Ўзбекистон Республикаси фуқаро авиацияси фаолиятини янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Президентининг:

«Ўзбекистон Республикасининг фуқаро авиациясини тубдан такомиллаштириш чора-тадбирлари тўғрисида» 2018 йил 27 ноябрдаги ПФ-5584-сон фармонига мувофиқ 2019 йил 1 январдан бошлаб юридик шахс ташкил этмасдан, Ўзбекистон Республикаси Парвозлар хавфсизлигини назорат қилиш давлат инспекциясини ривожлантириш жамғармаси ташкил этилганлиги;

«Транспорт соҳасида давлат бошқаруви тизимини тубдан такомиллаштириш чора-тадбирлари тўғрисида» 2019 йил 1 февралдаги ПФ-5647-сон фармонига мувофиқ Ўзбекистон Республикаси Парвозлар хавфсизлигини назорат қилиш давлат инспекцияси фаолиятини молиялаштиришнинг амалдаги тартиби сақлаб қолинган ҳолда, Ўзбекистон Республикаси Транспорт вазирлиги ҳузуридаги Фуқаро авиацияси агентлиги этиб қайта ташкил этилганлиги маълумот учун қабул қилинсин.

2. Қуйидагилар:

Ўзбекистон Республикаси Транспорт вазирлиги ҳузуридаги Фуқаро авиацияси агентлигини ривожлантириш жамғармаси тўғрисидаги низом 1-иловага мувофиқ;

Ўзбекистон Республикаси Транспорт вазирлиги ҳузуридаги Фуқаро авиацияси агентлиги ходимларининг меҳнатига ҳақ тўлаш ва уларни моддий рағбатлантириш тартиби тўғрисидаги низом 2-иловага мувофиқ;

Фаолияти парвозлар хавфсизлиги таъминланишини назорат қилиш билан боғлиқ бўлган Ўзбекистон Республикаси Транспорт вазирлиги ҳузуридаги Фуқаро авиацияси агентлиги раҳбарлари ва ходимларининг меҳнатига такомиллаштирилган тариф сеткаси бўйича ҳақ тўлаш разрядлари 3-иловага мувофиқ тасдиқлансин.

3. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари — транспорт вазири А.Ж. Раматов ва Ўзбекистон Республикаси Бош вазирининг ўринбосари — молия вазири Ж.А. Қўчқоров зиммасига юклансин.

1. Ушбу Низом Ўзбекистон Республикаси Транспорт вазирлиги ҳузуридаги Фуқаро авиацияси агентлигини ривожлантириш жамғармаси (кейинги ўринларда Жамғарма деб аталади) маблағларини шакллантириш ва улардан фойдаланиш тартибини белгилайди.

2. Жамғарма юридик шахс ҳисобланмайди ва қуйидаги мақсадларда ташкил этилган:

Ўзбекистон Республикаси Транспорт вазирлиги ҳузуридаги Фуқаро авиацияси агентлиги (кейинги ўринларда Агентлик деб аталади) ходимлари меҳнатига ҳақ тўлаш, уларни моддий рағбатлантириш, ижтимоий муҳофаза қилиш, ўқитиш ва малакасини оширишни;

Агентлик вазифаларининг самарали бажаришларини таъминлашни;

Агентликни моддий-техник таъминлаш, шу жумладан замонавий ахборот-коммуникация технологияларини жорий қилишни молиялаштириш чора-тадбирларини такомиллаштириш.

3. Жамғарма маблағлари қуйидаги манбалар ҳисобидан шакллантирилади:

қонун ҳужжатларига мувофиқ пулли хизматлар кўрсатишдан, шу жумладан аэродром ҳудудида парвозлар хавфсизлигига хавф солиши мумкин бўлган фаолиятни амалга ошириш учун рухсатномалар беришдан тушадиган маблағларнинг 100 фоизи;

маъмурий ҳуқуқбузарликлар содир этганлиги учун Агентлик ходимлари томонидан солинадиган жарималар миқдорининг 80 фоизи;

«Ўзаэронавигация» маркази соф фойдасининг 5 фоизи;

авиация хавфсизлиги учун ундириладиган йиғимлар миқдорининг 3 фоизи;

халқаро молия институтлари ва бошқа хорижий донорларнинг грантлари ва кредитлари;

қонун ҳужжатларида тақиқланмаган бошқа манбалар.

4. Жамғарма маблағларининг тушиши ва сарфланиши миллий валютада ҳисобга олинади.

5. Жамғармага тушадиган маблағлар Ўзбекистон Республикасининг Бюджет кодексига мувофиқ Агентликнинг даромадлар манбалари бўйича очилган махсус ғазначилик шахсий ҳисобварақларида жамланади.

6. Жамғарма маблағларидан қуйидаги мақсадларда фойдаланилади:

а) Агентликни моддий-техник таъминлаш, замонавий ахборот-коммуникация технологияларини жорий этиш, шунингдек, Ўзбекистон Республикаси давлат бюджети маблағлари билан қопланмаган бошқа харажатлар учун;

б) Агентлик ходимларининг меҳнатига ҳақ тўлаш, уларни моддий рағбатлантириш, мукофотлаш, моддий ёрдам кўрсатиш, ижтимоий ҳимоя қилиш, ўқитиш ва малакасини ошириш, шу жумладан:

Агентлик ходимларига вақтинча меҳнатга лаёқатсизлик бўйича нафақалар тўлаш;

Агентлик ходимларига Ўзбекистон Республикаси фуқаро авиацияси ҳаво кемаларида имтиёзли (махсус) тарзда юриш харажатларни қоплаш учун;

в) Агентлик фаолияти билан боғлиқ масалалар бўйича хорижий давлатлар, халқаро ташкилотлар делегацияларининг Ўзбекистон Республикасига ташрифларини ташкил этиш, шу жумладан:

вакиллик харажатларини, шунингдек, конференциялар, симпозиумлар, семинарлар, тренинглар ва давра суҳбатларини ўтказиш харажатларини қоплаш, сувенирлар, маҳсулотлар, буклетлар ва ахборот-маърифий материалларни харид қилиш;

хорижий мамлакатларда ўтказиладиган конференциялар, семинарлар ва бошқа тадбирларда иштирок этиш учун;

в¹) давлат органлари ва бошқа ташкилотлар, шу жумладан, етакчи лойиҳа институтлари, илмий ва таълим муассасалари, халқаро ташкилотлар ҳамда хорижий компанияларнинг юқори малакали мутахассисларини ва экспертларни шартнома асосида жалб қилиш харажатлари учун;

г) қонунчиликда тақиқланмаган Агентлик фаолиятини ривожлантиришга йўналтирилган бошқа тадбирлар учун.

7. Жамғарманинг жорий йилда фойдаланилмаган маблағлари олиб қўйилмайди ва кейинги йилга ўтказилади.

8. Жамғарма маблағларидан ҳар йили Агентлик директори томонидан тасдиқланадиган харажатлар сметаси асосида фойдаланилади. Агентлик даромадлари ва харажатлари сметаси Ўзбекистон Республикаси Молия вазирлигида рўйхатдан ўтказилади.

9. Жамғарманинг даромадлари ва харажатлари сметаси келгуси йил учун маблағлар тушишининг кутилаётган прогнози ва тадбирлар ўтказиш заруратидан келиб чиққан ҳолда тузилади.

10. Агентликнинг ташаббуси билан зарур ҳолларда, Жамғарманинг даромадлари ва харажатлари сметасига Ўзбекистон Республикаси Молия вазирлигида рўйхатдан ўтказилгандан кейин Жамғармага тушадиган маблағлар миқдоридан келиб чиққан ҳолда, белгиланган тартибда ўзгартиришлар киритилиши мумкин.

11. Жамғарма маблағларидан оқилона ва қатъий мақсадли фойдаланиш юзасидан назорат қонун ҳужжатларида белгиланган тартибда олиб борилади.

12. Агентлик директори Жамғарма маблағларидан қонуний ва мақсадли фойдаланилиши учун жавоб беради.

13. Ушбу Низом талаблари бузилишида айбдор бўлган шахслар қонун ҳужжатларида белгиланган тартибда жавоб берадилар.

1. Ушбу Низом Ўзбекистон Республикаси Транспорт вазирлиги ҳузуридаги Фуқаро авиацияси агентлиги (кейинги ўринларда Агентлик деб аталади) ходимларининг меҳнатига ҳақ тўлаш ва уларни моддий рағбатлантириш тартибини белгилайди.

2. Фаолияти парвозлар хавфсизлигини назорат қилиш билан боғлиқ бўлган Агентлик раҳбарлари ва ходимларининг лавозим маошлари такомиллаштирилган тариф сеткаси бўйича тариф коэффициентини қўллаган ҳолда уч баробар миқдорда белгиланади: битта лавозим маоши — бюджет маблағлари ҳисобидан, иккита лавозим маоши — Ўзбекистон Республикаси Транспорт вазирлиги ҳузуридаги Фуқаро авиацияси агентлигини ривожлантириш жамғармаси маблағлари ҳисобидан (кейинги ўринларда Жамғарма деб аталади).

Қўшимча ҳақ ва устамалар лавозим маошларининг умумий йиғиндисидан белгиланади.

3. Агентлик ходимларининг меҳнатига ҳақ тўлаш, уларни моддий рағбатлантириш ва мукофотлаш, шунингдек, уларга моддий ёрдам кўрсатиш қуйидагилар ҳисобидан амалга оширилади:

а) бюджет ажратмалари ҳисобидан:

Агентлик ходимларининг лавозим маошлари;

қонунчиликда белгиланган тартибда ва миқдорда давлат хизматчиларининг лавозим маошига меҳнатни рағбатлантириш коэффициенти;

йилига меҳнатга ҳақ тўлашнинг икки ойлик фонди миқдоридаги мукофотлар;

бир йилда бир маротаба бир ойлик меҳнатга ҳақ тўлаш фонди миқдорида моддий ёрдам тўловлари;

Агентлик ходимларининг меҳнатини моддий рағбатлантириш махсус фонди маблағлари ҳисобидан меҳнатга ҳақ тўлаш фонди маблағларининг 15 фоизи миқдорида моддий тақдирлаш ва рағбатлантириш;

фахрий унвонлар учун қўшимча ҳақлар;

б) Жамғарма маблағлари ҳисобидан:

фаолияти парвозлар хавфсизлигини назорат қилиш билан боғлиқ бўлган Агентлик раҳбарлари ва ходимларининг иккита лавозим маошлари;

вақтинча меҳнатга лаёқатсизлик бўйича нафақалар тўлаш;

Агентлик ходимларининг ушбу Низом 3-бобида кўрсатилган ҳар ойлик устамалари, моддий ёрдам ва мукофотлари;

қонун ҳужжатларида тақиқланмаган бошқа қўшимча ҳақ ва устамалар.

4. Амалдаги (учувчи, штурман) гувоҳномаларга эга бўлган раҳбар ва инспекторлар таркибига лавозим маошига ҳар ой қуйидаги миқдорларда устамалар белгиланади:

Халқаро фуқаро авиацияси ташкилотининг (кейинги ўринларда ИКАО деб аталади) тилни билишни баҳолаш шкаласи бўйича инглиз тилини 4-даражадан паст бўлмаган даражада билиш ва амалий фаолиятда қўллаши учун — 15 фоиз;

2 — даражали малака учун — 30 фоизгача;

1 — даражали малака учун — 50 фоизгача;

фуқаро авиациясининг амалдаги (учувчи, штурман) гувоҳномаси учун 50 фоизгача;

1 соат парвоз вақти учун — Ўзбекистон Республикасида белгиланган меҳнатга ҳақ тўлашнинг энг кам миқдорининг икки бараваригача миқдорида. Бир ойда 20 соатдан ошган ҳақиқий парвоз вақти учун ҳақ тўланмайди.

5. Ҳаводаги ҳаракатни бошқариш бўйича амалдаги диспетчер гувоҳномасига эга бўлган раҳбар ва инспекторлар таркибига лавозим маошига ҳар ой қуйидаги миқдорларда устамалар белгиланади:

ИКАОнинг тилни билишни баҳолаш шкаласи бўйича инглиз тилини 4-даражадан паст бўлмаган даражада билиш ва амалий фаолиятда қўллаш учун — 15 фоиз;

2 — даражали малака учун — 30 фоизгача;

1 — даражали малака учун — 50 фоизгача;

ҳаводаги ҳаракатни бевосита бошқариш билан боғлиқ бўлган иш ўринларида мустақил ишлашга рухсатнома учун — 30 фоизгача;

ҳаво ҳаракатини бошқаришнинг автоматлаштирилган тизимида мустақил ишлашга рухсатнома учун — 30 фоизгача;

ҳаводаги ҳаракатни бошқариш бўйича амалдаги диспетчер гувоҳномаси учун — 50 фоизгача;

ҳаво кемаларига хизмат кўрсатишни ташкил этиш ва ҳаво ҳудудидан фойдаланишни текшириш ҳамда назорат қилиш учун — 50 фоизгача.

6. Ҳаво кемаларига техник хизмат кўрсатиш бўйича амалдаги муҳандис гувоҳномасига эга бўлган раҳбар ва инспекторлар таркибига лавозим маошига ҳар ой қуйидаги миқдорларда устамалар белгиланади:

ходимга ҳар бир ҳаво кемаси тури учун берилган тоифалар тури ва сонига қараб 26 фоиздан 170 фоизгача;

ҳаво кемаларига техник хизмат кўрсатиш рухсатномаси учун — 60 фоизгача;

ҳаво кемаларига техник хизмат кўрсатиш бўйича амалдаги муҳандис гувоҳномаси учун — 16 фоизгача.

7. Агентлик директори ва унинг ўринбосарига алоҳида муҳим парвозларни ташкил этишда иштироки учун ҳар ойлик лавозим маошига 30 фоиздан 40 фоизгача миқдорда устамалар белгиланади.

8. Ўзбекистон Республикаси фуқаро авиацияси соҳасидаги кўп йиллик хизматлари учун ҳар ойлик лавозим маошига устамалар қуйидаги миқдорларда тўланади: 3 йилдан 5 йилгача — 15 фоиз, 5 йилдан 10 йилгача — 20 фоиз, 10 йилдан 15 йилгача — 30 фоиз, 15 йилдан 20 йилгача — 40 фоиз, 20 йил ва ундан ортиғига — 50 фоиз.

9. Байрам кунлари муносабати билан бериладиган мукофотлар — бир лавозим маошигача бўлган миқдорда (меҳнатни рағбатлантириш коэффициентини ҳисобга олган ҳолда) ҳақиқатда ишланган вақтдан қатъи назар тўланади.

Ташаббускорлик ва хизмат мажбуриятларини виждонан бажарганликлари учун Агентлик ходимлари бир йилда бир маротаба икки ойлик иш ҳақи миқдорида уларнинг фаолиятини алоҳида баҳолаш асосида мукофотланиши мумкин.

Ўриндошлик асосида ишларни бажарганлик учун рағбатлантириш Агентлик ходимларига белгиланган тартибда амалга оширилади.

10. Агентлик ходимларига меҳнатга ҳақ тўлаш фондидан икки юз фоизгача миқдорда ҳар ойлик устамалар белгиланади. Устаманинг аниқ миқдори Агентлик директори томонидан ходимлар фаолиятининг самарадорлиги ва натижадорлигини баҳолаш асосида белгиланади.

11. Зарур ҳолларда (даволаниш, тўй маросими, яқин қариндошларининг дафн маросими, бахтсиз ҳодиса билан боғлиқ ҳолларда), Агентлик ходимларига касаба уюшмаси билан келишилган ҳолда меҳнатга ҳақ тўлашнинг энг кам миқдорининг тўрт бараваригача миқдорда моддий ёрдам тўланади.

12. Агентлик ходимларига, меҳнат таътилига чиқиш санаси кунига бир календар йилда бир марта лавозим маоши миқдорида моддий ёрдам тўлови амалга оширилади.

13. Агентлик ходимларига бир йилда бир маротаба Ўзбекистон Республикаси фуқаро авиацияси ҳаво кемаларида имтиёзли (махсус) тарзда юришга рухсат берилади.

14. Агентлик ходимларига, фойдаланилмаган меҳнат таътили вақти учун қонун ҳужжатларида белгиланган тартибда компенсация тақдим этилиши мумкин.

15. Ушбу Низомда назарда тутилган тўловларнинг барча турлари Фондда маблағлар мавжуд бўлганда, Агентлик директорининг буйруғига асосан амалга оширилади.

16. Ушбу Низом талаблари бузилишида айбдор бўлган шахслар қонун ҳужжатларида белгиланган тартибда жавоб берадилар.