Ўзбекистон Республикаси билан Америка Қўшма Штатлари ўртасида дипломатик муносабатларни ўрнатиш тўғрисида 1992 йил 9 февралдаги Протоколга ва Ўзбекистон Республикаси Президентининг 1993 йил 19 февралдаги 566-сон Фармонига мувофиқ Вазирлар Маҳкамаси қарор қилади:

1. Америка Қўшма Штатларининг Вашингтон шаҳрида Ўзбекистон Республикасининг Элчихонасини очиш зарур деб ҳисоблансин.

2. Элчихонанинг 1993 йил учун штатлар жадвали ва харажатлар сметаси 1, 2-иловаларга мувофиқ тасдиқлансин.

Элчихона ходимлари сонини 1993 йил учун 9 кишидан, шулардан дипломатик таркибдаги ходимлар сони — 5 киши, техник таркибдаги ходимлар сони — 4 кишидан иборат қилиб белгилансин.

Ўзбекистон Республикаси Молия вазирлиги 1993 йил учун зарур бўлган маблағларни 2-илова бўйича харажатлар сметасига мувофиқ ажратсин.

3. Ўзбекистон Республикаси Ташқи ишлар вазирлиги бир ой муддатда:

АҚШ Давлат департаменти билан Тошкент ва Вашингтон шаҳарларидаги элчихоналар жойлашган бинолардан фойдаланиш учун ажратиладиган маблағлар бўйича ўзаро ҳисоб-китоблар тўғрисидаги масалани ҳал қилсин;

штатлар жадвалига мувофиқ Элчихонани ходимлар билан бутлаш учун номзодлар бўйича таклиф киритсин;

Ўзбекистон Республикаси Молия вазирлиги билан биргаликда Ўзбекистон Республикаси дипломатик ваколатхоналари ходимлари иш ҳақининг сўмларда тўланадиган қисмини қоплаш тўғрисидаги таклифни ишлаб чиқсин ва киритсин.

4. «Ўзшартномасавдо» давлат уюшмаси ва «Ўзбексавдо» давлат уюшмаси Ўзбекистон Республикасининг Америка Қўшма Штатларидаги Элчихонаси учун Ташқи ишлар вазирлигининг талабномаларига биноан белгиланган тартибда моддий-техника ресурслари, жиҳозлар, асбоб-ускуналар ҳамда транспорт воситалари ажратсинлар.

5. Ўзбекистон Республикасининг Америка Қўшма Штатларидаги элчиси маиший, тиббий ва транспорт хизмат кўрсатиш шароитлари бўйича Ўзбекистон Республикаси вазирига тенглаштирилсин.