1.14.00.00.00 Sogʻliqni saqlash. Jismoniy tarbiya. Sport. Turizm / 14.01.00.00 Sogʻliqni saqlash / 14.01.04.00 Sogʻliqni saqlash muassasalarini, aholini medikamentlar, dori-darmon vositalari va tibbiy buyumlar bilan taʼminlash. Dorixona]
[TSZ:
1.Ijtimoiy-madaniy masalalar / Sogʻliqni saqlash. Sanitariyaga oid qonun hujjatlari]
Oʻzbekiston Respublikasi Vazirlar Mahkamasining
qarori
Dori vositalarining klinik tadqiqotlarini rivojlantirish hamda ularning xalqaro standartlar talablariga muvofiq oʻtkazilishini tashkil etish chora-tadbirlari toʻgʻrisida
Oʻzbekiston Respublikasi Prezidentining “2022 — 2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida” 2022-yil 28-yanvardagi PF-60-son Farmoni ijrosini taʼminlash, shuningdek, klinik tadqiqotlarni xalqaro talablarga muvofiq rivojlantirish maqsadida Vazirlar Mahkamasi qaror qiladi:
1. Oʻzbekiston Respublikasi Sogʻliqni saqlash vazirligi va Farmatsevtika tarmogʻini rivojlantirish agentligining (keyingi oʻrinlarda — Agentlik) “Tashkent Pharma Park” innovatsion ilmiy-ishlab chiqarish farmatsevtika klasteri (keyingi oʻrinlarda — Klaster) hududida davlat muassasasi shaklidagi Dori vositalarining klinik tadqiqotlarini rivojlantirish markazini (keyingi oʻrinlarda — Markaz) tashkil etish toʻgʻrisidagi taklifiga rozilik berilsin.
2. Quyidagilar Markazning asosiy vazifalari etib belgilansin:
dori vositalarining klinik tadqiqotlarini xalqaro etik va ilmiy standartlar talablariga muvofiq tashkil etishni joriy etish;
respublika hududida klinik tadqiqotlarni rivojlantirish hamda klinik bazalarni jahon standartlari asosida modernizatsiya qilishni muvofiqlashtirish;
“Zarur klinika amaliyoti (GCP)” talablariga muvofiq dori vositalarining klinik tadqiqotlarini oʻtkazishni tashkil etish;
jenerik dori vositalarining original dori vositalariga farmakologik bioekvivalentligini aniqlash;
klinik tadqiqot subyektida dori vositalarining farmakokinetik tadqiqotlarini oʻtkazish;
tibbiyot xodimlarining klinik tadqiqotlar oʻtkazish sohasida malakasini oshirish;
“Zarur klinika amaliyoti (GCP)” yoʻnalishida xalqaro hamkorlikni amalga oshirish.
3. Belgilansinki:
Agentlik Markazning muassisi hisoblanadi;
Markazda qurilish-montaj, ichki muhandislik-kommunikatsiya infratuzilmasini barpo etish, tibbiy texnika, klinik va laboratoriya jihozlari bilan taʼminlash ishlari Farmatsevtika tarmogʻini rivojlantirish agentligining Farmatsevtika tarmogʻini qoʻllab-quvvatlash va rivojlantirish jamgʻarmasi mablagʻlari, “Toshkent viloyatining Zangiota tumanida “Tashkent Pharma Park” innovatsion ilmiy-ishlab chiqarish farmatsevtika klasterini tashkil etish loyihasi” doirasida Koreya Eksimbanki (EDCF) jamgʻarmasi kreditlari hisobidan moliyalashtiriladi.
4. “Tashkent Pharma Park” innovatsion ilmiy-ishlab chiqarish farmatsevtika klasterida Dori vositalarining klinik tadqiqotlarini oʻtkazish markazi faoliyatini tashkil etish chora-tadbirlari ilovaga muvofiq tasdiqlansin.
5. Quyidagilar Markaz faoliyatini moliyalashtirish manbalari etib belgilansin:
koʻrsatilgan pulli xizmatlardan tushadigan mablagʻlar;
xalqaro moliya institutlari, xorijiy tashkilotlar, donor mamlakatlar va tashkilotlarning mablagʻlari;
qonunchilik hujjatlari bilan taqiqlanmagan boshqa manbalar.
6. Oʻzbekiston Respublikasi Sogʻliqni saqlash vazirligi, Agentlik, Investitsiyalar va tashqi savdo vazirligi 2022 — 2026-yillarda Sogʻliqni saqlash vazirligi tizimidagi tibbiyot muassasalarini davlat investitsiya dasturlari doirasida qurish, rekonstruksiya qilish va jihozlashda ulardagi klinik bazalarni “Zarur klinika amaliyoti (GCP)” talablariga muvofiq qurish, rekonstruksiya qilish va jihozlash choralarini koʻrsin.
7. Agentlik
a) bir oy muddatda:
Markaz ustavini belgilangan tartibda tasdiqlasin hamda uning davlat roʻyxatidan oʻtkazilishini taʼminlasin;
Markaz tuzilmasi va shtatlar jadvalini tasdiqlasin;
Markazning rahbar va xodimlari mehnatiga haq toʻlashning Yagona tarif setkasi boʻyicha razryadlarini belgilasin;
b) Markazni yuqori malakali mutaxassis xodimlar bilan toʻldirish chorasini koʻrsin.
8. Oʻzbekiston Respublikasi Sogʻliqni saqlash vazirligi:
a) ikki oy muddatda mahalliy va xorijiy tashkilotlar tomonidan ishlab chiqariladigan dori vositalari klinik tadqiqotlarining xalqaro standartlar talablariga muvofiq oʻtkazilishini taʼminlashni nazarda tutuvchi Farmakologik vositalarning yoki dori vositalarining klinik tadqiqotlarini oʻtkazish tartibi toʻgʻrisidagi nizomni hamda klinik tadqiqotlarini oʻtkazish tartibi toʻgʻrisidagi nizomni hamda Klinik tadqiqotlar oʻtkaziladigan davolash-profilaktika muassasalarining roʻyxatini;
b) bir oy muddatda:
oʻz tuzilmasidagi Klinik tadqiqotlar oʻtkaziladigan davolash-profilaktika muassasalarini rivojlantirish yuzasidan chora-tadbirlar rejasini belgilangan tartibda tasdiqlasin;
boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
9. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri B.A. Musayev zimmasiga hamda Vazirlar Mahkamasining Taʼlim, sogʻliqni saqlash va sport masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 14-aprel,
181-son
Vazirlar Mahkamasining 2022-yil 14-apreldagi 181-son qaroriga
ILOVA
“Tashkent Pharma Park” innovatsion ilmiy-ishlab chiqarish farmatsevtika klasterida Dori vositalarining klinik tadqiqotlarini oʻtkazish markazi faoliyatini tashkil etish
ChORA-TADBIRLARI
T/r
Chora-tadbir nomi
Amalga oshirish shakli
Amalga oshirish muddati
Masʼul ijrochilar
1.
Markaz ustavini belgilangan tartibda tasdiqlash va davlat roʻyxatidan oʻtkazish
Ustav
2022-yil may
Farmatsevtika tarmogʻini rivojlantirish agentligi
2.
Markaz tuzilmasi va shtatlar jadvalini tasdiqlash
Tuzilma va shtatlar jadvali
3.
Markazning rahbar va xodimlari mehnatiga haq toʻlashning Yagona tarif setkasi boʻyicha razryadlarini belgilash
Tarif setkasi
4.
Loyihaning texnik-iqtisodiy asosini (TIA) ishlab chiqish
Texnik-iqtisodiy asos
2022-yil iyul
Farmatsevtika tarmogʻini rivojlantirish agentligi, Moliya vazirligi, Investitsiyalar va tashqi savdo vazirligi
5.
Loyihaning texnik-iqtisodiy asosini Koreya tomoni bilan kelishish
Kelishilgan loyiha hujjati
2022-yil avgust-sentyabr
Farmatsevtika tarmogʻini rivojlantirish agentligi, Investitsiyalar va tashqi savdo vazirligi
6.
Loyihaning texnik-iqtisodiy asosini ekspertizadan oʻtkazish
Ekspertiza xulosasi
2022-yil oktyabr
Farmatsevtika tarmogʻini rivojlantirish agentligi, Moliya vazirligi, Investitsiyalar va tashqi savdo vazirligi
7.
Koreya Eksimbanki (EDCF) jamgʻarmasi bilan farmatsevtika klasterining ilmiy-oʻquv qismini tashkil etish boʻyicha loyihani muhokama qilish bayonini (MOD) imzolash
Muhokama qilish bayoni (MOD)
2022-yil noyabr
Investitsiyalar va tashqi savdo vazirligi, Farmatsevtika tarmogʻini rivojlantirish agentligi, Moliya vazirligi
8.
Koreya Eksimbanki (EDCF) jamgʻarmasi bilan farmatsevtika klasterining ilmiy-oʻquv qismini tashkil etish boʻyicha imtiyozli moliyalashtirish shartlarini kelishish va qarz shartnomasini imzolash
Qarz shartnomasi
2022-yil dekabr
Moliya vazirligi, Investitsiyalar va tashqi savdo vazirligi, Farmatsevtika tarmogʻini rivojlantirish agentligi
9.
Loyihani amalga oshirish boʻyicha Koreya maslahatchilarini aniqlash uchun tender/tanlov oʻtkazish
Maslahatchilarni tanlash
2023-yil fevral
Farmatsevtika tarmogʻini rivojlantirish agentligi, Investitsiyalar va tashqi savdo vazirligi
10.
Koreya maslahatchilari tomonidan loyihani amalga oshirish rejasini va loyiha-smeta hujjatlarini ishlab chiqish
Loyiha-smeta hujjatlari
2023-yil oktyabr
Farmatsevtika tarmogʻini rivojlantirish agentligi, Investitsiyalar va tashqi savdo vazirligi
11.
Loyiha boʻyicha bosh pudratchini belgilangan tartibda aniqlash
Bosh pudratchi bilan shartnoma tuzish
2023-yil dekabr
Farmatsevtika tarmogʻini rivojlantirish agentligi, Investitsiyalar va tashqi savdo vazirligi
12.
Zarur jihozlar va inventarlar roʻyxatini aniqlash va ularni yetkazib berish tartib-taomillarini boshlash
Maslahatchilarning texnik shartlari
2023-yil dekabr
Farmatsevtika tarmogʻini rivojlantirish agentligi
13.
Dori vositalarining klinik tadqiqotlarini oʻtkazish markazining qurilish-montaj ishlarini boshlash
Qurilish maydonining tasdiqlangan bosh rejasi
2024-yil yanvar
Farmatsevtika tarmogʻini rivojlantirish agentligi, Qurilish vazirligi
14.
Dori vositalarining klinik tadqiqotlarini oʻtkazish markazida maxsus tibbiy texnika va jihozlarni oʻrnatish va ishga tushirish
Maxsus tibbiy texnika va jihozlarni ishga tushirish dalolatnomasi
2024-yil noyabr
Farmatsevtika tarmogʻini rivojlantirish agentligi
Izoh. Ushbu Chora-tadbirlardagi belgilangan muddatlar Koreya Eksimbanki (EDCF) jamgʻarmasi bilan erishiladigan kelishuvga muvofiq oʻzgarishi mumkin.
(Qonunchilik maʼlumotlari milliy bazasi, 14.04.2022-y., 09/22/181/0312-son)
