Ўзбекистон Республикаси Президентининг 2006 йил 20 декабрдаги «Осиё ўйинлари ғолиб ва совриндорларини тақдирлаш тўғрисида»ги ПФ-3832-сонли Фармонига мувофиқ қарор қиламиз:

1. Осиё ўйинларида қўлга киритилган юксак натижалар учун Ўзбекистон Республикаси спортчиларига пул мукофотларини тўлаш тартиби тўғрисидаги низом тасдиқлансин.

2. Мазкур қарор Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгач кучга киради.

Мазкур Низом Ўзбекистон Республикаси Президентининг 2006 йил 20 декабрдаги «Осиё ўйинлари ғолиб ва совриндорларини тақдирлаш тўғрисида»ги ПФ-3832-сонли Фармонига мувофиқ Осиё ўйинларида олтин, кумуш ва бронза медалини олган Ўзбекистон Республикаси спортчиларига пул мукофотларини тўлаш тартибини белгилайди.

1. Осиё ўйинларида олтин, кумуш ва бронза медал олган Ўзбекистон Республикаси спортчилари қуйидаги миқдорларда бирйўла тўланадиган пул мукофоти билан тақдирланадилар:

олтин медал — 5000 АҚШ доллари;

кумуш медал — 3000 АҚШ доллари;

бронза медал — 2000 АҚШ доллари.

2. Осиё ўйинларида олтин, кумуш ва бронза медал олган Ўзбекистон Республикаси спортчиларига бирйўла тўланадиган пул мукофотларини бериш билан боғлиқ харажатлар давлат бюджетидан амалга оширилади.

3. Кўрсатилган харажатларни молиялаштириш учун зарур бўлган маблағлар Ўзбекистон Республикаси Молия вазирлиги томонидан навбатдаги молиявий йил учун Давлат бюджети харажатларини тасдиқлашда кўзда тутилади.

4. Бюджет маблағларини ажратиш, уларни эркин муомаладаги валютага айирбошлаш ва бирйўла тўланадиган пул мукофотларини тўлаш Ўзбекистон Республикаси Президентининг фармойиши асосида амалга оширилади.

5. Ўзбекистон Республикаси Молия вазирлиги Маданият ва спорт ишлари вазирлигига банклараро савдо сессиясидан валюта маблағлари харид қилиши учун миллий валютада маблағ ўтказади.

Маданият ва спорт ишлари вазирлиги миллий валютада ажратилган маблағни эркин муомаладаги валюта харид қилиш учун ўрнатилган тартибда ваколатли банкка ўтказиб беради.

6. Ваколатли банк банклараро савдо сессиясида валюта маблағларини харид қилади ва Осиё ўйинларида олтин, кумуш ва бронза медал олган Ўзбекистон Республикаси спортчиларининг депозит валюта ҳисобрақамларига мувофиқ равишда ўтказиб беради.

7. Осиё ўйинларида олтин, кумуш ва бронза медалини олган Ўзбекистон Республикаси спортчиларини келгусида тақдирлаш учун ваколатли банк Маданият ва спорт ишлари вазирлигига ўрнатилган тартибда омонат дафтарчаларини тақдим қилади.

8. Ушбу Низом Ўзбекистон Республикаси Ташқи иқтисодий фаолият миллий банки билан келишилган.