|
Ҳужжат кучини йўқотган 07.06.2018
|
Ўзбекистон Республикаси Вазирлар Маҳкамасининг
қарори
Ўзбекистон Республикаси Президентининг «Тадбиркорлик субъектларига «ягона дарча» тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида» 2015 йил 28 сентябрдаги ПҚ-2412-сон қарорини амалга ошириш чора-тадбирлари ҳақида
LexUZ шарҳиМазкур қарор Ўзбекистон Республикаси Вазирлар Маҳкамасининг 2018 йил 6 июндаги 428-сонли «Ўзбекистон Республикаси Ҳукуматининг айрим қарорларига ўзгартиришлар ва қўшимча киритиш, шунингдек баъзи қарорларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Аҳолига давлат хизматлари кўрсатишнинг миллий тизимини тубдан ислоҳ қилиш чора-тадбирлари тўғрисида» 2017 йил 12 декабрдаги ПФ-5278-сон Фармони ва Ўзбекистон Республикаси Президентининг «Ўзбекистон Республикаси Адлия вазирлиги ҳузуридаги Давлат хизматлари агентлиги фаолиятини ташкил этиш тўғрисида» 2017 йил 12 декабрдаги ПҚ-3430-сон қарори)»ги қарорига асосан ўз кучини йўқотган.
Ўзбекистон Республикаси Президентининг «Тадбиркорлик субъектларига «ягона дарча» тамойили бўйича давлат хизматлари кўрсатиш тартибини янада такомиллаштириш чора-тадбирлари тўғрисида» 2015 йил 28 сентябрдаги ПҚ-2412-сон қарорига мувофиқ Вазирлар Маҳкамаси қарор қилади:
1. Қуйидагилар:
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари фаолиятини ташкил этиш тартиби тўғрисидаги низом 1-иловага мувофиқ;
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисидаги низом 2-иловага мувофиқ;
Тадбиркорлик субъектларига «ягона дарча» тамойили бўйича давлат хизматлари фақат давлат хизматлари кўрсатиш ягона марказлари орқали кўрсатиладиган давлат хизматининг намунавий паспорти 3-иловага мувофиқ тасдиқлансин.
2. Белгилансинки, тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари (кейинги ўринларда «ягона дарча» марказлари деб аталади) тадбиркорлик субъектларига давлат хизматлари кўрсатишда қонун ҳужжатларида назарда тутилмаган тўловни белгилашга ҳақли эмас.
3. Ўзбекистон Республикаси Президентининг 2015 йил 28 сентябрдаги ПҚ-2412-сон қарори билан тасдиқланган Тадбиркорлик субъектларига давлат хизматлари фақат «ягона дарча» тамойили бўйича ягона марказлар орқали кўрсатиладиган давлат хизматлари рўйхатига (кейинги ўринларда Рўйхат деб аталади) киритилган давлат хизматлари кўрсатадиган давлат органлари ва бошқа ташкилотлар (кейинги ўринларда ваколатли органлар деб аталади):
жойларда ўз ходимларини ва ягона дарча марказлари ходимларини Рўйхатга киритилган давлат хизматлари кўрсатиш тартиботларига тизимли равишда ўқитишни таъминласинлар;
2015 йил 25 декабргача бўлган муддатда — давлат хизматлари олиш учун зарур бўлган ҳужжатларнинг намунавий шакллари ва бланкаларини қонун ҳужжатларида назарда тутилган барча хусусиятларни ҳисобга олган ҳолда ишлаб чиқсинлар ҳамда Ўзбекистон Республикаси Адлия вазирлиги, Савдо-саноат палатаси ҳамда Ахборот технологиялари ва коммуникацияларини ривожлантириш вазирлиги билан келишган ҳолда тасдиқласинлар;
2015 йил 25 декабргача бўлган муддатда — фақат «ягона дарча» марказлари орқали кўрсатиладиган давлат хизматлари паспортларини уларда кўрсатилган маълумотларнинг муҳимлигини доимий равишда таъминлаган ҳолда ишлаб чиқсинлар ва Ўзбекистон Республикаси Ахборот технологиялари ва коммуникацияларини ривожлантириш вазирлиги, Адлия вазирлиги ҳамда Савдо-саноат палатаси билан келишган ҳолда тасдиқласинлар;
икки ой муддатда — Ўзбекистон Республикаси Савдо-саноат палатаси билан биргаликда консолидация қилинган маълумотларга ва классификаторларга эга бўлган, ҳужжатларнинг намунавий шаклларида ва бланкаларида кўрсатилган маълумотларнинг автоматик тарзда янгилаб борилишини таъминлаш, давлат хизматлари олишда тадбиркорлик субъектлари томонидан тақдим этиладиган маълумотларни туркумлаш имконини берадиган ахборот-маълумотнома ресурсларини ишлаб чиқсинлар ва ўз ваколатлари доирасида тасдиқласинлар, шунингдек уларнинг белгиланган тартибда «Ўзстандарт» агентлиги органларида давлат рўйхатидан ўтказилишини таъминласинлар.
Рўйхатга қўшимча давлат хизматларини киритишда тегишли ваколатли органлар ушбу бандда назарда тутилган талабларга риоя этилишини таъминлайдилар.
4. Давлат хизматлари кўрсатадиган «ягона дарча» марказларининг ва ваколатли органларнинг раҳбарлари:
уларнинг «ягона дарча» марказлари фаолиятини ўз вақтида ташкил этиш, шунингдек улар орқали тегишли давлат хизматлари кўрсатиш тартибига оғишмай риоя этиш юзасидан шахсий масъулияти тўғрисида;
тадбиркорлик субъектларига давлат хизматлари кўрсатиш, шунингдек лицензиялар ва бошқа рухсат бериш тусидаги ҳужжатларни беришнинг белгиланган тартиби ва муддатлари бузилганлиги учун қонун ҳужжатларида назарда тутилган жиноий жавобгарликкача бўлган жавобгарлик чоралари тўғрисида қатъий огоҳлантирилсин.
5. Белгилаб қўйилсинки:
ваколатли органларнинг давлат хизматлари кўрсатиш билан боғлиқ бўлган фаолиятининг функционал ва операцион жараёнлари улар Рўйхатга киритилган санадан бошлаб қонун ҳужжатларида белгиланган тартибда тизимли равишда қайта ташкил этилади;
давлат хизмати паспорти у тасдиқланган санадан бошлаб бир кун муддатда ваколатли органнинг расмий веб-сайтида жойлаштирилади;
давлат хизмати паспорти, ҳужжатларнинг намунавий шакллари ва бланкалари, ахборот-маълумотнома ресурслари ваколатли органлар томонидан, кейинчалик уларни «ягона дарча» марказларига юбориш учун улар тасдиқланган санадан бошлаб бир ҳафта муддатда Ўзбекистон Республикаси Адлия вазирлигига ҳамда Ўзбекистон Республикаси Ахборот технологиялари ва коммуникацияларини ривожлантириш вазирлигига тақдим этилади;
Ўзбекистон Республикаси Ахборот технологиялари ва коммуникацияларини ривожлантириш вазирлиги тасдиқланган давлат хизматлари паспортлари, ҳужжатларнинг намунавий шакллари ва бланкалари, шунингдек ахборот-маълумотнома ресурслари асосида Ўзбекистон Республикаси Интерактив давлат хизматлари ягона порталида (кейинги ўринларда Ягона портал деб аталади) давлат хизматлари паспортларининг эълон қилинишини ҳамда Ягона порталда алоҳида интерактив тарзда тўлдириш ва давлат хизматлари олиш учун электрон ҳужжатларни тақдим этиш имкониятини жорий этишни таъминлайди.
6. Ўзбекистон Республикаси Савдо-саноат палатаси, Марказий банки, Ахборот технологиялари ва коммуникацияларини ривожлантириш вазирлиги, Молия вазирлиги, Давлат солиқ қўмитаси давлат хизматлари кўрсатиш учун тўловни ундирадиган ваколатли органлар билан биргаликда 2016 йил 1 октябргача бўлган муддатда:
Ягона порталда давлат хизматлари кўрсатиш учун тўланган давлат божлари ва йиғимлари суммасини банклар кассалари ва (ёки) электрон тўлов тизимлари орқали ҳисобга олишнинг ягона биллинг тизимини (кейинги ўринларда ягона биллинг тизими деб аталади);
тадбиркорлик субъектларини ва ваколатли органларни реал вақт режимида ягона биллинг тизими воситасида ўзаро ҳисоб-китобларнинг ҳолати тўғрисида хабардор қилиш имкониятини;
ариза берувчилар томонидан тўловларни, шу жумладан электрон тарздаги тўловларни амалга оширишда уларни идентификациялаш механизмини;
ваколатли органларда давлат хизматлари кўрсатиш учун тўланган давлат божлари ва йиғимлари суммасини ҳисобга олишнинг идоравий биллинг тизимларини, уларни, шу жумладан ваколатли органларнинг маълумотларида фойдаланиладиган бухгалтерия дастурий таъминотини ягона биллинг тизими билан уларни интеграциялашни таъминлаган ҳолда;
«ягона дарча» марказлари томонидан бажариладиган қонун ҳужжатларида белгиланган вазифалар ва функцияларнинг автоматлаштирилишини таъминлайдиган ариза берувчилар билан ўзаро муносабатларни бошқаришнинг ахборот тизимини ишлаб чиқсинлар ва жорий этсинлар.
7. Ўзбекистон Республикаси Савдо-саноат палатаси Ахборот технологиялари ва коммуникацияларини ривожлантириш вазирлигига ушбу қарорнинг 5-бандида назарда тутилган ахборот-коммуникация технологияларини ишлаб чиқиш ва ривожлантириш лойиҳаларини икки ҳафта муддатда киритсин.
2013-2020 йилларда Ўзбекистон Республикаси Миллий ахборот-коммуникация тизимини ривожлантириш Комплекс дастурини амалга оширишни мувофиқлаштириш бўйича Республика комиссияси 2015 йил 15 декабргача бўлган муддатда ушбу қарорнинг 5-бандида назарда тутилган ахборот-коммуникация технологияларини ишлаб чиқиш ва ривожлантиришнинг киритилган лойиҳаларини амалга оширишга давлат буюртмасини тасдиқласин.
Ўзбекистон Республикаси Ахборот технологиялари ва коммуникацияларини ривожлантириш вазирлиги давлат буюртмаси тасдиқланган санадан бошлаб икки ой муддатда танлов (тендер) савдоларини ўтказсин ва уларнинг натижалари бўйича давлат буюртмаси лойиҳаларини амалга ошириш юзасидан тегишли шартномаларни тузсин.
8. Ўзбекистон Республикаси Савдо-саноат палатаси, Адлия вазирлиги бир ой муддатда «ягона дарча» марказлари ходимларининг намунавий лавозим йўриқномаларини, шу жумладан ўзи бевосита мурожаат қилувчи тадбиркорлик субъектларини қабул қилиш, телефон хизмати кўрсатиш, ваколатли органлар билан ўзаро ҳамкорлик қилиш, давлат хизматларининг юқори сифатини, шаффофлиги ва қулайлигини таъминлайдиган бошқа масалалар бўйича муфассал йўриқномаларни ишлаб чиқсинлар ва тасдиқласинлар.
9. Ўзбекистон Республикаси Адлия вазирлиги, Иқтисодиёт вазирлиги, Молия вазирлиги, Савдо-саноат палатаси бошқа манфаатдор вазирликлар ва идоралар билан биргаликда икки ой муддатда Вазирлар Маҳкамасига қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида таклифлар киритсин.
10. Вазирликлар ва идоралар бир ой муддатда ўзларининг идоравий норматив-ҳуқуқий ҳужжатларини ушбу қарорга мувофиқлаштирсинлар.
11. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов зиммасига юклансин.
Ўзбекистон Республикасининг Бош вазири Ш. МИРЗИЁЕВ
Тошкент ш.,
2015 йил 14 декабрь,
358-сон
Вазирлар Маҳкамасининг 2015 йил 14 декабрдаги 358-сон қарорига
1-ИЛОВА
1-ИЛОВА
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари фаолиятини ташкил этиш тартиби тўғрисида
НИЗОМ
I. Умумий қоидалар
1. Ушбу Низом тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари (кейинги ўринларда «ягона дарча» маркази деб аталади) фаолиятини ташкил этиш тартибини белгилайди.
2. «Ягона дарча» маркази Ўзбекистон Республикаси Адлия вазирлиги тузилмасига киради ва юридик шахс ҳисобланмайди, мол-мулкка, хўжалик юритувида ёки тезкор бошқарувида алоҳида мол-мулкка эга бўлмайди, тадбиркорлик фаолиятини амалга ошириш, ўз номидан бошқа шахслар билан фуқаролик-ҳуқуқий муносабатларни амалга ошириш ҳуқуқига эга бўлмайди.
(2-банднинг биринчи хатбошиси Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
«Ягона дарча» марказининг ўз номи ёзилган думалоқ муҳри, штампи ва бланкалари бўлади.
3. «Ягона дарча» маркази ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига ҳамда ушбу Низомга амал қилади.
4. «Ягона дарча» маркази ўз фаолиятида давлат ва хўжалик бошқаруви органларидан маҳаллий давлат ҳокимияти органларидан мустақилдир ва Ўзбекистон Республикаси Адлия вазирлигига ҳисобот беради.
(4-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
5. «Ягона дарча» маркази томонидан ушбу Низомда назарда тутилган тартибда берилган ҳужжатлар юридик кучга эга ва Ўзбекистон Республикасининг бутун ҳудудида амал қилади.
II. «Ягона дарча» марказларининг вазифалари ва функциялари
6. Қуйидагилар «ягона дарча» маркази фаолиятининг асосий вазифалари ҳисобланади:
«ягона дарча» тамойили бўйича давлат хизматлари кўрсатиш;
тадбиркорлик субъектлари томонидан рўйхатдан ўтказиш, рухсат бериш ва лицензия тартиботларидан ўтишда шаффофликни таъминлаш;
давлат органлари ва давлат хизматлари кўрсатадиган бошқа ташкилотлар (кейинги ўринларда ваколатли органлар деб аталади) билан мустаҳкам ўзаро ҳамкорлик ўрнатиш, тадбиркорлик субъектларига давлат хизматлари кўрсатишда бюрократик тўсиқларга йўл қўймаслик;
тадбиркорлик субъектларига (кейинги ўринларда аризачилар деб аталади) ахборот ёрдами кўрсатиш, шу жумладан давлат хизматлари кўрсатиш тартиби ва муддатлари тўғрисида бепул консультациялар бериш;
Ўзбекистон Республикаси Адлия вазирлигига аниқланган қонунбузарликлар, давлат хизматларини кўрсатиш бўйича қонун ҳужжатлари бузилишларининг белгилари, уларга имкон бераётган сабаб ва шарт-шароитлар тўғрисидаги маълумотларни, шунингдек «ягона дарча» тамойили бўйича давлат хизматлари кўрсатиш тизимидаги қонунчиликни такомиллаштиришга доир таклифларни киритади.
(6-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарорига асосан хатбоши билан тўлдирилган — ЎР ҚҲТ, 2017 й., 18-сон, 325-модда)
7. «Ягона дарча» маркази ўзига юкланган вазифаларга мувофиқ қуйидаги функцияларни бажаради:
тадбиркорлик субъектларини, шунингдек қонун ҳужжатларида назарда тутилган ҳолларда бошқа юридик шахсларни давлат рўйхатидан ва қайта рўйхатдан ўтказади;
молия-хўжалик фаолиятини амалга оширмаётган ва ўз устав фондларини қонун ҳужжатларида белгиланган муддатларда шакллантирмаган корхоналарни тугатиш бўйича белгиланган тартибда чора-тадбирлар кўради;
Давлат хизматлари кўрсатиш рўйхатида назарда тутилган, тадбиркорлик субъектларига «ягона дарча» тамойили бўйича давлат хизматлари фақат «ягона дарча» марказлари томонидан кўрсатиладиган Давлат хизматлари рўйхатида (кейинги ўринларда Рўйхат деб аталади) назарда тутилган давлат хизматлари кўрсатиш тўғрисидаги аризаларни (кейинги ўринларда ариза деб аталади) қабул қилади ва рўйхатдан ўтказади;
комплекс тадбиркорлик лицензияси (франшизинг) шартномаларини давлат рўйхатидан ўтказади;
тадбиркорлик лицензияси (франшизинг) шартномаларини давлат рўйхатидан ўтказиш реестрини (муҳим ўзгартиришлар, қўшимчалар, бекор қилиш) электрон тарзда юритади;
ариза берувчиларнинг ваколатли органлар билан контактсиз ўзаро ҳамкорлик қилишини таъминлайди;
аризаларнинг ваколатли органларга улар бўйича қарор қабул қилиш ва уларни тегишли равишда расмийлаштириш учун ўз вақтида берилишини таъминлайди;
аризачиларга аризаларни кўриб чиқиш якунлари бўйича ҳужжатлар беради;
аризачиларга «ягона дарча» марказига мурожаат қилишганда ахборот ёрдами кўрсатади;
жамоатчиликнинг кўрсатилаётган давлат хизматлари тўғрисидаги фикрини ўрганади;
қонун ҳужжатларига мувофиқ бошқа функцияларни амалга оширади.
(7-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
III. «Ягона дарча» марказининг ҳуқуқлари ва мажбуриятлари
8. «Ягона дарча» маркази ўзига юкланган вазифалар ва функцияларни бажариш учун қуйидаги ҳуқуқларга эга:
Ўзбекистон Республикаси Адлия вазирлигига Рўйхатга қўшимча давлат хизматларини киритиш бўйича, давлат хизматлари кўрсатиш тартибини такомиллаштириш тўғрисида таклифларни, шунингдек аризачининг давлат хизматлари кўрсатишнинг рад этилиши билан боғлиқ масалаларни кўриб чиқиш учун материалларни киритади;
маълумотларнинг тегишли базаларидан, давлат ахборот тизимларидан ва ваколатли органлар ресурсларидан белгиланган тартибда фойдаланиш;
ваколатли органлардан уларнинг ваколатига кирувчи масалалар бўйича ҳужжатлар ҳамда ахборотларни сўраш ва тўловсиз олиш.
«Ягона дарча» маркази қонун ҳужжатларига мувофиқ бошқа ҳуқуқларга ҳам эга бўлиши мумкин.
(8-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
9. «Ягона дарча» маркази қуйидагиларга мажбур:
аризачилар билан ўзаро муносабатларни бошқаришнинг ахборот тизимидан, Ўзбекистон Республикаси Интерактив давлат хизматлари ягона порталидан (кейинги ўринларда Ягона портал деб аталади), идоралараро электрон тарзда ҳамкорлик қилиш тизимидан фойдаланиш;
давлат хизматлари кўрсатишда ахборот хавфсизлиги талабларига риоя этиш;
ваколатли органлар билан Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисидаги низомда назарда тутилган тарзда ҳамкорликни амалга ошириш;
ўзининг дастурий-аппарат воситаларининг узлуксиз ишлашини таъминлаш;
давлат хизматлари кўрсатиш масалалари бўйича телефон хизмати (call-марказ)нинг зарур даражада ишлашини таъминлаш;
навбатни электрон бошқаришнинг самарали фаолият кўрсатишини ва маъмурий бошқаришни, муайян даврда (кун, ҳафта, ойда) «ягона дарча» маркази орқали хизмат кўрсатилган аризачиларнинг сонини уларнинг тоифалари ва кўрсатилаётган давлат хизматлари турлари бўйича, қабул қилиш ва хизмат кўрсатилишини кутишнинг ўртача вақтини кўрсатган ҳолда зарур даражада ҳисобга олишни таъминлаш.
10. «Ягона дарча» маркази қонун ҳужжатларига мувофиқ бошқа мажбуриятлар ҳам олиши мумкин.
IV. «Ягона дарча» маркази фаолиятини таъминлаш тартиби
11. «Ягона дарча» маркази фаолиятини таъминлаш тадбиркорлик субъектларини давлат рўйхатидан ўтказганлик учун давлат божини тўлашдан тушадиган маблағлар, «ягона дарча» марказлари орқали кўрсатиладиган давлат хизматлари учун тўланадиган давлат божлари ва йиғимлар суммасининг 10 фоизи ва қонун ҳужжатларида тақиқланмаган бошқа манбалар ҳисобига амалга оширилади.
(11-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
12. Тадбиркорлик субъектларини давлат рўйхатидан ўтказишдан тушадиган давлат божининг барча суммаси, шунингдек «ягона дарча» марказлари орқали кўрсатиладиган давлат хизматлари учун тўланадиган давлат божлари ва йиғимлар суммасининг 10 фоизи «ягона дарча» марказларининг даромадларига Ўзбекистон Республикаси Адлия вазирлиги номига очилган махсус шахсий ҳисоб рақамига ўтказилади.
Махсус очилган ҳисоб рақамига тушадиган маблағлар Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари томонидан тақдим этилган Ўзбекистон Республикаси Адлия вазирлиги томонидан тасдиқланган ва Ўзбекистон Республикаси Молия вазирлигида рўйхатдан ўтказилган харажатлар сметаси ва штатлар жадвалига асосан фақат «ягона дарча» марказлари ходимлари таъминотига, моддий-техник базани мустаҳкамлашга, иш ҳақи тўлашга ва ходимларни рағбатлантиришга йўналтирилади.
«Ягона дарча» марказларининг маблағларидан фойдаланиш бўйича молиявий операциялар, уларни ҳисобга олиш ва улар бўйича ҳисоботлар тегишли равишда Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари бухгалтерияси томонидан амалга оширилади.
(12-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
Олдинги таҳрирга қаранг.
(13-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарорига асосан ўз кучини йўқотган — ЎР ҚҲТ, 2017 й., 18-сон, 325-модда)
14. Ўзбекистон Республикаси Адлия вазири, зарур ҳолларда, «ягона дарча» марказлари тузилмасига барча марказ ходимларининг белгиланган умумий сони доирасида ўзгартиришлар киритиш ҳуқуқига эга.
(14-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
V. «Ягона дарча» маркази фаолиятини ташкил этиш ва унинг иш режими
15. «Ягона дарча» марказига директор бошчилик қилади.
(15-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
16. «Ягона дарча» маркази директори марказ фаолиятига умумий раҳбарликни амалга оширади ва ўзига юкланган вазифалар ва функцияларнинг бажарилиши учун шахсан жавоб беради.
«Ягона дарча» марказлари ходимлари лавозим маошларига устамалар (меҳнатни рағбатлантириш коэффициенти) миқдори, мукофотлаш ва моддий ёрдам кўрсатиш шартлари бўйича Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари бўлимлари ходимларига тенглаштирилади.
(16-банднинг иккинчи хатбошиси Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
«Ягона дарча» марказларининг даромадлари ва харажатлари сметасида меҳнатга ҳақ тўлаш фондининг 15 фоизи миқдорида моддий рағбатлантиришнинг махсус фонди назарда тутилиши мумкин. Ушбу фонд маблағларидан фойдаланиш қонун ҳужжатларида назарда тутилган тартибда амалга оширилади.
(16-банднинг учинчи хатбошиси Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
17. «Ягона дарча» маркази ходимларининг лавозим йўриқномаси Ўзбекистон Республикаси Адлия вазирлиги томонидан тасдиқланади, унда уларнинг вазифалари, функциялари, ҳуқуқлари ва мажбуриятлари, шахсий жавобгарлиги, шунингдек ҳар бир марказ ходимига уларнинг вазифа ва функцияларидан келиб чиқиб малакавий талаблар мажбурий тартибда белгиланади.
(17-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
18. «Ягона дарча» марказида меҳнат қонунчилигига мувофиқ беш кундан иборат бўлган иш ҳафтаси белгиланади.
19. «Ягона дарча» марказида унинг 9.00 соатдан 18.00 соатгача танаффуссиз ишлашини таъминлайдиган график белгиланади.
Аризачилар билан ишлаш учун хоналар «ягона дарча» маркази биноси (иморати)нинг биринчи қаватида жойлашади, унинг «ягона дарча» маркази биносига тўсиқсиз киришини таъминлайдиган алоҳида кириш жойи бўлади.
«Ягона дарча» марказининг биноси (иморати)га кириш жойида пешлавҳа ўрнатилади, унда қуйидаги мазмундаги маълумотлар бўлади:
«ягона дарча» марказининг жойлашган жойи (почта манзили);
«ягона дарча» марказининг иш режими;
телефон хизмати кўрсатиш (call-марказ) рақами;
аризачилар учун зарур бўлган бошқа маълумотлар.
20. «Ягона дарча» маркази биносида тўловларни қабул қилиш бўйича банклар кассалари жойлаштирилиши керак.
21. «Ягона дарча» маркази биносида навбат кутиш навбатни бошқаришнинг электрон тизими ускуналаридан фойдаланган ҳолда ташкил этилади.
Бино қўшимча равишда аризачиларни «ягона дарча» марказининг телефони, электрон почтаси ва Ягона портал орқали навбатга масофадан туриб ёзиш билан таъминланади.
22. «Ягона дарча» маркази аризачилар учун ахборот стендлари ва тахталари билан жиҳозланади, улар маълумотлар билан танишиш учун қулай бўлган жойда ўрнатилади ва уларда маълумотлар билан танишиш учун қулайлик мавжуд бўлади.
23. Ахборот стендларида «ягона дарча» маркази орқали кўрсатиладиган давлат хизматлари олиш учун зарур бўлган муҳим ва муфассал маълумотлар, шу жумладан қуйидагилар мавжуд бўлади:
тадбиркорлик субъектларини давлат рўйхатидан ўтказиш, қайта рўйхатдан ўтказиш тартиби ва муддатлари;
(23-банд Ўзбекистон Республикаси Вазирлар Маҳкамасининг 2017 йил 1 майдаги 252-сонли қарорига асосан иккинчи хатбоши билан тўлдирилган — ЎР ҚҲТ, 2017 й., 18-сон, 325-модда)
фақат «ягона дарча» марказлари орқали кўрсатиладиган давлат хизматлари паспортлари;
кўп бериладиган саволлар ва уларга жавоблар (улар ҳар ойда камида бир марта янгилаб борилади);
давлат хизматлари кўрсатиш механизми тавсифланган расмлар, блок-схемалар ва бошқа график чизмалар;
«ягона дарча» марказининг ва Интернет тармоғидаги Ягона порталнинг почта манзили, телефон хизмати (call-марказ)нинг рақами, электрон почта манзиллари;
давлат божи, йиғим ва бошқа тўловларни тўлаш учун банк реквизитлари;
ҳужжатларнинг муфассал рўйхати, шунингдек давлат хизматлари олиш, шу жумладан тадбиркорлик субъектларини давлат рўйхатидан ўтказиш, қайта рўйхатдан ўтказиш учун зарур бўлган ҳужжатларнинг намунавий шакллари ва бланкалари;
(23-банднинг саккизинчи хатбошиси Ўзбекистон Республикаси Вазирлар Маҳкамасининг 2017 йил 1 майдаги 252-сонли қарори таҳририда — ЎР ҚҲТ, 2017 й., 18-сон, 325-модда)
давлат хизматлари олиш учун «ягона дарча» марказига тақдим этиш учун зарур бўлган ҳужжатларнинг намунавий шакллари ва бланкаларини тўлдириш намуналари.
Стендда давлат хизматлари кўрсатиш учун зарур бўлган бошқа маълумотлар ҳам жойлаштирилиши мумкин.
VI. Якунловчи қоидалар
24. «Ягона дарча» маркази ходимларига ўз лавозим вазифаларини бажариш билан боғлиқ ҳолда аризачилар тўғрисидаги ўзларига маълум бўлган маълумотлардан қатъиян хизмат мақсадларида фойдаланилиши керак.
25. «Ягона дарча» маркази ходимлари давлат, банк, тижорат, солиқ сири бўлган ва қонун билан қўриқланадиган бошқа махфий ҳужжатларни ва (ёки) маълумотларни ошкор қилишга, улардан шахсий мақсадларда фойдаланишга ёхуд уларни учинчи шахсларга, шу жумладан ваколатли органларга беришга ҳақли эмас (қонунчиликда белгиланган ҳолатлар бундан мустасно).
26. Ушбу Низомнинг бузилишида айбдор бўлган шахслар қонун ҳужжатларига мувофиқ жавоб берадилар.
Вазирлар Маҳкамасининг 2015 йил 14 декабрдаги 358-сон қарорига
2-ИЛОВА
2-ИЛОВА
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисида
НИЗОМ
I. Умумий қоидалар
1. Ушбу Низом тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари (кейинги ўринларда «ягона дарча» марказлари деб аталади) орқали давлат хизматлари кўрсатиш, «ягона дарча» марказларининг давлат органлари ҳамда давлат хизматлари кўрсатадиган бошқа ташкилотлар ва (ёки) давлат хизматлари кўрсатиш учун зарур ҳужжатлар ва маълумотларга эга бўлган бошқа ташкилотлар билан ўзаро ҳамкорлик қилиш тартибини белгилайди.
2. «Ягона дарча» марказлари ҳамда давлат органлари ва қонун ҳужжатларига мувофиқ давлат хизматлари кўрсатадиган ва (ёки) давлат хизматлари кўрсатиш учун зарур ҳужжатлар ва маълумотларга эга бўлган бошқа ташкилотлар (кейинги ўринларда ваколатли органлар деб аталади) ўртасида ахборотларни айирбошлаш идоралараро ўзаро электрон тарзда ҳамкорлик қилиш тизими воситасида амалга оширилади, бунда «ягона дарча» марказларини автоматлаштиришни, ахборот хавфсизлигини таъминлашни ҳисобга олган ҳолда, аризачилар билан ўзаро муносабатларни бошқаришнинг ахборот тизими (кейинги ўринларда Тизим деб аталади) орқали амалга оширилади.
3. Тадбиркорлик субъектларига «ягона дарча» тамойили бўйича давлат хизматлари фақат давлат хизматлари кўрсатиш бўйича ягона марказлар орқали кўрсатиладиган Давлат хизматлари рўйхатига (кейинги ўринларда Рўйхат деб аталади) киритилган давлат хизматлари олиш учун «ягона дарча» марказларига мурожаат қилишган тадбиркорлик субъектларига (кейинги ўринларда аризачилар деб аталади) давлат хизматлари кўрсатиш ушбу Низомга 1-иловага мувофиқ схемага ва давлат хизмати паспортига мувофиқ амалга оширилади.
II. Давлат хизматлари кўрсатиш тўғрисида аризалар бериш, уларни кўриб чиқиш ва кўриб чиқиш натижалари бўйича ҳужжатлар бериш тартиби
4. Аризачи «ягона дарча» марказига давлат хизмати кўрсатиш тўғрисидаги аризани (кейинги ўринларда ариза деб аталади) ушбу Низомга 2-иловага мувофиқ шакл бўйича, ҳозир бўлиш тартибида ёки почта алоқаси воситасида беради.
Интерактив давлат хизматлари ягона портали (кейинги ўринларда Ягона портал деб аталади) орқали берилган аризалар давлат хизмати кўрсатадиган тегишли ваколатли органга автоматик равишда бевосита юборилади.
5. Аризачи ҳозир бўлиш тартибида мурожаат қилган тақдирда «ягона дарча» маркази хонасида навбат бўйича тартиб рақами олади ва кутиш учун ажратилган жойда «ягона дарча» маркази ходимининг чақиришини кутади.
Аризачи навбат рақамини олган вақтдан бошлаб «ягона дарча» маркази ходими томонидан аризани ариза қабул қилиб олинганлигини тасдиқлайдиган ҳужжат аризачига берилгунгача бўлган вақт 30 дақиқадан ошмаслиги керак.
6. Аризачи чақирилгандан кейин «ягона дарча» маркази ходими аризанинг давлат хизмати паспортига мувофиқ тўлиқ тўлдирилганлигини текширади. Текшириш якунлари бўйича «ягона дарча» маркази ходими аризани идоралараро электрон тарзда ҳамкорлик қилиш тизимига киритади, ушбу тизим воситасида Рўйхатга киритилган давлат хизматлари кўрсатиш учун тушган аризаларни рўйхатга олиш Электрон журналида (кейинги ўринларда Журнал деб аталади) шакллантирилади. Журнал идоралараро электрон тарзда ҳамкорлик қилиш тизими воситасида белгиланган шаклда, аризага уникал рўйхатдан ўтказиш рақамини беради.
Ариза рўйхатдан ўтказилгандан кейин «ягона дарча» маркази ходими аризачига ариза олингани тўғрисида тилхат беради ёки уникал рўйхатдан ўтказиш рақамини кўрсатган ҳолда ариза нусхасида қабул қилингани тўғрисидаги тегишли ёзувни қайд этади.
Почта алоқаси орқали «ягона дарча» маркази томонидан олинган ариза ҳам унга уникал рўйхатдан ўтказиш рақами берилган ҳолда Журналда рўйхатдан ўтказилади.
7. «Ягона дарча» маркази томонидан ҳозир бўлиш тартибида ёки почта алоқаси орқали олинган ариза «ягона дарча» маркази ходими томонидан сканирланади, унга электрон рақамли имзо (кейинги ўринларда ЭРИ деб аталади) қўйилади ва ариза олинган куни идоралараро электрон тарздаги ҳамкорлик тизими орқали тегишли ваколатли органларга юборилади.
«Ягона дарча» маркази ходимининг ЭРИси фақат берилган аризада нотўғри маълумот йўқлиги фактини аниқлайди.
8. Бошқа жойдаги «ягона дарча» марказига ҳозир бўлиш тартибида ёки почта алоқаси орқали мурожаат қилинган ёки аризачи рўйхатдан ўтказилган тақдирда ариза тегишли «ягона дарча» марказини хабардор қилган ҳолда идоралараро электрон тарзда ҳамкорлик қилиш тизими орқали «ягона дарча» маркази томонидан тегишли ваколатли органга юборилади.
Аризачи томонидан «ягона дарча» марказига ариза электрон манба орқали тақдим этилган тақдирда «ягона дарча» маркази ходими, зарурат бўлганда, унга аризани хизмат кўрсатиш учун ажратилган жойга «ягона дарча» маркази биносига Ягона портал орқали юборишда кўмаклашади.
9. Ариза Ягона портал орқали юборилган тақдирда ариза, уникал рўйхатдан ўтказиш рақами берилган ҳолда, автоматик равишда Ягона порталда рўйхатдан ўтказилади.
10. Аризачилардан аризани қабул қилиш учун тегишли давлат хизмати паспортида назарда тутилмаган қўшимча маълумотларни ва (ёки) ҳужжатларни тақдим этишни талаб қилиш тақиқланади.
Давлат хизматининг тасдиқланган паспорти қонун ҳужжатларига мувофиқ бўлмаган тақдирда аризачи ушбу паспортга мувофиқ расмийлаштирилган давлат хизматининг тўлиқ ва (ёки) ишончли бўлмаган маълумотлари ваколатли органга тақдим этилганлиги учун жавоб бермайди.
Бунда тегишли ваколатли орган ноаниқлик аниқланган санадан бошлаб бир кун муддатда ушбу давлат хизмати паспортидаги ноаниқликни белгиланган тартибда бартараф этиш чораларини кўриши шарт.
11. Ахборот айирбошлашда техник носозликлар вужудга келган ҳолатларда аризачи томонидан қоғозда тақдим этилган ариза у олинган санадан бошлаб бир иш куни мобайнида «ягона дарча» маркази томонидан почта алоқаси воситасида (буюртма хат билан) ёхуд ўзининг масъул ходими орқали юборилади.
12. Ваколатли орган ариза олинган вақтдан бошлаб унинг қонун ҳужжатларида белгиланган тартибда кўриб чиқилишини таъминлайди.
Аризани кўриб чиқишда ваколатли органнинг қўшимча ҳужжатлар ва (ёки) маълумотлар тақдим этилишини талаб қилиши, шунингдек аризасини кўриб чиқиш жараёнида давлат хизматлари кўрсатиш учун «ягона дарча» марказига мурожаат қилган аризачини таклиф этиши тақиқланади.
13. Ваколатли орган аризани кўриб чиқиш учун қонун ҳужжатларида белгиланган муддат тугашидан 3 иш соатидан кечикмай:
давлат хизмати кўрсатиш натижасини ёки давлат хизмати кўрсатишнинг асосли равишда рад этилганини белгиланган тартибда қоғозли манбада расмийлаштиради;
давлат хизмати кўрсатиш натижаси ёки давлат хизмати кўрсатишни рад этишнинг асосли сабаблари тўғрисидаги маълумотларни идоралараро электрон тарзда ҳамкорлик қилиш тизимига ва ўзининг электрон ахборот ресурсларига киритади;
QR-код (матрик штрихли код)да мавжуд бўлган давлат хизмати кўрсатиш натижасини ёки давлат хизмати кўрсатишнинг асосли рад этилишини — электрон ҳужжатни генерация қилади;
давлат хизмати кўрсатиш натижасини ёки давлат хизмати кўрсатишнинг асосли рад этилишини электрон тарзда «ягона дарча» марказига ёхуд аризачига (Ягона портал орқали мурожаат қилинган тақдирда) юборади.
Агар қонун ҳужжатларида бошқача тартиб назарда тутилмаган бўлса, давлат хизмати кўрсатишнинг асосли рад этилиши ушбу Низомга 3-иловага мувофиқ шакл бўйича расмийлаштирилади.
14. QR-кодда уни тегишли дастурий-аппарат воситалари билан санашда тадбиркорлик субъектини идентификациялаш имконини берадиган унинг тўғрисидаги асосий маълумотлар (рўйхатдан ўтказиш тўғрисидаги гувоҳномада, ҳисобга қўйиш тўғрисидаги гувоҳномада мавжуд бўлган маълумотлар, шу жумладан тегишли электрон ахборот ресурсидаги, шунингдек ваколатли орган масъул ходимининг ЭРИсидаги ёзувни кўрсатадиган Интернет тармоғидаги (ҳаволадаги) манзил мавжуд бўлиши керак.
15. Ваколатли органларда давлат хизмати кўрсатишнинг натижаси ёки давлат хизмати кўрсатишнинг асосли рад этилиши — электрон ҳужжатни генерациялашнинг дастурий-техник воситалари мавжуд бўлмаганда тегишли равишда давлат хизмати кўрсатиш натижаси ёки давлат хизмати кўрсатишнинг асосли рад этилиши ваколатли орган ходимининг ЭРИсини имзолаган ҳолда қоғоз манбада акс эттиришга йўл қўйилади. Бунда QR-коднинг мавжуд бўлиши талаб қилинмайди.
«Ягона дарча» маркази томонидан «ягона дарча» маркази муҳри қўйилган ҳолда аризани кўриб чиқиш натижалари бўйича тушган қоғозли манбада босилган ҳужжат ваколатли орган томонидан берилган электрон ҳужжатга тенглаштирилади.
16. Ахборотларни айирбошлашда техник носозликлар вужудга келган ҳолатларда ваколатли орган аризани кўриб чиқиш муддати тугагунгача аризани кўриб чиқиш якунлари бўйича тайёрланган ҳужжатларни почта алоқаси орқали (буюртма хат билан) ёхуд ўзининг масъул ходими орқали «ягона дарча» марказига юборади.
17. «Ягона дарча» маркази давлат хизмати кўрсатиш натижаси ёки давлат хизмати кўрсатишнинг асосли рад этилиши тўғрисидаги маълумотлар олинган вақтдан бошлаб бир иш соати мобайнида:
бу тўғрида аризачи аризада кўрсатилган усулда уни хабардор қилади;
идоралараро электрон тарздаги ҳамкорлик тизими воситасида Журналга тегишли ёзувни киритади.
18. Аризани кўриб чиқиш якунлари бўйича ҳужжатларни аризачига бериш иш кунларида қуйидаги ҳужжатлардан бирини беришда амалга оширилади:
ариза олингани тўғрисидаги тилхат;
уникал рўйхатга олиш рақамини кўрсатган ҳолда аризанинг қабул қилингани тўғрисида белги қўйилган нусхаси;
аризачининг шахсини тасдиқловчи ҳужжат.
Бунда давлат хизмати кўрсатиш натижасини ёхуд давлат хизмати кўрсатишнинг рад этилишини бериш Журналда рўйхатдан ўтказилади.
19. Журнал идоралараро электрон тарздаги ҳамкорликнинг тизимида автоматик тарзда электрон шаклда юритилади. Ҳар ойда Журналнинг мазмуни қоғозли манбага ёзилади, унинг ҳар бир варағи рақамланади, «ягона дарча» марказининг масъул ходими томонидан имзоланади ва муҳр қўйилади. Қоғоз манбага босилган Журнал мазмуни Журналнинг йиғма папкасига навбати билан тикилади.
Журналдаги ҳар бир ёзувга тартиб рақами берилади. Тартиб рақами қўйиш ҳар бир ёзувга бир рақамидан бошлаб навбатдаги тартиб рақами бериш йўли билан амалга оширилади. Тартиб рақами кейинги календарь йилда давом эттирилади.
20. Давлат хизмати кўрсатганлик учун давлат божи, йиғим ва бошқа тўловлар аризачининг хоҳишига кўра «ягона дарча» маркази хонасидаги банк кассаси ёхуд электрон тўлов тизимлари воситасида амалга оширилади.
21. Аризачи аризани кўриб чиқиш натижалари бўйича тайёрланган ҳужжатларни олиш учун бевосита мурожаат қилмаган ҳолатларда «ягона дарча» маркази уларнинг давлат хизмати кўрсатиш натижасини бериш муддати бошланган кундан эътиборан бир ой мобайнида сақланишини таъминлайди, шундан сўнг уларни аризачига почта алоқаси орқали (буюртма хат билан) жўнатади.
22. Аризани кўриб чиқиш натижалари бўйича қоғоз манбада тайёрланган ҳужжатни сақлаш махсус жиҳозланган шкафларда, уларнинг турлари ва ҳужжатни бериш (чиқариш) санаси бўйича ажратган ҳолда белгиланган тартибда амалга оширилади.
III. Якунловчи қоидалар
23. «Ягона дарча» маркази ходимлари томонидан ўз лавозим вазифаларини амалга ошириш муносабати билан ўзларига маълум бўлиб қолган аризачилар тўғрисидаги маълумотлардан қатъиян хизмат мақсадларида фойдаланилиши керак.
24. «Ягона дарча» маркази ходимлари давлат, банк, тижорат, солиқ ёки қонун билан қўриқланадиган бошқа сирга, конфиденциал ахборотга эга бўлган ҳужжатлар ва (ёки) маълумотларни ошкор қилишга, улардан шахсий мақсадларда фойдаланишга ёхуд уларни учинчи шахсларга, шу жумладан ваколатли органларга беришга ҳақли эмас, қонун ҳужжатларида белгиланган ҳолатлар бундан мустасно.
25. Ушбу Низомнинг бузилишида айбдор бўлган шахслар қонун ҳужжатларига мувофиқ жавоб берадилар.
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисидаги низомга
1-ИЛОВА
1-ИЛОВА
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш
СХЕМАСИ
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисидаги низомга
2-ИЛОВА
2-ИЛОВА
Тадбиркорлик субъектларига «ягона дарча» тамойили бўйича давлат хизматлари кўрсатиш ягона марказлари орқали давлат хизматлари кўрсатиш тартиби тўғрисидаги низомга
3-ИЛОВА
3-ИЛОВА
|
(Давлат хизмати кўрсатадиган ваколатли органнинг | |||||||||||||||||||||||||||||
| Сана: ____________ № _______________ |
| | | | | | | | | | | | | | | | | | | | | | | ||||||
| ___________________________________________________________________________ Сизнинг | |||||||||||||||||||||||||||||
|
(ваколатли органнинг тўлиқ номи) |
| | | ||||||||||||||||||||||||||
| 20____ йил «_____»_____________даги | | | | | | | | | | | рўйхатдан ўтказиш | ||||||||||||||||||
|
(йил, кун, ой (ёзув билан) |
| | | | | | | | | | | | | | | | | ||||||||||||
| рақамига эга бўлган аризангизни қонунчиликда белгиланган тартибда ва муддатларда кўриб чиқиб __________________________________________________________________________________ | |||||||||||||||||||||||||||||
|
(давлат хизматининг тўлиқ номи) | |||||||||||||||||||||||||||||
| давлат хизмати кўрсатишнинг рад этилгани тўғрисида хабар қилади. | |||||||||||||||||||||||||||||
| Қуйидагилар давлат хизмати кўрсатишнинг рад этилгани учун асос ҳисобланади: __________________ __________________________________________________________________________________ | |||||||||||||||||||||||||||||
|
(қонунчиликнинг аниқ нормалари кўрсатилган ҳолда рад этишнинг асосланган сабаблари қисқача ёзилади) | |||||||||||||||||||||||||||||
|
1. |
| | | | | | | | | | | | | | | | | | | | | | | | | | | | |
|
Қўшимча равишда шуни хабар қиламизки, давлат хизмати кўрсатишнинг рад этилгани учун асос бўлган сабаблар 20__ йил «__» __________гача бўлган муддатда (шу куннинг ўзи ҳам киради) бартараф этилган тақдирда, ариза рад этишнинг сабаблари бартараф этилгани тўғрисидаги ариза ва рад этиш сабабларининг бартараф этилганини тасдиқловчи тегишли ҳужжатлар олинган кундан бошлаб ___ иш кунидан ошмайдиган муддатда такроран кўриб чиқилади. | |||||||||||||||||||||||||||||
|
(___сўм миқдоридаги тўловнинг ундирилиши ёки ундирилмаслиги кўрсатилади). | |||||||||||||||||||||||||||||
|
_________________________ |
| |
_______________________ | ||||||||||||||||||||||||||
|
Масъул шахснинг электрон рақамли имзосидан иборат |
| ||||||||||||||||||||||||||||
Изоҳ:
* Электрон рақамли имзони генерациялашнинг дастурий-техник воситалари ва QR-код мавжуд бўлган тақдирда шахснинг лавозими, имзоси, инициаллари ва ваколатли органнинг муҳри кўрсатилмайди.
Вазирлар Маҳкамасининг 2015 йил 14 декабрдаги 358-сон қарорига
3-ИЛОВА
3-ИЛОВА
Тадбиркорлик субъектларига «ягона дарча» тамойили бўйича давлат хизматлари фақат давлат хизматлари кўрсатиш ягона марказлари орқали кўрсатиладиган давлат хизматининг
намунавий паспорти
|
«ТАСДИҚЛАЙМАН» ______________________________________ |
«КЕЛИШИЛГАН» | ||||||||
|
______________ |
________________________ |
______________ |
_______________________ | ||||||
|
20__ йил «___» ____________ |
20__ йил «___» ____________ | ||||||||
|
______________ |
_______________________ |
______________ |
_______________________ | ||||||
|
|
| ||||||||
Тадбиркорлик субъектларига «ягона дарча» тамойили бўйича давлат хизматлари фақат ягона марказлар орқали кўрсатиладиган
ДАВЛАТ ХИЗМАТИ ПАСПОРТИ
ДАВЛАТ ХИЗМАТИ ПАСПОРТИ
|
1. |
Давлат хизматининг номи |
___________________________________________________________ ___________________________________________________________
Изоҳ:давлат хизмати номи давлат хизматлари, шакллари ва бланкаларининг Ягона реестрига мувофиқ кўрсатилади. | ||||||||||||||||
|
2. |
Давлат хизмати кўрсатадиган давлат органи ва бошқа ташкилотнинг номи (кейинги ўринларда ваколатли орган деб аталади) |
Тўлиқ номи: ________________________________________. Қисқартирилган номи: ___________________________________. | ||||||||||||||||
|
3. |
Давлат хизматидан фойдаланувчилар |
□ юридик шахслар; □ жисмоний шахслар; □бошқалар:______________________________________________. | ||||||||||||||||
|
4. |
Давлат хизмати кўрсатиш тўғрисидаги аризани кўриб чиқишда қатнашадиган ва/ёки давлат хизмати кўрсатиш учун зарур бўлган ҳужжатлар ва маълумотларга эга бўлган органлар ва ташкилотларнинг муфассал рўйхати |
Давлат хизмати кўрсатиш жараёнида қуйидагилар қатнашадилар: 1) _______________________________________________________; 2) _______________________________________________________; n) _______________________________________________________.
Изоҳ: ваколатли орган кўрсатилган органлар ва ташкилотлар билан аризачини жалб этмасдан мустақил равишда ўзаро ҳамкорлик қилади. | ||||||||||||||||
|
5. |
Давлат хизмати олиш учун аризачи томонидан тақдим этиладиган ҳужжатларнинг муфассал рўйхати ва сони |
Аризачи давлат хизмати олиш учун қуйидагиларни тақдим этади: 1) _____________________________________________________ □ асл нусхаси: ___ (нусхалар сони); □ нусхаси: ___ (нусхалар сони). 2) _____________________________________________________ □ асл нусхаси: ___ (нусхалар сони); □ нусхаси: ___ (нусхалар сони). n) _____________________________________________________ □ асл нусхаси: ___ (нусхалар сони); □ нусхаси: ___ (нусхалар сони). | ||||||||||||||||
|
6. |
Давлат хизмати кўрсатиш учун зарур бўлган, ваколатли орган томонидан аризачининг иштирокисиз мустақил равишда олинадиган ҳужжатлар ва маълумотларнинг батафсил рўйхати ва сони |
Ваколатли орган давлат хизмати кўрсатиш учун қуйидагиларни мустақил равишда олади: 1) _____________________________________________________ — □ асл нусхаси: ___ (нусхалар сони); □ нусхаси: ___ (нусхалар сони). 2) _____________________________________________________ — □ асл нусхаси: ___ (нусхалар сони); □ нусхаси: ___ (нусхалар сони). n) _____________________________________________________ — □ асл нусхаси: ___ (нусхалар сони); □ нусхаси: ___ (нусхалар сони). Изоҳ: ваколатли орган кўрсатилган ҳужжатларни ва маълумотларни аризачини жалб этмасдан мустақил равишда ушбу Паспортнинг 4-бандида кўрсатилган органлар ва ташкилотлардан олади. | ||||||||||||||||
|
7. |
Давлат хизмати кўрсатиш шакли |
Давлат хизмати кўрсатишда АКТни қўллаш: □ Давлат хизмати кўрсатиш тартиби тўғрисидаги ахборотни Интернет орқали олиш. Интернет тармоғидаги манзил: ______________________________; □ зарур ҳужжатлар шакллари ва бланкаларини Интернет орқали олиш. Интернет тармоғидаги манзил: ______________________________; □ зарур ҳужжатлар шакллари ва бланкаларини Интернет орқали интерактив тўлдириш. Интернет тармоғидаги манзил: ______________________________; □ ҳужжатлар шакллари ва бланкаларини интерактив тўлдириш ва уларни Интернет орқали тақдим этиш. Интернет тармоғидаги манзил: ______________________________; □ ҳужжатлар шакллари ва бланкаларини интерактив тўлдириш, уларни Интернет орқали тақдим этиш ва натижаларини олиш. Интернет тармоғидаги манзил: ______________________________. | ||||||||||||||||
|
8. |
Давлат хизматининг қиймати ва уни тўлаш тартиби |
Давлат хизмати кўрсатиш учун: □ тўлов ундирилмайди; □ қуйидагилар (давлат божи, йиғим, бошқа тўлов) ундирилади: 1) _____________ сўм миқдорида давлат божи; 2) _____________ сўм миқдорида йиғим; 3) бошқа тўловлар: ___________сўм миқдорида _______________.
Тўлаш тартиби: □ ариза бергунгача ёхуд уни бериш вақтида; □ аризани кўриб чиқиш жараёнида; □ давлат хизмати кўрсатиш факти бўйича. | ||||||||||||||||
|
9. |
Давлат хизмати кўрсатиш муддати |
Давлат хизматлари кўрсатишнинг чекланган муддатлари: а) ____ иш куни — янгидан берилган аризани кўриб чиқишда; б) ____ иш куни — давлат хизматлари кўрсатиш бўйича илгари берилган рад этиш сабаблари бартараф этилгандан кейин тақдим этилган такрорий аризани кўриб чиқишда. | ||||||||||||||||
|
10. |
Давлат хизмати кўрсатиш тўғрисидаги аризани кўриб чиқиш якунлари бўйича бериладиган ҳужжатлар номи |
Аризани кўриб чиқиш якунлари бўйича аризачига қуйидагилар берилади: а) ижобий ҳал этилганда: 1) _______________________________________________________; 2) _______________________________________________________; n) _______________________________________________________.
б) давлат хизмати кўрсатиш рад этилганда: 1) асосланган тарзда рад этиш; 2) _______________________________________________________; n) _______________________________________________________. | ||||||||||||||||
|
11. |
Давлат хизмати регламенти |
Давлат хизмати кўрсатишни тартибга солувчи норматив-ҳуқуқий ҳужжатлар рўйхати:
| ||||||||||||||||
|
12. |
Ваколатли органнинг ҳаракатлари (ҳаракатсизлиги) тўғрисида аризачининг мурожаатларини (таклифларини), шикоятларини кўриб чиқиш ҳуқуқига эга бўлган юқори ёки бошқа органнинг номи |
Аризачининг мурожаатларини кўриб чиқиш ҳуқуқига эга бўлган юқори ёки бошқа орган:
| ||||||||||||||||
|
Қўшимча ахборот* | ||||||||||||||||||
|
13. |
Кўрсатилган давлат хизматлари сони тўғрисидаги маълумотлар** |
Охирги ҳисобот йилида давлат хизмати кўрсатиш тўғрисида тушган аризалар сони: _____ та. Охирги ҳисобот йилида тушган аризалардан қониқтирилганларининг сони: _____ та. | ||||||||||||||||
|
14. |
Ваколатли органнинг давлат хизматлари кўрсатиш тўғрисидаги аризаларни қабул қилиш учун масъул бўлган ходимлари тўғрисидаги маълумотлар |
| ||||||||||||||||
Изоҳ:
* Давлат хизмати паспортини келишишда унга илова тарзида алоҳида тақдим этилади ва ваколатли органнинг расмий сайтида, интерактив давлат хизматларининг Ягона порталида, шунингдек «ягона дарча» марказларининг ахборотлар стендида жойлаштирилмайди.
** Давлат хизмати паспортини келишиш билан бир вақтда тақдим этилади.
(Ўзбекистон Республикаси қонун ҳужжатлари тўплами, 2015 й., 50-сон, 626-модда; 2016 й., 43-сон, 501-модда; 2017 й., 18-сон, 325-модда)
