|
Ҳужжат кучини йўқотган 22.02.2021
|
Ўзбекистон Республикаси Президенти ҳузуридаги Вазирлар Маҳкамасининг
қарори
ТУРКИЯ РЕСПУБЛИКАСИ ЎҚУВ ЮРТЛАРИДА ТАЪЛИМ ОЛАЁТГАН ЎЗБЕКИСТОН ЁШЛАРИГА ЁРДАМ КЎРСАТИШ ТЎҒРИСИДА
LexUZ шарҳиМазкур қарор Ўзбекистон Республикаси Вазирлар Маҳкамасининг 2021 йил 22 февралдаги 87-сонли «Ўзбекистон Республикаси Ҳукуматининг ўз аҳамиятини йўқотган айрим қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Ўз аҳамиятини йўқотган қонунчилик ҳужжатларини қайта кўриб чиқиш тизимини жорий этиш орқали мамлакатда ишбилармонлик муҳитини яхшилаш чора-тадбирлари тўғрисида» 2020 йил 27 сентябрдаги ПФ-6075-сон Фармони)»ги қарорига асосан ўз кучини йўқотган.
Ўзбекистон билан Туркия ўртасидаги маданий алоқаларни яхшилаш, дўст мамлакатда таълим олаётган ёшларга ёрдам кўрсатиш мақсадида Вазирлар Маҳкамаси қарор қилади:
1. Туркияда таълим олаётган Ўзбекистон ёшларига ёрдам кўрсатиш билан боғлиқ бутун ишлар мажмуини мувофиқлаштириш ва тезликда ҳал этиш бўйича 1-иловага* мувофиқ таркибда ҳукумат комиссияси ташкил этилсин.
* 1-илова рус тилидаги матнда берилган.
2. Оғишмай бажарилиши зарур бўлган тадбирлар мажмуи 2-иловага* мувофиқ тасдиқлансин.
* 2-илова рус тилидаги матнда берилган.
3. Ўзбекистон Республикаси Алоқа вазирлиги:
Тошкент, Нукус шаҳарларида, барча вилоят марказларида ота-оналарнинг Туркияда таълим олаётган фарзандлари билан имтиёзли тарифлар бўйича телефон орқали гаплашишларини ташкил этишни таъминласин; бу хизматларни кўрсатиш жадвали ва тартибини ишлаб чиқсин;
1993 йил 1 январдан бошлаб вақтли матбуот, бадиий, илмий-оммабоп ва публицистик адабиётларнинг ўзбек талабалари ва ўқувчилари Туркияда таълим олаётган жойларга мунтазам етказиб берилишини ташкил қилсин.
4. Соғлиқни сақлаш вазирлиги Туркия Республикасида таълим олаётган ёшларга текин тиббий хизмат кўрсатишни таъминлаш масалаларини ҳал этсин.
5. «Ўзбекистон ҳаво йўллари» миллий авиакомпанияси Туркияда таълим олаётган ёшларнинг ёзги таътил даврида келишлари ва қайтиб кетишлари учун келишилган авиақатновларни ташкил этсин.
6. Молия вазирлиги ҳукумат комиссиясининг талабномаси бўйича мазкур қарорни рўёбга чиқариш учун зарур маблағлар ажратишни назарда тутсин.
7. Қорақалпоғистон Республикаси Вазирлар Кенгаши, вилоятларнинг ва Тошкент шаҳрининг ҳокимликлари Туркия вилоятлари, у ердаги ўзбекистонлик талабалар таълим олаётган олий ўқув юртлари билан 3-иловага* мувофиқ, дўстона муносабатлар ўрнатсинлар ва бу муносабатларни қўллаб-қувватласинлар.
* 3-илова рус тилидаги матнда берилган.
8. Республика талабалари ва ўқувчиларига ёрдам кўрсатиш билан боғлиқ масалаларни ҳал этиш учун бир ой муддат ичида Туркия Республикаси Миллий таълим вазирлиги ҳузурида Ўзбекистон Республикаси Олий ва ўрта махсус таълим вазирлигининг ваколатхонаси ташкил этилсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари ўртоқ М. К. Қорабоев зиммасига юклатилсин.
Вазирлар Маҳкамасининг Раиси И. КАРИМОВ
Тошкент ш.,
1992 йил 12 декабрь,
564-сон
