PQ-298-сон 28.06.2022. Avtotransport vositalaridan foydalanishda aholiga qoʻshimcha qulayliklar yaratish chora-tadbirlari toʻgʻrisida

Hujjat 29.06.2022 sanasi holatiga
Amaldagi versiyaga o‘tish

Oʻzbekiston Respublikasi Prezidentining

Qarori

Avtotransport vositalaridan foydalanishda aholiga qoʻshimcha qulayliklar yaratish chora-tadbirlari toʻgʻrisida

Mamlakatimizda avtotransport vositalari haydovchilari uchun qoʻshimcha qulayliklarni yaratish, aholining avtotransport vositalaridan foydalanish bilan bogʻliq muammolarini tezkorlik bilan hal etish, shuningdek, fuqarolarimizning bu boradagi istaklari amalga oshirilishini taʼminlash maqsadida:

1. Keng jamoatchilik bilan oʻtkazilgan ochiq muloqot doirasida aholidan avtotransport vositalari oynalarining tusini oʻzgartirishga ruxsatnoma berish uchun toʻlov stavkalari miqdorini kamaytirish hamda avtomototransport vositalarini texnik koʻrikdan oʻtkazish muddatlarini qayta koʻrib chiqish boʻyicha takliflar kelib tushayotganligi maʼlumot uchun qabul qilinsin.

2. 2022-yil 1-iyuldan boshlab:

yengil avtotransport vositalarining orqa yon oynalari tusini oʻzgartirish (qoraytirish) uchun ruxsatnoma olish tartibi bekor qilinsin;

jismoniy va yuridik shaxslarning yengil avtotransport vositalari old yon oynalari tusini oʻzgartirishga (qoraytirishga) ruxsatnoma berganlik uchun toʻlov miqdori bazaviy hisoblash miqdorining sakkiz baravari etib belgilansin.

3. Shunday tartib oʻrnatilsinki, unga muvofiq 2022-yil 1-sentabrdan boshlab:

a) ishlab chiqarilganiga oʻn yilgacha boʻlgan jismoniy shaxslarga tegishli yengil avtomototransport vositalarini texnik koʻrikdan oʻtkazish ixtiyoriy ravishda amalga oshiriladi;

b) yengil avtomototransport vositalarini majburiy texnik koʻrikdan oʻtkazishning quyidagi muddatlari belgilanadi:

ishlab chiqarilganiga oʻn bir yildan oʻn toʻrt yilgacha boʻlgan yengil avtomototransport vositalari — ikki yilda bir marta;

ishlab chiqarilganiga oʻn besh yil va undan ortiq boʻlgan yengil avtomototransport vositalari — bir yilda bir marta.

Bunda mazkur muddatlar tijorat asosida yoʻlovchilar tashish faoliyatida foydalaniladigan yengil avtomototransport vositalari uchun tatbiq etilmaydi.

4. Avtotransport vositalari oynalarining tusini oʻzgartirishga (qoraytirishga) ruxsatnoma berish Yagona interaktiv davlat xizmatlari portali bilan bir qatorda ichki ishlar organlari yoʻl harakati xavfsizligi boʻlinmalari tomonidan ham amalga oshirish tartibi joriy etilsin.

Ichki ishlar vazirligi (P. Bobojonov) manfaatdor vazirlik va idoralar bilan birgalikda 2022-yil 1-sentabrga qadar oynalari tusini oʻzgartirishga (qoraytirishga) ruxsat berilgan avtotransport vositasiga boʻlgan egalik huquqi oʻzgarganda, davlat raqami belgisi almashtirilganda yoki avtotransport vositasi egasining maʼlumotlarida oʻzgarish boʻlganda avtotransport vositalari oynalarining tusini oʻzgartirishga (qoraytirishga) berilgan ruxsatnomaning amal qilish muddatini avtomatik tarzda saqlab qolish tartibini joriy etsin.

5. Oʻzbekiston Respublikasi Hukumatining ayrim qarorlariga ilovaga muvofiq oʻzgartirish va qoʻshimchalar kiritilsin.

6. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2022-yil 28-iyun,

PQ-298-son

Oʻzbekiston Respublikasi Prezidentining 2022-yil 28-iyundagi PQ-298-son qaroriga
ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2018-yil 18-iyuldagi “Tusi oʻzgartirilgan (qoraytirilgan) oynali avtotransport vositalaridan foydalanishni tartibga solish chora-tadbirlari toʻgʻrisida”gi 547-son qarorining 2-bandida:

a) “a” kichik bandi quyidagi tahrirda bayon etilsin:

“a) M1, N1 va N2 toifaga oid avtotransport vositalari old yon oynalarining tusini yorugʻlik oʻtkazuvchanligi — 30 foizdan kam boʻlmagan darajada, shuningdek, M2, M3 toifaga oid III klass avtotransport vositalari yon oynalarining tusini yorugʻlik oʻtkazuvchanligi — 30 foizdan kam boʻlmagan darajada oʻzgartirish (qoraytirish) tasdiqlangan davlat standarti boʻyicha, shuningdek, xorijiy davlatlarning ishlab chiqaruvchi korxonalari tomonidan tusi yuqorida belgilangan meʼyorlardan ortiq boʻlmagan darajada oʻzgartirilgan (qoraytirilgan) oynalar oʻrnatilgan, erkin muomalaga chiqarish (import) va vaqtincha olib kirish bojxona rejimlariga rasmiylashtirilgan avtotransport vositalaridan foydalanish Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati tomonidan 1 yil muddatga beriladigan ruxsatnomaga asosan amalga oshiriladi”;

b) “b” kichik bandi “avtotransport vositalari orqa oynasining tusini,” soʻzlaridan keyin “M1, N1 va N2 toifaga oid avtotransport vositalari orqa yon oynalarining,” soʻzlari bilan toʻldirilsin;

v) quyidagi mazmundagi “b¹” kichik band bilan toʻldirilsin:

“b¹) oynalar tusini oʻzgartirishga ruxsat berilgan avtotransport vositasiga boʻlgan egalik huquqi oʻzgarganda, davlat raqami belgisi almashtirilganda yoki avtotransport vositasi egasining maʼlumotlarida oʻzgarish boʻlganda (jismoniy shaxsning familiyasi, ismi, otasining ismi oʻzgarganda, yuridik shaxs qayta tashkil etilganda, uning joylashgan joyi (pochta manzili) yoki nomlanishi oʻzgartirilganda) avtotransport vositalari oynalarining tusini oʻzgartirishga berilgan ruxsatnomaning amal qilish muddati 2022-yil 1-sentabrdan boshlab avtomatik tarzda saqlab qolinadi;”

g) “v” kichik bandida:

ikkinchi xatboshisi oʻz kuchini yoʻqotgan deb hisoblansin;

uchinchi xatboshisi ikkinchi xatboshi deb hisoblansin;

ikkinchi xatboshi quyidagi tahrirda bayon etilsin:

“orqa va old yon oynalar boʻyicha jismoniy va yuridik shaxslar uchun — bazaviy hisoblash miqdorining sakkiz baravari miqdorini va Oʻzbekiston Respublikasida faoliyat koʻrsatayotgan xorijiy davlatlar yuridik shaxslari uchun — bazaviy hisoblash miqdorining oʻn toʻrt baravari miqdorini tashkil etadi”.

2. Vazirlar Mahkamasining 2021-yil 9-martdagi “Transport vositalarini majburiy texnik koʻrikdan oʻtkazish tartibini takomillashtirishga doir qoʻshimcha chora-tadbirlar toʻgʻrisida”gi 125-son qarorida:

a) 2-band quyidagi tahrirda bayon etilsin:

“2. Oʻzbekiston Respublikasi Ichki ishlar vazirligi 2022-yil 31-dekabrga qadar davlat xaridlari toʻgʻrisidagi qonunchilik hujjatlarida belgilangan tartibda Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari jamoat xavfsizligi xizmatlari yoʻl harakati xavfsizligi boshqarmalari uchun bittadan harakatlanuvchi mobil texnik nazorat liniyalarini xarid qilsin va foydalanishga kiritsin”;

b) 3-bandning ikkinchi xatboshisidagi “Ichki ishlar vazirligining Yoʻl harakati xavfsizligi bosh boshqarmasi Davlat yoʻl harakati xavfsizligi xizmatining” soʻzlari “Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Davlat yoʻl harakati xavfsizligi xizmatining” soʻzlari bilan almashtirilsin;

v) 5-band quyidagi mazmundagi beshinchi xatboshi bilan toʻldirilsin:

“tadbirkorlik subyektlari mobil diagnostika stansiyalaridan faqat tadbirkorlik subyektlarining statsionar (turgʻun) diagnostika stansiyalari mavjud boʻlmagan uzoq hududlarda foydalanadi”;

g) 1-ilovada:

4-bandning uchinchi xatboshisidagi “Yoʻl harakati xavfsizligi bosh boshqarmasining” soʻzlari “Jamoat xavfsizligi departamenti Yoʻl harakati xavfsizligi xizmatining” soʻzlari bilan almashtirilsin;

5-band 2022-yil 1-sentabrdan eʼtiboran quyidagi tahrirda bayon etilsin:

“5. Transport vositalari quyidagi davriylikka muvofiq texnik koʻrikdan oʻtkazilishi kerak:

a) tijorat asosida yoʻlovchilar tashish faoliyati bilan shugʻullanuvchi yengil avtomobillar, avtobuslar, trolleybuslar, tramvaylar va oʻrindiqlar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularning tirkamalari — bir yilda ikki marta;

b) ishlab chiqarilganiga olti yildan koʻp boʻlmagan yuridik shaxslarga tegishli transport vositalari (mazkur bandning “a” kichik bandida koʻrsatilgan transport vositalaridan tashqari), shuningdek, ishlab chiqarilganiga oʻn bir yildan oʻn toʻrt yilgacha (oʻn toʻrtinchi yili ham) boʻlgan jismoniy shaxslarga tegishli M1 toifadagi transport vositalari (mazkur bandning “a” kichik bandida koʻrsatilgan transport vositalaridan tashqari) — ikki yilda bir marta;

v) ishlab chiqarilganiga olti yildan ortiq boʻlgan yuridik shaxslarga tegishli transport vositalari, ishlab chiqarilgan vaqti aniq boʻlmagan transport vositalari (mazkur bandning “a” kichik koʻrsatilgan transport vositalaridan tashqari), shuningdek, ishlab chiqarilganiga oʻn besh yil va undan ortiq boʻlgan jismoniy shaxslarga tegishli M1 toifadagi transport vositalari (mazkur bandning “a” kichik koʻrsatilgan transport vositalaridan tashqari) — bir yilda bir marta;”

g) tirkamalar texnik koʻrikka transport vositasi — shatakchi uchun belgilangan muddatlarda.

Ishlab chiqarilganiga oʻn yilgacha (oʻninchi yili ham) boʻlgan jismoniy shaxslarga tegishli M1 toifadagi transport vositalari (mazkur bandning “a” kichik bandida koʻrsatilgan transport vositalaridan tashqari) texnik koʻrikdan ixtiyoriy ravishda oʻtkaziladi”;

7-band quyidagi tahrirda bayon etilsin:

“7. Ishlab chiqarilganligidan qatʼi nazar transport vositalarini DYHXX organlarida roʻyxatdan oʻtkazishda (qayta roʻyxatdan oʻtkazishda), ularning agregat raqamlari texnik hujjatlarga mosligi tekshiriladi”;

15-bandning “b” kichik bandida:

quyidagi mazmundagi toʻrtinchi xatboshi bilan toʻldirilsin:

“avtomatik boshqaruvga ega boʻlgan M1 toifali transport vositalarining tormoz tizimini tekshirish uchun tormoz yoʻlagi mavjud boʻlishiga”;

toʻrtinchi — oʻn oltinchi xatboshilar tegishincha beshinchi — oʻn yettinchi xatboshilar deb hisoblansin;

16-bandda:

quyidagi mazmundagi toʻrtinchi xatboshi bilan toʻldirilsin:

“gaz yonilgʻisida ishlaydigan transport vositalarida gaz sizib chiqishini aniqlovchi (techeiskatel) uskunasiga”;

toʻrtinchi — oʻn toʻrtinchi xatboshilar tegishincha beshinchi — oʻn beshinchi xatboshilar deb hisoblansin;

20-band “viloyatlar ichki ishlar boshqarmalari” soʻzlaridan keyin “jamoat xavfsizligi xizmatlari” soʻzlari bilan toʻldirilsin;

21-bandda:

birinchi xatboshidagi “Ichki ishlar vazirligi Yoʻl harakati xavfsizligi bosh boshqarmasiga (keyingi oʻrinlarda — YHXBB)” soʻzlari “Ichki ishlar vazirligi Jamoat xavfsizligi departamenti Yoʻl harakati xavfsizligi xizmatiga (keyingi oʻrinlarda — YHXX)” soʻzlari bilan almashtirilsin;

ikkinchi xatboshidagi “YHXBB” qisqartmasi “YHXX” qisqartmasi bilan almashtirilsin;

29-band quyidagi mazmundagi toʻrtinchi va beshinchi xatboshilar bilan toʻldirilsin:

“DYHXXning mobil diagnostika stansiyalarida transport vositalarini texnik koʻrikdan oʻtkazganlik uchun bazaviy hisoblash miqdorining oʻn foizi miqdorida toʻlov undiriladi.

Ushbu mablagʻ Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Davlat yoʻl harakati xavfsizligi xizmatining moddiy-texnika bazasini rivojlantirish, xodimlarini ragʻbatlantirish va mukofotlash jamgʻarmasiga yoʻnaltiriladi”;

toʻrtinchi — yettinchi xatboshilar tegishincha oltinchi — toʻqqizinchi xatboshilar deb hisoblansin;

53-bandning ikkinchi xatboshisidagi “Yoʻl harakati xavfsizligi bosh boshqarmasi” soʻzlari “Jamoat xavfsizligi departamenti Yoʻl harakati xavfsizligi xizmati” soʻzlari bilan almashtirilsin;

1-ilovaning 12-bandi quyidagi tahrirda bayon etilsin:

“12. Ishlab chiqarish-texnika bazasining ishlab chiqarish xonasiga kirish oldidagi maydon 70 kvadrat metrdan kam boʻlmasligi kerak”.

3. Vazirlar Mahkamasining 2021-yil 28-iyuldagi “Tusi oʻzgartirilgan (qoraytirilgan) oynali avtotransport vositalaridan foydalanish tartibini takomillashtirish boʻyicha qoʻshimcha chora-tadbirlar toʻgʻrisida”gi 465-son qarorida:

a) 2-bandning ikkinchi xatboshisi quyidagi tahrirda bayon etilsin:

“avtotransport vositalari oynalarining tusini oʻzgartirishga (qoraytirish)ga ruxsatnoma berish boʻyicha davlat xizmati Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati tomonidan hamda Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali koʻrsatiladi”;

b) 5-band quyidagi tahrirda bayon etilsin:

“5. Belgilab qoʻyilsinki:

avtotransport vositalari oynalarining tusini oʻzgartirishga (qoraytirishga) oid davlat xizmati Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati tomonidan koʻrsatilganda, ushbu xizmat uchun yigʻimlar Vazirlar Mahkamasining “Tusi oʻzgartirilgan (qoraytirilgan) oynali avtotransport vositalaridan foydalanishni tartibga solish chora-tadbirlari toʻgʻrisida” 2018-yil 18-iyuldagi 547-son qarorida koʻrsatilgan miqdorlarda toʻlanadi;

“Davlat boji toʻgʻrisida”gi Oʻzbekiston Respublikasi Qonuniga muvofiq, avtotransport vositalari oynalarining tusini oʻzgartirishga (qoraytirishga) oid davlat xizmati uchun yigʻimlar davlat xizmati YIDXP orqali koʻrsatilganda, Vazirlar Mahkamasining “Tusi oʻzgartirilgan (qoraytirilgan) oynali avtotransport vositalaridan foydalanishni tartibga solish chora-tadbirlari toʻgʻrisida” 2018-yil 18-iyuldagi 547-son qarorida koʻrsatilgan miqdorlarning 90 foizi toʻlanadi.

Bunda ushbu toʻlovlar summasi quyidagicha taqsimlanadi:

11,25 foizi — Axborot-kommunikatsiya texnologiyalarini rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga;

88,75 foizi — Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Davlat yoʻl harakati xavfsizligi xizmatining moddiy-texnik bazasini rivojlantirish, xodimlarini ragʻbatlantirish va mukofotlash jamgʻarmasiga oʻtkaziladi”;

v) 1-ilovada:

3-band oʻz kuchini yoʻqotgan deb hisoblansin;

7-band quyidagi mazmundagi birinchi xatboshi bilan toʻldirilsin:

“7. Avtotransport vositalari oynalarining tusini oʻzgartirishga (qoraytirishga) oid davlat xizmati Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati tomonidan koʻrsatilganda, ushbu xizmat uchun yigʻimlar Vazirlar Mahkamasining “Tusi oʻzgartirilgan (qoraytirilgan) oynali avtotransport vositalaridan foydalanishni tartibga solish chora-tadbirlari toʻgʻrisida” 2018-yil 18-iyuldagi 547-son qarorida koʻrsatilgan miqdorlarda toʻlanadi”;

birinchi — toʻrtinchi xatboshilar tegishincha ikkinchi — beshinchi xatboshilar deb hisoblansin;

8-band quyidagi tahrirda bayon etilsin:

“8. Davlat xizmati YIDXP orqali mazkur Reglamentga 1-ilovada keltirilgan sxema asosida, vakolatli organ tomonidan toʻgʻridan-toʻgʻri koʻrsatilganda 1.1-ilovada keltirilgan sxema asosida koʻrsatiladi”;

2-bobning nomlanishidan “YIDXP orqali” soʻzlari chiqarib tashlansin;

9-band quyidagi tahrirda bayon etilsin:

“9. Davlat xizmati vakolatli organ tomonidan “Avtomototransport” avtomatlashtirilgan axborot tizimidan (keyingi oʻrinlarda — Tizim) foydalangan holda koʻrsatiladi.

Ariza beruvchi toʻgʻridan-toʻgʻri vakolatli organga murojaat qilganda, vakolatli organ masʼul xodimi tomonidan ushbu Reglamentga 2-ilovada keltirilgan soʻrovnomani ariza beruvchi nomidan toʻldiradi.

Agar ariza beruvchi davlat xizmatidan YIDXP orqali foydalanmoqchi boʻlsa, u YIDXPda roʻyxatdan oʻtadi hamda ushbu Reglamentga 2-ilovada keltirilgan soʻrovnomani elektron shaklda toʻldiradi”;

14-banddagi “uni ariza beruvchining” soʻzlari “ariza beruvchiga yoki uning” soʻzlari bilan almashtirilsin;

25-bandidan “, shu jumladan, YIDXP orqali” soʻzlari chiqarib tashlansin;

g) quyidagi mazmundagi 1.1-ilova bilan toʻldirilsin:

“Avtotransport vositalari oynalarining tusini oʻzgartirishga (qoraytirishga) ruxsatnoma berish boʻyicha davlat xizmati koʻrsatishning maʼmuriy reglamentiga
1.1-ILOVA

Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmati tomonidan avtotransport vositalari oynalarining tusini oʻzgartirishga (qoraytirishga) ruxsatnoma berish tartibi

SXEMASI

Bosqichlar	Subyektlar	Tadbirlar	Muddatlar

1-bosqich	Ariza beruvchi	1. Avtotransport vositalari oynalarining tusini oʻzgartirishga (qoraytirishga) ruxsatnoma olish uchun vakolatli organga murojaat etish. 2. Avtotransport vositalari oynalarining tusini oʻzgartirishga (qoraytirishga) ruxsatnoma berish boʻyicha soʻrovnoma vakolatli organ tomonidan ariza beruvchi nomidan toʻldirish.	Murojaat qilingan vaqtda

2-bosqich	Vakolatli organ	1. Davlat yoʻl harakati xavfsizlik xizmati “Avtomototransport” avtomatlashtirilgan axborot tizimi orqali soʻrovnomaga kiritilgan maʼlumotlarning toʻliqligini tekshirish. 2. Soʻrovnomada maʼlumotlar toʻliq koʻrsatilmagan yoki toʻlov toʻliq amalga oshirilmagan taqdirda, soʻrovnomani rad etish.	Avtomatik ravishda

3-bosqich	Vakolatli organ	Davlat yoʻl harakati xavfsizlik xizmati “Avtomototransport” avtomatlashtirilgan axborot tizimi orqali ariza beruvchiga toʻlovni amalga oshirish uchun hisob raqamni taqdim etish	Avtomatik ravishda

4-bosqich	Ariza beruvchi	Ruxsatnoma uchun toʻlovni amalga oshirish.	10 kun mobaynida

5-bosqich	Vakolatli organ	1. QR kod (matrik shtrixli kod) qoʻyilgan ruxsatnomani avtomatik ravishda rasmiylashtirish hamda uni ariza beruvchiga elektron shaklda yuborish. 2. Avtotransport vositasini hisobga olish elektron maʼlumotlariga tegishli oʻzgartirishlar kiritish.	Toʻlov toʻliq amalga oshirilgan vaqtdan soʻng 2 soat davomida
			”.

(Qonunchilik maʼlumotlari milliy bazasi, 29.06.2022-y., 07/22/298/0571-son)