|
Ҳужжат кучини йўқотган 19.06.2020
|
Ўзбекистон Республикаси Вазирлар Маҳкамасининг
қарори
Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгашини ташкил этиш тўғрисида
LexUZ шарҳиМазкур қарор Ўзбекистон Республикаси Вазирлар Маҳкамасининг 2020 йил 19 июндаги 391-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида» 2020 йил 18 февралдаги ПФ-5938-сон Фармони)»ги қарорига асосан ўз кучини йўқотган.
«Фуқароларнинг ўзини ўзи бошқариш органлари тўғрисида»ги Ўзбекистон Республикаси Қонунининг 20-моддасига мувофиқ ҳамда мамлакатимизда фуқаролик жамиятини ривожлантириш, маҳаллаларда маънавий муҳит барқарорлигини, миллатлараро дўстлик ва ҳамжиҳатликни мустаҳкамлаш, ёшларни она Ватанга ва миллий истиқлол ғоясига садоқат руҳида тарбиялаш, аҳолини ижтимоий қўллаб-қувватлаш борасидаги ишларнинг самарадорлигини янада оширишга кўмаклашиш мақсадида Вазирлар Маҳкамаси қарор қилади:
1. Ўзбекистон «Маҳалла» хайрия жамоат фонди, Ўзбекистон фахрийларини ижтимоий қўллаб-қувватлаш «Нуроний» жамғармаси, Ўзбекистон Хотин-қизлар қўмитаси, Ўзбекистон «Камолот» ёшлар ижтимоий ҳаракати ва бошқа нодавлат нотижорат ташкилотлари, кўп сонли маҳалла фаолларининг Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгашини 1-иловага мувофиқ таркибда ташкил этиш тўғрисидаги таклифлари маъқуллансин.
2. Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгашининг асосий вазифалари этиб қуйидагилар белгилансин:
фуқароларнинг ўзини ўзи бошқариш органлари фаолиятини қўллаб-қувватлаш, уларга қонун ҳужжатларида белгиланган ваколатларининг амалга оширилишига кўмаклашиш;
фуқароларнинг ўзини ўзи бошқариш органлари фаолиятини таҳлил қилиш, уларнинг фаолиятини такомиллаштириш юзасидан аниқ асосланган таклифлар ҳамда таъсирчан механизмлар ишлаб чиқиш, фуқаролар йиғинларининг илғор тажрибаларини оммалаштириш, улар томонидан ишлаб чиқилган истиқболли ғоялар ва лойиҳаларни амалга оширишда кўмаклашиш;
фуқаролар ижтимоий фаоллигини оширишда маҳалла институтининг аҳамияти ва ролини кучайтиришга қаратилган чора-тадбирларни белгилаш;
фуқароларнинг ўзини ўзи бошқариш органлари ходимларининг малакасини ошириш, уларда замонавий бошқарув кўникмаларини шакллантиришга кўмаклашиш.
3. Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши тўғрисидаги низом 2-иловага мувофиқ тасдиқлансин.
4. Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши бир ой муддатда Қорақалпоғистон Республикаси, вилоятлар ва Тошкент шаҳри ҳамда туманлар ва шаҳарлар Фуқароларнинг ўзини ўзи бошқариш органлари фаолиятини мувофиқлаштириш бўйича ҳудудий кенгашлари тўғрисидаги намунавий низомларни ишлаб чиқсин ва тасдиқлаш учун Вазирлар Маҳкамасига киритсин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А. И. Икрамов зиммасига юклансин.
Ўзбекистон Республикасининг Бош вазири Ш. МИРЗИЁЕВ
Тошкент ш.,
2013 йил 30 сентябрь,
267-сон
Вазирлар Маҳкамасининг 2013 йил 30 сентябрдаги 267-сонли қарорига
1-ИЛОВА
1-ИЛОВА
Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши
ТАРКИБИ
|
— |
Ўзбекистон Республикаси Бош вазирининг ўринбосари, Республика кенгаши раиси | |
|
Ж. Иноғомов |
— |
«Маҳалла» хайрия жамоат фонди республика бошқаруви раиси, Республика кенгаши раиси ўринбосари |
|
Д. Аллаев |
— |
«Маҳалла» хайрия жамоат фонди республика бошқаруви раисининг биринчи ўринбосари, Республика кенгаши масъул котиби |
|
А. Саидов |
— |
Ўзбекистон Республикаси Олий Мажлиси Қонунчилик палатасининг Демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси раиси (келишув асосида) |
|
Б. Матмуратов |
— |
Ўзбекистон Республикаси Олий Мажлиси Сенатининг Қонунчилик ва суд-ҳуқуқ масалалари қўмитаси раиси (келишув асосида) |
|
О. Солиев |
— |
Ўзбекистон Республикаси Президенти Девонининг Фуқароларни ўзини ўзи бошқариш органлари билан ишлаш шўъбаси мудири (келишув асосида) |
|
М. Алиев |
— |
Ўзбекистон Республикаси Президенти ҳузуридаги Давлат бошқаруви академияси ректори (келишув асосида) |
|
Ж. Қўчқоров |
— |
Ўзбекистон Республикаси Молия вазирининг ўринбосари |
|
Д. Турдиев |
— |
Ўзбекистон Республикаси Иқтисодиёт вазирининг ўринбосари |
|
Ё. Турсунов |
— |
Ўзбекистон Республикаси Ички ишлар вазирининг ўринбосари |
|
М. Салиев |
— |
Ўзбекистон Республикаси Мудофаа вазирининг ўринбосари |
|
Б. Низамов |
— |
Ўзбекистон Республикаси Меҳнат вазирининг ўринбосари |
|
У. Салимов |
— |
Ўзбекистон Республикаси Олий ва ўрта махсус таълим вазирининг биринчи ўринбосари, Ўрта махсус, касб-ҳунар таълими маркази директори |
|
Д. Кенжаев |
— |
Ўзбекистон Республикаси Халқ таълими вазирининг ўринбосари |
|
Л. Туйчиев |
— |
Ўзбекистон Республикаси Соғлиқни сақлаш вазирининг ўринбосари |
|
М. Ходжиматов |
— |
Ўзбекистон Республикаси Маданият вазирининг биринчи ўринбосари |
|
(лавозимига кўра) |
— |
Ўзбекистон Республикаси Қишлоқ хўжалиги вазирининг ўринбосари |
|
А. Усманов |
— |
Ўзбекистон Республикаси Адлия вазирининг ўринбосари |
|
О. Юсупов |
— |
Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита раиси |
|
Р. Аминов |
— |
Ўзбекистон Республикасининг Хусусийлаштириш, монополиядан чиқариш ва рақобатни ривожлантириш давлат қўмитаси раисининг ўринбосари |
|
Р. Файзиев |
— |
Ўзбекистон Республикаси Табиатни муҳофаза қилиш давлат қўмитаси раисининг ўринбосари |
|
(лавозимига кўра) |
— |
«Ўзкоммунхизмат» агентлиги бош директорининг ўринбосари |
|
И. Джураев |
— |
Ахборот технологиялари ва коммуникацияларини ривожлантириш вазирининг ўринбосари |
|
А. Ходжаев |
— |
Ўзбекистон миллий телерадиокомпанияси раиси |
|
М. Ҳазратқулов |
— |
Ўзбекистон Миллий ахборот агентлигининг Бош директори |
|
А. Абдуллаев |
— |
Ўзбекистон Республикаси Халқ банки бошқаруви раиси |
|
Ғ. Абдукаримов |
— |
Фуқаролик жамияти шаклланишини мониторинг қилиш мустақил институти директори ўринбосари |
|
О. Парпибоева |
— |
Ўзбекистон Хотин-қизлар қўмитаси раисининг ўринбосари |
|
Т. Нарбаева |
— |
Ўзбекистон Касаба уюшмалари Федерацияси Кенгаши раиси |
|
Б. Юсупов |
— |
Ўзбекистон фермер, деҳқон хўжаликлари ва томорқа ер эгалари кенгаши раиси |
|
Қ. Қуранбаев |
— |
Ўзбекистон ёшлар иттифоқи Марказий Кенгаши раиси |
|
Ш. Усмонов |
— |
Ўзбекистон фахрийларининг ижтимоий фаолиятини қўллаб-қувватлаш «Нуроний» жамғармаси раиси |
|
А. Шайхов |
— |
Ўзбекистон Савдо-саноат палатаси раиси |
|
Р. Ниязов |
— |
Ўзбекистон Республикаси мудофаасига кўмаклашувчи «Ватанпарвар» ташкилоти раиси |
|
— |
Республика Маънавият ва маърифат маркази раҳбари | |
|
Т. Ахмедов |
— |
Вазирлар Маҳкамаси ҳузуридаги Ижтимоий тадқиқотлар институти директори |
|
Р. Убайдуллаева |
— |
«Ижтимоий фикр» жамоатчилик маркази директори |
|
Н. Мухаммадиев |
— |
Ўзбекистон Республикаси Байналмилал маданият маркази директори |
|
Ҳ. Мамадалиева |
— |
«Оила» илмий-амалий маркази директори |
(1-илова Ўзбекистон Республикаси Вазирлар Маҳкамасининг 2018 йил 7 декабрдаги 995-сонли қарори таҳририда — Қонун ҳужжатлари маълумотлари миллий базаси, 10.12.2018 й., 09/18/995/2287-сон)
Вазирлар Маҳкамасининг 2013 йил 30 сентябрдаги 267-сонли қарорига
2-ИЛОВА
2-ИЛОВА
Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши тўғрисида
НИЗОМ
I. Умумий қоидалар
1. Ушбу Низом «Фуқароларнинг ўзини ўзи бошқариш органлари тўғрисида»ги Ўзбекистон Республикаси Қонунининг 20-моддасига мувофиқ, Фуқароларнинг ўзини ўзи бошқариш органлари фаолиятини мувофиқлаштириш бўйича республика кенгаши (кейинги ўринларда Кенгаш деб аталади) фаолиятини тартибга солади.
Кенгаш фуқароларнинг ўзини ўзи бошқариш органлари фаолиятининг ташкилий асосларини янада такомиллаштириш, қонун ҳужжатларида белгиланган ваколатларининг амалга оширилишига кўмаклашиш, улар фаолиятидаги муаммоларни комплекс ўрганиш ва тизимли ҳал қилиш юзасидан аниқ асосланган таклифлар ҳамда таъсирчан механизмлар ишлаб чиқиш мақсадида ташкил этилган коллегиал орган ҳисобланади.
2. Кенгаш ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Олий Мажлиси палаталари қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорларига, ушбу Низомга ҳамда бошқа қонун ҳужжатларига амал қилади.
3. Кенгаш ўз фаолиятида қонунийлик, ошкоралик, тенг ҳуқуқлилик ва коллегиаллик тамойилларига амал қилади.
4. Қорақалпоғистон Республикаси, вилоятлар ва Тошкент шаҳри, туманлар ва шаҳарларда Фуқароларнинг ўзини ўзи бошқариш органлари фаолиятини мувофиқлаштириш бўйича ҳудудий кенгашлар (кейинги ўринларда Ҳудудий кенгашлар деб аталади) фаолият кўрсатади.
Ҳудудий кенгашларнинг асосий вазифалари, ҳуқуқлари, уларнинг фаолиятини ташкил этиш тартиби ҳамда ҳудудий кенгашларнинг ўзаро ҳамкорлиги Фуқароларнинг ўзини ўзи бошқариш органлари фаолиятини мувофиқлаштириш бўйича Қорақалпоғистон Республикаси, вилоятлар ва Тошкент шаҳри ҳамда туман ва шаҳарлар кенгашлари тўғрисидаги намунавий низомларда белгиланади.
II. Кенгашнинг асосий вазифалари ва ҳуқуқлари
5. Кенгашнинг асосий вазифалари қуйидагилардан иборат:
фуқароларнинг ўзини ўзи бошқариш органлари фаолиятини қўллаб-қувватлаш, уларга қонун ҳужжатларида белгиланган ваколатларнинг амалга оширилишига кўмаклашиш;
фуқароларнинг ўзини ўзи бошқариш органлари фаолиятини таҳлил қилиш, уларнинг фаолиятини такомиллаштириш юзасидан аниқ асосланган таклифлар ҳамда таъсирчан механизмлар ишлаб чиқиш, фуқароларнинг ўзини ўзи бошқариш органлари илғор тажрибаларини оммалаштириш, улар томонидан ишлаб чиқилган истиқболли ғоялар ва лойиҳаларни амалга оширишда кўмаклашиш;
фуқаролар ижтимоий фаоллигини оширишда маҳалла институтининг аҳамияти ва ролини кучайтиришга қаратилган чора-тадбирларни белгилаш;
фуқароларнинг ўзини ўзи бошқариш органлари ходимларининг малакасини ошириш, уларда замонавий бошқарув кўникмаларини шакллантиришга кўмаклашиш.
6. Кенгаш ўзига юкланган вазифаларни бажариш учун қуйидаги функцияларни амалга оширади:
фуқароларнинг ўзини ўзи бошқариш органлари фаолиятига оид норматив-ҳуқуқий ҳужжатлар ижро этилиши мониторингини олиб боради ва уларни янада такомиллаштириш юзасидан таклифлар тайёрлайди;
фуқароларнинг ўзини ўзи бошқариш органлари фаолиятининг асосий йўналишлари бўйича комиссиялар фаолиятини такомиллаштиришга доир таклифлар тайёрлайди;
фуқаролар йиғинлари раислари (оқсоқоллари) ва уларнинг маслаҳатчилари энг муносиб фуқаролар орасидан сайланишини таъминлаш чора-тадбирларининг амалга оширилишига кўмаклашади, услубий тавсиялар ишлаб чиқади;
фуқароларнинг ўзини ўзи бошқариш органларининг ўзаро муносабатларини ривожлантиришга оид тавсиялар ишлаб чиқади;
фуқаролар йиғини раиси (оқсоқоли), унинг ўринбосарлари (фуқаролар йиғини раисининг кексалар ва фахрийлар ишлари ҳамда ёшлар масалалари бўйича маслаҳатчилари), масъул котиб, диний маърифат ва маънавий-ахлоқий тарбия масалалари бўйича маслаҳатчи фаолиятини рағбатлантиришга доир таклифлар тайёрлайди ва уларнинг ишларини мувофиқлаштиради;
(6-банднинг олтинчи хатбошиси Ўзбекистон Республикаси Вазирлар Маҳкамасининг 2019 йил 22 апрелдаги 346-сонли қарори таҳририда — Қонун ҳужжатлари маълумотлари миллий базаси, 23.04.2019 й., 09/19/346/2994-сон)
фуқароларнинг ўзини ўзи бошқариш органлари фаолияти учун зарур бўлган ўқув-услубий адабиётлар, қўлланмаларнинг мазмун-моҳияти, уларни нашр этиш ҳамда тиражларини белгилаш бўйича тавсиялар тайёрлайди;
фуқароларнинг ўзини ўзи бошқариш органлари фаолиятининг ташкилий асосларини янада такомиллаштириш, уларнинг вазифалари кўламини кенгайтириш, фуқароларнинг ўзини ўзи бошқариш органлари билан давлат органлари, фуқаролик жамиятининг бошқа институтлари, хусусий уй-жой мулкдорлари ширкатлари ва бошқа ташкилотлар ўртасидаги ижтимоий шериклик муносабатларини ривожлантириш юзасидан таклифлар ишлаб чиқади ҳамда амалга оширилишига кўмаклашади;
фуқароларнинг ўзини ўзи бошқариш органлари моддий-техника базасини мустаҳкамлаш бўйича таклифлар тайёрлайди ва бу борада аниқ чора-тадбирларнинг амалга оширилишини таъминлайди;
маҳаллани аниқ йўналтирилган асосда аҳолини ижтимоий қўллаб-қувватлаш, хусусий тадбиркорлик ва оилавий бизнесни ривожлантириш марказига айлантиришга кўмаклашади;
ҳудудда кексалар ва ногиронларнинг ижтимоий, шу жумладан пенсия ва тиббий таъминоти сифатини яхшилаш масалаларида фуқароларнинг ўзини ўзи бошқариш органлари томонидан жамоатчилик назоратини ўрнатиш ҳамда уларнинг роли ва таъсирини кенгайтиришга доир таклифлар ишлаб чиқади ва амалга оширилишига кўмаклашади;
(6-банд Ўзбекистон Республикаси Вазирлар Маҳкамасининг 2015 йил 9 июлдаги 185-сонли қарорига асосан ўн биринчи хатбоши билан тўлдирилган — ЎР ҚҲТ, 2015 й., 27-сон, 357-модда)
«Кучли давлатдан кучли фуқаролик жамияти сари» тамойилини жойларда изчиллик билан татбиқ этиш, фуқароларнинг фаоллигини, жамиятда амалга оширилаётган ислоҳотларга дахлдорлик ҳиссини ошириш, фуқароларнинг ўзини ўзи бошқариш органлари томонидан жамоатчилик назоратини олиб бориш тизимидаги вазифалар кўламини янада кенгайтириш бўйича тавсиялар ишлаб чиқади;
маҳаллаларда тарихан таркиб топган миллий ва маънавий қадриятларни эъзозлаш ва изчил тарғиб қилиш, халқимизнинг энг яхши удум ва анъаналарини асраш ва оммалаштириш чора-тадбирларини амалга оширади;
оммавий ахборот воситалари билан ўзаро ҳамкорлик қилади, маҳалла институтининг фаолиятини ёритишга доир тадбирларнинг амалга оширилишига кўмаклашади;
фуқаролар ижтимоий фаоллигини кучайтиришда маҳалланинг роли ва таъсирини ошириш, фуқароларнинг ўзини ўзи бошқариш органлари фаолларининг ташаббусларини қўллаб-қувватлаш ишларини ташкил этади, шунингдек уларнинг билим ва малакасини ҳамда ҳуқуқий маданиятини ошириш, замонавий бошқарув кўникмаларини шакллантиришга оид чора-тадбирларга кўмаклашади;
баркамол авлодни тарбиялашда «Оила — маҳалла — таълим муассасаси» ҳамкорлик механизмини кучайтиришга доир таклифлар тайёрлайди;
маҳалла институтининг долзарб масалалари бўйича халқаро ва республика конференциялари ҳамда семинарларини ташкил этишда ва ўтказишда мувофиқлаштиришни амалга оширади.
7. Кенгаш ўзига юкланган вазифалар ва функцияларни бажаришда қуйидаги ҳуқуқларга эга:
фуқароларнинг ўзини ўзи бошқариш органлари фаолиятини мувофиқлаштиришга йўналтирилган қарорлар қабул қилиш ва уларнинг ижросини назорат қилиш;
фуқаролар йиғинларининг раислари, раис ўринбосарлари (фуқаролар йиғини раисининг кексалар ва фахрийлар ишлари ҳамда ёшлар масалалари бўйича маслаҳатчилари), масъул котиблари, диний маърифат ва маънавий-ахлоқий тарбия масалалари бўйича маслаҳатчилари малакасини ошириш юзасидан таклифлар киритиш;
(7-банднинг учинчи хатбошиси Ўзбекистон Республикаси Вазирлар Маҳкамасининг 2019 йил 22 апрелдаги 346-сонли қарори таҳририда — Қонун ҳужжатлари маълумотлари миллий базаси, 23.04.2019 й., 09/19/346/2994-сон)
фуқароларнинг ўзини ўзи бошқариш органлари манфаатларини кўзлаб судга даъво қилиш, шунингдек, давлат ва хўжалик бошқаруви органлари, маҳаллий давлат ҳокимияти органларининг қарорлари, уларнинг мансабдор шахслари ҳаракатлари (ҳаракатсизлиги) устидан фуқароларнинг ўзини ўзи бошқариш органлари манфаатларини кўзлаб судга шикоят қилиш;
(7-банд Ўзбекистон Республикаси Вазирлар Маҳкамасининг 2018 йил 22 февралдаги 134-сонли қарорига асосан тўртинчи хатбоши билан тўлдирилган — Қонун ҳужжатлари маълумотлари миллий базаси, 22.02.2018 й., 09/18/134/0809-сон)
давлат органлари, нодавлат нотижорат ташкилотлардан ва бошқа ташкилотлардан, мансабдор шахслардан кенгаш ваколатига тааллуқли зарур маълумот ва материалларни сўраш ва олиш;
фуқароларнинг ўзини ўзи бошқариш органлари фаолиятига тааллуқли масалалар бўйича давлат органлари, нодавлат нотижорат ташкилотлари ва бошқа ташкилотларнинг ахборотларини эшитиш;
фуқароларнинг ўзини ўзи бошқариш органлари фаолиятини такомиллаштириш бўйича таклиф ва тавсияларни тайёрлаш учун ишчи комиссиялар ва эксперт гуруҳлар ташкил этиш, шунингдек олимлар ва амалиётчи-мутахассисларни ушбу комиссиялар ва гуруҳлар ишига жалб этиш;
фуқароларнинг ўзини ўзи бошқариш органлари фаолиятини такомиллаштириш бўйича Ҳудудий кенгашларнинг таклиф ва тавсияларини Кенгаш мажлисларида муҳокама қилиш;
фуқароларнинг ўзини ўзи бошқариш органлари фаолиятига доир услубий қўлланмаларни тасдиқлаш;
фуқароларнинг ўзини ўзи бошқариш органлари раислари ва фаоллари учун ўқув семинарлари ва давра суҳбатлари ташкил этиш.
Кенгаш қонун ҳужжатларига мувофиқ бошқа ҳуқуқларга ҳам эга бўлиши мумкин.
III. Кенгаш фаолиятини ташкил этиш
8. Кенгаш унинг раиси, раис ўринбосари, масъул котиби ва аъзоларидан иборат таркибда тузилади.
Кенгаш таркиби Ўзбекистон Республикаси Вазирлар Маҳкамаси томонидан тасдиқланади.
Ўзбекистон «Маҳалла» хайрия жамоат фонди республика бошқаруви Кенгашнинг ишчи органи (кейинги ўринларда Ишчи орган деб аталади) ҳисобланади.
9. Кенгашга Ўзбекистон Республикасининг Бош вазири жамоатчилик асосида раислик қилади ва Кенгашга юкланган вазифаларнинг бажарилиши учун масъулдир
(9-банднинг биринчи хатбошиси Ўзбекистон Республикаси Вазирлар Маҳкамасининг 2018 йил 22 февралдаги 134-сонли қарори таҳририда — Қонун ҳужжатлари маълумотлари миллий базаси, 22.02.2018 й., 09/18/134/0809-сон)
Кенгаш раисининг ваколатига қуйидагилар киради:
Кенгаш мажлислари кун тартибини белгилаш ва мажлисларни чақириш;
Кенгаш томонидан қабул қилинган қарорларнинг бажарилиши юзасидан назорат ташкил этиш;
Кенгаш аъзоларининг Кенгашга юкланган вазифаларнинг бажарилиши бўйича ишларини мувофиқлаштириш;
Кенгаш ишчи органи фаолиятини назорат қилиш;
Кенгашнинг самарали ишлашини таъминлашга доир бошқа ишларни бажариш.
10. Кенгаш аъзолари:
фуқароларнинг ўзини ўзи бошқариш органларининг бошқа ташкилотлар билан ҳамкорликдаги фаолияти самарали йўлга қўйилишига кўмаклашадилар;
фуқароларнинг ўзини ўзи бошқариш органлари фаолиятига тааллуқли масалалар юзасидан Кенгашга таклифлар киритадилар;
Кенгаш мажлисларида кўриб чиқиладиган масалаларни муҳокама қилишда ва ҳал этишда қатнашадилар;
Кенгаш муҳокамасига киритилган масалалар бўйича ёзма хулосалар ва оғзаки тушунтиришлар берадилар;
Кенгаш мажлисларида қабул қилинган қарорлар ижросини ўз ваколатлари доирасида таъминлайдилар.
11. Ушбу Низомда белгиланган вазифалар ижросини таъминлаш мақсадида Кенгаш ҳар йили ўз иш режасини тасдиқлайди, шунингдек раис ўринбосари, масъул котиб ва Кенгашнинг бошқа аъзолари вазифаларини белгилайди.
12. Кенгаш фаолияти билан боғлиқ ёзишмаларни юритишда хатлар Кенгаш раиси ёки унинг ўринбосари томонидан имзоланади.
Кенгаш ўз бланкасига эга бўлади.
13. Кенгаш ўз фаолиятини доимий асосда, ўз иш режасига мувофиқ амалга оширади ва мажлисларини заруриятга кўра, лекин ҳар чоракда камида бир марта ўтказади.
Кенгаш раиси қарори билан, Кенгаш раисининг ўринбосари ёки Кенгаш аъзолари ярмидан кўпининг ташаббусига кўра навбатдан ташқари мажлис ўтказилиши мумкин. Кенгашнинг навбатдан ташқари мажлисини ўтказиш тўғрисидаги таклиф зарур ҳужжатлар билан биргаликда ишчи органга юборилади.
14. Кенгаш мажлисини унинг раиси бошқаради. Кенгаш раиси бўлмаган тақдирда мажлисни унинг ўринбосари бошқаради.
Кенгаш мажлиси аъзоларининг камида учдан икки қисми ҳозир бўлганда ваколатли ҳисобланади.
Кенгаш қарорлари мажлисда қатнашганларнинг кўпчилик овози билан қабул қилинади. Овозлар тенг бўлган тақдирда Кенгаш раисининг овози ҳал қилувчи ҳисобланади. Кенгашнинг ҳар бир аъзоси қабул қилинаётган қарорлар бўйича ўз фикр-мулоҳазасини ёзма равишда баён қилиш ҳуқуқига эга.
Мажлисни ўтқазиш учун кворум бўлмаганда, Кенгашнинг янги мажлиси ўтказиладиган сана эълон қилинади. Янги мажлисни ўтказишда кун тартибини ўзгартиришга йўл қўйилмайди.
15. Кенгаш раисининг рухсати билан мажлисда унинг узрли сабабларга кўра қатнашмаётган аъзолари ўрнига уларнинг вакиллари овоз бериш ҳуқуқисиз қатнашиши мумкин.
16. Кенгаш мажлисига унда кўриб чиқилаётган масалаларнинг моҳиятига кўра давлат органлари, нодавлат нотижорат ташкилотлари ва бошқа ташкилотлар раҳбарлари, мутахассислар, Фуқароларнинг ўзини ўзи бошқариш органлари фаолиятини мувофиқлаштириш бўйича туман ва шаҳарлар кенгашлари ҳамда фуқаролар йиғинлари вакиллари таклиф этилиши мумкин.
17. Кенгаш қарорлари баённома билан расмийлаштирилади, уни раис ёки унинг ўринбосари, шунингдек масъул котиб имзолайди.
18. Кенгаш қарорлари Кенгашнинг барча аъзоларига ва манфаатдор шахсларга етказилади.
Кенгашнинг ўз ваколатлари доирасида қабул қилган қарорлари тегишли давлат органлари ва ташкилотлар томонидан бажарилиши мажбурийдир.
19. Ишчи орган:
Кенгаш мажлисларига тайёргарликни ва ташкилий-техник жиҳатдан таъминлаш ишларини амалга оширади;
Кенгаш фаолияти учун зарур барча ҳужжатларни (таҳлилий маълумотлар, жадваллар ва ҳ. к.) шакллантиради ва қарорлар лойиҳалари бўйича келишувни амалга оширади;
фаолият йўналишларига тааллуқли материалларни тўплайди, таҳлил қилади, қарорлар ва чора-тадбирлар режалари лойиҳаларини тайёрлайди;
фуқароларнинг ўзини ўзи бошқариш органлари фаолиятини мувофиқлаштириш ишларини таҳлил қилади ва умумлаштиради, мувофиқлаштириш натижалари бўйича ҳисобот ва ахборот материалларини тайёрлайди;
Ҳудудий кенгашлар ишчи органларининг фаолиятини мувофиқлаштиради.
Ишчи орган Кенгаш қарорига мувофиқ бошқа ваколатларни ҳам амалга ошириши мумкин.
20. Кенгаш қарорларининг бажарилиши натижалари ҳақида Ишчи орган ҳар чоракда Кенгашга тегишли зарур материалларни илова қилган ҳолда таҳлилий маълумотларни тақдим этади.
21. Ишчи орган раҳбари тайёрланган материаллар ва мажлис кун тартиби бўйича Кенгаш раисига ахборот беради, раис томонидан маъқулланган тақдирда, кенгаш мажлиси бўлиб ўтадиган кун ва вақтни, шунингдек таклиф этиладиган шахсларни белгилайди.
22. Кенгаш масъул котиби Кенгаш мажлиси материалларини баён лойиҳаси билан биргаликда мажлисни ўтказиш санасидан камида беш кун олдин Кенгашнинг ҳар бир аъзосига, зарур ҳолларда мажлисга таклиф этилган бошқа шахсларга тақдим этилишини таъминлайди.
Мажлис кун тартиби ўзгарган тақдирда, Кенгаш масъул котиби Кенгашнинг ҳар бир аъзосини ҳамда мажлисга таклиф этилган шахсларни мажлис бошланишидан олдин уч кундан кечикмай бундай ўзгаришлар тўғрисида хабардор қилади.
23. Ишчи орган Кенгаш ишига тайёргарлик кўриш мақсадида унинг ваколатлари доирасида зарур материалларни давлат органлари ва ташкилотлардан сўраш ҳамда олиш ҳуқуқига эга.
24. Кенгаш Ҳудудий кенгашлар билан ўзаро ҳамкорлик қилади ҳамда Ҳудудий кенгашлар фаолиятига ташкилий ҳамда услубий жиҳатдан раҳбарликни амалга оширади.
Ҳудудий кенгашлар фаолиятини қўллаб-қувватлаш, уларга қонун ҳужжатларида белгиланган ваколатларнинг амалга оширилишига кўмаклашиш, Ҳудудий кенгашлар фаолиятини мувофиқлаштириб бориш ва уни мониторинг қилиш Кенгаш томонидан амалга оширилади.
Қорақалпоғистон Республикаси, вилоятлар ва Тошкент шаҳри Ҳудудий кенгашлари йилнинг ҳар чорагида фуқароларнинг ўзини ўзи бошқариш органлари фаолиятини мувофиқлаштириш борасида амалга оширилган ишлар тўғрисида Кенгашга ҳисобот берадилар.
25. Қорақалпоғистон Республикаси, вилоятлар ва Тошкент шаҳри Ҳудудий кенгашларининг таркиби ҳамда уларнинг низомлари Ўзбекистон Республикаси Вазирлар Маҳкамаси томонидан тасдиқланган Фуқароларнинг ўзини ўзи бошқариш органлари фаолиятини мувофиқлаштириш бўйича ҳудудий кенгашлари тўғрисидаги намунавий низомлар асосида Кенгаш томонидан тасдиқланади.
IV. Якунловчи қоида
26. Ушбу Низом талаблари бузилишида айбдор бўлган шахслар қонун ҳужжатларига мувофиқ жавоб берадилар.
(Ўзбекистон Республикаси қонун ҳужжатлари тўплами, 2013 й., 40-сон, 527-модда; 2015 й., 26-сон, 338-модда, 27-сон, 357-модда; 2016 й., 42-сон, 489-модда; 2017 й., 8-сон, 120-модда, 19-сон, 345-модда, 37-сон, 996-модда, 38-сон, 1040-модда; Қонун ҳужжатлари маълумотлари миллий базаси, 27.12.2017 й., 09/17/1021/0465-сон, 22.02.2018 й., 09/18/134/0809-сон, 10.12.2018 й., 09/18/995/2287-сон, 23.04.2019 й., 09/19/346/2994-сон)
