Вазирлар Маҳкамасининг «Чигит экиш учун агротехника тадбирларини ўтказиш чора-тадбирлари ва 2004 йилда пахта етиштиришнинг прогноз ҳажмлари тўғрисида» 2003 йил 30 декабрдаги 578-сон қарорини бажариш ҳамда чигитнинг тез пишар ва юқори ҳосилли, тола сифати бўйича халқаро стандартлар ва талабларга жавоб берадиган селекция навларини республика минтақаларининг тупроқ-иқлим шароитларини ҳисобга олган ҳолда оқилона жойлаштириш, пахта етиштирувчи хўжаликларни 2004 йил ҳосили учун кондицияли чигитлар ва полиэтилен плёнкалар билан таъминлаш юзасидан Вазирлар Маҳкамаси қарор қилади:

1. Ўзбекистон Республикаси Қишлоқ ва сув хўжалиги вазирлиги Пахтачиликни ривожлантириш кенгашининг Қорақалпоғистон Республикаси Вазирлар Кенгаши, вилоятлар ҳокимликлари, Ўзбекистон Республикаси Ташқи иқтисодий алоқалар агентлиги, Ўзбекистон қишлоқ хўжалиги илмий-ишлаб чиқариш маркази билан келишилган:

2004 йил пахта ҳосили етиштириш ҳажмининг маъқулланган назорат кўрсаткичларидан келиб чиқиб чигитнинг районлаштирилган ва истиқболли навларини 1-иловага мувофиқ жойлаштириш;

2-иловага мувофиқ чигитни плёнка остига экиш ва хўжаликларни полиэтилен плёнкалар билан таъминлаш;

2004 йил учун чигитнинг асосий селекция навларини 3-иловага мувофиқ истиқболлилиги ва иқтисодий рағбатлантирилиши бўйича гуруҳларга ажратиш ҳақидаги таклифлари қабул қилинсин.

2. «Ўзпахтасаноат» уюшмаси, Ўзбекистон Республикаси Қишлоқ ва сув хўжалиги вазирлиги:

2004 йил 10 февралгача уруғлик пахтани тозалашни, 25 февралгача эса уруғлик чигитни эҳтиёт захирасини ҳисобга олган ҳолда тайёрлашни тугалласинлар, шунингдек уруғчилик корпорациялари ва компанияларини туксизлантирилган чигитлар билан 4-иловага мувофиқ ҳажмларда таъминласинлар;

хўжаликларга юқори сифатли уруғлик чигитнинг фақат дориланган, қопларга жойланган ва сертификатлар мавжуд бўлган ҳолда, селекция навларини жойлаштиришнинг тасдиқланган тартибига қатъий мувофиқ равишда берилишини таъминласинлар;

2004 йил 20 февралгача уруғлик чигитни 5-иловага мувофиқ ҳажмларда вилоятлараро ташишни тугалласинлар.

3. Ўзбекистон Республикаси Қишлоқ ва сув хўжалиги вазирлиги, «Ўзпахтасаноат» уюшмаси, Қорақалпоғистон Республикаси Вазирлар Кенгаши, вилоятлар ҳокимликлари:

чигит навларини жойлаштиришнинг тасдиқланган тартибига риоя қилиниши устидан назоратни таъминласинлар, тавсия этилган чигит навининг туманда иккитадан ортиқ, хўжаликларда эса биттадан ортиқ нави экилишига йўл қўймасинлар;

уруғлик чигит экиш учун ширкат ва фермер хўжаликлари рўйхатини бир ой муддатда танлов асосида қайта кўриб чиқсинлар.

Белгилаб қўйилсинки, чигитнинг янги навларини синаш фақат илмий-тадқиқот институтларининг экспериментал базаларида, базавий хўжаликларда, чигит навлари олдиндан кўпайтириладиган хўжаликларда ва давлат нав синаш участкаларида ўтказилади.

4. «Ўзбекнефтгаз» компанияси полиэтилен плёнка ишлаб чиқарадиган корхоналарни ва «Ўзкимёсаноат» компаниясини хомашё (гранулалар) билан таъминласин. Андижон, Фарғона, Наманган вилоятлари ҳокимликлари ҳамда «Ўзкимёсаноат» компанияси полиэтилен плёнкалар ишлаб чиқаришни ва уларнинг пахта етиштирувчи хўжаликларга зарур миқдорда етказиб берилишини ташкил этсинлар.

Қуйидагилар:

Шўртан газ-кимё комплекси — хомашё (гранулалар)нинг жами ҳажмини полиэтилен плёнка ишлаб чиқарувчи заводларга 2004 йилда чигит экиш учун сотишда;

«Жиззах пластмасса» акциядорлик жамияти, «Андижон полиэтилени» қўшма корхонаси, «Шанхай-Наманган индустрия ЛТД» масъулияти чекланган жамияти ва «Бешариқ плёнка» корхонаси — тайёр полиэтилен плёнкаларни пахта етиштирувчи хўжаликларга 2004 йил ҳосили учун 2-иловага мувофиқ сотишда қўшилган қиймат солиғи тўлашдан истисно тариқасида озод қилинсин.

6. Мазкур қарорнинг бажарилишини назорат қилиш Ўзбекистон Республикасининг Бош вазири Ш.М. Мирзиёев ва Ўзбекистон Республикаси Президентининг Давлат маслаҳатчиси И.Ҳ. Жўрабеков зиммасига юклансин.