toggle_night_mode
Ҳужжат кучини йўқотган 01.01.2025
Ўзбекистон Республикаси Президентининг
Фармони
Маҳаллий ишлаб чиқарувчиларнинг экспорт салоҳиятини янада рағбатлантириш чора-тадбирлари тўғрисида
 LexUZ шарҳи
Мазкур Фармон Ўзбекистон Республикаси Президентининг 2024 йил 18 сентябрдаги ПФ-140-сонли «Ўзбекистон Республикаси Президентининг солиқ ва божхона имтиёзларини беришни назарда тутувчи айрим ҳужжатларига ўзгартиришлар ва қўшимча киритиш, шунингдек, баъзиларини ўз кучини йўқотган деб ҳисоблаш тўғрисида»ги Фармонига асосан 2025 йил 1 январдан ўз кучини йўқотади.
Мамлакатимиз экспорт салоҳиятини кенгайтириш, экспорт қилувчи ташкилотларни давлат томонидан қўллаб-қувватлаш, шунингдек, рақобатбардош экспорт маҳсулотлари ишлаб чиқаришнинг кўпайтирилишини рағбатлантириш мақсадида:
Олдинги таҳрирга қаранг.
1. Белгилаб қўйилсинки, товарлар (ишлар, хизматлар) экспорти, шунингдек божхона режимида қайта ишлаш маҳсулотлари реэкспортини, шу жумладан комиссионер (ишончли вакил) орқали амалга оширган юридик шахслар солиқ солинадиган базани:
(1-банднинг биринчи хатбошиси Ўзбекистон Республикаси Президентининг 2022 йил 30 сентябрдаги ПФ-228-сонли Фармони таҳририда — Қонунчилик маълумотлари миллий базаси, 30.09.2022 й., 06/22/228/0878-сон)
товарлар (ишлар, хизматлар)ни экспортга реализация қилиш ҳажмига тўғри келадиган фойда қисми юзасидан юридик шахслардан олинадиган фойда солиғи бўйича;
товарлар (ишлар, хизматлар)ни экспортга реализация қилиш ҳажмига тўғри келадиган қисми юзасидан ягона солиқ тўлови бўйича камайтирадилар.
Ушбу бандда назарда тутилган имтиёзлар иловага мувофиқ рўйхат бўйича хом ашё товарларини экспорт қилишга, шунингдек, халқаро ташишлар (автотранспортдан ташқари) ҳамда узатиш қувурлари ва газ қувурлари орқали етказиб бериш хизматларига нисбатан татбиқ этилмайди.
2. Белгилансинки, ушбу Фармоннинг 1-бандида назарда тутилган имтиёзлар қўлланилиши натижасида тўланмаган маблағлар қуйидаги ҳолларда қонун ҳужжатларига мувофиқ пеня ҳисобланган ҳолда Ўзбекистон Республикаси Давлат бюджетига ундирилади:
товарлар (ишлар, хизматлар) экспорти фактини қонун ҳужжатларига мувофиқ тасдиқловчи ҳужжатлар мавжуд бўлмаганда;
товарлар экспорт режимига чиқарилган кундан бошлаб 180 кун мобайнида валюта тушуми таъминланмаганда.
3. Ўзбекистон Республикаси Молия вазирлиги янги таҳрирдаги Солиқ кодекси лойиҳасини ишлаб чиқишда ушбу Фармонга мувофиқ берилаётган имтиёзларни назарда тутсин.
4. Ўзбекистон Республикаси Давлат солиқ қўмитаси ушбу Фармонга мувофиқ имтиёзларни қўллаш устидан тизимли назорат ўрнатсин.
5. Мазкур Фармоннинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти Администрацияси раҳбари З.Ш. Низомиддинов, Ўзбекистон Республикаси Президенти маслаҳатчисининг биринчи ўринбосари Б.М. Мавлонов ва Ўзбекистон Республикаси Бош вазирининг ўринбосари — молия вазири Ж.А. Қўчқоров зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2018 йил 29 ноябрь,
ПФ-5587-сон
Ўзбекистон Республикаси Президентининг 2018 йил 29 ноябрдаги ПФ-5587-сон Фармонига
ИЛОВА
2019 йил 1 январдан қўлланиладиган солиқ имтиёзлари татбиқ этилмайдиган экспорт қилинадиган хом ашё товарлари
Рўйхати
Олдинги таҳрирга қаранг.

Т/р

Товарлар номи

ТИФ ТН коди

1.

Пахта линти

1404 20 000 0

2.

Нефть хом ашёси, газ конденсати, нефть маҳсулотлари

2709 00, 2710 (2710 12 — 2710 19 дан ташқари)

3.

Табиий газ

2711 21 000 0

4.

Суюлтирилган газ

2711 11 000 0 — 2711 19 000 0

5.

Электр энергияси

2716 00 000 0

6.

Радиоактив кимёвий элементлар ва радиоактив изотоплар ва уларнинг бирикмалари

2844

7.

Ўғитлар

3101 00 000 0 — 3105

8.

Бирламчи шаклдаги этилен полимерлари

3901 10 — 3901 20

9.

Пропилен полимерлари ёки бирламчи шаклдаги бошқа олефинлар (полипропилен)

3902

10.

Бирламчи шаклдаги стирол полимерлари

3903

11.

Винилхлорид полимерлари ёки бирламчи шаклдаги галогенлашган олефинлар

3904

12.

Полимерли, силиконли позициялар, каучук

3905 — 3914

13.

Ошланган чарм ёки қўй терисидан ёки йирик қорамол бузоқларининг терисидан, бошқа ҳайвонларнинг териларидан чарм крастлари

4101 — 4107

14.

Пилла, ипак чиқиндилари

5001, 5003 (ипак момиғидан ташқари)

15.

Пахта толаси ва чиқиндилари

5201 — 5203

16.

Ип калава

5205 — 5207

17.

Қимматбаҳо металлар

71 (7113 — 7118 дан ташқари)

18.

Қора металлар, қора металлар прокати, қора металл парчалари ва чиқиндилари

72

19.

Рангли металлар, рангли металлар прокати, рангли металлар парчалари ва чиқиндилари

7401 — 7409,

7501 — 7506, 7601 — 7603, 7801 — 7802,

7901 — 7903, 8001 — 8002,
8101 (8101 96 000 0, 8101 99 100 0 дан ташқари),

8102 (8102 95 000 0, 8102 96 000 0 дан ташқари),

8103 (8103 90 100 0 дан ташқари), 8104 — 8107,

8108 (8108 90 дан ташқари), 8109 — 8112

(илова Ўзбекистон Республикаси Президентининг 2019 йил 31 июлдаги ПФ-5777-сонли Фармони таҳририда — Қонун ҳужжатлари маълумотлари миллий базаси, 01.08.2019 й., 06/19/5777/3501-сон)
(Қонун ҳужжатлари маълумотлари миллий базаси, 30.11.2018 й., 06/18/5587/2245-сон; 01.08.2019 й., 06/19/5777/3501-сон, Қонунчилик маълумотлари миллий базаси, 26.04.2022 й., 06/22/115/0344-сон, 30.09.2022 й., 06/22/228/0878-сон)