Ўзбекистон Республикасининг хорижий давлатлар билан дипломатик муносабатларини янада ривожлантириш, Ўзбекистон Республикасининг ишлаб турган консуллик муассасалари фаолиятини такомиллаштириш, уларнинг ваколатларини кенгайтириш мақсадида, Вазирлар Маҳкамасининг «Чет элларда Ўзбекистон Республикасининг консуллик ваколатхоналарини очиш тўғрисида» 1994 йил 7 апрелдаги 192-сон қарорига қўшимча ва ўзгартириш сифатида Вазирлар Маҳкамаси қарор қилади:

1. Афина шаҳрида (Греция Республикаси) Ўзбекистон Республикасининг Бош консулхонаси очилсин.

2. 1996 йил 1 ноябрдан бошлаб:

Франкфурт-Майндаги (Германия Федератив Республикаси),

Нью-Йоркдаги (Америка Қўшма Штатлари),

Бангкокдаги (Таиланд Қироллиги) консулхоналар Ўзбекистон Республикасининг Бош консулхоналарига айлантирилсин.

3. Бош консулхоналарнинг 1996 йил учун штат жадвали ва харажатлар сметаси 1 — 8-иловаларга* мувофиқ тасдиқлансин.

Ўзбекистон Республикаси Молия вазирлиги 1996 йил учун зарур маблағларни кадрлар билан бутланишига қараб, харажатлар сметасига мувофиқ ажратсин.

4. Ўзбекистон Республикаси Ташқи ишлар вазирлиги Бош консулхоналарнинг дипломатик таркибини штат жадвалига мувофиқ кадрлар билан бутлаш учун номзодлар бўйича бир ой муддатда таклифлар киритсин.