ПҚ-4542-сон 02.12.2019. Иссиқлик таъминоти тизимини такомиллаштириш ва иссиқлик таъминоти корхоналарини молиявий соғломлаштиришга оид қўшимча чора-тадбирлар тўғрисида

Ўзбекистон Республикаси Президентининг

Қарори

Иссиқлик таъминоти тизимини такомиллаштириш ва иссиқлик таъминоти корхоналарини молиявий соғломлаштиришга оид қўшимча чора-тадбирлар тўғрисида

[Кўчирма]

Ўтган давр мобайнида республикада иссиқлик таъминоти тизимини яхшилаш ҳамда аҳолини иссиқлик энергияси ва иссиқ сув билан таъминлаш даражасини ошириш бўйича муайян ишлар амалга оширилди.

Амалий чора-тадбирлар доирасида иссиқлик таъминоти тизимини ривожлантириш ҳолати комплекс ўрганилди ва иссиқлик энергиясини ишлаб чиқариш бўйича замонавий технологиялар синовдан ўтказилди.

Шу билан бирга, республикани ижтимоий-иқтисодий ривожлантиришнинг ҳозирги босқичи иссиқлик таъминоти тизимини комплекс модернизация қилиш ва энергия тежовчи замонавий технологиялар асосида унинг техник даражасини ошириш зарурлигини тақозо этмоқда.

Иссиқлик таъминоти тизимини ривожлантириш ва модернизация қилиш, ресурсларни тежовчи замонавий технологияларни жорий этиш, аҳолини иссиқлик энергияси ҳамда иссиқ сув билан таъминлаш сифати ва даражасини яхшилаш чора-тадбирларини изчил амалга ошириш мақсадида:

1. Қуйидагилар маълумот учун қабул қилинсин:

Ўзбекистон Республикаси Президентининг 2017 йил 20 апрелдаги «2018 — 2022 йилларда иссиқлик таъминоти тизимини ривожлантириш дастури тўғрисида»ги ПҚ-2912-сон қарорига мувофиқ истеъмолчиларга иссиқлик энергияси узлуксиз етказиб берилишини таъминлаш ва унинг сифатини ошириш, ишлаб чиқариш жараёнига инновацион ва ресурс тежовчи технологияларни, шунингдек, ушбу соҳадаги бошқарувнинг самарали бозор механизмларини жорий этишга қаратилган 2018 — 2022 йилларда иссиқлик таъминоти тизимини ривожлантириш дастури амалга оширилмоқда;

Жаҳон банки иштирокида марказий қозонхоналар, иситиш тизимлари ҳамда тармоқларини модернизация ва реконструкция қилишни, уйлар ва квартиралар ички иссиқлик таъминоти тизимларини ёпиқ иссиқлик таъминоти тизимига ўтказган ҳолда тиклашни назарда тутувчи умумий қиймати 220,7 млн АҚШ доллари бўлган «Андижон, Чирчиқ, Бухоро, Самарқанд ва Тошкент (ТЦ-8) шаҳарларида марказлаштирилган иссиқлик таъминоти тизимини реконструкция қилиш ва энергия самарадорлигини ошириш» лойиҳаси амалга оширилмоқда;

Япония халқаро ҳамкорлик агентлиги билан биргаликда иссиқлик манбаларининг иситиш ускуналарини когенерацион газ турбинаси технологиясини жорий этган ҳолда реконструкция қилишни, шунингдек, магистрал ва тақсимловчи иссиқлик тармоқларини алмаштиришни назарда тутувчи ҳисоб-китоб қиймати 780,4 млн АҚШ доллари бўлган «Бухоро, Фарғона, Қувасой, Нукус ва Урганч шаҳарларида марказий қозонхоналарни модернизация ва реконструкция қилиш» лойиҳасини амалга ошириш масаласи кўриб чиқилмоқда.

2. Шундай тартиб ўрнатилсинки, унга мувофиқ:

а) 2020-2021 йиллар иситиш мавсумидан бошлаб марказлаштирилган иссиқлик таъминоти хизматлари учун истеъмолчилар билан ҳисоб-китоблар иситиш даврининг ҳар бир кунига 1 кв.м иситиладиган майдон ҳисобида тўлаш тизимига ўтказилади;

б) 2020 йил 1 январдан бошлаб:

истеъмолчилар учун иссиқлик таъминоти хизматларига тарифларни шакллантириш ва белгилашда ишлаб чиқариш харажатларини пасайтириш ҳамда иссиқлик таъминоти тармоқларидаги йўқотишларни қисқартириш ҳисобига иссиқлик таъминоти тизимини ривожлантириш ва модернизация қилиш харажатлари ҳисобга олинади, шунингдек, кўрсатилаётган хизматлар таннархини қоплаш механизмларини босқичма-босқич жорий этиш назарда тутилади;

аҳоли учун иссиқлик энергияси ва иссиқ сувга пасайтирилган тарифларни қўллаш натижасида кўриладиган зарарлар Қорақалпоғистон Республикасининг республика бюджети, вилоятлар ва Тошкент шаҳар маҳаллий бюджетлари ҳисобидан қопланади.

Ўзбекистон Республикаси Молия вазирлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда:

Қорақалпоғистон Республикасининг республика бюджети, вилоятлар ва Тошкент шаҳар маҳаллий бюджетларининг 2020 йилги параметрларини шакллантиришда аҳоли учун иссиқлик энергияси ва иссиқ сувга пасайтирилган тарифларни қўллаш натижасида кўриладиган зарарларни қоплаш учун 1-иловага мувофиқ зарур маблағларни назарда тутсин;

иссиқлик таъминоти соҳасига ажратилаётган бюджет маблағларининг мақсадли ва оқилона ишлатилишини таъминлаш юзасидан Қорақалпоғистон Республикаси Вазирлар Кенгаши раисининг, вилоятлар ва Тошкент шаҳар ҳокимларининг иқтисодиёт ва тадбиркорлик масалалари бўйича биринчи ўринбосарлари томонидан тегишли йил учун тадбирлар режаси ишлаб чиқилиши ва амалга оширилиши бўйича чоралар кўрсин.

3. Белгилансинки, иссиқлик таъминоти хизматларини кўрсатиш соҳасида:

а) Ўзбекистон Республикаси Уй-жой коммунал хизмат кўрсатиш вазирлиги Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда қуйидагилар учун жавобгардир:

иссиқлик таъминоти корхоналари томонидан хизматлар тузиладиган шартномаларга мувофиқ кўрсатилишини, шунингдек, истеъмолчиларга иссиқлик энергияси ва иссиқ сув узлуксиз етказиб берилишини таъминлаш;

иссиқлик энергияси ва иссиқ сув учун тўловларнинг квартиралар ички ҳисобга олиш ускуналари кўрсаткичлари, истеъмолнинг норматив ҳажмлари ва квартиранинг иситиладиган майдони ўлчами асосида ўз вақтида ва тўлиқ ундирилишини таъминлашни, шунингдек, истеъмолчиларнинг қарздорлиги камайтирилишини назорат қилиш;

иссиқлик таъминоти корхоналари томонидан кўрсатиладиган хизматлар ҳажмлари ҳақидаги ҳисобот ва ахборотлар, дебитор ва кредитор қарздорлик тўғрисидаги маълумотларнинг ҳаққонийлиги, шунингдек, иссиқлик энергияси ҳамда иссиқ сувни назорат қилиш ва ҳисобга олишнинг автоматлаштирилган тизимини жорий этиш;

иссиқлик таъминоти тизими объектларининг ҳолати, фойдаланилиши ва уларга таъмирлаш хизмати кўрсатилиши устидан назоратни таъминлаш;

иссиқлик энергияси ва иссиқ сувни ҳисобга олиш ускуналарининг алмаштирилиши ва ўрнатилишини, шунингдек, иссиқлик таъминоти корхоналари томонидан уларнинг пломбаланишини ташкил этиш;

иссиқлик энергияси ва иссиқ сувдан ноқонуний фойдаланиш ҳолатларини аниқлаш, бартараф этиш ва олдини олиш;

б) Тошкент шаҳар ҳокимлиги ушбу банднинг «а» кичик бандида назарда тутилган тадбирларнинг Тошкент шаҳрида амалга оширилиши учун жавобгардир.

4. Ўзбекистон Республикаси Уй-жой коммунал хизмат кўрсатиш вазирлиги, Иқтисодиёт ва саноат вазирлиги, Молия вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг:

Олдинги таҳрирга қаранг.

Ўзбекистон Республикаси Уй-жой коммунал хизмат кўрсатиш вазирлигининг марказий аппарати тузилмасида Иссиқлик таъминоти тизимларидан фойдаланиш бошқармасини тугатган ҳолда, иссиқлик таъминоти тизимларини комплекс ривожлантириш ва модернизация қилиш, шунингдек, уларнинг объектларидан ишончли ва самарали фойдаланишни таъминлаш учун масъул бўлган Иссиқлик таъминоти тизимларини комплекс ривожлантириш бошқармаси ҳамда Иссиқлик таъминоти тизимларини сақлаш ва улардан фойдаланиш бошқармасини ташкил этиш тўғрисидаги таклифлари қабул қилинсин.

(4-банднинг иккинчи хатбошиси Ўзбекистон Республикаси Президентининг 2025 йил 11 мартдаги ПҚ-100-сонли қарори таҳририда — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(4-банднинг учинчи хатбошиси Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан чиқарилган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(4-банднинг тўртинчи хатбошиси Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан чиқарилган — Қонунчилик маълумотлари миллий базаси, 15.03.2025 й., 07/25/100/0240-сон)

Белгилансинки, ушбу банднинг иккинчи хатбошисида кўрсатилган янгидан ташкил этилаётган бошқармаларнинг штат бирликлари сони Ўзбекистон Республикаси Уй-жой коммунал хизмат кўрсатиш вазирлиги тизими бошқарув ходимларининг белгиланган умумий сони ва меҳнатга ҳақ тўлаш фонди доирасида шакллантирилади.

5. Ўзбекистон Республикаси Уй-жой коммунал хизмат кўрсатиш вазирлиги томонидан Иқтисодиёт ва саноат вазирлиги, Молия вазирлиги, Қорақалпоғистон Республикаси Вазирлар Кенгаши ва вилоятлар ҳокимликлари билан биргаликда ишлаб чиқилган 2019 — 2022 йилларда республиканинг иссиқлик таъминоти тизимини ривожлантиришга қаратилган қўшимча чора-тадбирларни амалга ошириш бўйича «Йўл харитаси» 2-иловага мувофиқ тасдиқлансин.

Масъул вазирлик ва идоралар раҳбарлари зиммасига ушбу бандда назарда тутилган «Йўл харитаси»га киритилган чора-тадбирларни ўз вақтида, тўлиқ ва сифатли амалга ошириш юзасидан шахсий жавобгарлик юклансин.

7. Республиканинг иссиқлик таъминоти тизимини ислоҳ қилишга кўмаклашиш бўйича ишчи гуруҳ 4-иловага мувофиқ таркибда тузилсин ва унга қуйидаги вазифалар юклатилсин:

иссиқлик энергиясини ишлаб чиқариш ва етказиш сарф-харажатларини камайтириш, магистрал ва уйларнинг ички иссиқлик таъминоти тармоқларида мавжуд йўқотишларни қисқартириш бўйича амалий чора-тадбирларни ташкил этиш;

иссиқлик таъминоти соҳасига замонавий технологиялар ва бошқарув усуллари, жумладан иссиқлик энергиясини ишлаб чиқариш, тақсимлаш ҳамда унинг истеъмолини назорат қилиш ва ҳисобга олишнинг автоматлаштирилган тизими фаол жорий этилишини таъминлаш;

иссиқлик таъминоти соҳасида давлат тариф сиёсатини такомиллаштириш, шунингдек, инвестициявий жозибадорликни ошириш бўйича ҳар томонлама таҳлил ўтказиш ва таклифлар ишлаб чиқиш;

иссиқлик таъминоти соҳасидаги истиқболли инвестиция лойиҳаларини, шу жумладан давлат-хусусий шериклик лойиҳаларини тайёрлаш, кўриб чиқиш ва амалга оширишга кўмаклашиш;

«Йўл харитаси»да назарда тутилган тадбирларнинг ўз вақтида, тўлиқ ва сифатли амалга оширилишини тизимли мониторинг қилиш;

мазкур қарорда назарда тутилган вазифалар амалга оширилишининг ҳолати тўғрисида ҳар чоракда Ўзбекистон Республикаси Вазирлар Маҳкамасига ахборот киритиб бориш.

Ишчи гуруҳ (Б.А. Хўжаев) бир ой муддатда мазкур қарорнинг ижросини таъминлаш бўйича батафсил амалий тадбирлар режаси ишлаб чиқилиши ва амалга оширилишини ташкил этсин.

8. Ўзбекистон Республикаси Иқтисодиёт ва саноат вазирлиги:

Олдинги таҳрирга қаранг.

(8-банднинг «а» кичик банди Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан чиқарилган — Қонунчилик маълумотлари миллий базаси, 15.03.2025 й., 07/25/100/0240-сон)

б) Уй-жой коммунал хизмат кўрсатиш вазирлиги, Энергетика вазирлиги, Инвестициялар ва ташқи савдо вазирлиги ҳамда бошқа манфаатдор вазирлик ва идоралар билан биргаликда икки ой муддатда:

иссиқликни сақловчи, шу жумладан пенополиуретандан тайёрланган полимер изоляцияли ва ҳимоя қобиғига ўралган, каналсиз ётқизиш имконини берувчи қувурлар, шунингдек, индивидуал иссиқлик пунктлари ва уларнинг бутловчи буюмларини ишлаб чиқариш соҳасида саноат тармоқлари ўртасидаги ўзаро кооперацияни кенгайтириш бўйича мавжуд салоҳиятни ўргансин;

мавжуд хом ашё ресурсларини инобатга олган ҳолда, маҳаллийлаштирилиши лозим бўлган, иссиқлик таъминоти соҳасида фойдаланиладиган маҳсулотлар рўйхатини шакллантирсин ҳамда 2020 — 2022 йилларда уларни ишлаб чиқаришни маҳаллийлаштириш ва қувватларини кенгайтириш бўйича чора-тадбирлар дастурини Вазирлар Маҳкамасига киритсин.

Олдинги таҳрирга қаранг.

(9-банд Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

10. Ўзбекистон Республикаси Олий ва ўрта махсус таълим вазирлиги Уй-жой коммунал хизмат кўрсатиш вазирлиги билан биргаликда бир ой муддатда 2020/2021 ўқув йилидан бошлаб:

Тошкент давлат техника университетида (Тошкент қурилиш-коммунал касб-ҳунар коллежи негизида) — иссиқлик таъминоти соҳасида талаб юқори бўлган мутахассисларни (иссиқлик техникаси муҳандиси, муҳандис-метролог, энергия аудити муҳандиси, муҳандис-иқтисодчи) тизимли ўқитиш ва тайёрлашни;

соҳага оид таълим муассасаларида — замонавий ва инновацион ўқитиш усулларини қўллаган ҳолда, иссиқлик таъминоти объектларини лойиҳалаштириш, қуриш, бошқариш ва улардан фойдаланиш соҳасида мутахассисларни касбга қайта тайёрлаш бўйича доимий ишлайдиган қисқа муддатли (3 ойдан 12 ойгача) курсларни ташкил этиш юзасидан Вазирлар Маҳкамасига таклифлар киритсин.

11. Ўзбекистон Республикаси Уй-жой коммунал хизмат кўрсатиш вазирлиги манфаатдор вазирлик ва идоралар билан биргаликда икки ой муддатда қонун ҳужжатларига мазкур қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

12. Мазкур қарорнинг ижросини назорат қилиш Ўзбекистон Республикасининг Бош вазири А.Н. Арипов ва Ўзбекистон Республикаси Президентининг маслаҳатчиси Р.А. Гулямов зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2019 йил 2 декабрь,

ПҚ-4542-сон

Ўзбекистон Республикаси Президентининг 2019 йил 2 декабрдаги ПҚ-4542-сон қарорига
1-ИЛОВА

2020 йилда аҳоли учун иссиқлик энергияси ва иссиқ сувга пасайтирилган тарифларни қўллаш натижасида кўриладиган зарарларни қоплаш учун маблағларнинг ҳисоб-китоб суммаси

		млн сўм
Т/р	Корхоналарнинг номи	Сумма *
	Жами республика бўйича, шу жумладан:	333 197,7
1.	Қорақалпоғистон Республикаси
	«Коммуналлык ыссылык орайы» ДУК	138,2
	«Тахиаташ ыссылык тармаклары» МЧЖ	190,0
2.	Андижон вилояти
	«Иссиқлик манбаи» ДУК	211,8
3.	Бухоро вилояти
	«Иссиқлик манбаи» ДУК	13 923,5
	«Бухороэнергомарказ» ДУК	8 837,1
4.	Жиззах вилояти
	«Иссиқлик манбаи» ДУК	184,3
5.	Қашқадарё вилояти
	«Иссиқлик манбаи» ДУК	207,2
6.	Наманган вилояти
	«Иссиқлик манбаи» ДУК	171,3
7.	Самарқанд вилояти
	«Иссиқлик манбаи» ДУК	169,4
8.	Сурхондарё вилояти
	«Иссиқлик манбаи» ИЧБ	110,3
9.	Тошкент вилояти
	«Иссиқлик манбаи» ИЧБ	4 687,7
	«Иссиқлик энергияси» ИЧК (Чирчиқ шаҳри)	4 988,1
	«Иссиқлик энергияси» ДУК (Ангрен шаҳри)	18 881,3
	«Коммунал хизмат кўрсатиш» ДК (Ангрен шаҳри)	1 843,9
10.	Фарғона вилояти
	«Иссиқлик манбаи» ИЧБ	1 192,5
	«Киргули иссиқлик манбаи» МЧЖ	2 372,6
11.	Хоразм вилояти
	«Хоразм иссиқлик манбаи» ДУК	1 645,4
12.	Тошкент шаҳри
	«Тошиссиққуввати» ДУК	273 443,1

* Ўзбекистон Республикаси Давлат бюджетидан иссиқлик таъминоти корхоналарига ажратиладиган маблағлар суммаси асослантирилган ҳисоб-китоблар асосида аҳолига амалда сотиладиган иссиқлик энергияси ҳажмлари ва тарифлар тафовути бўйича аниқлаштирилиши лозим.

Ўзбекистон Республикаси Президентининг 2019 йил 2 декабрдаги ПҚ-4542-сон қарорига
2-ИЛОВА

2019 — 2022 йилларда республиканинг иссиқлик таъминоти тизимини ривожлантиришга қаратилган қўшимча чора-тадбирларни амалга ошириш бўйича

«Йўл харитаси»

Олдинги таҳрирга қаранг.

Т/р	Чора-тадбирларнинг номи	Амалга ошириш муддатлари	Молиялаштириш манбалари	Масъул ижрочилар
I. Норматив-ҳуқуқий базани такомиллаштириш
1.	Экспертларни жалб қилган ҳолда «Иссиқлик таъминоти тўғрисида»ги Ўзбекистон Республикаси қонуни лойиҳасини ишлаб чиқиш ва Вазирлар Маҳкамасига киритиш, унда қуйидагиларни назарда тутиш: аҳолини иссиқлик энергияси ва иссиқ сув билан тўла-тўкис ва сифатлитаъминлашга йўналтирилган иссиқлик таъминоти соҳасини давлат томонидан тартибга солиш механизмларини такомиллаштиришни; аҳолига кўрсатилаётган иссиқлик таъминоти хизматлари сифатини оширишга, иссиқлик таъминоти тизимини ривожлантириш ва модернизация қилишни рағбатлантиришга, шунингдек, иссиқлик таъминоти корхоналари фаолиятини қўллаб-қувватлашга қаратилган иссиқлик таъминоти соҳасидаги давлат тариф сиёсатини; иссиқлик таъминоти тизимларининг таркиби ва классификациясини, иссиқлик энергиясини ишлаб чиқариш технология ва усулларини, шу жумладан электр ва иссиқлик энергиясини комбинацияланган тарзда ишлаб чиқариш (когенерация), шунингдек, экология хавфсизлигини таъминлаш ва ёқилғи-энергетика ресурсларидан самарали фойдаланишни инобатга олган ҳолда бошқа турдаги энергияни иссиқлик энергиясига айлантиришни; иссиқлик таъминоти субъектлари ўртасидаги муносабатларни ва ўзаро ҳисоб-китобларни тартибга солишнинг замонавий усулларини, шунингдек, мазкур соҳада шаклланган ижобий амалиётни ва илғор хорижий тажрибани инобатга олган ҳолда ушбу субъектларнинг ҳуқуқ ва мажбуриятларини. Амалга ошириш шакли: Ўзбекистон Республикасининг қонуни лойиҳаси	2020 йил 1 декабрь	—	Уй-жой коммунал хизмат кўрсатиш вазирлиги (М. Солиев), Иқтисодиёт ва саноат вазирлиги (Б. Хўжаев), манфаатдор вазирлик ва идоралар
2.	Экспертларни жалб қилган ҳолда Қорақалпоғистон Республикаси ва вилоятларнинг иссиқлик таъминоти тизимларини комплекс ривожлантириш ва тўла миқёсда модернизация қилиш стратегиялари лойиҳаларини, шу жумладан иссиқлик таъминоти схемалари, иссиқлик таъминоти тизимларини ривожлантириш режалари, мазкур стратегияларни амалга оширишни молиялаштириш манбаларини кўрсатган ҳолда ишлаб чиқиш ва Вазирлар Маҳкамасига киритиш. Амалга ошириш шакли: стратегиялар лойиҳалари ва таҳлилий маълумотномалар	2020 йил 1 декабрь	Уй-жой коммунал хизмат кўрсатиш вазирлиги ҳузуридаги Уй-жой коммунал хўжалигини ривожлантириш жамғармаси маблағлари, халқаро молия институтлари ва донор мамлакатларнинг грантлари, қонун ҳужжатларида тақиқланмаган бошқа манбалар	Уй-жой коммунал хизмат кўрсатиш вазирлиги (М. Солиев), Иқтисодиёт ва саноат вазирлиги (Б. Хўжаев), Инновацион ривожланиш вазирлиги (И. Абдурахмонов), Инвестициялар ва ташқи савдо вазирлиги (С. Умурзоқов), «Иссиқликэлектрлойиҳа» АЖ (келишув бўйича)
3.	Иссиқлик таъминоти хизматларига тартибга солинадиган нархлар (тарифлар)ни шакллантириш, декларация қилиш (тасдиқлаш) ва ўрнатиш тартиби тўғрисидаги низом ишлаб чиқиш ва тасдиқлаш, шу жумладан шакллантирилаётган нарх (тариф) таркибига иссиқлик таъминоти тизимини ривожлантириш ва модернизация қилиш бўйича сарф-харажатлар киритилишини назарда тутиш. Амалга ошириш шакли: идоравий норматив-ҳуқуқий ҳужжат	2020 йил 1 июль	—	Молия вазирлиги (Т. Ишметов), Иқтисодиёт ва саноат вазирлиги (Б. Хўжаев), Уй-жой коммунал хизмат кўрсатиш вазирлиги (М. Солиев), Монополияга қарши курашиш қўмитаси (Н. Шарипов)
4.	Иссиқлик юкламаларини ҳамда иссиқлик энергиясини ишлаб чиқариш ва етказиб беришга сарфланадиган ёқилғи, электр энергияси, иссиқлик энергияси ва сув нормаларини, шунингдек, технологик йўқотишлар нормаларини аниқлаш тартибини бугунги кун ҳолатини инобатга олган ҳолда такомиллаштириш. Амалга ошириш шакли: идоравий норматив-ҳуқуқий ҳужжат	2020 йил 1 июль	—	Уй-жой коммунал хизмат кўрсатиш вазирлиги (М. Солиев), Энергетика вазирлиги (Ж. Мирзамахмудов), Саноат хавфсизлиги давлат қўмитаси (Б. Гулямов)
II. Иссиқлик таъминотини бошқариш тизимини такомиллаштириш ва ушбу соҳадаги хизматлар сифатини ошириш
5.	Ҳар бир ҳудудда биттадан қозонхона мисолида иссиқлик таъминоти тизимларининг ҳолати ва самарадорлигини комплекс ўрганиш бўйича график-режа ишлаб чиқиш ва амалга ошириш ҳамда Вазирлар Маҳкамасига қуйидагиларни назарда тутувчи аниқ таклифлар киритиш:	Ишлаб чиқиш: 2019 йил 20 декабрь	Ижрочиларнинг маблағлари	Иқтисодиёт ва саноат вазирлиги (Б. Хўжаев), Уй-жой коммунал хизмат кўрсатиш вазирлиги (М. Солиев), Энергетика вазирлиги (Ж. Мирзамахмудов) Қорақалпоғистон Республикаси Вазирлар Кенгаши ва вилоятлар ҳокимликлари, «Иссиқликэлектрлойиҳа» АЖ (келишув бўйича)
5.	иссиқлик энергиясини ишлаб чиқариш ва етказиб бериш сарф-харажатларини камайтиришни; магистрал ва уйларнинг ички иссиқлик таъминоти тармоқларида амалдаги йўқотишларни қисқартиришни; электр ва иссиқлик энергиясини комбинацияланган тарзда ишлаб чиқариш (когенерация) технологиясини жорий этиш имкониятларини; иссиқлик энергияси ва иссиқ сувни ҳисобга олиш тизимини, шунингдек, аҳолига кўрсатилаётган иссиқлик таъминоти хизматлари учун ҳисоб-китоб механизмларини такомиллаштириш. Амалга ошириш шакли: таклифларни ўз ичига олган таҳлилий маълумотнома	Амалга ошириш: 2019 йил декабрь — 2020 йил апрель	Ижрочиларнинг маблағлари
6.	Ҳудудларнинг иссиқлик таъминоти тизимларини ривожлантириш бўйича манзилли дастурларга киритилган лойиҳаларнинг техник-иқтисодий асосларини ўз вақтида ишлаб чиқиш бўйича амалий чора-тадбирларни амалга ошириш, шу жумладан:	2020-2021 йиллар	Қорақалпоғистон Республикаси бюджети ва вилоятлар маҳаллий бюджетларининг қўшимча манбалари маблағлари	Уй-жой коммунал хизмат кўрсатиш вазирлиги (М. Солиев), Иқтисодиёт ва саноат вазирлиги (Б. Хўжаев), Қорақалпоғистон Республикаси Вазирлар Кенгаши ва вилоятлар ҳокимликлари
	иссиқлик таъминоти соҳасидаги лойиҳаларнинг техник-иқтисодий асосларини тайёрлаш бўйича амалий чора-тадбирлар режасини ишлаб чиқиш ва тасдиқлаш;	2020 йил 1 январь
	Вазирлар Маҳкамасига лойиҳаларни амалга ошириш чора-тадбирлари ва уларни молиялаштириш манбалари тўғрисида таклифлар киритиш. Амалга ошириш шакли: амалий чора-тадбирлар режаси, техник-иқтисодий асослар ва таклифларни ўз ичига олган таҳлилий маълумотнома	ҳар бир лойиҳанинг ТИАси тайёрланишига қараб
8.	Иссиқлик таъминоти тизимлари самарадорлигини ошириш бўйича тадбирларни молиялаштириш манбаларини кенгайтириш имкониятлари ва механизмларини, шу жумладан зарур қурилма ва ускуналар харид қилиш учун лизинг механизмларидан қисман гаров таъминоти сифатида маҳаллий давлат ҳокимияти органлари томонидан кафолат тақдим этган ҳолда фойдаланиш усулларини ўрганиш. Амалга ошириш шакли: таклифларни ўз ичига олган таҳлилий маълумотнома	2020 йил 1 апрель	—	Уй-жой коммунал хизмат кўрсатиш вазирлиги (М. Солиев), Капитал бозорини ривожлантириш агентлиги (О. Назиров), Молия вазирлиги (Т. Ишметов)
9.	Аҳолини иссиқлик энергияси ва иссиқ сув билан таъминлаш соҳасидаги илғор хорижий тажрибага асосланган ҳолда, давлат-хусусий шериклик шартлари асосида хусусий манбалардан ягона иссиқлик таъминоти тизимига иссиқлик энергиясини етказиб бериш тизимини яратиш бўйича таклифлар ишлаб чиқиш. Амалга ошириш шакли: таклифларни ўз ичига олган таҳлилий маълумотнома	2020 йил 1 сентябрь	—	ДХШни ривожлантириш агентлиги (Ғ. Холжигитов), Уй-жой коммунал хизмат кўрсатиш вазирлиги (М. Солиев)
III. Иссиқлик энергияси ва иссиқ сувни назорат қилиш ҳамда ҳисобга олиш тизимини такомиллаштириш
10.	Иссиқлик таъминоти корхоналарида иссиқлик энергияси ва иссиқ сувни назорат қилиш ҳамда ҳисобга олишнинг интеграциялашган автоматлаштирилган тизимини жорий этиш бўйича амалий чора-тадбирлар режасини ишлаб чиқиш ва амалга ошириш.	Ишлаб чиқиш: 2020 йил 1 январь	Иссиқлик таъминоти корхоналарининг ўз маблағлари	Қорақалпоғистон Республикаси Вазирлар Кенгаши, вилоятлар ҳокимликлари, Уй-жой коммунал хизмат кўрсатиш вазирлиги (М. Солиев)
10.	Амалга ошириш шакли: амалий чора-тадбирлар режаси	Амалга ошириш: 2020-2021 йиллар давомида	Иссиқлик таъминоти корхоналарининг ўз маблағлари
12.	Истеъмолчиларнинг ўз эҳтиёжидан келиб чиққан ҳолда иссиқлик истеъмол қилишни тартибга солиш имкониятини таъминлайдиган иссиқликни ҳисобга олувчи квартира ички асбобларини ўрнатиш учун кўп квартирали уйларни иссиқлик энергияси тақсимлагичлари билан жиҳозлаш имкониятларини ўрганиш нуқтаи назаридан қурилиш нормалари ва қоидаларини, илғор хорижий тажрибани таҳлил қилиш ҳамда Вазирлар Маҳкамасига тегишли таклифлар киритиш. Амалга ошириш шакли: таклифларни ўз ичига олган таҳлилий маълумотнома	2020 йил 1 сентябрь	—	Қурилиш вазирлиги (Б. Зокиров), Уй-жой коммунал хизмат кўрсатиш вазирлиги (М. Солиев), «Иссиқликэлектрлойиҳа» АЖ (келишув бўйича)
13.	Энергия йўқотилиши манбалари ва сабабларини аниқлаш, шунингдек, энергия ресурсларидан нооқилона фойдаланишга барҳам бериш мақсадида ҳудудларнинг иссиқлик таъминоти тизимларини энергетика текширувдан (энергия аудити) ўтказиш, шу жумладан:	2020 — 2022 йиллар	Уй-жой коммунал хизмат кўрсатиш вазирлиги ҳузуридаги Уй-жой коммунал хўжалигини ривожлантириш жамғармаси маблағлари, Қорақалпоғистон Республикаси бюджети ва вилоятлар маҳаллий бюджетларининг қўшимча манбалари	Уй-жой коммунал хизмат кўрсатиш вазирлиги (М. Солиев), Иқтисодиёт ва саноат вазирлиги (Б. Хўжаев), Энергетика вазирлиги (Ж. Мирзамахмудов), Молия вазирлиги (Т. Ишметов), Қорақалпоғистон Республикаси Вазирлар Кенгаши ва вилоят ҳокимликлари
	2020 — 2022 йилларда ҳудудлар кесимида иссиқлик таъминоти тизимларини энергия аудитидан ўтказиш режа-жадвалини ишлаб чиқиш;	2020 йил 1 март
	иссиқлик таъминоти тизимларини энергия аудитидан ўтказиш бўйича техник талабларни ишлаб чиқиш;	2020 йил 1 май
	энергия аудити соҳасида ихтисослашган ташкилотларни белгиланган тартибда жалб қилиш;	2020 йил 1 сентябрь
	энергия аудити якунларига кўра энергия тежайдиган чора-тадбирлар бўйича ҳудудлар кесимида таклифлар шакллантириш ва уларни молиялаштириш манбаларини белгилаш. Амалга ошириш шакли: ташкилий тадбирлар ва келгусида амалий чора-тадбирлар режасини ишлаб чиқиш	ҳар бир ҳудуд бўйича энергия аудитидан сўнг 20 кун ичида
IV. Иссиқлик таъминоти соҳасининг кадрлар салоҳиятини ошириш
14.	«Коммуналўқув» ўқув-методик маркази» ДУК негизида иссиқлик таъминоти соҳаси мутахассисларининг малакасини ошириш бўйича доимий ишлайдиган курслар ташкил этиш, шу жумладан: таълимнинг илғор амалиёти ва технологияси асосида 3 ойдан 12 ойгача муддатли мутахассислар малакасини ошириш дастурларини ишлаб чиқиш ва жорий этиш; соҳа мутахассисларини иссиқлик таъминотини бошқаришнинг замонавий усулларига доимий ўқитишни ташкил этиш учун халқаро дастурлар ва жамғармаларнинг грантлари ва техник кўмак маблағларини жалб этиш бўйича тизимли чоралар кўриш. Амалга ошириш шакли: ўқув дастурлари, ўқитиш курслари	2020 йил 1 апрель	«Коммуналўқув» ўқув-методик маркази» ДУК маблағлари, халқаро дастурлар ва жамғармаларнинг грантлари, қонун ҳужжатларида тақиқланмаган бошқа манбалар	Уй-жой коммунал хизмат кўрсатиш вазирлиги (М. Солиев), Олий ва ўрта махсус таълим вазирлиги (И. Мажидов), Инвестициялар ва ташқи савдо вазирлиги (С. Умурзоқов)
15.	Уй-жой коммунал хизмат кўрсатиш вазирлигининг Қўшкўпир, Ангор, Қарши ва Бекобод туманларидаги таълим муассасалари негизида таълимнинг ишлаб чиқариш билан, шу жумладан илмий-тадқиқот ва тажриба-конструкторлик соҳаларида самарали интеграциялашувини таъминлайдиган профессионал-таълим кластерларини босқичма-босқич ташкил этиш. Амалга ошириш шакли: ташкилий тадбирлар	2020 йил 1 сентябрь	Уй-жой коммунал хизмат кўрсатиш вазирлиги ҳузуридаги Уй-жой коммунал хўжалигини ривожлантириш жамғармаси маблағлари, халқаро дастурлар ва жамғармаларнинг грантлари, қонун ҳужжатларида тақиқланмаган бошқа манбалар	Уй-жой коммунал хизмат кўрсатиш вазирлиги (М. Солиев), Олий ва ўрта махсус таълим вазирлиги (И. Мажидов), Инвестициялар ва ташқи савдо вазирлиги (С. Умурзоқов)
16.	Иссиқлик таъминоти соҳасидаги мутахассисларни тайёрлаш, қайта тайёрлаш ва уларнинг касб маҳоратини ошириш бўйича ўқув курслари,амалий семинар ва тренинглар, шунингдек, уларнинг чет элда ишлаб чиқариш амалиёти ўташини ташкил этиш учун халқаро дастурлар ва жамғармаларнинг грантларини жалб этиш чораларини кўриш. Амалга ошириш шакли: ташкилий тадбирлар	2020 — 2022 йиллар	—	Уй-жой коммунал хизмат кўрсатиш вазирлиги (М. Солиев), Инвестициялар ва ташқи савдо вазирлиги (С. Умурзоқов)

(2-илова Ўзбекистон Республикаси Президентининг 2025 йил 11 мартдаги ПҚ-100-сонли қарори таҳририда — Қонунчилик маълумотлари миллий базаси, 15.03.2025 й., 07/25/100/0240-сон)

Ўзбекистон Республикаси Президентининг 2019 йил 2 декабрдаги ПҚ-4542-сон қарорига
4-ИЛОВА

Республиканинг иссиқлик таъминоти тизимини ислоҳ қилишга кўмаклашиш бўйича ишчи гуруҳ

ТАРКИБИ

Хўжаев Ботир Асадиллаевич	—	иқтисодиёт ва саноат вазири, Ишчи гуруҳ раҳбари
Салиев Музаффар Холдорбоевич	—	уй-жой коммунал хизмат кўрсатиш вазири, Ишчи гуруҳ раҳбарининг ўринбосари
Турсунов Ёрқин Эргашевич	—	молия вазирининг ўринбосари
Ходжаев Шерзод Ҳикматуллаевич	—	энергетика вазирининг ўринбосари
Хидоятов Шерзод Саиджанович	—	қурилиш вазирининг биринчи ўринбосари
Вафаев Шухрат Абдушарифович	—	инвестициялар ва ташқи савдо вазирининг ўринбосари
Умаров Олимжон Мухамаджанович	—	ахборот технологиялари ва коммуникацияларини ривожлантириш вазирининг биринчи ўринбосари
Ражаббаев Шароф Рахимбердиевич	—	инновацион ривожланиш вазирининг биринчи ўринбосари в.б.
Холжигитов Ғолиб Аблакулович	—	Молия вазирлиги ҳузуридаги Давлат-хусусий шерикликни ривожлантириш агентлиги директори
Джамалов Ғофир Орибжанович	—	уй-жой коммунал хизмат кўрсатиш вазирининг ўринбосари, Ишчи гуруҳ котиби

Изоҳ: Ишчи гуруҳ аъзолари бошқа ишга ўтган тақдирда, унинг таркибига ушбу лавозимга янги тайинланган ёки тегишли функцияларни бажариш зиммасига юкланган шахслар киритилади.

Олдинги таҳрирга қаранг.

(5-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5а-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5б-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5в-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5г-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5д-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5е-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5ж-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5з-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5и-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5к-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5л-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5м-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

Олдинги таҳрирга қаранг.

(5н-илова Ўзбекистон Республикаси Президентининг 2025 йил 11 мартдаги ПҚ-100-сонли қарорига асосан ўз кучини йўқотган — Қонунчилик маълумотлари миллий базаси, 15.03.2025 й., 07/25/100/0240-сон)

(Қонун ҳужжатлари маълумотлари миллий базаси, 03.12.2019 й., 07/19/4542/4099-сон; Қонунчилик маълумотлари миллий базаси, 15.03.2025 й., 07/25/100/0240-сон)