Ички валюта бозорида валюта алмаштириш операциялари ҳажмларини кенгайтириш ва чет элга кетаётган Ўзбекистон Республикаси резидентларининг хорижий валютага бўлган эҳтиёжларини янада тўлиқ қондириш мақсадида Вазирлар Маҳкамаси қарор қилади:

1. Ўзбекистон Республикаси Марказий банкининг ваколатли банкларнинг алмаштириш шохобчалари орқали Ўзбекистон Республикаси резидентларига нақд хорижий валюта сотишнинг чекланган миқдорини 2000 йил 15 июлдан бошлаб 500 АҚШ долларигача кўпайтириш тўғрисидаги таклифига розилик берилсин.

2. Вазирлар Маҳкамасининг «Валюта бозорини янада эркинлаштириш ва валюта алмаштириш операцияларини кенгайтиришга доир чора-тадбирлар тўғрисида» 2000 йил 30 июндаги 250-сон қароридаги 4-банднинг иккинчи хат боши ва қарорга 2-иловадаги 15-банднинг биринчи хат боши қуйидаги таҳрирда баён қилинсин:

«ваколатли банкларнинг алмаштириш шохобчаларида нақд хорижий валюта Ўзбекистон Республикаси резидентларига паспорт кўрсатилган ва хорижий давлатнинг кириш визаси, авиация ёки темир йўл чипталари мавжуд бўлган тақдирда 500 АҚШ долларигача сотилади».

3. Ўзбекистон Республикаси Марказий банкига ваколатли банкларнинг алмаштириш шохобчалари орқали Ўзбекистон Республикаси резидентларига хорижий валюта сотишнинг чекланган миқдорини, ички валюта бозорида нақд хорижий валютага бўлган талаб ва таклифлардан келиб чиққан ҳолда, мустақил равишда белгилаш ҳуқуқи берилсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Б.С. Ҳамидов ва Ўзбекистон Республикаси Марказий банки раиси Ф.М. Муллажонов зиммасига юклансин.