Кичик бизнес ва хусусий тадбиркорлик субъектларини молиялаш ва кредитлаш тизимини янада такомиллаштириш ҳамда соддалаштириш, кредит ресурсларини шакллантириш манбаларидан оқилона фойдаланишни таъминлаш мақсадида:

1. Ўзбекистон Республикаси Давлат мулки қўмитаси, Иқтисодиёт вазирлиги, Молия вазирлиги, «Хусусий тадбиркорлик ва кичик бизнесни қўллаб-қувватлаш фонди» (Бизнес-фонд) акциядорлик жамияти ва «Тадбиркор» акциядорлик-тижорат банки муассисларининг қуйидаги таклифи қабул қилинсин:

Бизнес-фондни қонунчиликда белгиланган тартибда тугатиш;

Бизнес-фонднинг 2004 йил 1 январдаги ҳолатига кўра кредит ресурслари қолдиқларини «Тадбиркор» АТБга топшириш.

2. Белгилансинки, Бизнес-фонд томонидан «Тадбиркорбанк» АТБ негизида ташкил этилган «Микрокредитбанк» АТБга топширилган маблағлар кичик ва хусусий тадбиркорлик объектларига қуйидаги мақсадлар учун кредит ресурслар тарзида ажратилади:

ишлаб чиқариш фаолияти билан шуғулланувчи кичик корхоналар ва янги ташкил этилган кичик бизнес субъектларининг дастлабки (бошланғич) капиталини шакллантириш;

«Микрокредитбанк» АТБ ҳамда лизинг компаниялар ўртасида тузилган бош битимларга мувофиқ кичик ва хусусий тадбиркорлик субъектлари учун техника ва ускуналар лизинги;

«Микрокредитбанк» АТБ мазкур кредит ресурсларини тижорат банклари ва лизинг компанияларига муддатли, тўловли ва сўзсиз қайтариш шарти билан берсин.

3. Белгилаб қўйилсинки, 2004 йилнинг 1 январидан бошлаб илгари Бизнес-фонд ресурсларини шакллантиришга ажратилган маблағлар:

давлат тасарруфидан чиқариш ва хусусийлаштиришдан тушган маблағлар — 1991 йилга қадар кўрилган кўп хонали турар жой биноларини капитал таъмирлашни, шунингдек умумтаълим мактаблари ҳамда мактабгача тарбия болалар муассасаларини капитал таъмирлаш ва жиҳозлашни молиялаш мақсадида Қорақалпоғистон Республикаси бюджети ва маҳаллий бюджетларга ўтказилади;

Иш билан таъминлашга кўмаклашиш давлат жамғармасидан — янги иш жойларини яратиш лойиҳаларини амалга ошириш учун тижорат банклари воситасида кичик тадбиркорлик субъектларини кредитлаш орқали Иш билан таъминлашга кўмаклашиш давлат жамғармаси дастурларини молиялашга йўналтирилади.

4. Ўзбекистон Республикаси Президентининг «Хусусий тадбиркорлик ва кичик бизнесни қўллаб-қувватлаш фонди (Бизнес-фонд)ни ташкил этиш ҳақида» 1995 йил 26 июлдаги ПФ-1208-сон Фармони ўз кучини йўқотган деб ҳисоблансин.

5. Ўзбекистон Республикаси Адлия вазирлиги тегишли вазирликлар ва идоралар билан биргаликда бир ой муддатда қонунчиликка ушбу Фармондан келиб чиқадиган ўзгартириш ва қўшимчалар киритиш тўғрисидаги таклифларни Вазирлар Маҳкамасига тақдим этсин.

6. Ўзбекистон Республикаси Вазирлар Маҳкамаси бир ҳафта муддатда мазкур Фармон ижроси юзасидан қарор қабул қилсин.