488-сон 05.09.2022. Respublika hududlarida tadbirkorlikning rivojlanganlik darajasini baholash tartibini yanada takomillashtirish chora-tadbirlari toʻgʻrisida

Hujjat 05.09.2022 sanasi holatiga
Amaldagi versiyaga o‘tish

Oʻzbekiston Respublikasi Vazirlar Mahkamasining

qarori

Respublika hududlarida tadbirkorlikning rivojlanganlik darajasini baholash tartibini yanada takomillashtirish chora-tadbirlari toʻgʻrisida

Oʻzbekiston Respublikasi Prezidentining “Tadbirkorlik subyektlari uchun maʼmuriy va soliq yukini yanada kamaytirish, biznesning qonuniy manfaatlarini himoya qilish tizimini takomillashtirish chora-tadbirlari toʻgʻrisida” 2021-yil 15-sentabrdagi PF-6314-son Farmoniga muvofiq Vazirlar Mahkamasi qaror qiladi:

1. Oʻzbekiston Respublikasi Prezidentining “Tadbirkorlik subyektlari uchun maʼmuriy va soliq yukini yanada kamaytirish, biznesning qonuniy manfaatlarini himoya qilish tizimini takomillashtirish chora-tadbirlari toʻgʻrisida” 2021-yil 15-sentabrdagi PF-6314-son Farmoniga asosan 2022-yildan boshlab tadbirkorlik subyektlariga maʼmuriy bosim darajasini aniqlash va yengillashtirish, shuningdek, huquqbuzarliklarning oldini olishga qaratilgan Tadbirkorlik faoliyati erkinligi indeksi joriy etilganligi maʼlumot uchun qabul qilinsin.

2. Oʻzbekiston Respublikasi Adliya vazirligi hamda Tadbirkorlik subyektlarining huquqlari va qonuniy manfaatlarini himoya qilish boʻyicha vakilning Tadbirkorlik faoliyati erkinligi indeksini aniqlash ishlarini “BUSINESS INDICATOR” avtomatlashtirilgan onlayn axborot tizimi doirasida amalga oshirish toʻgʻrisidagi taklifiga rozilik berilsin.

3. Belgilansinki,

“BUSINESS INDICATOR” avtomatlashtirilgan onlayn axborot tizimi “Yagona davlat nazorati” axborot tizimi bilan integratsiya qilinadi;

tadbirkorlik faoliyati erkinligi indeksi baholash natijalari toʻgʻrisidagi maʼlumotlar belgilangan tartibda “Yagona davlat nazorati” axborot tizimida eʼlon qilinadi.

4. Tadbirkorlik faoliyati erkinligi indeksini “BUSINESS INDICATOR” avtomatlashtirilgan onlayn axborot tizimi doirasida joriy etishni takomillashtirish bilan bogʻliq xarajatlar budjetdan tashqari Adliya organlari va muassasalarini rivojlantirish jamgʻarmasi mablagʻlari hisobidan moliyalashtirilsin.

5. Vazirlar Mahkamasining 2020-yil 8-yanvardagi 8-son qarori bilan tasdiqlangan Respublika hududlarida tadbirkorlikning rivojlanganlik darajasini baholash tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi adliya vaziri R.Q. Davletov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 5-sentabr,

488-son

Vazirlar Mahkamasining 2022-yil 5-sentabrdagi 488-son qaroriga
ILOVA

Vazirlar Mahkamasining 2020-yil 8-yanvardagi 8-son qarori bilan tasdiqlangan Respublika hududlarida tadbirkorlikning rivojlanganlik darajasini baholash tartibi toʻgʻrisidagi nizomga kiritilayotgan oʻzgartirish va qoʻshimchalar

1. Qarorga 1-ilova 7-bandining oʻn toʻrtinchi xatboshi hamda 8-bandining yigirma birinchi xatboshisidagi “tadbirkorlik subyektlarining faoliyatini tekshirish va moliya-xoʻjalik faoliyatini taftish qilish holati” soʻzlari “tadbirkorlik faoliyati erkinligining taʼminlanganlik darajasi” soʻzlari bilan almashtirilsin.

2. Nizomga 2-ilovada:

a) 13-paragraf nomi quyidagi tahrirda bayon etilsin:

“Tadbirkorlik faoliyati erkinligining taʼminlanganlik darajasini hisoblash”;

b) 25-band quyidagi tahrirda bayon etilsin:

“25. Tadbirkorlik subyektlarining faoliyatini tekshirish koʻrsatkichi yarim yil davomida tegishli hududda tadbirkorlik subyektlari faoliyatida oʻtkazilgan jami qonuniy tekshirishlarning ushbu hududda faoliyat yuritayotgan har 1 000 nafar tadbirkorlik subyektlariga toʻgʻri keladigan oʻrtacha miqdorini aniqlash yoʻli bilan quyidagi formula asosida hisoblanadi:

I_13.1 = (T_j/ T_hf) × 1000

bunda:

I_13.1 — indikator miqdori (sonda);

T_j — yarim yil davomida tegishli hududda tadbirkorlik subyektlari faoliyatida oʻtkazilgan jami qonuniy tekshirishlar soni;

T_hf— tegishli hududda faoliyat yuritayotgan tadbirkorlik subyektlari soni”;

v) quyidagi mazmundagi 25¹ — 25⁴-bandlar qoʻshilsin:

“25¹. Tadbirkorlik subyektlari faoliyatida oʻtkazilgan tekshirishlarning qonuniyligi yarim yil davomida tegishli hududda (shu jumladan, nazorat qiluvchi organlar boʻyicha) Biznes-ombudsman tomonidan aniqlangan noqonuniy tekshirishlarning qonuniy oʻtkazilgan tekshirishlarga nisbatini aniqlash yoʻli bilan quyidagi formula asosida hisoblanadi:

I_13.2 = 100 — ((T_n / T_j) × 100)

bunda:

I_13.2— indikator miqdori (foizda);

T_n— yarim yil davomida tegishli hududda (shu jumladan, nazorat qiluvchi organlar boʻyicha) Biznes-ombudsman tomonidan aniqlangan noqonuniy tekshirishlar soni.

25². Tekshirishlarni oʻtkazish uchun nazorat qiluvchi organlar tomonidan kiritilgan ariza (buyurtnoma)larning asoslanganligi yarim yil davomida tegishli hududda nazorat qiluvchi organlar rad etilgan ariza (buyurtmanoma)larining jami berilgan ariza (buyurtmanoma)lardagi ulushini aniqlash yoʻli bilan quyidagi formula asosida hisoblanadi:

I_13.3 = 100 — ((T_ar / T_aj) × 100)

bunda:

I_13.3— indikator miqdori (foizda);

T_ar— yarim yil davomida tegishli hududda tekshirishlarni oʻtkazish toʻgʻrisidagi nazorat qiluvchi organlarning rad etilgan ariza (buyurtmanoma)lari soni;

T_aj— yarim yil davomida tegishli hududda tekshirishlarni oʻtkazish uchun nazorat qiluvchi organlar tomonidan kiritilgan jami ariza (buyurtmanoma)lar soni.

25³. Tekshirishlarni ogohlantirish bilan yakunlash darajasi yarim yil davomida tegishli hududda (shu jumladan, nazorat qiluvchi organlar boʻyicha) tadbirkorlik subyektlari faoliyatida qonun buzilishi aniqlanib, ogohlantirish bilan yakunlangan tekshirishlarning tadbirkorlik subyektlari faoliyatida qonun buzilishi qayd etilgan jami tekshirishlardagi ulushini aniqlash yoʻli bilan quyidagi formula asosida hisoblanadi:

I_13.4 = (T_o / T_qj) × 100

bunda:

I_13.4 — indikator miqdori (foizda);

T_o— yarim yil davomida tegishli hududda (shu jumladan, nazorat qiluvchi organlar boʻyicha) tadbirkorlik subyektlari faoliyatida qonun buzilishi aniqlanib, ogohlantirish bilan yakunlangan tekshirishlar soni;

T_qj — yarim yil davomida tegishli hududda tadbirkorlik subyektlari faoliyatida nazorat qiluvchi organlar tomonidan qonun buzilishi qayd etilgan jami tekshirishlar soni.

25⁴. Tekshiruvchi mansabdor shaxslarning professionallik darajasi yarim yil davomida tegishli hududda (shu jumladan, nazorat qiluvchi organlar boʻyicha) Maʼmuriy javobgarlik toʻgʻrisidagi kodeksning 241²-moddasiga asosan javobgarlikka tortilgan mansabdor shaxslarning tadbirkorlik subyektlari faoliyatini tekshirish huquqini tasdiqlovchi maxsus guvohnomaga ega boʻlgan jami mansabdor shaxslardagi ulushini aniqlash yoʻli bilan quyidagi formula asosida hisoblanadi:

I_13.5 = 100 — ((M_m / M_jt) × 100)

bunda:

I_13.5— indikator miqdori (foizda);

M_m— yarim yil davomida tegishli hududda (shu jumladan, nazorat qiluvchi organlar boʻyicha) Maʼmuriy javobgarlik toʻgʻrisidagi kodeksning 241²-moddasiga asosan javobgarlikka tortilgan mansabdor shaxslar soni;

M_jt — yarim yil davomida tegishli hududda (shu jumladan, nazorat qiluvchi organlar boʻyicha) tadbirkorlik subyektlari faoliyatini tekshirish huquqini tasdiqlovchi maxsus guvohnomaga ega boʻlgan mansabdor shaxslar soni”;

g) 35 — 37-bandlar quyidagi tahrirda bayon etilsin:

“35. Indikator koʻrsatkichlarini baholashda I₁, I₃, I_7.1, I_7.2, I₈, I_10.1, I_10.2^, I_11.1, I_11.2, I_11.3, I_11.4, I₁₂, I_15.1, I₁₈, I_5.2, I₁₉, I₂₀, I_21.1, I_21.2 indikatorlari tuman (shahar) darajasida, I_2.1, I_2.2, I₄, I_5.1, I₆, I_9.1, I_9.2, I_10.3, I_13.1, I_13.2, I_13.3, I_13.4, I_13.5, I₁₄, I_15.2, I₁₆, I₁₇indikatorlari Qoraqalpogʻiston Respublikasi, Toshkent shahar va viloyatlar darajasida hisoblanadi. Mazkur metodika boʻyicha aniqlangan indikatorlar ijobiy va salbiy koʻrsatkichlarga ega boʻladi.

36. Ijobiy indikatorlarga ega boʻlgan I₁, I_2.1, I_2.2, I_5.1, I₆, I_7.1, I_7.2, I_11.1, I_11.2, I_11.4, I₁₂, I_13.2, I_13.3, I_13.4, I_13.5, I_15.1, I_15.2, I₁₆, I₁₇, I₁₈, I_5.2, I₂₀, I_21.1, va I_21.2indikatorlariga quyidagi formula asosida ball beriladi:

B_ii = [((I_h— I_min) / (I_maks — I_min)) × (10 — 1)] + 1

bunda:

B_ii — ijobiy indikatorlarga beriladigan ball;

I_h— baholanayotgan tegishli hududning indikator miqdori;

I_min — baholanayotgan indikatorning barcha hududlardagi eng past koʻrsatkichga ega boʻlgan hudud indikatori miqdori;

I_maks— baholanayotgan indikatorning barcha hududlardagi eng yuqori koʻrsatkichga ega boʻlgan hudud indikatori miqdori.

37. Salbiy koʻrsatkichlarga ega boʻlgan I₃, I₄, I₈, I_9.1, I_9.2, I_10.1, I_10.2, I_10.3, I _11.3, I_13.1, I₁₄va I₁₉indikatorlariga quyidagi formula asosida ball beriladi:

B_si= 10-[((I_h — I_min) / (I_maks— I_min)) × (10-1)]

bunda:

B_si— salbiy indikatorlarga beriladigan ball;

I_h — baholanayotgan tegishli hududning indikator miqdori;

I_min— baholanayotgan indikatorning barcha hududlardagi eng past koʻrsatkichga ega boʻlgan hudud indikatori miqdori;

I_maks — baholanayotgan indikatorning barcha hududlardagi eng yuqori koʻrsatkichga ega boʻlgan hudud indikatori miqdori”;

d) 39-band quyidagi tahrirda bayon etilsin:

“39. Tegishli hududning oʻrtacha balini hisoblash quyidagi ketma-ketlikdagi formulalar asosida aniqlanadi:

B_iioʻ = (B_ii1 + B_ii2 + ... +B_ii23) / 24

B_sioʻ = (B_si1 + B_si2 + ... +B_si13) / 12

B_uoʻ = (B_iioʻ + B_sioʻ) / 2

bunda:

B_iioʻ — ijobiy indikatorning oʻrtacha bali;

B_ii1... B_ii24 — ushbu metodikaning 36-bandida nazarda tutilgan tartibda aniqlangan ijobiy indikatorlarning bali;

B_sioʻ — salbiy indikatorning oʻrtacha bali;

B_si1 ... B_si12 — ushbu metodikaning 37-bandida nazarda tutilgan tartibda aniqlangan salbiy indikatorlarning bali;

B_uoʻ — tegishli hududning umumiy oʻrtacha bali”;

e) metodikaga 1-ilovada:

2-pozitsiya quyidagi tahrirda bayon etilsin:

“
2.	Erkin iqtisodiy va kichik sanoat zonalaridan samarali foydalanish koʻrsatkichi	son	Tegishli hududda tashkil etilgan erkin iqtisodiy va kichik sanoat zonalarida amalga oshirilayotgan loyihalar sonining ushbu hududda faoliyat yuritayotgan har 1000 nafar tadbirkorlik subyektiga toʻgʻri keladigan oʻrtacha miqdori	1 balldan 10 ballgacha	Investitsiyalar va tashqi savdo vazirligi
2.		soʻm	Tegishli hududda tashkil etilgan erkin iqtisodiy va kichik sanoat zonalarida amalga oshirilayotgan loyihalar summasining ushbu hududdagi faoliyat yuritayotgan har bir tadbirkorlik subyektiga toʻgʻri keladigan oʻrtacha miqdori	1 balldan 10 ballgacha	Investitsiyalar va tashqi savdo vazirligi
					”;

13-pozitsiya quyidagi tahrirda bayon etilsin:

“
13.	Tadbirkorlik faoliyati erkinligining taʼminlanganlik darajasi	son	Yarim yil davomida tegishli hududda tadbirkorlik subyektlari faoliyatida oʻtkazilgan tekshirishlarning ushbu hududda faoliyat yuritayotgan har 1000 nafar tadbirkorlik subyektiga toʻgʻri keladigan oʻrtacha miqdori	1 balldan 10 ballgacha	Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil (kelishuv asosida)
		foiz	Tadbirkorlik subyektlari faoliyatida oʻtkazilgan tekshirishlarning qonuniyligi yarim yil davomida tegishli hududda (shu jumladan, nazorat qiluvchi organlar boʻyicha) Biznes-ombudsman tomonidan aniqlangan noqonuniy tekshirishlarning qonuniy oʻtkazilgan tekshirishlardagi ulushi	1 balldan 10 ballgacha
		foiz	Tekshirishlarni oʻtkazish uchun nazorat qiluvchi organlar tomonidan kiritilgan ariza (buyurtnoma)larning asoslanganligi yarim yil davomida tegishli hududda nazorat qiluvchi organlar rad etilgan ariza (buyurtmanoma)larining jami berilgan ariza (buyurtmanoma)lardagi ulushi	1 balldan 10 ballgacha
		foiz	Tekshirishlarni ogohlantirish bilan yakunlash darajasi yarim yil davomida tegishli hududda (shu jumladan, nazorat qiluvchi organlar boʻyicha) tadbirkorlik subyektlari faoliyatida qonun buzilishi aniqlanib, ogohlantirish bilan yakunlangan tekshirishlarning tadbirkorlik subyektlari faoliyatida qonun buzilishi qayd etilgan jami tekshirishlardagi ulushi	1 balldan 10 ballgacha
		foiz	Tekshiruvchi mansabdor shaxslarning professionallik darajasi yarim yil davomida tegishli hududda (shu jumladan, nazorat qiluvchi organlar boʻyicha) Maʼmuriy javobgarlik toʻgʻrisidagi kodeksning 241²-moddasiga asosan javobgarlikka tortilgan mansabdor shaxslarning tadbirkorlik subyektlari faoliyatini tekshirish huquqini tasdiqlovchi maxsus guvohnomaga ega boʻlgan jami mansabdor shaxslardagi ulushi	1 balldan 10 ballgacha
					”.

(Qonunchilik maʼlumotlari milliy bazasi, 05.09.2022-y., 09/22/488/0795-son)