toggle_night_mode
Oʻzbekiston Respublikasi Vazirlar Mahkamasining
qarori
Raqobatni taʼminlashga koʻmaklashish va isteʼmolchilar huquqlarini himoya qilish sohasidagi nodavlat notijorat tashkilotlarini ragʻbatlantirish va qoʻllab-quvvatlash chora-tadbirlari toʻgʻrisida
Mamlakatni har tomonlama va jadal rivojlantirishda fuqarolik jamiyati institutlarining roli va ahamiyatini tubdan oshirish, ularning davlat organlari bilan hamkorligini kuchaytirish, davlat tomonidan qoʻllab-quvvatlash koʻlamini kengaytirish hamda isteʼmolchilar huquqlarini himoya qilish sohasida faoliyat koʻrsatayotgan nodavlat notijorat tashkilotlarining fuqarolarning isteʼmolchi huquqlarini himoya qilish, huquqiy ongi va madaniyatini oshirishga doir ishlarini faollashtirish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining “Maʼmuriy islohotlar doirasida raqobatni rivojlantirish va isteʼmolchilar huquqlarini himoya qilish sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 6-iyuldagi PF-108-son Farmonida raqobatni rivojlantirish va isteʼmolchilar huquqlarini himoya qilish sohalarida tashabbuslarni ragʻbatlantirish, nodavlat notijorat tashkilotlari faoliyatiga koʻmaklashish, ularni uslubiy qoʻllab-quvvatlash, texnik koʻmak, xodimlar malakasini hamda huquqiy bilimlarini oshirish orqali jamoatchilik nazoratini qoʻllab-quvvatlash tizimi joriy qilinishi belgilangani;
Oʻzbekiston Respublikasi Prezidentining “Isteʼmolchilar huquqlarini samarali himoya qilishni tashkil etish chora-tadbirlari toʻgʻrisida” 2025-yil 6-oktabrdagi PQ-296-son qaroriga muvofiq tajriba tariqasida isteʼmolchilar huquqlarini himoya qilish sohasidagi nodavlat notijorat tashkilotlari tomonidan “sirli mijoz” va nazorat xaridi tadbirlari oʻtkazilishi maʼlumot uchun qabul qilinsin.
2. Shunday tartib oʻrnatilsinki, unga muvofiq:
a) raqobatni rivojlantirish va isteʼmolchilar huquqlarini himoya qilish sohalaridagi nodavlat notijorat tashkilotlari faoliyatiga koʻmaklashish, ularni uslubiy qoʻllab-quvvatlash, texnik koʻmak (grant va moliyaviy mablagʻlar) taqdim etish, xodimlar malakasini hamda huquqiy bilimlarini oshirishga quyidagilar masʼul organlar hisoblanadi:
raqobatni rivojlantirish sohasida — Raqobatni rivojlantirish va isteʼmolchilar huquqlarini himoya qilish qoʻmitasi (keyingi oʻrinlarda — Raqobat qoʻmitasi), Iqtisodiyot va moliya vazirligi, Investitsiyalar, sanoat va savdo vazirligi, Qishloq xoʻjaligi vazirligi, Transport vazirligi, Qurilish va uy-joy kommunal xoʻjaligi vazirligi, Energetika vazirligi hamda Raqamli texnologiyalar vazirligi;
isteʼmolchilar huquqlarini himoya qilish sohasida — Raqobat qoʻmitasi, Vazirlar Mahkamasi huzuridagi Oʻzbekiston texnik jihatdan tartibga solish agentligi, Sogʻliqni saqlash vazirligi, Qurilish va uy-joy kommunal xoʻjaligi vazirligi, Ekologiya, atrof-muhitni muhofaza qilish va iqlim oʻzgarishi vazirligi;
b) masʼul organlar:
har yili kamida bir marotaba nodavlat notijorat tashkilotlariga oʻzlariga biriktirilgan sohalarda tahlillar oʻtkazish, muammolarni oʻrganish va oʻz vakolatlari doirasida boshqa tadbirlarni tashkil etish yuzasidan budjetdan tashqari mablagʻlari hisobidan davlat ijtimoiy buyurtmalari berib boradi;
nodavlat notijorat tashkilotlarini uslubiy qoʻllab-quvvatlagan holda, ularning xodimlarining malakasini oshirish boʻyicha doimiy koʻmaklashadi;
v) Investitsiyalar, sanoat va savdo vazirligi hamda Sogʻliqni saqlash vazirligi, Kambagʻallikni qisqartirish va bandlik vazirligi, Savdo-sanoat palatasi raqobatni rivojlantirish va isteʼmolchilar huquqlarini himoya qilish sohalarida nodavlat notijorat tashkilotlariga:
turdosh xorijiy nodavlat notijorat tashkilotlari bilan yaqin hamkorlikni yoʻlga qoʻyishda, sohaga tajriba almashish uchun ularning malakali mutaxassislarini jalb etishda;
nodavlat notijorat tashkilotlari faoliyatining asosiy yoʻnalishlarini amalga oshirish uchun xalqaro moliya tashkilotlarining grantlarini jalb etishda koʻmaklashadi.
3. 2027-yil 1-yanvarga qadar tajriba tariqasida isteʼmolchilar huquqlarini himoya qilish sohasidagi nodavlat notijorat tashkilotlari tomonidan dori vositalari va tibbiyot xizmatlarini “sirli mijoz” va chakana savdoda nazorat xaridi tadbirlari oʻtkazilsin. Bunda mazkur qarorda nazarda tutilgan tadbirlarni amalga oshirishda hamkorlik qilishi mumkin boʻlgan nodavlat notijorat tashkilotlari roʻyxati Raqobat qoʻmitasining rasmiy veb-saytida eʼlon qilib boriladi.
Raqobat qoʻmitasi 2026-yil 31-dekabrga qadar mazkur tajriba natijalari boʻyicha ushbu funksiyalarni nodavlat notijorat tashkilotlariga oʻtkazish yuzasidan Vazirlar Mahkamasiga tegishli taklif kiritsin.
4. Dori vositalarini va tibbiy buyumlarni tayinlash, realizatsiya qilish hamda tibbiy xizmat koʻrsatish faoliyatini nazorat qilishda “sirli mijoz” tadbirlarini oʻtkazish tartibi toʻgʻrisidagi nizom 1-ilovaga muvofiq tasdiqlansin.
5. Oʻzbekiston Milliy teleradiokompaniyasi va Oʻzbekiston Milliy axborot agentligi isteʼmol madaniyatini oshirishga doir maʼrifiy tadbirlarni, isteʼmolchilar huquqlarini himoya qilish boʻyicha davlat va nodavlat tashkilotlari hamkorligi haqida muntazam yoritib borsin.
6. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar va qoʻshimcha kiritilsin.
7. Mazkur qaror ijrosini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 22-oktabr,
667-son
Vazirlar Mahkamasining 2025-yil 22-oktabrdagi 667-son qaroriga
1-ILOVA
Dori vositalarini va tibbiy buyumlarni tayinlash, realizatsiya qilish hamda tibbiy xizmat koʻrsatish faoliyatini nazorat qilishda “sirli mijoz” tadbirlarini oʻtkazish tartibi toʻgʻrisida
NIZOM
1-bob. Umumiy qoidalar
1. Ushbu Nizom isteʼmolchilarning huquqlarini himoya qilish maqsadida dori vositalarini va tibbiy buyumlarni dorixonalar tomonidan chakana realizatsiya qilish tartibiga amal qilish, tibbiy xizmat koʻrsatish (tibbiy diagnostika, muolaja, dori buyurish) faoliyatini nazorat qilishda “sirli mijoz” tadbirini oʻtkazish tartibini belgilaydi.
2. “Sirli mijoz” tadbiri mazkur Nizomga muvofiq mulkchilik shaklidan qatʼi nazar, dorixona va tibbiyot tashkilotlariga tashrif buyurgan holda oʻtkaziladi.
“Sirli mijoz” tadbirini oʻtkazish tadbirkorlik faoliyatini tekshirish hisoblanmaydi.
3. Ushbu Nizomda quyidagi asosiy tushunchalardan foydalaniladi:
vakolatli organ — Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi (keyingi oʻrinlarda — Raqobat qoʻmitasi) hamda uning hududiy organlari;
sirli mijoz — “sirli mijoz” tadbirida isteʼmolchi sifatida ishtirok etadigan shaxs;
“sirli mijoz” tadbiri — dori vositalarini va tibbiy buyumlarni dorixonalar tomonidan chakana realizatsiya qilish tartibiga amal qilinishi, tibbiyot (tibbiy diagnostika, dori buyurish, muolaja) tashkilotlarida inson hayoti, sogʻligʻi va mol-mulkiga zarar yetkazilishining oldini olish maqsadida qonunchilik talablariga rioya etilishini oʻrganish boʻyicha tadbirlar majmui;
tibbiyot tashkiloti — mulkchilik shaklidan qatʼi nazar, tibbiy faoliyat bilan shugʻullanadigan va mijozlarga davolash-diagnostika, muolaja va inson salomatligi boʻyicha maslahat yordami koʻrsatadigan tashkilot.
4. “Sirli mijoz” tadbiri quyidagi hollarda oʻtkaziladi:
Raqobat qoʻmitasi tomonidan kelishilgan va tasdiqlangan yillik reja asosida;
dori vositalarini va tibbiy buyumlarni dorixonalar tomonidan chakana realizatsiya qilish tartibiga amal qilinishi, tibbiyot (tibbiy diagnostika, dori buyurish, muolaja) tashkilotlarida inson hayoti, sogʻligʻi va mol-mulkiga zarar yetkazmaslik boʻyicha (yakuni oʻlim bilan tugagan holatlar bundan mustasno) qonunchilik talablari buzilishi haqida ommaviy axborot vositalaridan maʼlumotlar kelib tushganda;
jismoniy va yuridik shaxslarning dori vositalari va tibbiy buyumlarni dorixonalar tomonidan chakana realizatsiya qilish tartibiga amal qilinmagani, tibbiy xizmat koʻrsatish faoliyatidan noroziligi haqidagi murojaatlari kelib tushganda hamda ushbu sohada huquqbuzarliklar sodir etilayotgani haqidagi maʼlumotlarga aniqlik kiritish zarurati tugʻilganda;
jamoatchilik fikrini oʻrganish natijasida tibbiyot tashkilotida belgilangan talablar buzilishi alomatlari mavjud boʻlganda.
“Sirli mijoz” tadbiri yuqoridagi asoslar kelib tushgan va mavjudligi aniqlangan sanadan boshlab bir oy muddat ichida oʻtkaziladi.
5. “Sirli mijoz” tadbirini oʻtkazish rejasi har yili shakllantiriladi va Raqobat qoʻmitasi tomonidan tasdiqlanadi. Bunda, nodavlat notijorat tashkiloti tomonidan “sirli mijoz” tadbirlari Raqobat qoʻmitasi bilan kelishilgan va tasdiqlangan rejaga muvofiq oʻtkazilishi shart. Nodavlat notijorat tashkilotlari tomonidan “sirli mijoz” tadbirlari faqatgina tajriba davrida oʻtkaziladi.
“Sirli mijoz” tadbirini oʻtkazish rejasi quyidagi maʼlumotlarni oʻzida aks ettiradi:
tadbirni oʻtkazish davri;
tadbirini oʻtkazish joyi (viloyat, shahar, tuman);
tadbir yoʻnalishi (dorixona yoki tibbiyot tashkiloti).
6. “Sirli mijoz” tadbirining vazifalari quyidagilardan iborat:
dori vositalarini va tibbiy buyumlarni dorixonalar tomonidan chakana realizatsiya qilish tartibiga amal qilish, tibbiyot tashkilotlari (tibbiy diagnostika, muolaja, dori buyurish) faoliyatida isteʼmolchilar huquqlari himoya qilinishini taʼminlash;
mulkchilik shaklidan qatʼi nazar, tibbiyot tashkilotlari (tibbiy diagnostika, muolaja, dori buyurish) faoliyatida belgilangan tartiblarga rioya qilinishini oʻrganish va amaldagi talablar buzilishining oldini olish;
isteʼmolchilarning nomuayyan doirasi huquqlarini himoya qilish va sohadagi tizimli muammolarni oʻrganish;
jismoniy va yuridik shaxslarning murojaatlari, ommaviy axborot vositalarida chop etilgan tanqidiy materiallarda bayon etilgan holatlarga hamda jamoatchilik fikrini oʻrganish natijasida yuzaga kelgan masalalarga aniqlik kiritish;
oʻtkazilgan “sirli mijoz” tadbiri natijalari asosida amaldagi talablarni takomillashtirish boʻyicha takliflar ishlab chiqish;
oʻtkazilgan “sirli mijoz” tadbiri natijasida qonunchilik hujjatlari buzilishi holatlari aniqlangan taqdirda, tovarlar (ishlar, xizmatlar) xavfsiz boʻlishini va ularning sifatini nazorat qiluvchi davlat organi va tashkilotlariga maʼlumot kiritish;
aniqlangan qonun buzilishi holatlari boʻyicha tegishli choralar koʻrish.
7. “Sirli mijoz” tadbiri quyidagi prinsiplarga amal qilgan holda oʻtkaziladi:
qonuniylik;
tadbir oʻtkazilayotganligining sir saqlanishi;
tibbiyot tashkilotining moliyaviy-xoʻjalik faoliyatiga aralashmaslik;
asoslanganlik;
aniqlik va ishonchlilik;
begʻarazlik va xolislik;
korrupsiyaga va manfaatlar toʻqnashuviga yoʻl qoʻymaslik.
2-bob. “Sirli mijoz” tadbirini oʻtkazish tartibi
8. “Sirli mijoz” tadbiri vakolatli organning masʼul xodimi yoki nodavlat notijorat tashkilotining Raqobat qoʻmitasi huzuridagi Raqobat siyosati va isteʼmolchilar huquqlari tadqiqotlari markazi tomonidan tashkil qilingan maxsus kurslarda oʻqib, oʻqishni muvaffaqiyatli tamomlaganlik toʻgʻrisidagi maxsus sertifikatga ega boʻlgan xodimi tomonidan oʻtkaziladi.
9. “Sirli mijoz” tadbirini oʻtkazish toʻgʻrisida vakolatli organ tomonidan buyruq chiqariladi.
10. Buyruq quyidagi maʼlumotlarni oʻz ichiga olishi kerak:
vakolatli organ “sirli mijoz” tadbirini oʻtkazishga masʼul xodimi yoki xodimlarining familiyasi, ismi, otasining ismi va lavozimi;
tadbir oʻtkazilayotgan yuridik shaxs nomi va joylashgan manzili;
tadbirni oʻtkazishda baholanadigan majburiy talablar;
tadbirni oʻtkazish uchun asos;
tadbirni oʻtkazish muddatlari.
“Sirli mijoz” tadbirini oʻtkazish uchun bir ish kuni, davomli harakatlar uchun ushbu harakatning oxirgi kuniga qadar muddat belgilanadi.
11. “Sirli mijoz” tadbirini dorixonada oʻtkazishda “sirli mijoz” isteʼmolchi (xaridor) sifatida dori vositalari va tibbiy buyumlarni sotib olish uchun dorixonaga tashrif buyuradi.
Bu holatda “sirli mijoz”ning vazifasi dorixona xodimiga murojaat qilish, maʼlum bir dori vositalari va (yoki) tibbiy buyumni mavjudligini soʻrab murojaat qilish, tegishli xizmat koʻrsatilishidan oldin dorixona faoliyatini kuzatish hisoblanadi.
Bunda “sirli mijoz” tadbirini oʻtkazish davomida:
dori vositasining retsept asosida berilishi;
dori vositalarining belgilangan tartibda joylashtirilishi va saqlanishi;
xalqaro patentlanmagan nomlanishi boʻyicha rasmiylashtirilgan retseptda koʻrsatilgan dori vositalarini ularni savdo nomi boʻyicha tanlash imkoniyati yaratilishi;
dorixona xodimining mijozga dori vositasi va tibbiy buyumni qoʻllash tartibi, xususan, qoʻllash davriyligi, bir martalik va sutkalik dozalari, qoʻllash usuli, saqlash tartibi, yaroqlilik muddati haqida maʼlumot berishi;
dorixona xodimining mijoz eʼtiborini dori vositasi va tibbiy buyumning qoʻllash yoʻriqnomasi bilan diqqat qilib tanishib chiqishga qaratishi;
dorixona xodimining mijozlar bilan boʻlgan munosabatda etika qoidalariga rioya etishi, professionallik va savodxonlik xislatlarini namoyon etishi;
zarur hollarda, mijozning talabiga binoan dori vositalari va tibbiy buyumlarning sifatini tasdiqlovchi hujjatlarni koʻrsatishi;
mahsulotlarda narxnomaning mavjudligi;
mijozga u tomonidan soʻralmagan yoki retseptda koʻrsatilmagan dori vositalari va (yoki) tibbiy buyumlarni taklif qilish, sotib olishga undash holatlari oʻrganiladi.
12. “Sirli mijoz” tadbirini tibbiyot tashkilotlarida oʻtkazishda “sirli mijoz” isteʼmolchi (bemor) sifatida dori vositalarini tayinlash, xalqaro patentlanmagan nomlanishi boʻyicha retseptlarni rasmiylashtirish holati toʻgʻrisida maʼlumot olish uchun tibbiyot tashkilotiga tashrif buyuradi.
Bu holatda “sirli mijoz”ning vazifasi tibbiyot tashkilotining maʼlum bir shifokoriga murojaat qilish, oʻz kasalligi boʻyicha shifokordan tushuntirish, maslahat va tavsiyalar soʻrash, tegishli xizmat koʻrsatilishidan oldin tibbiyot tashkiloti faoliyatini kuzatish hisoblanadi.
Bunda “sirli mijoz” oʻzini muayyan kasallikka chalingan bemor sifatida namoyon etadi va quyidagi holatlarni oʻrganadi:
oʻz kasalligi boʻyicha zarur tushuntirish, maslahat va tavsiyalar berilishi;
dori vositalarini tayinlash va xalqaro patentlanmagan nomlanishi boʻyicha retseptlarni rasmiylashtirish tartibiga rioya etilishi;
savdo nomi boʻyicha aynan bir farmatsevtika korxonasiga mansub boʻlgan dori vositalarini tayinlash;
ortiqcha va zarur boʻlmagan diagnostika va laboratoriya tahlillarini topshirishga undash;
diagnostika va laboratoriya tahlillarini aynan bir tibbiyot tashkilotida oʻtkazishga undash;
shifokorning mijozlar bilan boʻlgan munosabatda etika qoidalariga rioya etishi, professionallik va savodxonlik xislatlarini namoyon etishi;
tibbiyot tashkilotida yuridik shaxsning nomi, xizmat turlari va narxlari toʻgʻrisida maʼlumotlar mavjudligi.
13. Xizmatning nuqsoni toʻplangan maʼlumotlar tadbir oʻtkazilgan tibbiyot tashkilotining hududidan tashqarida kasalliklarning diagnostikasi va davolash boʻyicha klinik protokol va algoritmlari boʻyicha solishtirish orqali amaldagi talablar asosida Sogʻliqni saqlash vazirligi tomonidan ajratilgan mutaxassislar bilan hamkorlikda aniqlanadi. Bunda koʻrsatilgan xizmatning klinik protokol va algoritmlarga mosligi boʻyicha xulosa Sogʻliqni saqlash vazirligi tomonidan uch ish kunida vakolatli organga taqdim etiladi.
14. “Sirli mijoz” tadbiri faqatgina audio yoki videokuzatuv moslamalaridan yashirin foydalanilgan holda oʻtkazilganda, amalga oshirilgan hisoblanadi.
Ushbu moslamalar yordamida yozib olingan maʼlumotlar vakolatli organ tomonidan toʻliq qabul qilib olinadi va ulardan mazkur Nizomda koʻrsatilgan hollardan tashqari boshqa maqsadlarda foydalanishga yoʻl qoʻyilmaydi.
15. “Sirli mijoz” tadbirini oʻtkazish jarayonida dorixona xodimini yoki shifokorni huquqbuzarliklar sodir etishga undash, shu jumladan, nizoli, bahsli holatlarni va kamchiliklarni sunʼiy ravishda keltirib chiqarish taqiqlanadi.
16. “Sirli mijoz” tadbirini oʻtkazishda dorixona yoki tibbiyot tashkilotining faoliyatiga, shu jumladan, moliyaviy-xoʻjalik faoliyatiga aralashish, undan isteʼmolchi sifatida tanishish mumkin boʻlganidan ortiqcha hujjatlarni soʻrash va talab qilishga, uning tadbir oʻtkazilishi haqida oldindan xabardor qilinishiga yoʻl qoʻyilmaydi.
17. “Sirli mijoz” tadbiri yakunlari boʻyicha maʼlumotnoma tuziladi.
Maʼlumotnomada tadbir davomida aniqlangan holatlar qayd etiladi. Bunda audio yoki videokuzatuv moslamalaridagi yozuvlar aniq koʻriladigan yoki eshitiladigan darajada boʻlgandagina asos sifatida olinadi.
Maʼlumotnoma “sirli mijoz” va tadbirga jalb qilingan shaxs hamda biriktirilgan xodimlar tomonidan imzolanadi.
Maʼlumotnomaga dori vositasi va (yoki) tibbiy buyum sotib olingani, tibbiyot tashkiloti xizmatlaridan foydalanilganligini tasdiqlovchi hujjatlar (kassa va/yoki tovar cheklari), retsept va boshqa hujjatlar nusxalari ilova qilinadi hamda vakolatli organga yuboriladi.
Maʼlumotnoma qogʻoz shaklida va skaner qilingan .rdf formatida, audio/video yozuvlar elektron formatda vakolatli organda bir yil muddat davomida saqlanadi. Ushbu muddat maʼmuriy ishlar yakunlangunga qadar qoʻshimcha uzaytirilishi mumkin.
18. “Sirli mijoz” tadbirida qonunchilik talablarini birinchi marta buzgan tibbiyot tashkilotlari va dorixonalar, shuningdek, ularning rahbarlari va (yoki) xodimlariga qonunchilik hujjatlarida belgilangan javobgarlik choralarini qoʻllamasdan (jinoyat alomatlari mavjud boʻlmaganda), tushuntirish ishlari olib boriladi va har tomonlama yordam koʻrsatiladi.
Biroq, takroriy ravishda “sirli mijoz” tadbiri natijasida normativ hujjatlar va qonunchilik talablari buzilishi alomatlari mavjud boʻlganda, qayd etilgan holat boʻyicha huquqbuzarlikni aniqlash uchun tekshirish belgilangan tartibda oʻtkaziladi.
3-bob. Yakunlovchi qoidalar
19. “Sirli mijoz” tadbiri bilan bogʻliq ishlar vakolatli organ tomonidan oʻtkazilganda Raqobat qoʻmitasi huzuridagi budjetdan tashqari Raqobatni rivojlantirishga koʻmaklashish jamgʻarmasi mablagʻlari, nodavlat notijorat tashkiloti tomonidan oʻtkazilganda oʻz mablagʻlari hisobidan moliyalashtiriladi.
20. “Sirli mijoz” tadbiri natijalari, uni oʻtkazish davomida toʻplangan foto va video materiallar isteʼmolchilarning xabardorligini oshirish uchun vakolatli organ tomonidan ommaviy axborot vositalarida eʼlon qilinishi mumkin.
21. “Sirli mijoz” tadbirini oʻtkazish natijalari boʻyicha dorixona yoki tibbiyot tashkiloti belgilangan tartibda yuqori turuvchi organga yoki sudga shikoyat qilishi mumkin.
22. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.
Vazirlar Mahkamasining 2025-yil 22-oktabrdagi 667-son qaroriga
2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar va qoʻshimcha
1. Vazirlar Mahkamasining “Isteʼmolchilar huquqlarini himoya qilishda jamoatchilik ishtirokini kengaytirish chora-tadbirlari toʻgʻrisida” 2002-yil 28-noyabrdagi 414-son qarorining 2-bandi beshinchi xatboshisi quyidagi mazmundagi beshinchi — oʻn birinchi xatboshilar bilan almashtirilsin:
“Belgilansinki, Isteʼmolchilar huquqlarini himoya qilish jamiyatlari federatsiyasi ijro etuvchi apparati, tuman, shahar jamiyatlari, shuningdek ularning hududiy birlashmalari ijro etuvchi apparatlarining taʼminoti:
aʼzolik badallari;
maqsadli loyihalarni amalga oshirish uchun grantlar va ijtimoiy buyurtmalar;
xalqaro moliya va boshqa institutlar, chet el tashkilotlari grantlari;
homiylik xayriyalari;
qonunchilikda taqiqlanmagan boshqa manbalar hisobiga amalga oshiriladi”.
2. Vazirlar Mahkamasining “Isteʼmolchilar huquqlarini himoya qilish va ushbu yoʻnalishda davlat organlari hamda tashkilotlari hamkorligini samarali tashkil etishni taʼminlash boʻyicha qoʻshimcha chora-tadbirlar toʻgʻrisida” 2021-yil 8-fevraldagi 59-son qarorida:
a) 2-bandning birinchi xatboshisi quyidagi tahrirda bayon etilsin:
“Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi hamda uning hududiy organlari (keyingi oʻrinlarda — Qoʻmita)”;
b) 3-band quyidagi tahrirda bayon etilsin:
“3. Vazirlar Mahkamasi huzuridagi Oʻzbekiston texnik jihatdan tartibga solish agentligi, Sogʻliqni saqlash vazirligi va milliy akkreditatsiya tizimida akkreditatsiya qilingan sinov laboratoriyalari Qoʻmitaga nazorat xaridi doirasida olinadigan xalq isteʼmoli tovarlarini tezkor ravishda ekspertizadan (testdan) oʻtkazishda amaliy yordam koʻrsatsinlar”;
v) 4-bandning birinchi xatboshisidagi “Agentlik” soʻzi “Qoʻmita” soʻzi bilan almashtirilsin;
g) ilovada:
5-bandda:
ikkinchi xatboshi quyidagi tahrirda bayon etilsin:
“Raqobatni rivojlantirish va isteʼmolchilar huquqlarini himoya qilish qoʻmitasi (keyingi oʻrinlarda — Qoʻmita) raisi tomonidan tasdiqlanadigan yoki Qoʻmita bilan kelishilgan va rasmiy veb-saytda joylashtiriladigan nazorat xaridi tadbirini oʻtkazish rejasi”;
beshinchi xatboshidagi “Vazirlar Mahkamasi yoki Monopoliyaga qarshi kurashish qoʻmitasining” soʻzlari “yoki Vazirlar Mahkamasining” soʻzlari bilan almashtirilsin;
6-bandda:
birinchi xatboshidagi “Monopoliyaga qarshi kurashish qoʻmitasi bilan kelishilgan holda Agentlik direktori” soʻzlari “Qoʻmita raisi” soʻzlari bilan almashtirilsin;
quyidagi mazmundagi ikkinchi xatboshi bilan toʻldirilsin:
“Nodavlat notijorat tashkiloti tomonidan oʻtkaziladigan nazorat xaridi tadbirlari rejasi Qoʻmita bilan kelishilgan holda tasdiqlanadi”;
ikkinchi — oltinchi xatboshilar tegishlicha uchinchi — yettinchi xatboshilar deb hisoblansin;
uchinchi xatboshidagi “Agentlikning” soʻzi “Qoʻmitaning” soʻzi bilan almashtirilsin;
8-band quyidagi tahrirda bayon etilsin:
“8. Nazorat xaridi tadbirlari Qoʻmita yoki uning hududiy organlari yoki nodavlat notijorat tashkilotlari tomonidan “Isteʼmolchilarning huquqlarini himoya qilish toʻgʻrisida”gi Oʻzbekiston Respublikasi Qonuniga muvofiq belgilangan boshqa vakolatli organlar (keyingi oʻrinlarda — vakolatli organlar) bilan birgalikda qonuniylik, oshkoralik, xolislik, adolatlilik, tenglik va shaffoflik prinsiplariga asoslangan holda amalga oshiriladi.
Nodavlat notijorat tashkiloti tomonidan oʻtkaziladigan nazorat xaridi tadbirlari Qoʻmita bilan kelishilgan va tasdiqlangan rejaga muvofiq amalga oshirilishi mumkin.
Bunda:
nodavlat notijorat tashkilotining xodimi nazorat xaridi tadbirini amalga oshirishi uchun Qoʻmita huzuridagi Raqobat siyosati va isteʼmolchilar huquqlari tadqiqotlari markazi tomonidan tashkil qilingan maxsus kurslarni muvaffaqiyatli tamomlaganlik toʻgʻrisidagi maxsus sertifikatga ega boʻlishi lozim;
nodavlat notijorat tashkilotlari tomonidan nazorat xaridi tadbirlarini faqatgina tajriba davrida oʻtkaziladi”;
9-banddagi “Agentlik direktori” soʻzlari “Qoʻmita yoki hududiy organlari yoxud nodavlat notijorat tashkiloti rahbari” soʻzlari bilan almashtirilsin;
10-band quyidagi tahrirda bayon etilsin:
“10. Buyruq quyidagi maʼlumotlarni oʻz ichiga olishi kerak:
Qoʻmita yoki uning hududiy organi yoxud nodavlat notijorat tashkiloti hamda vakolatli organlar nazorat xaridi tadbirini oʻtkazishga masʼul xodimi yoki xodimlarining familiyasi, ismi, otasining ismi va lavozimi;
nazorat xaridi tadbiri bevosita oʻtkazilayotgan joy;
nazorat xaridi tadbirini oʻtkazishda baholanadigan majburiy talablar;
nazorat xaridini amalga oshirish uchun asos;
nazorat xaridi davomida olinadigan tovarlarning savdo nomi, ularning soni, sotib olish va toʻlovni amalga oshirish toʻgʻrisidagi maʼlumot;
nazorat xaridini amalga oshirish muddatlari;
nazorat xaridi davomida foto va videotasvirlarning zarurligi toʻgʻrisida maʼlumot;
maʼlum tovar boʻyicha nazorat xaridini amalga oshirish uchun zarur boʻlgan boshqa maʼlumotlar.
Nazorat xaridi bunday tadbirlar oʻtkazilgan muayyan tovar (savdo nomi) boʻyicha yuridik shaxs yoki yakka tartibdagi tadbirkorda (savdo obyekti joylashuvi boʻyicha) keyingi bir yil davomida takroran amalga oshirilishiga yoʻl qoʻyilmaydi, qonunda belgilangan tartibda kelib tushadigan jismoniy va yuridik shaxslarning shikoyatlari asosida oʻtkaziladigan nazorat xaridi tadbirlari bundan mustasno”;
20-bandning ikkinchi xatboshisi quyidagi tahrirda bayon etilsin:
“Tanlab olish dalolatnomasi uch nusxada toʻldiriladi va Qoʻmita yoki uning hududiy organlari yoxud nodavlat notijorat tashkiloti, vakolatli organ hamda sinov laboratoriyasi xodimlariga bir nusxadan beriladi. Tanlab olish dalolatnomasi uni toʻldirgan mutaxassis hamda Qoʻmita yoki uning hududiy organi yoxud nodavlat notijorat tashkiloti xodimi tomonidan imzolanadi”;
24 va 25-bandlar quyidagi tahrirda bayon etilsin:
“24. Test natijalari boʻyicha tovar sifati va xavfsizlik talablariga muvofiq boʻlmagan holatlar aniqlanganda, qonunchilik hujjatlariga koʻra tegishli harakatlarni amalga oshirish uchun test natijalari Qoʻmita yoki uning hududiy organlari yoxud nodavlat notijorat tashkiloti tomonidan vakolatli organlarga yuboriladi va tekshirish umumiy tartibda amalga oshiriladi.
25. Nazorat xaridi bilan bogʻliq ishlarni moliyalashtirish Qoʻmita tomonidan oʻtkaziladigan nazorat xaridlari Qoʻmita huzuridagi budjetdan tashqari Raqobatni rivojlantirishga koʻmaklashish jamgʻarmasi mablagʻlari, nodavlat notijorat tashkiloti tomonidan oʻtkaziladigan nazorat xaridlari oʻz mablagʻlari hisobidan amalga oshiriladi”;
26-banddagi “Agentlik” soʻzi “Qoʻmita yoki uning hududiy organlari yoxud nodavlat notijorat tashkiloti” soʻzlari bilan almashtirilsin;
27-band quyidagi tahrirda bayon etilsin:
“27. Nazorat xaridi maqsadli korporativ bank kartasi yordamida Qoʻmita yoki uning hududiy organlari yoxud nodavlat notijorat tashkiloti tomonidan amalga oshiriladi. Shuningdek, nazorat xaridini oʻtkazish toʻgʻrisidagi buyruqda Qoʻmita yoki uning hududiy organlari yoxud nodavlat notijorat tashkilotining moddiy javobgar xodimiga beriladigan pul miqdorini qayd etgan holda, naqd pul shaklida ham toʻlanishi mumkin”;
28-banddagi “Agentlik hamda uning hududiy tuzilmalari” soʻzlari “Qoʻmita va uning hududiy organlari hamda nodavlat notijorat tashkiloti” soʻzlari bilan almashtirilsin;
29-banddagi “Agentlik hamda uning hududiy tuzilmalari” soʻzlari “Qoʻmita va uning hududiy organlari hamda nodavlat notijorat tashkiloti” soʻzlari bilan almashtirilsin;
30-banddagi “Agentlik” soʻzi “Qoʻmita” soʻzi bilan almashtirilsin;
31-band quyidagi mazmundagi ikkinchi xatboshi bilan toʻldirilsin:
“Nazorat xaridi tadbirlarini oʻtkazish tekshirish hisoblanmaydi”;
1-ilovaning matni quyidagi tahrirda bayon etilsin:
“Chakana savdo obyektlarida xalq isteʼmoli tovarlarining nazorat xaridini tashkillashtirish va ularni ekspertizadan (testdan) oʻtkazish tartibi
SXEMASI

Bosqichlar

Subyektlar

Tadbirlar

Muddatlar

1-bosqich

Qoʻmita va nodavlat notijorat tashkiloti

Nazorat xaridini oʻtkazish rejasini shakllantiradi va tasdiqlaydi.

Har yili, yanvar oyida

2-bosqich

Qoʻmita va nodavlat notijorat tashkiloti

Nazorat xaridini oʻtkazish rejasini rasmiy veb-saytda joylashtiradi.

Har yili, yanvar oyida

3-bosqich

Qoʻmita hamda uning hududiy organlari, nodavlat notijorat tashkiloti

Nazorat xaridini amalga oshirishda foydalanish uchun maqsadli korporativ bank kartasi ochadi va zarur miqdorda pul mablagʻi oʻtkazadi.

Har yili, yanvar oyida

4-bosqich

Qoʻmita yoki uning hududiy organlari yoxud nodavlat notijorat tashkiloti

Tasdiqlangan rejaga koʻra, OAV maʼlumotlari yoki murojaat kelib tushganda nazorat xaridini hamkorlikda amalga oshirish uchun vakolatli organdan (Vazirlar Mahkamasi huzuridagi Oʻzbekiston texnik jihatdan tartibga solish agentligi, Sanitariya-epidemiologiya va jamoat salomatligi qoʻmitasi, Veterinariya va chorvachilikni rivojlantirish qoʻmitasi) mutaxassis jalb qilinadi.

Tadbir oʻtkazilishidan 3 ish kuni avval

5-bosqich

Qoʻmita yoki uning hududiy organlari yoxud nodavlat notijorat tashkiloti

Tasdiqlangan rejaga koʻra, OAV maʼlumotlari yoki murojaat kelib tushganda nazorat xaridini amalga oshirish toʻgʻrisida Qoʻmita yoki uning hududiy organlari tomonidan buyruq chiqariladi.

Tadbir oʻtkazilishidan 1 ish kuni avval

6-bosqich

Qoʻmita yoki uning hududiy organlari yoxud nodavlat notijorat tashkiloti hamda vakolatli organlar

Masʼul xodim buyruqda koʻrsatilgan xoʻjalik yurituvchi subyektdan (joyiga chiqqan holda) belgilangan tovarni ekspertizadan oʻtkazish natijalariga asosan kassa va/yoki tovar cheki bilan sotib oladi (zarur hollarda foto- va videotasvirga olish vositalaridan foydalanadi).

Buyruqda koʻrsatilgan sanada

7-bosqich

Qoʻmita yoki uning hududiy organlari yoxud nodavlat notijorat tashkiloti hamda vakolatli organlar

Savdo obyekti hududidan tashqarida tovar namunalarini tanlab olish dalolatnomasi va nazorat xaridini oʻtkazish toʻgʻrisida maʼlumotnoma rasmiylashtiriladi.

Nazorat xaridi oʻtkazilgan kunda

8-bosqich

Vakolatli organlar

Nazorat xaridi davomida olingan tovar namunalari savdo nomlari olib tashlangan va toʻliq berkitilgan, biroq isteʼmol qadogʻi saqlangan holda tegishli sinov laboratoriyalariga yetkaziladi.

Nazorat xaridi oʻtkazilgan kunda

9-bosqich

Akkreditatsiya qilingan davlat va nodavlat laboratoriyalar

Tovar namunalarini testdan oʻtkazadi va sinov bayonnomalarini Qoʻmita yoki uning hududiy organlariga yoxud nodavlat notijorat tashkilotiga yuboradi.

Texnik hujjatlar va shartnomada belgilangan muddatda

10-bosqich

Qoʻmita yoki uning hududiy organlari yoxud nodavlat notijorat tashkiloti

Test natijalari boʻyicha tovar sifati va xavfsizlik talablariga muvofiq boʻlmagan holatlar aniqlanganda, qonunchilik hujjatlariga koʻra tegishli harakatlarni amalga oshirish uchun vakolatli organlarga yuboriladi.

Test natijalari olingan kundan 3 ish kunida

11-bosqich

Vakolatli organlar

Tovar sifati va xavfsizlik talablari buzilishi holati boʻyicha ishlab chiqaruvchi yoki import tovarlar boʻyicha uning vakolatli shaxsiga tegishli chora koʻradi.

Belgilangan muddatlarda

12-bosqich

Qoʻmita

Isteʼmolchi va tadbirkorlarni sifat va xavfsizlik talablariga javob bermaydigan tovarlar va uning ishlab chiqaruvchilari toʻgʻrisida xabardor qilish maqsadida nazorat xaridi natijalari boʻyicha ommaviy axborot vositalarida axborot joylashtiradi.

Nazorat xaridi natijalari boʻyicha

”;

2-ilovadagi “Agentlik yoki uning hududiy tuzilmasi” soʻzlari “Qoʻmita yoki uning hududiy organi yoxud nodavlat notijorat tashkiloti” soʻzlari bilan almashtirilsin.
(Qonunchilik maʼlumotlari milliy bazasi, 24.10.2025-y., 09/25/667/0971-son)