Ўзбекистон Республикаси Президентининг «Тошкент шаҳрида Турин политехника университети фаолиятини ташкил этиш тўғрисида» 2009 йил 27 апрелдаги ПҚ–1106-сон қарорини бажариш юзасидан ҳамда Тошкент шаҳридаги Турин политехника университетининг (кейинги ўринларда Университет деб аталади) моддий-техника базасини яратиш мақсадида Вазирлар Маҳкамаси қарор қилади:

1. Ўзбекистон Республикаси Давлат мулки қўмитаси:

бир ой муддатда «Ўзавтосаноат» АК ҳисобига Тошкент шаҳар, Ниёзов кўчаси (Кичик ҳалқа йўли), 17-уй манзилида жойлашган бинолар комплексининг туташ ҳудуд билан биргаликда баҳоланишини таъминласин ҳамда уни давлатнинг «Ўзавтосаноат» АК устав фондидаги улуши сифатида, кейинчалик Университетга бериш учун «Ўзавтосаноат» АК балансига ўтказсин;

«Ўзавтосаноат» АК билан биргаликда «Ўзавтосаноат» АКнинг устав фонди белгиланган тартибда кўпайтирилишини таъминласин.

2. Тошкент шаҳар ҳокимлиги бир ой муддатда Тошкент шаҳар Собир Раҳимов ва Шайҳонтоҳур туманларининг фуқаролик ишлари бўйича туманлараро судини қайта жойлаштиришни таъминласин.

3. Қуйидагилар:

«Ўзавтосаноат» АК — Университетга берилаётган бинолар комплексини лойиҳалаштириш ва реконструкция қилиш бўйича буюртмачи этиб белгилансин, кейинчалик буюртмачи функциялари ташкил этилаётган Университетга берилсин;

«Тошгипрогор» ОАЖ — бош лойиҳалаш ташкилоти этиб;

«Ўзнефтгазқурилишинвест» АК — бош пудрат ташкилоти этиб белгилансин.

Буюртмачига, истисно тариқасида, Университетга берилаётган бинолар комплексини реконструкция қилишни 2009 йил 1 августгача бўлган муддатда лойиҳа-смета ҳужжатларини ишлаб чиқиш билан бир пайтда амалга оширишга рухсат берилсин.

4. Ўзбекистон Республикаси «Давархитектқурилиш» қўмитаси Университетга берилаётган бинолар комплексини реконструкция қилиш бўйича лойиҳа-смета ҳужжатларининг белгиланган тартибда давлат экспертизасидан ўтказилишини таъминласин ҳамда реконструкция қилиш ишларининг сифатли бажарилиши юзасидан давлат архитектура-қурилиш назоратини ўрнатсин.

5. Тошкент шаҳрида Турин политехника университетини ташкил этиш бўйича Ташкилий комиссия (Р.С. Азимов):

Университетга берилаётган бинолар комплексини 2009/2010 ўқув йили бошлангунгача сифатли реконструкция қилиш ишларини;

Университетнинг унга берилаётган бинолар комплексида, уни зарур мебеллар, жиҳозлар, замонавий ўқув ва лаборатория асбоб-ускуналари, компьютер техникаси ва бошқа ташкилий техника, кутубхона фонди билан жиҳозлаган ҳолда жойлаштирилишини таъминласин.

7. Ўзбекистон Республикаси Олий ва ўрта махсус таълим вазирлиги:

икки ой муддатда Турин политехника университети (Италия Республикаси), «Ўзавтосаноат» АК, бошқа манфаатдор ташкилотлар билан биргаликда Тошкент шаҳридаги Турин политехника университетининг таъсис ҳужжатлари ишлаб чиқилишини ва келишилишини ҳамда унинг белгиланган тартибда давлат рўйхатидан ўтказилишини таъминласин;

2009/2010 ўқув йили бошлангунгача Турин политехника университети (Италия Республикаси) билан келишган ҳолда ўқув режалари ва дастурлари тайёрланишини таъминласин;

ҳар йили 30 мартгача, Ўзбекистон Республикаси Иқтисодиёт вазирлиги билан келишган ҳолда Ўзбекистон Республикаси Вазирлар Маҳкамасига келгуси ўқув йилига таълим йўналишлари (мутахассисликлар) бўйича талабалар қабул қилиш сони тўғрисида белгиланган тартибда таклифлар киритсин;

икки ой муддатда Турин политехника университети (Италия Республикаси) билан Университетнинг ташкилий тузилмасини келишиб олсин ҳамда Ўзбекистон Республикаси Вазирлар Маҳкамасига тегишли Ҳукумат қарори лойиҳасини киритсин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг биринчи ўринбосари Р.С. Азимов, Ўзбекистон Республикаси Бош вазирининг ўринбосарлари Р.С. Қосимов ва У.У. Розуқулов зиммасига юклансин.