Bank infrastrukturasini yanada rivojlantirish va banklar ishi samaradorligini xalqaro standartlar talablari darajasiga koʻtarish maqsadida Vazirlar Mahkamasi qaror qiladi:

1. Barcha tijorat banklari, mulkchilik shakllaridan qatʼi nazar, shu jumladan, xorijiy sarmoya ishtirokidagi tijorat banklari, shuningdek, chet el banklarining Oʻzbekiston Respublikasi hududidagi filiallari va vakolatxonalari 1996-yil 1-yanvargacha budjetga ilovaga muvofiq soliq toʻlashdan ozod qilinsin.

2. Belgilab qoʻyilsinki, boʻshatilayotgan mablagʻlar banklar tomonidan:

bank ichki lokal kompyuter tarmoqlari va filiallararo modem aloqa liniyalari barpo etishga, bank operatsiyalarini avtomatik qayta ishlash va hisobga olish boʻyicha zamonaviy dasturlarni ishlab chiqish va sotib olishga;

naqd pullarni hisobga olish va inkassatsiya qilishni avtomatlashtirishni taʼminlovchi elektron pochtani joriy etishga;

banklararo hisob-kitoblarning avtomatlashtirilgan tizimini yaratishga;

moddiy-texnik bazami mustahkamlashga, filiallar va almashtirish punktlari tarmogʻini kengaytirishga;

xorijiy maslahatchilarni jalb etishga;

bank xodimlarini oʻqitish va tayyorlashni tashkil etishga yoʻnaltiriladi.

Oʻzbekiston Respublikasi Davlat soliq qoʻmitasi bank infrastrukturasini rivojlantirishga yoʻnaltirilayotgan mablagʻlardan maqsadli foydalanilishi ustidan qatʼiy nazorat oʻrnatsin hamda yilning har choragida respublika Hukumatiga axborot bersin.

3. Oʻzbekiston Respublikasi Moliya vazirligi Davlat soliq qoʻmitasi bilan birgalikda soliq solish masalalari boʻyicha yoʻriqnomalarga tegishli oʻzgartirishlar kiritsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.

1. Korxonalar daromadidan olinadigan soliq

2. Korxonalar mol-mulkiga solinadigan soliq

3. Yer soligʻi

4. Transport vositalari egalaridan olinadigan soliq

5. Ammortizatsiyadan 20 foizli ajratmalar