toggle_night_mode
Oʻzbekiston Respublikasining Qonuni
Oʻzbekiston Respublikasining ayrim qonun hujjatlariga respublika hududida Internet va aloqa qamrovini kengaytirish uchun sharoitlarni yaxshilashga qaratilgan oʻzgartirishlar kiritish toʻgʻrisida
Qonunchilik palatasi tomonidan 2023-yil 24-oktabrda qabul qilingan
Senat tomonidan 2023-yil 20-dekabrda maʼqullangan
Bugungi kunda dunyoda yoʻldosh aloqaning jadal surʼatlar bilan rivojlanishi, ushbu sohada yangi texnologiyalarning joriy etilishi respublika hududida Internet va zamonaviy sifatli aloqa qamrovini kengaytirish uchun sharoitlarni yaxshilashga doir yangi texnologik imkoniyatlarni yaratmoqda.
Biroq mamlakatimizda xalqaro telekommunikatsiyalar tarmoqlarining turlaridan biri sifatida yoʻldosh aloqa tarmoqlarining rivojlanishi uchun yetarli shart-sharoitlar mavjud emasligi, bunday faoliyat turi bilan shugʻullanish uchun davlat boji miqdorining yuqoriligi ushbu aloqa vositasidan mahalliy tarmoqlarda foydalanishga, shuningdek togʻli va olis hududlarda Internet hamda aloqa qamrovini yanada kengaytirishga toʻsqinlik qilmoqda.
Mazkur Qonun bilan “Davlat boji toʻgʻrisida”gi hamda “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasi qonunlariga koʻchma radiotelefon (radiotelefon, trankli) aloqaga taalluqli litsenziyalanadigan faoliyatning mavjud kichik turlari respublika hududida yoʻldosh aloqa tarmoqlarini loyihalashtirish, qurish, ulardan foydalanish va ularning xizmatlarini koʻrsatish kabi faoliyat turi bilan toʻldirilishini, shuningdek respublika ijro etuvchi hokimiyat organining nomi aniqlashtirilishini nazarda tutuvchi oʻzgartirishlar kiritilmoqda.
Ushbu Qonun respublika hududining yuqori tezlikdagi Internet va sifatli aloqa bilan qamrab olinishini taʼminlashga, yoʻldosh aloqa tarmoqlarini rivojlantirishga, shuningdek telekommunikatsiyalar sohasidagi imkoniyatlarni yanada kengaytirishga xizmat qiladi.
1-modda. Oʻzbekiston Respublikasining 2020-yil 6-yanvarda qabul qilingan “Davlat boji toʻgʻrisida”gi OʻRQ-600-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2020-yil, № 1, 1-modda, № 3, 201-modda, № 5, 298-modda, № 10, 593-modda, № 12, 691-modda; 2021-yil, № 1, 13-modda, 4-songa ilova, № 7, 661-modda, № 8, 800, 803-moddalar, № 10, 968-modda; 2022-yil, № 2, 76-modda, № 3, 214, 216-moddalar, № 4, 340-modda, № 5, 463, 464, 467-moddalar, № 12, 1186-modda; 2023-yil, № 2, 103-modda, № 3, 186-modda, № 4, 265, 269-moddalar, № 6, 444, 445-moddalar, № 7, 538-modda) ilovaning 33-bandiga quyidagi oʻzgartirishlar kiritilsin:
“ts” — “sh2” kichik bandlar quyidagi tahrirda bayon etilsin:

“

ts) trankli, radiotelefon, respublika hududida yoʻldosh aloqa tarmoqlarini loyihalashtirish, qurish, ulardan foydalanish va ularga xizmatlar koʻrsatish

— BHMning 135 baravari

ch) koʻchma radiotelefon (uyali) aloqa tarmoqlarini loyihalashtirish faoliyatini amalga oshirish

— BHMning 200 baravari

sh) trankli, radiotelefon, respublika hududida yoʻldosh aloqa tarmoqlarini loyihalashtirish

— BHMning 10 baravari

sh1) koʻchma radiotelefon (uyali) aloqa tarmoqlarini qurish faoliyatini amalga oshirish

— BHMning 400 baravari

sh2) trankli, radiotelefon, respublika hududida yoʻldosh aloqa tarmoqlarini qurish faoliyatini amalga oshirish

— BHMning 20 baravari

”;
“yu” va “ya” kichik bandlar quyidagi tahrirda bayon etilsin:

“

yu) trankli, radiotelefon, respublika hududida yoʻldosh aloqa tarmoqlaridan foydalanish

— BHMning 30 baravari

ya) trankli, radiotelefon, respublika hududida yoʻldosh aloqa tarmoqlariga xizmatlar koʻrsatish faoliyatini amalga oshirish

— BHMning 80 baravari

”.
2-modda. Oʻzbekiston Respublikasining 2021-yil 14-iyulda qabul qilingan “Litsenziyalash, ruxsat berish va xabardor qilish tartib-taomillari toʻgʻrisida”gi OʻRQ-701-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2021-yil, № 7, 661-modda; 2022-yil, № 4, 340-modda, № 5, 465-modda; 2023-yil, № 2, 103-modda, № 3, 185-modda, № 7, 533-modda) quyidagi oʻzgartirishlar kiritilsin:
1) 1-ilovaning 32-pozitsiyasi quyidagi tahrirda bayon etilsin:

“

32.

Telekommunikatsiyalar tarmoqlarini loyihalashtirish, qurish, ulardan foydalanish va ularning xizmatlarini koʻrsatish uchun litsenziya

Mahalliy, shaharlararo va xalqaro telekommunikatsiyalar tarmoqlarini loyihalashtirish;

Oʻzbekiston Respublikasi Raqamli texnologiyalar vazirligi

mahalliy, shaharlararo va xalqaro telekommunikatsiyalar tarmoqlarini qurish;

mahalliy va shaharlararo telekommunikatsiyalar tarmoqlaridan foydalanish;

mahalliy va shaharlararo telekommunikatsiyalar tarmoqlari xizmatlarini koʻrsatish;

xalqaro telekommunikatsiyalar tarmoqlaridan foydalanish;

xalqaro telekommunikatsiyalar tarmoqlari xizmatlarini koʻrsatish;

koʻchma radiotelefon (uyali) aloqa tarmoqlarini loyihalashtirish;

koʻchma radiotelefon (uyali) aloqa tarmoqlarini qurish;

koʻchma radiotelefon (radiotelefon, trankli), respublika hududida yoʻldosh aloqa tarmoqlarini loyihalashtirish;

koʻchma radiotelefon (radiotelefon, trankli), respublika hududida yoʻldosh aloqa tarmoqlarini qurish;

koʻchma radiotelefon (radiotelefon, trankli), respublika hududida yoʻldosh aloqa tarmoqlaridan foydalanish;

koʻchma radiotelefon (radiotelefon, trankli), respublika hududida yoʻldosh aloqa tarmoqlari xizmatlarini koʻrsatish;

koʻchma radiotelefon (uyali) aloqa tarmoqlaridan foydalanish va ularning xizmatlarini koʻrsatish;

maʼlumotlar uzatish tarmoqlarini loyihalashtirish;

maʼlumotlar uzatish tarmoqlarini qurish;

maʼlumotlar uzatish tarmoqlaridan foydalanish;

maʼlumotlar uzatish tarmoqlari xizmatlarini koʻrsatish;

teleradioeshittirishlarni tarqatish (translatsiya qilish) tarmoqlarini loyihalashtirish;

teleradioeshittirishlarni tarqatish (translatsiya qilish) tarmoqlarini qurish;

teleradioeshittirishlarni tarqatish (translatsiya qilish) tarmoqlaridan foydalanish;

teleradioeshittirishlarni tarqatish (translatsiya qilish) tarmoqlari xizmatlarini koʻrsatish.

”;
2) 2-ilovaning 86-bandidagi “Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi” degan soʻzlar “Oʻzbekiston Respublikasi Raqamli texnologiyalar vazirligi” degan soʻzlar bilan almashtirilsin.
3-modda. Oʻzbekiston Respublikasi Raqamli texnologiyalar vazirligi, Adliya vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.
4-modda. Oʻzbekiston Respublikasi Vazirlar Mahkamasi:
hukumat qarorlarini ushbu Qonunga muvofiqlashtirsin;
respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.
5-modda. Ushbu Qonun rasmiy eʼlon qilingan kundan eʼtiboran uch oy oʻtgach kuchga kiradi.
Oʻzbekiston Respublikasining Prezidenti Sh. MIRZIYOYEV
Toshkent sh.,
2024-yil 23-fevral,
OʻRQ-912-son
(Qonunchilik maʼlumotlari milliy bazasi, 26.02.2024-y., 03/24/912/0147-son)