Hujjat kuchini yo‘qotgan 01.01.2025

Oʻzbekiston Respublikasi Vazirlar Mahkamasining

qarori

Fuqarolarning oʻzini oʻzi boshqarish organlari xodimlarini ragʻbatlantirish jamgʻarmasi toʻgʻrisidagi nizomni tasdiqlash haqida

LexUZ sharhi

Mazkur qaror Oʻzbekiston Respublikasi Prezidentining 2024-yil 25-dekabrdagi PQ-455-sonli “Oʻzbekiston Respublikasining “2025-yil uchun Oʻzbekiston Respublikasining Davlat budjeti toʻgʻrisida”gi Qonuni ijrosini taʼminlash chora-tadbirlari toʻgʻrisida”gi qaroriga asosan 2025-yil 1-yanvardan oʻz kuchini yoʻqotadi.

Oʻzbekiston Respublikasi Prezidentining “Fuqarolarning oʻzini oʻzi boshqarish organlari xodimlarini ijtimoiy qoʻllab-quvvatlashga doir qoʻshimcha chora-tadbirlar toʻgʻrisida” 2021-yil 18-oktabrdagi PF-6324-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Fuqarolarning oʻzini oʻzi boshqarish organlari xodimlarini ijtimoiy qoʻllab-quvvatlashga doir qoʻshimcha chora-tadbirlar toʻgʻrisida” 2021-yil 18-oktabrdagi PF-6324-son Farmoniga muvofiq:

a) 2021-yil 1-noyabrdan boshlab tuman (shahar) mahalla va oilani qoʻllab-quvvatlash boʻlimlari huzurida yuridik shaxs maqomiga ega boʻlmagan Fuqarolarning oʻzini oʻzi boshqarish organlari xodimlarini ragʻbatlantirish jamgʻarmasi (keyingi oʻrinlarda — Jamgʻarma) tashkil etilganligi;

b) quyidagilar:

fuqarolar oʻzini oʻzi boshqarish organlarining yillik mehnatga haq toʻlash jamgʻarmasining (moddiy ragʻbatlantirish maxsus jamgʻarmasi mablagʻlarini inobatga olmagan holda) 10 foizi miqdoridagi budjet mablagʻlari;

xalq deputatlari tuman (shahar) Kengashlari qarorlariga asosan ajratiladigan mahalliy budjetlar qoʻshimcha manbalarining 3 foizi miqdoridagi ajratma;

fuqarolarning oʻzini oʻzi boshqarish organlarining mol-mulkini belgilangan tartibda ijaraga berishdan olingan mablagʻlar;

homiylik mablagʻlari;

qonunchilik hujjatlari bilan taqiqlanmagan boshqa manbalar Jamgʻarma mablagʻlarini shakllantirish manbalari etib belgilanganligi maʼlumot uchun qabul qilinsin.

2. Quyidagilarni nazarda tutuvchi Fuqarolarning oʻzini oʻzi boshqarish organlari xodimlarini ragʻbatlantirish jamgʻarmasi toʻgʻrisidagi nizom ilovaga muvofiq tasdiqlansin:

Jamgʻarma mablagʻlarining shakllantirishning asosiy manbalari va ushbu mablagʻlardan foydalanishning maqsadi;

Jamgʻarma mablagʻlari hisobidan xodimlarga har oylik ustamalar belgilash va toʻlash, shuningdek, ularni mukofotlash va ijtimoiy himoya qilish tartibi;

tuman (shahar) mahalla va nuroniylarni qoʻllab-quvvatlash boʻlimi tomonidan Jamgʻarma mablagʻlarining hisobi va hisobotini yuritish, Mahalla va nuroniylarni qoʻllab-quvvatlash vazirligi hamda uning hududiy boʻlinmalari tomonidan Jamgʻarma mablagʻlaridan oqilona va maqsadli foydalanilishini nazorat qilish.

(2-bandning toʻrtinchi xatboshisi Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

3. Oʻzbekiston Respublikasi Mahalla va oilani qoʻllab-quvvatlash vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi mahalla va oilani qoʻllab-quvvatlash vaziri R.T. Mamatov zimmasiga hamda Vazirlar Mahkamasining Yoshlar, jamoat tashkilotlari, mahalla va oilani qoʻllab-quvvatlash masalalari kotibiyatiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2021-yil 28-dekabr,

779-son

Vazirlar Mahkamasining 2021-yil 28-dekabrdagi 779-son qaroriga
ILOVA

Fuqarolarning oʻzini oʻzi boshqarish organlari xodimlarini ragʻbatlantirish jamgʻarmasi toʻgʻrisida

NIZOM

1-bob. Umumiy qoidalar

1. Mazkur Nizom Fuqarolarning oʻzini oʻzi boshqarish organlari xodimlarini ragʻbatlantirish jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish tartibini belgilaydi.

2. Jamgʻarma fuqarolarning oʻzini oʻzi boshqarish organlari xodimlariga shaxsiy va ragʻbatlantiruvchi ustamalar toʻlash, ularni mukofotlash va ijtimoiy himoya qilish maqsadida tashkil etiladi.

3. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Moliya vazirligi Gʻaznachiligida budjet tashkilotining budjetdan tashqari jamgʻarmasi shaklida ochilgan tuman (shahar) mahalla va nuroniylarni qoʻllab-quvvatlash boʻlimlarining (keyingi oʻrinlarda — tuman (shahar) boʻlimi) shaxsiy gʻazna hisobvaragʻida jamgʻariladi.

(3-band Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

4. Jamgʻarma mablagʻlarini boshqarish va tasarruf qilish tuman (shahar) boʻlimi tomonidan amalga oshiriladi.

2-bob. Jamgʻarma mablagʻlarini shakllantirish

5. Quyidagilar Jamgʻarma mablagʻlarini shakllantirishning asosiy manbalari hisoblanadi:

xalq deputatlari tuman (shahar) Kengashlari qarorlariga asosan ajratiladigan mahalliy budjetlar qoʻshimcha manbalarining 3 foizi miqdoridagi ajratma;

fuqarolarning oʻzini oʻzi boshqarish organlarining mol-mulkini belgilangan tartibda ijaraga berishdan olingan mablagʻlar;

homiylik mablagʻlari;

qonunchilik hujjatlari bilan taqiqlanmagan boshqa manbalar.

3-bob. Jamgʻarma mablagʻlaridan foydalanish

6. Jamgʻarma mablagʻlaridan tuman (shahar) boʻlimlari tomonidan har yili tasdiqlanadigan daromadlar va xarajatlar smetalariga muvofiq tegishli shaxsiy gʻazna hisobvaragʻi orqali foydalaniladi.

7. Jamgʻarma mablagʻlari quyidagi maqsadlarga yoʻnaltiriladi:

fuqarolarning oʻzini oʻzi boshqarish organlari xodimlarining lavozim maoshlariga har oylik shaxsiy va ragʻbatlantiruvchi ustamalar belgilash va toʻlash;

fuqarolarning oʻzini oʻzi boshqarish organlari xodimlarini mukofotlash;

fuqarolarning oʻzini oʻzi boshqarish organlari xodimlariga moddiy yordam koʻrsatish.

8. Lavozim maoshlariga har oylik ustamalar xodimlar tomonidan xizmat vazifalarini vijdonan va yuksak tashabbuskorlik asosida bajarishni ragʻbatlantirish maqsadida belgilanadi.

9. Xodimlarning lavozim maoshlariga har oylik ustamalar fuqarolarning oʻzini oʻzi boshqarish organlarida uch oydan kam boʻlmagan ish stajiga ega boʻlgan xodimlarga belgilanadi.

10. Jamgʻarmaning joriy yilda foydalanilmagan mablagʻlari (qoldiq mablagʻlar) Oʻzbekiston Respublikasi Davlat budjetiga olib qoʻyilmaydi va ulardan keyingi yilda mazkur Nizomda belgilangan tartibda foydalaniladi.

4-bob. Jamgʻarma mablagʻlari hisobidan xodimlarga shaxsiy va ragʻbatlantiruvchi ustamalar toʻlash, ularni mukofotlash va ijtimoiy himoya qilish

11. Fuqarolarning oʻzini oʻzi boshqarish organlari xodimlarining lavozim maoshlariga har oylik ustamalar mazkur Nizomga ilovadagi sxema asosida belgilanadi.

12. Mukofotlash davriy va bir martalik shaklda amalga oshiriladi.

13. Fuqarolar yigʻinlari raislari har chorak yakuni boʻyicha keyingi oyning 5 sanasiga qadar fuqarolarning oʻzini oʻzi boshqarish organlari xodimlari tomonidan amalga oshirilgan ishlar yuzasidan maʼlumotlarni tuman (shahar) mahalla va nuroniylarni qoʻllab-quvvatlash boʻlimiga taqdim etadi.

(13-band Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

14. Tuman (shahar) mahalla va nuroniylarni qoʻllab-quvvatlash boʻlimi har chorak yakuni boʻyicha keyingi oyning 10-sanasiga qadar fuqarolarning oʻzini oʻzi boshqarish organlari xodimlari tomonidan amalga oshirilgan ishlar yuzasidan taqdim etilgan maʼlumotlarni Vazirlar Mahkamasining “Fuqarolar yigʻinlari faoliyati samaradorligini baholashning reyting tizimini takomillashtirish toʻgʻrisida” 2020-yil 14-avgustdagi 485-son qaroriga muvofiq tahlil qilib, xodimlar faoliyatining samaradorlik darajasini reyting tizimida baholaydi.

(14-band Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

15. Tuman (shahar) mahalla va nuroniylarni qoʻllab-quvvatlash boʻlimi tomonidan reyting baholash natijalariga koʻra “namunali”, “yaxshi”, “qoniqarli” deb topilgan fuqarolarning oʻzini oʻzi boshqarish organlari xodimlariga baholashning reyting tizimi boʻyicha (100,75,50 foizgacha miqdorda) har oylik ustamalar belgilanadi hamda kelgusi chorak davomida qoʻllaniladi.

(15-band Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

16. Fuqarolarning oʻzini oʻzi boshqarish organlari xodimlari faoliyatini baholash natijalari tuman (shahar) mahalla va nuroniylarni qoʻllab-quvvatlash boʻlimi boshligʻining tegishli buyrugʻi bilan tasdiqlanadi hamda natijasi keyingi oyning 15 sanasiga qadar tegishlicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga hamda Mahalla va nuroniylarni qoʻllab-quvvatlash vazirligi hududiy boshqarmalariga, boshqarmalar esa Mahalla va nuroniylarni qoʻllab-quvvatlash vazirligiga taqdim etadi.

(16-band Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

17. Fuqarolarning oʻzini oʻzi boshqarish organlari xodimlari bayram (ishlanmaydigan) kunlari munosabati bilan lavozim maoshining bir baravarigacha miqdorda bir martalik mukofot bilan moddiy ragʻbatlantirilishi mumkin.

18. Har oylik ustamalar, mukofotlar, ijtimoiy muhofaza qilishning aniq miqdorlari va ular tatbiq etiladigan xodimlar mazkur Nizom talablariga muvofiq Jamgʻarma tushumlari hajmidan kelib chiqib, tuman (shahar) boʻlimi boshligʻining buyrugʻi bilan belgilanadi.

5-bob. Jamgʻarma mablagʻlaridan foydalanilish yuzasidan hisobotlar taqdim etish, nazorat va javobgarlik

19. Jamgʻarma mablagʻlarining hisobi va hisoboti qonunchilik hujjatlarida belgilangan tartibda yuritiladi va tuman (shahar) boʻlimi tomonidan tegishli hududiy moliya organlariga taqdim etiladi.

20. Jamgʻarma mablagʻlaridan oqilona va maqsadli foydalanilishini nazorat qilish Mahalla va nuroniylarni qoʻllab-quvvatlash vazirligi va uning hududiy boʻlinmalari rahbarlariga yuklanadi.

(20-band Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

6-bob. Yakunlovchi qoidalar

21. Mazkur Nizom talablari buzilishida aybdor boʻlgan shaxslar qonunchilikka muvofiq javob beradilar.

22. Ushbu Nizomni amalga oshirishda yuzaga keladigan nizolar qonunchilik hujjatlarida belgilangan tartibda hal qilinadi.

Fuqarolarning oʻzini oʻzi boshqarish organlari xodimlarini ragʻbatlantirish jamgʻarmasi toʻgʻrisidagi nizomga
ILOVA

Fuqarolarning oʻzini oʻzi boshqarish organlari xodimlarining lavozim maoshlariga har oylik ustamalar belgilash

SXEMASI

Bosqichlar	Masʼullar	Chora-tadbirlar	Muddatlar

1-bosqich	Fuqarolar yigʻinlari raislari	Har chorak yakuni boʻyicha maʼlumotlarni tuman (shahar) mahalla va nuroniylarni qoʻllab-quvvatlash boʻlimiga taqdim etadi.	Har chorak yakuni boʻyicha keyingi oyning 5-sanasiga qadar

2-bosqich	Tuman (shahar) mahalla va nuroniylarni qoʻllab-quvvatlash boʻlimi	Fuqarolarning oʻzini oʻzi boshqarish organlari xodimlari tomonidan amalga oshirilgan ishlar yuzasidan taqdim etilgan maʼlumotlarni Vazirlar Mahkamasining “Fuqarolar yigʻinlari faoliyati samaradorligini baholashning reyting tizimini takomillashtirish toʻgʻrisida” 2020-yil 14-avgustdagi 485-son qaroriga muvofiq tahlil qilib, xodimlar faoliyatining samaradorlik darajasini reyting tizimida baholaydi.	Har chorak yakuni boʻyicha keyingi oyning 10-sanasiga qadar

3-bosqich	Tuman (shahar) mahalla va nuroniylarni qoʻllab-quvvatlash boʻlimi	Reyting baholash natijalari boʻyicha “namunali”, “yaxshi”, “qoniqarli” deb topilgan fuqarolarning oʻzini oʻzi boshqarish organlari xodimlariga baholashning reyting tizimi boʻyicha (100, 75, 50 foizgacha miqdorda) har oylik ustamalar belgilaydi hamda kelgusi chorak davomida qoʻllaydi.	Kelgusi chorak davomida

4-bosqich	Tuman (shahar) mahalla va nuroniylarni qoʻllab-quvvatlash boʻlimi, Mahalla va nuroniylarni qoʻllab-quvvatlash vazirligi hududiy boshqarmalari	Fuqarolarning oʻzini oʻzi boshqarish organlari xodimlari faoliyatini baholash natijalarini tuman (shahar) mahalla va nuroniylarni qoʻllab-quvvatlash boʻlimi boshligʻining tegishli buyrugʻi bilan tasdiqlaydi hamda natijasini tegishlicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga hamda Mahalla va nuroniylarni qoʻllab-quvvatlash vazirligi hududiy boshqarmalariga, boshqarmalar esa Mahalla va nuroniylarni qoʻllab-quvvatlash vazirligiga taqdim etadi.	Har chorak yakuni boʻyicha keyingi oyning 15-sanasiga qadar

(ilova Oʻzbekiston Respublikasi Vazirlar Mahkamasining 2022-yil 9-avgustdagi 438-sonli qarori tahririda — Qonunchilik maʼlumotlari milliy bazasi, 10.08.2022-y., 09/22/438/0726-son)

(Qonunchilik maʼlumotlari milliy bazasi, 28.12.2021-y., 09/21/779/1208-son; 10.08.2022-y., 09/22/438/0726-son)