Oʻzbekiston Respublikasi Oliy Kengashi qaror qiladi:

1. “Auditorlik faoliyati toʻgʻrisida”gi Oʻzbekiston Respublikasi Qonuni eʼlon qilingan kundan boshlab amalga kiritilsin.

2. Oʻzbekiston Respublikasi Vazirlar Mahkamasi:

ikki oylik muddat ichida:

“Auditorlik faoliyati toʻgʻrisida”gi Oʻzbekiston Respublikasi Qonun ijrosini taʼminlovchi zarur meʼyoriy hujjatlar tayyorlasin;

Oʻzbekiston Respublikasi Hukumatining qarorlarini “Auditorlik faoliyati toʻgʻrisida”gi Oʻzbekiston Respublikasi Qonuniga muvofiqlashtirsin;

Oʻzbekiston Respublikasi vazirliklari, davlat qoʻmitalari oʻzlari chiqargan, ushbu Qonunga zid keluvchi meʼyoriy hujjatlarni qayta koʻrib chiqishlari va bekor qilishlarini taʼminlasin;

bir oylik muddat ichida:

Oʻzbekiston Respublikasi Auditorlar palatasi toʻgʻrisida muvaqqat nizomni tayyorlasin va uni tasdiqlasin;

yillik hisobotlar bilan bir vaqtda ana shu hisobotlarning mukammalligiga doir auditorlik xulosalari taqdim etishi shart boʻlgan korxonalar va tashkilotlar doirasini belgilasin.

3. Auditorlik faoliyati Oʻzbekiston Respublikasi hududida joylashgan korxonalar (tashkilotlar) maxsus ruxsatnomalar (litsenziyalar) asosidagina shugʻullanishga haqli boʻlgan faoliyat turlari roʻyxatiga kiritilsin (Oʻzbekiston Respublikasi Oliy Kengashi 1992-yil 14-yanvarda qabul qilgan “Korxonalar (tashkilotlar) faqat maxsus ruxsatnomalar (litsenziyalar) asosidagina shugʻullanishga haqli boʻlgan faoliyat turlarining roʻyxati haqida”gi 516-XII-sonli qaror).