Ўзбекистон Республикаси Вазирлар Маҳкамасининг

қарори

Битимларни нотариал тасдиқлаш тартибини идоралараро электрон ҳамкорликни қўллаган ҳолда такомиллаштириш чора-тадбирлари тўғрисида

Олдинги таҳрирга қаранг.

Нотариал идоралар фаолиятида замонавий ахборот-коммуникация технологияларини кенг жорий этиш ва аҳолига кўрсатилаётган хизматлар сифатини ошириш мақсадида Вазирлар Маҳкамаси қарор қилади:

(муқаддима Ўзбекистон Республикаси Вазирлар Маҳкамасининг 2020 йил 1 апрелдаги 195-сонли қарори таҳририда — Қонун ҳужжатлари маълумотлари миллий базаси, 01.04.2020 й., 09/20/195/0391-сон)

1. Ўзбекистон Республикаси Адлия вазирлиги ҳамда Ахборот технологиялари ва коммуникацияларини ривожлантириш вазирлигининг:

нотариал ҳаракатларни амалга ошириш билан боғлиқ тартиб-таомилларни автоматлаштиришни;

кўчмас мулк ва автомототранспорт воситаларини бошқага ўтказиш тақиқланганлиги ёки хатланганлиги бўйича ягона маълумотлар базасини шакллантиришни;

нотариал ҳаракатларни амалга оширишда идоралараро электрон ҳамкорлик йўли билан давлат хизматлари кўрсатишни назарда тутувчи «Нотариус» автоматлаштирилган ахборот тизимини амалга киритиш ҳақидаги таклифига розилик берилсин.

2. Қуйидагилар:

Олдинги таҳрирга қаранг.

Кўчмас мулкнинг олди-сотди, айирбошлаш, ҳадя қилиш ва ипотека битимларини идоралараро электрон ҳамкорликни қўллаган ҳолда нотариал тасдиқлаш тартиби тўғрисидаги низом 1-иловага мувофиқ;

(2-банднинг иккинчи хатбошиси Ўзбекистон Республикаси Вазирлар Маҳкамасининг 2025 йил 3 сентябрдаги 559-сонли қарори таҳририда — Қонунчилик маълумотлари миллий базаси, 04.09.2025 й., 09/25/559/0802-сон)

Идоралараро электрон ҳамкорлик йўли билан алмашинадиган маълумотлар рўйхати 2-иловага мувофиқ тасдиқлансин.

3. Белгилансинки, идоралараро электрон ҳамкорликни қўллаган ҳолда кўчмас мулкнинг олди-сотди, айирбошлаш ва ҳадя қилиш битимларини нотариал тасдиқлаш:

Тошкент шаҳрида — 2017 йил 1 июлдан бошлаб;

Ўзбекистон Республикасининг барча ҳудудида (Тошкент шаҳри бундан мустасно) — 2018 йил 1 июлдан бошлаб амалга оширилади.

Олдинги таҳрирга қаранг.

Бунда, Ўзбекистон Республикасининг барча ҳудудида (Тошкент шаҳри бундан мустасно) идоралараро электрон тарзда ҳамкорлик қилиш тизими орқали қарздорликни аниқлаш электр ва газ таъминоти бўйича 2019 йил 1 январдан, иссиқлик таъминоти, сув таъминоти ва оқова сувларни чиқариш хизматлари бўйича 2021 йил 1 январдан бошлаб амалга оширилади.

(3-банд Ўзбекистон Республикаси Вазирлар Маҳкамасининг 2018 йил 6 апрелдаги 269-сонли қарорига асосан хатбоши билан тўлдирилган — Қонун ҳужжатлари маълумотлари миллий базаси, 06.04.2018 й., 09/18/269/1041-сон)

Олдинги таҳрирга қаранг.

4. Ўзбекистон Республикаси Уй-жой-коммунал хизмат кўрсатиш вазирлиги, «Ергеодезкадастр» давлат қўмитаси, «Ўзбекэнерго» АЖ ва «Ўзтрансгаз» АК, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари, Ўзбекистон Республикаси Ахборот технологиялари ва коммуникацияларини ривожлантириш вазирлиги ўзаро ҳисоб-китоблар, электр энергияси, табиий газ, совуқ ва иссиқ сув истеъмолчилари шахсий ҳисоб рақамларининг ҳисобга олиш маълумотлари, шу жумладан якка тартибда ҳисобга олиш асбоблари ҳолати тўғрисида 3-иловага мувофиқ батафсил маълумотларни шакллантириш тизими жорий этилишини ва идоралараро электрон тарзда ҳамкорлик қилиш тизимига аниқ вақт режимида юборилишини:

(4-банднинг биринчи хатбошиси Ўзбекистон Республикаси Вазирлар Маҳкамасининг 2017 йил 25 декабрдаги 1019-сонли қарори таҳририда — Қонун ҳужжатлари маълумотлари миллий базаси, 27.12.2017 й., 09/17/1019/0463-сон)

Тошкент шаҳри бўйича — 2017 йил 1 июлдан бошлаб;

Қорақалпоғистон Республикаси ва республика вилоятлари бўйича — 2018 йил 1 июлдан бошлаб таъминласинлар.

Олдинги таҳрирга қаранг.

Бунда, Қорақалпоғистон Республикаси ва республика вилоятларида — идоралараро электрон тарзда ҳамкорлик қилиш тизими орқали қарздорлик ҳақидаги маълумотлар электр ва газ таъминоти бўйича 2019 йил 1 январдан, иссиқлик таъминоти, сув таъминоти ва оқова сувларни чиқариш хизматлари бўйича 2021 йил 1 январдан бошлаб юборилиши таъминлансин.

(4-банд Ўзбекистон Республикаси Вазирлар Маҳкамасининг 2018 йил 6 апрелдаги 269-сонли қарорига асосан хатбоши билан тўлдирилган — Қонун ҳужжатлари маълумотлари миллий базаси, 06.04.2018 й., 09/18/269/1041-сон)

5. Ўзбекистон Республикаси Ички ишлар вазирлиги, Давлат солиқ қўмитаси, «Ергеодезкадастр» давлат қўмитаси, Адлия вазирлиги, «Ўзбекэнерго» АЖ, «Ўзтрансгаз» АК, иссиқлик таъминоти, сув таъминоти ва оқова сувларни чиқариш ташкилотлари 2017 йил 1 июлгача бўлган муддатда идоралараро электрон ҳамкорлик воситасида алмашинадиган маълумотларни долзарблаштириш, олиш ва бериш юзасидан ахборот тизимларини ўзаро мувофиқлаштирсинлар.

6. Ўзбекистон Республикаси Адлия вазирлиги Ахборот технологиялари ва коммуникацияларини ривожлантириш вазирлиги билан биргаликда:

2017 йил 1 апрелгача бўлган муддатда — нотариал ҳаракатларни амалга ошириш учун зарур бўлган давлат божи ва бошқа тўловларни электрон тарзда амалга ошириш бўйича таклифлар киритсин;

2017 йил 1 июлгача бўлган муддатда — ариза берувчилар томонидан Ўзбекистон Республикаси Ягона интерактив давлат хизматлари порталида шахсий кабинет орқали битимлар лойиҳаларини тайёрлаш, нотариал ҳаракатлар ҳақида тушунтиришлар олиш ва нотариус қабулига олдиндан ёзилиш учун мурожаат қилиш механизмини жорий қилсин;

2017 йил мобайнида ушбу қарорнинг қўлланилиши юзасидан мониторинг олиб борсин ва таҳлил қилсин ҳамда, зарурият бўлганда, кўчмас мулкнинг олди-сотди, айирбошлаш ва ҳадя қилиш битимларини нотариал тасдиқлаш тартибини янада такомиллаштириш юзасидан таклифлар киритсин.

7. Ўзбекистон Республикаси Ҳукуматининг 4-иловага мувофиқ айрим қарорларига ўзгартириш ва қўшимчалар киритилсин.

Ушбу ўзгартириш ва қўшимчалар Тошкент шаҳри бўйича — 2017 йил 1 июлдан бошлаб, Қорақалпоғистон Республикаси ва республика вилоятлари бўйича — 2018 йил 1 июлдан бошлаб кучга киради.

8. Вазирликлар ва идоралар ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсинлар.

9. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари А.Ж. Раматов, Ўзбекистон Республикаси Бош вазирининг ўринбосарлари Р.С. Азимов, Ғ.И. Ибрагимов, З.Т. Мирзаев ва Ўзбекистон Республикаси адлия вазири М.М. Икрамов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2017 йил 27 февраль,

106-сон

Вазирлар Маҳкамасининг 2017 йил 27 февралдаги 106-сон қарорига
1-ИЛОВА

Олдинги таҳрирга қаранг.

Кўчмас мулкнинг олди-сотди, айирбошлаш, ҳадя қилиш ва ипотека битимларини идоралараро электрон ҳамкорликни қўллаган ҳолда нотариал тасдиқлаш тартиби тўғрисида

НИЗОМ

(1-илованинг номи Ўзбекистон Республикаси Вазирлар Маҳкамасининг 2025 йил 3 сентябрдаги 559-сонли қарори таҳририда — Қонунчилик маълумотлари миллий базаси, 04.09.2025 й., 09/25/559/0802-сон)

1-боб. Умумий қоидалар

Олдинги таҳрирга қаранг.

1. Ушбу Низом Ўзбекистон Республикасининг «Нотариат тўғрисида»ги ва «Электрон ҳукумат тўғрисида»ги қонунларига мувофиқ кўчмас мулкнинг олди-сотди, айирбошлаш, ҳадя қилиш ва ипотека битимларини (кейинги ўринларда — битим) идоралараро электрон ҳамкорликни қўллаган ҳолда нотариал тасдиқлаш тартибини белгилайди.

(1-банд Ўзбекистон Республикаси Вазирлар Маҳкамасининг 2025 йил 3 сентябрдаги 559-сонли қарори таҳририда — Қонунчилик маълумотлари миллий базаси, 04.09.2025 й., 09/25/559/0802-сон)

2. Ушбу Низом мақсадларида қуйидаги асосий тушунчалардан фойдаланилади:

Олдинги таҳрирга қаранг.

ариза берувчи — битимни нотариал тасдиқлаш мақсадида нотариал идорага мурожаат этувчи кўчмас мулк мулкдори ёки қонунчиликда белгиланган тартибда унинг номидан ҳаракат қилишга ваколатли бўлган вакили;

(2-банднинг иккинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)

LexUZ шарҳи

Қаранг: Ўзбекистон Республикаси Фуқаролик кодексининг Х боби.

электрон ариза — ариза берувчининг битимни нотариал тасдиқлаш ҳақида электрон ҳужжат шаклидаги мурожаати;

коммунал хизматлар — газ таъминоти, совуқ сув таъминоти ва оқова сувларни чиқариш, иссиқлик таъминоти (марказий иситиш ва иссиқ сув таъминоти) бўйича хизматлар;

«Нотариус» автоматлаштирилган ахборот тизими (бундан буён матнда «Нотариус» ААТ деб аталади) — нотариал ҳаракатларни амалга ошириш билан боғлиқ тартиб-таомилларни автоматлаштириш учун мўлжалланган ахборот тизими;

электрон аризанинг ноёб рақами — электрон ариза тўлдирилгандан кейин «Нотариус» ААТ томонидан шакллантириладиган рамзларнинг ноёб тўплами.

3. Битимларни идоралараро электрон ҳамкорликни қўллаган ҳолда нотариал тасдиқлаш ушбу низомга 1-иловага мувофиқ схемага биноан амалга оширилади.

2-боб. Электрон аризани тўлдириш

4. Ариза берувчи битимни нотариал тасдиқлаш учун нотариал идорага:

Ўзбекистон Республикаси Ягона интерактив давлат хизматлари порталида шахсий кабинет орқали ушбу Низомга 2-иловага мувофиқ шаклдаги электрон аризани бевосита тўлдириш йўли билан;

Олдинги таҳрирга қаранг.

электрон аризани тўлдириш учун паспорт ёки шахсни тасдиқловчи бошқа ҳужжат билан нотариал идорага ўзи келиб мурожаат қилиши мумкин.

(4-банднинг учинчи хатбошиси Ўзбекистон Республикаси Вазирлар Маҳкамасининг 2023 йил 14 сентябрдаги 470-сонли қарори таҳририда — Қонунчилик маълумотлари миллий базаси, 16.09.2023 й., 09/23/470/0707-сон)

Олдинги таҳрирга қаранг.

Ўзи келиб мурожаат қилинганда электрон ариза қонунчиликда белгиланган тартибда тўлов ундирилгандан сўнг ариза берувчининг номидан нотариал идоранинг ходими томонидан тўлдирилади.

(4-банднинг тўртинчи хатбошиси Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)

5. Электрон ариза тўлдирилгандан кейин солиқлар, коммунал хизматлар ва электр энергияси бўйича қарздорлик, кўчмас мулкка нисбатан тақиқ ва хатлаш мавжудлиги Ўзбекистон Республикаси Ягона интерактив давлат хизматлари порталида ёки «Нотариус» ААТда идоралараро электрон ҳамкорлик орқали автоматик тарзда текширилади.

Олдинги таҳрирга қаранг.

Бунда коммунал хизматлар бўйича қарздорликлар ҳақидаги маълумотлар коммунал ташкилотлар ахборот тизимлари орқали ва ижро ҳужжатлари бўйича қарздорлик мавжудлиги тўғрисида маълумотлар Мажбурий ижро бюроси ахборот тизими орқали онлайн режимда текширилади. Электрон тизимларда техник носозликлар бўлганда, ушбу ташкилотлар билан ахборот алмашуви курьерлик хизмати орқали амалга оширилади.

(5-банднинг иккинчи хатбошиси Ўзбекистон Республикаси Вазирлар Маҳкамасининг 2021 йил 27 июлдаги 464-сонли қарори таҳририда — Қонунчилик маълумотлари миллий базаси, 27.07.2021 й., 09/21/464/0710-сон)

6. Солиқлар, коммунал хизматлар ва электр энергияси бўйича қарздорлик ёки кўчмас мулкка нисбатан тақиқ ва хатлаш мавжудлиги аниқланса, ариза берувчига қарздорлик бартараф этилганидан ёки тақиқ ва хатлаш олиб ташланганидан кейин битимни нотариал тасдиқлаш учун мурожаат қилиш ҳуқуқи борлиги ҳақида хабар берилади. Ариза берувчининг талабига кўра билдиришнома ёзма шаклда юборилади (топширилади).

Бунда ариза берувчига солиқлар, коммунал хизматлар ёки электр энергияси бўйича аниқланган қарздорликни нотариал идорада, шу жумладан электрон тўлов тизимлари орқали тўлаш имконияти берилади. Ариза берувчи томонидан амалга оширилган тўловлар тўғрисидаги маълумотлар тезкорлик билан «Нотариус» ААТда акс эттирилади.

7. Солиқлар, коммунал хизматлар ва электр энергияси бўйича қарздорлик ёки кўчмас мулкка нисбатан тақиқ ва хатлаш мавжуд бўлмаса, электрон аризага ноёб рақам берилади.

Ариза берувчига битимни нотариал тасдиқлаш мумкинлиги, давлат божи миқдори, шунингдек битимни нотариал тасдиқлаш учун зарур бўлган ҳужжатлар ҳақида хабар берилади.

Ушбу Низомнинг 12-бандида назарда тутилган ҳужжатлар мавжуд бўлса, ариза берувчи электрон аризага ноёб рақам берилган вақтдан бошлаб 24 соат ичида битимни нотариал тасдиқлашни амалга оширишни талаб қилиш ҳуқуқига эга.

8. Ариза берувчи битимни нотариал тасдиқлаш учун нотариал идорага келадиган кун ва қулай вақтни белгилаган ҳолда нотариус қабулига олдиндан ёзилиши мумкин.

Ариза берувчининг хоҳишига кўра электрон аризанинг ноёб рақамини, нотариал идорага келинадиган кун ва вақтни, нотариал идоранинг нотариуси фамилияси, исми ва отасининг исмини кўрсатган ҳолда нотариус қабулига олдиндан ёзилганлиги ҳақида унга ёзма шаклда билдиришнома берилади. Ариза берувчи билдиришномада кўрсатилган вақтда нотариал идорага келиши керак.

9. Электрон аризага ноёб рақам берилган кундан бошлаб 10 календарь кун ичида ариза берувчи нотариал идорага келиши мумкин.

Кўрсатилган муддат ўтгандан кейин нотариал идорага мурожаат этилса, электрон аризани тўлдириш ушбу Низомнинг 4 — 7-бандларида назарда тутилган тартибда қайта амалга оширилади.

Олдинги таҳрирга қаранг.

10. Ариза берувчининг хоҳишига кўра нотариал идоранинг ходимлари томонидан битимнинг дастлабки лойиҳаси тузилади. Бунда битим лойиҳаси нотариал тасдиқлаш учун нотариал идорага келинган куни тақдим этилади. Битим лойиҳаси тузилганлиги учун қонунчиликда белгиланган тартибда тўлов ундирилади.

(10-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)

3-боб. Битимни нотариал тасдиқлаш учун тақдим этиладиган ҳужжатлар

Олдинги таҳрирга қаранг.

11. Битимни нотариал тасдиқлаш қонунчиликда белгиланган нотариал ҳаракатларни амалга ошириш қоидаларига мувофиқ томонларнинг иштирокида амалга оширилади.

(11-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)

LexUZ шарҳи

Қаранг: Ўзбекистон Республикаси адлия вазирининг 2019 йил 4 январдаги 2-мҳ-сонли буйруғи билан тасдиқланган Нотариуслар томонидан нотариал ҳаракатларни амалга ошириш тартиби тўғрисидаги йўриқнома (рўйхат рақами 3113, 04.01.2019 й.).

Олдинги таҳрирга қаранг.

12. Битимни нотариал тасдиқлаш учун қуйидаги ҳужжатлар тақдим этилади:

электрон аризанинг ноёб рақами;

паспорт ёки битим томонларининг шахсини тасдиқловчи бошқа ҳужжат;

хусусийлаштирилган кўчмас мулкни бошқа шахсга ўтказишда — кўчмас мулкни хусусийлаштиришга розилик берган шахсларнинг нотариал тасдиқланган розилиги, шунингдек, Ўзбекистон Республикаси Давлат активларини бошқариш агентлигининг ҳудудий бошқармаларидан (Тошкент шаҳрида — «Тошкент шаҳрида уй-жойга давлат ордерлари ва маълумотлар бериш маркази» давлат унитар корхонасидан) олинган хусусийлаштиришга розилик берган шахслар тўғрисида маълумотнома;

агар кўчмас мулк биргаликдаги никоҳ давомида орттирилган бўлса — эрнинг (хотиннинг) нотариал тасдиқланган розилиги;

агар кўчмас мулк гаровга қўйилган бўлса — гаровга олувчининг розилиги;

агар васийликдаги (ҳомийликдаги) шахс номидан васий (ҳомий) шартнома тузса — васийлик ва ҳомийлик органининг розилиги;

юридик шахслар учун — юридик шахс ваколатли органининг қарори (умумий мажлис баённомаси, кузатувчи кенгашнинг қарори, буйруқ ва бошқалар);

давлат божи тўланганлигини тасдиқловчи ҳужжат.

Кўчмас мулкнинг кадастр маълумотлари, солиқ тўловчининг идентификация рақами, шунингдек, доимий яшаш жойи ёки вақтинча турган жойи бўйича рўйхатга олинган шахсларнинг паспортига оид маълумотларни нотариуслар идоралараро электрон ҳамкорлик орқали мустақил оладилар.

Юридик шахсларнинг кўчмас мулк билан боғлиқ битимларни нотариал тасдиқлаш тарафларнинг ўз хоҳишига кўра амалга оширилади ҳамда мажбурий тусга эга эмас.

(12-банд Ўзбекистон Республикаси Вазирлар Маҳкамасининг 2023 йил 14 сентябрдаги 470-сонли қарори таҳририда — Қонунчилик маълумотлари миллий базаси, 16.09.2023 й., 09/23/470/0707-сон)

4-боб. Якунловчи қоидалар

Олдинги таҳрирга қаранг.

13. Битим нотариал тасдиқлангандан кейин кўчмас мулкнинг кадастр рақами тўғрисидаги маълумот ва сотиб олувчи ҳақидаги қуйидаги маълумотлар «Нотариус» АТТ орқали Давлат кадастрлари палатасининг тегишли туман (шаҳар)даги филиалига юборилади:

(13-бандининг биринчи хатбошиси Ўзбекистон Республикаси Вазирлар Маҳкамасининг 2023 йил 14 сентябрдаги 470-сонли қарори таҳририда — Қонунчилик маълумотлари миллий базаси, 16.09.2023 й., 09/23/470/0707-сон)

жисмоний шахснинг шахсий индентификация рақами;

солиқ тўловчининг идентификация рақами;

Олдинги таҳрирга қаранг.

доимий яшаш жойи бўйича рўйхатга олинган манзили;

(13-банднинг тўртинчи хатбошиси Ўзбекистон Республикаси Вазирлар Маҳкамасининг 2020 йил 28 сентябрдаги 593-сонли қарори таҳририда — Қонун ҳужжатлари маълумотлари миллий базаси, 29.09.2020 й., 09/20/593/1340-сон)

телефон рақами (мавжуд бўлса);

электрон почта манзили (мавжуд бўлса);

нотариал ҳаракат амалга оширилган кун ва унинг қайд этилган рақами.

14. Ишончсиз ва бузиб кўрсатилган маълумотлар тақдим этилгани учун ушбу маълумотларни тақдим этган шахслар жавоб берадилар.

Олдинги таҳрирга қаранг.

15. Ушбу Низомни бузганликда айбдор бўлган шахслар қонунчиликда белгиланган тартибда жавоб берадилар.

(15-банд Ўзбекистон Республикаси Вазирлар Маҳкамасининг 2022 йил 4 апрелдаги 153-сонли қарори таҳририда — Қонунчилик маълумотлари миллий базаси, 05.04.2022 й., 09/22/153/0266-сон)

LexUZ шарҳи

Қаранг: Ўзбекистон Республикаси Маъмурий жавобгарлик тўғрисидаги кодексининг 193³-моддаси, Фуқаролик кодексининг 28-боби.

Олдинги таҳрирга қаранг.

Кўчмас мулкнинг олди-сотди, айирбошлаш, ҳадя қилиш ва ипотека битимларини идоралараро электрон ҳамкорликни қўллаган ҳолда нотариал тасдиқлаш тартиби тўғрисидаги низомга
1-ИЛОВА

(1-илованинг белгиси Ўзбекистон Республикаси Вазирлар Маҳкамасининг 2025 йил 3 сентябрдаги 559-сонли қарори таҳририда — Қонунчилик маълумотлари миллий базаси, 04.09.2025 й., 09/25/559/0802-сон)

Олдинги таҳрирга қаранг.

(1-илова Ўзбекистон Республикаси Вазирлар Маҳкамасининг 2017 йил 29 августдаги 679-сонли қарори таҳририда — ЎР ҚҲТ, 2017 й., 35-сон, 931-модда)

Олдинги таҳрирга қаранг.

(2-илованинг белгиси Ўзбекистон Республикаси Вазирлар Маҳкамасининг 2025 йил 3 сентябрдаги 559-сонли қарори таҳририда — Қонунчилик маълумотлари миллий базаси, 04.09.2025 й., 09/25/559/0802-сон)

Олдинги таҳрирга қаранг.

Кўчмас мулкнинг олди-сотди, айирбошлаш, ҳадя қилиш ва ипотека битимларини идоралараро электрон ҳамкорликни қўллаган ҳолда нотариал тасдиқлашни амалга оширишга

АРИЗА

(2-илованинг номи Ўзбекистон Республикаси Вазирлар Маҳкамасининг 2025 йил 3 сентябрдаги 559-сонли қарори таҳририда — Қонунчилик маълумотлари миллий базаси, 04.09.2025 й., 09/25/559/0802-сон)

Олдинги таҳрирга қаранг.

Т/р	Ариза берувчи ҳақидаги маълумотлар
1.	Фамилияси, исми, отасининг исми/юридик шахснинг номи
2.	Туғилган санаси (йил, кун, ой)
3.	Паспорт серияси ва рақами, қачон ва ким томонидан берилган/юридик шахс давлат рўйхатидан ўтказилганлиги тўғрисидаги гувоҳноманинг серияси ва рақами
4.	Доимий яшаш жойи бўйича рўйхатга олиш манзили/юридик шахснинг жойлашган жойи
5.	Солиқ тўловчининг идентификация рақами
Алоқа қилинадиган маълумотлар (мавжуд бўлса)
6.	Почта манзили
7.	Телефон рақами
8.	Электрон почта манзили
Кўчмас мулк ҳақидаги маълумотлар
9.	Кўчмас мулкнинг кадастр рақами (кадастр йиғмажилдига мувофиқ)
10.	Кўчмас мулкнинг манзили
Сана: 20___ й. «___» __________		Имзо: ____________________‎‎

Изоҳ:

Идоралараро ахборот тизимларида маълумотлар мавжуд бўлса, электрон аризанинг тегишли бандлари автоматик тарзда тўлдирилади.

Электрон ариза нотариал идоранинг ходимлари томонидан тўлдирилса, электрон ариза қоғозга чиқарилади ва ариза берувчи томонидан кўрсатилган маълумотлар тасдиқланган ҳолда имзоланади. Қоғозга чиқарилган ариза битим бўйича ҳужжатлар билан бирга қўшиб тикилади.

Солиқлар, коммунал хизматлар ва электр энергияси бўйича қарздорлик ёки кўчмас мулкка нисбатан тақиқ ва хатлаш мавжуд эмаслиги электрон аризага ноёб рақам бериш учун асос бўлади. Бунда ариза берувчи электрон аризага ноёб рақам берилган кундан бошлаб 10 календарь кун ичида нотариал идорага келиши мумкин.

(2-илова Ўзбекистон Республикаси Вазирлар Маҳкамасининг 2020 йил 28 сентябрдаги 593-сонли қарори таҳририда — Қонун ҳужжатлари маълумотлари миллий базаси, 29.09.2020 й., 09/20/593/1340-сон)

Вазирлар Маҳкамасининг 2017 йил 27 февралдаги 106-сон қарорига
2-ИЛОВА

Идоралараро электрон ҳамкорлик йўли билан алмашиладиган маълумотлар

РЎЙХАТИ

Олдинги таҳрирга қаранг.

Т/р	Маълумотнинг номи	Маълумотларни қабул қилувчи идора	Маълумотларни тақдим этувчи идора	Маълумотларни тақдим қилиш шарти
1.	Турар жойда доимий яшаш жойи ёки вақтинча турган жойи бўйича рўйхатга олинган шахсларнинг сони, доимий яшаш жойи ёки вақтинча турган жойи бўйича рўйхатга олинган/рўйхатдан чиқарилган кун	Газ таъминоти ташкилотлари, иссиқлик таъминоти, сув таъминоти ва оқова сувни чиқариш ташкилотлари	Ўзбекистон Республикаси Ички ишлар вазирлиги	Кўчмас мулкнинг кадастр рақами бўйича бир марталик сўровлар бўйича
2.	Турар жойда доимий яшаш жойи ёки вақтинча турган жойи бўйича рўйхатга олинган шахслар (жисмоний шахснинг шахсий идентификация рақами, Ф.И.О, паспорт серияси ва рақами, берган орган, берилган сана) ҳақидаги маълумотлар	Нотариал идоралар	Ўзбекистон Республикаси Ички ишлар вазирлиги	Кўчмас мулкнинг кадастр рақами бўйича бир марталик сўровлар бўйича
3.	Жисмоний шахснинг шахсий идентификация рақами, СТИР, сотиб олувчининг доимий яшаш жойи бўйича рўйхатга олинган манзили, мобил телефон рақами, электрон почта манзили (мавжуд бўлса), нотариал ҳаракат амалга оширилган кун ва қайд этилган рақам, кўчмас мулкнинг кадастр рақами	Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги	Нотариал идоралар	Нотариал тасдиқлангандан кейин
4.	Кўчмас мулк олди-сотди шартномалари, мол-мулк ижараси шартномалари тасдиқланганлиги ва ижара ҳақи миқдори, шунингдек мерос қилиб олиш ёки ҳадя тарзида фуқароларнинг мулкига ўтаётган мол-мулк қиймати тўғрисидаги маълумотлар	Ўзбекистон Республикаси Давлат солиқ қўмитаси	Нотариал идоралар	Нотариал ҳаракатлар амалга оширилган кундан эътиборан ўн кундан кечикмай
5.	СТИР, солиқлар бўйича қарздорлик мавжудлиги ёки йўқлиги ҳақидаги маълумот	Нотариал идоралар	Ўзбекистон Республикаси Давлат солиқ қўмитаси	Кўчмас мулкнинг кадастр рақами бўйича бир марталик сўровлар бўйича
6.	Кўчмас мулкнинг кадастр маълумотлари, кўчмас мулкни бошқага ўтказиш тақиқланганлиги ва хатланганлиги ҳақидаги маълумотлар	Нотариал идоралар	Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги	Кўчмас мулкнинг кадастр рақами бўйича бир марталик сўровлар бўйича
7.	Мулкдорнинг фамилияси, исми ва отасининг исми, доимий яшаш жойи бўйича рўйхатга олинган манзили, нотариал ҳаракат амалга оширилган сана ва қайд этилган рақам, кўчмас мулкнинг кадастр рақами ва умумий (турар жой) майдони, мулкдорнинг мобил телефон рақами (мавжуд бўлса), мулкдорнинг электрон почта манзили (мавжуд бўлса)	Давлат солиқ қўмитаси, ҳудудий электр тармоқлари корхоналари, газ таъминоти ташкилотлари, иссиқлик таъминоти, сув таъминоти ва оқова сувни чиқариш ташкилотлари	Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги	Мулк ҳуқуқи давлат рўйхатидан ўтказилганидан кейин, бир вақтда — амалдаги мулкдорнинг мулк ҳуқуқи пайдо бўлгандан кейин мулкдорга мулк ҳуқуқини берувчи ҳужжатларни тўлиқ бир-бирига мослаштириш

(2-илова Ўзбекистон Республикаси Вазирлар Маҳкамасининг 2023 йил 14 сентябрдаги 470-сонли қарори таҳририда — Қонунчилик маълумотлари миллий базаси, 16.09.2023 й., 09/23/470/0707-сон)

Вазирлар Маҳкамасининг 2017 йил 27 февралдаги 106-сон қарорига
3-ИЛОВА

Аниқ вақт режимида идоралараро электрон ўзаро ҳамкорлик тизимида бериладиган ўзаро ҳисоб-китоблар, электр энергияси, табиий газ, иссиқ ва совуқ сув истеъмолчилари шахсий ҳисоб рақамларининг ҳисобга олиш маълумотлари, шунингдек якка тартибда ҳисобга олиш асбоблари ҳолати тўғрисида

БАТАФСИЛ МАЪЛУМОТ

Кўчмас мулкнинг кадастр рақами	Истеъмолчи томонидан кўрсатилган якка тартибда ҳисобга олиш асбобининг кўрсаткичи	Якка тартибда ҳисобга олиш асбобининг аввалги кўрсаткичи билан фарқи	Ҳисоб-китобнинг бошқа мезони	Ўлчов бирлиги	Амалга оширилган тўлов (сўм)	Тўлов амалга оширилган сана	Якка тартибда ҳисобга олиш асбоби ҳолати текширилган сана	Якка тартибда ҳисобга олиш асбобини навбатдаги текшириш санаси	Инспектор томонидан кўрсатилган якка тартибда ҳисобга олиш асбобининг кўрсаткичи	Истеъмолчининг баланси (сўм)

Изоҳ.

Ушбу жадвалда охирги уч йил мобайнидаги маълумотлар кўрсатилади.

Ҳудудий электр тармоқлари корхоналари, газ таъминоти ташкилотлари, иссиқ сув таъминоти, сув таъминоти ва оқова сувни чиқариш ташкилотлари ўз хусусиятларидан келиб чиқиб ушбу жадвалда кўрсатилмаган қўшимча маълумотларни тақдим этиши мумкин.

Вазирлар Маҳкамасининг 2017 йил 27 февралдаги 106-сон қарорига
4-ИЛОВА

Ўзбекистон Республикаси Ҳукуматининг айрим қарорларига киритилаётган

ўзгартириш ва қўшимчалар

1. Вазирлар Маҳкамасининг 1994 йил 4 апрелдаги 180-сон қарори (Ўзбекистон Республикаси ҚТ, 1994 й., 4-сон, 20-модда) билан тасдиқланган Хусусийлаштирилган квартиралар (квартираларнинг бир қисми), уйлар (уйларнинг бир қисми)ни бошқаларга бериш ва мерос қилиб қолдиришда мулкчилик ҳуқуқининг ўтиши ҳақидаги шартномаларни расмийлаштириш тартиби тўғрисидаги низомнинг 6-банди қуйидаги таҳрирда баён этилсин:

«6. Хусусийлаштирилган уй-жойни бошқа шахсга ўтказиш қонун ҳужжатларига мувофиқ амалга оширилади.

Алоҳида уй (уйнинг бир қисми) ёки квартирани хусусийлаштиришга розилик берган шахслар тўғрисидаги маълумотнома берилганлиги учун энг кам ойлик иш ҳақининг ярми миқдорида йиғим ундирилади».

2. Вазирлар Маҳкамасининг «Электр энергиясидан фойдаланганлик учун ҳисоб-китоб қилиш механизмини тубдан такомиллаштириш чора-тадбирлари тўғрисида» 2004 йил 1 ноябрдаги 511-сон қарорининг 2-банди тўртинчи хатбоши (Ўзбекистон Республикаси ҚТ, 2004 й., 11-сон, 103-модда) қуйидаги таҳрирда баён этилсин:

«жисмоний шахсларга тегишли бўлган кўчмас мулкнинг олди-сотди, айирбошлаш ва ҳадя қилиш шартномаларини нотариал тасдиқлаш ва давлат рўйхатидан ўтказиш фақат электр энергияси, табиий газ, иссиқлик таъминоти, сув таъминоти ва оқова сувни чиқариш хизматлари учун қарзлар тўлиқ тўланган тақдирда амалга оширилади».

Олдинги таҳрирга қаранг.

(3-банд Ўзбекистон Республикаси Вазирлар Маҳкамасининг 2020 йил 1 апрелдаги 195-сонли қарорига асосан ўз кучини йўқотган — Қонун ҳужжатлари маълумотлари миллий базаси, 01.04.2020 й., 09/20/195/0391-сон)

Олдинги таҳрирга қаранг.

(4-банд Ўзбекистон Республикаси Вазирлар Маҳкамасининг 2018 йил 29 декабрдаги 1060-сонли қарорига асосан ўз кучини йўқотган — Қонун ҳужжатлари маълумотлари миллий базаси, 29.12.2018 й., 09/18/1060/2405-сон)

5. Вазирлар Маҳкамасининг «Коммунал хизматлар кўрсатиш қоидаларини тасдиқлаш тўғрисида» 2014 йил 15 июлдаги 194-сон қарорида (Ўзбекистон Республикаси ҚТ, 2014 й., 7-сон, 72-модда):

а) 1-иловада:

58-бандга «маълумотлар тақдим этилиши» сўзларидан кейин «, шунингдек зарур ҳолларда ёки Истеъмолчининг талабига кўра уй ичидаги иссиқлик таъминоти тизими ёки уй ичидаги асбоб-ускуналарни текшириши» сўзлари қўшилсин;

75-бандга қуйидаги мазмундаги хатбоши қўшилсин:

«шахсий ҳисоб рақами ва якка тартибда ҳисобга олиш асбобларининг ҳолати ҳақида батафсил маълумотни шакллантиришга ва идоралараро электрон ҳамкорлик қилиш тизимига аниқ вақт режимида юборишга»;

107 ва 108-бандлар қуйидаги таҳрирда баён қилинсин:

«107. Шахсий ҳисоб рақами ва якка тартибда ҳисобга олиш асбобларининг ҳолати тўғрисидаги батафсил маълумотлар Етказиб берувчи томонидан шакллантирилади ва аниқ вақт режимида идоралараро электрон ҳамкорлик қилиш тизимига юборилади.

108. Янги мулкдор кўчмас мулкнинг олди-сотди, айирбошлаш ва ҳадя қилиш битимлари давлат рўйхатидан ўтказилган кундан бошлаб 30 кун муддатда шартнома тузиши шарт.

Кўчмас мулкнинг олди-сотди, айирбошлаш ва ҳадя қилиш битимлари давлат рўйхатидан ўтказилгандан кейин давлат рўйхатидан ўтказувчи орган томонидан Етказиб берувчига янги мулкдорнинг фамилияси, исми, отасининг исми, янги доимий прописка қилинган манзили, нотариал ҳаракат амалга оширилган сана ва қайд этилган рақам, кўчмас мулкнинг кадастр рақами ва умумий (турар жой) майдони, мобил телефон рақами ва электрон почта манзили (мавжуд бўлса) ҳақидаги маълумотни юборади. Бунда Етказиб берувчи маълумот тушгандан кейин бир ой муддатда мулкдор билан иссиқлик таъминоти шартномаси тузилишини таъминлаши шарт»;

б) 2-иловада:

115-бандда:

иккинчи ва учинчи хатбошисидаги «7 кун муддатда» сўзлари «30 кун муддатда» сўзлари билан алмаштирилсин;

қуйидаги мазмундаги хатбоши қўшилсин:

«Кўчмас мулкнинг олди-сотди, айирбошлаш ва ҳадя қилиш битимлари давлат рўйхатидан ўтказилгандан кейин давлат рўйхатидан ўтказувчи орган томонидан ИСКХ ташкилотига янги мулкдорнинг фамилияси, исми, отасининг исми, доимий прописка қилинган манзили, нотариал ҳаракат амалга оширилган сана ва қайд этилган рақам, кўчмас мулкнинг кадастр рақами ва умумий (турар жой) майдони, мобил телефон рақами ва электрон почта манзили (мавжуд бўлса) ҳақидаги маълумотни юборади. Бунда ИСКХ ташкилоти маълумот олингандан кейин бир ой муддатда мулкдор билан иссиқлик сув таъминоти ва (ёки) оқова сувни чиқариш хизматларидан фойдаланишга шартнома тузилишини таъминлаши шарт»;

119-бандга қуйидаги мазмундаги хатбоши қўшилсин:

«шахсий ҳисоб рақами ва якка тартибда ҳисобга олиш асбобларининг ҳолати ҳақида батафсил маълумотни шакллантириш ва идоралараро электрон ҳамкорлик қилиш тизимига аниқ вақт режимида юбориш».

(Ўзбекистон Республикаси қонун ҳужжатлари тўплами, 2017 й., 9-сон, 131-модда, 33-сон, 863-модда, 35-сон, 931-модда; Қонун ҳужжатлари маълумотлари миллий базаси, 27.12.2017 й., 09/17/1019/0463-сон, 06.04.2018 й., 09/18/269/1041-сон, 29.12.2018 й., 09/18/1060/2405-сон, 12.06.2019 й., 09/19/478/3273-сон; 01.04.2020 й., 09/20/195/0391-сон; 15.04.2020 й., 09/20/217/0426-сон; 07.07.2020 й., 09/20/425/1034-сон; 29.09.2020 й., 09/20/593/1340-сон; Қонунчилик маълумотлари миллий базаси, 27.07.2021 й., 09/21/464/0710-сон; 05.04.2022 й., 09/22/153/0266-сон; 16.09.2023 й., 09/23/470/0707-сон; 04.09.2025 й., 09/25/559/0802-сон)