш танловларида қуйидаги шахслар иштирок эта олмайди:

а) бакалавриат таълим дастурлари бўйича — 25 ёшдан катта бўлган, аввал ўхшаш таълим йўналиши бўйича хорижда бакалавриатда таълим олганлар;

б) магистратура таълим дастурлари бўйича — 20 ёшдан кичик ва 45 ёшдан катта бўлган, шунингдек, аввал ўхшаш мутахассислик бўйича хорижда магистратурада таълим олганлар;

в) докторантура таълим дастурлари бўйича (шу жумладан аспирантура орқали фалсафа доктори (PhD) ёки фан доктори (DSc) илмий даражасини олиш учун) — 22 ёшдан кичик ва 45 ёшдан катта бўлган, шунингдек, аввал фалсафа доктори (PhD), фан номзоди ёки фан доктори (DSc) илмий даражасини хорижда олганлар;

г) танланган мутахассислик бўйича меҳнат стажи 2 йилдан кам бўлганлар;

д) олий маълумотга эга бўлмаганлар (мазкур талаб бакалавриат таълим йўналиши бўйича номзодларга татбиқ этилмайди);

е) давлат ҳокимиятининг сайлаб қўйиладиган органларида фаолият юритаётганлар;

ж) оғир ёки ўта оғир жиноятларни содир этганлик учун судланганлиги тугалланмаган ёхуд судланганлиги олиб ташланмаганлар.

6. Ўзбекистон Республикаси олий таълим муассасалари томонидан докторантура ва магистратурада таълим олиш дастурларига тавсия этилган номзодларга, шунингдек, бакалавриат таълим дастури бўйича номзодларга меҳнат стажидан қатъи назар саралаш танловида иштирок этишга рухсат берилади.

2-боб. Жамғарма стипендиялари

Олдинги таҳрирга қаранг.

7. Жамғарма стипендиялари белгиланган тартибда Жамғарма Васийлик кенгаши томонидан ҳар йили тасдиқланадиган таълим дастурларига мувофиқ етакчи хорижий таълим, илмий ва бошқа муассасаларда қуйидаги дастурлар бўйича таълим олиш учун ажратилади:

докторантура (аспирантура) — 3-4 йилга қадар;

магистратура — 1-2 йилга қадар;

бакалавриат — 3-4 йилга қадар.

Айрим ривожланган давлатлар таълим муассасаларида бир йилгача бакалавриатга тайёрлов курслари (Fоundаtiоn yеаr/cоursе) харажатлари Жамғарма томонидан молиялаштирилиши мумкин. Бунда, тайёрлов курси ва бакалавриатда ўқишнинг умумий муддати 4 йилдан ошмаслиги лозим.

Докторантура (шу жумладан аспирантура орқали фалсафа доктори (PhD) ёки фан доктори (DSc) даражасини олиш учун), магистратура ёки бакалавриатда таълим олиш тегишли хорижий мамлакатларнинг таълим, илмий ёки бошқа муассасалари томонидан қабул қилинган стандартлар, талаблар ва ўқув режаларига мувофиқ амалга оширилади.

Ўзбекистон Республикаси Соғлиқни сақлаш вазирлигининг тавсияси ва Жамғарма Васийлик кенгашининг қарорига мувофиқ республика учун алоҳида аҳамиятга эга тиббий мутахассисликлар бўйича икки йилгача клиник ординатурани ўташ учун стипендиялар ажратилиши мумкин. Бунда клиник ординатурага магистратура дастури бўйича ўқишнинг ўзига хос шакли сифатида қаралади.

Жамғарма буюртмачи ташкилотнинг асосланган таклифига мувофиқ, истисно тариқасида, хорижий олий таълим, илмий ва бошқа муассасаларнинг мурожаатлари асосида докторантура ва магистратурада таълим олиш муддатини, қўшимча молиялаштириш ҳуқуқисиз, бир семестргача узайтириш тўғрисида қарор қабул қилиш ҳуқуқига эга.

(7-банд Ўзбекистон Республикаси Президентининг 2021 йил 9 ноябрдаги ПФ-3-сонли Фармони таҳририда — Қонунчилик маълумотлари миллий базаси, 09.11.2021 й., 06/21/3/1037-сон)

8. Жамғарма стипендиялари ушбу Низом талаблари асосида очиқ саралаш танловидан ўтган шахслар (кейинги ўринларда — Стипендиатлар)га хорижда таълим олиш мақсадида қуйидаги харажатларни қоплаш учун ажратилади:

хорижий таълим, илмий ва бошқа муассасалар, вазирликлар, ишлаб чиқариш, инновацион компаниялар ҳамда бошқа ташкилотларда Стипендиатларнинг бакалавриат, магистратура ёки докторантурада ўқиши қиймати тўлови;

Стипендиатлар томонидан визалар олиш;

Стипендиатларнинг барча турдаги транспорт воситалари билан таълим олиш жойигача бўлган йўлкира харажатлари (иккала томонга, кўпи билан йилига бир марта);

бакалавриат, магистратура ёки докторантурада таълим олиш даврида Стипендиатларнинг яшаш, овқатланиш ва транспорт харажатлари;

зарур ўқув ва илмий адабиётларни харид қилиш, шу жумладан дарсликлар сотиб олиш, Стипендиат таълим олаётган хорижий таълим, илмий ёки бошқа муассаса талабларига биноан илмий мақолалар чоп эттириш, илмий мақолаларни кўчириб (электрон тарзда юклаб) олиш, мақолалар ҳамда илмий адабиётларнинг электрон базасига обуна бўлиш;

хорижда бакалавриат, магистратура ёки докторантурада таълим олиш даврида Стипендиатларни тиббий суғурталаш;

Жамғарма Васийлик кенгаши қарорига кўра Стипендиатларнинг хорижда таълим олиши билан бевосита боғлиқ бошқа харажатлари.

Ҳар бир таълим дастури бўйича битта Стипендиатга ажратиладиган харажатларнинг чекланган миқдори Жамғарманинг Васийлик кенгаши томонидан белгиланади.

3-боб. Саралаш танловида иштирок этиш учун ҳужжатларни қабул қилиш тартиби

9. Жамғарма Васийлик кенгаши қарорига мувофиқ таълим дастурлари бўйича ўтказиладиган очиқ саралаш танлови ҳақидаги эълон ҳужжатларни қабул қилиш муддати тугашидан камида бир ой аввал оммавий ахборот воситалари, шу жумладан интернет нашрлар ва Жамғарманинг расмий веб-сайтига жойлаштирилади.

Очиқ саралаш танлови ўтказиш тўғрисидаги эълон қуйидаги маълумотлардан иборат бўлиши лозим:

аризаларни қабул қилиш муддатлари, тартиби ва жойи;

зарур ҳужжатлар рўйхати;

танлов иштирокчиларига қўйиладиган талаблар (ёши, мутахассислик бўйича зарур меҳнат стажи, хорижий тилни билиш даражаси ҳамда хорижда ўқишга киришга қўйиладиган талаблар, илмий мақолаларнинг мавжудлиги ва бошқалар);

саралаш танловини ўтказиш жойи ва муддатлари;

алоқа телефонлари ва электрон манзиллар.

10. Барча таълим дастурлари бўйича номзодлар Жамғармага қуйидаги ҳужжатларни тақдим қиладилар:

а) таълим дастури, шу жумладан ўқийдиган мутахассислиги, танланган мамлакат, таълим, илмий ёки бошқа муассаса кўрсатилган ҳолда белгиланган шаклда Жамғарма ижрочи директори номига ариза;

б) паспорт нусхаси;

в) иш жойи ва лавозими сақланиши ёки тегишли таълим дастури тугаганидан сўнг ишга жойлаштириш бўйича мажбуриятлар акс этган буюртмачининг кафолат хати (танлов ғолиблари учун);

Олдинги таҳрирга қаранг.

г) узрсиз сабабларга кўра Стипендиат билан тузилган шартнома бекор қилинган тақдирда, Жамғарма молиявий харажатларини (ўтган йиллар давомида истеъмол нархлари индексининг ўртача йиллик даражасига тенг жарима билан) қоплаш тўғрисида манфаатдор вазирлик, идора, корхона ва ташкилотлар — юридик шахслар ва жисмоний шахслар (устувор равишда Стипендиатнинг ота-онаси, ака-укаси ёки опа-синглиси, улар қонунчилик ҳужжатларида белгиланган тартибда кафил бўла олмаган тақдирда уларга тенглаштирилган бошқа шахслар) томонидан берилган кафолат хати, банк кафолати ёки суғурта ташкилотининг суғурта полиси (танлов ғолиблари учун).

Бунда, номзод тўғрисидаги маълумотлар белгиланган тартибда «Ягона миллий меҳнат тизими» идоралараро дастурий-аппарат комплексига тўлиқ киритилиши таъминланиши шарт.

(10-банднинг «г» кичик банди Ўзбекистон Республикаси Президентининг 2021 йил 9 ноябрдаги ПФ-3-сонли Фармони таҳририда — Қонунчилик маълумотлари миллий базаси, 09.11.2021 й., 06/21/3/1037-сон)

11. Хорижда бакалавриатда ўқиш дастури бўйича номзодлар 10-бандда кўрсатилган ҳужжатларга қўшимча равишда қуйидагиларни тақдим қилади:

а) хорижий таълим муассасасига ўқишга қабул қилинганлиги ёки шартли қабул қилинганлиги тўғрисидаги таклифнома-хат (Lеttеr оf аccеptаncе ёки Lеttеr оf cоnditiоnаl аccеptаncе);

б) хорижий тилни билиш даражасини белгиловчи CEFR тизими бўйича В2 даражасидан паст бўлмаган амалдаги миллий ёки халқаро сертификат (Миллий сертификат, IELTS, TOEFL ва бошқалар).

Хорижий таълим муассасасига шартсиз қабул қилинганлиги тўғрисидаги таклифнома-хат (Lеttеr оf аccеptаncе)ни тақдим этган номзодлар, бундан мустасно;

в) хорижда таълим олишдан кўзланган мақсад ва таълим олиш тугагач олинган билимларни Ўзбекистонда қўллаш имкониятлари ҳақида эссе (ёзма иш).

12. Хорижда магистратурада ўқиш дастури бўйича номзодлар 10-бандда кўрсатилган ҳужжатларга қўшимча равишда қуйидагиларни тақдим қилади:

а) хорижий таълим, илмий ёки бошқа муассасага ўқишга қабул қилинганлиги ёки шартли қабул қилинганлиги тўғрисидаги таклифнома-хат (Lеttеr оf аccеptаncе ёки Lеttеr оf cоnditiоnаl аccеptаncе);

Хорижий таълим, илмий ёки бошқа муассасага шартсиз қабул қилинганлиги тўғрисидаги таклифнома-хат (Lеttеr оf аccеptаncе)ни тақдим этган номзодлар, бундан мустасно;

в) номзоднинг Ўзбекистонда ва хорижда (агар мавжуд бўлса) эълон қилинган илмий мақолалари рўйхати ҳамда уларнинг электрон вариантлари;

г) хорижда таълим олишдан кўзланган мақсад ва таълим олиш тугагач олинган билимларни Ўзбекистонда қўллаш имкониятлари ҳақида эссе (ёзма иш).

13. Хорижда докторантурада ўқиш дастури бўйича номзодлар 10-бандда кўрсатилган ҳужжатларга қўшимча равишда қуйидагиларни тақдим қилади:

в) танланган соҳани ривожлантириш ҳамда унинг натижаларини Ўзбекистонда қўллаш учун номзод тадқиқотининг долзарблиги тўғрисида тегишли таълим, илмий ёки бошқа муассаса раҳбарининг тавсия хати;

г) номзоднинг Ўзбекистонда ва хориждаги илмий журналларда эълон қилинган илмий мақолалари рўйхати ҳамда уларнинг электрон вариантлари;

д) режалаштирилаётган илмий тадқиқотнинг мақсадлари, услублари ва натижалари, уларни Ўзбекистонда қўллаш имкониятлари ҳақидаги эссе (ёзма иш).

14. Очиқ саралаш танловида иштирок этиш учун аризалар номзодлар томонидан онлайн тарзда электрон шаклда топширилади. Саралаш танловининг барча босқичларидан муваффақиятли ўтган номзодлар ҳужжатларини тегишли тарзда расмийлаштирилган ҳолда чоп этилган шаклда тақдим этадилар.

15. Жамғарма хорижда таълим олиш нархлари, муддатлари ва шарт-шароитларининг мақсадга мувофиқлигидан келиб чиққан ҳолда, тегишли таълим дастури бўйича Стипендиатнинг таълим олиши учун нисбатан афзал бўлган хорижий таълим, илмий ва бошқа муассасани танлаш ҳуқуқига эга.

4-боб. Жамғарма таълим дастурлари бўйича саралаш

16. Номзодларни саралаш икки босқичда амалга оширилади:

1-босқич ҳужжатларни ушбу Низомда белгиланган талаблар асосида қабул қилиш, таҳлил қилиш ва рўйхатга олишни кўзда тутади.

Ушбу босқич Жамғарма ходимлари томонидан ўтказилиб, унинг якунлари бўйича ҳужжатларини Жамғарма талабларига мос равишда тақдим этган, саралаш танловининг 2-босқичига ўтган иштирокчиларнинг йиғма рўйхати тузилади.

Олдинги таҳрирга қаранг.

2-босқичда номзодлар билан хорижда таълим олишдан кўзланган мақсад ва таълим олиш тугагач олинган билимларни Ўзбекистонда қўллаш имкониятлари, танлаган мутахассислиги бўйича билим ва кўникмалари, маънавий-ахлоқий тафаккури, соғлом дунёқараши, миллий ва умуминсоний қадриятларни, шунингдек, давлат тилини билиш даражасини аниқлашга қаратилган давлат тилида суҳбат ўтказилиши кўзда тутилади.

(16-банднинг тўртинчи хатбошиси Ўзбекистон Республикаси Президентининг 2021 йил 9 ноябрдаги ПФ-3-сонли Фармони таҳририда — Қонунчилик маълумотлари миллий базаси, 09.11.2021 й., 06/21/3/1037-сон)

Жамғарма Васийлик кенгаши қарорига кўра танловнинг 2-босқичи рақамли технологияларга асосланган ҳолда онлайн видеомулоқот шаклида ташкил этилиши мумкин.

Жамғарманинг Васийлик кенгаши номзодларнинг интеллектуал, таҳлил қилиш ва ижодий қобилиятлари даражасини аниқлашга қаратилган қўшимча тест синови ўтказиш бўйича қарор қабул қилиш ҳуқуқига эга.

2-босқич натижалари Танлов комиссиясининг имтиҳон қайдномаси билан расмийлаштирилади.

17. Танлов комиссияси танлов якунларини умумий ва Жамғарма таълим дастурлари бўйича алоҳида шаклда умумлаштиради ҳамда уларни тасдиқлаш учун Жамғарманинг Васийлик кенгашига тақдим қилади.

18. Жамғарма Васийлик кенгашининг Жамғарма таълим дастурлари бўйича ўтказилган саралаш танлови натижаларини тасдиқлаш ҳақидаги қарори танлов ўтказилгандан сўнг бир ой муддат ичида эълон қилиниши лозим.

Олдинги таҳрирга қаранг.

19. Жамғарма Васийлик кенгаши бакалавриат, магистратура ва докторантурада таълим олиш дастурлари бўйича очиқ саралаш танлови ғолибларини тавсия этиладиган мамлакатларни кўрсатган ҳолда тасдиқлайди.

(19-банднинг биринчи хатбошиси Ўзбекистон Республикаси Президентининг 2021 йил 9 ноябрдаги ПФ-3-сонли Фармони таҳририда — Қонунчилик маълумотлари миллий базаси, 09.11.2021 й., 06/21/3/1037-сон)

Очиқ саралаш танловидан муваффақиятли ўтган номзодларга Васийлик кенгаши томонидан белгиланган шаклдаги сертификатлар топширилади.

20. Жамғарма ҳар йили ўз расмий веб-сайтида Стипендиатлар учун тегишли таълим дастури бўйича тавсия этиладиган таълим, илмий ва бошқа муассасалар, вазирликлар, ишлаб чиқариш, инновацион компаниялар ва бошқа ташкилотларнинг рўйхатини эълон қилиб боради.

Ушбу рўйхат Жамғарма томонидан, биринчи навбатда, таълим соҳалари бўйича базавий олий таълим муассасаларининг, етакчи илмий муассасалар, шунингдек, манфаатдор ва мутасадди вазирликлар, идоралар ҳамда ташкилотларнинг таклифлари асосида шакллантирилади.

Рўйхатга, қоида тариқасида, THE (Thе Timеs Highеr Educаtiоn Wоrld Univеrsity Rаnkings), QS (Quаcquаrеlli Symоnds Wоrld Univеrsity Rаnkings), Thе U. S. Nеws аnd Wоrld Rеpоrt (Bеst Glоbаl Univеrsity Rаnkings) ва ARWU (Acаdеmic Rаnking оf Wоrld Univеrsitiеs) каби халқаро миқёсда эътироф этилган академик рейтингнинг энг илғор 300 та (ёки танлаб олинган фан бўйича етакчи 100 та) таълим ва илмий муассасалар рўйхатидан жой олган хорижий таълим, илмий ҳамда бошқа муассасалар киритилади.

Бундан ташқари, ушбу рўйхатга Стипендиат томонидан танлаб олинган соҳада эътироф этилган ва илғор таълим, илмий ҳамда бошқа муассасалар, вазирликлар, агентликлар, ишлаб чиқариш, инновацион ва бошқа компаниялар, халқаро иқтисодий, молиявий, энергетика ҳамда бошқа институтлар ва тузилмалар ҳам киритилиши мумкин.

Стипендиат томонидан танланган хорижий таълим, илмий ёки бошқа муассаса кўрсатилган рўйхатдан жой олмаган бўлса, Жамғарма Васийлик кенгаши қарори асосида Стипендиатга ўзи танлаган муассасада таълим дастуридан ўтишига рухсат бериш ҳуқуқига эга.

21. Агар Стипендиат танланган мутахассислик бўйича бакалавриат ва магистратура дастури учун олти ой, докторантура дастури учун бир календарь йил мобайнида танланган хорижий таълим, илмий ва бошқа муассасага шартсиз қабул қилинганлиги тўғрисидаги ҳужжатни («Lеttеr оf uncоnditiоnаl аccеptаncе») тақдим эта олмаса, унинг стипендияси бекор қилинади.

5-боб. Жамғарманинг Апелляция комиссияси

22. Ушбу Низомга риоя қилиш, суҳбат (тест)нинг ўтказилиши, шунингдек, танловни ўтказиш билан бевосита боғлиқ бўлган бошқа масалалар бўйича шикоятларни кўриб чиқиш учун Жамғарма Васийлик кенгашининг қарори билан апелляция комиссияси тузилади.

Жамғарма апелляция комиссиясининг шахсий таркиби ва ишлаш тартиби Жамғарма Васийлик кенгаши томонидан белгиланади.

23. Апелляция комиссиясига шикоят саралаш танлови натижалари эълон қилинганидан сўнг уч кун ичида топширилади.

24. Апелляция комиссияси қабул қилинган шикоятни кўриб чиқиши ва ариза берилганидан сўнг беш кун ичида тегишли қарор қабул қилиши зарур.

25. Танлов комиссиясининг тегишли кичик комиссиялари аъзолари, шунингдек, суҳбат (тест)ни олиб боришда иштирок этувчи экспертлар ишда йўл қўйган камчиликлари ва нохолислиги учун қонунчиликка мувофиқ жавобгар ҳисобланади.

6-боб. Стипендиатларнинг мажбуриятлари

26. Стипендиатлар шартномаларни (контрактларни) Жамғарма томонидан белгиланган тартибда тўлдириши ва келгусида рўйхатга олиниши ҳамда ижро этилиши учун кўрсатилган талаблар ва муддатларга мувофиқ Жамғармага тақдим этиши лозим.

Таълим дастури тугалланганидан сўнг, Стипендиатлар шартнома (контракт) талабларига қатъий амал қилган ҳолда Жамғармага диплом, сертификат ёки бошқа ҳужжат нусхасини, шунингдек, диссертациянинг (диплом, битирув ёки сертификат иши ёхуд бошқа ҳисобот шакли) электрон вариантини Жамғарманинг барча фойдаланиши мумкин бўлган электрон кутубхонасига жойлаштириш учун тақдим этишлари шарт.

27. Хорижда таълим олишга кетаётган Стипендиатлар қуйидаги масалалар бўйича якка тартибдаги инструктаждан ўтиши керак:

Ўзбекистонда амалга оширилаётган сиёсий ва ижтимоий-иқтисодий ислоҳотларнинг мазмун-моҳияти, мақсад ва вазифалари;

Ўзбекистоннинг тарихи, маданияти, анъаналари, сайёҳлик ва инвестицион салоҳияти;

халқаро этикет ва протокол, Ўзбекистон Республикасининг хориждаги ваколатхоналари билан ҳамкорлик ҳамда консуллик ҳисобида туриш.

Узрли сабабларсиз Жамғарма вакиллари билан якка тартибдаги инструктаждан ўтмаган Стипендиатлар Жамғарма Васийлик кенгаши қарори билан Стипендиатлар сафидан чиқарилиши мумкин.

28. Стипендиатларга вазирликлар, идоралар ва бошқа давлат ташкилотларида эгаллаган мутахассислиги бўйича қуйидаги муддатда тўлиқ бандлик режимида узлуксиз ишлаб бериш мажбурияти юкланади:

а) бакалавриатда ўқиш дастури бўйича — 5 (беш) йилдан кам бўлмаган муддатда;

б) магистратура ва докторантурада ўқиш дастури бўйича — 3 (уч) йилдан кам бўлмаган муддатда.

Олдинги таҳрирга қаранг.

Стипендиатнинг ўз хоҳишига кўра хорижда таълим олиш харажатларини молиялаштиришда унинг ўзи ёки молиявий кафиллари қисман иштирок этган тақдирда Стипендиатнинг мажбурий ишлаб бериш муддатига ўзгартириш киритилмайди.

(28-банд Ўзбекистон Республикаси Президентининг 2021 йил 9 ноябрдаги ПФ-3-сонли Фармонига асосан тўртинчи хатбоши билан тўлдирилган — Қонунчилик маълумотлари миллий базаси, 09.11.2021 й., 06/21/3/1037-сон)

29. Республика ҳудудларини етакчи хорижий таълим, илмий ва бошқа муассасаларда бакалавриат, магистратура ёки докторантурада таълим олган ёш мутахассислар билан таъминлаш учун қулай шароитлар яратиш мақсадида Жамғарма Васийлик кенгаши мажбурий ишлаб бериш жойи сифатида республиканинг чекка ҳудудларида жойлашган давлат ташкилотлари ёки муассасалари ҳамда давлат улуши мавжуд бўлган ташкилотларни танлаган Стипендиатларнинг мажбурий ишлаб бериш муддатини бакалавриатда ўқиш дастури бўйича 2 (икки) йилга қадар, магистратура ва докторантурада ўқиш дастури бўйича 1 (бир) йилга қадар қисқартириш бўйича қарор қабул қилиш ҳуқуқига эга.

Олдинги таҳрирга қаранг.

30. Стипендиат узрсиз сабабларга кўра хорижий таълим, илмий ёки бошқа муассасаларнинг талабалари сафидан чиқарилган ёки Жамғарма таълим дастурлари тугагандан сўнг у билан тузилган шартнома шартларига мувофиқ вазирликлар, идоралар ва бошқа давлат ташкилотлари ёхуд давлат улуши мавжуд бўлган ташкилотларда меҳнат фаолиятини давом эттиришдан бош тортган тақдирда, Жамғарма томонидан уни ўқитишга сарфланган барча молиявий харажатлар Стипендиат ва унинг молиявий кафиллари (юридик ва жисмоний шахслар) томонидан солидар тартибда қоплаб берилади.

(30-банднинг биринчи хатбошиси Ўзбекистон Республикаси Президентининг 2021 йил 9 ноябрдаги ПФ-3-сонли Фармони таҳририда — Қонунчилик маълумотлари миллий базаси, 09.11.2021 й., 06/21/3/1037-сон)

Стипендия харажатларини ҳисоблашда Стипендиатнинг хорижда таълим олиши учун хорижий валютада тўлаб берилган стипендия суммасининг Ўзбекистон Республикаси Марказий банкининг тўлов кунидаги алмашув курси асосида миллий валютада аниқланган миқдори асос сифатида қабул қилинади.

Стипендиатдан кафиллар билан биргаликда асосий тўлаб берилиши лозим бўлган харажатлар миқдори билан бирга ўтган йиллар давомида истеъмол нархлари индексининг ўртача йиллик даражасига тенг жаримани ҳисобга олган ҳолда дастурнинг тўлиқ қийматини тўлаб бериши Стипендиатлар билан тузилган шартномага мувофиқ талаб этилиши мумкин.

7-боб. Якунловчи қоида

31. Мазкур Низом талабларининг бузилишида айбдор деб топилган шахслар қонунчиликка мувофиқ жавобгарликка тортилади.

Ўзбекистон Республикаси Президентининг 2021 йил 11 февралдаги ПФ-6168-сон Фармонига
5-ИЛОВА

Давлат хизматчилари ва мутахассисларни хорижда тайёрлаш ҳамда уларнинг салоҳиятини янада ошириш тизимини тубдан такомиллаштириш юзасидан

«ЙЎЛ ХАРИТАСИ»

Т/р	Тадбирлар номланиши	Амалга ошириш шакли	Ижро муддати	Молиялаштириш манбалари	Масъул ижрочилар
I. «Эл-юрт умиди» жамғармаси фаолиятининг ташкилий-ҳуқуқий ва моддий-техник базасини янада ривожлантириш
1.	«Эл-юрт умиди» жамғармаси манфаатдор вазирликлар ва идоралар билан биргаликда қонун ҳужжатларига ушбу Фармондан келиб чиқадиган ўзгартириш ва қўшимчалар тўғрисида Ўзбекистон Республикаси Вазирлар Маҳкамасига таклифлар киритиш.	Норматив-ҳуқуқий ҳужжат лойиҳаси	2021 йил 1 апрель	Талаб этилмайди	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), Адлия вазирлиги (Р. Давлетов), манфаатдор вазирлик ва идоралар
2.	«Эл-юрт умиди» жамғармаси Васийлик кенгашида тасдиқлаш учун қуйидаги ҳужжатлар лойиҳаларини тайёрлаш ва тасдиқлаш учун киритиш: «Эл-юрт умиди» жамғармасининг штатлар жадвалини ҳамда тегишли йилга мўлжалланган даромадлар ва харажатлар истиқбол кўрсаткичлари; «Эл-юрт умиди» жамғармасининг бир стипендиатига мўлжалланган стипендиясининг энг юқори меъёрини белгилаш ва уни молиялаштириш тартиби тўғрисидаги низом; «Эл-юрт умиди» жамғармаси томонидан вазирлик, идора ва ташкилотларнинг тўғридан-тўғри буюртмалари асосида истиқболли ва талаб юқори бўлган мутахассисликлар бўйича амалга ошириладиган стажировкадан ўтишни ташкил этиш тартиби тўғрисидаги низом; «Эл-юрт умиди» жамғармаси стипендиатлари хорижда таълим олиши сифати ва натижадорлигига қўйиладиган минимал талаблар; «Эл-юрт умиди» жамғармаси стипендиатларининг таълим олиш жараёнлари ҳамда таълим олишдан кейинги меҳнат фаолияти мониторингини ташкил этиш тартиби тўғрисидаги низом; «Эл-юрт умиди» жамғармаси стипендиатларининг хорижда таълим олиши (бакалавриат, магистратура ва докторантурада таълим олиш) бўйича 4 (тўрт) томонлама шартнома намунаси.	Васийлик кенгаши қарори	Ҳар йили 1 февралга қадар 2021 йил 1 апрель	Талаб этилмайди	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), Олий ва ўрта махсус таълим вазирлиги (А. Тошкулов), Таълим сифатини назорат қилиш давлат инспекцияси (У. Ташкенбаев), Молия вазирлиги (Т. Ишметов), Адлия вазирлиги (Р. Давлетов)
3.	«Эл-юрт умиди» жамғармаси кадрлари салоҳиятини ва тажрибасини ошириш мақсадида уларни хориждаги етакчи мутасадди ташкилотлар, ҳамкор университетлар ва илмий марказлар, илғор компания ва ташкилотларга малака ошириш ёки стажировкадан ўтишга юборишни ташкил этиш.	Васийлик кенгаши қарори	2021 йил 1 апрелдан бошлаб доимий	«Эл-юрт умиди» жамғармаси, хорижий ҳамкорлар грантлари ва стипендиялари	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), Молия вазирлиги (Т. Ишметов), Ташқи ишлар вазирлиги (Ф. Арзиев)
4.	«Эл-юрт умиди» жамғармасида ахборотлар алмашуви ва уларни сақлашнинг мавжуд электрон базаларини такомиллаштириш, жамғарма фаолиятини хорижий ҳамкорлар ва ижтимоий тармоқларда фаол тарғиб этиш мақсадида махсус инновацион техник воситалар харид қилиш.	Очиқ танловга мувофиқ давлат хариди тўғрисида шартнома	2021 йил 1 май	«Эл-юрт умиди» жамғармаси ва Давлат хизматини ривожлантиришни қўллаб-қувватлаш жамғармаси	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), Молия вазирлиги (Т. Ишметов)
II. Хорижда таълим олиш дастурларини ташкил этиш мақсадида стипендия танловларини ўтказишни ташкил этиш
5.	Мазкур Фармонининг мазмуни ва «Эл-юрт умиди» жамғармаси стипендия танловларига киритилган асосий ўзгаришларга бағишланган Матбуот анжуманини ташкил этиш ва ўтказиш.	Матбуот анжумани	2021 йил 1 апрель	Талаб этилмайди	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), Олий ва ўрта махсус таълим вазирлиги (А. Тошкулов), Миллий телерадиокомпания (А. Хаджаев), Ўзбекистон Миллий ахборот агентлиги (А. Кўчимов)
6.	«Эл-юрт умиди» жамғармасининг очиқ саралаш танловида номзодларни иштирок этишга тавсия этган ҳолда «Эл-юрт умиди» жамғармаси таълим дастурлари бўйича таълим олиш учун истиқболли ва талаб юқори бўлган мутахассисликлар бўйича реал эҳтиёж тўғрисидаги маълумотлар (буюртмалар портфели)ни шакллантириш.	Буюртмалар портфели	2021 йилдан бошлаб ҳар йили 1 сентябрга қадар мунтазам равишда	Талаб этилмайди	«Эл-юрт умиди» жамғармаси (А. Бекмуродов), манфаатдор вазирлик ва идоралар, маҳаллий ижроия ҳокимияти органлари
7.	Ҳар йили камида бир марта 1 сентябрга қадар устувор мутахассисликлар бўйича хорижда ўқитиш учун буюртмалар портфелини шакллантириш мақсадида «Эл-юрт умиди» жамғармаси очиқ эшиклари» тақдимот тадбирларини ўтказиб бориш. Тадбир доирасида вазирлик, идора ва ҳудудлар раҳбарлари билан ҳамкорликда кадрларни хорижда тайёрлаш бўйича энг устувор мутахассисликларни аниқлаш ҳамда уларга мос равишда стипендия квоталари лойиҳаларини тайёрлаш амалиётини йўлга қўйиш.	Васийлик кенгаши қарори	2021 йилдан бошлаб ҳар йили 1 сентябрга қадар мунтазам равишда	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), манфаатдор вазирлик ва идоралар, маҳаллий ижроия ҳокимияти органлари, нодавлат нотижорат ташкилотлари
8.	Васийлик кенгаши қарорига мувофиқ танлов ўтказиш йўналишлари ҳамда таълим дастурлари бўйича таълим соҳалари кесимида (устувор ва талаб юқори бўлган замонавий мутахассисликларни эътиборга олган ҳолда) квоталарни тасдиқлаш ва «Эл-юрт умиди» жамғармаси стипендиялари танловини оммавий ахборот воситаларида эълон қилиш.	Васийлик кенгаши қарори	2021 йил 1 мартдан бошлаб ҳар йили мунтазам равишда	Талаб этилмайди	«Эл-юрт умиди» жамғармаси (А. Бекмуродов), Миллий телерадиокомпания (А. Хаджаев), Ўзбекистон Миллий ахборот агентлиги (А. Кўчимов)
9.	«Эл-юрт умиди» жамғармаси стипендиялари орқали хорижда таълим олиш учун тавсия этиладиган олий таълим, илмий-тадқиқот ҳамда ижодий муассасалар, компаниялар ва ташкилотлар рўйхатини ишлаб чиқиш ва эълон қилиш.	Васийлик кенгаши қарори	2021 йилдан бошлаб ҳар йили 1 декабрга қадар мунтазам равишда	Талаб этилмайди	«Эл-юрт умиди» жамғармаси (А. Бекмуродов), Олий ва ўрта махсус таълим вазирлиги (А. Тошкулов), Фанлар академияси (Б. Юлдашев), Соғлиқни сақлаш вазирлиги (А. Хаджибаев), Инновацион ривожланиш вазирлиги (И. Абдурахмонов), манфаатдор вазирлик ва идоралар
10.	«Эл-юрт умиди» жамғармасининг стипендия танловлари тартиби билан боғлиқ янгиликларни вазирлик, идора ва ташкилотлар, шу жумладан олий таълим муассасалари вакиллари орасида кенг тарғиб этишга қаратилган онлайн амалий-услубий семинарлар ташкил этиш ва ўтказиш.	Онлайн амалий-услубий семинарлар графиги	2021 йилдан бошлаб мунтазам равишда	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Олий ва ўрта махсус таълим вазирлиги (А. Тошкулов), Ёшлар ишлари агентлиги (А. Саъдуллаев)
11.	«Эл-юрт умиди» жамғармаси фаолияти ва унинг стипендиялари учун очиқ саралаш танловларини ўтказиш тартиби ва муддатлари юзасидан турли видеороликлар тайёрлаш ҳамда уларни ОАВ орқали намойиш этиш.	Режа-жадвал	2021 йилдан бошлаб мунтазам равишда	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Ёшлар ишлари агентлиги (А. Саъдуллаев), Миллий телерадиокомпания (А. Хаджаев), Ўзбекистон Миллий ахборот агентлиги (А. Кўчимов)
12.	«Эл-юрт умиди» жамғармаси стипендия танловларига номзодлар, хусусан республика ҳудудлари ёшлари учун қулайлик ва тенг имкониятлар яратиш мақсадида ҳужжатларни электрон тарзда онлайн режимда қабул қилишнинг модернизациялашган платформасини ишга тушириш.	Онлайн ҳужжат қабул қилиш платформаси	2021 йил 1 апрель	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Ахборот технологиялари ва коммуникацияларини ривожлантириш вазирлиги (Ш. Содиқов)
13.	«Эл-юрт умиди» жамғармаси стипендия танловларини ташкил этиш, танлов жараёнларига малакали олимлар ва экспертларни, жумладан хорижда таълим олган ёки тадқиқотлар ўтказган тажрибали ватандошларни, ёшлар орасида ҳурматга сазовор бўлган ёзувчилар ва шоирларни кенг жалб этиш.	Васийлик кенгаши қарори асосида танлов режа-графиги	Стипендия танловлари тўғрисидаги низомда белгиланган муддатларда	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Олий ва ўрта махсус таълим вазирлиги (А. Тошкулов), Давлат тест маркази (М. Каримов), Республика Маънавият ва маърифат маркази (М. Ҳожиматов), Ёшлар ишлари агентлиги (А. Саъдуллаев)
14.	«Эл-юрт умиди» жамғармаси стипендия танловлари натижалари бўйича Васийлик кенгаши қарорини қабул қилиш, стипендиатларни оммавий ахборот воситалари орқали эълон қилиш ва уларга стипендиатлик сертификатларини тантанали топшириш.	Васийлик кенгаши қарори	Стипендия танловлари тўғрисидаги низомда белгиланган муддатларда	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Олий ва ўрта махсус таълим вазирлиги (А. Тошкулов), Ёшлар ишлари агентлиги (А. Саъдуллаев)
15.	«Эл-юрт умиди» жамғармаси стипендия ғолибларини хориждаги етакчи олий таълим муассасалари, илмий-тадқиқот марказлари, илғор компания ва ташкилотларга таълим олишга юборишни ташкил этиш.	Чора-тадбирлар режаси	Васийлик кенгаши қарорига мувофиқ	«Эл-юрт умиди» жамғармаси, хорижий ҳамкорлар грантлари ва стипендиялари	«Эл-юрт умиди» жамғармаси (А. Бекмуродов), Ташқи ишлар вазирлиги (Ф. Арзиев), манфаатдор вазирлик ва идоралар
16.	«Эл-юрт умиди» жамғармаси стипендиатларининг хорижда таълим олишининг ҳамда Ўзбекистонга қайтгандан сўнг меҳнат фаолиятининг доимий мониторингини олиб боришни ташкил этиш.	Мониторинг дастури	Ҳар йили икки маротаба	Талаб этилмайди	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), манфаатдор вазирлик ва идоралар
III. Хорижда истиқомат қилаётган ватандош олимлар, экспертлар ва илмий тадқиқотчилар билан доимий мулоқот қилиш
17.	Хорижда истиқомат қилаётган, қимматли илмий ва амалий тажрибага эга ватандошлар билан мулоқотлар ўрнатиш ишларини янада кенгайтириш, ватандошлар электрон реестрини такомиллаштириш ва ундан фойдаланиш самарадорлигини таъминлаш.	Идоралараро чора-тадбирлар режаси	2021 йил 1 апрель	«Эл-юрт умиди» жамғармаси	«Эл-юрт умиди» жамғармаси (А. Бекмуродов), Ташқи ишлар вазирлиги (Ф. Арзиев), Ички ишлар вазирлиги (П. Бобожонов), манфаатдор вазирлик ва идоралар
18.	«Эл-юрт умиди» жамғармаси ҳузуридаги халқаро эксперт ватандошлар форуми фаолиятини ривожлантириш, хорижда истиқомат қилаётган олимлар ва экспертлар билан мулоқотлар олиб бориш ҳамда соҳалар кесимида турли мавзуларда тақдимотлар ўтказиш.	Онлайн видео-конференциялар ўтказиш графиги	2021 йил январдан бошлаб доимий	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Ташқи ишлар вазирлиги (Ф. Арзиев), манфаатдор вазирлик ва идоралар
19.	«UzBridge» электрон журналида Ўзбекистон Республикасидаги ижтимоий-сиёсий ва социал-иқтисодий ислоҳотларга оид таҳлилий материаллар, жумладан хорижда истиқомат қилаётган ватандошларнинг илмий мақолалари ва очеркларини чоп этиш.	«UzBridge» электрон журнали нашри	Ҳар йили камида икки марта	«Эл-юрт умиди» жамғармаси	«Эл-юрт умиди» жамғармаси (А. Бекмуродов), Олий ва ўрта махсус таълим вазирлиги (А. Тошкулов), Давлат хизматини ривожлантириш агентлиги (А. Хасанов)
20.	«Эл-юрт умиди» жамғармаси томонидан хорижий мамлакатларда фаолият юритаётган ватандош олимлар, тажрибали экспертлар ва тадқиқотчилар учун очиқ рўйхатдан ўтиш электрон платформасини яратиш.	Жамғарма веб-сайтида очиқ электрон платформа	2021 йил апрелдан бошлаб доимий	«Эл-юрт умиди» жамғармаси	«Эл-юрт умиди» жамғармаси (А. Бекмуродов), Ташқи ишлар вазирлиги (Ф. Арзиев), манфаатдор вазирлик ва идоралар
21.	Хорижий давлатларда истиқомат қилаётган қимматли илмий ва амалий тажрибага эга ватандошлар ҳамда собиқ «Умид» ва «Эл-юрт умиди» жамғармалари стипендиатлари иштирокида анъанавий халқаро форум ўтказиб бориш.	Васийлик кенгаши қарори	2021 йилдан бошлаб доимий	«Эл-юрт умиди» жамғармаси, ҳомийлар маблағлари	«Эл-юрт умиди» жамғармаси (А. Бекмуродов), Давлат хизматини ривожлантириш агентлиги (А. Хасанов), Ташқи ишлар вазирлиги (Ф. Арзиев), Молия вазирлиги (Т. Ишметов), манфаатдор вазирлик ва идоралар

Изоҳ: Ушбу «Йўл харитаси»да назарда тутилган тадбирларни амалга оширишда ишлаб чиқилаётган ҳужжат шакли ўзгартирилиши ёки ишлаб чиқилаётган ҳужжат бошқа бандларда кўзда тутилган ўзга ҳужжатлар билан бирлаштирилиши мумкин. Икки ва ундан кўпроқ ҳужжатлар бирлаштирилганда тегишли бандларни бажариш учун белгиланган энг кеч кўрсатилган муддат уларни ишлаб чиқиш муддати ҳисобланади.

Ўзбекистон Республикаси Президентининг 2021 йил 11 февралдаги ПФ-6168-сон Фармонига
6-ИЛОВА

Ўзбекистон Республикаси Президентининг айрим ҳужжатларига киритилаётган ўзгартириш ва қўшимчалар

1. Ўзбекистон Республикаси Президентининг 2018 йил 25 сентябрдаги «Ўзбекистон Республикаси Вазирлар Маҳкамаси ҳузуридаги Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси фаолиятини ташкил этиш тўғрисида»ги ПФ-5545-сон Фармонида:

а) 3-банднинг еттинчи хатбошиси қуйидаги таҳрирда баён этилсин:

«жаҳоннинг ривожланган мамлакатларидаги етакчи таълим ва илмий муассасаларида бакалавриат, магистратура ва докторантура дастурлари бўйича таълим, соғлиқни сақлаш, иқтисодиёт ва давлат бошқаруви соҳаларидаги истиқболли мутахассисларни, шу жумладан педагоглар ва илмий кадрларни танлаб олиш ҳамда тайёрлашни ташкил этиш»;

б) 4, 5, 7 ва 18-бандлар ўз кучини йўқотган деб ҳисоблансин;

в) 8-банддан «, малака ошириш ва стажировка ўташ» сўзлари чиқариб ташлансин;

г) 10-бандда:

иккинчи хатбошиси қуйидаги таҳрирда баён этилсин:

«а) Жамғарма стипендиатларини хорижда бакалавриат, магистратура ва докторантурада ўқитишни ташкил этиш, хорижий олим ва мутахассисларни, шу жумладан ватандошларимизни республикада меҳнат фаолиятини амалга оширишга жалб этиш, шунингдек, Жамғарма таълим дастурларининг самарадорлигини таъминлаш ҳамда давлат хизматчилари салоҳиятини оширишга кўмаклашиш мақсадида бошқа тадбирларни амалга ошириш бўйича:»;

«а» кичик банднинг учинчи хатбошисидаги «тегишли йилдаги истеъмол нархларининг прогноз индексига тенг коэффициентни қўллаган ҳолда» сўзлари «Жамғарманинг хорижий олим ва экспертларни, шу жумладан ватандошларимизни жалб қилиш билан боғлиқ таълим дастурлари, тадбирлари, шунингдек, Жамғарма таълим дастурлари самарадорлигини таъминлаш ҳамда давлат хизматчилари салоҳиятини оширишга кўмаклашиш мақсадида бошқа тадбирларни амалга ошириш учун молиявий ресурсларга бўлган реал эҳтиёжи прогнозини ҳисобга олган ҳолда» сўзлари билан алмаштирилсин;

«а» кичик банднинг тўртинчи хатбошиси чиқариб ташлансин;

«б» кичик банднинг олтинчи хатбошиси чиқариб ташлансин;

д) 14-банднинг учинчи хатбошиси қуйидаги таҳрирда баён этилсин:

«стипендиатлар хорижий мамлакатларга виза олишида, консуллик ҳисобига қўйилишида, нотариал ва бошқа хизматлар кўрсатилишида, борган давлатида стипендиатларнинг ўқишини мониторинг қилишда»;

е) 1 — 4-иловалар ўз кучини йўқотган деб ҳисоблансин.

2. Ўзбекистон Республикаси Президентининг 2019 йил 3 октябрдаги «Ўзбекистон Республикасида кадрлар сиёсати ва давлат фуқаролик хизмати тизимини тубдан такомиллаштириш чора-тадбирлари тўғрисида»ги ПФ-5843-сон Фармонида:

а) 4-банд қуйидаги мазмундаги хатбоши билан тўлдирилсин:

«давлат хизматчилари ва мутахассисларни хориждаги нуфузли таълим, илмий ва бошқа муассасаларда таълим олишини ташкил этишга кўмаклашиш»;

б) 7-банддаги «Ўзбекистон Республикаси Вазирлар Маҳкамаси ҳузуридаги Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси» сўзлари «Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси» сўзлари билан алмаштирилсин.

3. Ўзбекистон Республикаси Президентининг 2018 йил 28 июндаги «Ипак йўли» туризм халқаро университетини ташкил этиш тўғрисида»ги ПҚ-3815-сон қарорининг 20-банди иккинчи хатбошиси қуйидаги таҳрирда баён этилсин:

«Белгилансинки, ушбу бандда назарда тутилган харажатларни молиялаштириш халқаро молия институтларининг грантлари, бюджет маблағлари ва Университетнинг бюджетдан ташқари маблағлари ҳисобига амалга оширилади».

Олдинги таҳрирга қаранг.

(Ўзбекистон Республикаси Президентининг 2025 йил 26 декабрдаги ПФ-259-сонли Фармонига асосан 4-банднинг ўз кучини йўқотиш санаси — 2026 йил 1 январь — Қонунчилик маълумотлари миллий базаси, 27.12.2025 й., 06/25/259/1224-сон)

5. Ўзбекистон Республикаси Президентининг 2018 йил 25 октябрдаги «Хорижда истиқомат қилаётган ватандошлар билан ҳамкорлик соҳасида Ўзбекистон Республикаси давлат сиёсатини янада такомиллаштириш чора-тадбирлари тўғрисида»ги ПҚ-3982-сон қарорида:

а) 2-банднинг саккизинчи хатбошисидаги «Ўзбекистон Республикаси Вазирлар Маҳкамаси ҳузуридаги Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси» сўзлари «Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси» сўзлари билан алмаштирилсин;

б) 6-банддаги «Ўзбекистон Республикаси Вазирлар Маҳкамаси ҳузуридаги Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси» сўзлари «Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси» сўзлари билан алмаштирилсин;

в) 3-илованинг 13-банди қуйидаги таҳрирда баён этилсин:

«Лавозимига кўра — Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармаси ижрочи директори ўринбосари».

6. Ўзбекистон Республикаси Президентининг 2019 йил 4 январидаги «Ўзбекистон Республикаси Вазирлар Маҳкамаси ҳузуридаги Мутахассисларни хорижда тайёрлаш ва ватандошлар билан мулоқот қилиш бўйича «Эл-юрт умиди» жамғармасининг дастурлари бўйича кадрларни ўқитишни ташкил этишни янада такомиллаштириш чора-тадбирлари тўғрисида»ги ПҚ-4091-сон қарорида:

а) 2, 3, 4 ва 7-бандлар ўз кучини йўқотган деб ҳисоблансин;

б) 5-бандда:

тўртинчи хатбошиси қуйидаги таҳрирда баён этилсин:

«халқаро тан олинган ташкилотлар рейтингига кўра жаҳондаги энг яхши 300 талик ёки танланган фан йўналиши бўйича энг яхши 100 талик рўйхатига кирган хорижий таълим муассасалари ва илмий марказларнинг бакалавриати, магистратураси ёки докторантурасига мустақил тарзда кирган ва таълим олаётган Ўзбекистон Республикасининг фуқароларига Жамғарма стипендияларини ажратиш бўйича қарорлар қабул қилишга»;

бешинчи хатбошисидан «, шу жумладан, Жамғарма стипендияларига номзодларни хорижий тилларга ўқитиш дастурларини» сўзлари чиқариб ташлансин;

в) 2 ва 3-иловалар ўз кучини йўқотган деб ҳисоблансин.

7. Ўзбекистон Республикаси Президентининг 2019 йил 3 октябрдаги ПҚ-4472-сон қарори билан тасдиқланган Ўзбекистон Республикаси Президенти ҳузуридаги Давлат хизматини ривожлантириш агентлиги тўғрисидаги низомда:

а) 11-банд қуйидаги мазмундаги хатбоши билан тўлдирилсин:

б) 12-банд қуйидаги мазмундаги «м» кичик банди билан тўлдирилсин: