Ushbu Qonunning maqsadi avtomatlashtirilgan bank tizimida axborotni muhofaza qilish sohasidagi munosabatlarni tartibga solishdan iborat.

Avtomatlashtirilgan bank tizimida axborotni muhofaza qilish toʻgʻrisidagi qonun hujjatlari ushbu Qonun va boshqa qonun hujjatlaridan iboratdir.

Agar Oʻzbekiston Respublikasining xalqaro shartnomasida Oʻzbekiston Respublikasining avtomatlashtirilgan bank tizimida axborotni muhofaza qilish toʻgʻrisidagi qonun hujjatlarida nazarda tutilganidan boshqacha qoidalar belgilangan boʻlsa, xalqaro shartnoma qoidalari qoʻllaniladi.

Avtomatlashtirilgan bank tizimi bank faoliyati sohasida axborotni toʻplash, saqlash, izlash, unga ishlov berish va undan foydalanishni amalga oshirish uchun moʻljallangan axborot tizimidir.

Avtomatlashtirilgan bank tizimida axborotni muhofaza qilish quyidagi maqsadlarda amalga oshiriladi:

banklarning axborot xavfsizligini taʼminlash va bank sirini muhofaza qilish;

axborotning tarqalib ketishi, oʻgʻirlanishi, yoʻqotilishi, buzib talqin etilishi, toʻsib qoʻyilishi, qalbakilashtirilishi va undan oʻzgacha tarzda ruxsatsiz foydalanilishi, shuningdek nusxa olinishining hamda avtomatlashtirilgan bank tizimiga boshqacha shakldagi aralashuvlarning oldini olish.

Avtomatlashtirilgan bank tizimida axborotning muhofaza qilinishini tashkil etish:

axborotni muhofaza qilish qoidalarini ishlab chiqish hamda ularga rioya etish, shuningdek avtomatlashtirilgan bank tizimida ishlov beriladigan axborotni muhofaza qilishga qaratilgan chora-tadbirlarning bajarilishi ustidan nazorat qilish;

sertifikatlangan texnika vositalari va axborotni muhofaza qilish vositalaridan foydalanish;

avtomatlashtirilgan bank tizimida axborotni muhofaza qilish xizmatini tashkil etish;

avtomatlashtirilgan bank tizimida axborot toʻplashga doir faoliyatni va unga ishlov berish usullaridan foydalanishni muvofiqlashtirish yoʻli bilan amalga oshiriladi.

Avtomatlashtirilgan bank tizimidan foydalanuvchi avtomatlashtirilgan bank tizimida axborot mulkdorining ruxsati bilan axborotdan foydalanadi.

Avtomatlashtirilgan bank tizimida axborotdan axborot mulkdorining ruxsatisiz foydalanishga faqat qonunda nazarda tutilgan hollarda yoʻl qoʻyiladi.

Avtomatlashtirilgan bank tizimi mulkdori yuridik shaxs boʻlishi kerak.

Avtomatlashtirilgan bank tizimi mulkdori axborot mulkdori va avtomatlashtirilgan bank tizimidan foydalanuvchi oʻrtasidagi oʻzaro munosabatlarni muvofiqlashtiradi.

Avtomatlashtirilgan bank tizimi mulkdori axborot mulkdorini va avtomatlashtirilgan bank tizimidan foydalanuvchini avtomatlashtirilgan bank tizimida axborotga ishlov berish usullarining oʻziga xos xususiyatlari toʻgʻrisida xabardor qilishi, axborot mulkdori va avtomatlashtirilgan bank tizimidan foydalanuvchi esa taklif etilgan ishlov berish usullarining qoʻllanilishiga rozi ekanligini va eʼtirozlari yoʻqligini tasdiqlashi shart.

Avtomatlashtirilgan bank tizimi mulkdori Oʻzbekiston Respublikasi Markaziy banki tomonidan belgilangan qoidalarga muvofiq axborotning muhofaza qilinishini taʼminlashi hamda axborot mulkdorini uning axboroti muhofazasi buzilishining barcha hollari toʻgʻrisida xabardor qilishi shart.

Avtomatlashtirilgan bank tizimi mulkdori davlat sirlarini oʻz ichiga olgan yoki maxfiy hisoblangan axborotning muhofaza qilinishini Oʻzbekiston Respublikasi Vazirlar Mahkamasi tomonidan belgilangan tartibda taʼminlashi shart.

Avtomatlashtirilgan bank tizimidagi texnika vositalarini, shuningdek bu tizimning davlat sirlarini oʻz ichiga olgan yoki maxfiy hisoblangan axborotga ishlov beruvchi muhofaza vositalarini (shu jumladan kriptografiya vositalarini) sertifikatlashtirish qonun hujjatlariga muvofiq amalga oshiriladi.

Oʻzbekiston Respublikasi Markaziy bankida va banklarda avtomatlashtirilgan bank tizimida axborotni muhofaza qilish xizmati tashkil etilishi kerak.

Avtomatlashtirilgan bank tizimida axborotni muhofaza qilish xizmati:

axborotning saqlanishini taʼminlash ustidan nazoratni tashkil etadi;

axborotni muhofaza qilish masalalarida uslubiy va amaliy yordam koʻrsatadi;

avtomatlashtirilgan bank tizimida axborotni muhofaza qilish tizimini loyihalash, sinovdan oʻtkazish va qabul qilib olishda ishtirok etadi;

avtomatlashtirilgan bank tizimida axborotdan ruxsatsiz foydalanishga urinishlar boʻlganligi, unga boshqacha shaklda aralashilganligi aniqlanganda hamda tizimning ishlash qoidalari buzilganda mazkur tizimdagi axborotni muhofaza qilish chora-tadbirlarini koʻradi;

axborotni muhofaza qilish chora-tadbirlarining holati va samaradorligini tahlil etadi;

qonun hujjatlariga muvofiq boshqa vakolatlarni amalga oshiradi.

Avtomatlashtirilgan bank tizimida axborotni muhofaza qilish sohasidagi nizolar qonun hujjatlarida belgilangan tartibda hal etiladi.

Avtomatlashtirilgan bank tizimida axborotni muhofaza qilish toʻgʻrisidagi qonun hujjatlarini buzganlikda aybdor shaxslar belgilangan tartibda javobgar boʻladilar.

Ushbu Qonun rasmiy eʼlon qilingan kundan eʼtiboran kuchga kiradi.