toggle_night_mode
Ҳужжат кучини йўқотган 01.04.2025
Ўзбекистон Республикаси Вазирлар Маҳкамасининг
қарори
Ўзбекистон Республикаси Вазирлар Маҳкамаси ҳузуридаги Идоралараро тариф комиссияси фаолиятини ташкил қилиш чора-тадбирлари тўғрисида
 LexUZ шарҳи
Мазкур қарор Ўзбекистон Республикаси Вазирлар Маҳкамасининг 2024 йил 15 июндаги 337-сонли «Ёқилғи-энергетика тармоғида тариф сиёсатини янада такомиллаштиришга доир қўшимча чора-тадбирлар тўғрисида»ги қарорига асосан 2025 йил 1 апрелдан ўз кучини йўқотади.
Ўзбекистон Республикаси Президентининг «Электр энергетикаси тармоғини жадал ривожлантириш ва молиявий барқарорлигини таъминлаш чора-тадбирлари тўғрисида» 2018 йил 23 октябрдаги ПҚ-3981-сон қарори ва Ўзбекистон Республикаси Вазирлар Маҳкамасининг «Электр энергетика тармоғида тариф сиёсатини такомиллаштиришга доир қўшимча чора-тадбирлар тўғрисида» 2019 йил 13 апрелдаги 310-сон қарорига мувофиқ Вазирлар Маҳкамаси қарор қилади:
1. Ўзбекистон Республикаси Вазирлар Маҳкамаси ҳузуридаги Идоралараро тариф комиссияси тўғрисидаги низом иловага мувофиқ тасдиқлансин.
2. Ўзбекистон Республикаси Молия вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — молия вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2019 йил 3 декабрь,
964-сон

Вазирлар Маҳкамасининг 2019 йил 3 декабрдаги 964-сон қарорига

ИЛОВА

Ўзбекистон Республикаси Вазирлар Маҳкамаси ҳузуридаги Идоралараро тариф комиссияси тўғрисида
НИЗОМ
1-боб. Умумий қоидалар
1. Мазкур Низом Ўзбекистон Республикаси Вазирлар Маҳкамаси ҳузуридаги Идоралараро тариф комиссиясининг (кейинги ўринларда Комиссия деб аталади) фаолиятини ташкил қилиш тартибини белгилайди.
2. Комиссия қуйидаги товар ва хизматлар бўйича тартибга солинадиган тарифларни (устамаларни) кўриб чиқади ва тасдиқлайди:
ишлаб чиқарувчи ташкилотлар томонидан ишлаб чиқариладиган электр ва иссиқлик энергияси;
тақсимловчи ташкилотлар томонидан электр энергиясини тақсимлаш ва сотиш;
«Ўзбекнефтгаз» акциядорлик жамияти ва «Шўртан ГКМ» масъулияти чекланган жамияти томонидан республика ичида сотиладиган табиий газ, нефть ва газ конденсати;
қазиб чиқарувчи ва/ёки қайта ишловчи ташкилотлар томонидан ишлаб чиқариладиган ҳамда аҳолига ва ижтимоий соҳа объектларига маиший истеъмол учун етказиб беришга масъул ташкилотларга сотиладиган суюлтирилган газ;
комиссия шартномалари бўйича республика истеъмолчиларига табиий газ етказиб беришга масъул ташкилотларнинг воситачилик ҳақи;
транспорт, шунингдек, уй-жой коммунал хизмат кўрсатиш тармоқларининг табиий монополия шароитларида ишлаб чиқариладиган (кўрсатиладиган) товарлари (хизматлари);
кўмирнинг улгуржи ва чакана нархлари.
(2-банд Ўзбекистон Республикаси Вазирлар Маҳкамасининг 2022 йил 29 сентябрдаги 551-сонли қарорига асосан саккизинчи хатбоши билан тўлдирилган — Қонунчилик маълумотлари миллий базаси, 30.09.2022 й., 09/22/551/0875-сон)
Комиссия тартибга солинадиган тарифларни (устамаларни) ушбу Низомга иловага мувофиқ схема бўйича кўриб чиқади ва тасдиқлайди.
3. Комиссия ўз фаолиятида Ўзбекистон Республикаси Конституцияси ва қонунлари, Ўзбекистон Республикаси Олий Мажлиси палаталари қарорлари, Ўзбекистон Республикаси Президентининг фармонлари, қарорлари, фармойишлари, Ўзбекистон Республикаси Вазирлар Маҳкамаси қарорлари, фармойишлари ҳамда мазкур Низом ва бошқа қонунчилик ҳужжатларига риоя қилади.
(3-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
2-боб. Комиссиянинг асосий вазифалари ва функциялари
4. Қуйидагилар Комиссиянинг асосий вазифалари ҳисобланади:
давлат бошқаруви органлари ва бошқа манфаатдор ташкилотларнинг тарифлар шакллантирилишини тартибга солиш соҳасидаги давлат сиёсатини амалга оширишда самарали ҳамкорлигини таъминлаш;
уй-жой коммунал хўжалиги, энергетика ва транспорт соҳаларида истеъмолчилар, ишлаб чиқарувчилар, тартибга солинадиган фаолиятни амалга оширадиган ташкилотлар манфаатлари ва ижтимоий аҳамиятга молик манфаатлар мувозанатини таъминловчи тариф сиёсатининг амалга оширилишини таъминлаш;
энергетика ва транспорт, шунингдек, уй-жой коммунал хизмат кўрсатиш соҳаларида тарифлар шакллантирилишини тартибга солиш соҳаларида давлат сиёсатини такомиллаштириш бўйича таклифлар ва тавсиялар тайёрлаш;
тартибга солинадиган фаолиятни амалга оширадиган ташкилотлар фаолиятини самарали ташкил этишда иштирок этиш.
5. Комиссия ўзига юкланган вазифаларга мувофиқ қуйидаги функцияларни амалга оширади:
а) давлат бошқаруви органлари ва бошқа манфаатдор ташкилотларнинг тарифлар шакллантирилишини тартибга солиш соҳасидаги давлат сиёсатини амалга оширишда самарали ҳамкорлигини таъминлаш соҳасида:
тарифларни шакллантиришини тартибга солишда очиқлик, ошкоралик тамойиллари, истеъмолчилар, ишлаб чиқарувчилар, тартибга солинадиган фаолиятни амалга оширадиган ташкилотлар манфаатлари ва ижтимоий аҳамиятга молик манфаатлар мувозанати асосида давлат бошқаруви органлари ва манфаатдор ташкилотларнинг ўзаро ҳамкорлигини ташкил этиш чораларини кўради;
тарифларни шакллантиришини тартибга солиш соҳасида давлат сиёсатини амалга оширишда давлат бошқаруви органлари ва манфаатдор ташкилотларнинг ўзаро ҳамкорлигини яхшилаш чораларини ишлаб чиқади ва амалга оширади;
б) уй-жой коммунал хўжалиги, энергетика ва транспорт соҳаларида истеъмолчилар, ишлаб чиқарувчилар, тартибга солинадиган фаолиятни амалга оширадиган ташкилотлар манфаатлари ва ижтимоий аҳамиятга молик манфаатлар мувозанатини таъминловчи тариф сиёсатининг амалга оширилишини таъминлаш соҳасида:
энергетика ва транспорт (йўналишли ва линияли таксилардан ташқари), шунингдек, уй-жой коммунал хизмат кўрсатиш соҳаларида товарлар ва хизматлар учун тартибга солинадиган тарифларни (устамаларни) тасдиқлаш бўйича таклифларни кўриб чиқади;
энергетика ва транспорт (йўналишли ва линияли таксилардан ташқари), шунингдек, уй-жой коммунал хизмат кўрсатиш соҳаларида товарлар ва хизматлар учун истеъмолчилар, ишлаб чиқарувчилар, тартибга солинадиган фаолиятни амалга оширадиган ташкилотлар манфаатлари ва ижтимоий аҳамиятга молик манфаатлар мувозанатини таъминловчи тартибга солинадиган тарифларни (устамаларни) тасдиқлайди;
в) энергетика ва транспорт, шунингдек, уй-жой коммунал хизмат кўрсатиш соҳаларида тарифлар шакллантирилишини тартибга солиш соҳаларида давлат сиёсатини такомиллаштириш бўйича таклифлар ва тавсиялар тайёрлаш соҳасида:
энергетика ва транспорт, шунингдек, уй-жой коммунал хизмат кўрсатиш соҳаларида тариф сиёсатининг асосий йўналишларини янада такомиллаштириш бўйича таклифлар ишлаб чиқишни ташкил этади;
тармоқлараро ва тармоқлар ичида нарх тенгилиги ҳамда мувозанатига риоя қилиш, мослашувчан тарифларни тартибга солиш услубларини белгилаш соҳасида норматив-ҳуқуқий ҳужжатлар лойиҳаларини кўриб чиқади;
табиий монополия субъектлари учун тарифни шакллантиришнинг амалдаги услубларини такомиллаштиришнинг умумий тамойилларини ишлаб чиқишни таъминлайди;
г) тартибга солинадиган фаолиятни амалга оширадиган ташкилотлар фаолиятини самарали ташкил этишда иштирок этиш соҳасида:
электр энергияси соҳасидаги ташкилотларнинг молиявий барқарорлигини таъминлайдиган таклифларни кўриб чиқади ҳамда электр энергияси истеъмолчиларидан ва улгуржи қайта сотувчилардан тушадиган маблағларни тақсимлаш тартибини тасдиқлайди.
6. Комиссия ўзига юкланган функцияларни амалга ошириши учун қуйидаги ҳуқуқларга эга:
вазирликлар, идоралар, ташкилотлардан ўзига юкланган вазифаларни бажариш учун зарур материаллар ва маълумотларни белгиланган тартибда сўраш ва олиш;
ўз ваколатига тааллуқли масалалар бўйича вазирликлар, қўмиталар ва ташкилотлар раҳбарлари таклифларини кўриб чиқиш;
тарифлар шакллантирилишига таъсир қилувчи чораларни такомиллаштириш бўйича таклифлар тайёрланиши ҳамда Ўзбекистон Республикаси Президенти ва Ўзбекистон Республикаси Вазирлар Маҳкамасига кўриб чиқиш учун тақдим этилишини ташкил қилиш;
экспертиза ўтказиш ва маслаҳатлашиш учун фаолияти Комиссия ваколатига кирадиган масалалар билан боғлиқ бўлган вазирликлар, идоралар, ташкилотлар мутахассисларини, шу жумладан хорижий мутахассисларни белгиланган тартибда жалб қилиш;
Комиссия ваколатига кирадиган масалалар бўйича қарорлар қабул қилиш.
Комиссия қонунчилик ҳужжатларига мувофиқ бошқа ҳуқуқларга ҳам эга бўлиши мумкин.
(6-банднинг еттинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
3-боб. Комиссия фаолиятини ташкил қилиш
7. Комиссия таркиби Ўзбекистон Республикаси Вазирлар Маҳкамаси томонидан тасдиқланади. Комиссия таркибига раис ва Комиссия аъзолари киради.
8. Комиссияга Комиссия фаолиятига умумий раҳбарликни амалга оширадиган, унинг ишларини ташкил этадиган ва қабул қилинган қарорларнинг ижроси бўйича умумий назоратини амалга оширадиган раис бошчилик қилади.
9. Комиссия раиси Комиссияга юкланган функциялар ва вазифаларни бажармаганлик ёки тегишли даражада бажармаганлик учун шахсан жавобгардир.
10. Комиссия йиғилишини Комиссия раиси олиб боради.
11. Комиссия ўз фаолиятини доимий асосда амалга оширади ва зарурат туғилганда, шу жумладан тартибга солинадиган фаолиятни амалга оширадиган ташкилотлар мурожаат қилганда йиғилиш ўтказади.
Тартибга солинадиган фаолиятни амалга оширадиган ташкилотлар тарифларни тасдиқлаш бўйича лойиҳаларни тегишли тармоқларга мутасаддилик қиладиган вазирликлар ва/ёки идоралар билан келишилгандан кейин Комиссияга киритади. Бунда Ўзбекистон Республикаси Вазирлар Маҳкамасининг 2018 йил 12 январдаги 22-сон қарори билан тасдиқланган Электр энергиясидан фойдаланиш қоидаларига мувофиқ ўрнатиладиган турли истеъмолчилар гуруҳлари учун электр энергияси тарифлари бўйича электр энергияси тарифларини тасдиқлаш лойиҳаси Ўзбекистон Республикаси Энергетика вазирлиги билан келишилганидан кейин электр энергиясини ягона харидори томонидан киритилади.
Ташкилотлар томонидан Комиссияга киритилган масалаларни кўриб чиқиш ва улар бўйича қарорлар қабул қилиш муддати мурожаат ва қонунчилик ҳужжатларида белгиланган зарур ҳужжатлар Комиссияга киритилган кундан бошлаб ўттиз календарь кунини ташкил этади.
(11-банднинг учинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
12. Комиссия йиғилиши, агар унда аъзоларнинг камида ярми қатнашса ваколатли ҳисобланади.
13. Комиссия қарори очиқ овоз бериш орқали қабул қилинади ва йиғилишда иштирок этган Комиссия аъзолари умумий сонининг кўпчилиги овоз берганда қабул қилинган ҳисобланади. Агарда овозлар сони тенг бўлиб қолган тақдирда, раиснинг овози ҳал қилувчи ҳисобланади.
14. Комиссия қарори йиғилишда иштирок этган Комиссия аъзолари томонидан имзоланадиган баённома билан расмийлаштирилади ва Комиссия раиси томонидан тасдиқланади.
15. Комиссия аъзолари йиғилишда алмашиш ҳуқуқисиз иштирок этади.
Комиссия аъзолари алоҳида фикр билдириш ҳуқуқига эга ва бундай фикр билдириладиган ҳолларда, у ёзма равишда баён қилиниши ва баённомага илова қилиниши лозим.
16. Комиссия ўз фаолияти доирасида тарифларни шакллантириш соҳасида алоҳида масалалар ва муаммоларни чуқур ва батафсил ишлаб чиқиш, вақтинча ишчи гуруҳлар ташкил қилиш ва уларга давлат бошқаруви органлари ходимлари ва жалб қилинган экспертларни киритиш ҳуқуқига эга.
17. Комиссиянинг ишчи органи вазифасини Ўзбекистон Республикаси Молия вазирлиги (кейинги ўринларда Ишчи орган деб аталади) амалга оширади.
18. Ишчи орган қуйидагиларни амалга оширади:
Комиссия фаолиятини ташкилий-техник таъминлаш;
Комиссия аъзоларига кун тартибига киритилган масалалар, йиғилиш ўтказиладиган сана, вақт ва жойи ҳақида хабар бериш;
Комиссия йиғилиши учун материаллар тайёрлаш, йиғилиш материалларини тарқатиш, иш юритишни амалга ошириш ва ҳужжатларни сақлаш;
вазирликлар, давлат қўмиталари ва идоралари, маҳаллий давлат ҳокимияти органлари, фуқароларнинг ўзини-ўзи бошқариш органлари, жамоат бирлашмалари ва бошқа ташкилотлар билан биргаликда Комиссия қабул қилган қарорлар ижросининг назорати ва мониторингини ташкил қилиш, тегишли маълумотларни ва таклифларни Комиссия раисига тақдим қилиш;
келиб тушган хат-хабарларни кўриб чиқиш ва Комиссия ваколатига кирадиган масалалар бўйича қарорлар тайёрлаш.
Ишчи орган қонунчилик ҳужжатларига мувофиқ бошқа функцияларни ҳам амалга ошириши мумкин.
(18-банднинг еттинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)
19. Комиссия йиғилиши материаллари Комиссия раисининг имзоси билан ҳар бир Комиссия аъзосига йиғилишгача 5 кундан кам бўлмаган муддатда етказиб берилади.
4-боб. Якунловчи қоида
20. Комиссия фаолияти Ўзбекистон Республикаси Вазирлар Маҳкамасининг қарори билан тугатилади.

Ўзбекистон Республикаси Вазирлар Маҳкамаси ҳузуридаги Идоралараро тариф комиссияси тўғрисидаги низомга

ИЛОВА

Комиссия томонидан тартибга солинадиган тарифларни (устамаларни) кўриб чиқиш ва тасдиқлаш
СХЕМАСИ

Босқичлар

Субъектлар

Тадбирлар

Бажариш муддатлари

I босқич

Товарларининг (хизматларининг) нархлари давлат томонидан тартибга солинадиган ташкилотлар

1. Нархлари давлат томонидан тартибга солинадиган товарларга (хизматларга) янги нархларни (тарифларни) белгилаш учун ҳисоб-китоб материалларини тайёрлаш.

2. Товарнинг (хизматнинг) янги нархини тегишли тармоққа мутасаддилик қиладиган вазирлик (идора) билан келишиш.

3. Мутасадди вазирлик (идора) билан келишилган материалларни янги нархлар (тарифлар) лойиҳасига таҳлилий маълумотнома билан биргаликда Ишчи органга тақдим қилиш.

Зарурат туғилганда

II босқич

Ишчи орган

(Молия вазирлиги)

1. Ҳисоб-китоб материалларини кўриб чиқиш.

2. Камчиликлари бўлган тақдирда, пухта ишлаб чиқиш учун материлларни қайтариш.

3. Қарор қабул қилиш, йиғилиш учун зарур бўлган ҳужжатлар тўплами тўлиқ тақдим этилгандан сўнг кўриб чиқиладиган материалларни тайёрлаш ва янги нархларни тасдиқлаш лойиҳасини кўриб чиқиш учун Комиссияга киритиш.

5 кун мобайнида

25 кун мобайнида

III босқич

Идоралараро тариф комиссияси

Комиссиянинг янги нархларни (тарифларни) тасдиқлаш тўғрисидаги қарорини кабул қилиш.

5 кун мобайнида

IV босқич

Ишчи орган

(Молия вазирлиги)

Комиссиянинг қабул қилган қарорини тегишли вазирлик ва идораларга тарқатиш.

1 кун мобайнида
(Қонун ҳужжатлари маълумотлари миллий базаси, 04.12.2019 й., 09/19/964/4105-сон; Қонунчилик маълумотлари миллий базаси, 05.04.2022 й., 09/22/153/0266-сон; 30.09.2022 й., 09/22/551/0875-сон)