Soʻnggi yillarda mamlakatimizda ijtimoiy himoyaga muhtoj, turmush sharoiti ogʻir, ishsiz va kasb-hunarga ega boʻlmagan, huquqiy va maʼnaviy-psixologik qoʻllab-quvvatlashga ehtiyoji boʻlgan ijtimoiy ahvoli va turmush sharoiti ogʻir oilalarga davlat tomonidan manzilli koʻmaklashish boʻyicha mutlaqo yangicha tizim joriy qilindi.

Shu bilan birga, “Temir daftar”ga kiritilgan ijtimoiy ahvoli va turmush sharoiti ogʻir oilalarning muammolarini tizimli ravishda tezkor hal etish boʻyicha samarali chora-tadbirlarni belgilash zarurati yuzaga kelmoqda.

“Temir daftar”ga kiritilgan ijtimoiy ahvoli va turmush sharoiti ogʻir oilalar muammolarini tezkor va soddalashtirilgan tartibda hal etish hamda ularni ijtimoiy qoʻllab-quvvatlash choralarini yanada kuchaytirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim hujjatlariga quyidagilarni nazarda tutuvchi oʻzgartirish va qoʻshimchalar kiritilsin:

xalq deputatlari tuman (shahar) Kengashlarining sessiyalari oraligʻidagi davrda “Temir daftar”ga kiritilgan ijtimoiy ahvoli va turmush sharoiti ogʻir oilalarga kechiktirib boʻlmaydigan hollarda zudlik bilan yordam koʻrsatish zarurati yuzaga kelganda, bir martalik moddiy yordamni fuqarolar yigʻinlari tomonidan sektorlar rahbarlari bilan kelishgan holda taqdim etilgan xulosaga asosan bir ish kunida tuman (shahar) hokimlari qarorlari bilan berish;

qonunchilik hujjatlarida belgilangan hollarda tuman (shahar) hokimlariga “Saxovat va koʻmak” jamgʻarmasi mablagʻlarini tasarruf etish vakolatini berish.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda kambagʻallikni qisqartirish va bandlik vaziri B.A. Musayev zimmasiga yuklansin.

1. Vazirlar Mahkamasining 2021-yil 28-apreldagi 250-son qarori bilan tasdiqlangan “Temir daftar”ni yuritish orqali ijtimoiy ahvoli va turmush sharoiti ogʻir oilalar muammolarini tizimli ravishda hal etish va ularni ijtimoiy qoʻllab-quvvatlash boʻyicha vaqtinchalik tartibning 15-bandida:

“a” kichik band quyidagi tahrirda bayon etilsin:

“a) fuqarolar yigʻinlari tomonidan sektorlar rahbarlari bilan kelishgan holda, oilalarning ehtiyojmandlik darajasidan kelib chiqib, shuningdek, kechiktirib boʻlmaydigan hollarda, jumladan, ogʻir ahvoldagi kasallarni davolash, jarrohlik amaliyotini oʻtkazish, zarur dori-darmonlarni xarid qilish, ijtimoiy ahvoli va turmush sharoiti ogʻir oilalarga zarur oziq-ovqat mahsulotlarini xarid qilish, texnogen, tabiiy va ekologik tusdagi favqulodda vaziyatlar oqibatida uy-joyidan ayrilib qolgan oilalarga yashash uchun zarur boshpana qilib berish, ijtimoiy ahvoli va turmush sharoiti ogʻir oilalarning farzandlariga maktabga borishiga zarur kiyim-bosh sotib olish uchun zudlik bilan yordam koʻrsatish lozimligi toʻgʻrisida xulosaga kelingan “Temir daftar”ga kiritilgan oilalarga (har bir fuqaroning familiyasi, ismi, otasining ismi, pasport seriyasi va raqami koʻrsatilgan holda) bir martalik moddiy yordam berish miqdorlari koʻrsatilgan roʻyxat tuman (shahar) hokimligiga taqdim etiladi”;

“b” kichik bandda:

quyidagi mazmundagi uchinchi xatboshi bilan toʻldirilsin:

“xalq deputatlari tuman (shahar) Kengashlarining sessiyalari oraligʻidagi davrda fuqarolar yigʻinlari tomonidan sektorlar rahbarlari bilan kelishgan holda taqdim etilgan roʻyxatga muvofiq mazkur bandning “a” kichik bandida nazarda tutilgan kechiktirib boʻlmaydigan hollarda, zudlik bilan yordam koʻrsatish lozimligi toʻgʻrisidagi xulosaga asosan “Temir daftar”ga kiritilgan oilalarga bir martalik moddiy yordam bir ish kunida tuman (shahar) hokimlari qarorlari bilan beriladi. Hokimlarning mazkur qarorlari xalq deputatlari tuman (shahar) Kengashlarining navbatdagi sessiyasida tasdiqlanadi”;

uchinchi xatboshi toʻrtinchi xatboshi deb hisoblansin;

“b¹” kichik band “har oyning 5 sanasiga qadar” soʻzlaridan keyin “, mazkur bandning “a” kichik bandida nazarda tutilgan kechiktirib boʻlmaydigan hollarda, zudlik bilan yordam koʻrsatish lozimligi toʻgʻrisidagi hokim qarori qabul qilinganidan keyin bir ish kunida” soʻzlari bilan toʻldirilsin;

“v” kichik band “har oyning 5 — 27-kunlarida” soʻzlaridan keyin “, mazkur bandning “a” kichik bandida nazarda tutilgan kechiktirib boʻlmaydigan hollarda zudlik bilan yordam koʻrsatish lozimligi toʻgʻrisidagi hokim qarori qabul qilinganidan keyin bir ish kunida” soʻzlari bilan toʻldirilsin.

2. Vazirlar Mahkamasining 2020-yil 22-apreldagi 213-F-son farmoyishi bilan tasdiqlangan “Saxovat va koʻmak” jamgʻarmasi toʻgʻrisidagi nizomning 7-bandi toʻrtinchi xatboshisi quyidagi tahrirda bayon etilsin:

“tuman (shahar) miqyosida — xalq deputatlari tuman (shahar) Kengashlari tomonidan, qonunchilik hujjatlarida belgilangan hollarda — tuman (shahar) hokimlari tomonidan amalga oshiriladi”.