toggle_night_mode
OʻZBEKISTON RESPUBLIKASI PREZIDENTINING
FARMONI
Qishloq xoʻjaligi vazirligi huzurida Oʻzbekiston qishloq xoʻjaligi fanlari akademiyasini tashkil etish chora-tadbirlari toʻgʻrisida
[Koʻchirma]
Mamlakatimizda soʻnggi yillarda kuzatilayotgan iqlim oʻzgarishi oqibatlarini yumshatish, ekologik muammolarni bartaraf etish, oʻsib borayotgan aholining oziq-ovqatga va sanoatning xomashyoga boʻlgan talabini qondirish, iqtisodiyotni barqaror rivojlantirish va eksport salohiyatini oshirishda qishloq xoʻjaligi sohasi ilm-fani oʻrnini yuksaltirish hamda innovatsion faoliyatni boshqarish va tartibga solishning yagona tizimini yaratish maqsadida qaror qilaman:
I. Asosiy maqsadlar va ustuvor yoʻnalishlar
1. Quyidagilar respublikada qishloq xoʻjaligi sohasini ilmiy-innovatsion rivojlantirish, fundamental va amaliy tadqiqotlar natijadorligini oshirish, yuqori malakali ilmiy kadrlar tayyorlashning 2030-yilgacha moʻljallangan asosiy maqsadlari etib belgilansin:
(a) qishloq xoʻjaligiga oid patentlangan yangi ilmiy ishlanma va texnologiyalar sonini 3 baravarga;
(b) xalqaro ilmiy nashrlarda chop etilgan maqolalar sonini 2 baravarga;
(v) ilmiy faoliyatga oid davlat dasturlari doirasidagi tanlovlarga taqdim etiladigan loyihalar sonini 2 baravarga;
(g) agromaslahatlar va ilgʻor xorijiy agrotexnologiyalar transferi xizmatlaridan foydalanadigan subyektlar qamrovini 4 baravarga;
(d) xalqaro hamkorlik doirasida amalga oshirilgan ilmiy tadqiqotlar sonini 3 baravarga oshirish.
II. Qishloq xoʻjaligi sohasi ilm-fanida davlat boshqaruvini takomillashtirish
2. Qishloq xoʻjaligi vazirligi, Fanlar akademiyasi hamda Oliy taʼlim, fan va innovatsiyalar vazirligining:
(a) Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi negizida Qishloq xoʻjaligi vazirligi huzurida Oʻzbekiston qishloq xoʻjaligi fanlari akademiyasi (keyingi oʻrinlarda — Akademiya)ni tashkil etish;
(b) 1-ilovaga muvofiq Akademiya tashkiliy tuzilmasiga vazirlik va idoralar tizimidagi ilmiy tashkilotlarni oʻtkazish toʻgʻrisidagi takliflariga rozilik berilsin.
3. Quyidagilar:
(a) Oʻzbekiston qishloq xoʻjaligi fanlari akademiyasining asosiy faoliyat yoʻnalishlari 2-ilovaga muvofiq;
(b) Oʻzbekiston qishloq xoʻjaligi fanlari akademiyasining tashkiliy tuzilmasi 3-ilovaga muvofiq;
(v) Oʻzbekiston qishloq xoʻjaligi fanlari akademiyasi faoliyatini tashkil etish boʻyicha chora-tadbirlar dasturi 4-ilovaga muvofiq tasdiqlansin.
4. Belgilab qoʻyilsinki:
(a) Akademiya qishloq xoʻjaligi sohasida fundamental va amaliy tadqiqotlar yoʻnalishlari, uzoq va yaqin muddatli dasturlarni belgilovchi hamda muvofiqlashtiruvchi, agrosanoat majmuini ilmiy jihatdan rivojlantirishni amalga oshiruvchi davlat ilmiy muassasasi hisoblanadi;
(b) qishloq xoʻjaligi, yer munosabatlari bilan bogʻliq islohotlarni amalga oshirish boʻyicha ishlab chiqiladigan normativ-huquqiy hujjatlar loyihalari Qishloq xoʻjaligi vazirligi bilan kelishish jarayonida majburiy tartibda Akademiyada ilmiy ekspertizadan oʻtkaziladi;
(v) Akademiya Qishloq xoʻjaligida bilim va innovatsiyalar milliy markazining huquq va majburiyatlari boʻyicha huquqiy vorisi hisoblanadi;
(g) Akademiyaga qishloq xoʻjaligi vaziri taqdimnomasiga asosan Vazirlar Mahkamasi tomonidan besh yil muddatga tayinlanadigan rais rahbarlik qiladi hamda u uch nafar oʻrinbosarga ega boʻladi;
(d) Akademiya boshqaruv apparati xodimlarining cheklangan umumiy soni 60 ta etib belgilanadi, shundan qoʻshimcha 19 ta shtat birligi Qishloq xoʻjaligida bilim va innovatsiyalar milliy markazi tizimidagi ilmiy tashkilotlar shtatlarining maqbullashtirilgan qismi hisobiga ajratiladi;
(j) Respublika agroxizmatlar markazi va uning hududiy boʻlinmalariga Akademiyada yangi agrotexnologiyalarni, samarador innovatsiyalar va ilm-fan yutuqlarini joriy etish vazifalari yuklatiladi;
(z) Akademiya qishloq xoʻjaligida tuproq sifati, uni tiklash va boshqa muammolarni birgalikda hal qilish uchun muayyan innovatsion muhitda mahsulot yetishtiruvchi — tadbirkor — tadqiqotchi hamkorligidagi tashabbuslarga qaratilgan “Living lab” loyihalarini amalga oshiradi;
(i) Akademiya va uning tarkibidagi tashkilotlarda amaldagi moliyalashtirish tartibi, mehnatga haq toʻlash hamda moddiy ragʻbatlantirish shartlari saqlab qolinadi;
(k) Akademiya Toshkent viloyati Yuqori Chirchiq tumani “A. Yassaviy” MFY Sh. Rashidov koʻchasi 1-uy manziliga operativ boshqarish huquqi asosida bepul joylashtiriladi.
5. Shunday tartib oʻrnatilsinki, unga koʻra:
(a) Akademiyada quyidagi unvonlar berish tartibi joriy qilinadi:
(i) yosh akademik — ilmiy sohada samarali faoliyat yuritib kelayotgan, iqtidorli va liderlik qobiliyatiga ega 40 yoshgacha boʻlgan fan doktorlari (DSc) orasidan talabgorlarga tanlov asosida qishloq xoʻjaligi vaziri tomonidan beriladi;
(ii) Akademiya professori — yuqori ilmiy salohiyatga ega, professor unvonini olgan olimlar hamda yosh akademiklar orasidan talabgorlarga tanlov asosida qishloq xoʻjaligi vaziri tomonidan beriladi;
(iii) Akademiyaning muxbir aʼzosi — muayyan darajadagi ilmiy-amaliy yechimga ega ishlanmalar yaratgan, qishloq xoʻjaligi sohasini rivojlantirishga hissa qoʻshgan olimlar (fan doktorlari, professorlar) hamda Akademiya professorlari orasidan tanlov asosida Akademiya umumiy yigʻilishida saylanadi hamda Oʻzbekiston Respublikasi Prezidenti tomonidan tasdiqlanadi;
(iv) Akademiyaning haqiqiy aʼzosi (akademik) — xalqaro darajadagi ilmiy ishlari bilan tanilgan, oʻzining ilmiy maktabini yaratgan, qishloq xoʻjaligi sohasini rivojlantirishga salmoqli hissa qoʻshgan olimlar (fan doktorlari, professorlar) va Akademiya muxbir aʼzolaridan Akademiya umumiy yigʻilishida saylanadi hamda Oʻzbekiston Respublikasi Prezidenti tomonidan tasdiqlanadi;
(v) Akademiyaning xorijiy aʼzolari — jahon ilm-fanida yuqori natijalarga erishgan, xalqaro hamkorlik va qishloq xoʻjaligini rivojlantirishga salmoqli hissa qoʻshgan xorijiy fuqarolar orasidan Akademiya umumiy yigʻilishida saylanadi hamda (yoki) Oʻzbekiston Respublikasi Prezidenti tomonidan tasdiqlanadi;
(b) 2026-yilda saylovni oʻtkazish uchun Akademiyaga 3 nafar haqiqiy (akademik) va 5 nafar muxbir aʼzolar uchun boʻsh oʻrin (kvota) ajratiladi;
(v) Akademiya haqiqiy (akademik) va muxbir aʼzoligiga qishloq xoʻjaligi sohasida erishgan ulkan yutuqlari, yaratilgan ishlanmalari, yangi innovatsion texnologiyalari ishlab chiqarishda keng miqyosda tatbiq etilgan hamda yuqori iqtisodiy va ijtimoiy samara bergan, shuningdek, ularni ommalashtirish boʻyicha xorijiy tajribalarda oʻzini oqlagan “spin-off” kabi uslubiyotlar orqali xizmatlarni yoʻlga qoʻygan nomzodlar tanlab olinadi;
(g) Akademiya haqiqiy (akademik) va muxbir aʼzoligiga nomzodlarni tanlov asosida saralash Qishloq xoʻjaligi vazirligi tomonidan Vazirlar Mahkamasi bilan kelishgan holda koʻpi bilan ikki yilda bir marotaba oʻtkaziladi;
(d) Akademiyada haqiqiy aʼzolardan tashqari Akademiyaning faxriy professori unvoni joriy etiladi.
6. Belgilansinki:
(a) Akademiyaning quyidagi aʼzolariga gonorar toʻlanadi:
(i) haqiqiy aʼzolariga (akademikka) — Fanlar akademiyasining haqiqiy aʼzolariga (akademikka) tenglashtirilgan miqdorda;
(ii) muxbir aʼzolariga — mehnatga haq toʻlashning eng kam miqdorining 2,81 baravari miqdorda;
(b) sobiq Oʻzbekiston qishloq xoʻjaligi fanlari akademiyasining haqiqiy (akademik) va muxbir aʼzolari tegishliligi boʻyicha Akademiyaning haqiqiy (akademik) va muxbir aʼzolari hisoblanadi;
(v) Akademiyaning haqiqiy (akademik) va muxbir aʼzolariga Fanlar akademiyasi haqiqiy aʼzolari uchun belgilangan tibbiy xizmatlar koʻrsatish, salomatligini sanatoriy va kurort-sogʻlomlashtirish muassasalarida mustahkamlash tartibi qoʻllanadi;
(g) Akademiyaning haqiqiy (akademik) va muxbir aʼzolarining gonorar va sogʻlomlashtirish xarajatlarini moliyalashtirish 2026-yilda Qishloq xoʻjaligi vazirligiga ajratilgan respublika budjeti mablagʻlari hisobidan amalga oshiriladi, 2027-yildan boshlab esa Davlat budjeti parametrlarida nazarda tutiladi.
III. Ilmiy-tadqiqot muassasalari moddiy-texnika bazasini mustahkamlash
7. Qishloq xoʻjaligida bilim va innovatsiyalar milliy markazi huzuridagi Qishloq xoʻjaligida bilim va innovatsiyalarni qoʻllab-quvvatlash jamgʻarmasi Akademiya huzuridagi Qishloq xoʻjaligida ilm-fan va innovatsiyalarni rivojlantirishni qoʻllab-quvvatlash jamgʻarmasi etib (keyingi oʻrinlarda — Jamgʻarma) qayta nomlansin.
8. Jamgʻarmaning qoʻshimcha moliyalashtirish manbalari etib quyidagilar belgilansin:
(a) Qishloq xoʻjaligi vazirligining asoslangan hisob-kitoblariga asosan respublika budjetidan har yili ajratiladigan 50 milliard soʻmgacha mablagʻlar;
(b) Qishloq xoʻjaligi vazirligining budjetdan tashqari mablagʻlari hisobidan ilmiy loyihalarni moliyalashtirish uchun ajratiladigan mablagʻlari.
9. Qishloq xoʻjaligida ilm-fan va innovatsiyalarni rivojlantirishni qoʻllab-quvvatlash jamgʻarmasi mablagʻlari yoʻnaltiriladigan asosiy xarajatlar yoʻnalishlari 5-ilovaga muvofiq tasdiqlansin.
10. Quyidagilar:
(a) Oʻzbekiston Respublikasi Prezidentining 2023-yil 7-iyuldagi PQ-216-son qaroriga muvofiq Qishloq xoʻjaligi fundamental tadqiqotlar markazi (Centre of Excellence) (keyingi oʻrinlarda — Markaz) tashkil etilgani maʼlumot uchun qabul qilinsin;
(b) belgilansinki, Markaz:
(i) Toshkent viloyati Yuqori Chirchiq tumani Surankent mavzesi “Ahmad Yassaviy” MFY hududidagi Qishloq xoʻjaligida bilim va innovatsiyalar milliy markaziga qarashli 9,2 gektar yer maydonida barpo etiladigan bino va inshootlarda joylashtiriladi;
(ii) oʻz binosi qurilgunga qadar vaqtinchalik Akademiya binosida joylashtiriladi.
11. Qishloq xoʻjaligida fundamental tadqiqotlar markazi (Centre of Excellence) binosining qurilishi ishlarini jadallashtirish va oʻz vaqtida yakunlash boʻyicha ishchi guruh tashkil etilsin va uning tarkibi 6-ilovaga muvofiq tasdiqlansin.
12. Quyidagilar Markazning asosiy vazifalari etib belgilansin:
(a) qishloq xoʻjaligi sohasidagi muammolarga ilmiy yechim topishda asosiy qonuniyatlar haqidagi yangi bilimlarni olishga, ular oʻrtasidagi oʻzaro bogʻliqliklarni oʻrganishga qaratilgan nazariy va tajriba-sinov oʻtkazishga qaratilgan fundamental tadqiqotlarni amalga oshirish;
(b) qishloq xoʻjaligida global iqlim oʻzgarishining salbiy taʼsiri va shoʻrlanish kabi muammolarning fundamental asoslarini tadqiq etish;
(v) jahon ilm-fani yutuqlari va ilgʻor texnologiyalarni qoʻllash orqali qishloq xoʻjaligi ekinlarining yuqori hosildor, issiqqa va qurgʻoqchilikka chidamli, genetik jihatdan yaxshilangan nav va duragaylarini yaratish;
(g) “ilmga asoslangan, amaliyotga yoʻnaltirilgan (science-based, practice-oriented) taʼlim” tamoyili asosida ilmiy tadqiqotlar oʻtkazish va yuqori malakali ilmiy kadrlar tayyorlash tizimini yoʻlga qoʻyish.
13. Qishloq xoʻjaligi vazirligi va Akademiya qishloq xoʻjaligi sohasida ilgʻor tajribaga ega xalqaro tan olingan ekspertlarni jalb qilgan holda 2026-yil 1-iyunga qadar oʻz tizimidagi ilmiy muassasalar ilmiy xodimlari faoliyatining eng muhim samaradorlik koʻrsatkichlarini (KPI) va ilmiy muassasalar faoliyat samaradorligini baholash tizimini joriy etsin. Bunda:
(a) har uch yilda bir marta tashqi mustaqil ilmiy audit tashkilotini jalb qilgan holda ilmiy-tadqiqot muassasalarida ilm-fan auditini tashkil etsin;
(b) ilm-fan auditi natijalari asosida ilmiy-tadqiqot muassasalarining ilmiy-innovatsion faoliyati natijalari reytingini eʼlon qilib borsin.
IV. Farmon ijrosini tashkil etish, taʼminlash va nazorat
14. Oʻzbekiston Respublikasi Prezidentining ayrim hujjatlariga 7-ilovaga muvofiq oʻzgartirishlar kiritilsin.
15. Qishloq xoʻjaligi vazirligi Adliya vazirligi bilan birgalikda uch oy muddatda qonunchilik hujjatlariga ushbu Farmondan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
16. Ushbu Farmonning ijrosini samarali tashkil qilishga masʼul va shaxsan javobgar etib Bosh vazir oʻrinbosari J.A. Xodjayev hamda qishloq xoʻjaligi vaziri I.Yu. Abdurahmonov belgilansin.
17. Farmon ijrosi uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2026-yil 13-mart,
PF-40-son
Oʻzbekiston Respublikasi Prezidentining 2026-yil 13-martdagi PF-40-son Farmoniga
1-ILOVA
Oʻzbekiston qishloq xoʻjaligi fanlari akademiyasi tashkiliy tuzilmasiga vazirlik va idoralar tizimidan oʻtkaziladigan ilmiy tashkilotlar
ROʻYXATI

T/r

Ilmiy tashkilot nomi

Yuridik manzili

Yuqori turuvchi tashkilot nomi

1.

Tuproqshunoslik va agrokimyo ilmiy-tadqiqot instituti

Toshkent shahar, Olmazor tumani, Qamarniso koʻchasi, 3-uy

Qishloq xoʻjaligi vazirligi

2.

Chorvachilik va parrandachilik ilmiy-tadqiqot instituti

Toshkent viloyati, Qibray tumani, “Shalola” MFY, OʻzCHITI koʻchasi, 22-uy

Veterinariya va chorvachilikni rivojlantirish qoʻmitasi

3.

Baliqchilik ilmiy-tadqiqot instituti

Toshkent viloyati, Yangiyoʻl tumani, Gulbahor qoʻrgʻoni, “Qoʻshyogʻoch” MFY, 2-uy

Veterinariya va chorvachilikni rivojlantirish qoʻmitasi

4.

Qorakoʻlchilik va choʻl ekologiyasi ilmiy-tadqiqot instituti

Samarqand viloyati, Samarqand shahri, Mirzo Ulugʻbek koʻchasi, 47-uy

Veterinariya va chorvachilikni rivojlantirish qoʻmitasi

5.

Buxoro choʻl-yaylov ozuqabop oʻsimliklar urugʻchiligi ilmiy-ishlab chiqarish markazi

Buxoro viloyati, Buxoro shahri, Ibn Sino koʻchasi, 97-uy

Veterinariya va chorvachilikni rivojlantirish qoʻmitasi

Izoh. Boshqa idoralar tizimidan Akademiya tizimiga oʻtkaziladigan ilmiy tashkilotlarning amaldagi moliyalashtirish tartibi va tasdiqlangan shtat birliklari saqlab qolinadi.
Oʻzbekiston Respublikasi Prezidentining 2026-yil 13-martdagi PF-40-son Farmoniga
2-ILOVA
Oʻzbekiston qishloq xoʻjaligi fanlari akademiyasining
ASOSIY FAOLIYAT YOʻNALISHLARI
1. Qishloq xoʻjaligida fundamental, amaliy tadqiqotlar va innovatsion faoliyatning ustuvor yoʻnalishlarini ishlab chiqish hamda amalga oshirish.
2. Qishloq xoʻjaligi ilm-fan sohasini yaqin va uzoq muddatli rivojlantirish strategiya (dastur)larini ishlab chiqish hamda sohadagi yaqin va uzoq muddatli prognozlarni ishlab chiqishda ilmiy tavsiyalar berish.
3. Zamonaviy seleksiya usullarini qoʻllash orqali qishloq xoʻjaligi ekinlarining yuqori hosildor, issiqqa va qurgʻoqchilikka chidamli, genetik jihatdan yaxshilangan nav, duragaylarini yaratish hamda ularni yetishtirishning intensiv texnologiyalarini ishlab chiqish.
4. Qishloq xoʻjaligi sohasida amalga oshirilishi nazarda tutiladigan yirik ishlab chiqarish (shu jumladan, tajriba tariqasidagi) loyihalarini koʻrib chiqish va ilmiy xulosalar va/yoki tavsiyalar ishlab chiqish.
5. Qishloq xoʻjaligi sohasida yuqori unumli va resurstejamkor texnika va texnologiyalarni yaratish va amaliyotga keng joriy qilish hamda sohada boshqaruv jarayonlarini toʻliq raqamlashtirish.
6. Yer resurslaridan samarali foydalanish va iqlim oʻzgarishining salbiy taʼsirini yumshatishga qaratilgan “aqlli qishloq xoʻjaligi” ilm-fanini rivojlantirish va intellektual salohiyatni oshirishning yangi zamonaviy mexanizmlarini tatbiq etish.
7. Iqlim oʻzgarishini baholash, uning qishloq xoʻjaligi va oziq-ovqat xavfsizligiga salbiy oqibatlarini yumshatish boʻyicha taʼsirchan ilmiy-amaliy yondoshuvlarini ishlab chiqish.
8. Oziq-ovqat xavfsizligini taʼminlashda organik va ekologik toza mahsulot yetishtirishning fundamental asoslarini ishlab chiqish.
9. Qishloq xoʻjaligi sohasidagi standartlarni ishlab chiqishda tegishli ilmiy muassasalar bilan birgalikda ilmiy taklif va tavsiyalar ishlab chiqish.
10. Chorva hayvonlari, parranda, baliq va asalarining yangi zotlarini yaratish hamda ularning mahsuldorligini oshirish.
11. Oʻsimliklar oʻsishini boshqarishda biologik va ekologik xavfsiz zamonaviy qarshi kurashish usullarini ishlab chiqish.
12. “Yosh olimdan — akademiklikkacha” tamoyili asosida yuqori malakali ilmiy va ilmiy-pedagog kadrlarni tayyorlash, ularning malakasini oshirish va qayta tayyorlashni tashkil etish.
13. Qishloq xoʻjaligi mahsulotlari yetishtiruvchilarga ilmiy asoslangan axborot-maslahat va zamonaviy xizmatlar koʻrsatish, ishlab chiqarishga ilm-fan yutuqlarini keng joriy qilish.
14. Xorijiy ilmiy markazlarning ilm-fan yutuqlarini oʻrganish va tahlil qilish, qoʻshma loyihalarni amalga oshirish, ulardan qishloq xoʻjaligi sohasida foydalanish borasida tavsiyalar ishlab chiqish.
Oʻzbekiston Respublikasi Prezidentining 2026-yil 13-martdagi PF-40-son Farmoniga
3-ILOVA
Oʻzbekiston qishloq xoʻjaligi fanlari akademiyasining
TASHKILIY TUZILMASI

Umumiy yigʻilish

Direktorlar kengashi

Boshqaruv apparati

Hayʼat

Paxta seleksiyasi, urugʻchiligi va yetishtirish agrotexnologiyalari ilmiy-tadqiqot instituti

Ingichka tolali paxtachilik ilmiy-tadqiqot instituti

Baliqchilik ilmiy-tadqiqot instituti

Toshkent davlat agrar universiteti*

Respublika, Qoraqalpogʻiston Respublikasi, viloyatlar va tumanlar agroxizmatlar markazlari

Tolali ekinlar ilmiy-tadqiqot instituti

Qorakoʻlchilik va choʻl ekologiyasi ilmiy-tadqiqot instituti

Xalqaro qishloq xoʻjaligi universiteti*

Dala ekinlari urugʻchiligi milliy tadqiqot majmuasi direksiyasi

Don va dukkakli ekinlar ilmiy-tadqiqot instituti

Janubiy dehqonchilik ilmiy-tadqiqot instituti

Oziq-ovqat texnologiyasi va muhandisligi xalqaro instituti*

Buxoro choʻl-yaylov ozuqabop oʻsimliklar urugʻchiligi ilmiy-ishlab chiqarish markazi

Respublika qishloq xoʻjaligi ilmiy kutubxonasi

Sabzavot, poliz ekinlari va kartoshkachilik ilmiy-tadqiqot instituti

Lalmikor dehqonchilik ilmiy-tadqiqot instituti

Qoraqalpogʻiston qishloq xoʻjaligi va agrotexnologiyalar instituti*

Oʻzbekistonda meva-sabzavotchilikda ilgʻor texnologiyalar oʻquv markazi,

Oʻzbekistonda “aqlli qishloq xoʻjaligi” sanoat texnologiyalari innovatsion markazi,

Qishloq xoʻjaligi mahsulotlari va ularning koʻchatlarini yetishtirish markazi*

Chorvachilik va parrandachilik ilmiy-tadqiqot instituti

Akademik M. Mirzayev nomidagi bogʻdorchilik, uzumchilik va vinochilik ilmiy-tadqiqot instituti

Qishloq xoʻjaligini mexanizatsiyalash ilmiy-tadqiqot instituti

Andijon qishloq xoʻjaligi va agrotexnologiyalar instituti*

Tuproqshunoslik va agrokimyo ilmiy-tadqiqot instituti

Oʻsimliklar genetik resurslari ilmiy-tadqiqot instituti

Samarqand agroinnovatsiyalar va tadqiqotlar instituti*

Don va sholi ilmiy-ishlab chiqarish birlashmasi

Qishloq xoʻjaligida yuqori texnologiyalar agrotexnoparki maxsus sanoat zonasi direksiyasi

Samarqand davlat veterinariya meditsinasi, chorvachilik va biotexnologiya universiteti (filiallari)*

Sholichilik ilmiy-tadqiqot instituti

Qishloq xoʻjaligi sohasi kadrlarining malakasini oshirish va qayta tayyorlash instituti

Qoraqalpogʻiston dehqonchilik ilmiy-tadqiqot instituti

Qishloq xoʻjaligi fundamental tadqiqotlar markazi

Elita urugʻchilik xoʻjaliklari

* Akademiya mazkur muassasalarning ilmiy-innovatsion faoliyatini muvofiqlashtiradi.
Oʻzbekiston Respublikasi Prezidentining 2026-yil 13-martdagi PF-40-son Farmoniga
4-ILOVA
Oʻzbekiston qishloq xoʻjaligi fanlari akademiyasi faoliyatini samarali tashkil etish boʻyicha
CHORA-TADBIRLAR DASTURI

T/r

Chora-tadbirlar nomi

Amalga oshirish mexanizmi

Amalga oshirish muddatlari

Moliyalashtirish manbai

Masʼul ijrochilar

1.

Oʻzbekiston qishloq xoʻjaligi fanlari akademiyasi (keyingi oʻrinlarda — Akademiya) faoliyatini tashkil etish.

1. Quyidagilarni tasdiqlashni nazarda tutuvchi Hukumat qarori loyihasini ishlab chiqish:

Akademiyaning ustavi;

Akademiyaning haqiqiy (akademik) va muxbir aʼzoligiga tanlov asosida saralash va tasdiqlash tartibi toʻgʻrisidagi nizom.

2026-yil may

-

Qishloq xoʻjaligi vazirligi,

Fanlar akademiyasi

2. Hukumat qarori loyihasini manfaatdor vazirlik va idoralar bilan kelishish.

2026-yil iyun

3. Hukumat qarori loyihasini tasdiqlash uchun Vazirlar Mahkamasiga kiritish.

2026-yil iyul

2.

Akademiya tarkibidagi ilmiy tashkilotlarning faoliyat yoʻnalishlarini qaytadan koʻrib chiqish va takomillashtirish.

1. Xorijiy ekspertlarni jalb qilgan holda Akademiya tarkibidagi ilmiy tashkilotlarning faoliyat yoʻnalishlarini oʻrganish va tahlil qilish.

2026-yil may

Qishloq xoʻjaligida ilm-fan va innovatsiyalarni rivojlantirishni qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlari

Qishloq xoʻjaligi vazirligi,

Innovatsion rivojlanish agentligi,

Iqtisodiyot va moliya vazirligi

2. Oʻrganish natijalari asosida ilmiy tashkilotlar faoliyatini baholash, ularning vazifa va funksiyalari hamda ilmiy yoʻnalish va loyihalarini takrorlanishi nuqtai nazaridan toʻliq qayta koʻrib chiqish.

2026-yil iyun

3. Ishlab chiqarishning real ehtiyoji va xalqaro tajribadan kelib chiqqan holda ilmiy tashkilotlarning faoliyat yoʻnalishlariga oʻzgartirishlar kiritish.

2026-yil iyul

3.

Ilmiy-tadqiqot institutlarining moddiy-texnika bazasini mustahkamlash va yangi zamonaviy ilmiy laboratoriyalar tashkil etish.

1. Mavjud laboratoriyalarni hamda tajriba-sinov infratuzilmasini xatlovdan oʻtkazish hamda zarur yangi zamonaviy asbob-uskuna va jihozlar roʻyxatini shakllantirish.

2026-yil avgust

Jamgʻarma mablagʻlari,

xalqaro grant mablagʻlari

Qishloq xoʻjaligi vazirligi,

Akademiya

2. Qishloq xoʻjaligi ekinlarining yangi nav va duragaylarini yaratishda seleksiya jarayonlarini jadallashtirishning zamonaviy usullaridan foydalanishni joriy etish.

Doimiy

3. “In-vitro” laboratoriyasi hamda fitotron issiqxonalarini tashkil etish.

2026-yil dekabr

4.

Qishloq xoʻjaligi sohasida xorijdagi yetakchi olimlarni Akademiya tarkibidagi ilmiy tashkilotlarga hamkorlik uchun jalb qilish.

1. Ilmiy tashkilotlarning faoliyat yoʻnalishlaridan kelib chiqqan holda yetakchi xorijiy turdosh ilmiy muassasalar bilan uzviy hamkorlikning ustuvor yoʻnalishlarini belgilash.

2026-yil oktabr

Jamgʻarma mablagʻlari, xalqaro moliya institutlari grant mablagʻlari

Qishloq xoʻjaligi vazirligi,

Tashqi ishlar vazirligi

2. Belgilangan ustuvor yoʻnalishlarga muvofiq ilmiy tashkilotlarning xorijiy ilmiy muassasalar bilan hamkorlik munosabatlarini oʻrnatish va kengaytirish.

Doimiy

3. Akademiya ilmiy tashkilotlariga maslahatchi va yetakchi olimlar sifatida yuqori malakali xorijiy mutaxassislarni jalb etish.

2026-yil dekabr

5.

Akademiyaning haqiqiy (akademik) va muxbir aʼzolari tomonidan shakllantirilgan ilmiy jamoalar tomonidan erishilgan salmoqli natijalarni amaliyotga keng joriy etish.

1. Akademiyaning haqiqiy (akademik) va muxbir aʼzolari va ularning ilmiy jamoalari tomonidan yaratilgan yangi ishlanmalarni amaliyotga keng joriy etish.

2. Haqiqiy (akademik) va muxbir aʼzolar bilan ishlab chiqarish korxonalarining uzviy hamkorligini yoʻlga qoʻyish.

3. Xorijiy tajribalarda oʻzini oqlagan “spin-off” va “soil-doktor” kabi korxonalar orqali konsalting xizmatlarini koʻrsatish.

2027-yildan doimiy

-

Qishloq xoʻjaligi vazirligi,

Fanlar akademiyasi,

Akademiya

6.

Akademiyada ilmiy yoʻnalishlar boʻyicha “akademik maktablari”ni yaratish.

1. Soha uchun salohiyatli kadrlarni tayyorlashda tegishli oliy taʼlim tashkilotlarida oʻqish davridan boshlab iqtidorli talabalarni “ustoz-shogird” tizimi asosida ilmiy tadqiqotlar olib borish jarayoniga bevosita jalb qilish.

Doimiy

-

Qishloq xoʻjaligi vazirligi,

Akademiya,

Oliy taʼlim, fan va innovatsiyalar vazirligi,

Fanlar akademiyasi

2. Akademiya tarkibida “yosh olim — professor — muxbir aʼzo — akademik” tizimi asosida kelajak akademiklarini tayyorlash ilmiy maktabini shakllantirish.

Doimiy

3. Akademiya tizimidagi ilmiy tashkilotlarda ilgʻor xorijiy tajribalar asosida “oʻziga oʻzi kadr tayyorlash” amaliyotini joriy qilish.

Doimiy

7.

Akademiya tizimidagi ilmiy muassasalarning yer uchastkalaridan maqsadli foydalanish holatini oʻrganish.

1. Ilmiy muassasalarning yer uchastkalarini xatlovdan oʻtkazish.

2026-yil may

-

Qishloq xoʻjaligi vazirligi,

Akademiya,

Kadastr agentligi,

viloyat hokimliklari

2. Xatlov natijalari boʻyicha yer uchastkalaridan maqsadli foydalanish holatini oʻrganish.

2026-yil iyun

3. Oʻrganish natijalari boʻyicha yer uchastkalaridan maqsadli foydalanilishi boʻyicha Vazirlar Mahkamasiga takliflar kiritish.

2026-yil iyul

8.

Qishloq xoʻjaligi sohasida global iqlim oʻzgarishining salbiy taʼsirini yumshatishga qaratilgan istiqbolli ilmiy dasturlarni ishlab chiqish va tasdiqlash.

1. Global iqlim oʻzgarishining qishloq xoʻjaligiga salbiy taʼsirini yumshatishga qaratilgan ilmiy-tadqiqotlar mavzularini shakllantirish.

2026-yil sentabr

Mablagʻ talab etilmaydi

Qishloq xoʻjaligi vazirligi,

Akademiya,

Oliy taʼlim, fan va innovatsiyalar vazirligi,

manfaatdor vazirlik va idoralar

2. Iqlim oʻzgarishining salbiy taʼsiriga mos istiqbolli dasturlarni ishlab chiqish va tasdiqlash.

2026-yil oktabr

9.

Qishloq xoʻjaligi ekinlarining mahalliy navlari seleksiyasini yanada rivojlantirish choralarini belgilab olish va amalga oshirish.

1. Ilmiy-tadqiqot institutlari tomonidan qishloq xoʻjaligi ekinlari (sabzavot) seleksiyasi boʻyicha yoʻnalishlarni belgilab olish va 5 yillik muddatda yaratiladigan nav, duragaylar rejalarini ishlab chiqish.

2026-yil iyul

Jamgʻarma mablagʻlari

Qishloq xoʻjaligi vazirligi,

Akademiya,

manfaatdor vazirlik va idoralar

2. Ilmiy-tadqiqot institutlari tomonidan belgilangan rejaga muvofiq qishloq xoʻjaligi ekinlari (sabzavotlar) ning yangi nav va duragaylari seleksiyasi boʻyicha tadqiqotlar olib borilishini tashkil qilish.

2026 — 2030 yillar davomida

10.

Qishloq xoʻjaligi ekinlarining seleksiyasi bilan shugʻullanuvchi yosh mutaxassislarning malakasini oshirish.

1. Qishloq xoʻjaligi ekinlarining seleksiyasi bilan shugʻullanuvchi va xorijiy tillarni biladigan mutaxassislar roʻyxatini shakllantirish.

2026-yil may

Xalqaro moliya institutlari mablagʻlari

Qishloq xoʻjaligi vazirligi,

manfaatdor vazirlik va idoralar

2. Qishloq xoʻjaligi ekinlarining (sabzavot, poliz) Gʻ1 duragaylar seleksiya va urugʻchiligi rivojlangan davlatlar bilan malaka oshirish boʻyicha hamkorlikni yoʻlga qoʻyish.

2026-yil iyun-iyul

3. Yosh iqtidorli mutaxassislarni malaka oshirish uchun qisqa muddatli stajirovkaga yuborish.

2026 — 2030-yillar davomida

11.

Asosiy qishloq xoʻjaligi ekinlari (meva-sabzavot, poliz ekinlari, kartoshka va uzum) seleksiyasini jadallashtirish maqsadida laboratoriyalarni marker seleksiyasi uchun zarur asbob-uskunalar bilan jihozlash.

1. Ilmiy-tadqiqot institutlarida laboratoriyalarga marker seleksiyasi uchun zaruriy asbob-uskunalarni sotib olish maqsadida talab etiladigan mablagʻlar manbasini aniqlash.

2026-yil sentabr

Xalqaro moliya institutlari mablagʻlari

Qishloq xoʻjaligi vazirligi,

Akademiya,

manfaatdor vazirlik va idoralar

2. Meva-sabzavot, poliz ekinlari, kartoshka va uzum marker seleksiyasi uchun zarur asbob-uskunalarni sotib olish maqsadida tender tanlovlarini oʻtkazish.

2026-yil oktabr-noyabr

3. Meva-sabzavot, poliz ekinlari, kartoshka va uzum marker seleksiyasi uchun asbob-uskunalarni sotib olish.

2027-yil I chorak

12.

Qishloq xoʻjaligini rivojlantirish, oziq-ovqat xavfsizligini taʼminlash va innovatsion resurstejamkor agrotexnologiyalarni ishlab chiqish va joriy etish.

1. Sohadagi dolzarb yoʻnalishlar maʼlumotlar bazasini yaratish.

2026-yil aprel

Xalqaro moliya institutlari va Jamgʻarma mablagʻlari

Qishloq xoʻjaligi vazirligi,

Akademiya,

manfaatdor vazirlik va idoralar

2. Ustuvor drayver yoʻnalishlarni belgilash va ularning ilmiy yechimi boʻyicha loyihalar mavzularini shakllantirish.

2026-yil may

3. Qishloq xoʻjaligi ekinlarining xususiyatlaridan (ekin turi, ekish muddati, oʻsish davri) kelib chiqib innovatsion resurstejamkor agrotexnologiyalarni ishlab chiqish boʻyicha ilmiy loyihalarni amalga oshirish.

Doimiy

13.

Qishloq xoʻjaligi ekinlari genetik resurslari Milliy genbankiga noyob ilmiy obyekt maqomini berish.

1. Milliy genbank faoliyati va uning moddiy-texnika bazasi, saqlanayotgan genetik resurslar tarkibi va ahamiyati boʻyicha toʻliq tahliliy maʼlumotlar tayyorlash.

2026-yil may

-

Qishloq xoʻjaligi vazirligi,

Innovatsion rivojlanish agentligi,

Akademiya

2. Mutasaddilarni jalb qilgan holda genbankning oziq-ovqat xavfsizligi, seleksiya, biotexnologiya va ilmiy tadqiqotlardagi ahamiyatini asoslovchi ilmiy xulosa ishlab chiqish.

2026-yil iyun

3. Qishloq xoʻjaligi ekinlari genetik resurslari Milliy genbankini noyob ilmiy obyekt sifatida eʼtirof etish boʻyicha normativ-huquqiy hujjat loyihasini ishlab chiqish va Vazirlar Mahkamasiga kiritish.

2026-yil sentabr

14.

Qishloq xoʻjaligi yoʻnalishidagi oliy taʼlim muassasalarida Akademiyaning ilmiy tashkilotlari olimlari bilan tarmoq yoʻnalishlari boʻyicha mahorat darslari, seminarlar, treninglar, vebinarlar va onlayn maslahatlashuvlar tashkil qilish.

1. Mahorat darslari, seminar-trening, tematik vebinar, onlayn maslahatlashuvlar oʻtkazish boʻyicha bir yilga moʻljallangan oliy taʼlim muassasalari kesimida reja-jadvalni ishlab chiqish.

Doimiy

-

Qishloq xoʻjaligi vazirligi,

Akademiya,

Oliy taʼlim, fan va innovatsiyalar vazirligi

2. Tinglovchi va ishtirokchilarni jalb qilish uchun reja-jadvalni internet tarmogʻiga joylashtirish.

Har yili yanvar oyida

3. Oʻtkazilgan tadbirlar boʻyicha umumlashtirilgan maʼlumotlarni taʼlim jarayoniga tatbiq qilish.

Doimiy

15.

Soha olimlarining ilmiy yutuqlari va yaratilgan ishlanmalarini muntazam ravishda keng yoritib borish.

1. Akademiya va ilmiy tashkilotlar tomonidan erishilgan yutuqlar va yaratilgan yangi ishlanmalar toʻgʻrisidagi axborotlarni tarqatish boʻyicha masʼul guruh tashkil etish.

2026-yil aprel

Jamgʻarma mablagʻlari

Qishloq xoʻjaligi vazirligi,

Akademiya,

Oʻzbekiston Milliy teleradiokompaniyasi,

Oʻzbekiston Milliy axborot agentligi

2. Tarmoq yoʻnalishlaridan kelib chiqib, davriy nashr etiladigan elektron jurnallar tashkil etish.

2026 avgust

3. OAV vakillari bilan doimiy matbuot anjumanlari, ochiq eshiklar kunini tashkil etish.

Doimiy

16.

Qishloq xoʻjaligida fundamental tadqiqotlar markazi (Centre of Excellence) faoliyatini tashkil etish.

1. Vazirlar Mahkamasi qarori loyihasini ishlab chiqish boʻyicha ishchi guruh tuzish.

2026-yil aprel

-

Qishloq xoʻjaligi vazirligi,

Akademiya,

Iqtisodiyot va moliya vazirligi

2. Qaror loyihasini ishlab chiqish, vazirlik va idoralar bilan kelishish.

2026-yil 1-iyun

3. Loyihani belgilangan tartibda Vazirlar Mahkamasiga kiritish.

2026-yil iyul

17.

Akademiya huzuridagi Yosh olimlar kengashi faoliyatini tashkil etish va ularni qoʻllab-quvvatlash.

1. Yosh olimlar kengashining maqsad va vazifalari, tuzilmasi va samarali faoliyat yuritishi boʻyicha ish dasturlarini shakllantirish.

2026-yil may

Jamgʻarma mablagʻlari

Qishloq xoʻjaligi vazirligi,

Fanlar akademiyasi, Oliy taʼlim, fan va innovatsiyalar vazirligi,

Yoshlar ishlari agentligi

2. Akademiklar va yetakchi olimlar bilan yosh olimlar muloqotini kuchaytirish, ular uchun forumlar, ijtimoiy tarmoqlarda maxsus guruhlar tashkil qilish.

Reja asosida

3. Kengash faoliyati boʻyicha yosh olimlar orasida ijtimoiy soʻrovlar oʻtkazish.

Reja asosida

4. Kengash hisobotini Akademiya Prezidiumida eshitib borish.

Har yili yanvar oyida

Oʻzbekiston Respublikasi Prezidentining 2026-yil 13-martdagi PF-40-son Farmoniga
5-ILOVA
Qishloq xoʻjaligida ilm-fan va innovatsiyalarni rivojlantirishni qoʻllab-quvvatlash jamgʻarmasi mablagʻlari yoʻnaltiriladigan xarajatlar
YOʻNALISHLARI
1. Akademiya va uning tizimidagi ilmiy-tadqiqot muassasalarining moddiy-texnika bazasini mustahkamlash xarajatlarini moliyalashtirish.
2. Ilmiy asbob-uskunalar, reagent, reaktiv, xomashyo, sarflov materiallar va butlovchi qismlar xarid qilish.
3. Dolzarb ilmiy-tadqiqot natijalariga oid monografiya va kitoblar chop etish.
4. Olimlarning malakasini oshirish uchun kurslar, seminarlar va treninglar tashkil etish hamda ularning ishtirokini taʼminlash.
5. Akademiya xodimlarini moddiy ragʻbatlantirish, ularni xorijiy xizmat safarlariga yuborish xarajatlarini qoplash.
6. “Scopus”, “Web of science” va boshqa maʼlumotlar bazalariga obuna boʻlish xarajatlarini qoplash.
7. Yangi agrotexnologiyalarni, samarador innovatsiyalar va ilm-fan yutuqlarini amaliyotga tatbiq etish boʻyicha seminar-treninglar oʻtkazish xarajatlarini qoplash.
Oʻzbekiston Respublikasi Prezidentining 2026-yil 13-martdagi PF-40-son Farmoniga
6-ILOVA
Qishloq xoʻjaligida fundamental tadqiqotlar markazi (Centre of Excellence) binosining qurilishi ishlarini jadallashtirish va oʻz vaqtida yakunlash boʻyicha ishchi guruh
tarkibi

1.

Sh.J. Toʻxtaboyev

—

Bosh prokuror oʻrinbosari, Ishchi guruh rahbari

2.

A.N. Shukurov

—

qishloq xoʻjaligi vaziri oʻrinbosari, Ishchi guruh rahbarining oʻrinbosari

3.

T.Yu. Rapikov

—

Vazirlar Mahkamasining Investitsiyalar, eksport, savdo, qishloq va suv xoʻjaligi masalalari kotibiyatining mudiri

4.

A.Ya. Xaydarov

—

iqtisodiyot va moliya vaziri oʻrinbosari

5.

D.K. Adilov

—

qurilish va uy-joy kommunal xoʻjaligi vaziri oʻrinbosari

6.

M.A. Madrahimov

—

tashqi ishlar vaziri oʻrinbosari

7.

U.M. Mamadaminov

—

energetika vaziri oʻrinbosari

8.

Sh.U. Turdikulova

—

Fanlar akademiyasi vitse-prezidenti

9.

J.S. Kazbekov

—

Ekologiya va iqlim oʻzgarishi milliy qoʻmitasi raisi oʻrinbosari

10.

Lavozimi boʻyicha

—

Oʻzbekiston qishloq xoʻjaligi fanlari akademiyasi raisi

11.

E.A. Kaxorov

—

“Agrobank” ATB boshqaruvi raisi

12.

U.B. Atemov

—

Yuqori Chirchiq tumani hokimi

13.

T.U. Atakulov

—

Qishloq xoʻjaligi vazirligi boshqarma boshligʻi, Ishchi guruh kotibi

Izoh: Ishchi guruh aʼzolari boshqa ishga oʻtgan taqdirda uning tarkibiga ushbu lavozimga yangidan tayinlangan yoki zimmasiga tegishli funksiyalarni bajarish yuklangan shaxslar kiritiladi.
Oʻzbekiston Respublikasi Prezidentining 2026-yil 13-martdagi PF-40-son Farmoniga
7-ILOVA
Oʻzbekiston Respublikasi Prezidentining ayrim hujjatlariga kiritilayotgan oʻzgartirishlar
1. Oʻzbekiston Respublikasi Prezidentining 2021-yil 3-fevraldagi “Qishloq xoʻjaligida bilim va innovatsiyalar tizimi hamda zamonaviy xizmatlar koʻrsatishni yanada rivojlantirish toʻgʻrisida”gi PF-6159-son Farmonida:
(a) 2-band oʻz kuchini yoʻqotgan deb hisoblansin;
(b) 4-band quyidagi tahrirda bayon etilsin:
“4. Belgilansinki:
Qishloq xoʻjaligi vazirligi huzuridagi Oʻzbekiston qishloq xoʻjaligi fanlari akademiyasi (keyingi oʻrinlarda — Akademiya) Muvofiqlashtiruvchi kengashning ishchi organi hisoblanadi;
Akademiya oʻz tizimidagi ilmiy-tadqiqot muassasasi faoliyatiga bevosita rahbarlik qiladi, chorvachilik yoʻnalishlari, oʻrmon va suv xoʻjaligi, ipakchilik sohalaridagi ilmiy-tadqiqot muassasalari bilan hamkorlikda ish olib boradi, qishloq xoʻjaligi sohasidagi oliy va professional taʼlim muassasalarining ilmiy va innovatsion faoliyatini muvofiqlashtiradi”;
(v) 5-bandda:
(i) “b” kichik banddagi “Innovatsion rivojlanish vazirligiga” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligiga” soʻzlari bilan almashtirilsin;
(ii) “v” kichik bandda:
birinchi xatboshi quyidagi tahrirda bayon etilsin:
“v) besh yillik dasturda nazarda tutilgan, shuningdek, qishloq xoʻjaligi subyektlari tomonidan taklif etilgan va budjetdan moliyalashtirilmagan yoki toʻliq moliyalashtirilmagan loyihalar hamda boshqa vazifalar Akademiya huzuridagi Qishloq xoʻjaligida ilm-fan va innovatsiyalarni rivojlantirishni qoʻllab-quvvatlash jamgʻarmasi (keyingi oʻrinlarda — Jamgʻarma) tomonidan amalga oshiriladi”;
uchinchi xatboshidagi “Milliy markaz” soʻzlari “Akademiya” soʻzi bilan almashtirilsin;
(g) 8-bandning ikkinchi xatboshisidagi “Milliy markaz” soʻzlari “Akademiya” soʻzi bilan almashtirilsin;
(d) 10-bandning birinchi, ikkinchi va toʻrtinchi xatboshilaridagi tegishli kelishikdagi “Milliy markaz” soʻzlari tegishli kelishikdagi “Akademiya” soʻzi bilan almashtirilsin;
(j) 11-bandning birinchi xatboshisidagi “Milliy markaz” soʻzlari “Akademiya” soʻzi bilan almashtirilsin;
(i) 4-ilovaning 1-bandi quyidagi tahrirda bayon etilsin:
“1. Oʻzbekiston qishloq xoʻjaligi fanlari akademiyasi”.
2. Oʻzbekiston Respublikasi Prezidentining 2023-yil 10-iyundagi “Maʼmuriy islohotlar doirasida qishloq xoʻjaligi va oziq-ovqat sohasida davlat boshqaruvini samarali tashkil qilish chora-tadbirlari toʻgʻrisida”gi PF-90-son Farmonida:
(a) 1-bandda:
(i) beshinchi xatboshi chiqarib tashlansin;
(ii) oltinchi — toʻqqizinchi xatboshilar tegishincha beshinchi — sakkizinchi xatboshilar deb hisoblansin;
(b) 2-ilovada:
(i) “Ipakchilik va jun sanoatini rivojlantirish qoʻmitasi” hamda “Tuproqshunoslik va agrokimyoviy tadqiqotlar instituti” bloklari chiqarib tashlansin;
(ii) “Qishloq xoʻjaligida bilim va innovatsiyalar milliy markazi” bloki quyidagi tahrirda bayon etilsin:
“Oʻzbekiston qishloq xoʻjaligi fanlari akademiyasi”;
(v) 4-ilova oʻz kuchini yoʻqotgan deb hisoblansin;
(g) 8-ilovaning 6-pozitsiyasi “Chora-tadbirlar nomi” ustuni birinchi xatboshisidagi “Akademik M. Mirzayev nomidagi bogʻdorchilik, uzumchilik va vinochilik ilmiy-tadqiqot instituti hududida” soʻzlari “Toshkent viloyati Yuqori Chirchiq tumani “A. Yassaviy” MFY hududida joylashgan Dala ekinlari urugʻchiligi milliy tadqiqot majmuasi direksiyasi hududida” soʻzlari bilan almashtirilsin.
3. Oʻzbekiston Respublikasi Prezidentining 2021-yil 3-fevraldagi “Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi faoliyatini tashkil etish toʻgʻrisida”gi PQ-4975-son qarorida:
(a) 2-bandda:
(i) ikkinchi xatboshi chiqarib tashlansin;
(ii) uchinchi — beshinchi xatboshilar tegishincha ikkinchi — toʻrtinchi xatboshilar deb hisoblansin;
(iii) ikkinchi xatboshidagi “Qishloq xoʻjaligida bilim va innovatsiyalar milliy markazining” soʻzlari “Oʻzbekiston qishloq xoʻjaligi fanlari akademiyasining (keyingi oʻrinlarda — Akademiya)” soʻzlari bilan almashtirilsin;
(iv) uchinchi xatboshidagi “Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazining” soʻzlari “Akademiyaning” soʻzi bilan almashtirilsin;
(v) toʻrtinchi xatboshidagi “Milliy markaz” soʻzlari “Akademiya” soʻzi bilan almashtirilsin;
(b) 4-bandda:
(i) “a” va “b” kichik bandlar chiqarib tashlansin;
(ii) “v”, “d” va “j” kichik bandlardagi “Milliy markaz” soʻzlari “Akademiya” soʻzi bilan almashtirilsin;
(v) 7-bandning birinchi xatboshisidagi “Milliy markaz” soʻzlari “Akademiya” soʻzi bilan almashtirilsin;
(g) 13-band oʻz kuchini yoʻqotgan deb hisoblansin;
(d) 1-ilova oʻz kuchini yoʻqotgan deb hisoblansin;
(j) 3 va 4-ilovalarning nomlanishidagi “Qishloq xoʻjaligida bilim va innovatsiyalar milliy markazining” soʻzlari “Oʻzbekiston qishloq xoʻjaligi fanlari akademiyasining” soʻzlari bilan almashtirilsin.
5. Oʻzbekiston Respublikasi Prezidentining 2025-yil 8-sentabrdagi “Respublikada kartoshka yetishtirishni koʻpaytirish va urugʻchiligini yanada rivojlantirishga doir qoʻshimcha chora-tadbirlar toʻgʻrisida”gi PQ-269-son qarorining 2-bandi “a” kichik bandidagi “1-dekabrga qadar keyingi” soʻzlari “1-fevralga qadar joriy” soʻzlari bilan almashtirilsin.
(Qonunchilik maʼlumotlari milliy bazasi, 13.03.2026-y., 06/26/40/0227-son)