Ушбу Шартноманинг 6-моддасига мувофиқ қамоқда сақланаётган ёки озодликдан маҳрум этилиб, жазо ўтаётган шахсларни вақтинча гувоҳлик бериш учун бошқа Томонга бериш вақтида, уларни ташиш билан боғлиқ харажатлар, шунингдек, ушбу Шартноманинг 12-моддаси 2-бандида назарда тутилган харажатлар сўраётган Аҳдлашувчи Томон тарафидан қопланади.

8-модда
Ҳуқуқий масалалар бўйича ахборот

Аҳдлашувчи Томонларнинг марказий органлари илтимосга биноан бир-бирларига ўз давлатларида амалдаги ёки амалда бўлган қонунчилик ҳамда унинг қўллаш тажрибаси тўғрисидаги маълумотларни, шунингдек, ҳуқуқий масалалари бўйича бошқа ахборотларни тақдим этадилар.

II-Бўлим. Ҳуқуқий ёрдам кўрсатиш тартиби

9-модда
Ҳуқуқий ёрдам кўрсатиш тўғрисидаги илтимоснома ва уни бажариш тартиби

Ушбу Шартномада назарда тутилган жиноий ишлар бўйича ҳуқуқий ёрдам ёзма илтимосномаларга мувофиқ амалга оширилади. Бундай илтимосномаларни Аҳдлашувчи Томонларнинг марказий органлари бир-бирларига бевосита ёки дипломатик каналлар орқали жўнатишлари мумкин.

Ушбу моддада назарда тутилган ёрдам кўрсатиш тўғрисидаги илтимоснома сўралаётган Аҳдлашувчи Томон қонунчилигига мос равишда ва илтимосномада кўрсатилган тартибда бажарилади, агар улар ушбу Аҳдлашувчи Томон қонунчилигига зид бўлмасалар.

Зарур ҳолларда, марказий органлар илтимоснинг бажарилишини енгиллаштирадиган қўшимча маълумотларни талаб қилишга ҳақлидирлар. Агар илтимосноманинг бажарилиши сўралаётган Аҳдлашувчи Томон тарафидан амалга оширилаётган жиноий иш терговига ёки бошқа ҳаракатларга халақит қиладиган бўлса, унинг бажарилиши кечиктирилиши ёки маълум шартлар билан боғланиши мумкин. Илтимоснинг бажарилишини кечиктириш муддатлари ва шартлари сўраётган Аҳдлашувчи Томон билан келишиб олинади.

Марказий органлар ҳуқуқий ёрдам кўрсатиш тўғрисидаги илтимосноманинг ўз вақтида ва тўлиқ бажарилиши учун барча зарур чораларни кўрадилар. Агар ушбу Шартноманинг 3-моддасига биноан ҳуқуқий ёрдам кўрсатишнинг имкони бўлмаса, сўралаётган марказий орган ҳуқуқий ёрдам кўрсатиш тўғрисидаги илтимосномани ва унга илова қилинган ҳужжатларни сўраётган марказий органга қайтариб беради.

10-модда
Ҳуқуқий ёрдам кўрсатиш тўғрисидаги илтимосноманинг мазмуни

Ҳуқуқий ёрдам кўрсатиш тўғрисидаги илтимоснома қуйидагиларни ўз ичига олиши лозим:

1) сўраётган томон марказий органининг номи ва сўралаётган томон марказий органининг номи;

2) ҳуқуқий ёрдам сўралаётган ишнинг номи, илтимосноманинг мақсадини баёни ва сўралаётган ҳуқуқий ёрдамнинг баёни тавсифи;

3) ишнинг моҳияти тўғрисида имконият даражасида тўлиқ маълумотлар, шу жумладан, тергов объекти бўлмиш жиноятнинг содир этилган вақти, жойи ва ҳолатлари, содир этилган хатти-ҳаракатнинг баҳоланиши, шунингдек, агар ушбу хатти-ҳаракати оқибатида етказилган зарарнинг миқдори тўғрисидаги маълумотлар;

4) жабрланувчи, гувоҳ, гумонланувчи, айбланувчи, судланувчи ёки жазога ҳукм этилганнинг исм ва фамилиялари, уларнинг туғилган санаси ва жойи, фуқаролиги ва мутахассислиги, яшаш ёки туриш жойлари, юридик шахсларнинг номланиши, юридик адреси ёки бўлиш жойи тўғрисидаги маълумотлар;

5) 4-бандда кўрсатилган шахсларнинг вакиллари мавжуд бўлса, уларнинг исм, фамилия ва манзиллари;

6) сўраётган Аҳдлашувчи Томоннинг тегишли қонунлари ҳамда бошқа ҳуқуқий ҳужжатларининг матнлари ёки баёни;

7) бажарилиши талаб этилаётган аниқ ҳаракатлар ёки тартибни қўллаш сабаблари ва баёни, агар зарур бўлса;

8) амалга оширилиши сўралаётган ҳаракатлар ёки айнан шундай натижаларга олиб келувчи бошқа ҳар қандай чоралар сўраётган Аҳдлашувчи Томон ҳудудида унинг қонунчилигига мувофиқ кўрилиши ҳам мумкинлиги тўғрисида баёнот;

9) зарур бўлган ҳолларда, илтимосноманинг қайси муддатда бажарилиши кутилаётганлигини кўрсатиш.

Зарур бўлган ҳолларда илтимосномага суд, прокуратура ва тергов органлари томонидан чиқарилган расмий ҳужжатларнинг тасдиқланган нусхалари, шунингдек илтимосноманинг бажарилишини енгиллаштирадиган бошқа ҳужжатлар ёки уларнинг тасдиқланган нусхалари ёхуд улардан олинган кўчирмалар илова қилинади.

Илтимоснома сўраётган марказий органнинг тегишли мансабдор шахси томонидан имзоланган ва расмий муҳр билан тасдиқланган бўлиши лозим.

11-модда
Ҳуқуқий ёрдам кўрсатишда ваколатли органлар вакилларининг иштироки

Сўраётган Аҳдлашувчи Томоннинг ваколатли органлари вакиллари сўралаётган Аҳдлашувчи Томоннинг розилиги билан жиноий ишлар бўйича ҳуқуқий ёрдам кўрсатиш тўғрисидаги илтимосноманинг бажарилишида иштирок этишлари мумкин.

12-модда
Жабрланувчилар ёки уларнинг вакилларини, фуқаровий даъвогарлар ва фуқаровий жавобгарларни, гувоҳлар ва экспертларни чақириш

Зарур бўлганда Аҳдлашувчи Томонлардан бирининг ҳудудида амалга ошириладиган дастлабки терговда ёки ишнинг судда кўрилаётганда қатнашиш учун бошқа Аҳдлашувчи Томон ҳудудидаги жабрланувчилар ёки уларнинг қонуний вакиллари, фуқаровий даъвогарлар, фуқаровий жавобгарлар, гувоҳлар ва экспертлар чақиртирилиши мумкин.

Сўраётган Аҳдлашувчи Томон жабрланувчи ёки унинг қонуний вакили, фуқаровий даъвогар, фуқаровий жавобгар, гувоҳ ва экспертга келиб-кетишлари ҳамда сўраётган Аҳдлашувчи Томон ҳудудида бўлганликлари билан боғлиқ харажатлар ҳамда чалғиган кунлари учун олинмаган иш ҳақини қоплайди. Эксперт экспертиза ўтказганлиги учун ҳам ҳақ олиш ҳуқуқига эгадир. Чақирув қоғозида чақирилган шахслар қандай тўловларни олишга ҳақли эканлиги кўрсатилиши лозим. Бундай шахсларнинг илтимосига кўра сўраётган Аҳдлашувчи Томоннинг марказий органи уларга тегишли харажатларни қоплаш учун аванс тўлайди. Аванс тўланиши сўраётган Аҳдлашувчи Томоннинг дипломатик ваколатхонаси орқали амалга оширилиши мумкин.

Жабрланувчини ёки унинг қонуний вакилини, фуқаровий даъвогарни, фуқаровий жавобгарни, гувоҳни ва экспертни чақириш тўғрисидаги ҳужжатда келмаганлиги учун мажбурлов чоралари қўллаш ҳақида таҳдид бўлиши мумкин эмас.

13-модда
Иммунитет

Ушбу Шартноманинг 12-моддасига мувофиқ чақирилган жабрланувчи ёки унинг қонуний вакили, фуқаровий даъвогар, фуқаровий жавобгар, гувоҳ ва эксперт, унинг фуқаролигидан қатъи назар, сўраётган Аҳдлашувчи Томон ҳудудида унинг давлат чегарасидан ўтгунгача содир этилган қандайдир хатти-ҳаракати муносабати билан жиноий ёки маъмурий жавобгарликка тортилиши, қамоққа олиниши ёки жазоланиши мумкин эмас. Ушбу шахслар ўзларининг кўриб чиқилаётган иш бўйича кўрсатмалари ёки экспертлар сифатидаги хулосалари муносабати билан ҳам жиноий ёки маъмурий жавобгарликка тортилиши, қамоққа олиниши ёки жазоланиши мумкин эмас.

Ушбу модданинг биринчи қисмида кўрсатилган шахслар, агар улар сўраётган Аҳдлашувчи Томон ҳудудидан, бунинг учун имкониятга эга бўлишса-да, уларга бундан буён уларнинг бу ерда бўлишларига зарурат йўқлигини хабар қилган кундан бошлаб ўн беш кун ўтгунгача кетишмаса, ушбу банд билан назарда тутилган кафолатларни йўқотадилар. Ушбу шахслар сўраётган Аҳдлашувчи Томон ҳудудидан ўзига алоқадор бўлмаган айб билан жўнаб кета олмаган вақт ушбу муддат ҳисобига кирмайди.

14-модда
Ҳужжатларни топшириш тартиби

Чақирув қоғозлар ва бошқа ҳужжатлар сўралаётган Аҳдлашувчи Томон илтимосига ва унинг ҳудудида амалда бўлган қоидаларга мувофиқ топширилади, агар топширилаётган ҳужжатлар ушбу Шартноманинг 6-моддасига мувофиқ тасдиқланган таржима билан илова қилинган бўлса. Акс ҳолда, олувчи уларни ихтиёрий равишда қабул қилишга рози бўлса, ҳужжатлар олувчига берилади.

Ҳужжатларнинг ёзма таржимаси тўғрилигини тасдиқлаш Аҳдлашувчи Томон қонунчилиги ва ушбу Шартнома қоидаларига мувофиқ амалга оширилади.

Агар ҳужжатларни илтимосномада кўрсатилган манзил бўйича топшириш мумкин бўлмаса, сўралаётган марказий орган ўз давлати қонунчилигига мувофиқ манзилни аниқлаш учун зарур чора-тадбирлар кўради. Манзилни аниқлашнинг имкони бўлмаган ҳолларда, сўралаётган марказий орган сўраётган марказий органни бу ҳақда хабардор қилади ва топширилиши лозим бўлган ҳужжатларни унга қайтаради.

Ҳужжатларнинг топширилганлигини тасдиқлаш сўралаётган Аҳдлашувчи Томон ҳудудида амалда бўлган қоидаларга мувофиқ расмийлаштирилади. Тасдиқномада топширилган вақти, жойи ва усули, шунингдек, ҳужжатлар топширилган шахс кўрсатилиши лозим. Ҳужжатларни топшириш тасдиқномаси сўраётган марказий органга жўнатилади.

15-модда
Дипломатик ваколатхоналар ва консуллик муассасалари ваколатлари

Аҳдлашувчи Томонлар ўзларининг дипломатик ваколатхоналари ёки консуллик муассасалари орқали бошқа Аҳдлашувчи Томон ҳудудида бўлган ўз фуқароларига ҳужжатларини топшириш ҳуқуқига эга. Бунда мажбурий тусдаги чоралар қўллаш ёки қўллашга таҳдид қилиш мумкин эмас.

III-Бўлим.
Жиноят ишлари бўйича ҳуқуқий ёрдам кўрсатиш тўғрисидаги махсус қоидалар

16-модда
Қамоққа олинган ёки озодликдан маҳрум этиш кўринишидаги жазони ўтаётган шахсларни вақтинча бериб туриш

Зарур ҳолларда Аҳдлашувчи Томонлардан бирининг илтимосига кўра бошқа Аҳдлашувчи Томоннинг ҳудудида қамоққа олинган ёки озодликдан маҳрум этиш кўринишидаги жазони ўтаётган шахсни, унинг фуқаролигидан қатъи назар, унинг розилиги билан жиноий иши бўйича гувоҳлик бериши учун сўраётган Аҳдлашувчи Томонга, уни қамоқда сақлаш ва белгиланган муддатда қайтариш шарти билан, вақтинча бериб турилиши мумкин.

Шахсни вақтинча бериб туриш сўралаётган Аҳдлашувчи Томон тарафидан ушбу шахсга нисбатан амалга оширилаётган тергов ҳаракатларига ёки унинг озодликдан маҳрум этиш кўринишидаги жазо муддатини ўташига зарар етказмасдан Аҳдлашувчи Томонлар ўзаро келишиб оладиган муддатда амалга оширилиши лозим.

Ушбу модданинг биринчи қисмига мувофиқ вақтинча бериб туриладиган шахсга нисбатан ушбу Шартноманинг 13-моддасида назарда тутилган кафолатлар татбиқ этилади.

Муҳим асослар мавжуд бўлган тақдирда вақтинча беришни рад этиш мумкин.

17-модда
Тинтув ва олиб қўйиш

Ушбу Шартноманинг 18-моддасида назарда тутилган шартларга амал қилган ҳолда, Сўралаётган Аҳдлашувчи Томон ўз қонунчилигига мувофиқ сўраётган Аҳдлашувчи Томоннинг жиноий иши бўйича далил сифатида фойдаланиш учун тинтув ўтказиш, предметлар ва ҳужжатларни олиб қўйиш ва бериш тўғрисидаги илтимосномасини бажаради.

18-модда
Мулкни бериш

Тегишли илтимоснома мавжуд бўлганда, ҳуқуқий ёрдам сўралган жиноят оқибатида ўғирланган ҳамда сўралаётган Аҳдлашувчи Томон ҳудудида топилган барча мулк сўраётган Аҳдлашувчи Томонга берилади. Мулкни беришнинг аниқ шартларини Аҳдлашувчи Томонлар белгилайдилар. Бунда топширилаётган мулк солиқлар, божхона божлари, йиғимлар ва бошқа тўловлардан озод қилинади. Мулкни бериш ушбу мулкка алоқадор бўлган учинчи томонларнинг ҳуқуқларига тўлиқ риоя қилинадиган тартибда амалга оширилади.

Агар кўрсатиб ўтилган мулк сўралаётган Аҳдлашувчи Томонга жиноий иши бўйича далил сифатида зарур бўлса, унинг топширилиши иш юритуви тугагунига қадар кечиктирилиши мумкин.

Агар сўраётган Аҳдлашувчи Томон ҳудудида ушбу мулк хатга олиниши ёки мусодара қилиниши лозим бўлса, сўралаётган Аҳдлашувчи Томон уни беришни рад қилиши ёки вақтинчалик бериб туриши мумкин.

Агар сўралаётган Аҳдлашувчи Томон қонунчилиги ёки учинчи томон ҳуқуқларини ҳимоя қилиш манфаатлари тақозо этса, шундай йўл билан берилган ҳар қандай мулк суд муҳокамалари тугаши билан сўров сўралаётган Аҳдлашувчи Томонга, агар буни ушбу Аҳдлашувчи Томон талаб қилса, қайтарилиши лозим.

19-модда
Назорат қилинадиган етказиб бериш

Зарур ҳолларда Аҳдлашувчи Томонлар ўз миллий қонунчилигига мувофиқ юргизилиши махсус қоидалар билан тартибга солинадиган предметлар, воситалар ва моддаларни назорат қилинадиган етказиб бериш усулидан фойдаланишда, ушбу предметлар, воситалар ва моддаларнинг ноқонуний юргизилишида иштирок этадиган шахсларни аниқлаш ва уларни жиноий жавобгарликка тортиш мақсадида бир-бирларига ёрдам кўрсатади.

20-модда
Иккала Аҳдлашувчи Томон судларига тааллуқли ишларни кўриб чиқиш тартиби

Аҳдлашувчи Томонлар судларига тааллуқли бўлган, бир қанча жиноятларни содир этишда айбланаётган шахс ёки бир гуруҳ шахсларга нисбатан бўлган жиноий ишни кўриб чиқишга, ҳудудида дастлабки тергов ҳаракатлари ниҳоясига етган Аҳдлашувчи Томоннинг суди ваколатлидир. Бундай ҳолларда жиноий иш ушбу Аҳдлашувчи Томоннинг судда ишни кўриб чиқиш қоидаларига биноан кўриб чиқилади.

21-модда
Махфийликни сақлаш

Тегишли илтимоснома мавжуд бўлганида:

1) сўралаётган Аҳдлашувчи Томон ҳуқуқий ёрдам кўрсатиш тўғрисидаги илтимосномани, илтимоснома ва унга илова қилинаётган ҳужжатлар мазмунини, шунингдек, бундай ёрдам кўрсатиш ҳолатларини махфийликда сақлаш учун зарур чораларини кўради. Агар ушбу илтимосномани махфийликни сақлай олмасдан қондиришнинг иложи бўлмаса, сўралаётган Аҳдлашувчи Томон бу ҳақда сўраётган Аҳдлашувчи Томонни хабардор қилади, у эса ўз навбатида ушбу илтимосни қондиришни сўраш керак ёки йўқлигини ўзи ҳал этади;